ಯೂನೊ ಸ್ ಕೆ ಅಕತಗವ (1892-1927) ಆಧುನಿಕ್ ಜಪಾನ್ ಕಥಾ ಸಾಹಿತ್ಯಾಕ್ ನವಿ ಶೈಲಿ ಆನಿ ಉತ್ರಾಂಚಿಂ ವಳಕ್ ಕರ್ನ್ ದಿಲ್ಲೊ ಮಹಾನ್ ಕಾಣ್ಯೆಗಾರ್. ಪುಣ್, ಲೋಕ್ ಪದ್, ಆನಿ ಐತಿಹಾಸಿಕ್ ಸಂಗ್ತೆಂಕ್ ಆಧುನಿಕ್ ಭಗ್ಣಾಂ ಭರುನ್ ಕಾಣ್ಯೊ ರಚ್ಲಲೊ ತರ್ನಾಟೊ. ಆಪ್ಲ್ಯಾ ಪಂತ್ತಿಸಾವ್ಯಾ ಪ್ರಾಯೆರ್ ಜೀವ್ಘಾತ್ ಕರ್ನ್ ಮೊರ್ತಾನಾ, ಸುಮಾರ್ 105 ಕಾಣ್ಯೊ, ಲೇಖನಾಂ, ಪ್ರಬಂಧ್ ಮ್ಹಣ್ ಎಕುಣ್ 350 ಚ್ಯಾಕೀ ಚಡ್ ಕೃತಿಯೊ ರಚ್ಲಲೊ ಸಾಹಿತಿ. ಹಾಚ್ಯೊ ದೋನ್ ಕಾಣ್ಯೊ ಸಾಂಗಾತಾ ಕರ್ನ್ ‘ರಾಶೊಮಾನ್’ (1959) ಮ್ಹಳ್ಳೆಂ ಇಂಗ್ಲಿಶ್ ಸಿನೆಮಾ ಕೆಲಾಂ.
‘ಜೆಂಚಿ ನೈಗುಚೆಂ ನಾಕ್’ ಮ್ಹಳ್ಯಾರ್ ಪುರೊ, ಕೊಣಾ ವಿಶಿಂ ತುಮಿ ಉಲಯ್ತಾತ್ ಮ್ಹಣ್ ಇಕೊನೊ ಗಾವಾಂತ್ಲ್ಯಾ ಹರ್ಯೆಕ್ಲ್ಯಾಂಕ್ ಕಳಿತ್ ಆಸಾ. ತಾಕಾ ಜೆಂಚಿ ಮ್ಹಳ್ಯಾರ್ ಬುದ್ವಂತ್ ಮ್ಹಳ್ಳೆಂ ಸೊಭಿತ್ ನಾಂವ್ ಆಸಾ. ಕಿಯೋಟ ರಾಯಾಚ್ಯೆ ರಾವ್ಳೆರಾಂತ್ ಉಂಚ್ಲ್ಯಾ ಮಟ್ಟಾರ್ ಆಸ್ಚ್ಯಾ ಧಾ ಭಿಕ್ಕು ಪೈಕಿ ನೈಗು ಸಯ್ತ್ ಎಕ್ಲೊ. ಪೂಣ್ ತೊ ನಾಂವಾಡ್ಲೊಲೊ ತಾಚ್ಯಾ ನಾಕಾ ವರ್ವಿಂ. ತೆಂ ಸಕಯ್ಲ್ಯಾ ವೊಂಟಾಂ ತಿತ್ತುನ್ ಲಾಂಬ್ತಾಲೆಂ ಆನಿ ವಯ್ರ್ ಥಾವ್ನ್ ಸಕ್ಲಾ ಮ್ಹಣಾಸರ್ ತಾಚಿ ಮೊಟಾಯ್ ಏಕಾಚ್ ಥರಾಚಿ. ತುಮ್ಕಾಂ ತೆಂ ಕಸೆಂ ದಿಸ್ತಾ ಮ್ಹಳ್ಳೆಂ ಕಳಾಜಾಯ್ ಜಾಲ್ಯಾರ್, ಏಕಾ ಮನ್ಶ್ಯಾಚ್ಯಾ ನಾಕಾ ಬದ್ಲಾಕ್ ಏಕ್ ಸಾಸೆಜ್ ದವ್ರಿಲ್ಯಾರ್ ಕಸೆಂ ದಿಸ್ತಾ ತೆಂ ಕಲ್ಪನ್ ಕರಿಜಾಯ್.
ಹಾಕಾ ಆತಾಂ ಪನ್ನಾಸಾಚಿ ಪ್ರಾಯ್. ತರ್ನ್ಯಾ ಪ್ರಾಯೆ ಥಾವ್ನ್ ಆಜೂನ್ ಮ್ಹಣಾಸರ್ ವಾಂವ್ಟ್ ಕಾಡ್ನ್, ಏಕೇಕ್ ಚ್ ಪದ್ವಿ ಆಪ್ಣಾವ್ನ್ ಆತಾಂ ರಾವ್ಳೆರಾಂತ್ಲ್ಯಾ ಪದ್ವೆಕ್ ಪಾವ್ತಾನಾ, ತಾಕಾ ಸದಾಂನೀತ್ ಕಶ್ಟಾಯಿಲ್ಲೆಂ ತಾಚ್ಯಾ ನಾಕಾನ್! ಪೂಣ್ ತೊ ಕೆದ್ನಾಂಯ್ ಖಂತ್ ನಾಸ್ಲೆಲ್ಯಾ ಬರಿ ನಾಟಕ್ ಕರ್ತಾಲೊ. ಹ್ಯಾ ಬುದ್ದಿಸ್ಟ್ ಬಿಕ್ಕುನ್ ಆಪುಣ್ ಮರ್ಣಾ ಉಪ್ರಾಂತ್ ದೆವಾಲಾಗಿಂ ಪಾಂವ್ಚ್ಯಾಕ್ ಜಿಯೆತಾಂ ಮ್ಹಣ್ ಸಕ್ಡಾಂಕ್ ದಾಖಂವ್ಚಾ ಸಾಂಗಾತಾ, ಆಪ್ಲ್ಯಾ ನಾಕಾ ವಿಶಿಂ ಆಪ್ಣಾಕ್ ಕಸಲಿಚ್ ಪರ್ವಾ ನಾ ಮ್ಹಣ್ ಸಯ್ತ್ ದಾಖಯ್ಜಾಯ್ ಆಸ್ಲೆಂ. ಕೊಣಿ ತಾಚ್ಯಾ ನಾಕಾ ವಿಶಿಂ ಉಲಯ್ತಾನಾ ತಾಕಾ ಮೊಸ್ತು ಕರ್ಕರೆ ಜಾತಾಲೆ.
ತೆಂ ನಾಕ್ ತಾಕಾ ಕಿತ್ಯಾಕ್ ಏಕ್ ವೊಜೆಂ ಆನಿ ನಾಡ್ತಾ ಮ್ಹಳ್ಳ್ಯಾಕ್ ಕಾರಣಾಂ ಆಸಾತ್. ಏಕ್, ತಾಚಿ ಲಾಂಬಾಯ್. ಹ್ಯಾ ವರ್ವಿಂ ತಾಕಾ ಕಸಲೊಚ್ ಫಾಯ್ದೊ ನಾ. ಖಾಂವ್ಕ್ , ಜೇಂವ್ಕ್ ಕಶ್ಟಾತಾಲೊ. ಬೊಶ್ಯೆಕ್ ನಾಕ್ ಪಯ್ಲೆಂ ಪಾವ್ತಾಲೆಂ. ಜೆವ್ತಾನಾ ತಾಚೆಂ ನಾಕ್ ವಯ್ರ್ ಉಕಲ್ನ್ ಧರುಂಕ್ ಕೊಣೀ ಎಕ್ಲೊ ಭುರ್ಗೊ ಜಾಯ್ ಆಸ್ಲೊ. ಹೆಂ ಕಾಂಯ್ ಸಂತೊಸಾಚೆಂ ಕಾಮ್ ನ್ಹಯ್.
ಏಕ್ ಪಾವ್ಟಿಂ ಸದಾಂ ಯೆಂವ್ಚೊ ಭುರ್ಗೊ ಆಯ್ಲೊ ನಾ. ಬದ್ಲಾಕ್ ಆನ್ಯೆಕ್ಲೊ ಆಯ್ಲೊ. ತಾಣೆಂ ನಾಕ್ ಉಕಲ್ನ್ ಧರ್ಲೆಲ್ಯಾ ವಗ್ತಾ ಏಕಾಚ್ಚಾಣೆ ಶಿಂಕ್ ಕಾಡ್ಲೆಲ್ಯಾನ್ ತೆಂ ಹಾತಾಂತ್ಲೆಂ ನಿಸ್ರೊನ್ ಬೊಶ್ಯೆಂತ್ ಗಳ್ಳೆಂ. ಹಿ ಖಬಾರ್ ಗಾಂವಾಂತ್ ಘಾಜ್ಲಿ. ಪೂಣ್ ನಾಕಾಳೊ ನೈಗುನ್ ತ್ಯಾ ವಿಶಿಂ ಖಂತ್ ಕೆಲಿ ನಾ. ಇಕೊನೊ ಗಾಂವ್ಚೊ ಲೋಕ್ ಲಾಂಬ್ ನಾಕಾಚೊ ತೊ ಭಿಕ್ಕು ಜಾವ್ನಾಸ್ಚೆಂ ಬರಿ, ಸಂತೊಸಾಚಿ ಗಜಾಲ್ ಮ್ಹಳ್ಳೆಬರಿ ಚಲ್ತಾಲೊ. ಅಸ್ಲೆಂ ನಾಕ್ ಆಸ್ಲೆಲ್ಯಾನ್ ಕಾಜಾರ್ ಜಾಂವ್ಕ್ ಕೊಣ್‌ಚ್ ಚಲಿ ದೀನಾಂತ್ ಮ್ಹಣ್ ತಾಂಕಾಂ ಖುಶೆಚಿ ಗಜಾಲ್. ತೊ ಭಿಕ್ಕು ಜಾಂವ್ಕ್ ತೆಂ ನಾಕ್ ಚ್ ಕಾರ್ಣ್ ಮ್ಹಣ್ ಲೋಕ್ ಉಲಯ್ತಾಲೊ.
ಆಪ್ಲಿ ಮರ್ಯಾದ್ ಪಾಟಿಂ ಆಪ್ಣಾಂವ್ಚ್ಯಾ ಖಾತಿರ್ ತಾಚ್ಯಾ ಮತಿಕ್ ಆಯ್ಲೆಲೊ ಉಪಾವ್ ಮ್ಹಳ್ಯಾರ್, ಆತಾಂ ಲಾಂಬ್ ಆಸ್ಚೆಂ ನಾಕ್ ಲ್ಹಾನ್ ದಿಸ್ಚಾ ಬರಿ ಕರಿಜಾಯ್. ಏಕ್ಸುರೊ ಆಸ್ಚ್ಯಾ ವಗ್ತಾ ತೊ ಆರ್ಶ್ಯಾ ಸಾಮ್ಖಾರ್ ಬಸೊನ್, ಖಂಚ್ಯಾ ರಿತಿನ್, ಕಿತ್ಲೊ ಉಜ್ವಾಡ್ ಆಸ್ಲ್ಯಾರ್ ಆಪ್ಲೆಂ ನಾಕ್ ಲ್ಹಾನ್ ದಿಸ್ತಾ ತೆಂ ಪಳೆಂವ್ಕ್ ಪೆಚಾಡ್ಲೊ. ವಿವಿಂಗಡ್ ರಿತಿನ್ ಬಸೊನ್ ಪಳೆಲೆಂ. ಹಾತಾನ್ ಧರ್ನ್, ತಕ್ಲಿ ಬಾಗಾವ್ನ್, ಗಾಲ್ ಘುಂವ್ಡಾವ್ನ್ ಇತ್ಯಾದಿ ಕರ್ನ್ ವರಾಂ ಪಾಶಾರ್ ಕರೀತ್ ಪ್ರೇತನ್ ಕೆಲ್ಯಾರೀ ತಾಕಾ ಖುಶಿ ಜಾಲಿ ನಾ.
ಆಪ್ಲೆಂ ನಾಕ್ ಲ್ಹಾನ್ ದಿಸ್ಚ್ಯಾ ಬರಿ ಕರ್ಚೆಂ ವಿಧಾನ್ ತಾಕಾ ಕಳ್ಳೆಂಚ್ ನಾ, ತಶೆಂ ಪಳೆಲ್ಯಾರ್, ತೊ ತೆಂ ಲ್ಹಾನ್ ಕರ್ಚ್ಯಾಕ್ ವದ್ದಾಡ್ತಾನಾ, ತೆಂ ಅನಿಕೀ ಲಾಂಬ್ ಜಾವ್ನ್ ವೆತಾ ತಸೆಂ ಭಗ್ತಾಲೆಂ. ತೆದ್ನಾಂ ತೊ ನಿರಾಸೆನ್ ಆರ್ಸೊ ಪೆಟೆಂತ್ ದವ್ರುನ್, ನಾ ಖುಶೆನ್ ಧಾರ್ಮಿಕ್ ಬೂಕ್ ಆಸ್ಲೆಲ್ಯಾ ಕಡೆ ಯೇವ್ನ್ ನೀದ್ ಯೆತಾ ಮ್ಹಣಾಸರ್ ವಾಚ್ತಾಲೊ.
ಪಯ್ಲೆಂಚೊ ಉಪಾವ್ ನಿರ್ಫಳ್ ಜಾಲ್ಯಾ ಉಪ್ರಾಂತ್ ತಾಣೆಂ ದುಸ್ರೆಂ ವಿಧಾನ್ ಸೊದ್ಲೆಂ. ಹೆರಾಂಚಿಂ ನಾಕಾಂ ಚೀತ್ ದೀವ್ನ್ ಪಳೆಲಾಗ್ಲೊ. ಇಕೆಸೊ ದಿವ್ಳಾಂತ್ ಸಭಾರ್ ಕಾರ್ಯಿಂ ಚಲ್ತಾಲಿಂ. ಜೆವ್ಣಾ ಸತ್ಕಾರ್, ಧಾರ್ಮಿಕ್ ಪ್ರವಚನ್ ಇತ್ಯಾದಿ. ನಾಂವ್ಚಾಕ್ ಸಯ್ತ್ ವೆವಸ್ತಾ ಅಸೊನ್ ಥಂಯ್ಸರ್ ಹುನ್ ಉದಾಕ್ ಕೆದ್ನಾಂಯ್ ಆಸ್ತಾಲೆಂ. ದಿವ್ಳಾಂತ್ ಆಸ್ಲೆಲ್ಯಾ ಕೂಡಾಂನಿ ರಾಂವ್ಚ್ಯಾಕ್ ಆವ್ಕಾಸ್ ಆಸ್ಲೆಲ್ಯಾನ್, ಸಭಾರ್ ಭೌದ್ದ್ ಭಿಕ್ಕು ಯೇವ್ನ್ ವೆತಾಲೆ. ಆಸೆಂ ಆಯ್ಲೆಲ್ಯಾ ಹರ್ಯೆಕ್ಲ್ಯಾಚೆಂ ನಾಕ್ ತೊ ಭೋವ್ ಸೊಸ್ಣಿಕಾಯೆನ್ ಪಳೆಲಾಗ್ಲೊ. ಆಪ್ಣಾಕ್ ಆಸ್ಲೆಲ್ಯಾ ಬರಿಚ್ ಆನ್ಯೆಕ್ಲ್ಯಾಕ್ ನಾಕ್ ಆಸ್ತೆಲೆಂ ಕೊಣ್ಣಾ ಮ್ಹಣ್ ಚಿಂತುನ್ ಅಶೇನ್ ಪಳೆತಾಲೊ. ಆಯ್ಲೆಲ್ಯಾಂಚೆಂ ನ್ಹೆಸಾನ್ ಜಾಂವ್, ತೊಪಿ ಜಾಂವ್, ಧವಿಂ ಕಿಮೊನೋ(ಜಪಾನಿ ಸ್ತ್ರೀಯಾಂನಿ ನೆಸ್ಚೆಂ ನ್ಹೆಸಾಣ್) ಜಾಂವ್ ತೊ ಪಳೆನಾತ್ಲೊ. ದಿಸ್ಲ್ಯಾರೀ ತಾಕಾ ಕಸಲೊಚ್ ವೆತ್ಯಾಸ್ ದಿಸಾನಾತ್ಲೊ. ಸಕ್ಕಡ್ ಏಕಾಚ್ ಥರಾನ್ ದಿಸ್ತಾಲಿಂ. ತೊ ಹೆರಾಂಚಿ ಕೂಡ್ ಯಾ ವಿಶ್ವೆ ಪಳೆನಾತ್ಲೊ . ಪೂಣ್ ನಾಕ್ ಮಾತ್ರ್ ಲಾಗ್ಸಿಲ್ಯಾನ್ ಪಳೆತಾಲೊ. ಕೊಕ್ಕ್ಯಾ ಬರಿ ಬಾಗ್ವಾಲ್ಲಿಂ ಥೊಡಿಂ ನಾಕಾಂ ದಿಸ್ಲ್ಯಾರೀ, ಖಂಚೀಂಯ್ ಆಪ್ಲ್ಯಾ ನಾಕಾ ಬರಿ ಲಾಂಬ್ ನಾತ್ ಲ್ಲಿಂ. ಆಪ್ಲ್ಯಾ ನಾಕಾ ಬರಿ ಅನ್ಯೆಕ್ ಪಳೆಂವ್ಕ್ ತೊ ಸಲ್ವಲ್ಲ್ಯಾನ್ ತಾಕಾ ಮೊಸ್ತು ದುಖ್ಲೆಂ ಆನಿ ತೊ ನಿರಾಸ್ಲೊ. ಹ್ಯಾಚ್ ನಿರಾಸೆನ್ ತೊ ಥೊಡೆ ಪಾವ್ಟಿಂ ಲೊಕಾಕಡೆ ಉಲಯ್ನಾಸ್ತಾಂ , ಆಪ್ಲೆಂ ನಾಕ್ ಓಡಿತ್ತ್ , ಆಪ್ಲಿ ಪ್ರಾಯ್ ವಿಸ್ರೊನ್, ಭುರ್ಗ್ಯಾಬರಿ ನಕ್ಲಾಂ ಕರ್ತಾಲೊ. ಉಪ್ರಾಂತ್ ಅಪ್ಣಾ ವಿಶಿಂ ಬೆಜಾರ್ ಪಾವ್ತಾಲೊ. ಅಖ್ರೇಕ್ ತಾಣೆಂ ಆಪ್ಣಾಬರಿಚ್ ನಾಕ್ ಆಸ್ಚ್ಯಾ ವೆಕ್ತಿಂ ವಿಶಿಂ ಶಾಸ್ತ್ರ್ ಪುರಾಣಾಂನಿ ವಾಚುನ್ ಸೊದ್ಚೊ ನಿರ್ಧಾರ್ ಕೆಲೊ.
ಪೂಣ್ ಖಂಚಾಯ್ ಬೂಕಾಂನಿ ಲಾಂಬ್ ನಾಕ್ ಆಸ್ಲೆಲ್ಯಾ ವೆಕ್ತಿ ವಿಶಿಂ ಮಾಹೆತ್ ನಾತ್‌ಲ್ಲಿ. ಹರ್ಯೆಕಾ ಬೌದ್ಧ್ ಭಿಕ್ಕುಕ್ ಸಾದ್ಯಾ ಲೊಕಾಕ್ ಆಸ್ಚೆಂಚ್ ನಾಕ್ ಆಸ್‌ಲ್ಲೆಂ. ಚೀನಾಚೆಂ ರಾಯಾಳ್ ಘರಾಣೆಂ ಫು-ಹುನ್. ಹ್ಯಾ ಘರಾಣ್ಯಾಚೊ ಘಡ್ನಾರ್ ಲಿಯು ಘನಡೆ ರಾಯಾಕ್ ಲಾಂಬಾಯೆಚೆ ಕಾನ್ ಆಸ್ಲೆಲೆ ಮ್ಹಣ್ ಕಳ್ತಾನಾ, ಆಪ್ಲ್ಯಾ ಬರಿಚ್ ತಾಚೆಂ ನಾಕ್ ಸಯ್ತ್ ಲಾಂಬ್ ಆಸ್ಲೆಲೆಂ ಜಾಲ್ಯಾರ್ ಆಪ್ಲೆ ಕಶ್ಟ್ ಸಂಕಶ್ಟ್ , ಆಟೆವಿಟೆ ಸಕ್ಕಡ್ ಮುಗ್ದಾತಾತ್ ಮ್ಹಣ್ ತೊ ಆಶೆಲೊ. ಹ್ಯಾ ಅಸಹಾಯಾಕ್ ಸ್ಥಿತೆಂತ್ ತೊ ಆಪ್ಲೆಂ ನಾಕ್ ಲ್ಹಾನ್ ಕರ್ಚ್ಯಾಕ್ ಸಭಾರ್ ಉಪಾವ್ ಸೊಧಿಲಾಗ್ಲೊ. ಕಿತೆಂ ಸಕ್ಕಡ್ ತಾಣೆಂ ಕೆಲೆಂ ನಾ? ಪಡ್ವಳ್ ರಾಂದ್ವಾಯೆಚೊ ರೋಸ್ ಪಿಯೆಲೊ. ಉಂದ್ರಾಚೆಂ ಮೂತ್ ನಾಕಾಕ್ ಸಾರಯ್ಲೆಂ. ಪೂಣ್ ನಾಕ್ ಲ್ಹಾನ್ ಜಾಲೆಂಚ್ ನಾ.
ನೈಗುಕ್ ಕುಮಕ್ ಕರುನ್ ಆಸ್ಲೆಲೊ ಏಕ್ ಶಿಸ್ ಕಿಯೊಟೋಕ್ ಕಾಮಾ ನಿಮ್ತಿಂ ಗೆಲ್ಲೊ. ಥಂಯ್ಸರ್ ವಳ್ಕಿಚ್ಯಾ ಏಕಾ ವ್ಹಯ್ಜಾಲಾಗಿಂ ನಾಕ್ ಲ್ಹಾನ್ ಕರ್ಚಿ ರೀತ್ ಶಿಕ್ಲೊ. ಚೀನಾಚೊ ವಯ್ಜ್ ತೊ ಥಂಯ್ಸರ್ ಭಿಕ್ಕು ಜಾವ್ನಾಸ್ಲೊ. ಹಿ ಖಬಾರ್ ನೈಗುಕ್ ತ್ಯಾ ಶಿಸಾನ್ ಸಾಂಗ್ತಾನಾ ಆಪ್ಣಾಕ್ ಉರ್ಭಾ ನಾ ಮ್ಹಣ್ ನಾಟಕ್ ಕರಿಲಾಗ್ಲೊ. ಸುರ್ವೇಕ್ ಗೂಣ್ ಕರ್ಚ್ಯಾ ರಿತಿಕ್ ಒಪ್ವಾಲೊಚ್ ನಾ. ತ್ಯಾ ಶಿಸಾನ್ ಆಪ್ಣಾ ಖಾತಿರ್ ಕಾಡ್ಚ್ಯಾ ಕಶ್ಟಾಂಕ್ ಲಾಗೊನ್ ಚುರ್ಚುರ್ಲೊ. ಆಸೆಂ ಕೆಲ್ಯಾರ್ ತೊ ಶಿಸ್ ವತ್ತಾಯ್ ಕರ್ತಾ ಮಣ್ ತಾಚಿ ಆಶಾ ಜಾವ್ನಾಸ್ಲಿ. ತಸೆಂಚ್ ಜಾಲೆಂ.
“ಹರ್ಯೆಕಾ ದಿಸಾ ತುಂ ಜೆವ್ತಾನಾ ತುಜೆಂ ನಾಕ್ ಉಕಲ್ಣ್ ಧರ್ಚೆಂ ಏಕ್ ವೊಜೆಂ” ಮ್ಹಣ್ ತಾಣೆಂ ಸಾಂಗ್ತಾನಾ, ನೈಗು ತೆಂಚ್ ಏಕ್ ನೀಬ್ ಧರ್ನ್ ಆಪ್ಲೆಂ ನಾಕ್ ಮಟ್ವೆಂ ಕರ್ಚ್ಯಾಕ್ ಅಖ್ರೇಕ್ ಒಪ್ವಾಲೊ.
ಚಿಕಿಸ್ತಾ ವಿಧಾನ್ ಸುಲಭ್ ಆಸ್ಲೆಂ. ಖತ್ಕತ್ಯಾ ಉದ್ಕಾಂತ್ ನಾಕ್ ಬುಡವ್ನ್ ಉಪ್ರಾಂತ್ ಪಾಯಾನ್ ತಾಕಾ ಧಾಂಬುನ್ ದವ್ರಿಜಾಯ್. ತಸೆಂ ಪಳೆಲ್ಯಾರ್ ಹೆಂ ಸುಲಭಾಯೆಚೆಂ ಕಾಮ್. ಖತ್ಕತೆಂ ಉದಾಕ್ ದಿವ್ಳಾಂತ್ ಕೆದ್ನಾಂಯ್ ಮೆಳ್ತಾಲೆಂ. ಏಕ್ಲ್ಯಾನ್ ಬಾಲ್ದೆಂತ್ ಭರ್ನ್ ಹಾಡ್ಲೆಂಚ್. ತ್ಯಾ ಉದ್ಕಾಂತ್ ನಾಕ್ ಬುಡಯ್ಲ್ಯಾರ್ ಹುಲ್ಪೊನ್ ವ್ಹಚಾತ್ ಮ್ಹಣ್ ತಾಣಿಂ ಏಕ್ ಉಪಾವ್ ಸೊದ್ಲೊ. ಏಕಾ ರೂಕಾಚ್ಯೆ ಪೊಳ್ಯಾಕ್ ಮಧೆಂ ಏಕ್ ಬುರಾಕ್ ಕರ್ನ್ ಬಾಲ್ದೆ ವಯ್ರ್ ತೆಂ ದವ್ರುನ್ ತ್ಯಾ ಬುರಾಕಾಂತ್ಲ್ಯಾನ್ ತಾಚೆಂ ನಾಕ್ ಸಕ್ಲಾ ಬಾಲ್ದೆಂತ್ಲ್ಯಾ ಉದ್ಕಾಂತ್ ಸೊಡ್ಲೆಂ. ನೈಗುನ್ ಚಡ್ ತ್ರಾಸ್ ಜಾಲೆ ನಾಂತ್. “ನಾಕ್ ಬಹುಶ್ಯಾ ಶಿಜ್ಲಾಸ್ತೆಲೆಂ, ಮುಖ್ಲೆಂ ಕಾಮ್ ಕರ್ಯಾಂ” ಮ್ಹಣ್ ಉದಾಕ್ ಹಾಡ್ಲೆಲೊ ಶಿಸ್ ಮ್ಹಣಾಲೊ. ನಾಕ್ ಮೋವ್ ಜಾಲ್ಲ್ಯಾಬರಿ ನೈಗುಕ್ ಭಗ್ಲೆಂ.
ಬುರಾಕಾಂತ್ಲ್ಯಾನ್ ನಾಕ್ ಭಾಯ್ರ್ ಕಾಡ್ನ್ ಸಕ್ಲಾ ಆಸ್ಲೆಲ್ಯಾ ಮಾಂದ್ರೆ ವ್ಹಯ್ರ್ ದವ್ರುನ್ ತ್ಯಾ ಶಿಸಾನ್ ಆಪ್ಲ್ಯಾ ಪಾಯಾನ್ ಧಾಂಬ್ಲೆಂ. “ದುಖ್ತಾವೇ?” ಮ್ಹಣ್ ತಾಣೆಂ ವಿಚಾರ್ಲೆಲ್ಯಾಕ್ ನೈಗುನ್ “ನಾ, ದುಕಾನಾ!” ಮ್ಹಣ್ ಬೊಬಾಟುನ್ ಜಾಪ್ ದಿಲಿ. ಇಲ್ಲ್ಯಾ ವೆಳಾನ್ ನಾಕಾಚೆರ್ ಸಾಸ್ವಾ ಬರಿ ಗುಳೆ ಉದೆಲೆ. “ಚಿಮ್ಟ್ಯಾನ್ ಹುಮ್ಟುನ್ ಕಾಡಿಜಾಯ್” ಮ್ಹಣ್ ಶಿಸ್ ಮ್ಹಣ್ತಾನಾ ನೈಗುನ್ ಹುಂಕ್ ಕರ್ನ್ ವ್ಹಡಾನ್ ಉಸ್ವಾಸ್ ಸೊಡ್ಲೊ. ಶಿಸಾಂನಿ ಕರ್ಚ್ಯಾ ಬರ‍್ಯಾ ಕಾಮಾ ವಿಶಿಂ ತಾಕಾ ಅಭಿಮಾನ್ ಆಸ್ಲೊ. ಪೂಣ್ ಆಪ್ಲ್ಯಾ ನಾಕಾಕ್ ಖೆಳಾಚ್ಯಾ ವಸ್ತು ಬರಿ ತಾಣಿಂ ಕರ್ಚೆಂ ತಾಕಾ ಬರೆಂ ಲಾಗ್ಲೆಂ ನಾ. ಏಕ್ಲ್ಯಾನ್ ಚಿಮ್ಟೊ ವಾಪಾರ್ನ್ ತೆ ಗುಳೆ ಹುಮ್ಟುನ್ ಕಾಡ್ಲೆ. “ಆತಾಂ ಪರ್ತುನ್ ನಾಕಾಕ್ ಉದ್ಕಾಂತ್ ಶಿಜಂವ್ಕ್ ಜಾಯ್” ಮ್ಹಣ್ ಮ್ಹಣಾಲೊ.
ದುಸ್ರ್ಯಾ ಪಾವ್ಟಿಂ ಶಿಜ್ಲ್ಯಾ ಉಪ್ರಾಂತ್ ನಾಕ್ ಇಲ್ಲೆಶೆಂ ಲ್ಹಾನ್ ಜಾಲ್ಲ್ಯಾಬರಿ ಭಗ್ಲೆಂ. ನೈಗುನ್ ತೆಂ ಆಪ್ಲ್ಯಾಹಾತಾನಿ ಪೊಶೆವ್ನ್ ಶಿಸಾನ್ ಹಾಡ್ಲೆಲ್ಯಾ ಆರ್ಸ್ಯಾಂತ್ ಪಳೆಲಾಗ್ಲೊ. ವಾಂಯ್ಗ್ಯಾಬರಿ ಉಮ್ಕಾಳೊನ್ ಆಸ್ಲೆಲೆಂ ನಾಕ್ ಆತಾಂ ಮಟ್ವೆಂ ಜಾಲ್ಲೆಂ. ಆನಿ ಮುಖಾರ್ ಆಪ್ಲೆಂ ನಾಕ್ ಪಳೆವ್ನ್ ಲೋಕ್ ಹಾಸ್ಚೊ ನಾ ಮ್ಹಣ್ ತೊ ಸಂತೊಸ್ಲೊ. ಪೂಣ್ ದುಸ್ರ್ಯಾ ಘಡ್ಯೆ ಆಪ್ಲೆಂ ನಾಕ್ ಪರ್ತುನ್ ಲಾಂಬ್ತೆಲೆಂ ಮ್ಹಣ್ ತೊ ಭಿಯೆಲೊ. ಘಡ್ಯೆ ಘಡ್ಯೆ ನಾಕಾಕ್ ಆಪ್ಡುನ್ ಪಳೆಲಾಗ್ಲೊ. ಲಾಂಬ್ ಜಾಂವ್ಚಿಂ ಲಕ್ಷಣಾಂ ತಾಕಾ ದಿಸ್ಲಿಂ ನಾಂತ್. ರಾತ್ ಜಾಲಿ. ನಿದ್ಲೊಲೊ ತೊ ಸಾಕಾಳಿಂ ಉಟ್ತಚ್ ಪಯ್ಲೆಂ ತಾಣೆಂ ಕೆಲ್ಲೆಂ ಕಾಮ್ ಕಸಲೆಂಗೀ ಮ್ಹಳ್ಯಾರ್ ನಾಕಾಚೆಂ ತಪಾಸಣ್! ಲ್ಹಾನ್ಂಚ್ ಆಸ್ಲೆಲ್ಯಾನ್ ತೊ ಸಂತೊಸಾನ್ ನಾಚ್ಲೊ.
ಆಸೆಂ ಜಾವ್ನ್ ತೀನ್ ದಿಸಾಂ ಉಪ್ರಾಂತ್ ತಾಕಾ ಆಪ್ಲ್ಯಾ ನಾಕಾವಿಶಿಂ ಏಕ್ ನವಿ ಗಜಾಲ್ ಕಳ್ಳಿ. ಆನ್ಯೆಕಾ ಶಹರಾ ಥಾವ್ನ್ ಆಯ್ಲೆಲೊ ಏಕ್ಲೊ ನೈಗುಚೆಂ ನಾಕ್ ಆಜ್ಯಾಪಾಯೆನ್ ಪಳೆಂವ್ಚಾ ಬರಿ ಪಳೇತ್ತ್ ರಾವ್ಲೊ. ತಸೆಂ ತೊ ಪಳೆತ್ ಆಸ್ತಾನಾ , ಹ್ಯಾ ಆದಿಂ ಏಕ್ ಪಾವ್ಟಿಂ ನೈಗು ಜೆವ್ತಾನಾ ತಾಚೆಂ ನಾಕ್ ಉಕಲ್ನ್ ಧರ್ಲೆಲ್ಯಾ ಏಕ್ ಶಿಸಾನ್ ಶಿಂಕ್ ಕಾಡ್ಲೆಲ್ಯಾ ನಾಕ್ ಪೆಜೆಂತ್ ಪಡ್ಲೆಲೆಂ ತೆಂ ಆಮಿ ಜಾಣಾಂವ್. ತೊ ಶಿಸ್ ಥಂಯ್ಸರ್ ಪಾವ್ಲೊ ಆನಿ ಜಾಂವ್ಚೆಂ ಪಳೆವ್ನ್ ಜೊರಾನ್ ಹಾಸ್ಲೊ. ದೋನ್ ಪಾವ್ಟಿಂ ಹಾಸ್ಲೊ. ಭಂವ್ತಿಂ ಆಸ್ಚೆ ಥೊಡೆ ಜಣ್ ಸಯ್ತ್ ಹಾಸ್ಲೆ.
ಕಿತ್ಯಾಕ್ ಹಾಸ್ತಾತ್? ಬಹುಶ್ಯಾ ಆಪ್ಲೆಂ ನಾಕ್ ಬದ್ಲಾಲಾಂ ದೆಖುನ್ ಜಾಂವ್ಕ್ ಪುರೊ ಮ್ಹಣ್ ತೊ ಸಮ್ಜಾಲೊ. ಪೂಣ್ ತಾಕಾ ಸಮಾಧಾನ್ ಜಾಲೆಂ ನಾ. ನಾಕ್ ಲಾಂಬ್ ಆಸ್ತಾನಾ ದಿಲ್ಲೊ ಹಾಸೊ ಆನಿ ಆತಾಂ ದಿಲ್ಲೊ ಹಾಸೊ ವೆವೆಗ್ಳೊ ಆಸ್‌ಲ್ಲೊ. ನಾಕ್ ಮಟ್ವೆಂ ಜಾಲ್ಯಾರೀ ಲೋಕ್ ಹಾಸ್ತಾ ಮ್ಹಳ್ಯಾರ್ ಕಿತೆಂ? ತೊ ಘುಣ್ಗುಣ್ಲೊ. ಲಾಂಬ್ ಆಸ್ತಾನಾಂಚ್ ಜಿಣಿ ಬರಿ ಆಸ್ಲೆಲಿ ಮ್ಹಣ್ ಚಿಂತುನ್ ತೊ ನಿರಾಸ್ಲೊ. ಕಸಲೊಚ್ ಪರಿಹಾರ್ ತಾಕಾ ದಿಸ್ಲೊ ನಾ. ಮುಕ್ಲ್ಯಾ ದಿಸಾಂನಿ ಲೋಕ್ ಹಾಚೆಂ ನಾಕ್ ಪಳೆವ್ನ್ ಹಾಸ್ಚೆಂ ಪಳೆವ್ನ್ ಬಾವ್ಲೊ. ತಾಚಿ ಮತ್ ಪಿಸಾಂತೂರ್ ಜಾಲಿ. ತಾಕಾ ಕಿರ್ಕಿರೆ ಜಾಲೆ. ಗಾಳಿ ದೀಂವ್ನ್ಂಚ್ ಉಲಂವ್ಕ್ ಲಾಗ್ಲೊ. ತಾಚೆಂ ನಾಕ್ ಖತ್ಕತ್ಯಾ ಉದ್ಕಾಂತ್ ಶಿಜವ್ನ್ , ಪಾಯಾನ್ ದಾಂಬೂನ್ ಲ್ಹಾನ್ ಕರುಂಕ್ ಕುಮಕ್ ಕೆಲ್ಲೆ ಶಿಸ್, ” ಬರೆಂ ಉಲಂವ್ಚ್ಯಾ ಬದ್ಲಾಕ್, ಹ್ಯಾ ರಿತಿಂ ಕೆಲ್ಯಾರ್ ತುಕಾ ಶಿಕ್ಶಾ ಜಾತಾ” ಮ್ಹಣ್ ಘುಣ್ಗುಣ್ಲೆ. ನೈಗುಚೊ ರಾಗ್ ತಕ್ಲೆಕ್ ಚಡ್ಲೊ.
ಆಸೆಂ ಜಾಲ್ಲ್ಯಾ ಥೊಡ್ಯಾ ದಿಸಾಂ ಉಪ್ರಾಂತ್ ತಾಚೆ ಥಾವ್ನ್ ಏಕ್ ಚೂಕ್ ಜಾಲಿ. ಏಕ್ ಸುಣೆಂ ಜೊರಾನ್ ಘೊಂಕ್ಚೆಂ ಆಯ್ಕೊನ್ ನೈಗುಕ್ ರಾಗ್ ಆಯ್ಲೊ. ಭಾಯ್ರ್ ಯೇವ್ನ್ ಪಳೆತಾನಾ, ತೊಚ್ಹ್ ಹಾಸ್ಲೊಲೊ ಶಿಸ್ ಏಕ್ ಆಡಾರ್ ಕಾಣ್ಗೆವ್ನ್ ತ್ಯಾ ಸುಣ್ಯಾ ಪಾಟ್ಲ್ಯಾನ್ ಧಾಂವ್ತಾಲೊ. “ಮ್ಹಜ್ಯಾ ನಾಕಾನ್ ತುಕಾ ಮಾರ್ತೊಲೊಂ” ಮ್ಹಣ್ ಬೊಬಾಟ್ತಾಲೊ. ನೈಗುನ್ ತ್ಯಾ ಶಿಸಾಚ್ಯಾ ಹಾತಾಂತ್ಲೆಂ ಆಡಾರ್ ಓಡ್ನ್ ಕಾಡ್ನ್ ಸರ್ಸರಿತ್ತ್ ತ್ಯಾ ಶಿಸಾಕ್ ಮಾರ್ಲೆಂ.ಮಟ್ವೆಂ ಜಾಲ್ಲ್ಯಾ ಆಪ್ಲ್ಯಾ ನಾಕಾಚೆರ್ ತಾಕಾ ತಿರಸ್ಕಾರ್ ಉದೆಲೊ.
ಏಕಾ ರಾತಿಂ ಏಕ್ ವಿಚಿತ್ರ್ ಘಡ್ಲೆಂ. ಏಕಾಚ್ಹಾಣೆ ವಾರೆಂ ಜೊರಾನ್ ಆಯ್ಲೆಲ್ಯಾನ್ ದಿವ್ಳಾಂತ್ಲ್ಯೊ ಘಾಂಟಿ ಆವಾಜ್ಲ್ಯೊ. ನಿದ್ಲೆಲೆ ಸಕ್ಕಡ್ ಮಾಂದ್ರೆರ್ ಲೊಳ್ಲೆ, ತೆಂ ವಾರೆಂ ಮೊಸ್ತು ಥಂಡಾಯೆಚೆ ಜಾವ್ನಾಸ್ಲೆಂ. ನೈಗುಕ್ ನೀದ್ ಆಯ್ಲಿ ನಾ. ಕಾಳೊಕಾಕ್ ಪಳೆವ್ನ್ ಆಸ್ತಾನಾಂಚ್ ತಾಚೆಂ ನಾಕ್ ಮೋವ್ ಜಾಲ್ಲ್ಯಾ ಬರಿ ತಾಕಾ ಭಗ್ಲೆಂ. ಆಪ್ಡುನ್ ಪಳೆತಾನಾ ತೆಂ ಸುಜ್ಲೆಲ್ಯಾ ಬರಿ ತಾಕಾ ಭಗ್ಲೆಂ. ತಾಪ್ ಆಯ್ಲೊ ಮ್ಹಣ್ ತಾಕಾ ಅನುಭವ್ ಜಾಲೊ. “ಹಾಕಾ ಲ್ಹಾನ್ ಕರ್ಚಾಕ್ ಹಾಂವೆ ಕಿತೆಂ ಪೂರಾ ಕೆಲೆಂ ನಾ? ಆತಾಂ ಹಿ ಕಸಲಿ ಪಿಡಾಗಾಯ್? ” ಮ್ಹಣ್ ತೊ ಘುಣ್ಗುಣ್ಲೊ.
ಸಾಕಾಳಿಂ ಭಾಯ್ರ್ ಯೇವ್ನ್ ಪಳೆತಾನಾ ರಾತಿಂ ಆಯ್ಲೆಲ್ಯಾ ವಾರ‍್ಯಾನ್ ರೂಕಾಚೆ ಖೊಲೆ ಪೂರಾ ಸಕ್ಲಾ ಜಡಾಯಿಲ್ಲೆ. ಥಂಡ್ ವಾರೆಂ ತಾಣೆಂ ನಾಕಾಂತ್ಲ್ಯಾನ್ ಭಿತರ್ ಘೆತ್ಲೆಂ. ತ್ಯಾಚ್ ವಗ್ತಾ ತೊ ನವ್ಯಾಚ್ ಭಗ್ಣಾಂನಿ ಭರ್ಲೊ. ತಾಣೆಂ ತಾಚೆಂ ನಾಕ್ ಧರ್ಲೆಂ. ತೆಂ ಆದ್ಲ್ಯಾ ರಾತಿಂ ಆಸ್ಲೆಲೆಂ ಮಟ್ವೆಂ ನಾಕ್ ನ್ಹಯ್, ಪಯ್ಲೆಂ ಆಸ್ಲೆಲೆಂ ಲಾಂಬ್ ನಾಕ್! ಏಕಾಚ್ ರಾತಿಂ ಮಟ್ವೆಂ ನಾಕ್ ಲಾಂಬ್ ಜಾಲ್ಲೆಂ. ಲಾಂಬ್ ನಾಕ್ ಮಟ್ವೆಂ ಜಾಲ್ಲ್ಯಾ ವಗ್ತಾ ಭಗ್ಲೆಲೊ ಸಂತೊಸ್ ತಾಕಾ ಆತಾಂಯ್ ಭಗ್ಲೊ. ಆಪ್ಲೆಂ ಖರೆಂ ನಾಕ್ ಪಾಟಿಂ ಮೆಳ್ಳೆಂ ಮ್ಹಣ್ ತೊ ಸಂತಸ್ಲೊ.
“ಆನಿ ಮುಖಾರ್ ಕೊಣ್ಂಚ್ ಮ್ಹಜೆಂ ನಾಕ್ ಪಳೆವ್ನ್ ಹಾಸಾನಾಂತ್” ಮ್ಹಣ್ ಆಪ್ಣಾಕ್‌ಚ್ ಸಾಂಗೊನ್ ತೊ ಸಾಕಾಳಿಂಚ್ಯಾ ಥಂಡ್ ವಾರ‍್ಯಾಕ್ ಆಪ್ಲೆಂ ನಾಕ್ ಪಾಳ್ಣ್ಯಾಬರಿ ತಾಣೆಂ ಹಾಲಂವ್ಕ್ ಸೊಡ್ಲೆಂ.
■ ತರ್ಜುಮೊ: ಉಬ್ಬ, ಮೂಡ್ ಬಿದ್ರಿ
2 comments
ನೈಗುಚಾ ಲಾಂಬ್ ನಾಕಾಚಿ ಕಾಣಿ ವಾಚ್ತಾನಾ, ರಶ್ಯನ್ ಲೇಖಕ್ ನಿಕೊಲಾಯ್ ಗೊಗೊಲಾಚಿ The Nose ಕಾಣಿ ಉಡಾಸ್ ಆಯ್ಲಿ.
ತರ್ಜಣ್ ಕರ್ಚಿ ಸೊಸ್ಣಿಕಾಯ್ ಆಸ್ಲ್ಯಾರ್, ಅನ್ಯ್ ಭಾಶೆನಿ ಜಾಯಿತ್ತ್ಯೊ ರುಚಿಕ್ ಕಾಣಿಯೊ ಆಸಾತ್. ಹಿ ಕಾಣಿ ಕೊಂಕ್ಣೆಕ್ ತರ್ಜಣ್ ಕೆಲ್ಲ್ಯಾ ಉಬ್ಬ ಮೂಡ್‌ಬಿದ್ರಿಕ್ ಶಹಬ್ಬಾಸ್ ಮ್ಹಣ್ತಾಂ!