ಇವಾನ್ ಅಲೆಕ್ಸಿವಿಚ್ ಬುನಿನ್, ರಶ್ಯಾ ದೇಶಾಚೊ ನಾಂವಾಡ್ದೀಕ್ ಬರವ್ಪಿ. ಆಪ್ಲ್ಯಾ ದೇಶಾಕ್ ನೊಬೆಲ್ ಪುರಸ್ಕಾರ್ ಆಪ್ಣಾಯಿಲ್ಲೊ ಪಯ್ಲೊ ಸಾಹಿತಿ. ಕವಿತಾ ಬರಂವ್ಕ್ ಸುರು ಕರುನ್ ಉಪ್ರಾಂತ್ ಕಾಣ್ಯೆ ದ್ವಾರಿಂ ನಾಂವ್ ಆಪ್ಣಾಯ್ತಾ. ಮೋಗ್ ಆನಿ ಮರಣ್ ಹಾಚ್ಯಾ ಕಾಣಿಯಾನಿ ಉಟೊನ್ ದಿಸ್ತಾ. ರಶಿಯಾಚೊ ಅಖ್ರೇಚೊ ಕ್ಲಾಸಿಕಲ್ ಸಾಹಿತಿ ಮ್ಹಣ್ ಹಾಕಾ ಆಪಯ್ತಾತ್. ಹಾಚ್ಯಾ ಬರ್ಪಾಂನಿ ಅಲಂಕೃತ್ ಭಾಸ್ ನಾ. “ಕಾಣ್ಯೆಂತ್ ನೀಜ್ ಆವಾಜ್ ಆಸಾಜಾಯ್ ” ಮ್ಹಣ್ ತೊ ಮ್ಹಣ್ತಾ. ‘ ದ ವಿಲೆಜ್’, ‘ಸುಖ್ದೋಲ್’, ‘ದ ಕಪ್ ಆಫ್ ಲೈಫ್’ ತಾಚ್ಯೊ ನಾಂವಾಡ್ಲೆಲ್ಯೊ ಕಾಣ್ಯೊ.
ಮಾಸ್ಕೊ ಶಹರ್. ಶಹರಾಚ್ಯೆ ಭಾಯ್ರ್ ರಾನಾ ಮಧೆಂ ಥೊಡಿಂ ಹಳ್ಳೆಚಿಂ ಘರಾಂ. ಥೈಂಸರ್ ಚಡ್ ಗೂಂಡ್ ನಾತ್ಲೆಲೆಂ ಏಕ್ ತಳೆಂ. ತಾಚ್ಯೆ ಭಂವ್ತಿಂ ನಾಂವ್ಚಿಂ ಗುಡ್ಸುಲಾಂ.
ಗುಡ್ಸುಲಾಂ ಪೈಕಿ ಚಡ್ ಮಾರ್ಗಾಯೆಚೆಂ ಏಕ್ ತಳ್ಯಾಲಾಗಿಂ ಆಸ್ಲೆಂ. ವ್ಹಡ್ ಸೊಫೊ. ಭಂವ್ತಿಂ ಪೈನ್ ರೂಕ್ ಆನಿ ಥೈಂ ಹಾಂಗಾ ಥೊಡಿಂ ಫುಲಾಂಚಿಂ ಝಡಾಂ.
ತ್ಯಾ ಘರ್ಚಾ ಯೆಜ್ಮಾನಿನ್ ಸೊಭಿತ್, ಮಟ್ವೊ ಗಾಗ್ರೊ ಘಾಲ್ಲೊ. ತೀಸ್ ವರ್ಸಾಂಚಿ ತಿ ದೊಳೆ ಭರ್ನ್ ಪಳೆಂವ್ಚಾ ತಿತ್ಲಿ ಸುಂದರಿ. ಗಿಮಾಳೆ ದೀಸ್ ಸುಖಾನ್ ಆನಿ ಸಂತೊಸಾನ್ ತಿ ಜಿಯೆತಾಲಿ. ಘೊವ್ ಸಾಕಾಳಿಂ ನವ್ ವರಾರ್ ಘರಾ ಥಾವ್ನ್ ಮಾಸ್ಕೊಂತ್ ಆಸ್ಚ್ಯಾ ಧಪ್ತರಾಕ್ ಗೆಲ್ಯಾರ್, ಪಾಟಿಂ ಸಾಂಜೆರ್ ಸ ವರಾಂಕ್ ಪಾಟಿಂ ಯೆತಾಲೊ. ತೆದ್ನಾಂ ತೊ ಮೊಸ್ತು ಥಕೊನ್ ಆನಿ ಭುಕೆನ್ ಆಸ್ತಾಲೊ. ಆಯಿಲ್ಲೊಚ್ ಜೆವ್ಣಾ ಪಯ್ಲೆಂ ದಿಸಾಕ್ ಹುನ್ ಜಾವ್ನ್ ಆಸ್ಚ್ಯಾ ನಾಣ್ಯೆಕ್ ವಚುನ್, ನಾಗ್ಡೊಚ್ ನಾವ್ನ್ ಆಪ್ಲಿ ಪುರಾಸಣ್ ಉಣಿ ಕರ್ತಾಲೊ. ತಾಚ್ಯಾ ಘಟ್ ಮೂಟ್ ಆಸ್ಚ್ಯಾ ಕೂಡಿ ಥಾವ್ನ್ ಭಲಾಯ್ಕೆಭರಿತ್ ಘಾಮ್ ದೆಂವ್ತಾಲೊ.
ಜೂನ್ ಮಹಿನ್ಯಾಚೊ ಅಖ್ರೇಚೊ ದೀಸ್. ಸಾಂಜ್. ಟೆರೆಸಾರ್ ಸಾಮವಾ ಟೀ ಕರ್ಚಿ ಕೆಟಲ್ ಅನಿಕೀ ತಸಿಚ್ ಆಸ್ಲ್ಲಿ. ಘರ್ಚಿ ಯೆಜ್ಮಾನ್ ಜ್ಯಾಮ್ ಕರ್ಚಾಕ್ ಬೆರಿ ಫಳಾಂ ತಯಾರ್ ಕರ್ತಾಲಿ. ಥೊಡ್ಯಾ ದಿಸಾಂಕ್ ಸಯ್ರೊ ಜಾವ್ನ್ ರಾವೊಂಕ್ ಆಯ್ಲೆಲೊ ಘೊವಾಚೊ ಈಸ್ಟ್ ಸಿಗ್ರೆಟ್ ವೊಡಿತ್ತ್, ಸೊಭಿತ್, ಭಾರೀಕ್ ಆಸ್ಚೆ ತಿಚೆ ಬಾವ್ಳೆ ಪಳೆವ್ನ್ ಮ್ಹಣಾಲೊ:
“ಮೊದೊರ್ನೆ, ತುಜ್ಯಾ ಬಾವ್ಳ್ಯಾಂಕ್ ಹಾಂವೆ ಉಮೊ ದಿವ್ಯೆತ್ವೇ? ಭೆಶ್ಟೆಂಚ್ ಆಸೆಂ ಬಸೊನ್ ಪಳೆಂವ್ಕ್ ತ್ರಾಸ್ ಜಾತಾತ್.”
“ಆಯ್ಯೋ, ಮ್ಹಜ್ಯಾ ಹಾತಾಂಕ್ ಪೂರಾ ಜ್ಯೂಸಾಚೊ ರೋಸ್ ಲಾಗ್ಲಾ” ಮ್ಹಣೊನ್ ತಿಣೆಂ ಏಕ್ ಬಾವ್ಳೊ ಉಕಲ್ಲೊ.
ದಾದ್ಲ್ಯಾನ್ ತ್ಯಾ ಬಾವ್ಳ್ಯಾಕ್ ಏಕ್ ಉಮೊ ದೀವ್ನ್ ಕಾಲುಬುಲೊ ಜಾಲ್ಲ್ಯಾಬರಿ ಉಲಯ್ಲೊ:
“ಮೊದೊರ್ನೆ…”
“ಕಿತೆಂ ಪೊದೊರ್ನೆ?”
“ತುಕಾ ತಿ ಕಾಣಿ ಗೊತ್ತಾಸಾಮೂ. ತಿಚ್ಚ್, ದಾದ್ಲ್ಯಾಚೆಂ ಕಾಳಿಜ್ ತಾಚೆ ಹಾತ್ ಸೊಡ್ನ್ ವೆಚಿ ಕಾಣಿ. ಉಪ್ರಾಂತ್ ತಾಣೆಂ ಮತಿಂತ್ಚ್ ‘ಗುಡ್ ಬೈ’’ ಮ್ಹಣ್ ಸಾಂಗ್ಚಿ ಕಾಣಿ.”
“ಕಸಲೊ ಮತ್ಲಬ್ ತೊ? ತಾಚೆಂ ಕಾಳಿಜ್ ಹಾತ್ ಸೊಡ್ನ್ ವೆಚೆಂ ಮ್ಹಳ್ಯಾರ್?”
“ತಿಂ ಉತ್ರಾಂ ಸೌದಿ ಮ್ಹಳ್ಳ್ಯಾ ಪರ್ಶಿಯನ್ ಕವಿಚಿಂ ಮೊದೊರ್ನೇ.’
“ತೆಂ ಹಾಂವ್ ಜಾಣಾಂ. ಪೂಣ್ ತಾಚೆಂ ಕಾಳಿಜ್ ಹಾತ್ ಸೊಡ್ನ್ ವೆಚೆಂ ಮ್ಹಳ್ಯಾರ್ ಕಿತೆಂ?”
“ತಸೆಂ ಮ್ಹಳ್ಯಾರ್, ಏಕ್ ದಾದ್ಲೊ ಮೊಗಾರ್ ಪಡ್ಲಾ ಮ್ಹಣ್. ಹಾಂವ್ ತುಜೆರ್ ಪಡ್ಲಾಂ ಪಳೆ, ತಸೆಂ.”
“ತಸೆಂ ಜಾಲ್ಯಾರ್ ತುಂವೆ ಮತಿಂತ್ ಚ್ ’ಗುಡ್ ಬೈ’ ಮ್ಹಳೆಂಯ್, ತಸೆಂ…”
“ವ್ಹಯ್ ಮೊದೊರ್ನೆ, ಹಾಂವ್….”
ತಿ ಆಪುಣ್ ಕರುನ್ ಆಸ್ಚೆಂ ಕಾಮ್ ಕರೀತ್ತ್ ಇಲ್ಲಿಶಿ ಚಂಚಲ್ ಜಾವ್ನ್ ತರೀ ಹಾಸೊನ್ ಮ್ಹಣಾಲಿ:
ತ್ಯಾ ಖಾತಿರ್ ಹಾಂವ್ ತುಕಾ ಆಭಾರಿ.”
“ಹಾಂವ್ ತಮಾಸೊ ಕರಿನಾ.”
“ತಸೆಂ ತರ್, ಭಲಾಯ್ಕೆಕ್ ಬರೆಂ.”
“ತಿ ಭಲಾಯ್ಕಿ ನ್ಹಯ್ ಮೊದೊರ್ನೆ, ಮಾರೆಕಾರ್ ಪಿಡಾ.”
“ತುಂ ಏಕ್ ದುಬ್ಳಿ ಪಾಪಾಚಿ ಮನ್ಜಾತ್. ತಿ ಪಿಡಾ ವೆಗ್ಗಿಂ ಯೆಂವ್ಚಾ ಬರಿ ಕರ್. ಆಯ್ಲ್ಯಾರ್ ತಿಕಾ ಮೊಸ್ತು ದೀಸ್ ದವ್ರುಂಕ್ ಪಳೆ. ಕರ್ತಾಯ್ಮೂ?”
“ತಿ ಪಿಡಾ ಮ್ಹಾಕಾ ಆಸಾ ಮೊದೊರ್ನೆ. ಕೆದಾಳಾ ಥಾವ್ನ್ ಮ್ಹಣ್ ತುಕಾ ಸಾಂಗು? ಹಾಂವ್ ಆನಿ ತುಂ ಆಮ್ಕಾಂಚ್ ಕಳಿತ್ ನಾತ್ಲೆಲ್ಯಾ ಬರಿ ಅವ್ಚಿತ್, ‘ಸವೆಲ್ಯೇಫ್’ ಚೊ ಪೊದೊರ್ನ್ ಆನಿ ಮೊದೊರ್ನ್ ಜಾಲ್ಲ್ಯಾ ದಿಸಾ ಥಾವ್ನ್, ತುಕಾ ಆನಿ ಮ್ಹಾಕಾ ಆಪವ್ನ್ ಪೊದೊರ್ನ್ – ಮೊದೊರ್ನ್ ತಾಂಕಾಂ ಕಿತೆಂ ಪಿಶೆಂ ಲಾಗ್ಲ್ಲೆಂ ತೆಂ ಹಾಂವ್ ನೆಣಾಂ. ತ್ಯಾ ದಿಸಾ ಅಬ್ಬಾ ಕಸಲೆಂ ಥಂಡ್ ವಾರೆಂ ಆಸ್ಲ್ಲೆಂ. ಸಾಂಗಾತಾ ಭರಪ್. ತುಂ ಧಾಂವೊನ್ ಆಯ್ಲೆಲ್ಯಾನ್ ವಾರ್ಯಾ ಸಾಗಾತಾ ಆಯ್ಲೆಲ್ಯಾ ಬರ್ಪಾ ವರ್ವಿಂ ತುಜೆಂ ಆಂಗ್ ಸಗ್ಳೆಂ ಧವೆಂ ಜಾಲ್ಲೆಂ. ಉಪ್ರಾಂತ್ ಹಾಂವೆ ತುಜೊ ಓವರ್ ಕೋಟ್ ಕಾಡ್ ಲ್ಲೊ. ಇಲ್ಲೆಶೆಂ ಉಗ್ತೆಂ ಜಾಲ್ಲೆಂ ತುಜೆಂ ಹರ್ದೆಂ, ತುಂವೆ ಘಾಲ್ಲೆಂ ಧವೆಂ ರೇಸ್ಮಾಳೆಂ ವಸ್ತುರ್ ಆನಿ ತುಂ ಧಾಂವೊನ್ ಭುರ್ಗ್ಯಾಕ್ ದೊನೀ ಹಾತಾನಿ ಉಕಲ್ನ್, ಬಾತ್ ಟಬ್ಬಾ ಲಾಗ್ಸಾರ್ ಕಾಲುಬುಲೊ ಜಾಲ್ಲ್ಯಾಬರಿ ಹಾಸೊ ದೀವ್ನ್, ಮ್ಹಾಕಾಚ್ ಪಳೆವ್ನ್ ರಾವ್ಲೆಲಿ ತಿ ಘಡಿ….ಆಮ್ಚ್ಯಾ ಮಧೆಂ ಕಸಲೊಗೀ ಘುಟ್, ಕಸಲೆಂಗೀ ಪಾತಾಕ್ ಆಸ್ಲೆಲ್ಯಾಬರಿ ಏಕಾಮೆಕಾ ಥೈಂ ಸಂಬಂಧ್ ಜಲ್ಮಾಲ್ಲೊ. ಉಪ್ರಾಂತ್ ತ್ಯಾಚ್ ಖಾತಿರ್ ಆಮಿ ಮೊಸ್ತು ಉಚಾಂಬಳ್ ಜಾಲ್ಲ್ಯಾಂವ್….”
“ತುಂ ತುಜ್ಯಾ ಇತ್ಲ್ಯಾಕ್ಚ್ ಉಲವ್ನ್ ಆಸಾಯ್”
“ಉಪ್ರಾಂತ್ ದನ್ಪರಾಂ ಜೆವ್ಣಾ ವೆಳಾರ್ ಆಮಿ ದೊಗಾಂಯ್ ಲಾಗಿಂ ಲಾಗಿಂಚ್ ಬಸ್ಲ್ಯಾಂವ್. ತೆದ್ನಾಂ ಬರೊಚ್ ಫರ್ಮಳ್ ಆಯಿಲ್ಲೊ. ಬಹುಶ್ಯಾ ಮೆಜಾ ವಯ್ರ್ ದವ್ರಿಲ್ಲ್ಯಾ ಫುಲಾಂಚೊಗೀ ಯಾ ತುಜ್ಯಾ ಕೂಡಿಚೊಗೀ ಮ್ಹಣ್ ಮ್ಹಾಕಾ ಗೊತ್ತುನಾ.”
ತಿಣೆಂ ತಾಕಾ ಎಕ್ಪಾವ್ಟಿಂ ದೊಳೆ ಉಗವ್ನ್ ಪಳೆಲೆಂ.
ವ್ಹಯ್, ತೊ ದೀಸ್ ಮ್ಹಾಕಾ ಬರೊಚ್ ಉಡಾಸ್ ಅಸಾ. ಸಗ್ಳಿ ರಾತ್ ಮಾಸ್ಕೊಂತ್ ರಾಂವ್ಚಾಕ್ ದಾಕ್ಷೆಣ್ ಜಾತಾ ಮ್ಹಣ್ ನಿಕಾಲಾಯೆವಿಚಾನ್ ಮ್ಹಳ್ಳೆಂ. ಏಕಾ ಬರ್ಯಾ ವ್ಹಯ್ಜಾಕ್ ತಾಣೆಂ ತುಕಾ ದಾಖಯ್ಜಾಯ್ ಆಸ್ಲೆಂ.”
“ತೊ ಕಿತ್ಯಾಕ್ ರಾತಿಂ ಮಾಸ್ಕೊಂತ್ ರಾವ್ತಾ?”
“ಆಜ್ ಏಕ್ ಮಿಟಿಂಗ್ ಆಸಾ. ಮಿಟಿಂಗಾಕ್ ಯೆಂವ್ಚೆಂ ಥೊಡೆ ವಿದೇಶಾಕ್ ವೆತಾತ್ ಖೈಂ.”
“ಜಾಲ್ಯಾರೀ, ಮಧ್ಯಾನೆ ರಾತಿಂ ಪಾಟಿಂ ಯೆವ್ಯೆತೆಂ”
“ಮಿಟಿಂಗ್ ಮುಗ್ದಾಲ್ಲ್ಯಾ ಉಪ್ರಾಂತ್ ಮಾರಿಟೇನಿಯಾಂತ್ ಗುಡ್ ಬೈ ಮ್ಹಣ್ ಪಿಟ್ಕ್ ಪಾರ್ಟಿ.”
ಜೆವ್ಣಾ ವೆಳಾರ್ ತೊ ಇಲ್ಲೊಸೊ ಬಾವ್ಲೆಲ್ಯಾಬರಿ ಆಸೊನ್ ಗಂಭೀರ್ ಜಾಲ್ಲೊ. ಪೂಣ್ ಅಜಾಪ್ ಮ್ಹಳ್ಳೆಬರಿ ತಮಾಸೊ ಕರಿಲಾಗ್ಲೊ:
“ತಸೆಂ ಪಿಯೆವ್ನ್ ಆಮಾಲ್ ಜಾಯ್ಜಯ್ ಜಾಲ್ಯಾರ್ ಹಾಂವೆ ಸಯ್ತ್ ಮಾರಿಟೇನಿಯಾಕ್ ವಚಾಜಾಯ್ ಪಡ್ತೆಲೆಂ.”
ತಿಣೆಂ ತಾಚೆರ್ ಏಕ್ ಲಾಂಬ್ ನಜರ್ ಘಾಲ್ನ್ ಮ್ಹಳೆಂ:
“ಹ್ಯಾ ಖಾಲಿ ಘರಾಂತ್ ಮ್ಹಾಕಾ ಎಕ್ಸುರಿ ರಾಂವ್ಚಾಕ್ ಸೊಡ್…. ತಸೆಂಚ್ ತುಂವೆ ತ್ಯಾ ಮೆಜಾ ವಯ್ಲ್ಯಾ ಫುಲಾಂಕ್ ಉಡಾಸ್ ಕರಿಜಾಯ್!”
ಉಪ್ರಾಂತ್ ತಿ ಗೂಂಡ್ ಚಿಂತ್ಪಾನಿ ಆಸಾಂ ಮ್ಹಳ್ಳೆಬರಿ ಮೆಜಾ ವಯ್ರ್ ದವರ್ಲೆಲ್ಯಾ ತಾಚ್ಯಾ ಹಾತಾಚೆರ್ ಆಪ್ಲೊ ಹಾತ್ ದವರ್ಲೊ.
