ಫೆಭ್ರೆರ್ ಮಯ್ನ್ಯಾಚ್ಯಾ ಆರ್ಸೊ ಪತ್ರಾರ್ ಫಾಯ್ಸ್ ಜಾಲ್ಲೆಂ ಸಂಪಾದಕೀಯ್ ಲೇಖನ್ ಹಾಂಗಾಸರ್ ದಿಲಾಂ. ‘ವಿಚಾರ್ – ಸಾಹಿತ್ಯ್ – ವಿಜ್ಞಾನ್’ ; ಧ್ಯೇಯಾಖಾಲ್ ಫಾಯ್ಸ್ ಜಾಂವ್ಚೆಂ ‘ಆರ್ಸೊ’ ಪತ್ರ್ ತಯಾರ್ ಕರುಂಕ್ ಆನಿ ತಪ್ಪಾಲಾರ್ ಧಾಡುಂಕ್ ಆಮ್ಕಾಂ ಖರ್ಚ್ ಆಸಾ.
ಗುಣಾಮೊಲಾಂತ್ ಕಸಲಿಚ್ ಸೊಡ್‌ದೊಡ್ ಕರಿನಾಸ್ತಾನಾ ಆರ್ಸೊ ಪತ್ರಾಚಿಂ ಬರ್ಪಾಂ ಆಮಿ ತಯಾರ್ ಕರ್ತಾಂವ್. ಆರ್ಸೊ ಪತ್ರಾಚ್ಯಾ ವರ್ಗಣ್ದಾರಾಂಕ್ – ಭಾರತಾ ಭಿತರ್ ತಪ್ಪಾಲಾರ್ ಪತ್ರ್ ಧಾಡುನ್ ದಿತಾಂವ್ ತರ್, ವಿದೇಶಾಂತ್ ಆಸ್ಲ್ಯಾರ್ ವೆಬ್ ಪ್ರತಿ, ‘ದಯಾಕರುನ್ ಹೆರಾಂಸಂಗಿ ವಾಂಟುನ್ ಘೆನಾಕಾತ್’ ಮ್ಹಳ್ಳ್ಯಾ ವಿನವ್ಣೆಖಾಲ್ ಧಾಡುನ್ ದಿತಾಂವ್. ತರೀ ಆಜ್‌ಕಾಲ್ ಥೊಡೆ ವಾಟ್ಸಪ್ ಪಂಗ್ಡಾಂನಿ ವೆಬ್ ಪ್ರತಿ ಫೊರ್ವರ್ಡ್ ಕರ್ತಾತ್, ಫುಂಕ್ಯಾಕ್ ವಾಂಟ್ತಾತ್. ಆಮಿ ಬರ‍್ಯಾ ಮನಾನ್ ಧಾಡುನ್ ದಿಲ್ಲಿ ‘ಆರ್ಸೊ’ ಪತ್ರಾಚಿ ವೆಬ್ ಪ್ರತಿ ಅಶೆಂ ಫುಂಕ್ಯಾಕ್ ವಾಂಟುನ್ ದಯಾಕರುನ್ ಆಮ್ಕಾಂ ದುಕಯ್ನಾಕಾತ್.
ತುಮಿ ಅಶೆಂ ಫುಂಕ್ಯಾಕ್ ಪೊರ್ವರ್ಡ್ ಕೆಲ್ಲೆಂಚ್ ಸಂಪಾದಕಾಕ್ / ಮ್ಹಾಕಾ ಫೊನಾಂ ಯೆತಾತ್. “ಸಂಪಾದಕೀಯಾಚೆಂ / ಫಲಾಣ್ಯಾ ಬರ್ಪಾಚೆಂ ಪಿಡಿಎಫ್ ಧಾಡಾ!” ಹೆಂ ಸಾರ್ಕೆಂ ನಯ್. ವರ್ಗಣ್ದಾರ್ ನಯ್ ಆಸ್ಲೆಲ್ಯಾಂಕ್ ಆರ್ಸೊ ಪತ್ರಾಚಿ ವೆಬ್ ಆವೃತ್ತಿ ವಾಟ್ಸಪಾಚೆರ್ ಪೊರ್ವರ್ಡ್ ಕರ್ಚೆಂ ದಯಾಕರುನ್ ರಾವಯಾ. ವಾಚುಂಕ್ ಆಸಕ್ತ್ ಅಸ್ಲೆಲ್ಯಾಂಕ್ ವರ್ಗಣ್ದಾರ್ ಜಾಂವ್ಕ್ ಸಾಂಗಾ. ಆರ್ಸೊ ಪತ್ರ್ ತಯಾರ್ ಕರುಂಕ್ ಆಮಿ ಕಾಡ್ಚ್ಯಾ ವಾಂವ್ಟಿಕ್ ವರ್ಸಾಕ್ ರು.500/- ವ್ಹಡ್ಲಿ ಆಯ್ವಜ್ ನಯ್.
ವರ್ಸಾಕ್ ರು.500/- ಪಾವಿತ್ ಕರುನ್ ವರ್ಗಣ್ದಾರ್ ಜಾಲ್ಲ್ಯಾಂಕ್ ಭಾರತಾಂತ್ ತಾಂಚ್ಯಾ ಘರಾ ಪ್ರಿಂಟ್ ಆವೃತ್ತಿ ಧಾಡುನ್ ದಿಂವ್ಚೆ ಸಾಂಗಾತಾಚ್ ವಿದೇಶಾಂತ್ ಆಸ್ಲೆಲ್ಯಾಂಕ್ ವೆಬ್ ಆವೃತ್ತಿ ಧಾಡುನ್ ದಿತಾಂವ್.
ಇತ್ಲೆಂ ಸಾಂಗ್ಲ್ಯಾ ಉಪ್ರಾಂತೀ ತುಮ್ಕಾಂ ಆರ್ಸೊ ಪತ್ರಾಚಿ ವೆಬ್ ಆವೃತ್ತಿ ತುಮ್ಚ್ಯಾ ಇಶ್ಟಾ – ಮಂತ್ರಾಕ್ ಪೊರ್ವರ್ಡ್ ಕರಿಜೆಚ್ ಮ್ಹಣ್ ಆಶಾ ಆಸಾ ತರ್ – ಎಕಾ ವರ್ಸಾಕ್ ತರೀ ತಾಂಚಿ ವರ್ಗಣಿ ಸ್ಪೊನ್ಸರ್ ಕರಾ ಆನಿ ಆಮ್ಕಾಂ ವಿಳಾಸ್ – ವಾಟ್ಸಪ್ ನಂಬರ್ ಧಾಡುನ್ ದಿಯಾ. ತಾಂಚ್ಯಾ ಘರಾ ಪ್ರಿಂಟ್ ಆವೃತ್ತಿ ಧಾಡ್ತಾಂವ್. ತಾಂಕಾ ವೆಬ್ ಆವೃತ್ತಿ ಆಮಿಂಚ್ ಧಾಡುನ್ ದಿತಾಂವ್.
ಆರ್ಸೊ ಪತ್ರಾಚೊ ವರ್ಗಣ್ದಾರ್ ಜಾಂವ್ಕ್ ಆತಾಂ ಬೋವ್ ಸುಲಭ್. ಹಾಂಗಾಸರ್ ವಯ್ರ್ ದಿಲ್ಲೊ ಬುತಾಂವ್ ಕ್ಲಿಕ್ ಕರಾ. ಕಾರ್ಡ್, ಗೂಗಲ್ ಪೇ, ನೆಟ್ ಬ್ಯಾಂಕಿಂಗ್ ವಾಪರ್ನ್ ವರ್ಗಣಿ ಪಾವಿತ್ ಕೆಲ್ಯಾರ್ ಜಾಲೆಂ.
ಮೊಗಾಸವೆಂ,
ಎಚ್ಚೆಮ್, ಪೆರ್ನಾಲ್
ಪ್ರಕಾಶಕ್
ಆಮಿ ಪುರೋಹಿತ್‌ಶಾಹಿ ವಿಶ್ಯಾಂತ್, ತಾಂಚ್ಯಾ ಧಣ್ಸುಂಚ್ಯಾ ರಿತಿಂವಿಶ್ಯಾಂತ್, ಆಪುಣ್ ಪವಿತ್ರ್ ಹೆರ್ ಕೀಳ್ ಮ್ಹಣ್ ಲೆಕ್ಚ್ಯಾ ತಾಂಚ್ಯೆ ಮನಾಸ್ಥಿತೆವಿಶ್ಯಾಂತ್ ಆನಿ ಚಡ್ ಕರುನ್ ಭಕ್ತಾಂನಿ ಆಪ್ಣಾಕ್ ಸವಾಲಾಂ ಘಾಲುಂಕ್ ದೀನಾಶೆಂ ತಾಂಚೆಂ ಮತಿಚೆಂ ಗುಲಾಮ್‌ಪಣ್ ರಾಕೊನ್ ವ್ಹರುಂಕ್ ಕರ‍್ಚ್ಯಾ ಶಿಂತ್ರ್ಯಾಂ ವಿಶ್ಯಾಂತ್ ಜಾಯ್ತೆಂ ಉಲಯ್ತಾಂವ್, ಬರಯ್ತಾಂವ್. ಕ್ರಿಸ್ತಾಂವಾಂ ಮದೆಂ ಅಸಲೆಂ ಕಾಂಯ್ ನಾ ಮ್ಹಣ್ ಗತ್ತಾನ್ ಥೊಡ್ಯಾಂನಿ ಸಾಂಗ್ಚೆಂಯ್ ಆಯ್ಕಲಾಂ. ಪುಣ್ ದೊಳೆ ಸೊಡ್ನ್ ಪಳಯ್ತಾನಾ ಅಸಲಿಂಚ್ ಖುಣಾಂ ಕ್ರಿಸ್ತಾಂವ್ ಧರ್ಮಾಂತ್‌ಯೀ ದರಬಸ್ತ್ ಆಸಾತ್ ಮ್ಹಣ್ ಕಳ್ತಾ. ದೇವ್-ಧರ್ಮಾಚ್ಯಾ ನಾಂವಾನ್ ಭಿಯಾಚಿಂ ಬಿಯಾಂ ಲೊಕಾಚ್ಯೆ ಮತಿಂತ್ ಒಂಪುನ್, ತಾಂತುಂ ಕಿರ‍್ಲಲ್ಲೆಂ ಲುಂವೊನ್ ಖಾತಲ್ಯಾಂಕ್ ಹೆಂ ಗರ್ಜೆಚೆಂಚ್ ಮ್ಹಣ್ಯಾಂ. ಪುಣ್ ಆಯ್ಲೆವಾರ್ ಹೆಂ ಲೆಕಾವರ್ತೆಂ ಜಾಲ್ಲೆಬರಿ ಭೊಗ್ತಾ. ದೇವ್, ಧರ್ಮ್, ಫಿರ್ಗಜ್, ಮಾಗ್ಣ್ಯಾಚ್ಯಾ ನಾಂವಾನ್ ಕಶೆಂ ಸಾದ್ಯಾ ಮನ್ಶಾಚಿಂ ಹಕ್ಕಾಂ ಕ್ರಿಸ್ತಾಂವ್ ಪುರೋಹಿತ್‌ಶಾಹಿ ವರ್ಗ್ ಲುಟ್ತೇ ಆಸಾ ಮ್ಹಣ್ಚ್ಯಾಕ್ ಜಾಯ್ತೆ ದಾಖ್ಲೆ ಮೆಳ್ತಾತ್. ಆರ್ಥಿಕ್ ರಿತಿನ್ ಕಶೇಂಯ್ ಜಾಲೆಂ ಮೂ, ಲೊಕಾಚೊ ವೇಳ್, ತಾಂಚಿಂ ಕುಟ್ಮಾಚಿಂ ಹಕ್ಕಾಂ, ತಾಂಚೆಂ ಖಾಣ್-ಜೆವಣ್ ಹಾಂಚೆರ್‌ಯೀ ಆಯ್ಲೆವಾರ್ ಪಾದ್ರಿ ವರ್ಗಾನ್ ಹಲ್ಲೊ ಕರುಂಕ್ ಸುರು ಕೆಲಾ. ಅಸಲ್ಯೆ ಪಿಡೆಕ್ ಆತಾಂಚ್ ವೊಕತ್ ವಾಟಿನಾತ್ಲ್ಯಾರ್ ಫುಡೆಂ ಸಮುದಾಯಾಕ್ ಘಾಣ್ ಪಡ್ಚಿ ಖಂಡಿತ್.
ಫಿರ್ಗಜ್ ಕುಟಮ್ ಮ್ಹಳ್ಳೊ ಸಬ್ದ್ ಆಯ್ಕೊಂಕ್ ಖುಶಿ ಜಾತಾ. ಥೊಡ್ಯಾಂಕ್ ಹಾಂತುಂ ಎಕ್ವಟ್’ ದಿಸೊಂಕ್‌ಯೀ ಪುರೊ. ಪುಣ್ ಹ್ಯಾ ಫಿರ್ಗಜ್ ಕುಟ್ಮಾನ್ ಘರಾಂಕ್ ಚಿಲ್ಲುಂಕ್ ನ್ಹಜೊ ನೆ? ಸಮಾಜೆಚೆಂ ಕೇಂದ್ರ್ ಏಕ್ ಕುಟಮ್. ಫಿರ್ಗಜೆಪ್ರಾಸ್ ಕುಟಮ್ ಮಾಲ್ಘಡೆಂ. ಕುಟಮ್ ಮೆಳೊನ್ ಫಿರ್ಗಜ್ ವಾ ಆನಿ ಕಿತೆಂಯ್ ಜಾಂವ್ಚೆಂ. ದೆಕುನ್ ಕುಟ್ಮಾಕ್ ವಾ ಕುಟ್ಮಾಚ್ಯಾ ಹರ್ ಸಾಂದ್ಯಾಂಕ್ ತಾಚಿಂಚ್ ಮ್ಹಳ್ಳಿಂ ಹಕ್ಕಾಂ ಆಸ್ತಾತ್. ಪುಣ್ ಫಿರ್ಗಜ್‌ಕೇಂದ್ರಿತ್ ಧರ್ಮಿಕ್ ನಿಯಂತ್ರಣ್ ಕಶೆಂ ಕುಟ್ಮಾಚೆಂ ಖಾಸ್ಗಿಪಣ್, ಕುಟ್ಮಾಚೆಂ ಹಕ್ಕ್ ಧೆಸ್ವಾಟ್ ಕರ‍್ತೇ ಆಸಾ ಮ್ಹಳ್ಳ್ಯಾಕ್ ಏಕ್ ದೋನ್ ದಾಖ್ಲೆ ದಿಂವ್ಚೆ ತರ್ :
ಮೊಂತಿ ಫೆಸ್ತ್ ಮುಳಾನ್ ಕುಟ್ಮಾಚೆಂ ಫೆಸ್ತ್. ಎಕಾ ಕುಟ್ಮಾನ್ ಸಾಂಗಾತಾ ಬಸೊನ್ ಜೆಂವ್ಚೆಂಚ್ ಏಕ್ ವರ್ತೆಂ ಆಚರಣ್. ಘರ‍್ಚ್ಯಾ ಸಾಂದ್ಯಾಂನಿ ಎಕಾಮೆಕಾ ಉಲೊವ್ನ್, ಖುಶಾಲ್ ಕರುನ್, ಸಾದ್ಯಾ ವಸ್ತುರಾರ್ ಘರಾ ಜೆಂವ್ಚಿ ಮಝಾ ಆನಿ ದಾದೊಸ್ಕಾಯ್‌ಚ್ ದುಸ್ರಿ. ಥೊಡೆಕಡೆ ಇಗರ್ಜೆಕಡೆಚ್ ಸಾಮೂಹಿಕ್ ಥರಾನ್ ನವೆಂ ಜೆಂವ್ಚಿಂ ಕಾರ್ಯಿಂ ಮಾಂಡುನ್ ಹಾಡ್ಚೆಮಾರಿಫಾತ್ ಹೆಂ ಕುಟ್ಮಾಚೆಂ ಜೆವಣ್ ಫಿರ್ಗಜ್ ಭೊಖಾಯ್ತೇ ಆಸಾ! ಹೆಂ ಕೆಟ್ರಿಂಗ್ ವಾ ಕಾರ್ಯಾಕ್ ಗೆಲ್ಲೆಬರಿ ಫಕತ್ ಏಕ್ ಜೆವಣ್ ಜಾತಾ ಶಿವಾಯ್ ಇಗರ್ಜೆಚ್ಯಾ ಮಯ್ದಾನಾರ್ ಜಾಂವ್, ಸಾಲಾಂತ್ ಜಾಂವ್ ಘರಾ ಜೆವ್‌ಲ್ಲೆಬರಿ ಜಾತಾ? ಅಶೆಂಚ್ ಆನ್ಯೇಕ್ ಕುಟ್ಮಾದಾರಾಂನಿ ಸಾಂಗಾತಾ ಮೆಳ್ಚೆಂ ಫೆಸ್ತ್ – ವ್ಹಡ್ಲೆಂ ಫೆಸ್ತ್. ಹೊ ಮೊಂತಿ ಫೆಸ್ತಾಚೊ ಮುಕ್ಲೊ ಸ್ಥರ್. ಮ್ಹಳ್ಯಾರ್ ಮೊಂತಿ ಫೆಸ್ತಾದಿಸಾ ಎಕಾ ಕುಟ್ಮಾಚ್ಯಾ ಸಾಂದ್ಯಾಂನಿ ಸಾಂಗಾತಾ ಆಯ್ಲ್ಯಾರ್ ವ್ಹಡ್ಲ್ಯಾ ಫೆಸ್ತಾ ದಿಸಾ ಸರ್ವ್ ಸಯ್ರಿಂ-ಧಯ್ರಿಂ, ಧರ್ಮಾಚ್ಯೊ ವೊಂಯೊಂ ಉತ್ರೊನ್ ಸೆಜಾರ‍್ಚಿಂ ಸಯ್ತ್ ಸಾಂಗಾತಾ ಮೆಳ್ಚೆಂ ಫೆಸ್ತ್ ಹೆಂ. ಹ್ಯಾ ಫೆಸ್ತಾಕ್ ಇತ್ಲಿ ವಿಸ್ತಾರಾಯ್ ಆಸ್‌ಲ್ಲ್ಯಾನ್‌ಚ್ ಬೊವ್ಶಾ ಮಾಲ್ಘಡ್ಯಾಂನಿ ವ್ಹಡ್ಲೆಂ ಫೆಸ್ತ್’ ಮ್ಹಣ್ ವೊಲಾಯ್ಲೆಂ ಆಸ್ತಲೆಂ. ಪುಣ್ ಆತಾತಾಂ ವ್ಹಡ್ಲಿಂ ಫೆಸ್ತಾಂಯ್ ಇಗರ್ಜೆಕಡೆಚ್ ಸಂಭ್ರಮುನ್ ಕುಟ್ಮಾಚ್ಯಾ, ಸೆಜ್-ಸಾಮ್ರಾಚ್ಯಾ ಎಕ್ವಟಾಚ್ಯಾ ಜೆವ್ಣಾಚ್ಯೆ ಭೊಶಿಯೆಮತ್ ಫಾತರ್ ಘಾಲಾ. ಎಕಾ ಘರಾ ಸಯ್ರಿಂ-ಧಯ್ರಿಂ, ಸೆಜಾರ‍್ಚಿಂ ಬಸೊನ್ ಹಾಸೊನ್ ಉಲೊಂವ್ಚೆಬರಿ ಇಗರ್ಜೆಕಡೆ ರಾವೊನ್ ಉಲೊಂಕ್ ಸಾಧ್? ವ್ಹಡ್ಲೆಂ ಫೆಸ್ತ್ ವಾ ಮೊಂತಿ ಫೆಸ್ತಾಚೆಂ ಜೆವಣ್ ಮ್ಹಳ್ಯಾರ್ ದನ್ಪಾರಾಂ ಏಕ್ ಪಾವ್ಟಿಂ ಜೇವ್ನ್ ತಿರ‍್ಸುಂಚೆಂಗೀ? ದನ್ಪಾರಾಂ ಇಗರ್ಜೆಕಡೆ ಜೆವ್ಲ್ಯಾರ್ ರಾತಿಂ ಕಿತೆಂ ಬೊಟಾಂ ಚಿಂವ್ಚಿಂಗೀ? ಘರಾ ರಾಂದ್ಚೆಂ ರಾಂದಿಜೆಚ್ ಪಡ್ತಾ. ಹಿ ಆನ್ಯೇಕ್ ಗಜಾಲ್. ಹೆಂ ಎಕೆ ಫಿರ್ಗಜೆನ್ ಕುಟ್ಮಾಚ್ಯಾ ಖಾಸ್ಗಿಪಣಾಚೆರ್ ಕರ‍್ಚೊ ಹಲ್ಲೊ ಶಿವಾಯ್ ದುಸ್ರೆಂ ಕಿತೆಂಯ್ ನ್ಹಯ್.
ದುಸ್ರಿ ಗಜಾಲ್ ಪವಿತ್ರ್‌ಪಣಾಚಿ. ಆಯ್ಲೆವಾರ್ ಖಂಯ್ಚ್ಯಾಗೀ ಪಾದ್ರ್ಯಾಬಾಚೆಂ ಏಕ್ ಬರಪ್ ವಾಟ್ಸಾಪಾರ್ ಧಾಂವೊನ್ ಆಸ್‌ಲ್ಲೆಂ. ರೋಸ್ ಪವಿತ್ರ್ ನ್ಹಯ್, ರೊಸಾಕ್ ಆನಿ ಇಗರ್ಜೆಕ್ ಸಂಬಂದ್ ನಾ, ಮ್ಹಣ್ಚೆಮುಕಾಂತ್ರ್ ಇಗರ್ಜೆಂತ್ ಜಾಂವ್ಚೆಂ ಮಾತ್ರ್ ಪವಿತ್ರ್ ಆನಿ ಲೊಕಾನ್ ತಾಂಚ್ಯಾ ಆಂಗ್ಣಾಂತ್ ಕರ್ಚೆಂ ಪವಿತ್ರ್ ನ್ಹಯ್ ಮ್ಹಳ್ಳೆಂ ಧೋರಣ್ ಹೆಂ. ಇಗರ್ಜ್‌ಮಾತೆನ್ ಗುಳುಮ್ ಕರ‍್ಚೆಪಯ್ಲೆಂ ಕಿತ್ಲ್ಯೋಗೀ ಸಂಸ್ಕೃತ್ಯೊ, ಸಂಸ್ಕೃತಿಕ್ ಫೆಸ್ತಾಂ ಹ್ಯಾ ಗಾಂವಾಂನಿ ಆಸ್‌ಲ್ಲಿಂ. ರೊಸಾಚೆಂ ಕಾರ್ಯೆಂಯ್ ವಾ ನವೆಂ ಜೆಂವ್ಚೆಂಯ್ ತಸಲ್ಯೆಚ್ ಸಂಸ್ಕೃತೆಚ್ಯೊ ವಾಂಟೊ. ಪುಣ್ ಅತೀ ಧರ್ಮಿಕಾಂನಿ ಹ್ಯಾ ಸರ್ವ್ ಫೆಸ್ತಾಂಕ್ ಎಕ್‌ಚ್ ಗುಳುಮ್ ಕೆಲೆಂ ನಾ ತರ್ ತ್ಯಾ ಫೆಸ್ತಾಕ್ ಧರ್ಮಾಚೊ ವೇಸ್ ಲಾಯ್ಲೊ. ರೋಸ್ ಏಕ್ ಆಪುಟ್ ಸಂಸ್ಕೃತಿಕ್ ಕಾರ್ಯೆಂ. ಘರ‍್ಚ್ಯಾ ಮನ್ಶಾಂನಿ ನಾರ್ಲ್ ಭೆತುನ್, ವೊಳಿಂ ಕಾಂತುನ್, ವಾಂವ್ಟ್ ಕಾಡ್ನ್ ಪಿಳ್‌ಲ್ಲೊ ರೋಸ್ ಪವಿತ್ರ್‌ಚ್! ನಾ ಮ್ಹಣ್ಚೆಂ ಹಕ್ಕ್ ಕೊಣಾಕೀ ನಾ. ತರ್ ಇಗರ್ಜೆಂತ್ ಮೊಡ್ಚೊ ಉಂಡೊ ಕಿತೆಂ ಸರ್ಗಾರ್ ಥಾವ್ನ್ ಪಡ್ತಾ? ತೊ ರಯ್ತಾನ್ ಶೆತಾಂತ್ ಗುಡ್ಡಾಯಿಲ್ಲ್ಯಾ ಮಾತಿಯೆಂತ್ ವ್ಹಯ್ ಜಾಲ್ಲೆಂ ಖಾಣ್. ಹರ್ ಖಾಣ್ ಆನಿ ಹರ್ ಜೆವಣ್‌ಯೀ ಪವಿತ್ರ್‌ಚ್. ಆಲ್ತಾರಿಕ್ ಆಸ್ಚ್ಯಾ ಉಂಡ್ಯಾಪ್ರಾಸ್ ವಾಟೆದೆಗೆನ್ ಭುಕೆಲ್ಲ್ಯಾಕ್ ಲಾಂವ್ಚ್ಯಾ ಶಿತಾಂತ್ ಜೆಜುಚೆಂ ಪ್ರಸ್ತುತ್‌ಪಣ್ ಚಡ್ ಮ್ಹಣ್ ಮ್ಹಜಿ ಪಾತ್ಯೆಣಿ. ಆಗ್ಮೆಂತ್ ಪವಿತ್ರ್, ಆಲ್ತಾರಿವಯ್ಲೊ ಉಂಡೊ ಮಾತ್ರ್ ಪವಿತ್ರ್, ಬೈಬಲ್ ಮಾತ್ರ್ ಪವಿತ್ರ್ ಅಶೆಂ ಆಮ್ಚೆಂ ಮಾತ್ರ್ ಪವಿತ್ರ್ ಮ್ಹಣ್ಚಿ ಹಿ ಪಿಡಾ ಬ್ರಾಹ್ಮಣ್‌ಶಾಹಿಚೊ ಸಂಕೇತ್.
ಹ್ಯಾ ಪವಿತ್ರ್‌ಪಣಾಕ್ ಬಲಿ ಜಾಲ್ಲೊ ಲೇಟೆಸ್ಟ್ ಸಬ್ದ್ ಸೊರೊ! ಸಯ್ರ್ಯಾಂಕ್ ಸೊರೊ ದಿಲ್ಯಾರ್ ಕಾರ್ಯಾಚೆಂ ಪವಿತ್ರ್‌ಪಣ್ ಪಾಡ್ ಜಾತಾ. ವಿಶೇಸ್ ಜಾವ್ನ್ ಕುಮ್ಗಾರಾಚ್ಯಾ ಕಾರ್ಯಾಚೆಂ ಪವಿತ್ರ್‌ಪಣ್ ರಾಕೊನ್ ವ್ಹರಿಜೆ ಅಸಲಿಂ ಉತ್ರಾಂ ಆಯ್ಲೆವಾರ್ ಥೊಡ್ಯಾ ಪಾದ್ರ್ಯಾಬಾಂನಿ ಕೆಲ್ಲ್ಯಾ ವೀಡಿಯೋರ್ ಆಯ್ಕೊಂಕ್ ಮೆಳ್ಳಿಂ. ಕಾರ್ಯಾಂತ್ ಸೊರೊ ದೀಂವ್ಕ್ ನ್ಹಜೊ ಮ್ಹಣ್ ಶೆರ್ಮಾಂವ್ ದಿಂವ್ಚ್ಯಾ ತುಮಿ ಲ್ಹಾನ್ ಭುರ್ಗ್ಯಾಂಕ್ ಪಯ್ಲೊ ಕುಮ್ಗಾರ್ ಖಂಯ್ಚ್ಯಾಂತ್ ಬಿಂರ್ಡಿಸೊಲಾಂಚ್ಯಾ ರೊಸಾಂತ್ ಬುಡೊನ್ ದಿತಾತ್? ಸೊರೊ ಆಮಾಲ್ ಪೀವನ್ ತರ್ ತುಮಿ ಆಲ್ತಾರಿರ್ ಪುಜಾ ಕರ‍್ಚೊ ವಾಯ್ನ್ ಕಿತೆಂ? ಹಾಂಗಾಸರ್ ಆಸ್ಚಿ ಗಜಾಲ್‌ಯೀ ಪವಿತ್ರ್‌ಪಣಾಚಿಚ್. ವಾಯ್ನ್ ಇಗರ್ಜೆಂತ್ ಆಸ್ತಾ ದೆಕುನ್ ತೊ ಪವಿತ್ರ್. ರೋಸ್ ಆನಿ ಸೊರೊ ಲೊಕಾಚ್ಯಾ ಕಾರ್ಯಾಂತ್ ಆಸ್ತಾ ದೆಕುನ್ ತೊ ಪವಿತ್ರ್ ನ್ಹಯ್ ಮ್ಹಣ್ಚಿ ಪುರೋಹಿತ್‌ಶಾಹಿ ಮನಾಸ್ಥಿತಿಚ್ ಹಿ. ವಿಶೇಸ್ ಮ್ಹಳ್ಯಾರ್ ಹರ‍್ಯೆಕಾ ರೊಸಾಕ್ ಕಾನಾ ಶ್ಹೆರಾಂತ್ ಜೆಜುನ್ ಉದಕ್ ಆಸ್‌ಲ್ಲೆಂ ವಾಯ್ನ್ ಕೆಲ್ಲೆಂ ಅಚರ್ಯೆಂಚ್ ವಾಚುನ್ ಸಾಂಗ್ತಾತ್! ಜೆಜುನ್ ವಾಯ್ನ್ ದಿಲೊ, ಕಿತ್ಯಾಕ್ ಮ್ಹಳ್ಯಾರ್ ಜೆಜುಕ್ ತ್ಯಾ ಕಾರ್ಯಾಚಿ ಮರ್ಯಾದ್ ಕಳಿತ್ ಆಸ್‌ಲ್ಲಿ. ಹಿ ಮರ್ಯಾದ್ ಕಾರ್ಯಾಂತ್ ಸೊರೊ ದೀನಾಕಾತ್ ಆನಿ ಆಮಿ ದೀನಾಸ್ತಾನಾ ಪವಿತ್ರ್‌ಪಣ್ ಸಾಂಬಾಳ್ಳೆಂ ಮ್ಹಣ್ ಬಾಡಾಯ್ ಉಲೊಂವ್ಚ್ಯಾಂಕ್ ಕಳಿತ್ ನಾ. ಅಳೆ ಸಾಯ್ಬಾಂನೊ, ತುಮಿ ಸೊರೊ ದಿತಾತ್ ಮ್ಹಣ್ ಕೊಣೀ ತುಮ್ಚ್ಯಾ ಕಾರ್ಯಾಕ್ ಯೆತಾತ್ ವಾ ಕೊಣಾಕೀ ಪೊಟಾಕ್ ನಾ ಮ್ಹಣ್ ತುಮ್ಚ್ಯಾ ಕಾರ್ಯಾಕ್ ಯೆತಾತ್? ಸಾದ್ಯಾ ಲೊಕಾಕ್ ಪಯ್ಲೆಂಚ್ ಫಂಕ್ಶನಾಂಕ್ ವಚೊನ್ ಥಂಯ್ಚಿಂ ವಿಪ್ರೀತ್ ಮಾಗ್ಣಿಂ ಆಯ್ಕೊನ್, ಡಿಜೆ ವಾಲ್ಯಾಂಚೆ ಘಡ್ಗಡೆ ಸೊಸುನ್, ಎಮ್ಸಿಂಚಿ ಆರ್ಟಿಫಿಶಿಯಲ್ ಭಾಸ್ ಆಯ್ಕೊನ್ ಕಾಂಟಾಳೊ ಆಯ್ಲಾ. ತರೀ ಆಪ್ಣಾಚೊ ವೇಳ್ ಖರ್ಚುನ್ ಲೋಕ್ ಕಾರ್ಯಾಕ್ ಯೆತಾ ತರ್ ತುಮಿ ದಿಲ್ಲ್ಯಾ ಆಪೊವ್ಣ್ಯಾಕ್ ಮಾನ್ ದೀವ್ನ್ ಶಿವಾಯ್ ತುಮ್ಚ್ಯಾ ಸೊರ‍್ಯಾಕ್ ಆನಿ ಜೆವ್ಣಾಕ್ ಲೆಂಬೆವ್ನ್ ನ್ಹಯ್. ಸೊರೊ ದಿಂವ್ಚಿ ದೀನಾತ್ಲಿ ತುಮ್ಚಿ ಖುಶಿ. ಪುಣ್ ಆಮಿ ಸಯ್ರ್ಯಾಂಕ್ ಸೊರೊ ದೀನಾಸ್ತಾನಾ ಪವಿತ್ರ್‌ಪಣ್ ಸಾಂಬಾಳ್ಳೆಂ, ಆಮಿ ಕಬಾಬ್ ದೀನಾಸ್ತಾನಾ ಕುಂಕ್ಡಾಬಲಿ ಆಡಾಯ್ಲಿ ಮ್ಹಣ್ ಸಾಂಗ್ತಾತ್ ತರ್ ತೊ ತುಮ್ಚೆರ್ ಗವ್ರವ್ ದವರುನ್ ಆಯಿಲ್ಲ್ಯಾ ವೊವ್ಳ್ಯಾಂಕ್ ಕರ‍್ಚೊ ಅಕ್ಮಾನ್. ಕೊಣಾಕ್ ಜಾಯ್ ಅಸಲ್ಯಾ ಪವಿತ್ರ್‌ಪಣಾಚಿಂ ಫಂಕ್ಶನಾಂ? ತುಮಿ ಫಂಕ್ಶನಾಂ ಕರಿನಾತ್ಲ್ಯಾರ್ ಕೊಣೀ ತುಮ್ಚ್ಯಾ ಪಾಂಯಾಂಕ್ ಪಡೊನ್ ಫಂಕ್ಶನ್ ಕರ್ ಮ್ಹಣ್ತಾ? ಹಿ ಪವಿತ್ರ್‌ಪಣಾಚಿ ಪಿಡಾ ಪಾದ್ರಿವರ್ಗಾಥಾವ್ನ್ ಲೊಕಾಕ್ ಪಾಜಾರ್ಲಲ್ಯಾಕ್ ಹೊ ದಾಖ್ಲೊ.
ತಿಸ್ರಿ ಗಜಾಲ್ ವೇಳ್. ಪಯ್ಶಾಂಪ್ರಾಸ್ ವೇಳ್ ಮೊಲಾಧಿಕ್ ಮ್ಹಣ್ತಾತ್. ಪುಣ್ ಕ್ರಿಸ್ತಾಂವಾಕ್ ತಾಂಚೆ ಪಯ್ಶೆ ಲುಟ್ಲ್ಯಾರೀ ಕಳ್ತಿತ್ ಪುಣ್ ಹ್ಯಾ ಪುರೋಹಿತ್‌ಶಾಹಿಂನಿ ಲುಟ್ಚ್ಯಾ ವೆಳಾವಿಶ್ಯಾಂತ್ ಚಿಂತುಂಕ್‌ಚ್ ವಚಾನಾಂತ್. ಆಯ್ತಾರಾಚೊ ದೀಸ್‌ಚ್ ಪಳೆಯಾ. ಹಫ್ತ್ಯಾಮದೆಂ ಸಕ್ಕಡ್ ಆಪಾಪ್ಲ್ಯಾ ಕಾಮಾಂನಿ ವೆಸ್ತ್ ಆಸ್ತಾತ್. ಆಯ್ತಾರಾಚೊ ಏಕ್ ದೀಸ್ ಸರ್ವಾಂ ಘರಾ ಕುಟ್ಮಾಸವೆಂ ಆಸ್ತಾತ್. ಭೊಂವೊಂಕ್ ಪಾರ್ಕ್, ಬೀಚ್, ಸಿನೆಮಾಕ್‌ಗೀ ವಚೊನ್ ಆಪ್ಲೆಂ ಕುಟ್ಮಾಜಿವಿತ್ ಬರ‍್ಯಾನ್ ಜಿಯೆಂವ್ಕ್ ಏಕ್ ಬರೋ ಆವ್ಕಾಸ್ ತ್ಯಾ ದೀಸ್. ಪುಣ್ ಆಯ್ಚ್ಯಾ ಕಾಳಾರ್ ಆಯ್ತಾರಾತಿತ್ಲೊ ಬಿಝೀ ದೀಸ್ ಹಫ್ತ್ಯಾಮದೆಂಯ್ ನಾ ಕೊಣ್ಣಾ! ಜಮಾತ್ಯೊ, ವಾಡ್ಯಾಚಿಂ ಫೆಸ್ತಾಂ, ದೊತೊರ್ನೆಚ್ಯೊ ಪರೀಕ್ಶಾ, ರೆತಿರ‍್ಯೊ, ಮಾಗ್ಣಿಂ, ನೊವೆನಾಂ ಆನಿ ಕಿತೆಂ ಕಿತೆಂ. ವಯ್ಲ್ಯಾಬಾರ್ ಹೆಂ ಫಕತ್ ಮಾಗ್ಣೆಂ, ಜಮಾತ್ ಮ್ಹಣ್ ಭೊಗುಂಕ್ ಪುರೊ. ಪುಣ್ ಹಾಚೆಪಾಟ್ಲ್ಯಾನ್ ಆಸ್ಚಿ ಗಜಾಲ್ – ಲೊಕಾಕ್ ಧರ್ಮ್-ಇಗರ್ಜ್-ಮಾಗ್ಣ್ಯಾಭೊಂವ್ತಿಂಚ್ engage ಕರುನ್ ದವರ‍್ಚಿ! ಲೊಕಾಚ್ಯಾ ವೆಳಾಚೆರ್, ತಾಂಚ್ಯೆ ಜಿಣಿಯೆಚೆರ್, ಕುಟ್ಮಾಂತ್ ತಾಣಿಂ ಭೊಗ್ಚ್ಯಾ ಲ್ಹಾನ್ ಲ್ಹಾನ್ ಸಂತೊಸಾಂಚೆರ್ ಕರ‍್ಚೊ ಹಲ್ಲೊ ನ್ಹಯ್‌ಗೀ ಹೊ?
ಹಿ ಸವಾರಿ ವಾ dictatorship ಖಂಯ್ ಪರ್ಯಾಂತ್ ಪಾವ್ಲಾಂ ಮ್ಹಳ್ಯಾರ್, ಎಕೆ ಫಿರ್ಗಜೆಂತ್ ಪಾದ್ರ್ಯಾಬಾನ್ ತುಮಿ ತುಮ್ಚ್ಯಾ ಘರಾಂನಿ ಸಾಂಜೆರ್ ಇತ್ಲೊಚ್ ವೇಳ್ ಮಾಗ್ಣೆಂ ಕರಿಜೆ, ಮಾಗ್ಣೆಂ ಕೆಲ್ಲೆ ವೀಡಿಯೋ ಧಾಡಿಜೆ. ತುಮ್ಕಾಂ ಪುರ್ಸೊತ್ ನಾತ್ಲ್ಯಾರ್ ಹಾಂವ್ ಯೇವ್ನ್ ಮಾಗ್ತಾಂ ಮ್ಹಣ್ ಸಾಂಗ್‌ಲ್ಲೆಂ ಆಯ್ಕೊಂಕ್ ಮೆಳ್ಳೆಂ. ಹಾಂವ್ ಜಾಲ್ಲೊಂ ತರ್ ವಿಚಾರ‍್ತೊಂ – ಮಾಗ್ಣೆಂ ಕರುಂಕ್ ಮನ್ಶಾಂ ನಾತ್ಲ್ಯಾರ್ ತುಮಿ ಯೇವ್ನ್ ಮಾಗ್ಣೆಂ ಕರ್ತಾತ್. ಹಿತ್ಲಾಕ್ ಉದಕ್ ಸೊಡುಂಕ್ ಜಣ್ ಮೆಳನಾತ್ಲ್ಯಾರ್ ತುಮಿ ಯೇವ್ನ್ ಉದಕ್ ಸೊಡುಂಕ್ ಕುಮೊಕ್ ಕರ‍್ತಾತ್‌ಗೀ ಪಾದ್ರ್ಯಾಬಾಂನೊ?. ಅಶೆಂ ವಿಚಾರಿಜೆಚ್. ಆಮ್ಚೆರ್ ಕೊಣೆಂಯ್ ಸವಾರಿ ಕರುಂಕ್ ವಾ ಸರ್ವಾಧಿಕಾರ್ ಚಲೊಂವ್ಕ್ ಬಿಲ್ಕುಲ್ ಸೊಡ್ಚೆಂ ನ್ಹಯ್. ಧರ್ಮಾಭಾಯ್ರ್ ಹರ್ ಕುಟ್ಮಾಭಿತರ್‌ಯೀ ಎಕಾ ವೆಕ್ತಿಕ್ ತಾಚೆಂ ಮ್ಹಳ್ಳೆಂ ಸ್ವಾತಂತ್ರ್ಯ್ ಆಸಾ. ತಾಚೊಚ್ ಮ್ಹಳ್ಳೊ ಗವ್ರವ್ ಆಸಾ. ದೆಕುನ್ ಎಕಾ ಕುಟ್ಮಾಚೆಂ ಜೆವ್ಣಾಚೆಂ ಹಕ್ಕ್, ಎಕಾ ಕುಟ್ಮಾನ್ ಸಾಂಗಾತಾ ಖರ್ಚಿಜೆ ಜಾಲ್ಲೊ ವೇಳ್, ಎಕಾ ಕುಟ್ಮಾಚೊ ಸಂಭ್ರಮ್ ಸಂಭ್ರಮುಂಕ್ ತಾಂಕಾಂ ಆಸ್ಚೆಂ ಸ್ವಾತಂತ್ರ್ಯ್ – ಹಾಚೆರ್ ಫಿರ್ಗಜ್ ಕುಟಮ್ ಮ್ಹಳ್ಳ್ಯಾ ನಾಂವಾರ್ ವಾ ಪಾದ್ರ್ಯಾಬ್ ಮ್ಹಳ್ಳೊ ಧರ್ಮಿಕ್ ಅಧಿಕಾರ್ ವಾಪಾರುನ್ ಕರ‍್ಚೆ ಹಲ್ಲೆ ರಾವಯ್ಜೆ. ಕುಟ್ಮಾಚೆಂ ಜೆವಣ್, ವೇಳ್, ಫೆಸ್ತಾಂ, ಸಂಭ್ರಮ್ ಹೆಂ ಪೂರಾಯ್ ತ್ಯಾ ಕುಟ್ಮಾಚಿ ಆಸ್ತ್. ಹಾಚೆರ್ ಸವಾರಿ ಕರುಂಕ್ ಖಂಯ್ಚ್ಯಾ ಪುರೋಹಿತ್‌ಶಾಹಿಂಕ್‌ಯೀ, ಪಾದ್ರಿವರ್ಗಾಕ್‌ಯೀ ಹಕ್ಕ್ ನಾ.
ಏಕ್ ಘಡಿ ಚಿಂತುನ್ ಪಳೆಯಾ, ಆತಾತಾಂ ಕ್ರಿಸ್ತಾಂವಾಂನಿ ಮಾಗ್ಣೆಂ ಆನಿ ತಾಕಾ ಸಂಬಂದ್ ಜಾಲ್ಲ್ಯಾ ಗಜಾಲೆಂನಿ ಖರ್ಚುಂಚೊ ವಾ ಹೊಗ್ಡಾಂವ್ಚೊ ವೇಳ್ ಕಿತ್ಲೊ! ಉಟ್‌ಲ್ಲ್ಯಾಕೀ ಮಾಗ್ಣಿಂ, ಬಸ್‌ಲ್ಲ್ಯಾಕೀ ಮಾಗ್ಣಿಂ. ಮಾಗ್ಣೆಂ ಏಕ್ ವೊಕತ್ ಮ್ಹಣ್‌ಚ್ ಲೆಕಾಕ್ ಧರ‍್ಯಾಂ. ಪುಣ್ ವೊಕ್ತಾಂ ಸರ್ವಾಂಕ್ ಜಾಯ್ ಮ್ಹಣ್ ನಾ ನೆ ಆನಿ ವೊಕ್ತಾಂಚಿ dosage ಸಯ್ತ್ ಸರ್ವಾಂಕ್ ಎಕ್‌ಚ್ ಲೇಕ್ ಆಸನಾನೆ? ವೊಕ್ತಾಂ ಚಡ್ ಘೆತ್ಲ್ಯಾರ್ ತಿಯ್ ಏಕ್ ಪಿಡಾಚ್. ಆಜ್ ಕ್ರಿಸ್ತಾಂವ್ ಸಮುದಾಯ್ ಮಾಗ್ಣ್ಯಾಕ್ addict ಜಾಲ್ಲೆಬರಿ ಭೊಗ್ತಾ. ಖಂಯ್ಚ್ಯಾಯ್ ಸಂಭ್ರಮಾಂತ್ ವಾ ಸಮುದಾಯಿಕ್ ಜಾವ್ನ್ ಮಾಗ್ತಾನಾ ಮಾಗ್ಣಿಂ ಲೆಕಾಚಿಂ ಆಸ್ಲ್ಯಾರ್ ಬರಿಂ. ಪುಣ್ ಗಜಾಲ್ ತಶಿ ನಾ. ರೊಸಾ ಕಾರ್ಯಾಂತ್ ಥೊಡೆಕಡೆ ಸಗ್ಳೊ ತೇರ್ಸ್‌ಚ್ ಶಿಕಯ್ತಾತ್. ರೊಸಾಚ್ಯಾ ಮಾಟ್ವಾಂತ್ ವೊವಿಯಾಂಕ್ ಮಾನ್ ಆಸಜೆ ಶಿವಾಯ್ ಲೆಕಾವರ್ತ್ಯಾ ಮಾಗ್ಣ್ಯಾಕ್ ನ್ಹಯ್. ಥೊಡ್ಯಾ ರೊಸಾಚ್ಯಾ ಮಾಟ್ವಾಕ್ ಗೆಲ್ಯಾರ್ ರೊಸಾಕ್ ಆಯ್ಲಾಂಗೀ, ಮಿಸಾಕ್ ಆಯ್ಲಾಂಗೀ ಮ್ಹಣ್ ದುಬಾವ್ ಜಾತಾ. ಹರ್ ಕಾರ್ಯಾಂತ್ ಸುರ‍್ವೇರ್ ಮಾಗ್ಣೆಂ ಆಸ್ತಾಚ್. ತೆಂಚ್ ಮಟ್ವೆಂ ಆನಿ ಬರೇಂ ಆಸ್ಲ್ಯಾರ್ ಜಾಲೆಂ. ಪುಣ್ ಮದೆಂ ಮದೆಂ ಮಾಗ್ಣಿಂ ಶಿಕೊಂವ್ಚಿ ಗರ್ಜ್ ಕಿತೆಂ? ಜೆವ್ಣಾಚೆರ್ ಬೆಸಾಂವ್ ಮ್ಹಳ್ಳೆಂ ಥೊಡೆಕಡೆ ಆನ್ಯೇಕ್ ಮಿನಿ ಶೆರ್ಮಾಂವ್. ಇತ್ಲೆಂ ಪೂರಾ ಬೆಸಾಂವ್ ಪಡ್‌ಲ್ಲೆಂ ಜೆವಣ್ ಘೆತ್ಲ್ಯಾರೀ ಲೊಕಾನ್ ವಿಬಾಡ್ಚ್ಯಾ ಖಾಣಾಂತ್ ಕಾಂಯ್ ಬದ್ಲಾವಣ್ ಜಾಲ್ಯಾ?
ಆತಾಂ ಥೊಡ್ಯಾಂಕ್ ಸವಾಲ್ ಧೊಸುಂಕ್ ಪುರೊ – ಮಾಗ್ಚಿಂ ಮಾಗೊಂದಿ ಸಾಯ್ಬಾ. ತಾಣಿಂ ಮಾಗ್ಲ್ಯಾರ್ ತುಕಾ ಕಿತೆಂ? ಪುಣ್ ಹ್ಯಾ ವಿಪ್ರೀತ್ ಮಾಗ್ಣ್ಯಾಧರ್ಮಾನ್ ಸಮುದಾಯ್ ಪೊಕೊಳ್ ಜಾವ್ನ್ ವೆಚೊ ಕೊಣಾಕ್ ಕಳ್ತಾ? ಸಮಾಜೆಂತ್ ಆಮ್ಚಿಂ ಹಕ್ಕಾಂ ರಾಕೊನ್ ವ್ಹರಿಜೆ ತರ್ ಮಾಗ್ಣ್ಯಾಪ್ರಾಸ್ ವಿಚಾರ್ ಆನಿ ಗಿನ್ಯಾನ್ ಗರ್ಜೆಚೆಂ. ಪುಣ್ ಆಯ್ಚಿಂ ಚಡ್ತಾವ್ ಮಾಗ್ಣಿಂ ವಿಚಾರಾಕ್ ಅಸ್ಕತ್ ಕರ‍್ಚೆತಸಲಿಂ. ಆಯ್ಚ್ಯಾ ವಿಪ್ರೀತ್ ಮಾಗ್ಣ್ಯಾಂನಿ ಲುಟ್ಚೊ ಚಡ್ತಾವ್ ವೇಳ್ ಸಮಾಜೆಕ್ ಸಮ್ಜೊಂಕ್ ಶಿಕೊಂಕ್ ಖರ್ಚಿಜೆ ಜಾಲ್ಲೊ! ಏಕ್ ಪಾವ್ಟಿಂ ಇಗರ್ಜೆಂಚೆರ್ ಎದೊ ವ್ಹಡ್ ಹಲ್ಲೊ ಜಾಲ್ಯಾರೀ ಆನಿಕೀ ಸಮಾಜೆಂತ್ ಘಟ್ಟ್ ರಾವೊನ್ ಉಲೊಂವ್ಚೊ ಎಕ್ಲೊ ಮಾನೆಸ್ತ್ ಆಮ್ಚೆಮದೆಂ ಆಸಾ? ಹ್ಯಾ ದೆಶಾಂತ್ ಉಣ್ಯಾಸಂಖ್ಯಾತಾಂಚ್ಯಾ ಧರ್ಮಿಕ್ ಸ್ವಾತಂತ್ರ್ಯಾಚೆರ್‌ಚ್ ಜಾಂವ್ಚೆ ಹಲ್ಲೆ ಖಂಡನ್ ಕರುಂಕ್‌ಯೀ ಎಕ್ಲೊ ಧರ್ಮಿಕ್ ಸಯ್ತ್ ನಾ! ಹಫ್ತ್ಯಾಗಟ್ಲ್ಯಾನ್ ದೀಸ್‌ರಾತ್ ರೆತಿರ್ ದಿಂವ್ಚೆ ಜಾಯ್ತೆ ಆಸ್ತಿತ್. ಪುಣ್ ಸಮಾಜೆಂತ್ ರಾವೊನ್ ಲೊಕಾಪಾಡ್ತೆನ್ ಪಾಂಚ್ ಮಿನುಟಾಂ ಉಲೊಂವ್ಚೊ ಎಕ್ಲೊ ಪುಣೀ ಆಸಾ? ಪೂರಾ ಸೊಡ್ಯಾಂ, ಇತ್ಲೆಂ ಹಾತ್ ಪಾಂಯ್ ಬಡೊವ್ನ್, ವೊಮ್ತೆಂ ಉದಾರೆಂ ಲೊಳೊನ್ ಮಾಗೊನ್‌ಯೀ ಆಪುಣ್ ಆತಾಂ ಸರ್ಗ್ ಭೊಗ್ತೇ ಆಸಾಂ, ಮ್ಹಾಕಾ ದುಕಿಚ್ ನಾಂತ್ ಮ್ಹಣ್ ಧಯ್ರಾನ್ ಸಾಂಗ್ಚೊ ಎಕ್ಲೊ ಭಕ್ತ್ ಪುಣೀ ಆಸಾಗೀ? ಮಾಗಿರ್ ಹ್ಯಾ ವಿಪ್ರೀತ್ ಮಾಗ್ಣ್ಯಾಂರ್ಥಾವ್ನ್ ಸಮುದಾಯಾನ್ ಜೊಡ್‌ಲ್ಲೆಂ ಕಿತೆಂ?
ಆಯ್ಚ್ಯೆ ಸಮಾಜೆಕ್ ಸಾದ್ಯಾ ಲೊಕಾಚ್ಯೆ ಪಾಡ್ತೆನ್ ರಾವೊನ್, ದೊಳೆ ಉಗ್ತೆ ಕರೊವ್ನ್ ವಾಟ್ ವ್ಹರ‍್ಚೊ ಮನಿಸ್ ಗರ್ಜ್ ಶಿವಾಯ್ ದೊಳೆ ಧಾಂಪುನ್ ಮಾಗ್ಚೊ ಮನಿಸ್ ನ್ಹಯ್. ಆಜ್ ಜೆಜು ಆಸಾ ತರ್ ರಸ್ತ್ಯಾರ್ ಖಂಯ್ ಪುಣೀ ಲೊಕಾಚ್ಯಾ ಹಕ್ಕಾಂಖಾತಿರ್ ಝುಜ್ಚ್ಯಾ ಸ್ಟ್ಯಾನ್ ಸ್ವಾಮಿ ತಸಲ್ಯಾಂಸಂಗಿ ಆಸಾ ಶಿವಾಯ್, ಲೊಕಾಚಿಂ ಹಕ್ಕಾಂ ಲುಟ್ಚ್ಯಾ ಮಾಗ್ಣೆಂ ಕರಾ, ಸೊರೊ ದೀನಾಕಾತ್ ಮ್ಹಣ್ ಫಾರ್ಮಾಯ್ತಲ್ಯಾಂಸಂಗಿ ಬಿಲ್ಕುಲ್ ನಾ.
ಆಖೇರಿಕ್ ಇತ್ಲೆಂಚ್ ಸಾಂಗ್ಚೆಂ –
ಮ್ಹಜ್ಯಾ ಘರಾ ಕೊಣೀ ರಿಗೊನ್ ಜಾಂವ್ ತೊ, ಧರ್ಮಾಚೊ, ವೆವಸ್ಥೆಚೊ ವಾ ಆನಿ ಖಂಯ್ಚೋಯ್, ಮ್ಹಜ್ಯಾ ಭುರ್ಗ್ಯಾಕ್ ವೋಡ್ನ್ ವ್ಹರ‍್ತಾನಾ ಹಾಂವ್ ದೊಳೆ ಧಾಂಪುನ್ ಮಾಗ್ಣೆಂ ಕರ‍್ತಾಂ? ವಾ ಮ್ಹಜ್ಯಾ ಭುರ್ಗ್ಯಾಚೆಂ ಹಕ್ಕ್ ಲುಟುಂಕ್ ತುಂ ಕೋಣ್ ಮ್ಹಣ್ ವಿಚಾರ್ ಕರ‍್ತಾಂ? ಹ್ಯಾ ನಿರ್ಧಾರಾಚೆರ್ ಹೊಂದೊನ್ ಆಸಾ – ಮ್ಹಜ್ಯಾ ಭುರ್ಗ್ಯಾಚೊ, ಮ್ಹಜ್ಯಾ ಕುಟ್ಮಾಚೊ, ಸಮುದಾಯಾಚೊ, ಸಮಾಜೆಚೊ ಫುಡಾರ್, ತಿತ್ಲೆಂಚ್!
► ವಿಲ್ಸನ್ ಕಟೀಲ್
2 comments