ಘಯ್ರೊಮ್

ಡಾನ್ಸ್ ಕ್ಲಾಸಿಂತ್ ಚಡಿತ್ ತರ್ಬೆತಿ ಆಸ್‍ಲ್ಲ್ಯಾನ್, ಮಾಯಾ ಶಾಳಾ ಥಾವ್ನ್ ಪಾಟಿಂ ಯೆತನಾ ವೇಳ್ ಜಾಲ್ಲೊ.

114 ನಂಬ್ರಾಚಾ ಬಸ್ಸಾರ್ ಥಾವ್ನ್ ಆಪ್ಲ್ಯಾ ಘರಾಲಾಗ್ಚಾ ಬಸ್ಸ್-ಸ್ಟೆಂಡಾಂತ್ ತೆಂ ದೆಂವ್ತನಾ, ಕಾಳೊಕ್ ಪಡೊನ್ ಆಯಿಲ್ಲೊ. ಬಗ್ಲೆಚಾ ಪಾರ್ಕಾಂತ್ ಭುರ್ಗಿಂ ಖೆಳ್ತಾಲಿಂ ಆನಿ ಪಾರ್ಕಾಂತ್ ವಾಡ್‌ಲ್ಲ್ಯಾ ರುಕಾನಿ ಚಿಳಿಪಿಳಿ ಕರ್ಚಿಂ ಸುಕ್ಣಿಂ ರಾತಿಚಾ ವಿಶೆವಾಚಿ ತಯಾರಿ ಕರ್ತಾಲಿಂ. ಆಪ್ಲ್ಯಾ ಘರಾ ಪಾವೊಂಕ್ ಥೊಡಿ ವಾಟ್ ಚಲೊಂಕ್ ಆಸ್‌ಲ್ಲಿ ಜಾಲ್ಲ್ಯಾನ್, ಅಂವ್ಸರಿಂ ಮೆಟಾಂ ಕಾಡ್ಲಿಂ ಮಾಯಾನ್.

ಎಕಾಚ್ಚಾಣೆ ದೆಗೆನ್ ರಾವೊನ್ ಆಸ್‌ಲ್ಲ್ಯಾ ಕಾರಾಂ ಪೈಕಿ ಎಕಾ ಕಾರಾಚೊ ಆರ್ಸೊ ಉಗ್ತೊ ಜಾಲ್ಲೊ ಅವಾಜ್ ಆನಿ ತ್ಯಾ ಬರಾಬರ್, ಎಕಾ ದಾದ್ಲ್ಯಾಚಿಂ ಉತ್ರಾಂ ಮಾಯಾಚಾ ಕಾನಾಂಕ್ ಆಪ್ಟಾಲಿಂ.

“ಎಕ್ಸ್‌ಕ್ಯೂಜ್ ಮಿ ಮಿಸ್ಸ್,” ಕಾರಾಂತ್ಲೊ ತರ್ನಾಟೊ ಹಾಸೊನ್ ಮ್ಹಣಾಲೊ. ತಾಚಾ ಕಾರಾಂತ್ ಥಾವ್ನ್ ಹಿಂದಿ ಪದ್ ವ್ಹಾಳೊನ್ ಯೆತಾಲೆಂ.

“ಹಾಂ?” ಮಾಯಾಚಿ ತಕ್ಲಿ ಕಾರಾ ಕುಶಿನ್ ಘುಂವ್ಲಿ.

“ಹೊ ವಿಳಾಸ್ ಖಂಯ್ ಮ್ಹಣ್ ಕಳಿತ್ ಆಸಾಗಿ ಮಿಸ್ಸ್? ಬರ್ಥ್‌ಡೇ ಪಾರ್ಟಿಕ್ ವಚೊಂಕ್ ಆಸಾ ಆನಿ ಮ್ಹಾಕಾ ವಾಟ್ ಚುಕ್ಲ್ಯಾ, ಥೊಡಿ ಕುಮಕ್ ಕೆಲ್ಯಾರ್ ಉಪ್ಕಾರ್ ಜಾತೊ!” ತರ್ನಾಟ್ಯಾನ್ ಮ್ಹಳೆಂ ಪರಾತ್ತುನ್.

ತಾಚಾ ಹಾತಾಂತ್ಲ್ಯಾ ಲೊಕಾಟ್ಯಾರ್ ಆಸ್‌ಲ್ಲೊ ವಿಳಾಸ್ ಪಳೆಲೊ ಮಾಯಾನ್, ತಾಂಚಾ ಘರಾ ತೆಣೆಂಚ್ ಆಸ್‌ಲ್ಲೆಂ ತೆಂ ಘರ್.

“ಹ್ಯಾಚ್ ವಾಟೆನ್ ಮುಕಾರ್ ವಚೊನ್, ಉಜ್ವ್ಯಾಕ್ ಘುಂವ್ಲೊಯ್ ತರ್, ಉಪ್ರಾಂತ್ ಮೆಳ್ಚೊ ದಾವ್ಯಾ ಕುಶಿಚೊ ರಸ್ತೊ ಧರ್ಲ್ಯಾರ್ ಜಾಲೆಂ, ತ್ಯಾ ರಸ್ತ್ಯಾರ್ ಆಸಾ ತೆಂ ಘರ್.” ತೆಂ ಮ್ಹಣಾಲೆಂ ಚಡಿತ್ ಉಲಂವ್ಕ್ ರಾವನಾಸ್ತಾಂ.

“ಹಾಂವ್ ಹಾಂಗಾಸರ್ ನವೊಚ್,” ತರ್ನಾಟೊ ಮ್ಹಣಾಲೊ. “ಯೇ ಕಾರಾಂತ್ ಬಸ್, ಮ್ಹಾಕಾ ವಾಟ್ ದಾಕಯಿಲ್ಲೆಬರಿ‌ಯೀ ಜಾಲೆಂ, ತುಕಾ ಹಾಂವೆಂ ತುಜಾ ಘರಾ ಪಾವಯಿಲ್ಲೆಬರಿಯೀ ಜಾಲೆಂ. ಕಾಳೊಕೀ ಜಾವ್ನ್ ಆಯ್ಲೊ, ಕಿತೆಂ ಮ್ಹಣ್ತಾಯ್ ಮಿಸ್ಸ್?”

“ನಾ-ನಾ, ಮ್ಹಾಕಾ ಚಲೊಂಕ್ ಬರೆಂ ಲಾಗ್ತಾ, ತುಂ ವಚ್, ಥೇಂಕ್ಸ್.” ತಿತ್ಲೆಂ ಮ್ಹಣೊನ್ ತೆಂ ಚಲ್ಚಾರ್ ಆಸ್‌ಲ್ಲೆಂ.

“ಹಾಂವ್ ಕಾಂಯ್ ಗೊಂಗೊ ನ್ಹಯ್, ಭಿಯೆನಾಕಾ ಮಿಸ್ಸ್, ತುಕಾ ಪಾಯಿಲ್ಲೆಬರಿಯೀ ಜಾಲೆಂ, ಮ್ಹಾಕಾ ಬರ್ಥ್‌ಡೇಕ್ ತುರ್ತಾನ್ ಪಾವ್‌ಲ್ಲೆಬರಿಯೀ ಜಾಲೆಂ, ಪ್ಲೀಜ್-ಪ್ಲೀಜ್-ಪ್ಲೀಜ್?”

ಪಳೆಂವ್ಕ್ ಸೊಭಿತ್‌ಯೀ ಆಸ್‌ಲ್ಲ್ಯಾ ತ್ಯಾ ತರ್ನಾಟ್ಯಾಕ್ ಪಳೆವ್ನ್ ಬಾರಾ ವರ್ಸಾಂಚಾ ಮಾಯಾಕ್, ದಾಕ್ಶೆಣ್ ಜಾಲಿ.‌ ತರ್ನಾಟ್ಯಾಚಾ ಒತ್ತಾಯೆಕ್‌ ಲಾಗೊನ್‌, ತಾಚಾ ಗಾಲಾಂಚೆರ್ ತಾಂಬ್ಸಾಣ್ ಚರ್ಲಿ.

ತೆಂ ಕಾರಾಂತ್ ಬಸ್ಲೆಂ.

***

“ಸರ್, ಆಯುದ ಪುಜಾ ಲಾಗಿಂ ಆಯ್ಲಿ ಸರ್,” ಚೀಫ್ ಕೊನ್ಸ್‌ಟೆಬಲ್ ರಾಮಯ್ಯಾ ಮ್ಹಣಾಲೊ ಇನ್ಸ್‌ಪೆಕ್ಟರ್ ಕುಲಾಸೊಚಾ ದಫ್ತರಾ ಭಿತರ್ ರಿಗೊನ್. “ಡೆಕೊರೆಶನ್ ಕರ್ಚಾ ಪಯ್ಲೆಂ, ಸಗ್ಳ್ಯಾ ಸ್ಟೇಶನಾಂತ್ಲೊ ಘಯ್ರೊಮ್ ನಿತಳ್ ಕರುಂಕ್ ಎಕ್ಲ್ಯಾಕ್ ಆಪಯ್ಲಾ. ಫಾಲ್ಯಾ ತಾಣೆ ಆಯ್ಲ್ಯಾರ್ ವ್ಹಡ್ ನಾಂಗೀ?”

“ತಿತ್ಲ್ಯಾ ಭಿತರ್ ಏಕ್ ವರ್ಸ್ ಜಾಲೆಂಗೀ ಕಿತೆಂ!” ಇನ್ಸ್‌ಪೆಕ್ಟರ್ ಕುಲಾಸೊ ಮ್ಹಣಾಲೊ ಹಾಸೊನ್. “ಹೆಂ ತುಜಿ ಫ್ಯಾಮಿಲಿ ಕಶಿ ಆಸಾ ರಾಮಯ್ಯಾ? ಧುವೆಚೆಂ ಕಾಜಾರ್ ಕೆದಳಾ?”

“ಚಡ್ ತೇಂಪ್ ನಾ ಸರ್, ತೀನ್ಂಚ್ ಮ್ಹಯ್ನೆ ಉರ‍್ಲ್ಯಾತ್. ಥೊಡಿಶಿ ತಯಾರಿ ಕರುಂಕ್ ಆಸಾ.”

“ನೊವ್ರೊ ಖಂಚೊ?”

“ಮ್ಹಜಾ ಬಾಯ್ಲೆಚಾ ಒಳ್ಕಿನ್‌ ಜಾಲ್ಲಿ ಸೈರಿಕ್‌ ಸರ್!‌ ತಸಲೊ ಚೆರ್ಕೊ ಆಮ್ಚೊ ಜಾವಂಯ್ ಜಾವ್ನ್ ಮೆಳ್‌ಲ್ಲೊ, ಆಮ್ಚಾ ಚೆಡ್ವಾಚೆಂ ನಶಿಬ್ ಮ್ಹಣಾಜಾಯ್. ತೊ ಸೊಫ್ಟ್-ವೇರ್‌ ಡಿಸ್ಟ್ರಿಬ್ಯೂಟರ್ ಜಾವ್ನ್ ಕಾಮ್ ಕರ್ತಾ. ತಾಕಾ ಕಂಪೆನಿಚೆಂ ಫ್ಲೆಟ್ ಆನಿ ಕಾರ್ ಮೆಳ್ಳಾಂ ಆಸ್ತಾಂ ಮ್ಹಜಾ ಧುವೆಕ್ ಕಾಂಯ್ಚ್ ರಗ್ಳೆ ನಾಂತ್. ತಾಚೆಂ ಕುಟಾಮ್‌ಯೀ ಬರೆಂಚ್ ಮ್ಹಣ್ ಖಬರ್ ಮೆಳ್ಳ್ಯಾ ಆಮ್ಕಾಂ. ಒಟ್ಟಾರೆ ದೆವಾಚಿ ದಯಾ!” ಹಾತ್ ಜೊಡುನ್, ದೊಳೆ ವಯ್ರ್ ಕರುನ್ ದೆವಾಕ್ ಸ್ತುತಿ ದಿಲಿ ತಾಣೆ.

“ಭುರ್ಗ್ಯಾಂಚೆಂ ಬರೆಂ-ಫಾಲೆಂ ಬರ‍್ಯಾನ್ ಜಾಯ್ಶೆಂ ಕರ್ಚೊ ಆಮ್ಚೊ ವ್ಹಡಿಲಾಂಚೊ ಕಾಯ್ದೊ ನ್ಹಯ್ಂಗೀ ರಾಮಯ್ಯಾ? ಭಿಯೆನಾಕಾ, ಸಗ್ಳೆಂ ಸಾರ್ಕೆಂ ಜಾತಲೆಂ.”

“ಹಾಂವೀ ತೆಂಚ್ ಆಶೆತಾಂ ಸರ್!” ತಿತ್ಲೆಂ ಮ್ಹಣೊನ್ ರಾಮಯ್ಯಾ ಭಾಯ್ರ್ ಗೆಲೊ.

ತಿತ್ಲ್ಯಾರ್, ತಾಚೆಲಾಗಿಂ ಉಲಂವ್ಚಾ ಖಾತಿರ್ ಸೀನಿಯರ್ ಕೊನ್ಸ್‌ಟೆಬಲ್ ರವಿ ಭಿತರ್ ಆಯ್ಲೊ.

ಇನ್ಸ್‌ಪೆಕ್ಟರ್ ಕುಲಾಸೊನ್ ಆಪ್ಲ್ಯೊ ಆಸ್ಡ್ಯೊ ವಯ್ರ್ ಕರುನ್‌, ಸವಲಾ ರುಪಾರ್ ಕಪಲಾರ್ ಮಿರಿಯೊ ಘಾಲ್ಯೊ.

“ಸರ್,” ರವಿ ಮ್ಹಣಾಲೊ ಆಂವ್ಸರಾನ್, “ಮಾಯಾಚಿಂ ಆವಯ್-ಬಾಪಯ್ ಯೇವ್ನ್ ಗಲಾಟೊ ಕರುನ್ ಆಸಾತ್.”

“ಮಾಯಾ…?” ಇನ್ಸ್‌ಪೆಕ್ಟರಾಚ್ಯೊ ಆಸ್ಡ್ಯೊ ಪರತ್ ವಯ್ರ್ ಗೆಲ್ಯೊ.

“ತೆಂ ಸರ್, ಕಾಲ್ ಸಾಂಜೆರ್ ನಪಂಯ್ಚ್ ಜಾಲ್ಲೆಂ ಚೆಡುಂ.”

ಇನ್ಸ್‌ಪೆಕ್ಟರಾಕ್ ಹಿ ಕಾಂಯ್ ನವಿ ಗಜಾಲ್ ನ್ಹಯ್. ತಾಚಾ ಅನುಭವಾಂತ್ ಸಭಾರ್ ಜಣಾಂ ನಪಂಯ್ಚ್ ಜಾಲ್ಯಾಂತ್, ಥೊಡಿಂ ಖುನಿಯಾಂ ಬಾಬ್ತಿನ್, ಥೊಡಿಂ ದುಷ್ಕರ್ಮಿಂಚಾ ಪಯ್ಶ್ಯಾಂಚಾ ಆಶೆಕ್ ಲಾಗೊನ್ ಆನಿ ಥೊಡಿಂ, ವ್ಹಡಿಲಾಂಕ್‌ ಬೂದ್‌ ಶಿಕಂವ್ಚಾ ಖಾತಿರ್!. ಸಕ್ಡಾಂಕ್ ಸೊದುಂಕ್ ಭಾಯ್ರ್ ಸರ್ಲ್ಯಾರ್, ಸ್ಟೇಶನಾಂತ್ ಚಾರ್ ಡಜನ್ ಪೊಲಿಸ್ ಪುಣಿ ಜಾಯ್ ಪಡ್ತಿತ್ ಮ್ಹಣ್ ತೊ ಜಾಣಾಸ್‌ಲ್ಲೊ ತರೀ ಖಂಚ್ಯೋಯ್ ಕೆಜಿ ತಾಣೆ ಗೋಸ್ಪರಿ ಕೆಲ್ಲ್ಯೊ ನಾಂತ್. ಹರ್ಯೆಕಾ ಆವಯ್-ಬಾಪಾಯ್ಕ್, ಘೊವಾ-ಬಾಯ್ಲೆಕ್, ತಾ-ತಾಂಚಾ ಭುರ‍್ಗ್ಯಾಂ ವಿಷ್ಯಾಂತ್ ಹುಸ್ಕೊ ಆಸ್ತಾಚ್ ಮ್ಹಳ್ಳೆಂ, ಸ್ವತಾ ದೊಗಾಂ ಭುರ್ಗ್ಯಾಂಚೊ ಬಾಪಯ್ ಜಾವ್ನಾಸ್ಚೊ ಇನ್ಸ್‌ಪೆಕ್ಟರ್ ಕುಲಾಸೊ ಬರೆಂಚ್ ಜಾಣಾಸ್‌ಲ್ಲೊ. ಆಪ್ಲ್ಯಾ ಕಾಮಾಂತ್ ಬರೊಚ್ ನಾಂವಾಡ್‌ಲ್ಲೊ ಮನಿಸ್ ತೊ ತರೀ ಥೊಡ್ಯೊ ಕೆಜಿ ವೆಗಿಂ ಸೊಡಂವ್ಕ್ ಜಾತಾತ್, ತಶೆಂಚ್ ಥೊಡ್ಯೊ ಸೊಡಂವ್ಕ್ ವರ್ಸಾಂ ಲಾಗ್ತಾತ್ ತೆಂ ತಾಕಾ ಕೊಣೆಂಯ್ ಸಂಗ್ಚಿ ಗರ್ಜ್ ನಾತ್‌ಲ್ಲಿ. ತ್ಯಾ ಸುತ್ತುರಾಂತ್, ತಾಚೆಂ ನಾಂವ್ ಆಯ್ಕಲ್ಯಾರ್ ಕೋಣ್ ಜಾಲ್ಯಾರಿ ಅಭಿಮಾನಾನ್ ತಕ್ಲಿ ಹಾಲಯ್ತಾಲೆ. ಪುಣ್ ಹ್ಯಾ ದಿಸಾನಿ ತಾಚಾ ನಾಂವಾಕ್ ಕರಿ ಪುಸುಂಕ್ ಭಾತ್ಮಿದಾರಾನಿ ಸಾಧನ್ ಕೆಲ್ಲೆಂ ಜಾಲ್ಲ್ಯಾನ್, ಇನ್ಸ್‌ಪೆಕ್ಟರ್ ಕುಲಾಸೊನ್ ಜಾಗ್ರುತ್ ಆಸ್ಚಿ ಗರ್ಜ್ ಆಸ್‌ಲ್ಲಿ. ಪಾಟ್ಲ್ಯಾ ಸ ಮಹಿನ್ಯಾ ಥಾವ್ನ್ ದೋನ್ ಪ್ರಕರಣಾ, ತಾಚೆ ವರ್ವಿಂ ಸೊಡೊಂವ್ಕ್ ಜಾಂವ್ಕ್ ನಾತ್‌ಲ್ಲಿಂ. ದೊನೀ ಸಂದರ್ಭಾನಿ, ನಪಂಯ್ಚ್ ಜಾಲ್ಲಿಂ ಮಾಸೂಮ್ ಚೆಡ್ವಾಂ, ಎದೊಳೀ ಮೆಳೊಂಕ್ ನಾತ್‌ಲ್ಲಿಂ. ತಾಣೆ ಜಾಯಿತ್ತೆಂ ಸಾಧನ್ ಕೆಲ್ಲೆಂ ತರೀ ತಾಚೆ ಪೊಲಿಸ್ ಕಸಲಿಚ್ ಮಾಹೆತ್ ಆಪ್ಣಾಂವ್ಕ್ ಸಕೊಂಕ್ ನಾತ್‌ಲ್ಲೆ.

ಹೆಂ ಸಗ್ಳೆಂ ಪಾವಾನಾತ್‌ಲ್ಲ್ಯಾಕ್, ಕಾಲ್, ಮಾಯಾ ನಾಂವಾಚೆಂ ಬಾರಾ ವರ್ಸಾಂಚೆಂ ಚೆಡುಂ ನಾ ಜಾಲಾಂ. ಆವಯ್-ಬಾಪಾಯ್ಚಾ ವಾಕ್ಮೂಲಾ ಪ್ರಕಾರ್, ಚೆಡುಂ ಘರ್ ಸೊಡುನ್ ಧಾಂವೊಂಕ್ ನಾ. ಸಕ್ಕಡ್ ವ್ಹಡಿಲಾಂನಿ ಅಶೆಂಚ್ ಮ್ಹಣ್ಚೆಂ ಮ್ಹಣ್ ಇನ್ಸ್‌ಪೆಕ್ಟರ್ ಕುಲಾಸೊ ಬರೊಚ್ ಜಾಣಾಸ್‌ಲ್ಲೊ ತರೀ ತೋಂಡ್ ಸೊಡ್ನ್ ತಶೆಂ ಮ್ಹಣೊಂಕ್ ಜಾತಾವೆ? ತೊಂಡ್ ಉಗ್ತೆಂ ಕರ್ಚಾ ಪಯ್ಲೆಂ, ಕಿತೆಂ ಉಲಂವ್ಕ್ ಜಾಯ್ ತೆಂ ಪಯ್ಲೆಂಚ್ ಚಿಂತುನ್ ಪಳೆಂವ್ಚಾಂತ್, ಚತುರ್ ತೊ. ತಾಣೆ ರಾಜಕೀಯಾಂತ್ ಆಸಾಜಾಯ್ ಆಸ್‌ಲ್ಲೆಂ – ಆವ್ಕಾಸ್ ಆಸ್‌ಲ್ಲೆ ತರೀ ತಾಕಾ ನಾಂವಾಚಿ ಜಾಂವ್, ಪಯ್ಶ್ಯಾಂಚಿ ಜಾಂವ್, ಲೆಕಾವರ್ತ್ ಆಶಾ ನಾತ್‌ಲ್ಲಿ ಜಾಲ್ಲ್ಯಾನ್, ಆಪ್ಲ್ಯಾ ಹುದ್ದ್ಯಾಂತ್‌ ತ್ರಪ್ತ್‌ ಆಸ್‌ಲ್ಲೊ ತೊ ಸಭಾರ್ ವರ್ಸಾಂ ಇನ್ಸ್‌ಪೆಕ್ಟರ್ ಜಾವ್ನ್‌ಂಚ್ ಉರ್‌ಲ್ಲೊ.

“ಕಿತೆಂ ಮ್ಹಣ್ತಾತ್ ತಿಂ?” ವಿಚಾರ್ಲೆಂ ತಾಣೆ.

“ಸಾರ್ಕೆಂ ಸಾಂಗ್ಚೆಂ ತರ್, ತಿಂ ಕಿತೆಂ ಮ್ಹಣ್ತಾತ್ ತೆಂ ತಾಂಕಾಂಚ್ ಕಳಿತ್ ನಾ ಸರ್!” ಕೊನ್ಸ್‌ಟೆಬಲ್ ರವಿ ಮ್ಹಣಾಲೊ ಪರಿಗತ್ ವಿವರುನ್. “ತಾಂಕಾಂ ತಾಂಚಿ ಧುವ್ ಜಾಯ್, ಆಮಿ ಸಗ್ಳೆಂ ಕಾಮ್ ಸೊಡುನ್, ತಾಂಚಾ ಧುವೆಕ್ ಸೊಧಿಜಾಯ್ ಮ್ಹಳ್ಳೊ ಮನೋಭಾವ್ ತಾಂಚೊ.”

ಇನ್ಸ್‌ಪೆಕ್ಟರ್ ಕುಲಾಸೊ ಉಟೊನ್ ಭಾಯ್ರ್ ಆಯ್ಲೊ. ಸ್ಟೇಶನಾಂತ್ ಬರಿಚ್ ಗಡ್ದಿ ಆಸ್‌ಲ್ಲಿ. ತಾಚೆ ದೊಳೆ ರವಿಚೊ ಪಾಟ್ಲಾವ್ ಕರಿಲಾಗ್ಲೆ. ರವಿನ್ ವಚೊನ್, ಮಾಯಾಚಾ ಆವಯ್-ಬಾಪಾಯ್ಕ್ ಹಾಡುನ್ ತಾಚೆ ಮುಖಾರ್ ಉಬಿಂ ಕೆಲಿಂ. ತಾಣಿ ದೊಗಾಯ್ನಿ ತಾಕಾ ಪಳೆವ್ನ್, ಭಿಯಾನ್ಂಚ್ ಹಾತ್ ಜೊಡ್ಲೆ; ತಾಂಚಾ ದೊಳ್ಯಾಂನಿ ದುಕಾಂ ವ್ಹಾಳ್ತಾಲಿಂ.

ತಾಂಕಾಂ – ‘ಆಮಿ ಕಾಂಯ್ ಹಾಂಗಾ ಹಾತ್ ಬಾಂದುನ್ ಬಸೊಂಕ್ ನಾಂವ್’ – ಅಶೆಂ ಸಾಂಗೊನ್ ದಮ್ಕಿ ದೀವ್ನ್ ಘರಾ ಧಾಡುಂಕ್ ಜಾಯ್ ಆಸ್‌ಲ್ಲೆಂ ಇನ್ಸ್‌ಪೆಕ್ಟರ್ ಕುಲಾಸೊಕ್; ಪುಣ್ ತೊವೀ ಏಕ್ ಬಾಪಯ್ ಆನಿ ಅಸಲ್ಯಾ ಪರಿಗತಿಂತ್ ತೊ ಸಾಂಪ್ಡಾಲ್ಲೊ ತರ್, ತೊವೀ ಮಾಯಾಚಾ ವ್ಹಡಿಲಾಂ ಬರಿಚ್ ಆಕಾಂತ್ ಪಾವ್ತೊ ತೆಂ ಖಂಡಿತ್. ತಾಚೊ ಜಿನೊಸ್ ಬದಲ್ಲೊ. ತಾಣೆ ತಾಂಕಾಂ ತಾಚಾ ದಫ್ತರಾ ಭಿತರ್ ಆಪವ್ನ್ ವ್ಹೆಲಿಂ.

“ನಪಂಯ್ಚ್ ಜಾಲ್ಲ್ಯಾಂಚಾ ಪಟ್ಟೆಂತ್ ದಾಖಲ್ ಕರಿಜಾಯ್ ತರ್, 24 ಥಾವ್ನ್ 48 ವ್ಹರಾಂ ಪುಣಿ ಪಾಶಾರ್ ಜಾಯ್ಜಾಯ್.” ಇನ್ಸ್‌ಪೆಕ್ಟರ್ ಕುಲಾಸೊ ಮ್ಹಣಾಲೊ ತಾಂಕಾಂ ಸಮಧಾನ್‌ ಕರುನ್. “ತಿತ್ಲೊ ವೇಳ್ ಎದೊಳ್ ಜಾಂವ್ಕ್‌ನಾ ತರೀ ತುಮಿ ಕಾಂಯ್ ಭಿಯೆನಾಕಾತ್. ಆಮಿ ತುಮ್ಚಾ ಧುವೆಕ್ ಸೊದ್ಚಾ ವಾಟೆನ್ ಹರ್ ಪ್ರೇತನ್ ಕರುನ್‌ ಆಸಾಂವ್. ಕಸಲಿಯ್ ಖಬರ್ ಮೆಳ್ಳ್ಯಾರ್ ಆಮಿ ತುಮ್ಕಾಂ ತಕ್ಶಣ್ ಫೊನ್ ಕರ್ತಾಂವ್, ತಶೆಂಚ್ ಅವ್ಚಿತ್ ಕಾಂಯ್ ತುಮ್ಚೆಂ ಧುವ್ ಪಾಟಿಂ ಘರಾ ಯೇತ್ ತರ್,  ಆಮ್ಕಾಂಯಿ ಸಾಂಗೊಂಕ್ ಉಗ್ಡಾಸ್ ಆಸೊಂ. ಆತಾಂ ತುಮಿ ಘರಾ ವಚೊನ್ ತುಮ್ಚಾ ದೆವಾಕ್ ಏಕ್ ದಿವೊ ಪೆಟಯಾ ಆನಿ ಮಾಗಾ, ಕೊಣಾಯ್‌ಲಾಗಿಂ ಕಾಂಯ್ ಉಲಂವ್ಕ್ ವ ವಿಚಾರುಂಕ್ ವಚನಾಕಾತ್, ಭಾತ್ಮಿದಾರ್ ಪುಣಿ ಉಲಂವ್ಕ್ ಯೆತಿತ್ ತರ್ ದಾರ್ ಉಗ್ತೆಂಚ್ ಕರಿನಾಕಾತ್.” ತಾಣೆ ದಾಂಬೂನ್ ಕುಡ್ಸಿಲೆಂ!

“ಸಗ್ಳಿ ಗಜಾಲ್ ಪರತ್ ವಿವರ್ಸಿ ಕೊನ್ಸ್‌ಟೆಬಲ್,” ಸೀನಿಯರ್ ಕೊನ್ಸ್‌ಟೆಬಲ್ ರವಿಕ್ ಪಳೆವ್ನ್, ಇನ್ಸ್‌ಪೆಕ್ಟರ್ ಕುಲಾಸೊ ಮ್ಹಣಾಲೊ ಚಿಕ್ಕೆ ಗರಮ್ ತಾಳ್ಯಾನ್. ಥೊಡ್ಯಾಚ್ ವೆಳಾ ಆದಿಂ ಕಮಿಷನರಾಚೆಂ ಫೊನ್ ಆಯಿಲ್ಲೆಂ ತಾಕಾ. ಲೋಕ್ ಚಿಕ್ಕೆ ಉಚಾಂಬಳ್ ಜಾಲ್ಲ್ಯಾ ವಿಷ್ಯಾಂತ್ ಚತ್ರಾಯ್ ದಿಲ್ಲಿ ಕಮಿಷನರಾನ್. ತ್ಯಾ ಕಾರಾಣಾನ್, ಸ್ಟೇಶನಾಂತ್ಲ್ಯಾ ಚಾರ್, ಸೀನಿಯರ್ ಕೊನ್‌ಸ್ಟೆಬಲಾಂಕ್ ಮೀಟಿಂಗಾಕ್ ಆಪಯಿಲ್ಲೆ ತಾಣೆ. ಹ್ಯಾ ಪಾವ್ಟಿಂ ಹೊ ಘೊಟಾಳೊ ಸೊಡಯ್ಜಾಯಿಚ್ ಮ್ಹಣ್ ನಿರ್ಧಾರ್ ಜಾಲ್ಲೊ ತಾಚಾ ಮತಿಂತ್.

ಸೀನಿಯರ್ ಕೊನ್ಸ್‌ಟೆಬಲ್ ರವಿನ್ ಹಕೀಗತ್ ವಿವರಿಲಿ: “ಕಾಲ್ ಸಾಂಜೆರ್ ‘ಮಾಯಾ’ಕ್ ಶಾಳಾಂತ್ ಡ್ಯಾನ್ಸಾಚಾ ತರ್ಭೆತೆ ಖಾತಿರ್ ಚಡ್ ವೇಳ್ ರಾವೊಂಕ್ ಪಡ್‌ಲ್ಲ್ಯಾನ್, ತಾಣೆ ಸದಾಂಚೆಂ ಬಸ್ಸ್ ಧರುಂಕ್‌ನಾ ಮ್ಹಳ್ಳೊ ಆಮ್ಕಾಂ ದುಭಾವ್ ಆಸ್‌ಲ್ಲೊ. ಹಿ ಮಾಹೆತ್ ಶಾಳಾಂತ್ಲ್ಯಾ ಟಿಚರಾಂ ಥಾವ್ನ್ ಖಚಿತ್ ಜಾಲ್ಯಾ. ತಾಣೆ ಖಂಚೆಂ ಬಸ್ಸ್ ಧರ್ಲೆಂ ಮ್ಹಣ್ ಎದೊಳ್ ಖಚಿತ್ ಕಳಿತ್‌ನಾತ್‌ಲ್ಲೆಂ, ಪುಣ್ ಆತಾಂ ಕೊನ್‌ಸ್ಟೆಬಲ್ ರಾಮಯ್ಯಾನ್ ತಿ ಖಭಾರೀ ಸೊಧುನ್ ಕಾಡ್ಲ್ಯಾ. ಬಸ್ಸ್ ನಂ. 114-ಚಾ ಚಾಲಕಾನ್ ‘ಮಾಯಾ’ ತಸಲ್ಯಾ ಧಾಕ್ಟ್ಯಾ ಚಲಿಯೆಕ್ ಪಳೆಲಾಂ ಮ್ಹಣ್‌ಯೀ ಸಾಂಗ್ಲಾಂ. ತಾಕಾ ತಾಣೆ ತಾಂಚಾ ಘರಾ ಲಾಗ್ಸಾರ್‌ಚಾ ಪಾರ್ಕಾಲಾಗಿಂ ಪಾವ್ಣೆ-ಸ ವ್ಹರಾಂಯಿತ್ಲ್ಯಾಕ್ ದೆಂವಯ್‌ಲ್ಲೆಂ. ತಿತ್ಲೆಂಚ್, ತ್ಯಾ ಉಪ್ರಾಂತ್ ಕಿತೆಂ ಜಾಲಾಂ ತೆಂ ಕಳಿತ್‌ನಾ ಸರ್.” ರವಿನ್ ಉಲವ್ಣೆ ರಾವಯ್ಲೆಂ.

“ಬಸ್ಸಾಚಾ ಚಾಲಕಾಚಾ ಸಾಂಗ್ಣೆಚೆಂ, ಆನಿ ತಾಚಾ ಚಲನ್-ವಲನಾಚೆಂ ಪರಿಶೀಲನ್ ಕರ್ಚೆಂ ಗರ್ಜೆಚೆಂ. ತೊಚ್ ಹಾಂತುಂ ಮೆತೆರ್ ಜಾಂವ್ಕ್ ನಾ ಮ್ಹಳ್ಳೆಂಯೀ ಖಚಿತ್ ಕರಿಜಾಯ್” ಇನ್ಸ್‌ಪೆಕ್ಟರ್ ಕುಲಾಸೊ ಮ್ಹಣಾಲೊ. “ಪಾರ್ಕಾಚಾ ಭಂವ್ತಣಿಂಚಾ ಘರಾಂನಿ ವಿಚಾರ್ನ್ ಪಳೆಂವ್ಚಿಯ್ ಗರ್ಜ್ ಆಸಾ. ಪಾರ್ಕಾ ಭಂವ್ತಣಿ ಕಿತ್ಲಿಂ ಕಾರಾಂ ಪಾರ್ಕ್ ಕರ್ನ್ ಆಸ್‌ಲ್ಲಿಂ ಮ್ಹಳ್ಳಿ ಗಜಾಲ್ ಕಳೊಂಕ್ ಸಾಧ್ಯ್ ಜಾಲ್ಯಾರ್ ಬರೆಂಚ್. ತ್ಯಾ ಬರಾಬರ್, ಚೆಡ್ವಾಕ್, ಬೊಯ್-ಫ್ರೆಂಡ್ ಪುಣಿ ಆಸ್‌ಲ್ಲೆಗಿ ಮ್ಹಣ್ ಸೊಧುನ್ ಕಾಡಿಜಾಯ್.”

“ಬೊಯ್-ಫ್ರೆಂಡ್ ಸರ್?” ಕೇಸ್ ಪಿಕ್‌ಲ್ಲೊ ಸೀನಿಯರ್ ಕೊನ್ಸ್‌ಟೆಬಲ್ ರಾಮಯ್ಯಾ ದೊಳೆ ವಾಠಾರಿಲಾಗ್ಲೊ. “ತಾಚಿ ಪ್ರಾಯ್ ಚಿಕ್ಕೆ ಲ್ಹಾನ್ ನ್ಹಯ್?”

“ತೆಂ ಚಿಂತಪ್ ಆಮ್ಚಾ ಕಾಲಾರ್ ಚಲ್ತಾಲೆಂ, ರಾಮಯ್ಯಾ!” ಬಾರೀಕ್ ಹಾಸೊ ದೀವ್ನ್ ಮ್ಹಣಾಲೊ ಇನ್ಸ್‌ಪೆಕ್ಟರ್ ಕುಲಾಸೊ. “ಆತಾಂಚಿ ಪರಿಗತ್‌ಚ್ ದುಸ್ರಿ. ಕೋಣ್ ಪುಣಿ ಪಾರ್ಕಾ ಭಂವ್ತಣಿ ಫೊಟೊ ಕಾಡುನ್ ಆಸ್‌ಲ್ಲೆ ತರ್ ಬರೆಂಚ್ ಆಸ್‌ಲ್ಲೆಂ. ತಸಲಿ ಕುಮಕ್ ಪಬ್ಲಿಕಾ ಥಾವ್ನ್ ಮೆಳಜಾಯ್ ತರ್, ಟಿ.ವಿ. ಚೆರ್ ಚೆಡ್ವಾಚಾ ತಸ್ವೀರೆಸಂಗಿಂ, ಮಾಹೆತ್ ಘಾಲಿಜಾಯ್. ಚೆಡ್ವಾಚಿಂ ಆವಯ್-ಬಾಪಯ್ ಹಾಕಾ ತಯಾರ್ ಆಸಾತ್‌ಗಿ ಮ್ಹಳ್ಳೆಂ ವಿಚಾರ್ನ್ ಪಳೆಂವ್ಚೆಂಯ್ ಗರ್ಜೆಚೆಂ. ಸದ್ದ್ಯಾಕ್ ಇತ್ಲೆಂ ಕರ್ನ್ ಮ್ಹಾಕಾ ತುಮಿ ಖಬರ್ ದಿಜಾಯ್. ತುಮ್ಕಾ ದೋನ್ ವ್ಹರಾಂಚೊ ವೇಳ್ ದಿತಾಂ ಹಾಂವ್.”

“ಛೆ, ದೋನ್ ವ್ಹರಾನಿ ಕಾಲೆಂ ಕರುಂಕ್ ಜಾತಾ ಸರ್…” ಪಿಂರ್ಗಲೊ ತಾಂಚಾ ಪಯ್ಕಿಚೊ ಎಕ್ಲೊ ಕೊನ್ಸ್‌ಟೆಬಲ್.

“ದೋನ್ ವ್ಹರಾಂ,” ಇನ್ಸ್‌ಪೆಕ್ಟರ್ ಕುಲಾಸೊನ್ ಆಪ್ಲೊ ಹಾತಾ ತಳ್ವೊ ಮೆಜಾರ್ ಆಪ್ಟಿಲೊ. “ಡಿಸ್ಮಿಸ್ಡ್!” ತಾಣೆ ಮೀಟಿಂಗ್ ಅಕೇರ್ ಕೆಲೆಂ.

“ಚೆಡ್ವಾಚಿ ಫೊಟೊ, ಟಿ.ವಿ. ಚೆರ್ ಘಾಲುಂಕ್ ವ್ಹಡಿಲಾಂ ಒಪ್ಪಾಲ್ಯಾಂತ್, ಸರ್.” ಮಾಯಾಚಿ ತಸ್ವೀರ್‌ ವಣದಿಚೆರ್‌ ಚಿಡ್ಕಾವ್ನ್‌ ಮ್ಹಣಾಲೊ ಸೀನಿಯರ್ ಕೊನ್ಸ್‌ಟೆಬಲ್ ರವಿ.

“ಬರೆಂಚ್,” ಮ್ಹಣಾಲೊ ಇನ್ಸ್‌ಪೆಕ್ಟರ್ ಕುಲಾಸೊ. “ಸಾಂಜೆಚಾ ಆಟ್ ವ್ಹರಾಂಚೆರ್ ಹ್ಯಾ ಖಬ್ರೆಚೊ ಉಲ್ಲೇಖ್ ಜಾಂವ್ದಿ. ಹೆರ್ ಕಾಂಯ್ ಮಾಹೆತ್ ಆಸಾ?”

“ತೆಂ ನಪಂಯ್ಚ್ ಜಾಲ್ಲ್ಯಾ ವೆಳಾರ್, ತ್ಯಾ ಪಾರ್ಕಾ ಭಂವ್ತಣಿ ಮಸ್ತ್ ಕಾರಾಂ ಆಸ್‌ಲ್ಲಿಂ ಸರ್.” ಸೀನಿಯರ್ ಕೊನ್ಸ್‌ಟೆಬಲ್ ರಾಮಯ್ಯಾನ್ ತಾಳೊ ಸಡಿಳ್ ಕೆಲೊ. “ಹಿ ಸದಾಂಚಿ ಗಜಾಲ್. ಥಂಯ್ಚ್ ಲಾಗ್ಸಾರ್ ಬೊಂಡೆ ವಿಕ್ಚಾ ಮನ್ಶ್ಯಾನೀ ಕಾಂಯ್ ಪಳೆಲ್ಲೆಂನಾ.”

“ಲಾಗ್ಸಾರ್ ಕ್ಲೋಸ್-ಸರ್ಕಿಟ್ ಟಿ.ವಿ. ಕೆಮರಾ ಆಸ್‌ಲ್ಲೆ ತರ್ ಬರೆಂ ಆಸ್‌ಲ್ಲೆಂ!” ಇನ್ಸ್‌ಪೆಕ್ಟರ್ ಕುಲಾಸೊ ಮ್ಹಣಾಲೊ ಕಪಾಲಾಕ್ ಮಿರಿಯೊ ಘಾಲುನ್. “ಪುಣ್ ಹರ್ಯೇಕ್ ಆಮಿ ಚಿಂತ್‌ಲ್ಲೆ ಬರಿ ಜಾಯ್ನಾ. ಆಸೊಂ, ಕೋಣ್ ಪುಣಿ ಖಬರ್ ದಿತೆಲೆ ತೆಂ ಖಂಡಿತ್.  ಹಿಂ ಕಾಂಯ್ ಗ್ರೇಸ್ತ್ ಮನ್ಶಾಂ ನ್ಹಯ್ ಜಾಲ್ಲ್ಯಾನ್, ಕೊಣೆಂಯ್ ಪಯ್ಶ್ಯಾಂ ಖಾತಿರ್ ಚೆಡ್ವಾಕ್ ಅಪಹರ್ಸಿಲಾಂ ಮ್ಹಣೊಂಕ್‌ಯೀ ಸಾಧ್ಯ್‌ನಾ. ತುಮಿ, ತುಮ್ಚೆಂ ಕಾಮ್ ಮುಂದರಿಯಾ. ಸೊದ್ನಾ ಚಾಲು ಆಸೊಂದಿತ್. ಉಗ್ಡಾಸ್ ದವರಾ – ಹ್ಯಾ ಚಲಿಯೆಕ್ ಅಪಹರ್ಸಿಲಾಂ ವ್ಹಯ್‌ಚ್ಚ್ ತರ್, ಅಪಹರ್ಸಿಲ್ಲೊ ಮನಿಸ್ ಆಮ್ಚಿಂ ಕಾಮಾಂ ಪಳೆವ್ನ್ಂಚ್ ಆಸ್ತಲೊ. ಭಾತ್ಮಿಧಾರಾಂಕ್ ಸಗ್ಳೆಂ ಸಾಂಗೊಂಕ್ ವಚನಾಕಾತ್. ಆಮ್ಚಾ ಚಿಂತ್ಪಾಕ್ ಆನಿ ಕ್ರಿಮಿನಲಾಂಚಾ ಚಿಂತ್ಪಾಕ್ ರಾತ್-ದೀಸ್ ಫರಕ್ ಆಸಾ ಮ್ಹಳ್ಳೆಂಯಿ ಉಡಾಸ್ ಆಸೊಂ. ಕ್ರಿಮಿನಲಾನ್ ಚಿಂತ್ಚೆಬರಿ ಆಮಿ ಚಿಂತ್ಲ್ಯಾರ್ ಮಾತ್ ತಾಚಾ ಕರ್ತುವಾಂಕ್ ಆಡ್ ಪಾಯ್ ದವರುಂಕ್ ಸಾಧ್ಯ್ ಆಸಾ. ಹೊಚ್ಚ್ ಜಾವ್ನಾಸಾ ಘುಟ್, ಕ್ರಿಮಿನಲಾಂಕ್ ಧರ್ಚೊ. ದೆಕುನ್ ಆಮ್ಚಾ ಸೊದ್ನೆ ಬಾಬ್ತಿನ್ ಕಸಲೊಚ್ ಘುಟ್ ಫೊಡ್ಚೊ ನ್ಹಯ್!”

ಸಾಂಜೆಚಿ ಖಬರ್ ಪ್ರಸಾರ್ ಜಾವ್ನ್ ಏಕ್ ವ್ಹರ್ ಜಾಯ್ಜಾಯ್ ತರ್, ಪೊಲಿಸ್ ಸ್ಟೇಶನಾಂತ್ ವಿಶೇಸ್ ಖಬರ್ ಆಯ್ಲಿ. ಕೊಣೆಂಗಿ ಬಾವ್ಡ್ಯಾನ್, ಆಪ್ಲಿಂ ಭುರ್ಗಿಂ ಪಾರ್ಕಾಂತ್ ಖೆಳ್ತಾನಾ, ಸೆಲ್-ಫೊನಾರ್ ವಿಡಿಯೊ ಕಾಡ್‌ಲ್ಲೊ. ತ್ಯಾ ವಿಡಿಯೊಂತ್, ತಾಚಾ ಭುರ್ಗ್ಯಾನಿ ಖೆಳ್ಚಾ ಸಂಗಿಂ, ಎಕಾ ತರ್ನ್ಯಾ ಪ್ರಾಯೆಚಾ ಚಲಿಯೆನ್, ಕಾರಾಂತ್ ರಿಗ್ಚೆಂ ದ್ರಷ್ಯ್, ಚುಕಾಮುಕಿಂ ರೆಕೊರ್ಡ್ ಜಾಲ್ಲೆಂ. ಅಪ್ಣಾಕ್ ಸಂಪೆಂ ಇನಾಮ್ ದಿಲ್ಯಾರ್, ತೊ ವಿಡಿಯೊ ಲಬ್ಯ್ ಕರ್ಚಿ ಭಾಸ್ ದಿಲ್ಲಿ ತ್ಯಾ ಮನ್ಶ್ಯಾನ್. ತಿ ಖಬರ್ ಫೊನಾರ್ ಆಯ್ಕಲ್ಲೊ ಇನ್ಸ್‌ಪೆಕ್ಟರ್ ಕುಲಾಸೊ ತ್ಯಾ ವೆಳಾರ್ ಘರಾ ಆಸ್‌ಲ್ಲೊ. ಆಪ್ಣಾಚೆಂ ನಶೀಬ್ ಚಿಂತುನ್, ಹಾಸ್ಲೊ ತೊ. ವಿಡಿಯೊಂತ್ಲ್ಯಾ ರೆಕೊರ್ಡಿಂಗಾಕ್ ಲಾಗೊನ್ ಆಪ್ರಾಧ್ಯಾಕ್ ಕಯ್ದ್ ಕರುಂಕ್ ಸಾಧ್ಯ್ ಜಾಲ್ಯಾರ್, ಬರ್ಪೂರ್ ಇನಾಮ್ ಭಾಸಾಂವ್ಕ್ ತಾಣೆ ಮನ್ ಕೆಲೆಂ ತರೀ, ಕಮಿಶನರಾಲಾಗಿಂ ವಿಚಾರ್ನಾಸ್ತಾಂ ಖಂಚೊಯ್ ನಿರ್ಧಾರ್ ಘೆಂವ್ಕ್ ಮನ್ ನಾತ್‌ಲ್ಲ್ಯಾ ತಾಣೆ ಫೊನ್ ಉಕಲ್ಲೆಂ.

ರಾಜ್ಯ್ ಚುನಾವಣ್ ಚಡ್ ಪಯ್ಸ್ ನಾ ತೆಂ, ಕಮಿಷನರ್ ಬರೊಚ್ಚ್ ಜಾಣಾಸ್‌ಲ್ಲೊ. ಆಪ್ರಾಧ್ಯಾಕ್ ಧರ್ಲ್ಯಾರ್, ತ್ಯಾ ವರ್ವಿಂ ರಾಜಕೀಯ್ ಫುಡಾರ‍್ಯಾಂಕ್ ಮೆಳ್ಚೊ ಪ್ರಚಾರ್ ಸಾಂಗ್ಚೊ ನ್ಹಯ್. ಅಸಲೊ ಅವ್ಕಾಸ್ ಕಿತ್ಲೆ ಪಯ್ಶೆ ದಿಲ್ಯಾರೀ ಮೆಳನಾ ತೆಂ ಜಾಣಾಸ್‌ಲ್ಲ್ಯಾ ಕಮಿಶನರಾನ್, ಇನ್ಸ್‌ಪೆಕ್ಟರ್ ಕುಲಾಸೊಚಾ ಆಲೊಚನೆಕ್ ಬರೊಚ್ ಪಾಟಿಂಬೊ ದಿಲೊ.

ಪರ್ವಣ್ಗಿ ಮೆಳ್ತಚ್, ಇನ್ಸ್‌ಪೆಕ್ಟರ್ ಕುಲಾಸೊನ್, ಸೀನಿಯರ್ ಕೊನ್ಸ್‌ಟೆಬಲ್ ರವಿಕ್ ಫೊನ್ ಕರುನ್, ತಯಾರ್ ರಾವೊಂಕ್ ಸಾಂಗ್ಲೆಂ ಆನಿ ಆಪ್ಲೆಂ ಖಾಸ್ಗಿ ಕಾರ್ ಘೆವುನ್ ರವಿಚಾ ಘರಾ ಕುಶಿನ್ ಭಾಯ್ರ್ ಸರ್ಲೊ ತೊ. ಅಸಲಿ ಸಂಗತ್‌, ಭಾತ್ಮಿಧಾರಾಂಚಾ ಖಬ್ರೆವಿಣೆ ಕರ್ಚಿ ಗರ್ಜ್‌ ದಿಸ್ಲಿ ತಾಕಾ.

ಅರ್ಧ್ಯಾ ವ್ಹರಾ ಭಿತರ್, ತೆ ದೊಗೀ ವಿಡಿಯೊ ಕಾಡ್‌ಲ್ಲ್ಯಾ ಮನ್ಶ್ಯಾಚಾ ಘರಾ ಪಾವ್ಲೆ.

ಪಾಂಚ್ ಹಜಾರ್ ರುಪಯ್ ಇನಾಮ್ ದಿಂವ್ಚಿ ಭಾಸಾವ್ಣಿ ದೀವ್ನ್, ವಿಡಿಯೊ ಪಳೆಂವ್ಕ್ ಬಸ್‌ಲ್ಲ್ಯಾ ಇನ್ಸ್‌ಪೆಕ್ಟರ್ ಕುಲಾಸೊಚೆಂ ಪೀಂತ್ ಖದ್ವಳ್ಳೆಂ. ಅಪಹರಣ್ ಕರ್ಚಾ ಮನ್ಶ್ಯಾಂಕ್ ಕಾಂಠಾಳ್ತಾಲೊ ತೊ – ತೇಂಯ್ ಭುರ್ಗ್ಯಾಂಕ್ ಅಪಹರಣ್ ಕರ್ತೆಲ್ಯಾಂಚೆರ್ ತಾಕಾ ವೊರ್ತೊ ತಾತ್ಸಾರ್ ಆಸ್‌ಲ್ಲೊ. ತಾಚಾ ಮಟ್ಟಾಕ್ ತಸಲೆ ಮನಿಸ್ ಸಾಮಾಜಿಂತ್ಲೆ ನಾಲಿಯೊ ಜಾವ್ನಾಸ್‌ಲ್ಲೆ.

ಸಕಾಳಿಂ ರಾಮಯ್ಯಾನ್, ಘಯ್ರೊಮ್ ನಿತಳ್ ಕರ್ಚಾ ವಿಶಿಂ ಉಲಯಿಲ್ಲೊ ಉಗ್ಡಾಸ್ ಆಯ್ಲೊ ತಾಕಾ. ಖಂಚಾ ಘರಾಂತ್‌ ಘಯ್ರೊಮ್‌ ನಾ? ಘರಾಂತ್ಲೊ ಘಯ್ರೊಮ್ ನಿತಳ್ ಕರ‍್ಯೆತ್, ಪುಣ್ ಕಾಳ್ಜಾಂತ್ಲೊ ಘಯ್ರೊಮ್? ಕೊಣಾಚಾ ಕಾಳ್ಜಾಂತ್ ಕಸಲೊ ಘಯ್ರೊಮ್ ಆಸಾ ತೆಂ ಕಳ್ಚೆಂ ಸುಲಭಾಯೆಚಿ ಗಜಾಲ್‌ ನ್ಹಯ್.

‘ಮಾಯಾ’ ತಸಲ್ಯಾ ಎಕಾ ಭುರ್ಗ್ಯಾನ್ ಕಾರಾಂತ್ ರಿಗ್ಚೆಂ ಘಯ್ರೆಂ-ಘಯ್ರೆಂ ದಿಸ್ತಾಲೆಂ ತರೀ ಒಳೊಕ್ ಕಳ್ಚೆ ತಿತ್ಲೊ ಸ್ವಶ್ಟ್‌ ನಾತ್‌ಲ್ಲೊ ತೊ ವಿಡಿಯೊ. ಕಾರಾಚೆಂ ನಂಬರ್‌ಯೀ ಘಯ್ರೆಂ-ಘಯ್ರೆಂಚ್ ದಿಸ್ತಾಲೆಂ. ಪುಣ್ ಏಕ್ ಸೂಕ್ಶ್ಮ್ ಸಂಗತ್ ಇನ್ಸ್‌ಪೆಕ್ಟರ್‌ ಕುಲಾಸೊಚಾ ಮತಿಕ್ ಗೆಲಿ – ಚೆಡುಂ ಆಪ್ಲ್ಯಾಚ್ ಖುಶೆನ್ ಕಾರಾಂತ್ ರಿಗ್‌ಲ್ಲೆಂ.

ತರ್, ಚೆಡುಂ ಆಪ್ಲ್ಯಾಚ್ ಖುಶೆನ್ ಪೊಳೊನ್ ಪುಣಿ ಧಾಂವೊಂಕ್ ನಾಮೂ? ಮತಿಂತ್ ದುಬಾವ್ ಉದೆಲೊ ತರೀ ತಾಣೆ ಕೊನ್ಸ್‌ಟೆಬಲ್ ರವಿಲಾಗಿಂ ಕಿತೆಂಚ್ ಮ್ಹಳೆಂನಾ; ಕಿತ್ಯಾಕ್ ಮ್ಹಳ್ಯಾರ್, ಅಪಹರಣ್ ಕರ್ಚೆ ಮನಿಸ್, ಭುರ್ಗ್ಯಾಂಕ್ ಫಟವ್ನ್, ಕಾರಾರ್ ಘರಾ ಪಾವಯ್ತಾಂ ಮ್ಹಳ್ಳೆಂ ನೀಬ್ ದೀವ್ನ್, ಭುರ್ಗ್ಯಾನಿ ಖುಶೇನ್ ಕಾರಾಂತ್ ಬಸ್‌ಲ್ಲೆ ದಾಖ್ಲೆಯೀ ಆಯ್ಕಲ್ಲೆ ತಾಣೆ. ಖಂಚೆಯ್ ತಜ್ವೀಜ್ ಕರುನ್ ಪಳೆಲ್ಯಾ ಶಿವಾಯ್ ಆಪ್ಲಿ ಅಭಿಪ್ರಾಯ್ ದಿಂವ್ಚೆಂ ಸಾರ್ಕೆಂ ದಿಸ್ಲೆಂನಾ ತಾಕಾ.

ಆತಾಂ ತಾಕಾ ವಿಡಿಯೊ ಎಡಿಟಿಂಗ್ ಕರ್ಚಾ ಅನುಭವ್ಯಾಚಿ ಗರ್ಜ್ ಆಸ್‌ಲ್ಲಿ. ತಾಣೆ ಕ್ರೈಮ್-ಬ್ರಾಂಚಾಚಾ ಇನ್ಸ್‌ಪೆಕ್ಟರ್ ಪುರುಶೋತ್ತಮಾಚಿ ಕುಮಕ್ ವಿಚಾರ್ಲಿ.

ಏಕ್ ಪಾವ್ಟಿಂ ಕಾರಾಚೆಂ ನಂಬರ್ ಕಳ್ಳೆಂ ತರ್, ಚಡಾವತ್ ಮಾಹೆತ್ ಕಳ್‌ಲ್ಲೆಬರಿಚ್ಚ್. ನಂಬರ್ ಕಳ್ತಚ್ಚ್, ತಾಂಚಿ ಪಯ್ಲಿ ಜವಾಬ್ಧಾರಿ ಜಾವ್ನ್ ಆಸ್‌ಲ್ಲಿ – ಮಾಯಾ ಆಜುನೀ ಜಿವಂತ್ ಆಸಾ ತರ್ – ತಾಕಾ ಬಂದನ್ ಮುಕ್ತ್ ಕರ್ಚಿ. ಆಪ್ರಾಧಿಯೀ ಮೆಳ್ಳೊ ತರ್, ಎಕಾ ಫಾರಾನ್ ದೋನ್ ಸುಕ್ಣಿಂ ಮಾರ್‌ಲ್ಲೆಬರಿ. ತಿತ್ಲೆಂಚ್ ನ್ಹಯ್ ಆಸ್ತಾಂ, ಹೆಂ ಪ್ರಕರಣ್, ಆಪ್ಣಾಚಾ ನಾಂವಾಕ್‌ ಕರಿ ಪುಸುಂಕ್‌ ರಾಕೊನ್‌ ಆಸ್ಚಾ ಭಾತ್ಮಿಧಾರಾಂಚೆಂ ತೋಂಡ್‌ಯೀ ಧಾಂಪಯ್ತೆಲೆಂ ಜಾಲ್ಲ್ಯಾನ್, ತೀನ್ ಸುಕ್ಣಿಂ ಮಾರ್ಚೊ ಗುಪಿತ್ ಉದ್ದೇಶ್ ಇನ್ಸ್‌ಪೆಕ್ಟರ್ ಕುಲಾಸೊಚಾ ಮತಿಂತ್ ಉದೆಲೊ.

“ಇನ್ಸ್‌ಪೆಕ್ಟರ್ ಪುರುಶೋತ್ತಮನ್ ಕಾರಾಚೆಂ ನಂಬರ್ ಆನಿ ರಿಜಿಸ್ಟ್ರೇಶನಾಚೊ ಪತ್ತೊ ದಿಲಾ ಸರ್!” ಅಂವ್ಸರಿಂ ಭಿತರ್ ರಿಗ್‌ಲ್ಲೊ ಸೀನಿಯರ್ ಕೊನ್ಸ್‌ಟೆಬಲ್ ರವಿ ಮ್ಹಣಾಲೊ ಗಂಭಿರಾಯೆನ್.

“ತರ್ ತುರ್ತಾನ್ ವಾರಂಟ್ ತಯಾರ್ ಕರ್ಚೆಂ ಬರೆಂ” ಇನ್ಸ್‌ಪೆಕ್ಟರ್ ಕುಲಾಸೊ ಮ್ಹಣಾಲೊ ಸಗ್ಳೊಚ್ ಸುಡ್ಸುಡಿತ್ ಜಾವ್ನ್.

“ಪುಣ್ ಸರ್, ಏಕ್ ಗಜಾಲ್-” ರವಿ ನರ್ಗಲೊ.

“ಗಜಾಲ್? ಕಸಲಿ ಗಜಾಲ್ ರವಿ?”

“ಹಿ ಖಬರ್ ಸಾಂಗ್ಲ್ಯಾರ್ ಕೊಣೀ ಪಾತ್ಯೆಂವ್ಚೆನಾಂತ್…”

“ರವಿ!” ಸಣ್ಸಣ್ಲೊ ಇನ್ಸ್‌ಪೆಕ್ಟರ್ ಕುಲಾಸೊ, “ಹುಮಿಣ್ಯೊ ಉಲಂವ್ಕ್ ಸಾಂಗ್‌ಲ್ಲೊ ವೇಳ್ ನ್ಹಯ್ ಹೊ, ಸಾಂಗೊಂಕ್ ಆಸ್ಚೆಂ ಸುಡಾಳ್ ಸಾಂಗ್.!”

“ಸರ್, ಕಾರಾಚಾ ಧನಿಯಾಚೆಂ ನಾಂವ್ ಪ್ರವೀಣ್ ಕುಮಾರ್ ಸರ್.”

“ತಾಂತುಂ ಪಾತ್ಯೆಂವ್ಕ್‌ ಕಿತೆಂ ಆಸಾ?”

“ಹೊ ಪ್ರವೀಣ್ ಕುಮಾರ್, ಸೀನಿಯರ್ ಕೊನ್ಸ್‌ಟೆಬಲ್ ರಾಮಯ್ಯಾಚೊ, ಮುಕ್ಲೊ ಜಾಂವಯ್ ಸರ್!”

“ಅರೆ ದೆವಾ,” ಇನ್ಸ್‌ಪೆಕ್ಟರ್ ಕುಲಾಸೊಕ್ ಪರಿಗತಿಚಿ ಗಂಭಿರಾಯ್ ಚಿಂತುನ್ ಲೋಂವ್ ಉಬಿ ಜಾಲಿ.

“ರಾಮಯ್ಯಾಕ್ ಕಶೆಂ ಸಾಂಗ್ಚೆಂ ಸರ್?”

“ಬರೆಂ ರವಿ, ಪಾಟಿಂ ಮುಕಾರ್ ಕರುನ್ ನರ್ಗೊನ್ ರಾವೊಂಕ್ ವೇಳ್ ನಾ.” ಇನ್ಸ್‌ಪೆಕ್ಟರ್ ಕುಲಾಸೊ ಮ್ಹಣಾಲೊ  ಪರಿಸ್ಥಿತಿ ಲಗಾಮೆಂತ್ ದವರ್ಚಿ ಗರ್ಜ್ ಸಮ್ಜೊನ್‌, “ಚೆಡ್ವಾಚೊ ಪತ್ತೊ ಸೊಧುನ್ ಕಾಡುಂಕ್ ಆಸಾ. ವೆಗಿಂ ವಾರಂಟಾಚಿ ವಿಲೆವಾರಿ ಕರ್, ಆನಿ ರಾಮಯ್ಯಾಕ್ ಭಿತರ್ ಧಾಡ್. ಹಾಂವ್ ತಾಕಾ ಸಮ್ಜಯ್ತಾಂ”

“ಆಪ್ಲಿ ಪತಿಣ್ ಹುಶಾರ್ ನಾ ಮ್ಹಣ್ ತೊ ಘರಾ ಗೆಲಾ ಸರ್.” ರವಿ ಮ್ಹಣಾಲೊ ಅಸಹಾಯಕ್ ಜಾವ್ನ್.

ಭಾತ್ಮಿಧಾರಾಂಚಿ ಗಡ್ದಿ ಲೆಕಾಕ್ ಮಿರ್ವಾಲ್ಲಿ. ಸ್ಟೇಶನಾಂತ್ ರಾವೊಂಕ್ ಜಾಗೊ ನಾತ್‌ಲ್ಲೊ. ಭಾಯ್ರ್-ಭಿತರ್ ವೆಚ್ಯಾ ಹರ್ಯೆಕ್ಲ್ಯಾಚೊಯ್ ಫೊಟೊ ಆನಿ ವಿಡಿಯೊ ಕಾಡುನ್ ಆಸ್‌ಲ್ಲ್ಯಾ ಕೆಮರಾಂಚಾ ಫ್ಲ್ಯಾಶಾ ಧರ್ಮಾನ್ ಸಗ್ಳ್ಯಾ ಸ್ಟೇಶನಾಂತ್ ದಿವಾಳೆ ಬರಿ ಉಜ್ವಾಡ್ ಫಾಂಕ್‌ಲ್ಲೊ!

ಸಭಾರ್ ದಿಸಾಂ ಉಪ್ರಾಂತ್, ಇನ್ಸ್‌ಪೆಕ್ಟರ್ ಕುಲಾಸೊಲಾಗಿಂ ಭಾತ್ಮಿಧಾರಾಂಚಾ ಸವಲಾಂಕ್ ಥೊಡ್ಯೊ ಪುಣಿ ಜಾಪಿ ಆಸ್‌ಲ್ಲ್ಯೊ! ಪ್ರವೀಣ್ ಕುಮಾರಾ ಥಾವ್ನ್ ಸತ್ ಖಬರ್ ಕಾಡ್ಚಾಂತ್ ತಾಚೆ ಕೊನ್ಸ್‌ಟೆಬಲ್ ಜೈತೆವಂತ್ ಜಾಲ್ಲೆ. ತಿ ಖಬರ್ ಕಾಡ್ಚಾ ವಾಟೆನ್, ಪ್ರವೀಣಾಕ್ ಕಿತ್ಲೊ ತಾಣಿ ಧಾಡಾಯ್ಲಾ ಮ್ಹಳ್ಳ್ಯಾ ವಿಶಿಂ ವಿಚಾರ್ ಕರ್ಚಾ ರಗ್ಳ್ಯಾಂಕ್ ಗೆಲೊನಾ ಇನ್ಸ್‌ಪೆಕ್ಟರ್ ಕುಲಾಸೊ. ಮಾಯಾ ಖಂಯ್ ಆಸಾ ಮ್ಹಳ್ಳಿ ಖಬರ್ ಭಾಯ್ರ್ ಕಾಡ್‌ಲ್ಲಿ ತಾಣಿ. ಪುಣ್ ಅಸಲ್ಯಾ ಸಂಗ್ತಿಂತ್ ಪ್ರವೀಣ್ ಕುಮಾರ್ ಮಾತ್ ನ್ಹಯ್, ಹೆರ್‌ಯೀ ಮೆತೆರ್ ಜಾಲ್ಯಾತ್ ಮ್ಹಳ್ಳೊ ಬರೊಚ್ಚ್ ದುಬಾವ್ ಆಸ್‌ಲ್ಲ್ಯಾ ತಾಣಿ, ಆನಿಕೀ ಜಾಯಿತ್ತೆಂ ಕಾಮ್ ಕರುಂಕ್ ಆಸ್‌ಲ್ಲೆಂ.

“ಹ್ಯಾ ಪಾವ್ಟಿಂ ನಶೀಬ್ ಆಮ್ಚ್ಯಾ ಕುಶಿನ್ ಘುಂವ್ಲೆಂ,” ಫಾಂತ್ಯಾಫರಾರ್‌ ಚಲೊನ್‌ ಆಸ್‌ಲ್ಲ್ಯಾ ತ್ಯಾ ಪತ್ರಿಕಾ ಸಂದರ್ಶನಾಂತ್ ಕುಲಾಸೊ ಮ್ಹಣಾಲೊ ಆಪ್ಲಿ ಗಂಭಿರಾಯ್ ಸಾಂಭಾಳ್ನ್. “ಅಪಹರಣಾಕ್ ಒಳಗ್ ಜಾಲ್ಲ್ಯಾ ಚಲಿಯೆಕ್ ಆಮಿ ಸೊಧುನ್ ಕಾಡ್ಲಾಂ ಆನಿ ತಿಕಾ ತಿಚಾ ವ್ಹಡಿಲಾಂ ತಾಬೆನ್ ಕರುಂಕ್ ಸಗ್ಳಿ ವಿಲೆವಾರಿ ಚಲೊನ್‌ ಆಸಾ. ಹ್ಯಾ ಕೆಜಿ ಸಂಬಂದಿ, ಎಕಾ ವ್ಯಕ್ತಿಕ್ ದುಬಾವಾಚೆರ್ ಆಮಿ ಕಯ್ದ್ ಕೆಲಾ ಆನಿ ತಾಚೆ ಮುಕಾಂತ್ರ್, ಆದಿಂ ನಪಂಯ್ಚ್ ಜಾಲ್ಲ್ಯಾ ಹೆರ್ ದೊಗಾಂ ಭುರ್ಗ್ಯಾಂಚಿ ಖಬರ್‌ಯೀ ಕಳೊಂಕ್ ಪುರೊ ಮ್ಹಣ್ ಆಮ್ಚೊ ಭರ್ವಸೊ. ತುಮ್ಚೆಲಾಗಿಂ ಸಭಾರ್ ಸವಲಾಂ ಆಸಾತ್ ತೆಂ ಹಾಂವ್ ಜಾಣಾ, ಪುಣ್ ಸಗ್ಳ್ಯೊ ಜಾಪಿ ಆಮ್ಚೆಲಾಗಿಂ ಹ್ಯಾ ಘಡಿಯೆ ನಾಂತ್. ಆತಾಂ ಹಿ ಕೇಸ್ ಪಯ್ಲ್ಯಾ ಹಂತಾಚೆರ್ ಆಸಾ ಜಾಲ್ಲ್ಯಾನ್, ಆರೋಪಿಚೊ ಆಪ್ರಾಧ್ ರುಜು ಜಾಲ್ಯಾ ಶಿವಾಯ್, ಖಂಚೆಂಚ್ ನಾಂವ್ ಆಮಿ ಉಲ್ಲೇಖ್ ಕರ್ಚೆನಾಂವ್. ಚಡಿತ್ ಕಸಲಿಯ್ ಖಬರ್ ಮೆಳ್ಳಿ ತರ್, ಆಮಿ ತಡವ್ ಕರಿನಾಸ್ತಾನಾ ಲೊಕಾಕ್ ಕಳಿತ್ ಕರ್ತೆಲ್ಯಾಂವ್ ಮ್ಹಳ್ಳೊ ಭರ್ವಸೊ ದಿತಾಂವ್…..” ಇನ್ಸ್‌ಪೆಕ್ಟರ್ ಕುಲಾಸೊನ್ ಸುಲಭಾಯೆನ್ ಫೊಟ್ ಮಾರ್ಲಿ!

ಭಾತ್ಮಿಧಾರ್ ಆಂಗಾರ್ ಪಡೊನ್ ಸವಲಾಂ ವಿಚಾರಿಲಾಗ್ಲೆ ತರೀ, ಗುಮಾನ್ ಕರಿನಾಸ್ತಾಂ, ತಾಂಕಾಂ ಸೀನಿಯರ್ ಕೊನ್ಸ್‌ಟೆಬಲ್ ರವಿಚಾ ಹಾತಾಂತ್ ಸೊಡುನ್, ಸಂಸಾರಾ ಮುಕಾರ್ ದರ್ಬಾರ್‌ ಉಲಂವ್ಚೆಂ ಕುಸ್ಕುಟ್‌ ಮನ್‌ ನಾತ್‌ಲ್ಲೊ ಇನ್ಸ್‌ಪೆಕ್ಟರ್ ಕುಲಾಸೊ, ಚಲಾಕೆನ್ ಥಂಯ್ಚೊ ನಿಕಳ್ಳೊ. ಅಪಹರಣ್ ಜಾಲ್ಲ್ಯಾ ’ಮಾಯಾ’ಕ್ ಆಸ್ಪತ್ರೆಂತ್ ದಾಖಲ್ ಕೆಲ್ಲೆಂ ಆನಿ ಆತಾಂ ವ್ಹಡಿಲಾಂಕ್ ಖಬರ್ ದೀವ್ನ್ ಭುಜಂವ್ಚೆಂ ಕಾಮ್ ಬಾಕಿ ಆಸ್‌ಲ್ಲೆಂ. ತಿತ್ಲೆಂ ಮಾತ್ ನ್ಹಯ್, ಸೀನಿಯರ್ ಕೊನ್ಸ್‌ಟೆಬಲ್ ರಾಮಯ್ಯಾಕೀ ಮೆಳೊನ್ ಭುಜಂವ್ಚೆಂ ಕಾಮ್ ಆಸ್‌ಲ್ಲೆಂ. ಖುದ್ದ್‌ ವಚೊನ್ ರಾಮಯ್ಯಾಕ್ ಹಕೀಗತ್ ಸಾಂಗ್ಲ್ಯಾ ಶಿವಾಯ್, ಪ್ರವೀಣಾಚೆಂ ನಾಂವ್ ಭಾತ್ಮಿದಾರಾಂಕ್ ದೀಂವ್ಕ್ ಇನ್ಸ್‌ಪೆಕ್ಟರ್ ಕುಲಾಸೊಕ್ ಪುಟ್ವೊಂಕ್ ನಾತ್‌ಲ್ಲೆಂ. ದೊನೀ ಬರ್ಪೂರ್ ಸಿಂತಿಮೆಂತಾಂಚ್ಯೊ ಸಂಗ್ತಿ. ತಸಲ್ಯೊ ಸಂಗ್ತಿ ವ್ಹಡಿಲಾಂಕ್ ವಿವರುಂಚೆಂ ಕಾಮ್ ಭಾರಿಚ್ ಕಷ್ಟಾಂಚೆಂ ಮ್ಹಳ್ಳೆಂ ಇನ್ಸ್‌ಪೆಕ್ಟರ್ ಕುಲಾಸೊ ಅನುಭವಾನ್ ಜಾಣಾಸ್‌ಲ್ಲೊ ತರೀ ಹರ‍್ಯೇಕ್ ಪಾವ್ಟಿಂ ಅಸಲೊ ಸಂದರ್ಬ್ ಉದೆತಾನಾ, ಗಂಭೀರ್‌ ಕಾಲೆತಿಚಾ ತಾಚಾ ಮತಿಂತ್ ತಳ್ಮಳೆ ಜಾತಾಲೆ ಆನಿ ತಾಚೊ ತಾಳೊ ಭರೊನ್ ಯೆತಾಲೊ – ಆಪ್ಲ್ಯಾ ಭುರ್ಗ್ಯಾಂಚೊ ಮೋಗ್ ಆಸ್‌ಲ್ಲ್ಯಾ ಖಂಚಾಯ್ ದಾದ್ಲ್ಯಾಚಿಂ ಬೊಗ್ಣಾಂ ತಿಂ.

ಮಾಯಾಚಾ ವ್ಹಡಿಲಾಂಕ್ ಜಾಂವ್, ರಾಮಯ್ಯಾಚಾ ಕುಟ್ಮಾಕ್ ಜಾಂವ್, ಫಕತ್ ಫೊನ್ ಕರುನ್ ಖಬರ್ ದೀಂವ್ಕ್ ತಾಚಾ ಕೊಶೆಡ್ದಾಕ್ ಪುಟ್ವಾಲೆಂನಾ.

ಜೀಪ್ ಘೆವ್ನ್, ತಾಂಚಾ ಘರಾಂ ಕುಶಿನ್ ಭಾಯ್ರ್ ಸರ್ಲೊ ತೊ. ತಿ ಲಾಂಬ್ ರಾತ್ ಆಜೂನ್ ಅಕೇರ್ ಜಾಂವ್ಕ್ ನಾತ್‌ಲ್ಲಿ!