ಪಾಟ್ಲ್ಯಾ ಕಾಂಯ್ ವರ್ಸಾಂ ಪಾಸುನ್, ಮಂಗಳ ಗಂಗೋತ್ರಿ – ಮಂಗ್ಳುರ್ ವಿಶ್ವವಿದ್ಯಾಲಯ್, ಮಾರ್ಚ್ ಮಯ್ನಾಚ್ಯಾ ನಿಮಾಣ್ಯಾ ಹಫ್ತ್ಯಾಂತ್ ಡಿ.ಲಿಟ್ ಪದವಿಕಾ, ಮ್ಹಣ್ಜೇ ಗವ್ರವ್ ಡಾಕ್ಟರೇಟ್ ಪ್ರದಾನ್ ಕರುನ್ ಆಯ್ಲ್ಯಾ. ರಾಜ್ಯಾಂತ್ ಕೊಂಗ್ರೆಸಾಚೊ ಸೆಕುಲಾರ್ ಸರ್ಕಾರ್ ಅಧಿಕಾರಾಕ್ ಆಯ್ಲ್ಯಾ ಉಪ್ರಾಂತ್, ಡಿ.ಲಿಟ್ ಪದವಿಕಾ ಸಮಾಜ್ ಸೇವಿ ಉದ್ಯಮಿಂಕ್ ದಿತಲೆ ತರೀ, ವಿಂಚ್ಣುಕೆ ಪ್ರಕ್ರಿಯೆಂತ್ ಏಕ್ ಸಾಮಾಜಿಕ್ ನ್ಯಾಯ್ ದಿಸ್ತಾಲೊ. ಸಮಾಜಿಕ್ ಮಾದ್ಯಮಾಂನಿ ಆನಿ ಥೊಡ್ಯಾ ಪತ್ರಾಂನಿ ಮಂಗ್ಳುರ್ ವಿಶ್ವವಿದ್ಯಾಲಯಾಚ್ಯಾ ವಾರ್ಶಿಕ್ ಡಿ.ಲಿಟ್ ಪದವಿಕಾಂಕ್ ಅಮರ್ – ಅಕ್ಬರ್ – ಅಂತೊನಿ ಡಾಕ್ಟರೇಟ್ಸ್ ಮ್ಹಣ್ ನಕ್ಲಾಂ ಕರ್ತಾಲೆ ತರೀ, ಪ್ರದೇಶಾಂತ್ಲ್ಯಾ ಪ್ರಮುಕ್ ಸಮುದಾಯಾಂಕ್ ಫಾವೊತೆಂ ಪ್ರತಿನಿಧಿತ್ವ್ ಮೆಳ್ತಾಲೆಂ ಮ್ಹಳ್ಳೆಂ ಸತ್ ನೆಗಾರುಂಕ್ ಜಾಯ್ನಾ. ಸಾಹಿತಿ, ಕಲಾಕಾರ್, ಪತ್ರಕರ್ತ್ ಆನಿ ಸಮಾಜಿಕ್ ಮಾಧ್ಯಮಾಂನಿ ಬರಂವ್ಚ್ಯಾ ಪ್ರಗತಿಪರಾಂಕ್ ಸಯ್ತ್ ಉದ್ಯಮಿಂಚೊ ದುಡು ಜಾಯ್, ಪೂಣ್ ತಾಂಕಾ ಮಾನ್ ಕರ್ಚೊ ನಾಕಾ ಮ್ಹಣ್ಚ್ಯಾಂತ್ ಮ್ಹಾಕಾ ರಾಜಾಂವ್ ದಿಸಾನಾ.
ಹ್ಯಾ ಪಾವ್ಟಿಂ ಡಿ. ಲಿಟ್ ಗವ್ರವಾಕ್ ವಿಂಚ್ತಾನಾ, ಪ್ರತಿಭಾ ಆನಿ ಸೆವಾ ಲೆಕಾಕ್ ಧರ್ಚ್ಯಾಂತ್ ಮಂಗ್ಳುರ್ ವಿಶ್ವವಿದ್ಯಾಲಯಾನ್ ಕಸಲೀಚ್ ಸೊಡ್ದೊಡ್ ಕರುಂಕ್ ನಾ ಮ್ಹಳ್ಳಿ ಗಜಾಲ್ ವರ್ತ್ಯಾ ದಾದೊಸ್ಕಾಯೆಚಿ ತರೀ, ಪ್ರಕ್ರಿಯೆಂತ್ ಖಂಯ್ಗೀ ಸಮಾಜಿಕ್ ನ್ಯಾಯಾಚಿ ವಿಸರ್ ಪಡ್ಲ್ಲೆಪರಿಂ ದಿಸ್ತಾ. ಮಂಗ್ಳುರ್ ವಿಶ್ವವಿದ್ಯಾಲಯಾಚ್ಯಾ ವ್ಯಾಪ್ತೆಕ್ ಯೆಂವ್ಚ್ಯಾ ಕಥೊಲಿಕ್ ಸಮುದಾಯಾಚ್ಯಾ ರೊನಾಲ್ಡ್ ಕೊಲಾಸೊಕ್ 2024 ವ್ಯಾ ವರ್ಸಾ ಆನಿ ರೋಹನ್ ಮೊಂತೇರೊಕ್ 2025 ವ್ಯಾ ವರ್ಸಾ ಹೊ ಮಾನ್ ಫಾವೊ ಜಾಲ್ಲೊ ತರ್, ಹ್ಯಾ ಪಾವ್ಟಿಂ ಕಥೊಲಿಕ್ ಸಮಾಜೆಚ್ಯಾ ಕೊಣಾಯ್ಕೀ ಹೊ ಮಾನ್ ನಾ.
ಹಾಚೊ ಅರ್ಥ್ ಕಿತೆಂ ? ಸಮಾಜ್ ಸೇವಿ ಉದ್ಯಮಿ ಸೊಡ್ಲ್ಯಾರ್ ಮಂಗ್ಳುರ್ ವಿಶ್ವವಿದ್ಯಾಲಯಾ ಥಾವ್ನ್ ಡಿ. ಲಿಟ್. ಪದವಿಕಾ ಜೊಡ್ಚಿ ಯೋಗ್ಯತಾ ಆಸ್ಚೊ ಸಾಧಕ್ ಕಥೊಲಿಕ್ ಸಮಾಜೆಂತ್ ಎಕ್ಲೋಯ್ ನಾ ? ಏಕ್ – ದೋಗ್ ಆಸ್ಲ್ಯಾರೀ ತಾಂಕಾ ಲೆಕಾಕ್ ಧರುಂಕ್ ನಾ ? ಜರಿ ಡಿ. ಲಿಟ್ ಪದವಿಕಾ ಯೋಗ್ಯ್ ಸಾಧಕ್ ಕಥೊಲಿಕ್ ಸಮಾಜೆಂತ್ ನಾಂತ್ ತರ್ ಕಿತ್ಯಾಕ್ ನಾಂತ್ ? ಆಸಾತ್ ಜಾಲ್ಯಾರ್ ಅಂತಿಮ್ ವಳೆರಿಂತ್ ತಾಂಚೆಂ ನಾಂವ್ ಕಿತ್ಯಾಕ್ ನಾ?
ಮಂಗ್ಳುರಾಂತ್ ಕಥೊಲಿಕ್ ಸಮಾಜ್ ಸವ್ಕಾಸ್ ಆಪ್ಲೆಂ ಅಸ್ತಿತ್ವ್ ಹೊಗ್ಡಾವ್ನ್ ಆಸಾ ಮ್ಹಣ್ಚ್ಯಾಕ್ ಹಿ ಗಜಾಲ್ ಏಕ್ ದೃಶ್ಟಾಂತ್ ಜಾವ್ನ್ ಘೆವ್ಯೆತಾ. ಹೊ ವಿಚಾರ್ ಫಕತ್ ಮಂಗ್ಳುರ್ ವಿಶ್ವವಿದ್ಯಾಲಯಾಚ್ಯಾ ಡಿ.ಲಿಟ್ ಪದವಿಕಾಕ್ ಮಾತ್ ಸೀಮಿತ್ ಜಾವ್ನ್ ಉರೊಂಕ್ ನಾ. ಪಾಟ್ಲ್ಯಾ ಸಬಾರ್ ವರ್ಸಾಂ ಪಾಸುನ್ ಅನಿವಾಸಿ ವಿಭಾಗಾಂತ್ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತೆಂತೀ ಕಥೊಲಿಕ್ ಸಮಾಜೆಚೆಂ ನಾಂವ್ ನಾ.
2017 ವರ್ಸಾ ರೊನಾಲ್ಡ್ ಕೊಲಾಸೊಕ್ ದಿಲ್ಯಾ ಉಪ್ರಾಂತ್, ರಾಜ್ಯೋತ್ಸವ ಪ್ರಶಸ್ತಿ (ಅನಿವಾಸಿ) ಕಥೊಲಿಕಾಕ್ ದೀಂವ್ಕ್ ನಾ. ಪೂಣ್ 2024 ಆನಿ 2025 ದೊನೀ ವರ್ಸಾಂನಿ ಅನ್ಯೇಕಾ ಉಣ್ಯಾಸಂಕ್ಯಾತ್ ಸಮುದಾಯಾಕ್ ಪಾಟೋ ಪಾಟ್ (Back to Back) ಮೆಳುನ್ ಆಸಾ. ಡಿ.ಲಿಟ್ ವಾ ರಾಜ್ಯೋತ್ಸವ ಪ್ರಶಸ್ತಿ – ವಿಂಚ್ಣುಕೆಂತ್ ಸಾಧನ್ ಮಾತ್ ಲೆಕಾಕ್ ಧರ್ಚೆಂ ಮ್ಹಣ್ ಕಿತ್ಲೆಂ ಸಾಂಗ್ಲ್ಯಾರೀ, ರಾಜಕೀಯ್ ಪ್ರಭಾವ್ ನಾಸ್ತಾನಾ ಹ್ಯೊ ವಿಂಚ್ಣುಕ್ಯೊ ಬಿಲ್ಕುಲ್ ಜಾಯ್ನಾಂತ್ ಮ್ಹಣ್ಚಿ ಗಜಾಲ್ ಆಜ್ ಕಾಂಯ್ ಲಿಪೊನ್ ಉರೊಂಕ್ ನಾ. ಕೊಂಗ್ರೆಸಾಚೊ ಸೆಕುಲಾರ್ ಸರ್ಕಾರ್ ಕರ್ನಾಟಕಾಂತ್ ಆಧಿಕಾರಾಕ್ ಆಯ್ಲ್ಯಾ ಉಪ್ರಾಂತ್ ಎಕಾ ಉಣ್ಯಾಸಂಕ್ಯಾತ್ ಸಮುದಾಯಾಚ್ಯಾಂಕ್ ಮಾತ್ ಅನಿವಾಸಿ ರಾಜ್ಯೋತ್ಸವ ಪ್ರಶಸ್ತಿ ವಿಭಾಗಾಂತ್ ಪ್ರತಿನಿಧಿತ್ವ್ ಮೆಳ್ತಾ ಆನಿ ಕಥೊಲಿಕ್ ಅನಿವಾಸಿ ಉದ್ಯಮಿಂಕ್ ಮೆಳಾನಾ ಜಾಲ್ಯಾರ್ – ರಾಜಕಾರಣಾಂತ್ ಆನಿ ಸಮಾಜ್ಕಾರಣಾಂತ್ ಕಥೊಲಿಕ್ ಸಮಾಜ್ ಆನಿ ಸಮಾಜಾಚ್ಯಾ ಲಾಯಿಕ್ ಆನಿ ಧಾರ್ಮಿಕ್ ಮುಕೆಲ್ಯಾಂಕ್ ಆಯ್ಕಾತಾಲೊ ಕೋಣ್ ನಾ ಮ್ಹಣುಂಯೆತಾ. ಫಕತ್ ಲೆಕಾಕ್ ಜಾಯ್, ಖೆಳಾಕ್ ನಾಕಾ ತಸಲಿ ಪರಿಸ್ಥಿತಿ ಜಾಲ್ಯಾಶಿ ದಿಸ್ತಾ ಕಥೊಲಿಕ್ ಸಮಾಜಾಚಿ. ಮಂಗ್ಳುರ್ ವಿಶ್ವವಿದ್ಯಾಲಯಾಚ್ಯಾ ಡಿ.ಲಿಟ್ ಪದವಿಕಾ ವಳೆರಿಂತ್ ಕಥೊಲಿಕ್ ಸಮಾಜ್ ಭಾಯ್ರ್ ಉರ್ಲೆಲಿ ಗಜಾಲ್ ಹ್ಯಾ ದುಬಾವಾಕ್ ಪುಶ್ಟಿ ದಿತಾ.
‘ಅಸ್ಮಿತಾಯ್’ ಆನಿ ‘ಅಸ್ಥಿತ್ವಾ’ ವಯ್ರ್ ಉಲಂವ್ಚ್ಯಾ ಕಥೊಲಿಕ್ ಸಮಾಜೆಚ್ಯಾ ಲಾಯಿಕ್ ಆನಿ ಧಾರ್ಮಿಕ್ ವ್ಹಡಿಲಾಂನಿ ಗಂಭಿರ್ಪಣಿ ಆಟೊವ್ ಕರಿಜೆ ಜಾಲ್ಲಿ ಗಜಾಲ್ ಹಿ. ಕಥೊಲಿಕ್ ಸಮಾಜಾಚ್ಯಾ ಮುಕೆಲ್ಯಾಂನಿ ಫಕತ್ ಟಿಪ್ಪುಕ್ ದಾಕವ್ನ್ ದಾಂತ್ ಕಿರ್ಲಿಲ್ಯಾರ್, ಇಂಕ್ವಿಜಿಸಾಂವ್ ಮ್ಹಣ್ ಸಿನೆಮಾ ಕಾಡ್ಲ್ಯಾರ್ ಪಾವಾನಾ. ವರ್ತಮಾನಾಂತ್ ಜಿಯೆಜೆ ಜಾಲ್ಯಾರ್ – ವರ್ತಮಾನಾಚೆ ಸಮಸ್ಸೆ ಪುಡ್ ಕರುಂಕ್ ಶಿಕಜೆ ಶಿವಾಯ್, ಸಿಮೆಸ್ತ್ರಿಂತ್ ಮೊಡಿಂ ಉಸ್ತುನ್ … ಅರಾಬಾಯೊ ದಿಲ್ಯಾರ್ ಜಾಯ್ನಾ.
ವಿಪರ್ಯಾಸ್ ಪಳಯಾ – ಕಥೊಲಿಕ್ ಸಮಾಜೆಚ್ಯಾ ಭುರ್ಗ್ಯಾಂನಿ ಐ.ಎ.ಎಸ್, ಐ.ಪಿ.ಎಸ್. ಜಾಯ್ಜೆ, ಆಮ್ಚ್ಯಾಚ್ ಗಾಂವಾಂತ್ ಉದ್ಯಮಾಂ – ಕಯ್ಗಾರಿಕೊ ಬಾಂದುನ್ ಹಾಡಿಜೆ ಮ್ಹಣ್, ಕಥೊಲಿಕ್ ಸಭೆಚ್ಯಾ ಫಿರ್ಗಜ್ ಘಟಕಾಚ್ಯಾ ಅಧ್ಯಕ್ಷಾ ಥಾವ್ನ್ ಧರುನ್, ಆರ್ಚ್ ಬಿಸ್ಪಾ ಪರ್ಯಾಂತ್ ಆಮ್ಚೆ ಲಾಯಿಕ್ ಆನಿ ಧಾರ್ಮಿಕ್ ಮುಕೆಲಿ ಹಾತಾಕ್ ಮೈಕ್ ಮೆಳ್ಲ್ಲೆ ತಿತ್ಲೆ ಪಾವ್ಟಿಂ ಸಾಂಗೊನ್ಚ್ ಆಸ್ತಾತ್. ಪ್ರೋತ್ಸಾಹನ್ ದಿಂವ್ಚಿ ಬರಿ ಗಜಾಲ್. ಪೂಣ್ … ಭುರ್ಗ್ಯಾಂಕ್ ವಾಚಾ, ಶಿಕಾ ಆನಿ ಪರೀಕ್ಷಾ ಬರಯಾ ಮ್ಹಳ್ಯಾರ್ ಪುರೊ ? ಪರೀಕ್ಶಾ ಬರಯ್ಲಿ, ಬರೆ ಅಂಕ್ಯೀ ಆಯ್ಲೆ – ಮುಕಾರ್ ಕಿತೆಂ ?
ಬಾಬಾ ಸಾಹೇಬ್ ಅಂಬೇಡ್ಕರಾಚ್ಯಾ ದಯೆನ್, ಆಮ್ಚ್ಯಾ ದೇಶಾಂತ್ ಆನಿ ಪ್ರದೇಶಾಂತ್, ಸಮಾಜಿಕ್ ನ್ಯಾಯ್ ಆನಿ ಸಮುದಾಯಿಕ್ ಪ್ರತಿನಿಧಿತ್ವಾಚಿ ಗಜಾಲ್ ಅಜೂನ್ ಜೀವ್ ಆಸಾ. ನಾಗರಿಕ್ ಸೆವಾ ಆಸೊಂಕ್ ಪುರೊ ವಾ ಉಂಚ್ಲಿ ಕೋಡ್ತ್ – ನಾಗರಿಕ್ ಸೆವೆಚ್ಯಾ ಪ್ರಾಧಿಕಾರಾಂತ್ ಎಕ್ಲೊ ತರೀ ಸಾಂದೊ ಕಥೊಲಿಕ್ ಸಮಾಜೆಚೆಂ ಪ್ರತಿನಿಧಿತ್ವ್ ಕರ್ತಾ ಆನಿ ಉಣ್ಯಾಸಂಕ್ಯಾತ್ ಸಮುದಾಯಾ ಥಾವ್ನ್ ಎಕಾ ತರೀ ನಿತಿದಾರಾಕ್ ಉಂಚ್ಲ್ಯಾ ಕೊಡ್ತಿಂತ್ ನೆಮ್ತಾತ್. ಆಮಿ ಕಿತ್ಲೆಂ ನಾ ಮ್ಹಳ್ಯಾರೀ ಹ್ಯೊ ಗಜಾಲೀಯ್ ರಾಜಕೀಯ್ ಪ್ರಭಾವಾನ್ ಆನಿ ಧಾರ್ಮಿಕ್ ವ್ಹಡಿಲಾಂಚ್ಯಾ ಶಿಫಾರಸೆನ್ಚ್ ಚಲ್ತಾತ್. ವಿಶ್ವವಿದ್ಯಾಲಯಾಚ್ಯಾ ವ್ಹಡಿಲಾಂಕ್ ಆನಿ ಡಿ.ಲಿಟ್ ತಸಲ್ಯೊ ಪದವಿಕಾ ಠರಾಂವ್ಚ್ಯಾ ನಿರ್ಣಾಯಕ್ ಮಂಡಳೆಂತ್ ಆಸ್ಚ್ಯಾಂಕ್ ಫಕತ್ ‘ಸೌಹಾರ್ದ ಕ್ರಿಸ್ಮಸ್’ ಮ್ಹಣ್ ಆಪವ್ನ್ ಕೇಕ್ ದೀವ್ನ್ ಧಾಡ್ಲ್ಯಾರ್ ಪಾವಾನಾ, ಕಥೊಲಿಕ್ ಸಮಾಜಾಂತೀ ಡಿ.ಲಿಟ್ ಪದವಿಕಾಕ್ ಯೋಗ್ಯ್ ಪ್ರತಿಭಾವಂತ್ ಆಸಾತ್ ಮ್ಹಣ್ ಒಳಕ್ ಕರುನ್ ದಿಂವ್ಚೆ ಕಾಮ್ಯೀ ಧಾರ್ಮಿಕ್ ವ್ಹಡಿಲಾಂನಿ ಅಸಲ್ಯಾ ಸಂದರ್ಭಾಂನಿ ಕರಿಜೆ ಪಡ್ತಾ. ಹಾಂವೆ ಪಳಯಿಲ್ಲ್ಯಾ ಎದೊಳ್ಚ್ಯಾ ಸೌಹಾರ್ದ ಕ್ರಿಸ್ಮಸ್ ಆಚರಣಾಂನಿ ಕಥೊಲಿಕ್ ಸಮಾಜಾಚ್ಯಾ ಎಕಾ ತರೀ ಅಸಲ್ಯಾ ಪ್ರತಿಭಾವಂತಾಕ್ ಆಪವ್ನ್ ಮುಕೆಲ್ ವ್ಹಾಳ್ಯಾಕ್ ಒಳಕ್ ಕೆಲ್ಲಿ ಗಜಾಲ್ ಮ್ಹಜ್ಯಾ ಗುಮಾನಾಕ್ ಯೇಂವ್ಕ್ ನಾ. ಸಾಧನ್ ಕೆಲ್ಲ್ಯಾಂಕ್ ಸನ್ಮಾನ್ ಕರ್ಚಿ ಗಜಾಲ್ ವೆಗ್ಳಿ, ಸಾಧಕಾಂಕ್ ಮುಕೆಲ್ ವ್ಹಾಳ್ಯಾಕ್ ಒಳಕ್ ಕರುನ್ ದಿಂವ್ಚಿ ಗಜಾಲ್ ವೆಗ್ಳಿ. ಹಿ ಮುಳಾವಿ ಗಜಾಲ್ ಆಮ್ಚ್ಯಾ ಧಾರ್ಮಿಕ್ ಜಾಂವ್ ಲಾಯಿಕ್ ವ್ಹಡಿಲಾಂನಿ ಸಮ್ಜುನ್ ಘೆತ್ಲ್ಯಾ ಮ್ಹಣ್ ಮ್ಹಾಕಾ ದಿಸಾನಾ.
ಖೊಲಾಯೇನ್ ವಿಚಾರ್ ಕೆಲ್ಯಾರ್ – ಮಂಗ್ಳುರ್ ವಿಶ್ವವಿದ್ಯಾಲಯಾಚ್ಯಾ ಹ್ಯಾ ಪಾವ್ಟಿಂಚ್ಯಾ ಡಿ.ಲಿಟ್ ಪದವಿಕಾಂ ವಿಂಚ್ಣುಕೆ ಪಾಟ್ಲ್ಯಾನ್ ರಾಜಕೀಯ್ ಪ್ರಭಾವ್ ಆನಿ ಧಾರ್ಮಿಕ್ ಶಿಫಾರಸ್ ಕಾಮ್ ಕರುಂಕ್ಚ್ ನಾ ಮ್ಹಣ್ ಸಾಂಗೊಂಕ್ ಜಾಯ್ನಾ. ಉಣ್ಯಾಸಂಕ್ಯಾತ್ ಸಮುದಯಾಚ್ಯಾ ಹಾಜಬ್ಬಾಕ್ ಶಿಕ್ಪಾಶೆತಾಂತ್ ಸ್ವತಂತ್ರ್ಪಣಿ ಕೆಲ್ಲ್ಯಾ ವಾವ್ರಾಕ್ ಡಿ.ಲಿಟ್ ದಿಲ್ಯಾ ಜಾಲ್ಯಾರ್, ಉರ್ಲೆಲ್ಯಾ ದೊಗಾಂಕ್ ಕಲಾ ಆನಿ ಆರಾದಾನಾಚ್ಯಾ ಶೆತಾಂತ್ ಕೆಲ್ಲ್ಯಾ ವಾವ್ರಾ ಖಾತಿರ್ ಡಿ.ಲಿಟ್ ದಿಲ್ಯಾ. ಹಾಂಗಾ ಗುಮಾನಾಂತ್ ಘೆಜೆ ಜಾಲ್ಲಿ ಗಜಾಲ್ – ಕಲಾ ಆನಿ ಆರಾದಾನ್ ಶೆತಾಂತ್ ಡಿ.ಲಿಟ್ ಜೊಡ್ಲಲೆ ದೊಗೀ ಮಾನೆಸ್ತ್ ಎಕಾಚ್ ಸಂಸ್ಥ್ಯಾ ಖಾತಿರ್ ಸೆವಾ ದಿಲ್ಲೆ ಆನಿ ದೀವ್ನ್ ಆಸ್ಚೆ ಸಾಧಕ್. ಆನಿ ತಾಂಚಿ ಸೆವಾ ಫಕತ್ ತಾಂಚೊ ಸಮಾಜ್ ಆನಿ ಸಮಡ್ತಿಕ್ ಮಾತ್ ಸೀಮಿತ್.
ಹ್ಯಾ ತುಲನಾಂತ್ ಉದ್ಯಮಿಚ್ ತರೀ, ಹ್ಯಾ ಆದ್ಲ್ಯಾ ವರ್ಸಾಂನಿ ಮಂಗ್ಳುರ್ ವಿಶ್ವವಿದ್ಯಾಲಯಾ ಥಾವ್ನ್ ಡಿ.ಲಿಟ್ ಪದವಿಕಾ ಆಪ್ಣಾಯಿಲ್ಲ್ಯಾ ರೊನಾಲ್ಡ್ ಕೊಲಾಸೊ ಆನಿ ರೋಹನ್ ಮೊಂತೇರೊ ಹಾಂಚಿ ಸೆವಾ – ಫಕತ್ ಕಥೊಲಿಕ್ ಸಮಾಜೆಕ್ ಮಾತ್ ನಯ್, ಹರ್ ಸಮುದಾಯಾಕ್, ಹರ್ ಭಾಸಾಂಕ್, ಸಿನೆಮಾ – ನಾಟಕಾಂಕ್ ವಿಸ್ತಾರ್ಲ್ಯಾ. ವ್ಯಾಪ್ತೆನ್ ತೆ ಉದ್ಯಮೀಚ್ ತರೀ, ತಾಣಿ ಜಾತ್, ಕಾತ್, ಭಾಸ್, ಪ್ರದೇಶ್ ಮ್ಹಣ್ ಭೆದಾಭೆದ್ ಕರಿನಾಸ್ತಾನಾ ಸಮಸ್ತ್ ಸಮಾಜಾಚಿ ಸೆವಾ ಕೆಲ್ಯಾ. ತಾಂಚ್ಯಾ ದೆಣ್ಗೆನ್ ಪ್ರದೇಶಾಂತ್ – ಭಾಸ್, ಸಂಸ್ಕೃತಿ, ಕಲಾ ಫುಲ್ಲ್ಯಾ ಮಾತ್ ನಯ್, ಪ್ರದೇಶಾಚಿ ಅಭಿವೃದ್ದಿ ಜಾಲ್ಯಾ.
ಮಂಗ್ಳುರ್ ವಿಶ್ವವಿದ್ಯಾಲಯಾನ್ ಡಿ.ಲಿಟ್ ಪದವಿಕಾಕ್ ಬೋವ್ ಜೊಕ್ತ್ಯಾ ಮಾಲ್ಘಡ್ಯಾ ಸಾಧಕಾಂಕ್ ವಿಚಾರ್ ಕರೂನ್ ವಿಂಚುನ್ ಕಾಡ್ಲಾಂ ಆನಿ ತಾಂಕಾ ಹೊ ಮಾನ್ ಬೇಶಕ್ ಫಾವೊ ಮ್ಹಣ್ಚ್ಯಾಕ್ ದೋನ್ ಉತ್ರಾಂ ನಾಂತ್. ಪೂಣ್ ಎಕಾ ವಾಟೆನ್ ಸಮಾಜಿಕ್ ನ್ಯಾಯಾಚ್ಯಾ ನಾಂವಾನ್ ಸೆಕುಲಾರ್ ಸರ್ಕಾರ್ ಚಲಂವ್ಚ್ಯಾ ಕೊಂಗ್ರೆಸಾಕ್ ಸಮುದಾಯಿಕ್ ಪ್ರತಿನಿಧಿತ್ವಾಚಿ ವಿಸರ್ ಪಡ್ಲ್ಲಿ ಗಜಾಲ್ ಆನಿ ದುಸ್ರೆ ವಾಟೆನ್ ಕಥೊಲಿಕ್ ಸಮಾಜಾಕ್ ಹಕ್ಕಾನ್ ಮೆಳಾಜೆ ಜಾಲ್ಲೆ ಗವ್ರವ್ ಮೆಳಾನಾಸ್ತಾನಾ, ನಿರಂತರ್ ಅನ್ಯಾಯ್ ಜಾತಾನಾಂಯ್, ಕೊಣೆಂಗೀ ದುಶ್ಕರ್ಮಿನ್ ಖಂಯ್ಗೀ ಸಾಣಾಚ್ಯಾ ಕಾಣಿಕೆ ಡಬ್ಬ್ಯಾಂತ್ ಕೊಂಡೋಮ್ ಘಾಲೊ ಮ್ಹಣ್ ಘಡಿತಾಚೆಂ ಖಂಡನ್ ಕರುನ್ ಉಡುನ್ – ಪಡುನ್ ಪತ್ರಾ ಪರ್ಗಟ್ಣಿ ದಿಲ್ಲ್ಯಾ ಕಥೊಲಿಕ್ ಸಮಾಜೆಚ್ಯಾ ಲಾಯಿಕ್ ಆನಿ ಧಾರ್ಮಿಕ್ ಮುಕೆಲ್ಯಾಂನಿ ಆತಾಂ ಸಗ್ಳಿಂ ಇಂದ್ರಿಯಾಂ ಧಾಂಪುನ್ ನುತ್ತಾ ಬಸ್ಲ್ಲಿ ಗಜಾಲ್ ಬೋವ್ ಬೆಜಾರಾಯೆಚಿ.
ರಡ್ಲ್ಯಾ ಶಿವಾಯ್ ಭುರ್ಗ್ಯಾಕ್ ಆವಯ್ ಸಯ್ತ್ ದೂದ್ ದೀನಾ ಮ್ಹಣ್ ಮಾಲ್ಘಡ್ಯಾಂನಿ ಮ್ಹಳಾಂ ತರ್, ಕ್ರಾಂತಿವೀರ್ ಸಿನೆಮಾಂತ್ ನಾನಾ ಪಾಟೇಕರ್ ಮ್ಹಣ್ತಾ – इस दुनिया में अपना हक छीनना पड़ता है, माँगने से नहीं मिलता |
ಕಥೊಲಿಕ್ ಸಮಾಜೆಚ್ಯಾ ಲಾಯಿಕ್ ಆನಿ ಧಾರ್ಮಿಕ್ ಮುಕೆಲ್ಯಾಂನಿ ಹೊ ವಿಚಾರ್ ಸಮ್ಜುನ್, ಪತ್ರಾ – ಪರ್ಗಟ್ಣಿ ದೀವ್ನ್ ಪರ್ಗಟ್ ಆವಾಜ್ ಉಟಯ್ನಾ ಜಾಲ್ಯಾರೀ ವ್ಹಡ್ ನಯ್, ಸಂಬಂದಿತಾಂ ಲಾಗಿಂ ಏಕ್ ಉತರ್ ವಿಚಾರ್ಲ್ಯಾರ್ ಬರೆಂ. ಕಥೊಲಿಕ್ ಸಮಾಜ್ ಮ್ಹಳ್ಯಾರ್ ತುಮ್ಕಾಂ ತಿತ್ಲೋಯ್ ಕೇವಲ್ಗೀ ? ಆಮಿ ಹ್ಯಾ ದೆಶಾಚೆ ನಾಗರಿಕ್ ನಂಯ್ಗೀ ?
■ ಎಚ್ಚೆಮ್
