ವಿಮರ್ಸೊ ಎಕ್ ವೈಚಾರಿಕ್ ಚರ್ಚಾ, ಭಾಸಾಭಾಸ್ ಆನಿ ಎಕಾ ರಿತಿನ್ ಸಲಹಾ-ಸೂಚನಾಂ ದಿಂವ್ಚೆ ಎಕ್ ಹಾತೆರ್ ಜಾವ್ನಾಸಾ. ವಿಮರ್ಸೊ ಮ್ಹಳ್ಳ್ಯಾರ್ ಕಿತೆಂ, ಕಸೊ ಕರ್ತಾತ್ ಆನಿ ತಾಂತುನ್ ಕಿತೆಂ ಬರೆಂಪಣ್ ಮೆಳ್ತಾ ಮ್ಹಣುನ್ ಕಳಿತ್ ಆಸ್ಲೆಂಲ್ಯಾಂಕ್ ವಿಮರ್ಸೊ ತಾಂಚ್ಯಾ ಕಲಾ ವಾ ಸಾಹಿತಿಕ್ ವಾವ್ರಾಚ್ಯಾ ಬರೆಪಣಾಚೆಂ ಹಾತೆರ್ ಜಾತಾ. ವಿಮರ್ಶೆ ಆನಿ ಸಮೀಕ್ಶಾ ವೆಳಾಕಾಳಾತೆಕಿದ್ ಬದ್ಲಾತಾತ್. ಸಿನೆಮಾ, ಸಾಹಿತ್ಯ್, ಸಂಗೀತ್, ರಾಜಕೀಯ್ ಆನಿ ಕಲಾ ಅಶೆಂ ವಿಮರ್ಶೆಯಿ ಥರಾವಳ್ ಥರಾಂಚೆ ಆಸಾತ್.
ಸಕ್ಕಡ್ ವಿಷಯಾಂಚೆರ್ ಎಕಾಚ್ ಥರಾಚೊ ವಿಮರ್ಸೊ ಕರುಂಕ್ ಜಾಯ್ನಾ. ಎಕಾ ಬುಕಾಚೊ ವಿಮರ್ಸೊ ದಿಂವ್ಚೊ ಮ್ಹಳ್ಳ್ಯಾರ್ ತ್ಯಾ ಬುಕಾ ವಿಶ್ಯಾಂತ್ ಲೊಕಾಂಕ್ ವಾ ವಾಚ್ಪ್ಯಾಂಕ್ ಕಳಂವ್ಚೆ. ಫಿಲ್ಮಾಂ ವಿಶಿಂ ಆನಿ ತಾಂತ್ಲ್ಯಾ ಪಾತ್ರ್ ಆನಿ ನಟನಾವಿಶಿಂ ಅಭಿಪ್ರಾಯ್ ದಿಂವ್ಚೊ ಜಾವ್ನಾಸಾ ಅನ್ಯೇಕ್ ಥರಾಚೊ ವಿಮರ್ಸೊ. ಹಿ ಎಕಾ ಥರಾಚಿ ಜಾಣ್ವಾಯ್. ವಿಮರ್ಸೊ ದಿಂವ್ಚೆ ಸುಲಭಾಯೆಚೆ ಕಾಮ್ ನಂಯ್. ಬರಯ್ಲೆಲ್ಯಾ ಹರ್ಯೆಕಾ ರುಜ್ವಾತಿ ಅನಿ ರಾಜಾಂವಾಕ್ ಅದಾರ್ ಆಸಾಜಾಯ್ ದೆಕುನ್ ವಿಮರ್ಶ್ಯಾಕಾಕ್ ತಾಣೆಂ ವಾಚ್ಲೆಲ್ಯಾ, ಆಯ್ಕಲ್ಲ್ಯಾ ವಾ ತಾಕಾ ಅಭಿಪ್ರಾಯ್ ಉಚಾರುಂಕ್ ಪ್ರೇರಿತ್ ಕೆಲ್ಲ್ಯಾ ವಿಷಯಾ ವಯ್ರ್ ಮಾತ್ರ್ ನಂಯ್ ತಾಕಾ ಲಗ್ತಿ ಜಾಲ್ಯಾ ಹೆರ್ ವಿಶಯಾಂಚೇರಿ ಜಾಣ್ವಾಯ್ ಅಸ್ಚಿ ಗರ್ಜೆಚಿ. ವಿಮರ್ಸೊ ದೀಂವ್ಕ್ ವೃತ್ತಿಪರ್ ಜಾಯ್ಜಾಯ್ ಮ್ಹಣುನ್ ನಾಂ. ನಕಾರಾತ್ಮಾಕ್ ಆನಿ ಸಕಾರಾತ್ಮಕ್ ಪುಣ್ ಹಾಂಗಾಸಾರ್ ಅಭಿಪ್ರಾಯ್ ಉಚಾರ್ಚಿ ಭೋವ್ ಗರ್ಜೆಚೆ.
ವಿಮರ್ಸೊ ಕೇವಲ್ ವಾಚ್ಪ್ಯಾಚಿ ವಾ ಪ್ರೇಕ್ಷಕಾಚಿ ಅಭಿಪ್ರಾಯ್ ಮ್ಹಣುನ್ ಸಾಂಗೊಂಕ್ ಜಾಯ್ನಾ. ತಾಂತುನ್ ಅಭಿಪ್ರಾಯೆ ಸಂಗಿ, ವಿಶ್ಲೇಷಣ್, ಪಾರ್ಕುಂಚಿ ಆನಿ ಪಾಟ್ ಥಾಪ್ಡುನ್ ಆನಿಕೀ ಬರೆಂ ಕರ್ಯೆತ್ ಆಸ್ಲೆಂ ಮ್ಹಣುನ್ ಜಾಗ್ವಣ್ ದಿಂವ್ಚೊ ಭೋವ್ ಅಪುರ್ಬಾಯೆಚೊ ಗೂಣ್ ತೊ. ವಿಮರ್ಸೊ ಆನಿ ಅಭಿಪ್ರಾಯ್ ದೀಂವ್ಕ್ ಹರ್ಯೆಕ್ಲ್ಯಾಕಿ ಹಕ್ಕ್ ಆಸಾ ಆನಿ ತಾಂತು ಬರೆಪಣ್ ಜಾಂವ್ಚಿ ಸಾಧ್ಯತಾ ಚಡ್ ಆಸಾ. ಕವಿ, ನಟ್ ಯಾ ಬರವ್ಪಿ ವಿಮರ್ಶ್ಯಾಕ್ ಭಿಯೆವ್ನ್ ಅಪ್ಲಿ ಲಿಖ್ಣಿ ಯಾ ನಟನ್ ರಾವಯ್ತಾ ಯಾ ತಾಚ್ಯಾ ಬರವ್ಪಾಂತ್ ಯಾ ನಟನಾಂತ್ ಕಿತೆಂಚ್ ಬರೆಪಣ್ ಜಾಯ್ನಾ ತರ್ ತರ್ ತೊ ಕವಿ, ನಟ್ ಯಾ ಬರಯ್ಣಾರ್ ಜಾಯ್ನಾ ತೊ ಎಕ್ ನಾಂವ್ ಜೊಡುಂಕ್ ಅತ್ರೆಗ್ಚೊ ವ್ಯಕ್ತಿ ಜಾತಾ.
ವಿಮರ್ಸೊ ಮ್ಹಳ್ಳ್ಯಾರ್ ಮೊಸೊರ್, ಪೊಟಾ ಜಾಳ್, ಖೊಡಿ ಕಾಡ್ಚೆಂ, ತಾಂಕಾ ಜಾಯ್ನಾತ್ಲೆಂ ಆಮಿ ಕರ್ತಾಂವ್ ದೆಕುನ್ ತಾಂಕಾ ತೆಂ ಸೊಸಾನಾ ಅಶೆಂ ಮ್ಹಣುನ್ ಸಾಂಗ್ಣ್ಯೊ ಚಾಲ್ತೆರ್ ಆಸ್ಚ್ಯಾ ಕಾಳಾರ್, ವಿಮರ್ಸೊ ಮ್ಹಳ್ಳ್ಯಾರ್ ಕಿತೆಂ, ಕಸೊ ಕರ್ಯೆತ್ ಆನಿ ತಾಂತುನ್ ಕಿತೆಂ ಬರೆಪಣ್ ಮೆಳ್ತಾ ಮ್ಹಣುನ್ ಕಳಿತ್ ಅಸ್ಚ್ಯಾಂಕ್ ನಾನು ಮರೋಲ್ ಹಾಚಿಂ ಬರ್ಪಾಂ ಭಾರಿಚ್ ರುಚ್ತಾತ್.
ಹ್ಯಾ ದಿಸಾಂನಿ ಹಾಂವೆ ಆಶಾವಾದಿ ಪ್ರಕಾಶಾನಾಚೆಂ ಸಸತ್ತರಾವೆಂ ಪುಸ್ತಕ್ “ನಾನುಚ್ಯಾ ಸಾಣ್ಯಾಥಾವ್ನ್” ಬೂಕ್ ವಾಚುಂಕ್ ಸುರು ಕೆಲೊ. ನಾನು ಮರೊಲ್ ಆಪ್ಲ್ಯಾ ತಿಕ್ಶ್ಯಾ ಆನಿ ಅಂಬ್ಶ್ಯಾ ಬರವ್ಪಾಂಕ್ ನಾಂವಾಡ್ಲಲೊ ಬರಯ್ಣಾರ್. ತಾಚೊ ಪುಡ್ಲದ್ ಬೂಕ್ ವಾಚ್ತಾನಾ, ತಾಣೆ ಬರಯ್ಲೆಲೆಂ ಮಾತ್ರ್ ನಂಯ್, ತಾಣೆ ಬರಂವ್ಕ್ ವಿಂಚ್ಲೆಲೆ ವಿಶಯ್ ಸೊಧುನ್, ವಾಚುಂಕ್ ವಾ ಆಯ್ಕೊಂಕ್ ಕರ್ತಾತ್. ಕವಿತಾ, ಬೂಕ್ ಆನಿ ಥೊಡ್ಯಾ ಸಾಮಾಜಿಕ್ ಜಾಳಿಜಾಗ್ಯಾಂನಿ ಆಯ್ಲೆಲ್ಯಾ ವಿಶಾಯಾಂಚೆರೀ ತಾಣೆ ತಾಚಿ ಅಭಿಪ್ರಾಯ್ ದಿಲ್ಯಾ. ಅದ್ಲ್ಯಾ ಕಾಳಾರ್, ವಾಚ್ಪ್ಯಾಂಚಿ ಪತ್ರಾಂ ಅಂಕಣ್ ಯೆತಾಲೆಂ ಆನಿ ಹಾಂವೆ ತೆಂ ವಾಚುನ್ ಪರತ್ ಆಂಕಣ್ ಬರಯ್ಲೆಲ್ಯಾ ವಾಚ್ಪ್ಯಾಚ್ಯಾ ನದ್ರೆನ್ ಪರತ್ ಲೇಖನ್ ವಾಸ್ಚೆಂ ಆಸಾ ಪಳೆ ತಾಚಿ ದಾದೊಸ್ಕಾಯ್ ವೆಗ್ಳಿ.
ಕವಿ ಆಂಡ್ರ್ಯೂ ಎಲ್. ಡಿ ಕುನ್ಹಾಚೆಂ ಪ್ರಸ್ತಾವನ್ ಭಾರಿಚ್ ರುಚ್ಲೆಂ. “ಕೊಂಕ್ಣಿ ಸಂಸ್ಕ್ರತಿಚ್ಯಾ ಸಂಸಾರಾಂತ್ ಅಸ್ತಿತ್ವಾಚ್ಯಾ ಕಠೀಣ್ ಸತಾಚೊ ವಿಚಾರ್ ಕರ್ಚೊ ಬಳ್ವಂತ್ ಅವಾಜ್, ಆಸಾ ತರ್ ತೊ ನಾನು ಮರೋಲ್.” ಮುಕಾರ್ಸುನ್ ಸಾಂಗ್ತಾ “ದಾಕ್ಶೆಣ್ ನಾತ್ಲೊ ದೈರಾಧಿಕ್ ವಿಮರ್ಶಕ್.” ಖಂಡಿತ್ ತಾಚಿ ಬರ್ಪಾಂ ವಾಚ್ಲೆಲ್ಯಾ ಮ್ಹಜೆಂ ಮಾತ್ರ್ ನಂಯ್ ಹರ್ಯೆಕ್ಲ್ಯಾಚೆಂ ಭೊಗಾಪ್ ಹೆಂಚ್ ಆಸ್ತಲೆಂ.
ಕವಿ ಮೆಲ್ವಿನ್ ರೊಡ್ರಿಗಸ್ ಮ್ಹಣ್ತಾ, “ಕೊಂಕ್ಣೆಂತ್ ವಿಮರ್ಶಕ್ ಆಸ್ಚೆ ಉಣೆಂ ಆನಿ ವಿಮರ್ಶಕ್ ಕಿತ್ಯಾಕ್ ಉಣೆ, ಹಾಕಾ ಸಂಬಂಧ್ ಜಾಲ್ಲೆಂ ಸಾಹಿತ್ಯ್ ಆಸ್ಚೆಂಯ್ ಉಣೆಂ. ಕಾಂಯ್ ಬೊಟಾಂನಿ ಮೆಜ್ಯೆತ್ ಜಾಲ್ಲ್ಯಾ ವಿಮರ್ಶಾಕಾಂ ಪಯ್ಕಿ ನಾನು ಮರೋಲ್ ಎಕ್ಲೊ”.
“ನಾನುಚೊ ಸಾಣೊ ಆನಿ ಗಜಾಲಿ” ಹಾಂತುನ್ ಕವಿ, ಸಂಪಾದಕ್ ವಲ್ಲಿ ಕ್ವಾಡ್ರಸ್ ಮ್ಹಣ್ತಾ – ನಾನುಕ್ ಮೆಳೊನ್ ಉಲಯ್ತಾಂ ಮ್ಹಣಾಸರ್ ನಾನು ಮರೋಲಾವಿಶಿಂ ತಾಚಿ ಅಭಿಪ್ರಾಯ್ ವೆಗ್ಳಿಚ್ ಆಸ್ಲೆಲಿ. ತಾಚ್ಯಾ ಬರ್ಪಾಂ ಮುಖಾಂತ್ರ್ ತಾಚಿ ವಳಕ್ ಆಸ್ಚ್ಯಾ ಹರ್ಯೆಕ್ಲ್ಯಾಚೆಂ ಚಿಂತಾಪ್ ಹೆಂಚ್ ಆಸೊಂಕ್ ಪುರೊ. ಮ್ಹಜೆಂಯ್ ತೆಂಚ್ ಆಸ್ಲೆಲೆಂ. “ನಾನು ನಿತಳ್ ಚಿಂತ್ಪಾಚೊ, ಸಾಧೊ ಆನಿ ಮಯ್ಪಾಸಿ” ಮ್ಹಣ್ತಾ ವಲ್ಲಿ ಕ್ವಾಡ್ರಸ್. ನಾನು ಮರೋಲ್ ತೊಟ್ಟಾಂ ಲಿಖ್ಣೆನಾಂವಾಖಾಲ್ ಫಾಯ್ಸ್ ಜಾಲ್ಲಿಂ ತಾಚ್ಯಾ ಬರ್ಪಾಂಬರಿಂಚ್ ತೊಯ್ ಖಡಕ್ಕ್ ಆನಿ ಕಟೀಣ್ ಮನಿಸ್ ಆಸ್ತಲೊ ಮ್ಹಣುನ್ ಚಿಂತ್ಲೆಲ್ಯಾ ಮ್ಹಾಕಾ ತಾಚಿ ವಳಕ್ ಜಾಲ್ಯಾ ಉಪ್ರಾಂತ್ ಸಮ್ಜಾಲೆಂಗಿ ನಾನು ಮರೋಲ್ ಎಕ್ ದಯಾಳ್ ಆನಿ ಮ್ಹನ್ಶಾಪಣಾನ್ ಭರ್ಲಲೊ ವ್ಯಕ್ತಿ ಮ್ಹಣುನ್.”
ಗೀತ್ ಗಜಾಲ್ ಕಾರ್ಯಾವೆಳಿಂ ತಾಚೆ ಸಂಗಿ ವಾವ್ರ್ ಕರ್ಚೊ ಅವ್ಕಾಸ್ ಮೆಳ್ಲ್ಲ್ಯಾ ತವಳ್ ತಾಚೆ ಸಂಗಿ ಸಬಾರ್ ವಿಶಯಾಂಚೆರ್ ವಿಚಾರ್ ವಿನಿಮಯ್ ಜಾಲೆ, ಬೂಕ್, ಕವಿತಾ, ಪದಾಂ ಆನಿ ನಾಟಕ್ ಅಶೆಂ ಎಕ್ ನಾಂ ಎಕ್ ವಿಶಯಾಚೆರ್ ಆಮ್ಚ್ಯೊ ಅಭಿಪ್ರಾಯೊ ದಿತಾನಾ ತಾಣೆಂ ಚೀತ್ ದೀವ್ನ್ ಆಯ್ಕೊನ್ ತಾಚಿ ಅಭಿಪ್ರಾಯ್ ದಿಂವ್ಚಿ ಅಸ್ಲಿ. ತಾಚೆ ಅಭಿಪ್ರಾಯೆ ಖಾತಿರ್ ವಾ ವಿಮರ್ಶ್ಯಾ ಖಾತಿರ್ ಕಾರ್ಯಕ್ರಮ್ ಆಯೋಜಕ್ ರಾಕೊನ್ ಅಸ್ತಾತ್. ತಾಚಿ ಸಲಹಾ ಆನಿ ಸುಚನಾಂ ನಿಜಾಯ್ಕಿ ತೊ ಉಗ್ತ್ಯಾ ಮನಾನ್ ದಿತಾ ಜಾಲ್ಲ್ಯಾನ್ ಅಯೋಜಕಾಂಕ್ ತೆಂ ಉಪ್ಕಾರಾಕ್ ಪಡ್ತಾ. ತೊ ಖೊಡಿ ಕಾಡ್ತಾ, ಜಾಳ್ ವೊಂಕ್ತಾ ಮ್ಹಣ್ಚೆಯ್ ಅಸಾತ್. ಪುಣ್ ತಾಂಚೆ ಉತರ್ ತೊ ಸಮಾಧಾನಾನ್ ಆಯ್ಕಾತಾ ಹರ್ಯೆಕ್ಲ್ಯಾಕ್ ತಾಂಚಿ ತಾಂಚಿ ಅಭಿಪ್ರಾಯ್ ವ್ಯಕ್ತ್ ಕರ್ಚೆಂ ಸ್ವಾತಂತ್ರ್ ಅಸಾ. ಕೊಣೆಯಿ ಕಿತೆಂಯ್ ಸಾಂಗ್ಲಾಂ ಮ್ಹಣುನ್ ಆಪ್ಣೆ ಕರ್ಚೊ ವಾವ್ರ್ ಆನಿ ಸಾಮಾಜಿಕ್ ಜೀವಿ ಜಾವ್ನ್ ಆಪ್ಲೆಂ ಕರ್ತವ್ಯ್ ರಾವಂವ್ಕ್ ನಜೊ ಮ್ಹಣೊನ್ ತೊ ಸಮ್ಜಾಯ್ತಾ.
ವಾಚುನ್ ವಾಚುನ್ ಬೂಕ್ ಆಖೇರ್ ಜಾಲೊ ಆನಿ ಮ್ಹಾಕಾ ಹ್ಯಾ ಬೂಕಾದ್ವಾರಿಂ ಹಾಂತುನ್ ಉಲ್ಲೇಖ್ ಕೆಲ್ಲಿಂ ಆದ್ಲಿಂ ಆನಿ ಹಾಂವೆ ವಾಚುಂಕ್ ನಾತ್ಲ್ಯೊ ವಾ ಆಯ್ಕೊನಾತ್ಲ್ಯೊ ಥೊಡ್ಯೊ ಕವಿತಾ, ಥೊಡಿಂ ಪದಾಂ, ಥೊಡೆ ಬೂಕ್ ವಾಚ್ಚೆ ಖಾತಿರ್ ಪಟ್ಟಿ ಕರುನ್ ದವರ್ಚೆಂ ಪಡ್ಲಿ.
ಕೇವಲ್ ವಾಚುನ್ ವೆಚ್ಯಾಂಕ್ ಹೊ ಬೂಕ್ ಹತ್ತರಲ್ಲಿ ಹನ್ನೊಂದು. ಮ್ಹಾಕಾ ಮಾತ್ರ್ ಹೊ ಬೂಕ್ ನಾನುನ್ ಅಮ್ಸೊರಾನ್, ಪರ್ಗಟ್ ಕೆಲೊ ಆಸ್ತೆಲೊ ಮ್ಹಣ್ ಭೊಗ್ಲೆಂ. ಸಾಮಾಜಿಕ್ ಜಾಳಿಜಾಗ್ಯಾಂನಿ ಬರಯ್ಲೆಲೆ ವಿಚಾರ್ ಆನಿ ವಾಚ್ಪ್ಯಾಂಚಿಂ ಪತ್ರಾಂ ಬೂಕಾ ರುಪಿಂ ಆಸಾಜಾಯ್ ಮ್ಹಣುನ್ ಪರ್ಗಟ್ ಕೆಲ್ಲೆ ಬರಿಂ ದಿಸ್ತಾ. ವಿಮರ್ಶ್ಯಾ ಲೇಖನಾಂಚೊಂ ಜಮೊ ಉಣೊ, ವಾಚ್ಪ್ಯಾಂಚ್ಯಾ ಪತ್ರಾಂಚೊಂ ಜಮೊ ಜಶೆಂ ಮ್ಹಾಕಾ ಭೊಗ್ತಾ.
ಅಪ್ಲ್ಯಾಚ್ ಉತ್ರಾಂನಿ ನಾನು ಆಶೆಂ ಸಾಂಗ್ತಾಕೀ “ವಿಂಚ್ಣಾರ್ ಬರ್ಪಾಂಚೊ ಬೂಕ್ ಕಾಡುಂಕ್ ಅಪ್ಣಾಚಿಂ ಬರ್ಪಾಂ ಖಂಚ್ಯಾ ವರ್ಗಾಂತ್ ಯೆತಾತ್ ಮ್ಹಣುನ್ ತಾಕಾಚ್ ಕಳಿತ್ ನಾಂ ಮ್ಹಣುನ್. ಪುಣ್ ವಿಮರ್ಶೆ ವಾಚುನ್ ಸಭಾರ್ ಲೇಖಕಾಂಚಿ ಚಿಂತ್ಪಾ ಸಕತ್ ಬದ್ಲಲ್ಯಾ.” ಮ್ಹಳ್ಳ್ಯಾ ಉತ್ರಾಂಚೆರ್ ಭರ್ವಸೊನ್ ಅಪ್ಣಾಚ್ಯಾ ಬರವ್ಪಾಚೊಂ ಬೂಕಾ ರುಪಿ ದಾಖ್ಲೊ ಅಸಾಜಾಯ್ ಮುಣೊನ್ ತಾಕಾ ಭೊಗ್ಲೆ ಜಾಯ್ಜಾಯ್. ಪುಣ್ ಹ್ಯಾ ಬೂಕಾದ್ವಾರಿಂ ಆಪ್ಲ್ಯಾ ವಾಚ್ಪ್ಯಾಂಕ್ ತಾಣೆಂ ಸವಾಲಾಂನಿ ದವರ್ಲಾಂಗೀ ಮ್ಹಣುನ್ ಭಗ್ತಾ ಮ್ಹಾಕಾ. ಮಹಿನ್ಯಾವಾರ್ ಫಾಯ್ಸ್ ಜಾಲ್ಲ್ಯಾ ಕವಿತೆಂಚೊ ವಿಮರ್ಸೊ ಆನಿ ಬರಯ್ಣಾರಾಂಚಿ ನಾಂವಾ ಅಸಾತ್, ಪುಣ್ ಕವಿತಾ ನಾಂತ್ ತರ್ ತೊ ವಿಮರ್ಸೊ ವಾಚುನ್ ಕಿತೆಂ ಫಾಯ್ದೊ?
ಕವಿತಾ ಜಾಳಿಜಾಗ್ಯಾರ್ ಪರ್ಗಟ್ ಆಸಾತ್ ತ್ಯೊ ತುಮ್ಕಾಂ ವಾಚುಂಕ್ ಥಂಯ್ ಮೆಳ್ತಾತ್ ತರ್ ತ್ಯಾ ಕವಿತೆಂಕ್ ಬರಯ್ಲೆಲೆಂ ವಿಮರ್ಶೆಯ್ ಥಂಯ್ಸರ್ ಆಸಾತ್ ನಂಯ್? ಹಾಂವೆ ಕಿತ್ಯಾಕ್ ಹೆಂ ಸಾಂಗ್ಚೆ ಮ್ಹಳ್ಳ್ಯಾರ್, ಸತ್ತರ್ ವರ್ಸಾಂಚಿಂ ಏಕ್ ವ್ಯಕ್ತಿ ನಾನುಚ್ಯಾ ಅಭಿಮಾನಾನ್ ಹೊ ಬೂಕ್ ವಾಚುನ್ ಮ್ಹಣಾಲಾಗ್ಲಿ “ಮ್ಹಾಕಾ ಕಾಂಯ್ ಸಮ್ಜೊಂಕ್ ನಾಂ. ಕವಿತಾ ವಾಚುಂಕ್ ಮೆಳೊಂಕ್ ನಾಂತ್.” ತಶೆಂ ಹಾಣೆ ಬರಯ್ಲೆಲೆಂ ತಿಕಾ ಸಮ್ಜೊಂಕ್ ನಾಂ. ಹಿಚ್ ಜಾಂವ್ಕ್ ಪುರೊ ಆನಿ ಥೊಡ್ಯಾಂಚೀಯ್ ಆಭಿಪ್ರಾಯ್. ವಾಚ್ಪಿ ಸಗ್ಳೆ ಅಧುನಿಕ್ ಮಾದ್ಯಮಾಂಕ್ ವರ್ಗಲ್ಲೆ ನಾಂತ್. ಥೊಡ್ಯಾ ಮಾಲ್ಗಡ್ಯಾ ವಾಚ್ಪ್ಯಾಂಕ್ ಸಾಮಾಜಿಕ್ ಜಾಳಿಜಾಗೆ ವಾಪಾರುಂಕ್ ಕಳಿತ್ ನಾತ್ಲ್ಯಾನ್ ಥೊಡ್ಯೊ ಕವಿತಾ ಘಾಲ್ಯೆತ್ ಆಸ್ಲೆ ಮ್ಹಣುನ್ ಭೊಗ್ಲೆಂ ಮ್ಹಾಕಾ.
ನಾನು ಮರೋಲ್ ಹಾಚೊ ಬೂಕ್ ಪರ್ಗಟ್ ಜಾತಾನಾ ಹಾಂವೆ ಚಿಂತ್ಲೆಲೆಂ ಎಕೇಕ್ ಕವಿತಾ ವಾ ಬೂಕ್ ಘೇವ್ನ್ ತಾಚೆರ್ ತಾಚೊ ವಿಮರ್ಸೊ ಕೊಣ್ಣಾ ಮ್ಹಣುನ್. ಭೊವ್ಶ್ಯಾ ಏಕ್ ವಾಚ್ಪಿ ಜಾವ್ನ್ ನಾನು ಮರೋಲ್ ಹಾಚೆ ಲಿಖ್ಣೆ ಥಾವ್ನ್ ಚಡಿತ್ ಅಪೇಕ್ಶಾ ಕೆಲ್ಲೆಂಯ್ ಕಾರಣ್ ಆಸೊಂಕ್ ಪುರೊ . ಪುಣ್ ಹಿ ಅಪೇಕ್ಶಾ ಆಶಿಚ್ ಸೊಡಿನಾಂ. ತಾಚೆ ಥಾವ್ನ್ ಆನೀಕಿ ವಾಚುಂಕ್ ಆಶೆಂವ್ಚ್ಯಾ ಪಯ್ಕಿ ಹಾಂವ್ ಅಸ್ತೆಲಿಂಚ್, ಜಾಂವ್ ತೆಂ ಪತ್ರಾನಿಂ, ಜಾಳಿಜಾಗ್ಯಾನಿಂ ವಾ ಬೂಕಾ ರುಪಿಂ.
■ ಡಯಾನಾ ಶರಲ್ ಲೋಬೊ
