2025 ಚ್ಯಾ ಹ್ಯಾ ಜುಬ್ಲೆವಾ ವರ್ಸಾ ಭರ್ವಶ್ಯಾಚಿಂ ಯಾತ್ರಿಕಾಂ ಆಮಿ ಜಾವ್ನ್ ಆಸಾಂವ್ ಮ್ಹಳ್ಳೊ ಧ್ಯೇಯ್ ಆಚರಣ್ ಕರುಂಕ್ ಇಗರ್ಜ್ ಮಾತೆನ್ ನಿರ್ಣಯ್ ಘೆತ್ಲಾ. ಆನಿ ಹ್ಯಾ ವರ್ಸಾಚ್ಯಾ ಶಿಂಜಿಚ್ಯಾ ಬುದ್ವಾರಾ ಆರಂಭ್ ಜಾಲ್ಲೆಂ ಪ್ರಾಚಿತಾಚೆಂ ಯಾತ್ರಿಕ್ ಪಯ್ಣ್, ಜೆಜು ಕ್ರೀಸ್ತಾಚ್ಯಾ ಖುರ್ಸಾ ವಾಟೆಚ್ಯಾ ಕರೆಜ್ಮಾ ಕಾಳಾಚ್ಯಾ 40 ದಿಸಾಂ ನಂತರ್ ಎಪ್ರಿಲ್ 20 ತಾರ್ಕೆರ್ ಜೆಜುಚ್ಯಾ ಪುನರ್ ಜಿವಂತ್‌ಪಣಾಚ್ಯಾ ಪಾಸ್ಕಾ ಫೆಸ್ತಾ ಮುಖಾಂತರ್ ಆಕೇರ್ ಜಾತಾ. ಆನಿ ಹ್ಯಾ ಚಾಳಿಸ್ ದಿಸಾಚ್ಯಾ ಪಾಸ್ಕಾಂ ವಾಟೆರ್ ಆಮಿ ಆತ್ಮೀಕ್ ಮಿಸ್ಳಾಪಾಚಿಂ ಮೆಟಾಂ ಘಾಲುನ್ ಆಸೊಂಕ್ ಆಮ್ಕಾಂ ಉಲೊ ಆಸಾ. ಮೊವಾಳ್ ಕುರ್ಪಾಳ್ ದೆವಾಚೊ ಕುಮ್ಕೆ ಹಾತ್ ಆಮ್ಚೆರ್ ಆಸ್ತಾಂ, ಕ್ರೀಸ್ತೀ ಭಾವಾರ್ಥಾಕ್ ವಿರೋಧ್ – ಖಂತ್, ನಿರಾಸ್ ಬೆಜಾರಾಯ್ ಹೆಂ ಸರ್ವ್ ಆಮಿ ಸಾಂಡುನ್, ಭಕ್ತಿನ್ ಮಾಗ್ಣ್ಯಾನ್, ಆನಿ ದೈವೀಕ್ ಆಚಾರಣಾನಿಂ ಕರೆಜ್ಮಾದೀಸ್ ಸಾರುಂಕ್ ಜಾಯ್.
ಪ್ರಾಚಿತ್ ಕಾಳಾಚಿ ಆತ್ಮೀಕ್ ತಯಾರಾಯ್ ಪ್ರತ್ಯೇಕ್ ಜಾವ್ನ್ ಪಾತ್ಕಾಕ್ ಪಾಟ್ ಕರುನ್, ಪಾತ್ಕಾಂಚ್ಯಾ ತಾಳ್ಣ್ಯಾಂ ಥಾವ್ನ್, ಸಮಯಾಂ ಥಾವ್ನ್, ಪಯ್ಸ್ ರಾಂವ್ಚೆಂ ಆನಿ ಚುಕೊವ್ನ್ ಘೆಂವ್ಚೆಂ. ಹ್ಯಾ ಖಾತಿರ್ ಕ್ರೀಸ್ತಾಚೆರ್ ಭರ್ವೊಸೊ ದವರುನ್ ಭಕ್ತಿಪಣಿಂ ತಾಚಿ ಕುರ್ಪಾ ಮಾಗುಂಕ್ ಜಾಯ್. ಆನಿ ಹ್ಯಾವರ್ವಿಂ ಆಮ್ಚೆಂ ಜಿಣ್ಯೆ ಬದ್ಲಾಪ್ ಫಳಾದಿಕ್ ಜಾಂವ್ಕ್ ಪ್ರೇತನ್ ಕರುಂಕ್ ಜಾಯ್.
ಮಾಗ್ಣೆಂ ಮ್ಹಳ್ಯಾರ್ ಫಕತ್ತ್ ವೊಂಟಾನಿಂ ಬಡ್ಭಡುನ್ ಯಾಂತ್ರಿಕ್ ಥರಾನ್ ಮಾಗ್ಚೆಂ ನ್ಹಂಯ್. ಬಗಾರ್ ಭಕ್ತಿಪಣಾನ್ ಮತಿಂ ಕಾಳ್ಜಾಂತ್ ಆಟಾವ್ನ್, ದೆವಾಚ್ಯಾ ಭೊಗ್ಣಾಂ ಭಾವಾನಾಂಚ್ಯಾ ಮನೋಭಾವಾನ್, ಆತ್ಮೀಕ್ ಭೊಗ್ಣಾಂನಿಂ ಮಾಗೊಂಕ್ ಜಾಯ್. ಲ್ಹಾನಾ ಭುರ್ಗ್ಯಾಂಪರಿಂ ಮುಗ್ದತೆನ್, ಭುರ್ಗ್ಯಾ ಮನೋಬಾವಾನ್ ಮಾಗ್ಚೆಂ ಮಾಗ್ಣೆಂ ಆಮ್ಚೆಂ ಜಾವ್ನ್ ಆಸೊಂಕ್ ಜಾಯ್.
ಆಮ್ಕಾ ಕಿತೆಂ ಜಾಯ್ ಮ್ಹಳ್ಳೆಂ ತೆಂ ದೇವ್ ಜಾಣಾಂ. ತೆಂ ಆಮ್ಕಾಂ ಫಾವೊ ತರ್ ದೇವ್ ಖಂಡಿತ್ ಜಾವ್ನ್ ಫಾವೊ ಕರ್ತಾ. ದೆಕುನ್ ಮಾಗ್ತಾನಾ ಗರ್ಜ್ ವಿಸರ್ನ್, ‘ದೆವಾಚಿ ಖುಶಿ ತರ್ ದೇವ್ ಆಮ್ಕಾಂ ಫಾವೊ ಕರ್ತೊಲೊ…’ ಮ್ಹಳ್ಯಾ ಭರ್ವೊಶ್ಯಾನ್ ಆನಿ ವಿಶ್ವಾಸಾನ್ ಮಾಗೊಂಕ್ ಜಾಯ್.
ಕಶ್ಟ್ ಸಂಕಶ್ಟ್, ಪಿಡಾಶಿಡಾ, ಖಂತ್ ಬೆಜಾರಾಯ್ ಹೆಂ ಸರ್ವ್ ‘ತಿ ದೆವಾಚಿ ಖುಶಿ’ ಮ್ಹಣ್ ಮಾನುನ್ ಘೆವ್ಯಾಂ ಆನಿ ತಾಕಾ ಅರ್ಗಾಂ ದಿವ್ಯಾಂ. ‘ತುಜಿ ಖುಶಿತರ್ ಆಮ್ಕಾಂ ಫಾವೊ ಕರ್…’ ಮ್ಹಳ್ಳ್ಯಾ ಮಾಗ್ಣ್ಯಾದ್ವಾರಿಂ, ದೆವಾಚೆರ್ ಭರ್ವಾಸೊನ್ ಮಾಗ್ಯಾಂ. ನೀಜ್ ತರ್ ಕರೆಜ್ಮಾ ಕಾಳಾಚೆಂ ಪ್ರಮುಖ್ ಮಾಗ್ಣೆಂ ಜಾವ್ನಾಸಾ ; ಜೆಜುಚೊ ಪಾಶಾಂವ್ ನಿಯಾಳುನ್ ಕರ್ಚಿ ತಿ ಖುರ್ಸಾವಾಟ್.
ಪ್ರಾಚಿತ್ ಕಾಳ್ ಆಮ್ಚ್ಯಾ ಜಿಣ್ಯೆ ಬದ್ಲಾಪಾಚೊ, ತಶೆಂಚ್ ಅತ್ಮೀಕ್ ತಶೆಂ ದೈವಿಕ್ ವಿಶಯಾಂನಿಂ ಮಿಸ್ಳೊನ್ ಆಸ್ಚೊ ಕಾಳ್. ಹ್ಯಾ ಕಾಳಾ, ಆದ್ಲ್ಯಾ ಜಿಣ್ಯೆಕ್ ಪಾಟ್ ಕರುನ್, ಅತ್ಮೀಕ್ ನವ್ಸರ್ಣೆನ್ ದೆವಾಚೆಂ ಉತರ್ ಆಮ್ಚ್ಯಾ ಜಿಣ್ಯೆಂತ್ ಮಿಸ್ಳಾಶೆಂ ಕರುನ್, ಜಿಯೆಂವ್ಕ್ ಪ್ರೇತನ್ ಕರುಂಕ್ ಜಾಯ್.
ಆಮಿ ಆಮ್ಚ್ಯಾ ಜಿಣ್ಯೆಂತ್ಲೆಂ ಅನ್ಯಾಯ್ ಅನೀತ್‌ಪಣ್, ಅತ್ಮೀಕ್ ತಶೆಂ ಲೌಕಿಕ್ ಉಣೆಂಪಣ್, ಮಿತಿ ಭಾಯ್ಲ್ಯೊ ಸವಯೊ, ವಾಯ್ಟ್ ಕರ್ನ್ಯೊ, ಹೆಂ ಸರ್ವ್ ಸೊದುನ್ ಕಾಡುಂಕ್ ಕರ್ಚೆಂ ಪ್ರೇತನ್, ಪ್ರಾಚಿತ್ ಕಾಳಾಚ್ಯಾ ಆಮ್ಚ್ಯಾ ಜಿಣ್ಯೆ ಬದ್ಲಾಪಾಕ್ ಸಹಕಾರ್ ಜಾತೆಲೆಂ.
ಆಮಿ ಆಮ್ಚ್ಯಾ ಪಾತ್ಕಿ ಜಿಣ್ಯೆಕ್ ಪಾಟ್ ಕರ್ತಾಸ್ತಾನಾಂ, ಕ್ತೀಸ್ತ್ ಆಮ್ಕಾಂ ಪಾಟ್ ಕರಿಸೊ ನಾ. ಬಗಾರ್ ತೊ ತಾಳ್ನ್ಯಾಂ ವಿರೋಧ್ ಝುಜೊಂಕ್, ಆಮ್ಚೆರ್ ದೈವಿಕ್ ಕುರ್ಪೆ ಝರ್ ವ್ಹಾಳಯ್ತೊಲೊ.
ತ್ಯಾಚ್ಚ್ ಪರ್ಮಾಣೆಂ, ಆಮಿ ಎಕಾಮೆಕಾಚ್ಯಾ ಮೋಗ್ ಹುಸ್ಕ್ಯಾಂತ್, ಸಹಕಾರಾಂತ್, ಭೊಗ್ಸಾಣ್ಯಾಂತ್, ಆಮ್ಚ್ಯಾ ನಿತಳ್ ಅಂತಸ್ಕರ್ಣಾಂತ್, ದಾನ್ ಧರ್ಮ್ ಸೆವಾ ಕರುನ್, ಕ್ರೀಸ್ತಾಚ್ಯಾ ಶಿಕೊವ್ಣೆ ಪರ್ಮಾಣೆಂ ಪ್ರಮಾಣಿಕ್ ಜಿಣಿಂ ಜಿಯೆವ್ನ್ ಚಮ್ಕಾಲ್ಯಾಂವ್ ತರ್, ಖಂಡಿತ್ ಜಾವ್ನ್ ಆಮಿ ಸರ್ಗಾರಾಜಾಕ್ ಪಾಂವ್ಚೆ ಯಾತ್ರಿಕ್ ಜಾಂವ್ಕ್ ತಾಚೊ ಸಹಕಾರ್ ಆಮ್ಕಾಂ ಲಾಭ್ತೊಲೊ.
ಪೂಣ್ ಜರ್ ಹೆಂ ಸರ್ವ್, ಫಾರಿಜೆವಾಪರಿಂ ಪೆಲ್ಯಾಚ್ಯಾ ದೆಕಿಕ್ ಮಾತ್ರ್ ಕರುನ್ ಜಿಯೆತಾಂವ್ ತರ್, ಆಮಿ ದೆವಾಚೆಂ ಆಶೀರ್ವಾದ್ ಸಸಾಯ್ ಕುರ್ಪಾ ಹೊಗ್ಡಾಯ್ತೆಲ್ಯಾಂವ್. ಆಮಿ ದೆವಾಚ್ಯಾ ಮೆಚ್ವೊಣೆಕ್ ಫಾವೊ ಜಾಂವ್ಚೆ ತಸಲಿ ಪ್ರಮಾಣಿಕ್ ಜಿಣಿಂ ಜಿಯೆವ್ಕ್ ಜಾಯ್. ಹ್ಯಾವರ್ವಿಂ ದೆವಾಚಿ ಸಳಾವಳ್ ತಶೆಂ, ದೇವ್ ಆನಿ ಆಮ್ಚೆ ಮಧ್ಲೊ ಅತ್ಮೀಕ್ ಸಂಭಂದ್ ವಾಡ್ತೊಲೊ. ಆನಿ ತಾಚಿ ಕುರ್ಪಾ ಆನಿ ಸಹಕಾರ್ ಸದಾಂಚ್ಚ್ ಆಮ್ಕಾಂ ಫಾವೊ ಜಾತೆಲೆಂ.
ಅಸಲ್ಯಾ ಜಿಣ್ಯೆಕ್, ಪ್ರಾಚಿತ್ ಕಾಳಾರ್ ಕರ್ಚೊ ಉಪ್ವಾಸ್, ದಂಡವ್ಣ್ಯೊ, ದಾನ್ ಧರ್ಮ್, ಸೆವಾ – ಹೆಂಸರ್ವ್ ಆಧಾರುನ್, ತವಳ್ ತವಳ್ ಅಂತಸ್ಕರ್ನಾಚಿ ಝಡ್ತಿ ಆಮಿ ಕರುನ್ ಆಸ್ಲ್ಯಾಂವ್ ತರ್, ಆಮ್ಚಿ ದೈವಿಕ್ ತಶೆಂ ಲೌಕಿಕ್ ಜಿಣಿ ಫಳಾಭರಿತ್ ತಶೆಂ ಊರ್ಜಿತ್ ಜಾತೆಲಿ. ದೆಕುನ್ ಕರೆಜ್ಮಾ ಕಾಳಾಚಿ ಹಿ ಜಾಗ್ವೊಣಿ, ಚತ್ರಾಯ್, ಥಿರ್ ಭಾವಾಡ್ತಾನ್ – ಮುಕಾರ್ ಯೀ ಜಿಣಿಭರ್ ಆಮಿ ಜಿಯೆಂವ್ಚೊ ಧೃಢ್ ನಿಚೆವ್ ಆಮ್ಚೆಂ ಥಂಯ್ ಆಸೊಂಕ್ ಜಾಯ್. ಹ್ಯಾ ಖಾತಿರ್ ದಿಸ್ಪೊಡ್ತೆಂ ತೊ ನಿಚೆವ್ ಧೃಢ್ ಮನಾನ್ ನಿಯಾಳುನ್ ಜಿಯೆಲ್ಯಾಂವ್ ತರ್… ಜೆಜುಚ್ಯಾ ಸಳಾವಳ್ ಸಂಭಂಧಾಂತ್ ಆಮ್ಕಾಂ ನಿರಂತರ್ ಆಸೊಂಕ್ ಸಾಧ್ಯ್ ಜಾತೆಲೆಂ. ಆನಿ ಹೆಂ ದೈವೀಕ್ ಪ್ರೇತನ್ ಆಮಿ ನಿರಂತರ್ ಕರ್ತೆಲ್ಯಾಂವ್ ಮ್ಹಳ್ಳೊ ನಿರ್ಧಾರ್, ಆಮಿ ಹ್ಯಾ ಪ್ರಾಚಿತ್ ಕಾಳಾರ್ ಘೆಂವ್ಕ್ ಜಾಯ್.
ತ್ಯಾ ಶಿವಾಯ್ ಆಮ್ಚೆಂ ಕ್ರೀಸ್ತೀ ಜಿವಿತ್ ಯಶಸ್ವೀ ವಾಟೆರ್ ಮುಂದರುನ್, ಆಮ್ಚೆಂ ಜಿವಿತ್ ಸಾರ್ಥಕ್ ಆನಿ ಸುಫಳ್ ಜಾಂವ್ಕ್ ಹೊ ಪ್ರಾಚಿತ್ ಕಾಳ್ ಏಕ್ ಆವ್ಕಾಸ್ ಜಾವ್ನಾಸಾ. ದೆಕುನ್ ಪ್ರಾಚಿತ್ ಕಾಳಾರ್ ದೇವ್ ಸ್ತುತಿಕ್ ತಶೆಂ ನಿತಳ್ ನಿತಿಚ್ಯಾ ಲೌಕಿಕ್ ವಯುಕ್ತೆತೆಕ್ ಪೂರಕ್ ಜಾಂವ್ಚೆಂ ವಾತಾವರಣ್, ಕುಟ್ಮಾಂತ್, ಫಿರ್ಗಜೆಂತ್, ಸಮಾಜೆಂತ್ ಮಾಂಡುನ್ ಹಾಡುಂಕ್ ಜಾಯ್.
ಅಸಲೆಂ ವಾತಾವರಣ್ ಉಬ್ಜೊಂಕ್ ಪ್ರಪ್ರಥಮ್ ಜಾವ್ನ್ ಜೆಜುಚ್ಯಾ ಯೆಣ್ಯಾಚೊ ಉದ್ದೇಶ್, ಆಮಿ ಕರೆಜ್ಮಾವೆಳಾ ನಿಯಾಳುನ್ ಕಾಳ್ಜಾ ಮತಿಂ ಥಿರ್ ಕರುನ್, ಏಕ್ ಪಂಥಾಹ್ವಾನ್‌ಶೆಂ ರುತಾ ಕೆಲೆಂ ತರ್, ಸಮಾಜೆಂತ್ಲೆಂ ಅನೀತ್ ಆನಿ ವಾಯ್ಟ್ ವೊಡ್ಣ್ಯಾಂಚೆಂ ಬಳ್ ಮೊಡ್ತಾ.
ಜೆಜುಚ್ಯಾ ಯೆಣ್ಯಾಚೊ ಪ್ರಪ್ರಥಮ್ ಉದ್ದೇಶ್ ಜಾವ್ನಾಸಾ, ಮನ್ಶಾಕುಳಾಚಿ ಸೊಡ್ವಣ್. ತ್ಯಾಚ್ಚ್ ಪರ್ಮಾಣೆಂ ಮನ್ಶಾ ಕುಳಾಕ್ ಮರಣಾ ಥಾವ್ನ್ ಸಸಾಣ್ ಜಿವಿತಾಕ್, ಅಸತಾ ಥಾವ್ನ್ ಸತಾಕ್, ಕಶ್ಟಾ ಥಾವ್ನ್ ಸುಖಾಕ್, ಕಾಳೊಕಾ ಥಾವ್ನ್ ಉಡ್ವಾಡಾಕ್ ವಾಟ್ ದಾಕಂವ್ಚೊ ಉದ್ದೇಶ್‌ಯೀ ಜೆಜುಚ್ಯಾ ಯೆಣ್ಯಾಂತ್ ಆಟಾಪುನ್ ಆಸಾ.
ದೆಕುನ್ ಪ್ರಾಚಿತಾಚ್ಯಾ ಕಾಳಾರ್, ಜೆಜುನ್ ಸೊಸ್ಲೆಲೆ ತೆ ಕಠಿಣ್ ಕಶ್ಟ್ ನಿಯಾಳ್ಚೆ, ಖಂತಿ ಭಕ್ತೆನ್ ತಾಚೊ ಪಾಶಾಂವ್ ನಿಯಾಳ್ಚೊ, ತವಳ್ ತವಳ್ ಖುರ್ಸಾವಾಟ್ ಕರ್ಚಿ, ಕರೆಜ್ಮಾಚ್ಯೊ ಕಂತಿಗೊ ವ್ಹಡಾ ತಾಳ್ಯಾನ್ ಗಾಂವ್ಚೆಂ, ಉಪಾಸ್ ಕರ್ಚೊ, ರೆತಿರೆಕ್ ತಶೆಂ ತವಳ್ ತವಳ್ ಮಿಸಾಚ್ಯಾ ಬಲಿದಾನಾಂತ್ ಭಾಗ್ ಘೆಂವ್ಚೆಂ … ಹೆಂ ಸರ್ವ್ ಕರೆಜ್ಮಾಚೆಂ ವಾತಾವರಣ್ ಆಸಾ ಕರುಂಕ್ ಸಹಕಾರ್ ಜಾತೆಲೆಂ.
ಅಸಲೆಂ ಕರೆಜ್ಮಾಚೆಂ ವಾತಾವರಣ್, ಅಕ್ರೀಸ್ತಾವಾಂ ಥಂಯ್ ಕ್ರೀಸ್ತಾಚಿ ವಳಕ್ ಪ್ರಸಾರ್ ಕರುಂಕ್ ಸಹಕಾರ್ ಜಾತೆಲಿ. ತಶೆಂಚ್ಚ್ ನಾಸ್ತಿಕಾಕ್‌ಯೀ ಇಗರ್ಜೆಚೆಂ ದಾರ್ ಥಾಪ್ಡುಂಕ್ ಪ್ರೇರಣ್ ಜಾಂವ್ಚೆಂ ಸಾಧ್ಯಾತಾ ಆಸಾ. ಕರೆಜ್ಮಾಂತ್ ದೋನ್ ಸಂಗ್ತಿಂಚೆರ್ ಆಮಿಂ ಆಮ್ಚಿ ನದರ್ ಪ್ರಮುಖ್ ಜಾವ್ನ್ ಖಂಚೊವ್ನ್ ಆಸೊಂಕ್ ಜಾಯ್. ಪಯ್ಲೆಂ ಉಪ್ವಾಸಾ ದ್ವಾರಿಂ ದೆವಾಚೊ ಸಂಭಂಧ್. ದುಸ್ರೆಂ ಭೊಗ್ಸಾಣ್ಯಾ ದ್ವಾರಿಂ ಪೆಲ್ಯಾಲಾಗಿಂ ರಾಜಿ ಸಂಧಾನ್.
ಜೆಜುನ್ ಯೀ ದೆವಾಚ್ಯಾ ಸ್ಪಿರಿತಾಂತ್ ಭರೊಂಕ್, ಚಾಳಿಸ್ ದಿಸಾಂಚೊ ಉಪ್ವಾಸ್ ಕೆಲ್ಲೊ. ಹ್ಯಾ ವೆಳಾ ಸೈತಾನಾನ್ ತಾಕಾಯಿ ನಾಡ್‌ಲ್ಲೆಂ. ಪೂಣ್ ಜೆಜುಕ್ರೀಸ್ತ್ ಪವಿತ್ರ್ ಅತ್ಮ್ಯಾ ಸಕ್ತೆನ್ ದೆಂವ್ಚಾರಾಕ್ ಸಲ್ವಾಯ್ತಾ. ಆಧುಕ್ ಕಾಳಾರ್ ಹ್ಯಾ ಸಂಸಾರಾರ್ ಮನ್ಶಾಕ್ ನಾನಾಂತಿ ಥರಾಂಚ್ಯೊ ಆಶಾ ಹಾಡಂವ್ಚ್ಯೊ ತಾಳ್ನ್ಯೊ ಯೆತೇ ಆಸಾತ್. ತುರ್ತಾನ್ ಪೈಶೆ ಜೊಡ್ಚ್ಯಾಕ್, ಕುಡಿಚ್ಯಾ ಸುಖಾಕ್ ಅನೀತ್ ವಾಟ್ ವಾಪಾರ್ಚೆಂ, ಅಶ್ಲೀಲ್ ಫಿಲ್ಮಾಂ, ಅಶ್ಲೀಲ್ ಸುಖ್, ಗಾಂಜಾ ಡ್ರಗ್ಸ್, ಆರಾಂವ್ಣಿಂ, ಅಸಲ್ಯೊ ಸರ್ವ್ ಅನೀತಿಚಿ ವಾಯ್ಟ್ ಸವಯೊ ಆಧಾರುಂಕ್, ಆಧುನಿಕ್ ಸಂಸಾರ್ ಮನ್ಶಾಕ್ ನಮುನೆವಾರ್ ತಾಳ್ನಿ ಹಾಡ್ತಾ.
ಪ್ರತ್ಯೇಕ್ ಜಾವ್ನ್ ಯುವಜನಾಂಗ್ ಅಸಲ್ಯಾ ಸರ್ವ್ ಗುನ್ಯಾಂವಾಂಕ್ ಒಳಗ್ ಜಾತಾ. ಪರಿಣಾಮ್ ಜಾವ್ನ್ ಚೊರಿ ಜಿವ್ಘಾತ್ ಖುನಿ ಅಸಲಿಂ ಸರ್ವ್ ಭಯಾನಕ್ ಘಡಿತಾಂ ಸಮಾಜೆಂತ್ ಉದೆತಾತ್. ದೆಕುನ್ ವ್ಹಡಿಲಾಂನಿ ಲ್ಹಾನ್ ಆಸ್ತಾನಾಂಚ್ಚ್ ತಾಂಚೆರ್ ಜಾಗ್ವೊಣೆಚೊ ದೊಳೊ ದವರ್ನ್ ತಾಂಚೆ ಜಿವಿತ್ ವಿಭಾಡ್ ಜಾಯ್ನಾಶೆಂ ಜಾಗ್ರುತ್ ಘೆಂವ್ಕ್ ಜಾಯ್.
ಉಪಾಸ್ ಮ್ಹಣ್ತಾನಾ – ನಾಸ್ಟೊ ಜೆವ್ಣಾಂತ್ ನಿಯಂತ್ರಣ್, ಮೀಸ್, ಪಾಶಾಂವಾಚೊ ನಿಯಾಳ್, ಖುರ್ಸಾ ವಾಟ್ ಆಧಾರ್ಚಿ – ಹೆ ಸರ್ವ್ ಇಗರ್ಜ್ ಮಾತೆಚೆ ಕಾಯ್ದೆ ಉಗ್ಡಾಸಾಕ್ ಹಾಡ್ತಾತ್. ಪೂಣ್ ಆಧುನಿಕ್ ಕಾಳಾರ್ ಇಗರ್ಜ್ ಮಾತೆಚ್ಯಾ ಕಾಯ್ದ್ಯಾಂ ಬರಾಬರ್… ಆಧುನಿಕ್ ತಾಂತ್ರಿಕ್ ವಸ್ತು ಸಂಗ್ತೆಂಚೆರ್ ನಿಯಂತ್ರಣ್ ಹಾಡ್ಚೊ ಉಪಾಸ್ ಖಂಡಿತ್ ಜಾವ್ನ್ ಕರುಂಕ್ ಜಾಯ್.
ಆಧುನಿಕ್ ಜನಾಂಗ್ ದೀಸ್ ಉಜ್ವಾಡ್ತಾಂ ಮೊಬಾಯ್ಲ್ ಹಾತಿಂ ಧರ್ತಾ. ಆನಿ ರಾತಿಂ ಉಶ್ಯಾಕ್ ಮಾತೆಂ ತೆಂಕ್ಚ್ಯಾ ಪರ್ಯಾಂತ್ ಮೊಬಾಯ್ಲ್ ಹಾತಿಂಚ್ ಆಸ್ತಾ. ಪ್ರಸ್ತುತ್ ಹ್ಯಾ ಕರೆಜ್ಮಾವೆಳಾ ಮೊಬಾಯ್ಲಾಂತ್ಲ್ಯಾ… ಯುಟ್ಯೂಬ್, ಫೇಸ್ ಬುಕ್, ಇನ್ಸ್ಟಾಗ್ರಾಮ್, ಟಿಕ್-ಟೊಕ್, ಟ್ವಿಟರ್, ನೆಟ್-ಫ್ಲಿಕ್ಸ್, ಕ್ರೈಮ್, ಇತ್ಯಾದಿಂಚೆರ್ ನಿಯಂತ್ರಣ್ ಯಾ ತಾಚೊ ಉಪಯೋಗ್ ಕರಿನಾಸ್ತಾಂ, ಮೊಬಾಯ್ಲಾ ವಿರೋಧ್ ಝಗಡ್ನ್ ಮ್ಹಳ್ಳೆಪರಿಂ ತಾಚ್ಯಾ ಅನುಪಯೋಗಾಚೊ ಉಪ್ವಾಸ್ ಆಮಿ ಕರುಂಕ್ ಜಾಯ್. ಆನಿ ಮೊಬಾಯ್ಲಾರ್ ಖರ್ಚುನ್ ಆಸ್ಚೊ ವೇಳ್ – ಕರೆಜ್ಮಾಂತ್ ಜೆಜುಚ್ಯಾ ಪಾಶಾಂವಾಚೊ ನಿಯಾಳ್, ರೊಜಾರಿಚೊ ತೇರ್ಸ್, ಕಾಕುಳ್ತಿಚೊ ತೇರ್ಸ್, ಖುರ್ಸಾವಾಟ್ ಅಸಲೆ ಸರ್ವ್ ಅತ್ಮೀಕ್ ಸಂಗ್ತಿನಿಂ ಖರ್ಚಿಲೊ ತರ್, ದೆವಾಚಿ ದಯಾ, ಕುರ್ಪಾ, ಆಮ್ಚಿ ಜಾತೆಲಿ.
ಅಶೆಂ ದೆವಾಚಿ ಕುರ್ಪಾ ಜೊಡ್ಚ್ಯಾಂತ್ ಆನಿ ದೆಂವ್ಸಾರಾಚ್ಯಾ ತಾಳ್ನ್ಯಾ ವಿರೋದ್ ಝಗಡ್ಚ್ಯಾಂತ್ ಆಮ್ಚೆಂ ಝುಜ್ ಸದಾಂಚ್ಚ್ ಆಸೊಂದಿ. ಅಸಲ್ಯಾ ಝಜಾಚೆರ್ ದೆವಾಚಿ ಸಸಾಯ್ ಕುರ್ಪಾ ಆಶೀರ್ವಾದಾಂ ಆಮ್ಟೆರ್ ಸದಾಂಚ್ಚ್ ಆಸ್ತೆಲಿಂ. ಅಶೆಂ ದೆವಾಲಾಗ್ಚೊ ಆನಿ ಪೆಲ್ಯಾಲಾಗ್ಚೊ ಮೋಡ್ನ್ ಘೆತ್ಲೊಲೊ ಸಂಬಂದ್ , ಕರೆಜ್ಮಾ ವೆಳಾಚ್ಯಾ ಅತ್ಮೀಕ್ ಆಚರಣಾಂ ದ್ವಾರಿಂ, ಪರತ್ ಜೊಡುನ್ ಘೆಂವ್ಯಾ. ಹ್ಯಾವರ್ವಿಂ ದೆವಾಚಿ ಕಾಕುಳ್ತ್ ಆನಿ ಮೊವಾಳ್ ಸಂಭಂಧ್ ಜಿಣಿಂಭರ್ ಆಮ್ಚೆ ಸಂಗಿ ಆಸಾಶೆಂ ಜಿಯೆಂವ್ಯಾ.
ಆನಿ ಆಮ್ಚ್ಯಾ ಧಾರ್ಮಿಕ್ ಆಚರಣೆಚ್ಯಾ ಆರ್ಶ್ಯಾಂತ್ – ದೆವಾಚಿ ಸಾವ್ಳಿ ಸದಾಂಚ್ಚ್ ಪಳೆಂವ್ಕ್ ದೇವ್ ಆಮ್ಕಾಂ ಫಾವೊ ಕರುಂದಿ, ಮ್ಹಣ್ ಮಾಗ್ಯಾಂ.
■ ರೋನ್ ರೋಚ್ ಕಾಸ್ಸಿಯಾ
