ದಯಾಳ್ ಕರ್ನಿ ವಿಸರ್ಲಿಗಿ ಇಗರ್ಜ್‌ಮಾತಾ?

65

ತ್ಯಾ ಎಕಾ ದಿಸಾ ಚಡ್ ಉಣೆಂ ಸಾತ್ ಆಟ್ ವರ್ಸಾಂ ಆದಿಂ…

ಮ್ಹಜೊ ಎಕ್ಲೊ ಬಾಪುಲ್ ಭಾವ್  ಜೊ ಸಬಾರ್ ವರ್ಸಾಂ ಮ್ಹಜ್ಯಾ ಸಂಪರ್ಕಾರ್‌ಚ್ಚ್ ನಾತ್ಲೊಲೊ ತೊ, ಎಕಾಎಕಿ ವೆನ್ಲೋಕ್ ಆಸ್ಪತ್ರೆಂತ್ ಭರ್ತಿ ಜಾಲಾ ಮ್ಹಳ್ಳಿ ಖಬರ್  ಮೆಳ್ಳಿ. ಥಂಯ್ಸರ್ ತಾಚ್ಯಾ ವಾರ್ಡಾಕ್ ಭೆಟ್ ಕರ್ತಾಂ ತೊ ಏಕ್ ಏಡ್ಸ್ ಪೇಶಂಟ್ ಮ್ಹಣ್ ಕಳ್ಳೆಂ. ಹೆಂ ಆಯ್ಕಾತಾಂ ಮ್ಹಜೊ ಜೀವ್ ಏಕ್ ಪಾವ್ಟಿಂ ಉಡೊನ್ ಪಡ್ಲೊ.

ಜೀವಂತ್ ಅಸ್ತಿಪಂಜರ್ ಶೆಂ ತೊ ದಿಸ್ತಾಲೊ. ತಾಚೊ ಹಾಸೊ ಪಳೆತಾಂ ಅಸ್ತಿಪಂಜರಾಂತ್ಲ್ಯಾ ಉಗ್ತ್ಯಾ ತೊಂಡಾಂತ್ಲೆ ದಾಂತ್ ಮಾತ್ರ್ ದಿಸೊನ್, ಅಸ್ಥಿಪಂಜರ್ ಹಾಸ್ತಾಶೆಂ ಮ್ಹಾಕಾ  ದಿಸ್ಲೆಂ. ಹೆಂ ಪಳೆತಾಂ ಮ್ಹಜ್ಯಾ ಹರ್ದ್ಯಾಂತ್ ಬಾರೀಕ್ ಧಡ್ಧಡೆ ಉಟ್ಲೆ.

ತ್ಯಾಉಪ್ರಾಂತ್ ಚಡ್ ದೀಸ್ ಗೆಲೆನಾಂತ್. ಥೊಡ್ಯಾಚ್ಚ್ ದಿಸಾಂನಿ, ತಾಚಿ ಮರಣಾಚಿ ಖಬರ್ ಆಯ್ಲಿ. ಆನಿ ಹಾಂವ್ ತಾಚ್ಯಾ ಮರಣಾವಿಧಿಕ್ ಮ್ಹಣ್ ಸುಮಾರ್ ಪಾಂತ್ತೀಸ್ ಕಿ.ಮೀ. ಪಯ್ಸ್ ಆಸ್ಚ್ಯಾ ಇಗರ್ಜೆಕ್ ಗೆಲೊಂ.

ಥಂಯ್ಸರ್ ಇಗರ್ಜೆಚ್ಯಾ ಆಲ್ತಾರಿ ಮುಕಾರ್ ಮರಣಾ ಮೆಜಾರ್, ಫಕತ್ ಧೊವ್ಯಾ ಕುಡ್ಕ್ಯಾನ್ ಗುಟ್ಲಾವ್ನ್ ತಾಚಿ ನಿರ್ಜೀವ್ ಕೂಡ್ ದವರ್‌ಲ್ಲಿ, ಆನಿ ಫಕತ್ ತಾಚೆ ತೋಂಡ್ ಮಾತ್ರ್ ದಿಸ್ಚ್ಯಾಪರಿಂ, ಮಾತ್ಯಾಲಾಗಿಂ ಏಕ್ ಕಟ್ ಘಾಲ್ಲೊ!

***

ಥೊಡ್ಯಾಚ್ಚ್ ದಿಸಾಂ ಆದಿಂ ಅಸಲೆಂಚ್ಚ್ ಆನ್ಯೇಕ್ ಮರಣ್ …  ಆನಿ ಫಕತ್ ಧೊವ್ಯಾ ವಸ್ತುರಾನ್ ಗುಟ್ಲಾವ್ನ್ ಆಸ್ಲೆಲಿ ನಿರ್ಜೀವ್ ಕೂಡ್, ಮ್ಹಾಕಾ ಧೊಸುಂಕ್ ಲಾಗ್ಲ್ಯಾ.

ಆದಿಂ ಪಳೆಲ್ಲೆಂ ತೆಂ ಆಂಗ್ ಶಿರ್ಶಿರಾಂವ್ಚೆಂ ಮರಣ್, ಗಾಂವಾಂತ್ ತರ್… ಹಾಂಗಾಸರ್ ಪಳೆಂವ್ಕ್ ಮೆಳ್‌ಲ್ಲೆಂ ತೆಂ, ಕಾಳಿಜ್ ಥರ್ಥಾರಾಂವ್ಚೆಂ ಮರಣ್ … ಮುಂಬಯ್ ಶಹರಾಂತ್.

ಗಾಂವಾತ್ಲೆಂ ಮರಣ್ ಕಥೊಲಿಕ್ ಇಗರ್ಜೆಂತ್ ಆಲ್ತಾರಿ ಮುಕಾರ್ ಮರ್ಣಾ ಮೆಜಾರ್ ದವರ್‌ಲ್ಲೆಂ ತರ್ … ಮುಂಬಯ್ಚಿ ಹಿ ಕ್ರೀಸ್ತೀ ನಿರ್ಜೀವ್ ಕೂಡ್ … ಹಿಂದು ಸ್ಮಶಾನಾಂತ್ ಸಿಮೆಂಟೆ ಧರ್ಣಿರ್ ದವರುನ್ ಆಸ್‌ಲ್ಲೆಂ ದೃಶ್ಯ್ !

ಗಾಂವಾಂತ್ಲೊ ತೊ ಏಡ್ಸ್ ಪಿಡೆನ್ ಮೆಲ್ಲೊ ತರ್ … ಮುಂಬಯಾಂತ್ಲೊ ಕಿಡ್ನಿ ಆನಿ ಲಿವರ್ ಪಿಡೆನ್ ಮರಣ್ ಪಾವ್‌ಲ್ಲೊ ತಸಲೊ. ದೊಗಾಂಚೆ ತರ್ನೆ ಜೀವ್.

ಆನಿ ಹಾಂಗಾಸರ್‌ಯೀ, ನಿರ್ಜೀವ್ ಕೂಡ್ ಫಕತ್ ಧೊವ್ಯಾ ಕುಡ್ಕ್ಯಾಂತ್ ಗುಟ್ಲಾವ್ನ್, ಪಾಂಯಾಕ್ ಏಕ್ ಕಟ್, ಪೆಂಕ್ಟಾಕ್ ಏಕ್ ಕಟ್. ಆನಿ ಮಾತ್ಯಾಕ್ ಆನ್ಯೇಕ್ ಕಟ್. ಹ್ಯಾವರ್ವಿಂ ತಾಚೆಂಯ್ ತೋಂಡ್ ಉಗ್ತೆಂ ದಿಸಾನಾತ್‌ಲ್ಲೆಂ!

ಎಕಾ ಕ್ರೀಸ್ತೀ ಮನ್ಶಾಚಿ ಹಿ ಅವಸ್ಥಾ ಪಳೆವ್ನ್, ಮ್ಹಜೆ ದೊಳೆ ದುಖಾಂನಿ ಭರುನ್ ಗಯ್ರೆ ಜಾಲೆ.  ಹ್ಯಾವೆಳಾ, ಕ್ರೀಸ್ತೀ ಮನ್ಶಾಚ್ಯಾ ಕ್ರೀಸ್ತೀ ಸಂಸ್ಕಾರಾಕ್ ಕೊಣಾಕ್‌ಚ್ಚ್ ಕಿತೆಂಚ್ಚ್ ಭೊಗ್ಣಾಂ ಉದೆಲಿನಾಂತ್‌ಗೀ? ಕೊಣೆಂಯ್ ಹ್ಯಾ ಕ್ರೀಸ್ತೀ ಅತ್ಮ್ಯಾಚ್ಯಾ ಬಚಾವೆವಿಶಿಂ ಚಿಂತ್ಲೆಂನಾಂಗೀ ? ಹಾಕಾ ಲೆಕ್ಚೆ ಕೊಣ್‌ಚ್ಚ್ ನಾಂ ಜಾಲೆಗೀ ?  ಮ್ಹಜೆಂ ಕಾಳಿಜ್ ಕಳ್ವಳೊಂಕ್ ಲಾಗ್ಲೆಂ.

ಹ್ಯಾ ಕಠಿಣ್ ಪರಿಗತೆಂತ್, ತೆಣೆಂ ಹೆಣೆಂ ಗುಸು ಗುಸು ಉಟ್ಲೆಲ್ಯಾ ಉಲೊಣ್ಯಾಕ್ ಮ್ಹಜೆ ಕಾನ್ ಘುಂವ್ಲೆ ಆನಿ ಹ್ಯಾ ದುರ್ದೆಶ್ಯಾಚ್ಯಾ ಮಿಸ್ತೆರಾ ಗಜಾಲಿವಿಶಿಂ ನೀಟ್ ಜಾಲೆ.

ಥಂಯ್ಸರ್ ಹಾಜರ್ ಜಾಲ್ಲೆ ಸಗ್ಳೆ ಮ್ಹಜೆಪರಿಂಚ್ಚ್ ಆಕ್ರೇಚ್ಯಾ ಘಡ್ಯೆ ಆಕಾಂತೆಚಿ ಖಬರ್ ಮೆಳುನ್ ತುರ್ತಾನ್ ಥಂಯ್ಸರ್ ಪಾವ್ಲೆಲೆ ತಸಲೆ. ತಾಂಕಾಯೀ ಆಕ್ರೇಚ್ಯಾ ಎಕಾ ವರಾ ಆದಿಂ ಮೋರ್ನ್ ‘ವೈಕುಂಟ್ ಧಾಮ್, ಬಾಲ್ಕುಮ್ ಹಿಂದು ಕ್ರಿಮೇಶನ್ ಗ್ರೌಂಡ್, ಬಾಲ್ಕುಮ್‌ಪಾಡಾ, ಥಾಣೆ’ ಮ್ಹಳ್ಳೆಂ ಕಳ್ತಾಸ್ತಾನಾಂ, ಸಕ್ಡಾಂಚ್ಯಾ ಕಾಳ್ಜಾ-ಮತಿಕ್ ಧಕೊ ಪಡ್‌ಲ್ಲೊ.

ಅಶೆಂ ಕಶೆಂ ಜಾಲೆಂ? ಕಿತ್ಯಾಕ್ ಜಾಲೆಂ ?  ಮ್ಹಳ್ಳೆಂ ಮತಿಂತ್ ಆಘಾತ್ ಶಿಜ್ತಾಸ್ತಾನಾಂ, ವೇಳ್ ಉತ್ರೊನ್ ಗೆಲ್ಲೊ!

ಸಗ್ಳೆ ಮ್ಹಜೆ ಪರಿಂಚ್ಚ್ ಆಕ್ರೇಚ್ಯಾ ಘಡ್ಯೆ ತ್ಯಾ ಹಿಂದು ಸ್ಮಶಾನಾಕ್ ತುರ್ತಾನ್ ಪಾವ್‌ಲ್ಲೆ. ಆನಿ ಥಂಯ್ಸರ್ ಎಕಾಮೆಕಾ ತಗ್ಸಾಲ್ಲ್ಯಾ ಪಿಸ್ಪಿಸ್ಯಾ ತಾಳ್ಯಾನ್ ಉಲೊವ್ನ್ ಆಸ್‌ಲ್ಲೆ. ಹ್ಯಾ ಅನಿರೀಕ್ಶಿತ್ ಅಚಾನಕ್ ಉದೆಲ್ಲ್ಯಾ ಆಘಾತೆ ಘಡಿತಾವಿಶಿಂ ಎಕಾಮೆಕಾ ಖಬಾರ್ ಕಾಡುನ್ ಆಸ್‌ಲ್ಲೆ.

ಹ್ಯಾ ಶಿವಾಯ್, ಕಿತೆಂ ಘಡ್ಲೆಂ? ಕಿತೆಂ ಕರುಂಯಾ? ಸವಾಲಾ ಬರಾಬರ್, ‘ಕಾಂಯ್ ತರೀ ಕರುಂಯಾ!’ ಮ್ಹಣ್ಚ್ಯಾಕ್ ಆವ್ಕಾಸ್‌ಚ್ಚ್ ನಾತ್‌ಲ್ಲೆಂ ವಿಶಿಶ್ಟ್ ಸನ್ನಿವೇಶ್ ತೆಂ!

ಹಿಂದು ಸಂಸ್ಕೃತೆ ಪರ್ಮಾಣೆಂ ಸೂತಕ್ ಮ್ಹಣ್ ನ್ಹಾಣ್ ನಿತಳಾಯ್ ಕಿತೆಂಚ್ಚ್ ನಾಸ್ತಾಂ ಧರ್ಣಿರ್ ನಿದಾಯ್ಲೆಲ್ಯಾ ತ್ಯಾ ನಿರ್ಜೀವ್ ಕುಡಿಚೆರ್, ಬಿರ್ಮೊತೆ ದೀಶ್ಟ್ ಘಾಲುನ್ ಆಸ್ಚ್ಯಾ ತ್ಯಾ ಲ್ಹಾನ್ ಜಮ್ಯಾ ಮಧೆಂ ಹಾಂವೆಂ ಖಬಾರ್ ಕಾಡ್ಲಿ. ತವಳ್ ಅಸಲ್ಯಾ ಹ್ಯಾ ಕಠಿಣ್ ಸನ್ನಿವೇಶಾಕ್ ಕಾರಣ್ ಜಾಲ್ಲಿ , ನೀಜ್ ಗಜಾಲ್ ಕಳಿತ್ ಜಾಲಿ.

ಮರಣಾ ವಿಧಿವಿಶಿಂ ಫಿರ್ಗಜ್ ಯಾಜಕಾಕ್ ಸಾಂಗುಂಕ್ ಗೆಲ್ಲ್ಯಾಂಕ್, ಮರ್ನಾವಿಧಿಚಿ ಗಜಾಲ್ ವಾಡ್ಯಾಚಾ  ಗುರ್ಕಾರಾಲಾಗಿಂ ವಿಚಾರುಂಕ್ ಜಾಯ್ ಮ್ಹಣ್ ಯಾಜಕಾನ್ ಸಾಂಗ್ಲೆಂ. ಆನಿ ಗುರ್ಕಾರಾನ್ ಇಗರ್ಜೆ ರಿಜಿಸ್ಟರಾಚೆರ್ ತಾಚೆಂ ನಾಂವ್ ದಾಖಲ್ ಜಾಂವ್ಕ್ ನಾ, ತೊ ಹಾಂಗಾಸರ್ ಇಗರ್ಜೆಕ್‌‌ ಯೇನಾತ್‌ಲ್ಲೊ. ತ್ಯಾವರ್ವಿಂ ತೊ ಜಿಯೆವ್ನ್ ಆಸ್ಲೆಲ್ಯಾ ಹ್ಯಾ ಇಗರ್ಜೆಂತ್ ಯಾ ಸಿಮೆತ್ರೆಂತ್ ತಾಚಿ ಮರಣಾವಿಧಿ ಕರುಂಕ್ ಜಾಯ್ನಾಂ ಮ್ಹಣ್ ಖಡಾಖಡ್ ಸಾಂಗ್ಲೆಂ ಖಂಯ್. ಯಾಜಕಾನ್‌ಯೀ ಗುರ್ಕಾರಾಚೊ ನಿರ್ಣಯ್ ಅಂತಿಮ್ ಮ್ಹಣ್ ಹಾತ್ ಉದಾರೆ ಕೆಲೆ ಖಂಯ್. ಕಸಲ್ಯಾಚ್ ಸೊಡ್ – ದೊಡಿಕ್ ತಯಾರ್ ನಾತ್ಲ್ಯಾ ತಾಂಚ್ಯಾ ಅಂರ್ಗಾಟಿ ವರ್ತನಾನ್  , ಸರ್ಲೆಲ್ಯಾಚ್ಯಾ ಕುಟಮ್ ಧೆಧೆಸ್ಪರ್ ಜಾಲ್ಲೆಂ.

ಅಸಲ್ಯಾ ಆಕಾಂತೆ ವೆಳಾ ತಾಚೊ 85 ವರ್ಸಾಂಚೊ ಬಾಪುಯ್, ಆನಿ ತಾಚೆಂ ತೆಂ ಬೋವ್ ಲ್ಹಾನ್ ಕುಟಾಮ್ ಕಂಗಾಲ್ ಜಾಲೆಂ. ಪಯಿಲ್ಲೆಂಚ್ಚ್ ಮರಣಾ ಆಘಾತೆಂತ್ ಆಸ್ಲೆಲ್ಯಾ ತಾಂಣಿಂ, ಅಸಲೆಂ ತಳ್ಮಳೆ ಕಳ್ವಳ್ಯಾಚೆಂ ಸನ್ನಿವೇಶ್ ಉದೆತ್ ಮ್ಹಣ್ ಚಿಂತುಂಕ್‌ಚ್ಚ್ ನಾತ್‌ಲ್ಲೆಂ.

ಆತಾಂ, ಸರ್ಲೆಲ್ಯಾಚಿ ಮರಣಾವಿಧಿ ಕ್ರೀಸ್ತೀ ಸಂಸ್ಕೃತೆ ಪರ್ಮಾಣೆಂ ಕರುಂಕ್ ಜಾಯ್ನಾಂ ಮ್ಹಣ್ಚಿ ಗಜಾಲ್, ಸರ್ಲೆಲ್ಯಾಚ್ಯಾ ಬಾಯ್ಲೆಚ್ಯಾ ಕುಟ್ಮಾಂಚಾಕ್ ಕಳಿತ್ ಜಾತಾಸ್ತಾಂ, ತಿಂ ತಾಂಚ್ಯಾ ಹಿಂದು ಸಂಸ್ಕೃತೆ ಪರ್ಮಾಣೆಂ, ತಾಚಿ ಮರಣಾವಿಧಿ ಕರುಂಕ್ ತಯಾರಾಯ್ ಕರಿಲಾಗ್ಲಿಂ!

ಅಶೆಂ ಏಕ್ ಕ್ರೀಸ್ತೀ ಅತ್ಮೊ, ಕ್ರೀಸ್ತೀ ಯಾಜಕ್ ಆನಿ ಲಾಯಿಕ್ ಗುರ್ಕಾರಾ ನಿಮ್ತಿಂ ಸಲ್ವಾಸಾಂವಾವಿಶಿಂ ದುಬಾವೆಕ್ ಒಳಗ್ ಜಾವ್ನ್, ಹಿಂದು ಸ್ಮಶಾನಾಕ್ ಪಾವ್ಲೊ.

ಬಾಪ್ತಿಜ್ಮ್ , ಕುಮ್ಗಾರ್, ಕ್ರೀಜ್ಮ್. ಮಾತ್ರಿಮೊನಿ –  ಅಸಲೆ ಸಾಕ್ರಾಮೆಂತ್ ಘೆತ್ಲೆಲ್ಯಾ ಕ್ರೀಸ್ತೀ ಯುವಕಾಕ್, ತ್ಯಾ ನಂತರ್ ತೊ ಇಗರ್ಜೆಕ್ ಯೇಂವ್ಕ್ ನಾ, ರಿಜಿಸ್ಟರಾಂತ್ ನಾಂವ್ ನಾ,  ರುಲಿ ರೆಗ್ರ್ಯೊ ಪಾಳುಂಕ್ ನಾಂತ್ , ಮ್ಹಳ್ಳೆಂ ರಾಜಾಂವ್ ಘಟ್ಟ್ ಧರುನ್…

ಕ್ರೀಸ್ತಾಂವ್ ಜಾವ್ನ್ ಆಸ್ಲೆಲ್ಯಾ ಯುವಕಾಕ್, ‘ತೊ ಖಂಯ್ಗೀ ರಸ್ತ್ಯಾರ್ ಮೆಲ್ಲೊ, ತಾಚಿ ಒಳಕ್ ನಾ!’ ಮ್ಹಳ್ಳೆಪರಿಂ ಕರುನ್, ತಾಕಾ ಕ್ರೀಸ್ತೀ ಸಲ್ವಾಸಾಂವ್ ಮೆಳಾನಾತ್ಲೆಲೆಪರಿಂ ಕರುನ್  ಹಿಂದು ಸ್ಮಶಾನಾಚಿ ವಾಟ್ ದಾಕಯ್ಲೆಲಿ ಗಜಾಲ್ – ಬೆಜಾರಾಯೆಚಿ.

ಅನಿರೀಕ್ಶಿತ್ ಥರಾನ್ ಉದೆವ್ನ್, ಚಿಂತುಂಕ್ ಆವ್ಕಾಸ್‌ಚ್ಚ್ ನಾತ್ಲೆಲ್ಯಾ, ವೆಳಾಚೊ ಆಬಾವ್, ಆಕಾಂತ್ ಆಘಾತೆಚ್ಯಾ ಹ್ಯಾ ಸಂಧರ್ಭಾವರ್ವಿಂ ಘರ್ಚಿಂ ಕಂಗಾಲ್ ಜಾಲ್ಲಿಂ. ಅಸಲ್ಯಾ ಸಂಧರ್ಭಿಂ, ತಾಚ್ಯಾ ಫಿರ್ಗಜಿಚ್ಯಾ ಯಾಜಕಾನ್ ಯಾ ತ್ಯಾ ಲಾಯಿಕ್ ಗುರ್ಕಾರಾನ್ ಎಕಾ ಅತ್ಮ್ಯಾಚ್ಯಾ ಬಚಾವೆ ಖಾತಿರ್… ಸರ್ಲೆಲ್ಯಾಚ್ಯಾ ಕುಟ್ಮಾಕ್, ತಾಕಾ ಬಾಪ್ತಿಜ್ಮ್, ಎವ್ಕರಿಸ್ತ್ , ಕ್ರೀಜ್ಮ್ ಮೆಳ್ಳ್ಯಾ ಫಿರ್ಗಜೆಕ್ ವೆಚಾಕ್ ಸಲಹಾ ದಿಲಿನಾಂ. ಯಾ ತಾಣಿಂ ಜಾವ್ನ್ ಪ್ರೇತನ್ ಕರುಂಕ್ ನಾ.  ತಾಣಿಂ ಫಕತ್ತ್, ರೇಗ್ರ್ ರುಲಿ, ಕಾಯ್ದೊ ಮ್ಹಣ್ ಪಿಲಾತಾನ್ ಹಾತ್ ಧುಲ್ಲೆಪರಿಂ ಹಾತ್ ಧುಲೆ , ಆನಿ ಕಸಲಿಚ್ಚ್ ಚಿಂತ್ತಾ ಪರ್ವಾ ಕರಿನಾಸ್ತಾಂ ಸಮಡ್ತಿಚೆಂ ಬೆಫಿಕೆರ್ ಕರುನ್ ಥಂಡ್ ರಾವ್ಲೆ.

ಎಕಾದಾವೆಳಾ ಜರ್ ತೊ ಮಿಸಾಕ್ ವೆಚೆಂ ತಶೆಂ ಕುಮ್ಗಾರ್ ಘೆವ್ನ್ ಆಸ್ಚೆಂ ಆಸೊನ್, ಫಕತ್ ಇಗರ್ಜೆ ರಿಜಿಸ್ತ್ರಾರೆಂತ್ ಆಪ್ಲೆಂ ನಾಂವ್ ದಾಖಲ್ ಕರುಂಕ್ ನಾತ್ಲೆಲೆಂ ತರ್, ತವಳ್‌‌‌ಯೀ  ತೆ ಹಿಂದು ಸಿಮೆಸ್ತ್ರೆಕ್ ತಾಚೆಂ ಮರಣ್ ಧಾಡ್ತೆ ಆಸ್‌ಲ್ಲೆ?

ತ್ಯಾಚ್ಚ್ ಪರ್ಮಾಣೆಂ ತ್ಯಾ ಯಾಜಕಾಚೊ ಯಾ ತ್ಯಾ ಗುರ್ಕಾರಾಚೊ ಭಾವ್ ಯಾ ಖಾಸಾ ಸಂಬಂದಿ ಜಾಲ್ಲೊ ತರ್, ಅಸಲ್ಯಾ ಸಂದರ್ಬಾರ್ ಅಶೆಂಚ್ಚ್ ತೆ ಕರ್ತೆ? ಹಿ ಸಗ್ಳಿಂ ಸವಾಲಾಂ ಚಿಂತ್ತಾಸ್ತಾನಾಂ, ತಾಂಕಾಯೀ ಹ್ಯಾವಿಶಿಂ ದೆವಾಕ್ ಜಾಪ್ ದೀಂವ್ಕ್ ಆಸ್ತೆಲೆಂ ಮ್ಹಳ್ಳೆಂ ಚಿಂತಾಪ್ ಉದೆತಾ.

ಜೆಜುನ್, ಲೊಕಾಂಚೆರ್ ಕಾಯ್ದ್ಯಾಚೊ ಭೊರೊ ಘಾಲ್ಲ್ಲ್ಯಾ ಫಾರಿಜೆವ್, ಶಾಸ್ತ್ರಿಂಕ್ ಖಂಡನ್ ಕರ್ಚ್ಯಾ ಉತ್ರಾಂಚಿ ಚಾಟಿ ಭಿಜಾಯಿಲ್ಲಿ. ಚೂಕ್ ಕೆಲ್ಲ್ಯಾಕ್ ‘ಸಾತ್ ನ್ಹಂಯ್ ಸಾತಾಂಚ್ಯಾ ಸತ್ತರ್ ಪಾವ್ಟಿಂ ಭೊಗ್ಶಿಯಾ’ ಮ್ಹಣ್ ಜೆಜುನ್ ಸಾಂಗ್‌ಲ್ಲೆಂ.

ಸದಾಂ ಮಾಗ್ಣೆಂ ರಜಾರ್ ತಶೆಂ ಹರ್ಯೆಕ್ ಘಡಿ ದೆವಾಚೊ ಉಗ್ಡಾಸ್, ಪೂಜಾ ಕರುನ್ ಆಸ್ಲೆಲ್ಯಾಕ್ ತಾಣೆಂ ಪೆಲ್ಯಾಚಿ ನಿರ್ಲಕ್ಶಾ ನಿಂದಾ ಕೆಲ್ಲ್ಯಾ ಖಾತಿರ್ ಜೆಜು  ‘ತುಂ ಕೋಣ್? ಆಪುಣ್ ತುಕಾ ವೊಳ್ಕಾನಾಂ!’ ಮ್ಹಣುನ್ ಜೆಜುನ್‌ಯೀ ತಾಚಿ ನಿರ್ಲಕ್ಶಾ ಕೆಲ್ಲಿ.

ಹೆಂ ಸಗ್ಳೆಂ ಮತಿಕ್ ಧೊಸ್ತಾನಾಂ… ‘ಸದಾಂ ವಾಂಜೆಲ್ ವಾಚ್ಚ್ಯಾ ಯಾಜಕಾಕ್ … ಎಕಾ ಕ್ರಿಸ್ತೀ ಅತ್ಮ್ಯಾಕ್ ಹಿಂದು ಸಿಮೆತ್ರೆಕ್ ಪಾವಯಿಲ್ಲ್ಯಾ ಗಜಾಲೆವಿಶಿಂ ಕಿತೆಂಚ್ಚ್ ಭೊಗ್ಲೆಂನಾಂ ಕಾಂಯ್ ?

ಇಗರ್ಜೆಂತ್ … ನಿರ್ಜೀವ್ ಕುಡಿಕ್ ಬೆಂಜಾರ್ ಕರುನ್, ತವಳ್ ಥೊಡಿ ಕ್ರೀಸ್ತೀ ಶಿಕೊವ್ಣ್, ಜೆಜುನ್ ಪರತ್ ಪರತ್ ಮ್ಹಳ್ಳೆಲೆಂ ಭೊಗ್ಸಾಣೆಂ … ಭರ್ವೊಸೊವಿಶಿಂ ಥೊಡೆಂ ನಿಯಾಳ್ ಶಿಕಾಪ್, ಜರ್ ಯಾಜಕಾನ್ ದಿಲ್ಲೊ ತರ್ … ಥಂಯ್ಸರ್ ಹಾಜರ್ ಜಾಲ್ಯಾ ಅಕ್ರೀಸ್ತಾಂವಾಕ್, ಜೆಜು ಕ್ರೀಸ್ತಾಚಿ ವೊಳಕ್ ತರೀ ಲಾಭ್ತಿ.

ಪೂಣ್ ನಾಂ. ‘ನಾಂ … ಸಾದ್ಯಚ್ಚ್ ನಾಂ’ ಮ್ಹಳ್ಳ್ಯಾ ಧಾರುಣಾಯೆಚ್ಯಾ ಹಟ್ಟಾನ್ ಸಗ್ಳೆಂ ವ್ಯರ್ಥ್ ಜಾಲೆಂ.

ಹಾಂಗಾಸರ್ ಏಕ್ ಸವಾಲ್ ಉದೆತಾ … ಎಕಾದಾವೆಳಾ ತ್ಯಾ ಹಿಂದ್ವಾಂನಿಯೀ ‘ತೊ ಆಮ್ಚ್ಯಾ ದೆವಾಳಾಕ್ ಹಾಜರ್ ಜಾಯ್ನಾತ್‌ಲ್ಲೊ’ ಮ್ಹಣ್ ಕ್ರೀಸ್ತೀ ಕಾಯ್ದೊ ರಿವಾಜ್ ರೂಲಿ ಮಳ್ಳ್ಯಾಹಟ್ಟಾನ್ ರಾವ್ಲೆಲೆಂ ಪರಿಂ ತಾಣಿಂಯೀ ಹಟ್ಟ್ ಕೆಲ್ಲೆಂ ತರ್ … ತ್ಯಾ ನಿರ್ಜೀವ್ ಕುಡಿಚಿ ಗತ್ ಕಿತೆಂ ಜಾತೆ ಆಸ್‌ಲ್ಲಿ?

ಪೂಣ್ ಕ್ರೀಸ್ತಾವಾಂನಿಂ ಚಿಂತ್ಲೆಲೆಪರಿಂ ತಾಣಿಂ ಚಿಂತ್ಲೆಂ ನಾ. ಬಗಾರ್ ಕ್ರೀಸ್ತೀ ಸಮುದಾಯೆಕ್ ತಾಂಚೆ ಮನ್ಶಾವಿಶಿಂ ತಾಚ್ಯಾ ಅತ್ಮ್ಯಾ ವಿಶಿಂ ಕಿಂಚಿತ್ ಭೊಗ್ಣಾಂ ನಾಂತ್ ತರ್, ಆಮಿಂ ತರೀ ತ್ಯಾ ಪುನೆವಂತಾಚಿ ಬಿರ್ಮತ್ ಪಾವ್ಯಾಂ  ಆನಿ ತಾಚೊ ಅಂತಿಮ್ ಸಂಸ್ಕಾರ್ ಆಮಿಂ ಕರ್ಯಾಂ ಮ್ಹಣ್ ತಿಂ ಮುಕಾರ್ ಆಯ್ಲಿಂ!

ಆನಿ ಥಂಯ್ಸರ್ ಜಮ್ಲೆಲ್ಯಾ ಕ್ರೀಸ್ತೀ ಲೊಕಾಚಿಂ ತಿಂ ಫಕತ್ ಸಿಸ್ರೆಚಿಂ ದುಖಾಂ ಮ್ಹಣ್ ಚಿಂತುನ್ ಆಮ್ಕಾಂ ತಾಣಿಂ ಲಜೆಕ್ ಘಾಲೆಂ!

ಕಿತೆಂಯ್ ಜಾಂವ್ – ಆಕ್ರೇಕ್ ಹಾಂವೆಂ ಸಾಂಗ್ಚೆಂ ಇತ್ಲೆಂಚ್ಚ್, ಆಮಿ ಸದಾಂ ಆಮ್ಚ್ಯಾ ಮಾಗ್ಣ್ಯಾವೆಳಾರ್ ‘ಅಸಲೆಂ ಅನಾಥ್ ಮರಣ್ ಮೆಲ್ಲ್ಯಾ ಅತ್ಮ್ಯಾ ಖಾತಿರ್ ಮಾಗ್ಯಾಂ’ ಆನಿ ‘ಆಮ್ಕಾಂಯೀ ಬರೆಂ ಮರಣ್ ಫಾವೊ ಕರ್ ದೆವಾ’ ಮ್ಹಣ್ ಮಾಗ್ಣೆಂ ಚಾಲು ದವರ್ಯಾಂ.

■ ರೋನ್ ರೋಚ್ ಕಾಸ್ಸಿಯಾ