ಸಾಂಗಾತಿ ರೋಶುಚಿ ಆವಯ್ ಆಪ್ಲ್ಯೆ 87 ವರ‍್ಸಾಂ ಪ್ರಾಯೆರ್ ಸಂಸಾರಾಕ್ ಅಂತರ‍್ಲಿ. ತ್ಯೆಚ್ ರಾತಿಂ ರೋಶುನ್ ಮ್ಹಾಕಾ ವಾಟ್ಸಾಪಾರ್ ಮೆಸೇಜ್ ಧಾಡ್ಲಿ – ‘ಮ್ಹಜಿ ಮಮ್ಮಿ ಸರ‍್ಲಿ, 6 ವೊರಾರ್’.
‘ಆರ್ಸೊ’ ಪತ್ರ್ ಸುರು ಜಾಲ್ಲ್ಯಾ ದಿಸಾಥಾವ್ನ್ ರೋಶುಚಿ ಮಮ್ಮಿ ಪತ್ರಾಚಿ ಖಾಯಾಮ್ ವಾಚ್ಪಿ ಜಾವ್ನಾಸ್ಲಿ. ಬೊವ್ಶಾ ರೋಶುನ್ ವಾಚುನ್ ಕಾಡ್ಚ್ಯಾ ಪಯ್ಲೆಂ ತಿ ‘ಆರ್ಸೊ’ ಪತ್ರ್ ಸಗ್ಳೆಂ ವಾಚುನ್ ಕಾಡ್ತಾಲಿ. ಹಾಂವ್ ಆನಿ ಎಡಿಯಾಬ್ ರೋಶುಚ್ಯಾ ಘರಾ ಫೆಸ್ತಾಕ್ ಗೆಲ್ಲ್ಯಾ ತವಳ್ ‘ಆರ್ಸೊ’ ಪತ್ರಾರ್ ಫಾಯ್ಸ್ ಜಾಂವ್ಚ್ಯಾ ಬರ‍್ಪಾಂವಿಶಿಂ ತಿ ಆಮ್ಚೆಲಾಗಿಂ ತೋಂಡ್‌ಭರ್ ಉಲಯಿಲ್ಲಿ. ತಿಚ್ಯಾ ಉಲೊಣ್ಯಾಂತ್ ಹಾಂವೆಂ ಪಾರ್ಕಿಲ್ಲಿ ಗಜಾಲ್ – ತಿ ಫಕತ್ ‘ಆರ್ಸೊ’ ಮಾತ್ ನ್ಹಯ್, ಘರಾ ಯೆಂವ್ಚಿಂ ಹರ್ ಕೊಂಕ್ಣಿ ಪತ್ರಾಂ ವಾಚ್ತಾಲಿ ಆನಿ ತಿಕಾ ಕೊಂಕ್ಣಿ ಸಾಹಿತ್ಯಾಚಿ ರೂಚ್ ಆಸ್ಲಿ. ಮಾತ್ರ್ ನ್ಹಯ್, ಬರೆಂ ವಾಚಪ್ ಕಶೆಂ ಆಸೊಂಕ್ ಜಾಯ್ ಮ್ಹಳ್ಳ್ಯಾ ವಿಶ್ಯಾಂತ್ ಏಕ್ ಸ್ಪಶ್ಟ್ ಚಿಂತಪ್ ಆಸ್ಲೆಂ.
ಆಯ್ತಾರಾ 28 ವೆರ್ ರೋಶುಚ್ಯಾ ಮಮ್ಮಿಚೆಂ ಮೋರ‍್ನ್ ಬಜ್ಪೆ ಇಗರ್ಜೆಂತ್ ಜಾಲೆಂ. ಫ್ರಾನ್ಸಿಸ್ಕನ್ ಮೆಳಾಚೆ ಆನಿ ದಿಯೆಸೆಜಿಚೆ ಮ್ಹಣ್ ಸುಮಾರ್ ಸಾತಾಟ್ ಯಾಜಕಾಂನಿ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಕುಲ್ಶೇಕರ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಕ್ಲಿಫರ್ಡ್ ಫೆರ್ನಾಂದ್ ಹಾಣಿಂ ದೆವಾಚೆಂ ಉತರ್ ವಾಚ್ಲೆಂ ಆನಿ ದೆವಾಚ್ಯಾ ಉತ್ರಾಚೆರ್ ನಿಯಾಳ್ ದೀವ್ನ್ ಮೊರ‍್ನಾವಿಧಿಚೆರ್ ಏಕ್ ಕಾವ್ಯಾಳ್ ಕೀಟ್ ಪೆಟೊವ್ನ್ ಸೊಡ್ಲೆಂ.
ಬಾ| ಕ್ಲಿಪ್ಪಿನ್ ಆಪ್ಲ್ಯಾ ನಿಯಾಳಾಂತ್ ಪೆಟಯಿಲ್ಲೆಂ ಕಾವ್ಯಾಚೆಂ ಕೀಟ್, ಶೃದ್ಧಾಂಜಲಿ ಪಾಟಯಿಲ್ಲ್ಯಾ ಆಲ್ವಿನ್ ಮೆಸ್ತ್ರಿನ್ (ಆಲ್ವಿನ್ ನೊರೊನ್ಹಾ) ಕವಿತೆಚ್ಯಾ ಶಿಖರಾಕ್ ವ್ಹರುನ್ ಪಾಯ್ಲೆಂ. ಆಪ್ಲ್ಯಾ ಭುಜಾವಣೆಚ್ಯಾ ಉತ್ರಾಂನಿ ಆಲ್ವಿನ್ ಮೆಸ್ತ್ರಿನ್ ಮ್ಹಳೆಂ – ‘ಆವಯ್ ಕೆದಿಂಕ್‌ಚ್ ಸರಾನಾ. ತಿ ನ್ಹಂಯ್ ಜಾವ್ನ್ ವ್ಹಾಳೊನ್ ಆಸ್ತಾ ಆನಿ ದರ್ಯಾಕ್ ವಚೊನ್ ಮೆಳ್ತಾ.’ ಆನಿ ಅಶೆಂ ರೋಶುನ್ ಆವಯ್ ಸರ್‌ಲ್ಲ್ಯಾ ತವಳ್ ಆಕ್ಲಾಸಾನ್ ‘ಮ್ಹಜಿ ಮಮ್ಮಿ ಸರ‍್ಲಿ’ ಮ್ಹಣ್ ಕಾಡ್ಲಲೊ ಉದ್ಗಾರ್ ಸಯ್ತ್ ಏಕ್ ಕಾವ್ಯಾಳ್ ರೂಪಕ್ ಜಾವ್ನ್ ಬದ್ಲಿಲೊ. ಆಲ್ವಿನ್ ಮೆಸ್ತ್ರಿಚ್ಯಾ ಉತ್ರಾಂನಿ ಘಾಲ್ಲ್ಯೆ ಭುಲಿ ಥಾವ್ನ್ ಮ್ಹಾಕಾ ತರೀ, ಆಜೂನ್ ಭಾಯ್ರ್ ಯೇಂವ್ಕ್ ಜಾತೇ ನಾ.
ಮುಳಾನ್ ರೋಶು ಏಕ್ ವಿನೋದ್ ಬರೊವ್ಪಿ. ತಾಚೆಭಿತರ್ ಏಕ್ ಕವಿ ಆಸಾ ಮ್ಹಣ್ ಕವಿ ವಿಲ್ಸನಾನ್ ‘ಪೊಯೆಟಿಕ್ಸ್’ ವಾಟ್ಸಾಪ್ ಪಂಗಡ್ ಸುರು ಕರ‍್ತಾ ಪರ್ಯಾಂತ್ ತಾಕಾಚ್ ಖಬರ್ ನಾತ್ಲಿ ಮ್ಹಣ್ ತಾಣೆಂಚ್ ಆಮ್ಚೆಲಾಗಿಂ ಮ್ಹಳ್ಳೆಂ ಆಸಾ. ‘ಪೊಯೆಟಿಕ್ಸ್’ ಪಂಗ್ಡಾ ಥಾವ್ನ್ ಕವಿತಾ ಬರೊಂವ್ಕ್ ಧರ‍್ಲಲ್ಯಾ ರೋಶುಚೆ ಕವಿತೆಂಚೆ ಬೂಕ್ ಜಾಲ್ಯಾತ್ ಆನಿ ತಾಚ್ಯಾ ಎಕಾ ಬುಕಾಕ್ ತಿತೀನ್ ಪುರಸ್ಕಾರ್‌ಯೀ ಲಾಬ್ಲ್ಯಾತ್.
ಬಾ| ಕ್ಲಿಪ್ಪಿನ್ ಆನಿ ಆಲ್ವಿನ್ ಮೆಸ್ತ್ರಿನ್ ರೋಶುಕ್ ಏಕ್ ಕವಿ ಜಾವ್ನ್ ಕಿತ್ಲೆಂ ವಾಚ್ಲಾಂ ಮ್ಹಳ್ಳಿ ಜಾಣ್ಕಾರಿ ಮ್ಹಾಕಾ ನಾ. ಮ್ಹಾಕಾ ಧಾಡ್‌ಲ್ಲೆಬರಿಚ್ ರೋಶುನ್ ಆಲ್ವಿ ಮೆಸ್ತ್ರಿಕ್‌ಯೀ ‘ಮ್ಹಜಿ ಮಮ್ಮಿ ಸರ‍್ಲಿ, 6 ವೊರಾರ್’ ಮ್ಹಣ್ ವಾಟ್ಸಾಪ್ ಮೆಸೇಜ್ ಧಾಡ್‌ಲ್ಲಿಗೀ ಮ್ಹಳ್ಳೆವಿಶ್ಯಾಂತ್‌ಯೀ ಖಬರ್ ನಾ. ಎಕಾದಾ ವೆಳಾ ಧಾಡುಂಕ್ ನಾ ಜಾಲ್ಯಾರ್, ಆಲ್ವಿನ್ ಮೆಸ್ತ್ರಿನ್ ಆಪ್ಲ್ಯೆ ಶೃದ್ಧಾಂಜಲಿಂತ್ ‘ಆವಯ್ ಸರಾನಾ, ತಿ ನ್ಹಂಯ್ ಜಾವ್ನ್ ವಾಳ್ತಾ, ದರ್ಯಾಕ್ ವಚೊನ್ ಮೆಳ್ತಾ’ ಮ್ಹಳ್ಳ್ಯಾ ಕಾವ್ಯಾಳ್ ಉತ್ರಾಂಚೊ ಪ್ರಯೋಗ್ ಕೆಲ್ಲೊ ಫಕತ್ ಆಕಸ್ಮಿಕ್ ಆಸ್ತಲೊ ಮ್ಹಣ್ ಲೆಕ್ಯಾಂ.
ಭಾರತೀಯ್ ಸಂಸ್ಕೃತೆಂತ್ ನ್ಹಂಯ್ಕ್ ಆನಿ ಭುಂಯ್ಕ್ ಆವಯ್ ಮ್ಹಳಾಂ. ಲಂಕೇಶಾನ್ ತಾಚ್ಯೆ ಎಕೆ ಕವಿತೆಂತ್ ಆವಯ್ಕ್ ಭುಂಯ್ಕ್ ಸರ್ ಕೆಲಾಂ.
ನನ್ನವ್ವ ಫಲವತ್ತಾದ ಕಪ್ಪು ನೆಲ
ಅಲ್ಲಿ ಹಸಿರು ಪತ್ರದ ಹರವು, ಬಿಳಿಯ ಹೂ ಹಬ್ಬ;
ಸುಟ್ಟಷ್ಟು ಕಸುವು, ನೊಂದಷ್ಟು ಹೂ ಹಣ್ಣು
ಮಕ್ಕಳೊದ್ದರೆ ಅವಳ ಅಂಗಾಂಗ ಪುಲಕ;
ಹೊತ್ತ ಬುಟ್ಟಿಯ ಇಟ್ಟು ನರಳಿ ಎವೆ ಮುಚ್ಚಿದಳು ತೆರೆಯದಂತೆ.
ಭುಂಯ್‌ಬರಿಚ್ – ನ್ಹಂಯ್ ಜೀವ್ ದಿತಾ – ಫಕತ್ ಮನ್ಶಾಂಕ್ ಮಾತ್ರ್ ನ್ಹಯ್, ಸುಕ್ಣ್ಯಾ-ಸಾವ್ಜಾಂಕ್, ರುಕಾ-ಝಾಡಾಂಕ್, ಮಾಸ್ಳಿ-ಮೊನ್ಜಾತಿಂಕ್. ನ್ಹಂಯ್ ಸಗ್ಳ್ಯಾಂಕ್ ಎಕಾಚ್ ಮಾಪಾನ್ ಮೋಗ್ ದೀವ್ನ್‌ಚ್ ವೆತಾ. ಸಂಸಾರಾರ್ ನಾಗರೀಕತಾ ವಾಡೊನ್ ಆಯಿಲ್ಲೊ ಇತಿಹಾಸ್ ಪಳಯ್ಲ್ಯಾರೀ ನಾಗರಿಕತಾ ನ್ಹಂಯ್ ವ್ಹಾಳೊನ್ ಗೆಲ್ಲೆಕಡೆನ್ ವಾಡೊನ್ ಆಯಿಲ್ಲಿಚ್ ದೊಳ್ಯಾಂಕ್ ದಿಸ್ತಾ. ಮಾದ್ಯಮಿಕ್ ಶಾಳೆಂತ್ ಇತಿಹಾಸಾಚ್ಯಾ ಪಾಠ್‌ಪುಸ್ತಕಾಂನಿ ಹ್ಯಾ ವಿಶಿಂ ಜಾಯ್ತ್ಯೊ ದೆಕಿ ವಾಚುಂಕ್ ಮೆಳ್ತಾತ್.
ಆಲ್ವಿನ್ ಮೆಸ್ತ್ರಿನ್ ಶೃದ್ಧಾಂಜಲಿಂತ್ ಆನ್ಯೇಕ್ ಉತರ್ ಮ್ಹಳೆಂ – ‘ರೋಶುಚಿ ಮಮ್ಮಿ ತಿಚ್ಯಾ ಭುರ್ಗ್ಯಾಂಚೆ ಸಾಂಗಾತಿ ಕೋಣ್ ಘರಾ ಗೆಲ್ಯಾರೀ ತಿಚ್ಯಾಚ್ ಭುರ್ಗ್ಯಾಂಬರಿ ಪಳಯ್ತಾಲಿ.’ ಹ್ಯಾಚ್ ಕಾರಣಾಕ್ ಲಾಗೊನ್ ತಾಣೆಂ ತಿಚೆಂ ವೆಕ್ತಿತ್ವ್ ಪಿಂತ್ರಾಂವ್ಕ್ ನ್ಹಂಯ್ಚೆಂ ರೂಪಕ್ ವಾಪಾರ‍್ಲೆಂ ಆಸುಂಯೆತಾ ಮ್ಹಣ್ ಮ್ಹಾಕಾ ಭೊಗ್ತಾ.
ಬೈಬಲಾಚ್ಯಾ ವಾಚ್ಪಾಚೆರ್ ‘ಹೆಂ ವಾಚಪ್ ತೀನ್ ವರ‍್ಸಾಂಕ್ ಏಕ್ ಪಾವ್ಟಿಂ ಲಿತುರ್ಜಿಂತ್ ಯೆತಾ. ಆಮಿ ಜೀವ್ ಆಸ್ಲ್ಯಾರ್ ತೀನ್ ವರ‍್ಸಾಂ ಉಪ್ರಾಂತ್ ಹೆಂಚ್ ವಾಚಪ್ ಆಮಿ ಪರ‍್ತ್ಯಾನ್ ಆಯ್ಕೊವ್ಯೆತ್’ ಮ್ಹಣ್ ಡಿಸ್‌ಕ್ಲೈಮರ್ ದೀವ್ನ್ ಆಪ್ಲೊ ನಿಯಾಳ್ ಸುರು ಕೆಲ್ಲ್ಯಾ ಬಾ| ಕ್ಲಿಪ್ಪಿನ್ ಬೈಬಲಾಚೆಂ ಉತರ್ ವಾಚ್ತಾನಾ ವಾಕ್ಯಾಂ ಸಾರ್ಕಿಂ, ಕಶಿಂ ಬರಯ್ಲ್ಯಾಂತ್ ತಶಿಂ, ಅರ್ಧೊ ವಿರಾಮ್, ಪೂರ್ಣ್ ವಿರಾಮ್ ಘೆವ್ನ್ ಸುಡಾಳ್ ವಾಚಿಜೆ. ತವಳ್ ಮಾತ್ರ್ ಆಮ್ಕಾಂ ದೆವಾಚೆಂ ಉತರ್ ಸಾರ್ಕೆಂ ಸಮ್ಜಾತಾ ಮ್ಹಳ್ಳಿ ಶಾಸನಾತ್ಮಕ್ ಕಳೊವ್ಣಿಯ್ ದಿಲಿ.
ಚಡ್ ಕರುನ್ ಸಾಹಿತ್ಯಾಂತ್, ಪ್ರತ್ಯೇಕ್ ಜಾವ್ನ್ ಕವಿತಾ/ಕಾವ್ಯೆಂ ವಾಚ್ತಾನಾ ಅರ್ಧ್ ವಿರಾಮ್, ಪೂರ್ಣ್ ವಿರಾಮ್ ಆನಿ pauses ಸಾರ್ಕೆ ಘೆಜೆ ಮ್ಹಣ್ತಾಂವ್ ಆನಿ ಭುರ್ಗ್ಯಾಂಕ್‌ಯೀ ಶಿಕಯ್ತಾಂವ್. ಕವಿತೆಚೊ ಅರ್ಥ್ ಲಿಪೊನ್ ಆಸ್ಚೊಚ್ space ಆನಿ pause ಹಾಂತುಂ ಮ್ಹಣ್ ಹಾಂವ್ ಖಂಡಿತ್ ಪಾತ್ಯೆವ್ನ್ ಆಯ್ಲಾಂ. ಕವಿತಾ ಸಾರ್ಕಿ ಸ್ಪೇಸ್ ಆನಿ ಪೊಜ್ ದೀವ್ನ್ ವಾಚಿನಾ ಜಾಲ್ಯಾರ್ ತೀ ಅರ್ಥ್ ಕಶೀಯ್ ಜಾಯ್ನಾ, ವಿದ್ರೂಪ್ ಜಾಂವ್ಚಿ ಸಾಧ್ಯತಾಯ್ ಚಡ್ ಆಸ್ತಾ. ಪುಣ್ ದೆವಾಚೆಂ ಉತರ್ ಕಾವ್ಯಾಬರಿ pause ಆನಿ space ದೀವ್ನ್ ವಾಚಿಜೆ ಮ್ಹಣ್ ಎಕಾ ಯಾಜಕಾನ್ ಮಿಸಾರ್ ಸಾಂಗ್‌ಲ್ಲೆಂ ಬೊವ್ಶಾ ಹಾಂವೆಂ ಪಯ್ಲೆಪಾವ್ಟಿಂ ಆಯ್ಕಾಲೆಂ.
ಸಾದ್ಯಾ ಕಾಳಾಚ್ಯಾ ಸವಿಸಾವ್ಯಾ ಆಯ್ತಾರಾಚೆಂ ವಾಚಪ್ (ಲೂಕ್ 18:18-31) ‘ಜೆಜುನ್ ಫಾರಿಜೆವಾಂಕ್ ಸಾಂಗ್ಲೆಂ…’ ಥಾವ್ನ್ ಸುರು ಜಾತಾ ಆನಿ ಪಾತಾಳಿಂ ವಳ್ವಳ್ಚ್ಯಾ ಗ್ರೇಸ್ತ್ ಮನ್ಶಾನ್ ‘ತರ್ ಬಾಪಾ, ಲಾಜರಾಕ್ ಮ್ಹಜ್ಯಾ ಬಾಪಾಯ್ಚ್ಯಾ ಘರಾ ಪುಣೀ ಧಾಡ್…’ ಮ್ಹಣ್ ಪರಾತ್ಚೆಸವೆಂ ಆಖೇರ್ ಜಾತಾ.
ವಾಚ್ಪಾಂತ್ಲಿಂ ಕಾವ್ಯಾಳ್ ಕುಸಾಂ ಉಸೊವ್ನ್ ಬಾ| ಕ್ಲಿಪ್ಪಿನ್ ಜಾಯ್ತ್ಯೊ ಗಜಾಲಿ ಆಪ್ಲ್ಯಾ ನಿಯಾಳಾಂತ್ ಸಾಂಗ್ಲ್ಯೊ. (ಆಸಕ್ತ್ ಆಸ್ಲಲ್ಯಾಂನಿ ವೀಡಿಯೊ ಪಳವ್ಯೆತ್) ಹ್ಯಾ ಪಯ್ಕಿ ಮ್ಹಾಕಾ ಆಪಡ್ಲಲ್ಯಾ ದೋನ್ ಗಜಾಲಿಂ ಪಯ್ಕಿ – ಪಯ್ಲಿ ಗಜಾಲ್; ಹ್ಯಾ ಸಗ್ಳ್ಯಾ ವಾಚ್ಪಾಂತ್ ಗ್ರೇಸ್ತ್ ಮನ್ಶಾಚೆಂ ನಾಂವ್ ನಾ. ಪುಣ್ ಲಾಜರ್ ನಾಂವಾಚೊ ರುಂವಾಂನಿ ಭರ‍್ಲಲೊ ಏಕ್ ಭಿಕಾರಿ ಯೇವ್ನ್ ಪಡ್ತಾಲೊ ಮ್ಹಳಾಂ. ಆನಿ ದುಸ್ರಿ ಗಜಾಲ್; ಗ್ರೇಸ್ತ್ ಮನಿಸ್‌ಯೀ ಮೆಲೊ ಆನಿ ತಾಕಾ ವ್ಹರ‍್ನ್ ಪುರ‍್ಲೊ ಮ್ಹಳಾಂ. ಪುಣ್ ಭಿಕಾರಿ ಮೆಲೊ ಆನಿ ದೇವ್‌ದುತಾಂನಿ ತಾಕಾ ವ್ಹರ‍್ನ್ ಸರ್ಗಿಂಚ್ಯಾ ಜೆವ್ಣಾಕ್ ಆಬ್ರಾಹಮಾಚ್ಯೆ ಕುಶಿನ್‌ಚ್ ಬಸಯ್ಲೊ ಮ್ಹಳಾಂ.
ಆಜ್‌ಕಾಲ್ ಗ್ರೇಸ್ತ್ ಮನಿಸ್ ನಾಂವ್ ಜೊಡುಂಕ್ ಕಿತೆಂ ಕಿತೆಂ ಕರ‍್ತಾತ್ ತಿ ಸಗ್ಳ್ಯಾಂಕ್ ಕಳಿತ್ ಆಸ್ಚಿಚ್ ಗಜಾಲ್. ಪುಣ್ ಹ್ಯಾ ವಯ್ಲ್ಯಾ ವಾಂಜೆಲಾಂತ್ ಗ್ರೇಸ್ತ್ ಮನ್ಶಾಚೆಂ ನಾಂವ್‌ಚ್ ಕಾಡುಂಕ್ ನಾ. ಪುಣ್ ಏಕ್ ಭಿಕಾರಿ ಜಾಲ್ಯಾರೀ ಲಾಜರಾಚೆಂ ನಾಂವ್ ವಾಂಜೆಲಾಂತ್ ಕಾಡ್ಲಾಂ. ಇತ್ಲೆಂ ಮಾತ್ರ್ ನ್ಹಯ್, ಗ್ರೇಸ್ತ್ ಮನ್ಶಾಚ್ಯಾ ಘರಾ ಬಾಗ್ಲಾರ್ ಲಾಜರ್ ಯೇವ್ನ್ ಪಡ್ತಾಲೊ ಮ್ಹಳಾಂ. ಲಾಜರ್ ಪಯ್ಲೆಂ ಮೆಲೊ ಆನಿ ಉಪ್ರಾಂತ್ ಗ್ರೇಸ್ತ್ ಮನಿಸ್‌ಯೀ ಮೆಲೊ. ಪುಣ್ ವಾಂಜೆಲಾಂತ್ಲಿ ಕಾವ್ಯಾಳ್ ಅಭಿವೆಕ್ತಿ ಪಳಯಾ – ಲಾಜರಾಕ್ ‘ದೇವ್‌ದುತಾಂನಿ ತಾಕಾ ವ್ಹರ‍್ನ್ ಸರ್ಗಿಂಚ್ಯಾ ಜೆವ್ಣಾಕ್ ಆಬ್ರಾಹಮಾಚ್ಯೆ ಕುಶಿನ್‌ಚ್ ಬಸಯ್ಲೊ’ ಮ್ಹಳಾಂ ತರ್ ‘ಗ್ರೇಸ್ತ್ ಮನ್ಶಾಕ್ ವ್ಹರ‍್ನ್ ಪುರ‍್ಲೊ’ ಮ್ಹಳಾಂ.
ಮನ್ಶಾಚ್ಯಾ ಮರ‍್ಣಾಕ್‌ಯೀ ಘನತಾ ದಿಂವ್ಚೆಂ ಆಮಿ ಫಕತ್ ಸುಣೆಂ ಮಾಜಾರ್ ಮೆಲ್ಯಾರ್ ಮಾತ್ರ್ ‘ಪುರ‍್ಚೆಂ’ ಮ್ಹಳ್ಳೊ ಸಬ್ದ್ ವಾಪಾರ‍್ತಾಂವ್ ಮ್ಹಳ್ಳ್ಯಾ ಬಾ| ಕ್ಲಿಪ್ಪಿನ್ ನಿರ್ದಯಿ, ಲಾಜರಾಚ್ಯಾ ಕಶ್ಟಾಂಕ್ ಕಾನ್ ಆನಿ ದೊಳೆ ದೊನೀ ಧಾಂಪ್‌ಲ್ಲ್ಯಾ ಗ್ರೇಸ್ತ್ ಮನ್ಶಾಕ್, ಪಯ್ಲ್ಯಾನ್ ಗಮ್ಮತಾಂ, ಫೆಸ್ತಾಂ ಕರ‍್ತಾನಾ ತಾಚೆಂ ನಾಂವ್ ಉಲ್ಲೇಖ್ ಕರಿನಾಸ್ತಾನಾ ಆನಿ ದುಸ್ರ್ಯಾನ್ ಮೆಲ್ಯಾ ಉಪ್ರಾಂತ್ ‘ವ್ಹೆಲೊ ಆನಿ ಪುರ‍್ಲೊ’ ಮ್ಹಣ್ ಬರೊವ್ನ್ ಸಾದ್ಯಾ ಮನ್ಶಾಕ್ ದಿಂವ್ಚಿ ಮರ್ಯಾದ್ ಸಯ್ತ್ ವಾಂಜೆಲಿಸ್ತಾನ್ ದೀಂವ್ಕ್ ನಾ ಮ್ಹಳೆಂ. ವಾಂಜೆಲಾಚ್ಯಾ ವಾಕ್ಯಾಂನಿ ಲಿಪ್ಲಲೊ ಕಾವ್ಯಾಳ್ ಅರ್ಥ್ ಲೊಕಾನ್ ಸಮ್ಜೊಂಚೆಬರಿ ವಿಸ್ಕಾಳಾವ್ನ್ ಸಾಂಗೊಂಕ್ ಎಕಾ ಯಾಜಕಾಚ್ಯಾ ಕಾಳ್ಜಾಂತ್ ಥೊಡ್ಯಾ ಕಾಳಾಕ್ ಕವಿ ಪ್ರವೇಶ್ ಜಾಲೊ ಅಶೆಂ ಮ್ಹಾಕಾ ದಿಸ್ಲೆಂ.
ಬಾ| ಕ್ಲಿಪ್ಪಿಚ್ಯಾ ನಿಯಾಳಾ ಉಪ್ರಾಂತ್ ಲೂಕಾಚ್ಯಾ ವಾಂಜೆಲಾಂತ್ಲೆಂ ವಾಚಪ್ ಪರ‍್ತ್ಯಾನ್ ವಾಚ್ತಾನಾ ಆನ್ಯೇಕ್ ಮಾರ್ಮಿಕ್ ಗಜಾಲ್ ಮ್ಹಜ್ಯೆ ದಿಶ್ಟಿಕ್ ಪಡ್ಲಿ:
ಎಕ್ಲೊ ಗ್ರೇಸ್ತ್ ಮನಿಸ್ ಖರ‍್ಯಾನ್ ಆಸ್‌ಲ್ಲೊಗೀ? ಪಿತಾಂಬರ್ ಆನಿ ಸಣಾಂಚಿಂ ವಸ್ತುರಾಂ ನ್ಹೆಸೊನ್ ಸದಾಂನಿತ್ ತೊ ಆಪ್ಲ್ಯಾ ಘರಾ ಫೆಸ್ತಾಂ, ಗಮ್ಮತಾಂ ಕರ‍್ತಾಲೊಗೀ? ಲಾಜರ್ ಮ್ಹಳ್ಳೊ ಆಂಗ್‌ಭರ್ ರುಂವಾಂನಿ ಭರ‍್ಲಲೊ ಭಿಕಾರಿ ಖರ‍್ಯಾನ್ ಆಸ್‌ಲ್ಲೊಗೀ? ಆನಿ ತೋ ಗ್ರೇಸ್ತ್ ಮನ್ಶಾಚ್ಯಾ ದಾರಾರ್ ಯೇವ್ನ್ ಪಡ್ತಾಲೊಗೀ? ವಾ ಹಿ ಕಾಣಿ ಫಕತ್ ಫಾರಿಜೆವಾಂಕ್ ಸಾಂಗೊಂಕ್ ಮ್ಹಣ್ ಜೆಜುನ್‌ಚ್ ಘಡ್ಲಿಗೀ? ಹಿಂ ಸವಾಲಾಂ ಕುಶಿಕ್ ದವರ‍್ನ್ ನಿಯಾಳ್ ಘೆತ್ಲ್ಯಾರ್ – ದೊಳ್ಯಾಂಕ್ ಮಾರ‍್ತಾ ಲೂಕಾನ್ ವಾಂಜೆಲಾಂತ್ ವಾಪಾರ್‌ಲ್ಲೆಂ ಜೆವ್ಣಾಚೆಂ ರೂಪಕ್.
ಉಪರೋಕ್ತ್ ವಾಚಪ್ ಸುರು ಜಾಂವ್ಚೆಂಚ್ ಜೆವ್ಣಾ ಥಾವ್ನ್. ಗ್ರೇಸ್ತ್ ಮನಿಸ್ ಸದಾಂನಿತ್ ಫೆಸ್ತಾಂ ಕರ‍್ನ್ ಗಮ್ಮತಾಂ ಕರ‍್ತಾಲೊ. ತೊ ಜೆವ್ಣಾರ್ ಆಸ್ತಾನಾ ಲಾಜರ್ ನಾಂವಾಚೊ ಭಿಕಾರಿ ತಾಚ್ಯಾ ಘರಾ ಬಾಗ್ಲಾರ್ ಯೇವ್ನ್ ಪಡ್ತಾಲೊ. ಕಾರಣ್ – ಭುಕ್. ಗ್ರೇಸ್ತ್ ಮನ್ಶಾಚ್ಯಾ ಮೆಜಾರ್ ಥಾವ್ನ್ ಪಡ್ಲಲೆ ಉಂಡ್ಯಾ ಕುಡ್ಕೆ ಜಾಲ್ಯಾರ್‌ಯೀ ಖಾವ್ನ್ ಆಪ್ಲೆಂ ಪೋಟ್ ಭರುಂಕ್ ಲಾಜರ್ ಆಶೆತಾಲೊ. ಸುಣಿಂ ಲೆಗುನ್ ಯೇವ್ನ್ ತಾಚಿಂ ರುವಾಂ ಲೆಂವ್ತಾಲಿಂ. ಪುಣ್ ಗ್ರೇಸ್ತ್ ಮನ್ಶಾಕ್ ಲಾಜರಾಚೆರ್ ದಯಾ ಯೇನಾತ್ಲಿ.
ಲಾಜರ್ ಆನಿ ಗ್ರೇಸ್ತ್ ಮನಿಸ್ ದೊಗೀ ಮೆಲೆ. ಪುಣ್ ಲಾಜರಾಕ್ ದೇವ್‌ದುತಾಂನಿ ವ್ಹರ‍್ನ್ ಬಸಯಿಲ್ಲೊ ಆಬ್ರಾಹಾಮಾಚ್ಯೆ ಕುಶಿನ್ – ಸರ್ಗಿಂಚ್ಯಾ ಜೆವ್ಣಾಕ್. ಗ್ರೇಸ್ತ್ ಮನಿಸ್ ಮರ‍್ತಕೂಚ್ ಪಾತಾಳಿಂ ಪಾವ್ಲೊ. ಭುಕೆನ್ ವ್ಹಳ್ವಳ್ತಾನಾ ಗ್ರೇಸ್ತ್ ಮನಿಸ್ ಬಾಪಾಲಾಗಿಂ ಮಾಗ್ತಾ ತರೀ ಕಿತೆಂ?
“ಲಾಜರಾನ್ ಆಪ್ಲ್ಯಾ ಬೊಟಾಚಿ ತೆಮೆಟಿ ಉದ್ಕಾಂತ್ ಬುಡೊವ್ನ್ ಮ್ಹಜಿ ಜೀಬ್ ಥಂಡ್ ಕರಿಶೆಂ ತಾಕಾ ಹಾಂಗಾ ಧಾಡ್”
ಪಯ್ಲ್ಯಾ ವಾಂಟ್ಯಾಂತ್ ಸಂಸಾರಿಂ – ಗ್ರೇಸ್ತ್ ಮನಿಸ್ ಗಮ್ಮತ್, ಫೆಸ್ತಾಜೆವಣ್ ಕರುನ್ ಆಸ್ತಾನಾ, ಲಾಜರ್ ತಾಚ್ಯಾ ಬಾಗ್ಲಾರ್ ಯೇವ್ನ್ ಪಡ್ತಾಲೊ. ದುಸ್ರ್ಯಾ ವಾಂಟ್ಯಾಂತ್ ಸರ್ಗಿಂ – ಲಾಜರ್ ಆಬ್ರಾಹಾಮ್ ಬಾಪಾ ಸಾಂಗಾತಾ ಜೆವ್ಣಾಕ್ ಬಸ್ಲಾ ಆನಿ ಗ್ರೇಸ್ತ್ ಮನಿಸ್ ಪಾತಾಳಿಂ ತಾನೆನ್ ವಳ್ವಳ್ತಾ.
ಜೆವ್ಣಾಚೆಂ ಏಕ್‌ಚ್ ರೂಪಕ್ ವಾಚ್ಪಾಚ್ಯಾ ಪಯ್ಲ್ಯಾ ವಾಂಟ್ಯಾಂತ್ ಆನಿ ದುಸ್ರ್ಯಾ ವಾಂಟ್ಯಾಂತ್ ಲೂಕಾನ್ ಘೊಳಯಿಲ್ಲಿ ರೀತ್, ಖಂಯ್ಚ್ಯಾಯ್ ಕವಿಚ್ಯಾ ಕಲ್ಪನಾ ಸಕ್ತೆಕ್ ಉಣಿ ನಾ ಮ್ಹಣ್ ಮ್ಹಜಿ ಅಭಿಪ್ರಾಯ್.
ಖೊಲಾಯೆನ್ ಪಳೆಂವ್ಕ್ ಗೆಲ್ಯಾರ್ ಲಾಜರ್, ಜಾಕ್ಕೆವ್, ಸಾಮಾರಿಯಾಗಾರಾ ತಸಲಿಂ ಯಥೇಶ್ಟ್ ಕಾವ್ಯಾಳ್ ರೂಪಕಾಂ ಸುವಾರ್ತಾ ಬರಯಿಲ್ಲ್ಯಾಂನಿ ವಿಸ್ತ್ರತ್ ಜಾವ್ನ್ ವಾಂಜೆಲಾಂತ್ ವಾಪಾರ‍್ಲ್ಯಾಂತ್. ಬೈಬಲಾಚೆಂ ಉತರ್ ಮಣೊನ್ ತೆಂ ವಾಚ್ತಾನಾ ಆಮಿ ತಾಂತ್ಲೆ Space ಆನಿ Pause ಸೊಡ್ತಾಂವ್, ಸಮ್ಜೊಂಕ್ ಸಕಾನಾಂವ್. ಅಪ್ರೂಪ್ ಬಾ| ಕ್ಲಿಪ್ಪಿ ತಸಲ್ಯಾ ಥೊಡ್ಯಾ ಯಾಜಕಾಂ ಭಿತರ್ ಕವಿ ರಿಗ್ತಾತ್ ಆನಿ ಸುವಾರ್ತೆಂತ್ಲೆಂ ಕಾವ್ಯಾಳ್ ದರ್ಶನ್ ದೀವ್ನ್ ವೆತಾತ್.
■ ಎಚ್ಚೆಮ್ ಪೆರ್ನಾಲ್
