ನ್ಯಾನ್ಸಿಲ್, ಸ್ಟ್ಯಾನಿ ಡಿ’ಸೊಜಾಕ್ ಎಕ್ಲೆಂಚ್ ಭುರ್ಗೆಂ. ತೆಂ ಲ್ಹಾನ್ ಆಸ್ತಾನಾ ಬಾಯ್ಲ್ ಸರ್‌ಲ್ಲ್ಯಾನ್, ಬಾಪಾಯ್ನ್ ಆಪ್ಲ್ಯಾ ಮೊಗಾಳ್ ಧುವೆಕ್ ಭೋವ್ ಮೊಗಾನ್ ಪೊಸುನ್ ವ್ಹಡ್ ಕೆಲ್ಲೆಂ. ತೊ ಕಲಿನಾಂತ್ ಎಕಾ ವ್ಹಡ್ಲ್ಯಾ ಫ್ಲೆಟಾಂತ್ ರಾವ್ತಾಲೊ ಆನಿ ಬರ‍್ಯಾ ಕಾಮಾರ್ ಆಸ್‌ಲ್ಲೊ.
ಬಿ.ಎ. ಶಿಕೊನ್ ಜಾತಚ್, ನ್ಯಾನ್ಸಿಲ್ ಎಕಾ ಆಫಿಸಾಂತ್ ಕಾಮಾಕ್ ಲಾಗ್‌ಲ್ಲೆಂ. ಭೋವ್ ಸೊಭೀತ್ ಆಸ್‌ಲ್ಲ್ಯಾ ನ್ಯಾನ್ಸಿಲಾಚಿ ಇಷ್ಟಾಗಾತ್ ಕರುಂಕ್, ತ್ಯಾ ವಠಾರಾಂತ್ಲ್ಯಾ ತರ್ನಾಟ್ಯಾ ಚಲ್ಯಾಂನಿ ಕೆಲ್ಲೆಂ ಪ್ರಯತನ್ ನಿರ್ಫಳ್ ಜಾತಾನಾ, ತಾಣಿಂ ಏಕ್ ಪ್ಲ್ಯಾನ್ ಮಾಂಡ್ಲೆಂ. ನ್ಯಾನ್ಸಿಲಾನ್ ಸಾಕಾಳಿಂ ಕಾಮಾಕ್ ವೆಚೊ ವೇಳ್, ಕಾಮ್ ಕರ‍್ಚೊ ಠಿಕಾಣೊ ಆನಿ ಪಾಟಿಂ ಪರ್ತುಂಚೊ ವೇಳ್, ತ್ಯಾ ಪಾಂಚ್ ಜಣಾ ತರ್ನಾಟ್ಯಾಂನಿ ಜಾಣಾ ಕೆಲ್ಲೆಂ.
ನ್ಯಾನ್ಸಿಲ್ ಸಾಕಾಳಿಂ ನೋವಾಂಕ್ ಘರಾ ಥಾವ್ನ್ ಭಾಯ್ರ್ ಸರೊನ್, ದಾ ಮಿನುಟಾಂ ಪಾಂಯ್ ವಾಟ್ ಚಲೊನ್, ವಯ್ರ್ ರಸ್ತ್ಯಾಕ್ ಪಾವೊನ್, ಬಸ್ಸ್ ಧರುನ್ ಕಾಮಾಕ್ ವೆತಾಲೆಂ; ತಸೆಂಚ್ ಪಾಟಿಂ ಪರ್ತತಾನಾ, ತಾಕಾ ರಾತ್ಚಿಂ ಸಾಡೆ ಸಾತ್-ಆಟ್ ಜಾತಾಲಿಂ. ಬಸ್ಸಾರ್ ಥಾವ್ನ್ ದೆಂವೊನ್, ತೆಂ ತಸೆಂಚ್ ಚಲೊನ್ ಆಪ್ಲ್ಯಾ ಘರಾ ಪಾವ್ತಾಲೆಂ. ಬಾಪಯ್‌ಯಿ ಸಿಟಿಂತ್ ಕಾಮಾಕ್ ವೆತಾಲೊ ಆನಿ ಘರಾ ಪಾವ್ತಾನಾ, ನೋವ್ ಉತ್ರಾತಾಲಿಂ. ತ್ಯಾ ಪರ‍್ಯಾಂತ್ ನ್ಯಾನ್ಸಿಲ್ ಜೆವ್ಣಾಚಿ ತಯಾರಾಯ್ ಕರುನ್, ಬಾಪಾಯ್ಕ್ ರಾಕೊನ್ ಬಸ್ತಾಲೆಂ.
ಏಕ್ ದೀಸ್ ಕಾಮ್ ಚಡ್ ಆಸ್‌ಲ್ಲ್ಯಾನ್, ನ್ಯಾನ್ಸಿಲಾಕ್ ಆಫಿಸಾಥಾವ್ನ್ ಸುಟ್ತಾನಾ, ವೇಳ್ ಜಾವ್ನ್ ತೆಂ ಪಾವ್ತಾನಾ ರಾತ್ಚಿಂ 9.30 ಜಾಲ್ಲಿಂ. ರಾತಿಂ ನೋವಾ ಉಪ್ರಾಂತ್ ತೆಣೆ ಲೊಕಾಚೊ ಸಂಚಾರ್ ಚಿಕ್ಕೆ ವೀರಳ್ ಆಸ್ತಾಲೊ.
ಪಯ್ಲೆಂಚ್ ಪ್ಲ್ಯಾನ್ ಮಾಂಡೂನ್, ರಾಕೊನ್ ಆಸ್‌ಲ್ಲ್ಯಾ ತ್ಯಾ ಪಾಂಜ್ ಜಣ್ ತರ್ನಾಟ್ಯಾ ಚಲ್ಯಾಂನಿ, ನ್ಯಾನ್ಸಿಲಾನ್ ಬೋಬ್ ಮಾರಿನಾಶೆಂ ಧರೂನ್, ಕಾರಾಂತ್ ಘಾಲುನ್ ಆಪಾಹರ‍್ಸಿಲ್ಲೆಂ!
ನ್ಯಾನ್ಸಿಲಾಕ್ ಆಪಹರ‍್ಸಿಲ್ಲೆ ತರ್ನಾಟೆ, ಗ್ರೇಸ್ತ್ ಕುಟ್ಮಾಂತ್ಲೆ, ತ್ಯಾಚ್ ವಠಾರಾಂತ್ಲೆಂ ಜಾವ್ನಾಸ್‌ಲ್ಲೆ. ತ್ಯಾ ಪಾಯ್ಕಿಂ ದೋಗ್ ಕ್ರೀಸ್ತಾಂವ್ ತರ್, ತೇಗ್ ಹಿಂದೂ ಜಾತಿಚೆ. ತಾಣಿಂ ಸಗ್ಳ್ಯಾಂನಿ ಮೆಳುನ್ ಮಾಂಡ್‌ಲ್ಲೆಂ ಯೋಜನ್ ಆಜ್ ಸುಫಳ್ ಜಾಲ್ಲೆಂ. ನ್ಯಾನ್ಸಿಲಾಕ್ ಖಂಚಾಗಿ ಪಯ್ಶಿಲ್ಯಾ ನಿರ್ಜನ್ ಸುವಾತೆರ್, ಎಕಾ ಉಪ್ರಾಂತ್ ಏಕ್, ಸಗ್ಳ್ಯಾಂನಿ ಬಲಾತ್ಕಾರ್ ಕರ‍್ತಾನಾ, ನ್ಯಾನ್ಸಿಲ್ ಮಸ್ತು ಕಷ್ಟಾಲ್ಲೆಂ.
ಉಪ್ರಾಂತ್ ನ್ಯಾನ್ಸಿಲಾಕ್ ಪಾಟಿಂ ಹಾಡುನ್, ತಾಣೆ ರಾಂವ್ಚ್ಯಾ ಬಿಲ್ಡಿಂಗಾಚ್ಯಾ ಸಕೈಲ್ ಸೊಡುನ್, ತೆ ಫರಾರ್ ಜಾತಾನಾ, ವೊರಾಂ ರಾತಿಚಿಂ ದೋನ್ ಜಾಲ್ಲಿಂ. ಬಾಪಯ್ ಸ್ಟ್ಯಾನಿ ಧುವೆಚಿ ವಾಟ್ ರಾಕೊನ್ ಆನಿ ಭಿಂಯೆವ್ನ್ ಘರಾ ಧಾರಾರ್‌ಚ್ ಉಭೊ ಆಸ್ತಾನಾ, ಅಸ್ತವ್ಯಾಸ್ಥ್ ಸ್ಥಿತೆರ್, ಪಾವ್‌ಲ್ಲ್ಯಾ ನ್ಯಾನ್ಸಿಲಾಕ್ ಪಳವ್ನ್ ತೊ ಶಿರಿಂ ಚುಕ್‌ಲ್ಲೊ!
ಏಕ್ ಬಾಪಯ್, ಜಾಣೆ ಆಪ್ಲ್ಯಾ ಧುವೆಕ್ ಲ್ಹಾನ್‌ಥಾವ್ನ್, ಫುಲಾಪರಿಂ ಸಾಂಬಾಳುನ್ ಆಸ್ತಾನಾ, ತ್ಯೆ ಧುವೆಚಿ ಅಸಲಿ ಸ್ಥಿತಿ ಪಳವ್ನ್, ತ್ಯಾ ಬಾಪಾಯ್ಕ್ ಕಿತೆಂ ಭಗ್ಲೆಂ ಜಾಯ್ತ್…!?
ಬಾಪಾಯ್ಕ್ ಪಳವ್ನ್ ಪಪ್ಪಾ…… ಮ್ಹಣೊನ್ ವೆಂಗೊನ್, ನ್ಯಾನ್ಸಿಲ್ ಮತ್ ಚುಕೊನ್ ಪಡ್ಲೆಂ. ತ್ಯೆ ಧುವೆಕ್ ಮತಿರ್ ಹಾಡುಂಕ್ ಸ್ಟ್ಯಾನಿನ್ ಸಗ್ಳಿ ರಾತ್ ಫಾಲೆಂ ಕೆಲಿ. ಪುಣ್ ಮತಿರ್ ಆಯಿಲ್ಲೆಂ ನ್ಯಾನ್ಸಿಲ್ ಆಪ್ಲಿ ಮಾನಾಸ್ಥಿಕ್ ಸ್ಥಿತಿ ಹೊಗ್ಡಾಂವ್ಕ್ ಪಾವ್‌ಲ್ಲೆಂ. ಉಗ್ಡಾಸ್ ಯೆತಾನಾ, ತಾಚೆಥಂಯ್ ಜಾಲ್ಲೆಂ ತೆಂ ಸಾಂಗೊನ್ ರಡ್ತಾಲೆಂ. ಪುಣ್ ಥೊಡ್ಯಾಚ್ ವೆಳಾನ್ ಪರ್ತುನ್ ಸಗ್ಳೆಂ ವಿಸ್ರಾತಾಲೆಂ. ಧುವೆಚೊ ಫುಡಾರ್ ಚಿಂತುನ್, ಬಾಪಾಯ್ನ್ ತ್ಯಾ ಪಾಡಾರಿ ಚಲ್ಯಾಂಕ್, ಶಿಕ್ಷೆಕ್ ವ್ಹಳಗ್ ಕರುಂಕ್‌ಯಿ ಸಾಧ್ಯ್ ನಾತ್‌ಲ್ಲೆಂ. ತಾಣೆ ಆಪ್ಲ್ಯಾ ಕಾಳ್ಜಾಚಿ ದೂಖ್ ದೆವಾಕ್ ಸಮರ್ಪಿಲ್ಲಿ.
ನ್ಯಾನ್ಸಿಲಾನ್ ಕಾಮ್ ಸೊಡ್ಲೆಂ. ಧುವೆಕ್ ಎಕ್ಲ್ಯಾಕ್ ಸೊಡುನ್ ಬಾಪಯ್‌ಯಿ ಕಾಮಾಕ್ ವಚೊಂಕ್ ಸಕ್ಲೊನಾ. ಸ್ಟ್ಯಾನಿಚೊ ಭೋವ್ ಲಾಗ್ಸಿಲೊ ಮಿತ್ರ್, ರಿಚ್ಚರ್ಡ್ ತ್ಯಾಚ್ ಬಿಲ್ಡಿಂಗಾಂತ್ ರಾವ್ತಾಲೊ. ಸ್ಟ್ಯಾನಿ ಸಭಾರ್ ದೀಸ್ ಥಾವ್ನ್ ದಿಸೊಂಕ್ ನಾತ್‌ಲ್ಲ್ಯಾನ್, ತೊ ಸ್ಟ್ಯಾನಿಕ್ ಮೆಳುಂಕ್ ಆಯ್ಲೊ. ಭೋವ್ ಪಾತ್ಯೆಣೆಚೊ ಮಿತ್ರ್ ಜಾಲ್ಲ್ಯಾನ್, ನ್ಯಾನ್ಸಿಲಾ ಥಂಯ್ ಘಡ್‌ಲ್ಲಿ ಸಂಗತ್, ಸ್ಟ್ಯಾನಿನ್ ರಿಚ್ಚರ್ಡಾಕ್ ಸಾಂಗ್ಲಿ…
ಲೀಮಾ ಸರ‍್ಲ್ಯಾ ಉಪ್ರಾಂತ್, ಮ್ಹಜ್ಯಾ ಧುವೆಕ್ ಹಾವೆಂ ಭೋವ್ ಮೊಗಾನ್ ಸಾಂಬಾಳ್ಳಾಂ ರಿಚ್ಚಿ. ಆತಾಂ ತಾಚೆ ಥಂಯ್ ಘಡ್‌ಲ್ಲ್ಯಾ ತ್ಯಾ ಮಾರೆಕಾರ್ ಬಲಾತ್ಕಾರಾಕ್ ತೆಂ ರಾತ್ಚೆಂ ಉಟೊನ್ ಸಯ್ತ್ ಬೊಬೊ ಮಾರೂನ್ ರಡ್ತಾ. ತಾಕಾ ನಿಯಾಂತ್ರಾಣಾರ್ ಹಾಡುಂಕ್ ಮ್ಹಾಕಾ ಜೀವಾರ್ ಯೆತಾ. ನಾಂವ್ಕ್ ಸಯ್ತ್ ತಾಕಾ, ಹಾವೆಂ ಸಾಂಗೊಂಕ್ ಪಡ್ತಾ…
ನಾಂವ್ಕ್ ಗೆಲ್ಯಾರ್ ವೊರಾಂ ಗಟ್ಲ್ಯಾನ್ ಭಾಯ್ರ್ ಯೇನಾತ್‌ಲ್ಲೆಂ ಪಳವ್ನ್, ತಾಕಾ ಉಲೊ ಕೆಲ್ಯಾರ್, ತೆಂ ಜಾಪ್ ದೀನಾ. ಕಿತೆಂ ಜಾಲಾಂ ಮ್ಹಣ್ ಭಿಂಯೆವ್ನ್ ಧಾರಾರ್ ಬಡಯ್ತಾನಾ, ಧಾರ್ ಸಯ್ತ್ ಭಿತರ್ಲ್ಯಾನ್ ಬಂಧ್ ಕರಿನಾತ್‌ಲ್ಲೆಂ ಕಳೊನ್, ಭಿತರ್ ತಿಳ್ತಾನಾ, ತೆಂ ವಸ್ತೂರ್ ಕಾಡುನ್, ನಾಂವ್ಚೆಂ ವಿಸ್ರುನ್, ಖಾಂಭ್ಯಾಪರಿಂ ಉಭೆಂ ಆಸೊನ್ ಹಿಶಿಲ್ಯಾ ಸಂಸಾರಾಂತ್ ಆಸಾನಾ. ಅಸಲ್ಯಾ ಸ್ಥಿತೆರ್, ಎಕಾ ಬಾಳ್ಶ್ಯಾಕ್ ನಾಣಯಿಲ್ಲೆಪರಿಂ ಪರಿಂ ಮ್ಹಜ್ಯಾ ತರ್ನಾಟ್ಯಾ ಧುವೆಕ್ ಹಾವೆಂ ನಾಣಂವ್ಕ್ ಪಡ್ತಾ ರಿಚ್ಚಿ… ಮ್ಹಣೊನ್ ಸ್ಟ್ಯಾನಿ ಗಳ್ಘಡ್ಯಾಂ ರಡ್ಲೊ.
ಆಪ್ಲ್ಯಾ ಮಿತ್ರಾಚ್ಯಾ ಧುವೆಸಂಗಿಂ ಜಾಲ್ಲೆಂ ಘಡಿತ್ ಆನಿ ಆತಾಂ ತೆಂ ಮಾನಸಿಕ್ ಸ್ಥಿತಿ ಹೊಗ್ಡಾವ್ನ್, ಬಾಪಾಯ್ಕ್ ಭಗೊಂಕ್ ಆಸ್ಚೆ ತೆ ದೀಸ್ ಆಯ್ಕೊನ್, ರಿಚ್ಚರ್ಡ್ ರಾಗಾನ್ ಪೆಟುನ್, ಪೊಲಿಸಾಂಕ್ ದೂರ್ ದೀವ್ನ್ ತ್ಯಾ ತರ್ನಾಟ್ಯಾಂಕ್ ಧರಯಾಂ ಮ್ಹಣ್ ಸಾಂಗ್ತಾನಾ, ಧುವೆಚ್ಯಾ ಫುಡಾರಾಚೆಂ ಚಿಂತುನ್, ಸ್ಟ್ಯಾನಿನ್ ನಾಕಾ ಮ್ಹಳ್ಳೆಂ.
ಪುಣ್ ತಾಚ್ಯಾ ಮಿತ್ರಾಕ್ ಸಾಂಗೊನ್ ಸ್ಟ್ಯಾನಿನ್ ವ್ಹಡ್ಲಿ ಚೂಕ್ ಕೆಲ್ಲಿ! ಕಿತ್ಯಾಕ್ ರಿಚ್ಚರ್ಡಾನ್ ಹಿ ಗಜಾಲ್ ಆಪ್ಲ್ಯಾ ಬಾಯ್ಲೆಕ್ ಸಾಂಗ್‌ಲ್ಲಿ ಆನಿ ತಿಣೆ ತ್ಯಾ ಬಿಲ್ಡಿಂಗಾಂತ್ ರಾಂವ್ಚ್ಯಾ ಸಭಾರಾಂಕ್, ತ್ಯಾ ವಿಶಿಂ ಸಾಂಗೊನ್ ಜಾಲ್ಲಿ!
ಕೊಣೆಂಗಿ ಸ್ಟ್ಯಾನಿಕ್ ಸಾಂಗ್ಲೆ- ‘ತಾಚೆಂ ಕಾಜಾರ್ ಕರ್. ನೊವ್ರ್ಯಾಚ್ಯಾ ಸುಖಾಂತ್, ಸವ್ಕಾಸ್ ತೆಂ ಆಪಾಪಿಂ ಬರೆಂ ಜಾಂವ್ಕ್ ಸಕ್ತೆಲೆಂ’ ಸ್ಟ್ಯಾನಿಕ್ ತ್ಯಾ ಮನ್ಶ್ಯಾನ್ ಸಾಂಗ್‌ಲ್ಲೆಂ ವ್ಹಯ್ ಮ್ಹಣ್ ಭಗ್ತಾನಾ, ತಾಣೆ ನ್ಯಾನ್ಸಿಲಾಕ್ ಸೈರಿಕ್ ಸೊಧ್ಲಿ.
ಸೈರಿಕ್ ಸೊಧ್‌ಲ್ಲೆಂ ಘರಾಣೆ ಆಂದೆರಿಂತ್ಲ್ಯಾ ಫೆಲಿಕ್ಸ್ ಮಾಥಾಯೆಸಾಚೆಂ. ಫೆಲಿಕ್ಸ್ ಮಾಥಾಯೆಸ್ ಎಕ್ದಮ್ ಕರ್ಮಿ ಆನಿ ಘಮಂಡಿ. ‘ಸೊಡ್-ದೋಡ್’ ವ ‘ಸಮ್ಜೊಣಿ’ ಮ್ಹಳ್ಳೊ ಸಬ್ಧ್ ನೆಣಾಸ್‌ಲ್ಲೊ ಹಂಕಾರಿ ಆನಿ ಪಿಸೊ ಮ್ಹಣ್ ಸಾಂಗ್ಯೆತ್. ತಾಚೆಂ ಲಾನ್ಶೆಂ ಪ್ರಿಂಟಿಂಗ್ ಪ್ರೆಸ್ಸ್ ಆಸ್‌ಲ್ಲೆಂ. ಬಾಯ್ಲ್ ಎಲಿಜ್ ಜಾಲ್ಯಾರ್‌ಯಿ ಏಕ್ ಸ್ವಾರ್ಥಿ ಸ್ತ್ರೀ ಮ್ಹಣ್ಯೆತ್. ಹಾಂಕಾಂ ತೆಗಾಂ ಭುರ್ಗಿಂ- ಮಲ್ಘಡೊ ಲಿಯೊ, ದುಸ್ರೊ ಡ್ಯಾನಿ ಆನಿ ನಿಮಾಣೆ ಸಿಲ್ವಿ. ಸಗ್ಳ್ಯಾಂಚೆಂ ಶಿಕಾಪ್ ಜಾವ್ನ್ ಕಾಮಾರ್ ಆಸ್‌ಲ್ಲಿಂ. ದುಸ್ರೊ ಪೂತ್ ಡ್ಯಾನಿ ಕಾಮಾರ್ ಆಮೆರಿಕಾಂತ್ ಬೊಸ್ಟನ್ ಶೆರಾಂತ್ ಆಸ್‌ಲ್ಲೊ.
ಮಲ್ಘಡ್ಯಾ ಲಿಯೊಕ್ ನ್ಯಾನ್ಸಿಲಾಚಿ ಸೈರಿಕ್ ಯೆತಾನಾ, ನ್ಯಾನ್ಸಿಲಾಚಿ ಸೊಭಾಯ್ ಪಳವ್ನ್ ಕೂಡ್ಲೆಚ್ ಕಾಜಾರಾಕ್ ರಾಜಿ ಜಾಲೊ. ಸ್ಟ್ಯಾನಿನ್ ಧುವೆಕ್ ಬರೆಂ ಕರುನ್ ಸಮ್ಜಾವ್ನ್ ಕಾಜಾರಾಕ್ ರಾಜಿ ಕೆಲ್ಲೆಂ. ಥೊಡೆ ಪಾವ್ಟಿಂ ನ್ಯಾನ್ಸಿಲ್ ಬರೆಂ ಆಸೊನ್, ತಾಚೆಥಂಯ್ ಕಿತೆಂಚ್ ಘಡುಂಕ್ ನಾತ್‌ಲ್ಲೆಪರಿಂ ದಿಸ್ತಾಲೆಂ ಜಾಲ್ಲ್ಯಾನ್, ಬಾಪಾಯ್ನ್ ತೆಂ ಕಾಜಾರಾ ಉಪ್ರಾಂತ್ ಎಕ್ದಮ್ ಬರೆಂ ಜಾತೆಲೆಂ ಮ್ಹಳ್ಳೊ ಭರ್ವಸೊ ಕರುನ್, ಸಗ್ಳೆಂ ದೆವಾಚೆರ್ ಸೊಡುನ್, ನ್ಯಾನ್ಸಿಲಾ ಥಂಯ್ ಘಡ್‌ಲ್ಲಿ ಸಂಗತ್ ಲಿಪಯಿಲ್ಲಿ. ತೆಂ ತೊಚ್ ನಹಿಂ, ಖಂಚೊಯಿ ಬಾಪಯ್ ಕರ‍್ತೊ.
ಸತ್ ಸಾಂಗ್‌ಲ್ಲೆಂ ತರ್, ಕೋಣ್ ನ್ಯಾನ್ಸಿಲಾಚೊ ಹಾತ್ ಧರುಂಕ್ ಫುಡೆಂ ಸರ‍್ತೊ?
ಕಾಜಾರಾ ಆಧಿಂ ಕೆಲ್ಲೆಂ ಸಗ್ಳೆಂ ಲಿಪ್ತಾ. ಚಲೊ ವ ಚಲಿ ಕಿತ್ಲೆಯಿ ಬೋಯ್‌ಫ್ರೆಂಡ್ ವ ಗರ್ಲ್‌ಫ್ರೆಂಡಾ ಬದ್ಲಿ ಕರುಂದಿತ್ ವ ನಿಸ್ಕಳ್ಪಣ್ ಹೊಗ್ಡಾವ್ನ್ ಘೆಂವ್ದಿತ್. ತೆಂ ಲಿಪೊನ್ ವೆತಾ. ಪುಣ್ ನ್ಯಾನ್ಸಿಲಾ ತಸಲಿ ನಿರಪ್ರಾದಿ ಚಲಿ ಮಾತ್ರ್ ಬಲಿ ಜಾತಾ ಸತ್ ಗಜಾಲ್ ಉಜ್ವಾಡಾಕ್ ಪಡ್ತಾನಾ!
ನ್ಯಾನ್ಸಿಲಾ ಥಂಯ್‌ಯಿ ತಸೆಂಚ್ ಘಡ್ಲೆಂ. ಕಾಜಾರ್ ತಾಚೆಂ ಲಿಯೊಸಂಗಿಂ ತ್ಯಾಚ್ ವರ್ಸಾ ಮ್ಹಳ್ಯಾರ್, ತಾಚೊ ಬಲಾತ್ಕಾರ್ ಜಾವ್ನ್ ಸ ಮಹಿನ್ಯಾ ಬಿತರ್, ಭೋವ್ ಗದ್ದಾಳಾಯೆನ್ ಜಾಲೆಂ. ಸ್ಟ್ಯಾನಿನ್ ಆಪ್ಲ್ಯಾ ಎಕ್ಲೆಚ್ ಧುವೆನ್ ಸುಖಾನ್ ಆಸೊಂಕ್ ಜಾಯ್ ಮ್ಹಳ್ಳ್ಯಾ ಚಿಂತ್ಪಾನ್, ಬಾಂಗಾರ್, ದೋತ್-ದೆಣೆ, ದುಡು, ಕಾರ್ ಆನಿ ಕಾಜಾರಾಚೊ ಸರ್ವ್ ಖರ್ಚ್‌ಯಿ ಪಳವ್ನ್ ಕಾಜಾರ್ ಕೆಲ್ಲೆಂ.
ಕಾಜಾರ್ ಜಾವ್ನ್ ಗೆಲ್ಲ್ಯಾ ನ್ಯಾನ್ಸಿಲಾಕ್, ನೊವ್ರ್ಯಾನ್ ಹನಿಮೂನಾಕ್ ಬಾಯ್ರ್ ವರುನ್, ತಾಕಾ ಮೊಗಾನ್ ಫುಸ್ಲಾವ್ನ್, ತಾಚೆಂ ಮನ್ ಜಿಕೊನ್, ತಾಕಾ ಆಪ್ಣಾಂವ್ಕ್ ಪ್ರಯತನ್ ಕೆಲ್ಲೆಂ ತರ್, ಕಾಂಯ್ ನ್ಯಾನ್ಸಿಲ್ ಆಪ್ಣಾಥಂಯ್ ಜಾಲ್ಲೆಂ ತೆಂ ಮಾರೆಕಾರ್ ಘಡಿತ್, ವಿಸ್ರುನ್ ಬರೆಂ ಜಾತೆಂ ಕೊಣ್ಣಾ. ಪುಣ್ ಲಿಯೊನ್, ನ್ಯಾನ್ಸಿಲಾಚ್ಯಾ ಖುಶೆ ವಿರೋಧ್, ತಾಕಾ ವಸ್ತ್ರಾವೀಣ್ ಕರ‍್ತಾನಾ, ಭಿಂಯೆಲ್ಲ್ಯಾ ನ್ಯಾನ್ಸಿಲಾಕ್, ತಾಚ್ಯಾ ಜಿಣ್ಯೆಂತ್ ಘಡ್‌ಲ್ಲೊ ತೊ ಬಲಾತ್ಕಾರ್, ಉಗ್ಡಾಸ್ ಯೇವ್ನ್ ತೆಂ ಬೋಬ್ ಮಾರಿಲಾಗ್ಲೆಂ.
ಘಡ್ಬಡ್‌ಲ್ಲೊ ಲೀಯೊ ಭಿಂಯೆವ್ನ್, ಆಪ್ಲ್ಯಾ ನವ್ಯಾ ಹೊಕ್ಲೆಕ್ ಕಿತೆಂ ಜಾಲೆಂಗಾಯ್ ಮ್ಹಣೊನ್ ಚಿಂತಾನಾ, ಭಾಯ್ಲ್ಯಾನ್ ಆವಯ್-ಬಾಪಯ್‌ಯಿ ಧಾಂವೊನ್ ಆಯಿಲ್ಲಿಂ. ನ್ಯಾನ್ಸಿಲ್, ಭಿಂಯಾನ್ ವಿಣ್ಗೆಂಚ್ ಎಕಾ ಕೊಣ್ಶ್ಯಾಂತ್ ಉಭೆಂ ಆಸೊನ್ ಕಾಂಪ್ಚೆಂ ಪಳವ್ನ್ ಘರ‍್ಚ್ಯಾಂಕ್ ವಿಚಿತ್ರ್ ದಿಸ್ಲೆಂ. ಲಿಯೊಚ್ಯಾ ಆವಯ್ನ್ ಘೊವಾಕ್ ಕುಶಿಕ್ ಲೊಟುನ್, ತಿ ಭಿತರ್ ಗೆಲಿ ಆನಿ ರಾಗಾನ್ ಮ್ಹಣಾಲಿ – “ತುಕಾ ಕಾಜಾರ್ ಕರುನ್ ಹಾಡ್ಲಾಂ ಮ್ಹಜ್ಯಾ ಪುತಾನ್ ಹಾಂಗಾ, ’ಶೋ ಕೇಸಿಂತ್’ ಸಜಂವ್ಕ್ ನಹಿಂ, ಆಮ್ಚೆಂ ಸಂತಾನ್ ವಾಡಂವ್ಕ್. ಕಾಜಾರ್ ಜಾಲ್ಲ್ಯಾ ಆಪ್ಲ್ಯಾ ನೊವ್ರ್ಯಾಸಂಗಿಂ ತುಂ ಅಸೆಂ ಭಿಂಯೆವ್ನ್, ಬಲಾತ್ಕಾರ್ ಕರುಂಕ್ ಆಯಿಲ್ಲೆಪರಿಂ ಅಸೊ ನಾಟಕ್ ಕರ‍್ಶಿ ತರ್, ಕಸೆಂ?”
“ತುಕಾ ಕೋಣ್‌ಯಿ ಆಸ್‌ಲ್ಲೊ ತರ್, ತುವೆಂ ಕಾಜಾರಾಕ್ ಇನ್ಕಾರ್ ಕರುಂಕ್ ಜಾಯ್ ಆಸ್‌ಲ್ಲೆಂ, ಮ್ಹಜ್ಯಾ ಗಳ್ಯಾಕ್ ಕಿತ್ಯಾಕ್ ಪಡ್‌ಲ್ಲೆಂಯ್?” ಲಿಯೊ ಮ್ಹಣಾಲೊ.
ಬಾಪಯ್ ಥೊಂಡಾಕ್ ಅಯಿಲ್ಲೆಂ ಯೆಟುನ್, ಸುನೆಚ್ಯಾ ಬಾಪಾಯ್ಕ್ ಗಾಳಿ ಸೊವೊಂಕ್ ಲಾಗ್ಲೊ. ಭಿಂಯೆಲ್ಲೆಂ ನ್ಯಾನ್ಸಿಲ್ ಮಾತ್ರ್ ಆಸ್‌ಲ್ಲ್ಯಾ ಸ್ಥಿತೆರ್‌ಚ್ ಆಸೊನ್, ಕಾಂಯ್ಚ್ ಉಲೊಂವ್ಕ್ ಸಕ್ಲೆಂನಾ.
“ತುಂ ತಾಕಾ ಕೇರ್ ಕರಿನಾಕಾ ಪುತಾ. ಬಹುಷಾ ತಾಕಾ ಅಸಲೊ ಅನುಭವ್ ನಾ. ಪಯ್ಲೆಂ ಪಯ್ಲೆಂ ತೆಂ ಭಿಂಯೆತೆಲೆಂ, ಉಪ್ರಾಂತ್ ಸುದ್ರಾತೆಲೆಂ. ತುಂ ಧಾರ್ ಭಿತರ್ಲ್ಯಾನ್ ಬಂಧ್ ಕರ್ ” ಮ್ಹಣೊನ್ ಎಲಿಜ್ ಕುಡಾಂತ್ಲಿ ಭಾಯ್ರ್ ಆಯ್ಲಿ.
ಆತಾಂ ಸೊಭೀತ್ ಹೊಕ್ಲ್ಯೆಸಂಗಿಂ ಕಾಜಾರ್ ಜಾವ್ನ್, ಪಯ್ಲ್ಯಾ ರಾತಿಂ ಭಗೊಂಕ್ ಆಸ್ಚ್ಯಾ ಸುಖಾಚ್ಯಾ ಉದ್ರಿಕ್ತ್‌ಪಣಾನ್, ಲಿಯೊನ್ ಆಪ್ಲ್ಯಾ ಹಕ್ಕಾಚೊ ಅಥ್ವೊ ಫಾಯ್ದೊ ಕಸೊ ಜೊಡ್ಲೊ ಮ್ಹಳ್ಳೆಂ ಕೊಣ್‌ಯಿ ನೆಣಾಂತ್. ಪುಣ್ ನ್ಯಾನ್ಸಿಲ್ ಮಾತ್ರ್ ಲಿಯೊಕ್ ಪಳೆತಾನಾ, ಭಿಂಯಾನ್ ಕಾಂಪ್ತಾಲೆಂ. ಅಸೆಂ ದೀಸ್ ಪಾಶಾರ‍್ಲೆ. ನ್ಯಾನ್ಸಿಲಾಚಿ ಸ್ಥಿತಿ ಸುದ್ರೊಂವ್ಚ್ಯಾ ಬದ್ಲಾಕ್ ಚಡ್ ಆನಿ ಚಡ್ ಬಿಘ್ಡೊನ್ ಗೆಲಿ.
ನ್ಯಾನ್ಸಿಲ್ ಆಪ್ಲ್ಯಾ ಬಾಪಾಯ್ಚ್ಯಾ ಘರಾ ಆಸ್ತಾನಾ, ಬಾಪಯ್ ತಾಕಾ ಎಕಾ ಬಾಳ್ಶ್ಯಾಕ್ ಸಾಂಬಾಳ್‌ಲ್ಲೆ ಪರಿಂ ಮೊಗಾನ್ ಪಳೆತಾಲೊ. ಪುಣ್ ಘೊವಾಚ್ಯಾ ಘರಾ ಯೇವ್ನ್ ಬಿರ್ಮೊತ್ ನ್ಯಾನ್ಸಿಲ್ ಯೆಮ್ಕೊಂಡಾಚಾಕ್‌ಯಿ ಪಾಸ್ಟ್ ಜಿಣ್ಯೆಕ್ ಪಾವ್‌ಲ್ಲೆಂ. ತಾಚ್ಯಾ ಜಿಣ್ಯೆಂತ್ ಘಡ್‌ಲ್ಲೆಂ ಮಾರೆಕಾರ್ ಬಲಾತ್ಕಾರಿ ಘಡಿತ್, ಬಹುಷಾ ಘೊವಾಚ್ಯಾ ಘರಾ, ಸಭಾರ್‌ಪಾವ್ಟಿಂ ಪರ್ತ್ಯಾನ್ ಘಡ್ಲಾಂ ಮ್ಹಣ್ ಕಳ್ತಾಲೆಂ.
ಆಖ್ರೇಕ್ ಫೆಲಿಕ್ಸ್ ಮಾಥಾಯೆಸ್, ಪತ್ತೇಧಾರಿ ಕಾಮಾಂ ಕರುಂಕ್, ನ್ಯಾನ್ಸಿಲಾನ್ ರಾವೊನ್ ಆಸ್‌ಲ್ಲ್ಯಾ ಬಿಲ್ಡಿಂಗಾಕ್ ಪಾಪ್ಲೊ. ಥಂಯ್ಚರ್ ತಾಕಾ, ನ್ಯಾನ್ಸಿಲಾಚೊ ಬಲಾತ್ಕಾರ್ ಜಾಲ್ಲೊ ಘುಟ್ ಕಳ್ಳೊ. ಪಾಂಚ್ ಜಾಣಾಂನಿ, ತಾಚೊ ಬಲಾತ್ಕಾರ್ ಕೆಲಾ, ತೆಂ ಮಾನಾಸ್ಥಿಕ್ ಸ್ಥಿತಿ ಹೊಗ್ಡಾಂವ್ಕ್ ಪಾವ್ಲಾಂ. ಶಿವಾಯ್ ನಾಂವ್ಕ್ ಸಯ್ತ್ ನೆಣಾ’ಸ್‌ಲ್ಲ್ಯಾ ತಾಕಾ ಬಾಪಯ್‌ಚ್ ನಾಣೈತಾಲೊ ಮ್ಹಳ್ಳೆಂಯಿ ಕಳ್ಳೆಂ.
ಅಸಲಿ ಖಭಾರ್ ಆಯ್ಕಾಲ್ಲೊ ಫೆಲಿಕ್ಸ್ ಮಾಥಾಯೆಸ್, ಸಗ್ಳೊಚ್ ಖುಭಾಳೊನ್, ಘರಾ ಯೇವ್ನ್, ನಿರಪ್ರಾಧಿ ನ್ಯಾನ್ಸಿಲಾಕ್ ಗುನ್ಯಾಂವ್ಕಾರ್ ಠರಾವ್ನ್, ರಂಬಾರೂಟ್ ಕರಿಲಾಗ್ಲೊ. ಥೊಡ್ಯಾಚ್ ದಿಸಾಂನಿ, ಹಿ ಖಭಾರ್ ಸಗ್ಳ್ಯಾ ವಾಟಾರಾಂತ್ ವಿಸ್ತಾರ‍್ಲಿ.
ಆಪ್ರಾಧ್ಯಾಂಕ್ ಶಿಕ್ಷಾ ದಿವಂವ್ಚ್ಯಾ ಬದ್ಲಾಕ್, ಮೆಳೆಂ ಜಾಲ್ಲೆಂ ಆಯ್ದಾನ್, ಆಮ್ಚ್ಯಾ ಘರಾ ಧಾಡುನ್ ಆಮ್ಕಾಂ ಅಪವಿತ್ರ್ ಕೆಲಾಂ ಮ್ಹಳ್ಳೊ ವಾಧ್ ಗಾಜಾವ್ನ್, ಫೆಲಿಕ್ಸಾಗೆಲಿಂ, ಇಗರ್ಜ್ ಮಾತೆಥಾವ್ನ್, ವೆಗ್ಳಾಚಾರ್ ಮೆಳುಂಕ್ ವಡ್ಲೊ ತಮಾಸೊ ಕರಿಲಾಗ್ಲಿಂ.
ಪಾದ್ರಿ ತಾಂಚಾ ಘರಾ ಪಾವೊನ್, ಫೆಲಿಕ್ಸಾ ಗೆಲ್ಯಾಂಕ್ ಸಮ್ಜಾವ್ನ್, ‘ನ್ಯಾನ್ಸಿಲಾಚಿ ಕಸಲಿ ಚೂಕ್, ತಾಕಾ ತುಮಿಂ ಕಾಜಾರ್ ಕರುನ್ ಹಾಡ್ಲಾಂ ಆಸ್ತಾಂ, ತಾಕಾ ಬರೆಂ ಕರುಂಕ್ ಪೆಚಾಡ್ಚಿ ತುಮ್ಚಿ ಜಿಮ್ಮೆಧಾರಿ ಮ್ಹಣ್’ ಮ್ಹಣ್ ಸಮ್ಜಾಯಿಲಾಗ್ಲೆ. ಪುಣ್ ಫೆಲಿಕ್ಸ್ ಆನಿ ತಾಚಿ ಬಾಯ್ಲ್ ಎಲಿಜಾಕ್ ಮನ್ಶ್ಯಾಂಪಣ್ಂಚ್ ನಾತ್‌ಲ್ಲೆಂ. ಲೊಕಾಚ್ಯಾ ಮಜತಿನ್, ಸೆಜಾರ‍್ಚ್ಯಾ ಸಾಕ್ಷೆಂನಿ ಜಿಕೊನ್, ಬಿರ್ಮೊತ್ ನ್ಯಾನ್ಸಿಲಾಕ್ ವೆಗ್ಳಾಚಾರ್ ದೀವ್ನ್, ತಾಚ್ಯಾ ಬಾಪಾಯ್ಚ್ಯಾ ಘರಾ ಪಾಟಿಂ ಧಾಡ್ಲೆಂ!!!
ನಿರಾಪ್ರಾದಿ ನ್ಯಾನ್ಸಿಲಾಚಿ ಕರಾಳ್ ಕಾಣಿ ಆಯ್ಕೊನ್ ಬಿರ್ಮೊತ್ ಪಾವ್‌ಲ್ಲ್ಯಾ, ಫೆಲಿಕ್ಸಾಚೊ ಸೆಜಾರಿ ಆಂತೊನಿನ್, ತಾಚ್ಯಾ ಜರ್ಮನಿಂತ್ ಕಾಮ್ ಕರುನ್ ಆಸ್‌ಲ್ಲ್ಯಾ, ಲಾಗ್ಸಿಲೊ ಮಿತ್ರ್ ರೋಹನಾಕ್ ಸಂಪರ್ಕ್ ಕೆಲೊ. ರೋಹನ್ ತೊಡ್ಯಾಚ್ ದಿಸಾಂನಿ ಇಂಡಿಯಾಕ್ ಯೇವ್ನ್ ಆಂತೊನಿಸಂಗಿಂ ನ್ಯಾನ್ಸಿಲಾಚೊ ಬಾಪಯ್ ಸ್ಟ್ಯಾನಿಕ್ ಭೆಟ್ಲೊ.
ನಿರಪ್ರಾಧಿ ಜಾವ್ನಾಸ್‌ಲ್ಲ್ಯಾ ನ್ಯಾನ್ಸಿಲಾಕ್ ಕರ್ಮಿ ಸಮಾಜೆನ್ ದಿಕ್ಕಾರ‍್ತಾನಾ, ತಾಚೊ ಹಾತ್ ಮಾಗೊಂಕ್ ಆಯಿಲ್ಲ್ಯಾ ರೋಹನಾಸಂಗಿಂ, ಸ್ಟ್ಯಾನಿನ್ ದುಸ್ರ್ಯೆಪಾವ್ಟಿಂ ನ್ಯಾನ್ಸಿಲಾಚೆಂ ಕಾಜಾರ್ ಕರುನ್ ದಿಲೆಂ.
ಆಜ್ ನ್ಯಾನ್ಸಿಲ್ ಆಪ್ಲೊ ಘೊವ್ ರೋಹನ್ ಆನಿ ಆಪ್ಲ್ಯಾ ತೆಗಾಂ ಭುರ್ಗ್ಯಾಂ ಸಂಗಿಂ, ಜರ್ಮನಿಂತ್ ಮಸ್ತು ಸಂತೋಸಾನ್ ಜಿಯೆವ್ನ್ ಆಸಾ. ತವೊಳ್ ತವೊಳ್ ತೆಂ ಆಪ್ಲ್ಯಾ ಕುಟ್ಮಾಸಂಗಿಂ ಇಂಡಿಯಾಕ್ ಯೆತಾ. ಬಾಪಯ್ ಸ್ಟ್ಯಾನಿಯಿ ತವೊಳ್ ತವೊಳ್ ಜರ್ಮಾನಿಂತ್ ವಚೊನ್ ಧುವ್, ಜಾಂವಯ್ ಆನಿ ನಾತ್ರಾಂ ಸಂಗಿಂ ರಾವೊನ್ ಪಾಟಿಂ ಯೆತಾ.
ಪುಣ್ ನ್ಯಾನ್ಸಿಲಾಸಂಗಿಂ ಅನೀತ್ ಕೆಲ್ಲ್ಯಾ ಫೆಲಿಕ್ಸಾಚ್ಯಾ ಕುಟ್ಮಾಚೆಂ ಕಿತೆಂ ಜಾಲೆಂ ಮ್ಹಳ್ಳೆಂಯಿ ಜಾಣಾ ಜಾವ್ಯಾಂ –
ನ್ಯಾನ್ಸಿಲಾಸಂಗಿಂ ಕಾಜಾರ್ ಜಾಲ್ಲೊ ಲಿಯೊ, ದುಸ್ರೆಂ ಕಾಜಾರ್ ಜಾಲ್ಲೊ. ಪುಣ್ ಹೊಕಾಲ್ ತಾಕಾ ಸೊಡುನ್ ಧಾಂವ್ಲಿ. ಹೆಣೆ ಲಿಯೊ ತಕ್ಲೆಂತ್ ಅಸ್ಕತ್ ಜಾವ್ನ್ ಜಿಯೆತಾ. ಫೆಲ್ಸಿಕ್ಸ್ ಮಥಾಯೆಸ್‌ಯಿ ನಾಕ್‌ಭರ್ ಸೊರೊ ಪಿಯೆವ್ನ್ ಘರಾ ದೊಷಿ ದಿತಾನಾ, ಬಾಯ್ಲ್ ಎಲಿಜ್ ಘೊವಾಕ್ ಸೊಡುನ್, ಆಪ್ಲ್ಯಾ ಭಯ್ಣಿಗೆರ್ ರಾವೊಂಕ್ ಗೆಲ್ಲ್ಯಾ ಥಂಯ್‌ಯಿ ಸುಖಾನ್ ನಾ. ಆಸ್‌ಲ್ಲಿ ಎಕ್ಲಿಚ್ ಧುವ್ ಸಿಲ್ವಿ ತಿಕಾ ಭಾವಾ ಡ್ಯಾನಿನ್ ಆಮೆರಿಕಾ ಕಾಮಾರ್ ವೆಲ್ಲೆಂ. ಏಕ್ ದೀಸ್ ಸಿಲ್ವಿ ಥಂಯ್ ರಸ್ತ್ಯಾ ಅವ್ಘಡಾಂತ್ ಅಂತರ‍್ಲಿ. ಧುವ್ ಸರ್‌ಲ್ಲ್ಯಾ ಖಂತಿನ್ ಬಾಪಯ್ ಪಿಸೊ ಜಾವ್ನ್ ಗಳ್ಯಾಕ್ ದೊರಿ ಘೆವ್ನ್ ಮೆಲೊ.
ಆವಯ್ ಎಲಿಜಾಕ್ ಕೊಣಾಯ್ಚೊಯಿ ಆಧಾರ್ ನಾ. ನಿರಪ್ರಾದಿ ಸುನ್ಯೆಕ್, ಕರ್ಮಿಪಣಾನ್ ವೆಗ್ಳಾಚಾರ್ ದಿವವ್ನ್ ಘರಾ ಥಾವ್ನ್ ಧಾಂವ್ಡಾಯ್ತಾನಾ, ತಿಣೆ ಚಿಂತುಂಕ್ ನಾ ತಿಕಾಯಿ ಏಕ್ ಧುವ್ ಆಸಾ ಮ್ಹಣ್. ಹ್ಯಾಚ್ ತಿಣೆ ಆನಿ ತಿಚ್ಯಾ ಘೊವಾನ್ ಕೆಲ್ಲ್ಯಾ ಅನೀತಿಂಚ್ಯಾ ಕರ್ಮಾಂಕ್, ತಾಣಿ ಸ್ವತಾಃ ಮಾಗೊನ್ ಘೆತ್‌ಲ್ಲೊ ಶಿರಾಪ್ ತಾಂಚೆರ್ ಬೆಜೊನ್, ತೆಂ ಕುಟಾಮ್ ದೆಸ್ವಟ್ಲಾಂ.
ಪುಣ್ ನ್ಯಾನ್ಸಿಲಾಕ್ ದೆವಾನ್ ಭೆಸಾಂನಿ ಬರೊನ್, ತೆಂ ಆಜ್ ಪಾಟ್ಲೆಂ ಸಗ್ಳೆಂ ವಿಸ್ರುನ್, ಆಪ್ಲ್ಯಾ ಘೊವಾ ಆನಿ ಭುರ್ಗ್ಯಾಂಸಂಗಿಂ ವರ್ತ್ಯಾ ಸುಖಾನ್ ಜಿಯೆವ್ನ್ ಆಸಾ.
■ ಎಚ್. ಜೆ. ಗೋವಿಯಸ್
