ಮಂಗ್ಳುರ್ಚ್ಯಾ ಕೊಂಕ್ಣಿ ಕಥೊಲಿಕ್ ವಕೀಲಾಂಚ್ಯಾ ಸಂಘಾನ್, ದಿಯೆಸೆಜಿಚ್ಯಾ ಲಾಯಿಕ್ ಆಯೋಗಾ ಸಾಂಗಾತಾ ಮೆಳೊನ್ ‘ನತಾಲಾಂಚೊಂ ನಿಯಾಳ್’ ಮ್ಹಣ್ಯೆತ್ ತಸಲೆಂ ಎಕ್ ಅರ್ಥಾಭರಿತ್ ಕಾರ್ಯೆಂ ಜೆಪ್ಪು, ಸಾಂತ್ ಅಂತೊನ್ ಅಸ್ರ್ಯಾಚಾ ಸಂಭ್ರಮ್ ಸಭಾ ಸಾಲಾಂತ್ ಸುಕ್ರಾರಾ , ದಶೆಂಬರ್ 5 ವೆರ್ ಮಾಂಡುನ್ ಹಾಡ್ಲ್ಲೆಂ.
ಬದಲ್ಚ್ಯಾ ಕಾಳಾರ್ ಕ್ರೀಸ್ತಾಕ್ ಸಾಕ್ಸ್ ಜಾಂವ್ಚೆಂ ಕಶೆಂ ? ವಿಚಾರ್ ಮಂಡನಾ ಸಾಂಗಾತಾ ಸಂವಾದಾಕೀ ಅವ್ಕಾಸ್ ಕರುನ್ ದಿಲ್ಲಿ ಬೋವ್ ಬರಿ ಗಜಾಲ್. ಪೂಣ್ ; ಗೊಂಯ್ – ದಮನ್ ದಿಯೆಸೆಜಿಚೊ ಆರ್ಚ್ ಬಿಸ್ಪ್ ಫಿಲಿಪ್ ನೆರಿ ಧರುನ್, ಮಂಗ್ಳೂರ್ಚೊ ಬಿಸ್ಪ್ ಪೀಟರ್ ಪಾವ್ಲ್, ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚೊ ಕುಲಪತಿ ಫಾ| ಪ್ರವೀಣ್ ಮಾರ್ಟಿಸ್, ಲಾಯಿಕ್ ಆಯೊಗಾಚೊ ನಿರ್ದೇಶಕ್ ಫಾ| ಜೆ. ಬಿ. ಕ್ರಾಸ್ತಾ, ಕೊಂಕಣಿ ಕಥೊಲಿಕ್ ವಕೀಲಾಂಚ್ಯಾ ಸಂಘಾಚೊ ಅಧ್ಯಕ್ಶ್ ಸುಶಾಂತ್ ಸಲ್ಡಾನ್ಹಾ – ಕೊಂಕ್ಣಿ ಭಾಶಿಕ್ಚ್ ವೆದಿರ್ ಆಸ್ಲೆಲ್ಯಾ, ತಾಂತ್ಲ್ಯಾತೂಯ್ ಗೆಲ್ಲೆ ಗೆಲ್ಲೆ ಕಡೆ ‘ಕೊಂಕ್ಣಿ ಉಲಯ್, ಫುಲಯ್, ಉರಯ್ ….’ ಮ್ಹಣ್ ನಾರೆ ದಿತೆಲ್ಯಾಂನಿ ಆಪ್ಲೆ ವಿಚಾರ್ ಇಂಗ್ಲೆಜಾಂತ್ ಮಾಂಡ್ಲೆ – ಹಿ ಗಜಾಲ್ ಬೆಜಾರಾಯೆಚಿ. ಉಪ್ಕಾರ್ ಭಾವುಡ್ಚ್ಯಾ ಉತ್ರಾಂನಿ ಸಂಘಾಚಿ ಕಾರ್ಯದರ್ಶಿ ಲೋಲಿನಾನ್ ಹೆ ವಿಶಿಂ ಕೆಲ್ಲೊ ಉಲ್ಲೇಕ್ ವಾಜ್ಬಿಚ್. ವಿಪರ್ಯಾಸಾಚಿ ಗಜಾಲ್ ಮ್ಹಳ್ಯಾರ್ ಕೊಂಕ್ಣೆ ಖಾತಿರ್ ಜೀವ್ ಸಯ್ತ್ ದೀಂವ್ಕ್ ತಯಾರ್ , ಕೊಂಕ್ಣಿ ಆಮ್ಚಿ ಖಾಶೆಲಿ ಗಜಾಲ್ ಮ್ಹಣ್ ಪ್ರೆಸ್ ಸ್ಟೇಟ್ಮೆಟಾಂ ದಿತಲೆ ಕೊಂಕ್ಣಿ ಝುಜಾರಿ ಪಯ್ಲ್ಯಾ ಫಂಗ್ತೆರ್ ನುತ್ತಾ ಬಸ್ಲಲೆ.
ಸಂವಾದ್ ಚಲವ್ನ್ ವರುಂಕ್ ವೆದಿ ಚಡ್ಲೆಲ್ಯಾ ದೊ| ಆಲ್ವಿನ್ ಡೆ ಸಾನ್ ಏಕ್ ದೋನ್ ವಾಕ್ಯಾಂ ಕೊಂಕ್ಣೆಂತ್ ಉಲಯಿಲ್ಲ್ಯಾನ್ ಕಾರ್ಯಾಂತ್ ಕೊಂಕ್ಣಿ ‘ಜೀವ್’ ಆಸಾ ಆನಿ ಉರ್ತಾ ಮ್ಹಣ್ ಖಾತ್ರಿ ಜಾಲೆಂ.
ನಿಯಾಳಾಚೊ ವಿಶಯ್ ಬದ್ಲಾವಣೆಚ್ಯಾ ಕಾಳಾರ್ ಕ್ರೀಸ್ತಾಕ್ ಸಾಕ್ಸ್ ಜಾಂವ್ಚೆಂ ಕಶೆಂ? – ಬೋವ್ ಪ್ರಸ್ತುತ್ ಆನಿ ಗೂಂಡಾಯೇನ್ ವಿಚಾರ್ ಕರಿಜೆ ಜಾಲ್ಲೊ ವಿಶಯ್ ಮ್ಹಣ್ಚ್ಯಾಂತ್ ದೋನ್ ಉತ್ರಾಂ ಖಂಡಿತ್ ನಾಂತ್. ಪೂಣ್ ಪರತ್ ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್ – ಕಾಡ್ದಿನಾಲಾಕ್ ಧರುನ್ ಉಲಯಿಲ್ಲ್ಯಾ ಚಡಾವತ್ ಸಯ್ರ್ಯಾಂನಿ ಆನಿ ಸಂವಾದಾಂತ್ ವಾಂಟೊ ಘೆತ್ಲಲ್ಯಾ ಚಡಾವತ್ ಜಣಾಂನಿ 2008 ಥಾವ್ನ್ ಬದ್ಲೊಂಕ್ಚ್ ಆಯ್ಕಾನಾತ್ಲಿ – ಆಮ್ಕಾಂ ಐಎಎಸ್ ಜಾಯ್, ಐಪಿಎಸ್ ಜಾಯ್, ಕೆಎಎಸ್ ಜಾಯ್, ಜಡ್ಜ್ ಜಾಯ್, ಪತ್ರಕರ್ತ್ ಜಾಯ್ ಮ್ಹಳ್ಳಿ ಆಳ್ಣಿ ಲದಿನ್ಚ್ ವಾಚ್ಲಿ. ಐಎಎಸ್, ಐಪಿಎಸ್, ಕೆಎಎಸ್, ಜಡ್ಜ್ ಕಿತ್ಯಾಕ್ ಜಾಯ್? ತಾಂಚೆವರ್ವಿಂ ಆಮ್ಚೊ ಸಮುದಾಯ್ ಕಸೊ ಸಾಲ್ವಾರ್ ಜಾತಾ ಮ್ಹಳ್ಳೆ ವಿಶ್ಯಾಂತ್ ಕೊಣೆಂಚ್ ಖರೊ ಉಜ್ವಾಡ್ ಫಾಂಕಯ್ಲೊ ನಾ. ಆಸ್ಲ್ಲ್ಯಾ ಎಕಾ ಕೆ.ಎ.ಎಸ್. ಅಧಿಕಾರಿಕ್ ವೋಡ್ನ್ ಹಾಡ್ನ್ ತಾಕಾ ರಾಜಕಾರಣಿ ಕರುನ್ ಘರಾ ಬಸಯ್ಲ್ಯಾ ಉಪ್ರಾಂತ್ ಆತಾಂ ಪರ್ತ್ಯಾನ್ ಐಎಎಸ್ ಜಾಯ್, ಐಪಿಎಸ್ ಜಾಯ್, ಕೆಎಎಸ್ ಜಾಯ್, ಜಡ್ಜ್ ಜಾಯ್ …..!
ಬಾ| ಪ್ರವೀಣ್ ಮಾರ್ಟಿಸ್ ಹಾಣಿ ಮಾತ್ಶೆಂ ವೆಗ್ಳೆಂ ಚಿಂತೂನ್ ಏಕ್ ಬೋವ್ ಮಹತ್ವಾಚೊ ಮುದ್ದೊ ಮಾಂಡ್ಲೊ – ಮುಸ್ಲಿಂ ಸಮುದಾಯಾಚ್ಯಾ ಎಕಾ ಮಾನೆಸ್ತಾಚಿ ದೇಕಿ ದೀವ್ನ್ ಥಳೀಯ್ ಬಿಜ್ನೆಸ್ ಆಮ್ಚ್ಯಾ ಸಮುದಾಯಾಚ್ಯಾ ಹಾತಾಂತ್ ಆಸೊಂಕ್ ಜಾಯ್ ಮ್ಹಳೆಂ. ಕಿತ್ಲ್ಯಾ ಜಣಾಂಕ್ ಹೊ ಮುದ್ದೊ ಗಂಭೀರ್ಪಣಿ ಸಮ್ಜಾಲೊ ಆನಿ ಹಾಚೆರ್ ವಿಚಾರ್ ಕೆಲೊ – ಮ್ಹಾಕಾ ಅಂದಾಜ್ ಕರುಂಕ್ ಜಾಯ್ನಾ. ಪೂಣ್ ಮ್ಹಾಕಾ ಮಾತ್ ತೋ ಸಮ್ಜಾಲೊ. ಕಾರಣ್ ಪಾಟ್ಲ್ಯಾ ಕಿತ್ಲ್ಯಾಗೀ ವರ್ಸಾಂ ಪಾಸುನ್ ಹಾಂವ್ ಹಿ ಗಜಾಲ್ ಪರತ್ ಪರತ್ ಸಾಂಗುನ್, ಬರವ್ನ್ ಆಯ್ಲಾಂ. ಆಮ್ಚೆಲಾಗಿಂ ಎನ್ಆರ್ಐ ಜಾಯ್ತೆ ಆಸಾತ್. ಥಳೀಯ್ ಒಪೀನಿಯನ್ ಮೇಕರ್ ಮ್ಹಣ್ಚೆ ತಸಲೆ ಬಳ್ವಂತ್ ಉದ್ಯಮಿ ನಾಂತ್! ಆನಿ ಜೆ ಆಸಾತ್, ತಾಂಕಾ ತಾಂಚ್ಯಾ ಶೆತಾಂತ್ ಕುಸ್ಕುಟಾಚಿ ಮರ್ಯಾದ್ ನಾ, ಐಡೆಟಿಂಟಿ ನಾ ದೆಕುನ್ ಹಾಂವ್ ಬಿಸ್ಪಾಚೊ ಪ್ರತಿನಿಧಿ, ಕೊಂಕ್ಣೆಚೊ ಪ್ರತಿನಿಧಿ ಮ್ಹಣ್ ಸಾಂಗೊನ್ ಭಂವ್ತಾತ್.
2008 ವ್ಯಾ ವರ್ಸಾ ಚರ್ಚ್ ಎಟ್ಯಾಕ್ ಜಾಲ್ಲೆಪಾಸುನ್ ಆಜ್ ಮೆರೆನ್ ಸಮುದಾಯಾಕ್ ರಾಕ್ಚಿಂ ಜಾಯ್ತಿಂ ಉಪಕ್ರಮಾಂ ಲಾಯಿಕಾಂಚಿಂ ಸಂಘಟನಾಂ, ಉದ್ಯಮಿಂಚಿಂ ಸಂಘಟನಾಂ ದಿಯೆಸೆಜಿಚ್ಯಾ ಸತ್ರೆಪಂದಾ ಮಾಂಡುನ್ ಹಾಡುನ್ ಆಸಾತ್. ಹಿಂ ಉಪಕ್ರಮಾಂ ಕಶಿಂ ಮ್ಹಳ್ಯಾರ್ ಸಂಭ್ರಮ್ ಹೊಲಾಚ್ಯಾ ಕೊನ್ಶ್ಯಾಂತ್ ದವರ್ಲೆಲ್ಯಾ ಫಯರ್ ಎಕ್ಸ್ಟ್ವಿಂಗಾರಾ ಪರಿಂ (ಉಜೊ ಪಾಲ್ವೊಂಚೆಂ ಮೆಶಿನ್ ) ಆಮ್ಚ್ಯಾ ಸಮುದಾಯಾಚೆ ಚಡಾವತ್ ಯೋಜನಾಂ – ಉಪಕ್ರಮಾಂ ಹ್ಯಾ ಉಜೊ ಪಾಲ್ವೊಂಕ್ ವಾಪರ್ಚ್ಯಾ ಮೆಶಿನಾಂಪರಿಂ ಫಕತ್ ಅಲಂಕಾರಿಕ್ ಮ್ಹಣ್ಚ್ಯಾಕ್ ಮ್ಹಾಕಾ ಕಸಲಿಚ್ ಮುಲಾಜ್ ನಾ. ಕಾಂಯ್ ಹೊಲಾಂತ್ ನೀಜ್ ಉಜೊ ಪೆಟ್ಲೊ ಜಾಲ್ಯಾರ್ ಅರ್ವಾಸ್ ಲೊಕಾಕ್ ತಿಂ ಕಶಿಂ ವಾಪಾರ್ಚಿಂ ಕಳಿತ್ ನಾ. ಫಕತ್ ಆಸಾತ್ ಮ್ಹಳ್ಳೆ ಖಾತಿರ್ ತಿಂ ಆಸಾತ್. ಕರಾವಳೆಂತ್ ಆಜ್ ಕ್ರಿಸ್ತಾಂವ್ ಸಮಾಜಾಚಿ ಪರಿಸ್ಥಿತಿ ಚರ್ಚ್ ಎಟ್ಯಾಕ್ ಜಾತಾನಾ ಕಶಿ ಆಸ್ಲ್ಲಿ ತೆ ಪ್ರಾಸ್ ವಾಯ್ಟ್ ಆಸಾ ಮ್ಹಳ್ಳೆಂ ಮಾನುನ್ ಘೆಂವ್ಕ್ ಮಾತ್ ಆಮಿ ತಯಾರ್ ನಾಂವ್. ಕಥೊಲಿಕ್ ಸಭಾ ತಸಲೆಂ ಸಂಗಟನ್ ಪಾಟ್ಲ್ಯಾ ಕಿತ್ಲ್ಯಾಗೀ ವರ್ಸಾಂ ಪಾಸುನ್ ಭುರ್ಗ್ಯಾಂಕ್ ಕನ್ನಡಾಂತ್ ಭಾಷಣ್ ಕರುಂಕ್ ಶಿಕಯ್ತಾ. ಪೂಣ್ ಚರ್ಚ್ ಎಟ್ಯಾಕ್ ಜಾಲ್ಲೆ ತವಳ್ ಆಮ್ಚ್ಯಾ ಸಮುದಾಯಾಚ್ಯಾ ತರ್ಫೆನ್ ಉಲಂವ್ಕ್ ಕಶೆಂ ಕೋಮು ಸೌಹಾರ್ದ ವೇದಿಕೆ ಥಾವ್ನ್ ಕೆ. ಎಲ್. ಅಶೋಕಾನ್ ಯೇಜೆ ಪಡ್ಲೆಂಗೀ, ತಶೆಂಚ್ ಜೆರೋಸಾ ಘಡಿತ್ ಜಾತಾನಾ ಎಂ. ಜಿ. ಹೆಗ್ಡೆ ತಸಲ್ಯಾನ್ ಯೇಜಾಯ್ ಪಡ್ಲೆಂ. ತರ್ ಪರಿಸ್ಥಿತಿ ಖಂಯ್ ಬದಲ್ಲ್ಯಾ ? ಚರ್ಚ್ ಎಟ್ಯಾಕ್ ಜಾಲ್ಲೆ ತವಳ್ ಘಾಂಟಿ ವೊಡ್ಲೆ ದೆಕುನ್ ಲೋಕ್ ಜಮೊ ಜಾಲ್ಲೊ ಖರೆಂ, ಪೂಣ್ ಆಜ್ ಘಾಂಟ್ ವೊಡ್ಲ್ಯಾರ್ ಎಕ್ಲೊ ದೋಗ್ ಆಯ್ಲ್ಯಾರೀ ತಿ ವ್ಹಡ್ಲಿ ಗಜಾಲ್.
ತರ್, 2008 ಥಾವ್ನ್ ಆಜ್ ಮೆರೆನ್ ‘ಫಯರ್ ಎಕ್ಸ್ಟ್ವಿಂಗರ್’ ತಯಾರ್ ಕರುಂಕ್ ಇತ್ಲಿಂ ಉಪಕ್ರಮಾಂ ಜಾಲಿಂ, ಲಾಕಾಂನಿ ದುಡು ಖರ್ಚ್ ಜಾಲೊ . . . ಫಲಿತಾಂಶ್ ಕಿತೆಂ ? ಆಜ್ಯೀ ಹೊಲಾಕ್ ಉಜೊ ಪೆಟ್ಲ್ಯಾರ್ ಉಜೊ ಪಾಲ್ವಂವ್ಚೆಂ ಮೆಶಿನ್ ಕಶೆಂ ವಾಪಾರಿಜೆ ಮ್ಹಣ್ ಕೊಣಾಕೀ ಕಳಿತ್ ನಾ. ತರ್ ಕಿತೆಂ ಫಾಯ್ದೊ ಹ್ಯಾ ಮೆಶಿನಾಂಚೊಂ?
ತರ್ – ಆಮ್ಚೆ ಮಧೆಂ ಉಲಯ್ತಲೆ ಮನಿಸ್ಚ್ ನಾಂತ್ ? ಖಂಡಿತ್ ಆಸಾತ್. ಪೂಣ್ ತಾಂಕಾ ಇತ್ಲೆಂ ಭೆಶ್ಟಾವ್ನ್ ದವರ್ಲಾಂಗೀ, ತೆ / ತಿಂ ಉಲಂವ್ಕ್ ಭಿಯೆತಾತ್. ಕಾಡ್ದಿನಲಾ ಥಾವ್ನ್, ಫಾ| ಮಾರ್ಟಿಸ್, ಬಿಸ್ಪ್ ಪೀಟರ್ ಪಾವ್ಲ್ ಪರ್ಯಾಂತ್ ಕೌಂಟರ್ ನೆರೆಟಿವಾ ವಿಶ್ಯಾಂತ್ ವ್ಹಡ್ಲ್ಯಾನ್ ಉಲಯ್ಲೆ. ಅನ್ಯಾಯ್ – ಅಕ್ರಮ್ ಜಾತಾನಾ ಮೌನ್ ರಾವಾನಾಯೆ, ಉಲಯ್ಜೆ ಮ್ಹಣಾಲೆ. ಆಯ್ಲೆವಾರ್ಚೊಚ್ ಏಕ್ ದಾಕ್ಲೊ ಘೆವ್ಯಾಂ – ಜೆರೊಸಾ ಇಸ್ಕೊಲಾಚೆರ್ ಹಲ್ಲೊ ಜಾಲೊ ಖಂಯ್ ಗೆಲ್ಲೆಂ ಕೌಂಟರ್ ನೆರೆಟೀವ್ ? ಉಲಯ್ಜೆ ಜಾಲ್ಲೆ ಕಿತ್ಯಾಕ್ ಉಲಯ್ಲೆ ನಾಂತ್ ? ಆನಿ ಉಲಯ್ತೆಲ್ಯಾಂಕ್ ಉಲಂವ್ಕ್ ನಜೊ ಮ್ಹಣ್ ಕೊಣೆಂ / ಕಿತ್ಯಾಕ್ ಆಡಾಯ್ಲೆಂ?
ಜೆರೊಸಾ ಘಡಿತ್ ಘಡ್ಲಲೆಂ ಆದ್ಲ್ಯಾ ಹಫ್ತ್ಯಾಚಾ ಸನ್ವಾರಾ ದಿಸಾ. ತೆ ದೀಸ್ ಹಾಂವ್ ಸಾಹಿತ್ಯ ಅಕಾಡೆಮಿಚ್ಯಾ ಕಾರ್ಯಾವಳಿಕ್ ಮೈಸೂರ್ ಆಸ್ಲೊಂ. ರಾಜ್ಯ್ ಮಟ್ಟಾರ್ ಮಾದ್ಯಮಾಂನಿ ಲೈವ್ ಪ್ರಸಾರ್. ಸಾಯ್ಭಾನ್, ಫಾ| ಪ್ರವೀಣಾನ್ ಸಾಂಗ್ಲಲೆಪರಿಂ ಫುಲ್ ಫೇಕ್ ನೆರೇಟಿವ್! ಹಾಕಾ ಕೌಂಟರ್ ನೆರೆಟೀವ್ ದಿಂವ್ಚೆಂ ಪ್ರೇತನ್ ಆಮ್ಚ್ಯಾ ಸಮುದಾಯಾ ಥಾವ್ನ್ ಜಾಲೆಂಚ್ ನಾ. ಆಮ್ಚ್ಯಾ ಹರೇಕಾ ಸಂಸ್ಥ್ಯಾಕ್ ಏಕ್ ಸರ್ವಜಣಿಕ್ ಸಂಪರ್ಕ್ ಅಧಿಕಾರಿ ಆಸಾ, ಪಾವಾನಾತ್ಲ್ಯಾಕ್ ದಿಯೆಸೆಜಿಕ್ ಏಕ್ ನಯ್ ದೋಗ್ ಸಂಪರ್ಕ್ ಅಧಿಕಾರಿ ಆಸಾತ್ – ಸಗ್ಳೆ ಮಾಯಾಕ್ ಆನಿ ಮಾವ್ನ್. ಸಾಯ್ಬ್ ಸಂಪರ್ಕಾ ಥಾವ್ನ್ ಭಾಯ್ರ್. ಆಯ್ತಾರ್, ಸೊಮಾರ್, ಮಂಗ್ಳಾರ್, ಬುದ್ವಾರ್ – ಚಾರ್ ದೀಸ್ ಉಬೊನ್ ಗೆಲೆ. ಖಂಯ್ಚ್ಯಾಗೀ ಸಾಣಾಚ್ಯಾ ಕಾಣಿಕೆ ಕಂರ್ಡ್ಯಾಕ್ ಕೊಣೆಂಗೀ ದುಶ್ಕರ್ಮಿಂನಿ ಕಾಂಡೊಮ್ ಘಾಲ್ಲೆಂ ಖಂಡನ್ ಕರ್ನ್ ರಾತ್ ಉಜ್ವಾಡ್ಚೆ ಭಿತರ್ ಪ್ರೆಸ್ ನೋಟ್ ದಿಲ್ಲ್ಯಾಂ ಥಾವ್ನ್ – ಏಕ್ ಪ್ರೆಸ್ ನೋಟ್ ಸಯ್ತ್ ನಾ.
ಅಕೇರಿಕ್ ಕಥೊಲಿಕ್ ಪತ್ರಕರ್ತಾಂಚ್ಯಾ ವಾಟ್ಸಪ್ ಗ್ರೂಪಾಂತ್ ಆಮಿ ಥೊಡ್ಯಾಂನಿ ವಿಚಾರುಂಕ್ ಸುರು ಕೆಲೆಂ. ಶೆವ್ಟಿಂ ಚಾರ್ ವೊಳಿಂಚೊಂ ಏಕ್ ಅಸ್ಪಷ್ಟ್ ಪ್ರೆಸ್ ನೋಟ್ ದಿಯೆಸೆಜಿ ಥಾವ್ನ್ ಆಯ್ಲೊ. ಪೂಣ್ ತಿತ್ಲೆ ಭಿತರ್ ಉಜೊ ಪೆಟೊನ್ ಜಾಲ್ಲೊ ಆನಿ ಸಂಸ್ಥ್ಯಾನ್ ಖರಿ ಗಜಾಲ್ ಲೊಕಾಮುಕಾರ್ ದವರಿನಾತ್ಲೆ ವರ್ವಿಂ ದಾಲ್ ಮೆ ಕುಛ್ ಕಾಲಾ ಜರೂರ್ ಹೈ ಮ್ಹಣ್ ಆಮ್ಚೆಚ್ ಉಲಂವ್ಕ್ ಲಾಗ್ಲ್ಲೆ. ದಿಯೆಸೆಜಿಚಿಂ ಮಾದ್ಯಮಾಂ, ಆಮ್ಚಿಂ ಮಾದ್ಯಮಾಂ ಸಗ್ಳಿಂ ಕೋಮಾಂತ್ ಆಸ್ಲಿಂ. ಅಕೇರಿಕ್ ಬೆಂಗ್ಳುರ್ ಥಾವ್ನ್ ಎಕಾ ಮಾಲ್ಘಡ್ಯಾ ಪತ್ರಕರ್ತಾಚ್ಯಾ ಪ್ರೇತನಾನ್ ಸಂಸ್ಥ್ಯಾಚಿ ವ್ಹಡಿಲ್ನ್, ಕೊಣಾಕ್ ನೀಜ್ ಆನಿ ಸತ್ ಗಜಾಲ್ ಕಳಿತ್ ಆಸಾ – ತಿಚೊ ವಿಡಿಯೊ ಕರುನ್ ಮುಕೆಲ್ ವಾಳ್ಯಾಚಾ ಎಕಾ ಡಿಜಿಟಲ್ ಮಾಧ್ಯಮಾಂತ್ ಫಾಯ್ಸ್ ಜಾಂವ್ಚೆಪರಿಂ ಪಳಯ್ಲೆಂ. ಗಾಂವಾಂತ್ ಆನಿ ಪರ್ಗಾಂವಾಂತ್ ಮ್ಹಣ್ ಎಕಾ ರಾತಿಂ ಭಿತರ್ ಚಾರ್ ತೆ ಪಾಂಚ್ ಲಾಕ್ ಲೊಕಾನ್ ಹೊ ವಿಡಿಯೊ ಪಳಯ್ಲೊ. ಲೊಕಾಕ್ ಸತ್ ಕಳಿತ್ ಜಾಲೆಂ. ಕೌಂಟರ್ ನೆರೆಟೀವ್ ತಯಾರ್ ಜಾಲ್ಲೆಂ.
“ತುಮ್ಕಾಂ ಉಲಂವ್ಕ್ ಕಳಿತ್ ನಾ, ತುಮ್ಕಾಂ ಕನ್ನಡ ಯೇನಾ, ತುಮಿ ಉಲಯ್ಲ್ಯಾರ್ ಚುಕ್ತಾ, ಅನಾಹುತ್ ಜಾತಾ, ಮಾದ್ಯಮಾಂಕ್ ಲಾಗಿಂ ಕರಿನಾಕಾತ್” – ಮ್ಹಣ್ ಭೆಶ್ಟಾಂವ್ಚ್ಯಾ ಬದ್ಲಾಕ್ , ಸತ್ ಗಜಾಲ್ ಕಳಿತ್ ಆಸ್ಲೆಲ್ಯಾಂಕ್, ಉಲಂವ್ಕ್ ಕಳಿತ್ ಆಸ್ಲೆಲ್ಯಾಂಕ್ ಧಯ್ರ್ ದೀವ್ನ್ ಕೌಂಟರ್ ನೆರೆಟೀವ್ ಬಾಂದ್ಚೆಂ ಕಾಮ್ ಪಯ್ಲೆಂಚ್ ಕೆಲ್ಲೆಂ ಜಾಲ್ಯಾರ್ ? ತೆಂ ಆಮ್ಚ್ಯಾ ಸ್ವಘೋಷಿತ್ ಸಮಡ್ತಿಚ್ಯಾ ಸೊಡ್ವಣ್ದಾರಾಂಕ್ ನಾಕಾ – ಕಿತ್ಯಾಕ್ ಮ್ಹಳ್ಯಾರ್ ತಾಣಿ ಉಲಯ್ಲ್ಯಾರ್ ಹಾಂಕಾ ಪೂಟೇಜ್ ಮೆಳಾನಾ. ಇಸ್ಕೊಲಾಚ್ಯಾ ವ್ಹಡಿಲ್ನಿಚೊ ವಿಡಿಯೊ ಪಳಯಿಲ್ಲೆ ಮ್ಹಜೆ ಪತ್ರ್ಕಾರ್ ಮಿತ್ರ್ ಆತಾಂಯ್ ಮ್ಹಣ್ತಾತ್ “ನಿಮ್ಮವರು ಇಷ್ಟು ನಿರರ್ಗಳವಾಗಿ ಕನ್ನಡ ಮಾತನಾಡುವವರು ಇದ್ದಾರಲ್ಲ?” ಸಂಸ್ಥ್ಯಾಚ್ಯಾ ಮುಕೆಲ್ ಮೆಸ್ತ್ರಿರ್ಣಿಚೊ ವಿಡಿಯೊ ವೈರಲ್ ಜಾಲ್ಲೊಚ್ ತೆ ಪರ್ಯಾಂತ್ ಬಿಳಾಂನಿ ಲಿಪೊನ್ ಬಸ್ಲಲೆ ಮುಕೆಲಿ ಎಕೇಕ್ಲೆಚ್ ಭಾಯ್ರ್ ಆಯ್ಲೆ ಆನಿ ನಾ ಮುಂದು ತಾ ಮುಂದು ಮ್ಹಣ್ ಕಿತೆಂ ವಿಡಿಯೊ ? ಕಿತೆಂ ಪ್ರೆಸ್ ? ಊರು ಕೊಳ್ಳೆ ಹೊಡೆದ ಮೇಲೆ ಕೋಟೆ ಬಾಗಿಲು ಹಾಕಿದರಂತೆ – ಫಾಯ್ದೊ ಕಿತೆಂ ?
ಐಎಸ್, ಐಪಿಎಸ್, ಜಡ್ಜ್ ಸಾಂಗಾತಾ ಮಾದ್ಯಮಾಚೀಯ್ ಗಜಾಲ್ ಸಂವಾದಾ ವೆಳಾರ್ ಪರ್ತ್ಯಾನ್ ಚರ್ಚೆಕ್ ಆಯ್ಲಿ. ಆಮ್ಕಾಂ ಆಮ್ಚೆಂಚ್ ಮ್ಹಳ್ಳೆಂ ಬಳ್ವಂತ್ ಮಾದ್ಯಮ್ ಜಾಯ್ ಮ್ಹಣ್ಚೆಂ ರುದಾನ್, ಬಿಸ್ಪ್ ಬಾಜಿಲ್ ಸರ್ಲ್ಲ್ಯಾ ಕಾಳಾಚೆಂ, ಆತಾಂಯ್ ಆಸಾ. ತ್ಯಾ ವೆಳಾರ್ ಕಶ್ಟಿ ಲೊಕಾನ್ ಬೆಡೊ ವಿಕುನ್ ಆಯಿಲ್ಲ್ಯಾ ಪಯ್ಶ್ಯಾಂನಿ ಹಿಶೆದಾರ್ ಜಾವ್ನ್ ಜನವಾಹಿನಿ ಪತ್ರ್ ಸುರು ಕೆಲ್ಲೆಂ. ಕೋಣ್ಗೀ ಎಕ್ಲೊ ಪಿಕಾರ್ಡೊ ಫಾ| ಆಲ್ವಿನ್ ಸೆರಾವೊಚ್ಯಾ ಚಿರಿ ನಾಟಕಾಂತ್ ಆಯಿಲ್ಲೆಪರಿಂ (ಹ್ಯಾ ನಾಟಕಾಚೊ ಉಲ್ಲೇಖ್ ಕಾಲ್ ಫಾ| ಪ್ರವೀಣಾನ್ ಆಪ್ಲ್ಯಾ ಉಲವ್ಪಾಂತ್ ಕೆಲೊ) ‘ತೀಸ್ ನಾಣ್ಯಾಂಚಿಂ ಚಿರಿ’ ಹಾಡ್ನ್ ಆಯ್ಲೊ, ಆನಿ ಜನಮಾಧ್ಯಮಾಕ್ ಸುರಿ ಮಾರ್ನ್ ಗೆಲೊ – ಹಿ ಆತಾಂ ಸಗ್ಳ್ಯಾಂಕೀ ಕಳಿತ್ ಆಸ್ಚಿ, ಪೂಣ್ ಕೊಣಾಕ್ಚ್ ಉಗ್ತ್ಯಾನ್ ಉಚಾರುಂಕ್ ನಾಕಾ ಜಾಲ್ಲಿ ಗಜಾಲ್. ಆಮ್ಕಾಂ ಆಮ್ಚೆಂಚ್ ಮಾದ್ಯಮ್ ಜಾಯ್ ಮ್ಹಣ್ಚಿ ಪರಿಸ್ಥಿತಿ ಆತಾಂಯ್ ತಸೀಚ್ ಆಸಾ. ಪರಿಸ್ಥಿತಿ ಮಾತ್ 2008 ವ್ಯಾ ವರ್ಸಾ ಆಸ್ಲೆಲ್ಯಾಚ್ಯಾಕೀ ಪಾಡ್ ಆಸಾ. ಜನವಾಹಿನಿ ಉಪ್ರಾಂತ್ ಸುರು ಕೆಲ್ಲೆಂ ವಾರ್ತಾ ಭಾರತಿ ಆಜ್ ಖಂಯ್ ಪಾವ್ಲಾಂ ಪಳಯಾ.
ಏಕ್ ದಾಕ್ಲೊ ದಿತಾಂ – 2008 ವ್ಯಾ ವರ್ಸಾ ಚರ್ಚ್ ಎಟ್ಯಾಕ್ ಜಾಲ್ಲೆ ತವಳ್ ಆತಾಂ ಸಮುದಾಯಾಚೊ ಲೀಡರ್ ಮ್ಹಣ್ ಹರ್ದೆಂ ಬಡಂವ್ಚೆಂ ಚಡಾವತ್ ಕೊಣೀ ಜಾಗ್ಯಾರ್ ನಾತ್ಲೆ. ಸಾಯ್ಬ್ ಆಸ್ಪತ್ರೆಂತ್ ಆಸ್ಲೊ. ತಾಚ್ಯಾ ಅನುಪಸ್ಥಿಂತ್ ದಿಯೆಸೆಜಿಚೆಂ ಮುಕೆಲ್ಪಣ್ ಘೆತ್ಲಲೆಂ, ಫಾ| ಫ್ರಾನ್ಸಿಸ್ ಸೆರಾವೊ, ಫಾ| ಓನಿಲ್, ದೆ| ಫಾ| ವಿನ್ಸೆಂಟ್, ಫಾ| ವಿಲಿಯಮ್ ತಸಲ್ಯಾ ಕಾಂಯ್ ಥೊಡ್ಯಾ ಅನ್ಭೊಗಿ ಯಾಜಕಾಂನಿ. ತವಳ್ ಹ್ಯಾ ಯಾಜಕಾಂಕ್ ಭೆಟೊಂಕ್ ಆಯಿಲ್ಲ್ಯಾ ರಾಜ್ಯಾಚಾ ಎಕಾ ವರಿಷ್ಠ್ ಐಪಿಎಸ್ ಅಧಿಕಾರಿನ್ (ಆನಿ ತೋ ಕ್ರೀಸ್ತಾಂವ್) ಏಕ್ ಸಲಹಾ ದಿಲ್ಲಿ – ಬಿಸ್ಪಾಚೊ ನಿವಾಸ್, ಕಾಥೆದ್ರಾಲ್, ಇಗರ್ಜೊ – ಹ್ಯೊ ಸಗ್ಳ್ಯೊ ಸುವಾತಿ ಸುರಕ್ಷಿತ್ ಆನಿ ಪವಿತ್ರ್ ಉರಜೆ ಜಾಲ್ಯಾರ್ ರಾಜಕಾರಣಿ ಆನಿ ಅಧಿಕಾರಿಂ ಸಾಂಗಾತಾ ಪಾಟ್ಲಾಮ್ ಬಾಂದುನ್ ಯೆತಲ್ಯಾಂಕ್ ತುಮಿ ಭಿತರ್ ಸೊಡುಂಕ್ ನಜೊ. ತಾಂಚೆ ಸಾಂಗಾತಾ ಯೆತೆಲ್ಯಾಂ ಪಯ್ಕಿ ಚಡಾವತ್ ಖಬ್ರಿ ಆಸ್ತಾತ್. ತಸ್ವಿರ್ಯೊ ಕಾಡ್ತಾನಾ, ಉಲಯ್ತಾನಾ ಜಾಗ್ರುತ್ ಆಸಜೆ. ತುಮ್ಚಿ ಸುರಕ್ಷಾ ತುಮಿ ಪಳಯ್ಜೆ. ಪೂಣ್ ಆಜ್ ಕಿತೆಂ ಜಾತೇ ಆಸಾ? ಆಮ್ಚ್ಯಾ ಬಿಸ್ಪಾಚ್ಯಾ ನಿವಾಸಾಂನಿ ಆಮ್ಕಾಂ ಮಾತ್ ಜೆರಾಲ್ ಭೆಟೆಚೊ ದೀಸ್, ಪೂಣ್ ಅಸಲ್ಯಾಂಕ್ ಫ್ರೀ ಪಾಸ್, ಫೊಟೊ ಸೆಷನ್. ಆನಿ ಹೆ ಫೊಟೊ ಚುನಾವ್ ಪ್ರಚಾರಾಕ್ ಕಸಲೀಚ್ ಮುಲಾಜ್ ನಾಸ್ತಾನಾ ತೆ ವಾಪಾರ್ತಾತ್. (ಹಾಂಗಾ ಸಕಯ್ಲ್ ದಾಕ್ಲೊ ದಿಲಾ ಪಳಯಾ…) ತೇಂಚ್ ತುಮಿ ಹೆರ್ ಸಮಡ್ತೆಚ್ಯಾ ವ್ಹಡಿಲಾಂಕ್, ಧರ್ಮಾಧಿಕಾರಿಂಕ್ ಮೆಳೊಂಕ್ ವಚಾ. ತೇ ತುಮ್ಕಾಂ ದೊರಿ ಬಾಂದುನ್ ಭಾಯ್ರ್ ರಾವಯ್ನಾಂತ್ಗೀ ?
ಆಮ್ಕಾಂ ಐಪಿಎಸ್, ಐಎಎಸ್ ಜಾಯ್, ಜಾಯ್ ಮ್ಹಣ್ ಅರಾಬಾಯೊ ದಿತಾಂವ್. ಪೂಣ್ ತುಮಿ ವ್ಹಡಿಲ್, ಐಎಎಸ್, ಐಪಿಎಸ್, ವಕೀಲ್, ಪತ್ರಕರ್ತಾಂನಿಂ ಸಾಂಗ್ಲ್ಲೆಂ ಕಿತ್ಲೆಂ ಆಯ್ಕಾತಾತ್ ? ಅಕ್ರೇಕ್ ತುಮ್ಕಾಂ ಜಾಯ್ ‘ಚಿರಿ’ ಚ್ ಮೂ ?
“ಹೀಗಾಗಿ ಕಾಂಗ್ರೆಸಿನ ಸಾಂಪ್ರದಾಯಿಕ ಮತಗಳನ್ನು ತಮ್ಮತ್ತ ಸೆಳೆಯಲು ಬಿಜೆಪಿ ಚರ್ಚ್ ಮುಖ್ಯಸ್ಥರ ಮೂಲಕವೇ ಲಾಬಿ ನಡೆಸಿದೆ….”
ಮಾಧ್ಯಮಾಂ ವಿಶ್ಯಾಂತ್ ಮಂಗ್ಳುರ್ ವಾ ಉಡುಪಿ ದಿಯೆಸೆಜಿಚಿ ಪರಿಸ್ಥಿತಿ 2008 ಪ್ರಾಸ್ ಚಡ್ ಪಾಡ್ ಆಸಾ ಮ್ಹಣ್ಚ್ಯಾಕ್ ಮಂಗ್ಳುರಾಂತ್ ಜೆರೊಸಾ ಘಡಿತಾ ವೆಳಾರ್ ಆನಿ ಉಡುಪಿಂತ್ ಎಕಾ ಯಾಜಕಾನ್ ಕೆಲ್ಲ್ಯಾ ಜಿವ್ಘಾತಾವೆಳಾರ್ – ದಿಯೆಸೆಜಿಚ್ಯಾ ಪತ್ರಾಂನಿ ನುತ್ತಾ ಬಸ್ಲ್ಲಿ ಗಜಾಲ್ ಪಳೆವ್ನ್ ಪಾರ್ಕಿಯೆತ್. ಸತ್ ಗಜಾಲ್ ಸಾಂಗೊಂಕ್ ನಾಕಾ ಜಾಲ್ಯಾರ್, ತರ್ ಹಿಂ ಪತ್ರಾಂ ಆಸ್ಚಿಂ ಕಿತ್ಯಾಕ್ ? ಗೋಳಿಬಜೆ ಬಾಂದುನ್ ದೀಂವ್ಕ್ ? ವ್ಹಡಿಲಾಂನಿ ಫಕತ್ ಕೌಂಟರ್ ನೆರೆಟೀವ್ ಮ್ಹಣ್ ಉಲಯ್ಲ್ಯಾರ್ ಪುರೊ ? ಭಾಯ್ಲ್ಯಾಂಕ್ ನಾಕಾ, ಆಮ್ಚ್ಯಾ ಲೊಕಾಕ್ ತರೀ ಸತ್ ಗಜಾಲ್ ಸಾಂಗ್ಚಿ ನಾಕಾ? ಆದ್ಲೊ ಮಂಗ್ಳುರ್ಚೊ ಬಿಸ್ಪ್ ವ್ಹಡ್ಲೊ ಭುಂಯ್ ಮಾಲೀಕ್, ನಿವೃತ್ತೆ ಉಪ್ರಾಂತ್ ರಾವೊಂಕ್ ಸತ್ರಾ ಕರೊಡಾಂಚೊಂ ಬೊಂಗ್ಲೊಂ ಬಾಂದುನ್ ಆಸಾ ಮ್ಹಣ್ ಫೇಕ್ ನೆರೆಟೀವ್ ಬಾಂದ್ತಾನಾ, ದಿಯೆಸೆಜಿಚಿಂ ಅಧಿಕೃತ್ ಮಾಧ್ಯಮಾಂ ಕಿತ್ಯಾಕ್ ಉಲಯ್ಲಿಂ ನಾಂತ್ ? ಖಂಯ್ ಗೆಲೆಂ ಕೌಂಟರ್ ನೆರೆಟೀವ್?
ಮ್ಹಾಕಾ ಸಾಂಗೊಂಕ್ ಮುಲಾಜ್ ನಾ – 2008 ವ್ಯಾ ವರ್ಸಾ ರಾಕ್ಣೊ ಪತ್ರಾಚೊ ಸಂಪಾದಕ್ ಜಾವ್ನ್ ಆಸ್ಲೆಲ್ಯಾ ಫಾ| ಫ್ರಾನ್ಸಿಸ್ ರೊಡ್ರಿಗಸಾಕ್ ಆಸ್ಲಲೆಂ ಚಿಮ್ಟಿಭರ್ ಧಯ್ರ್ ಆಯ್ಚ್ಯಾಂಕ್ ನಾ! ತವಳ್ ಸಯ್ತ್ ರಾಕ್ಣೊ ದಫ್ತರಾಂತ್ ಸೀಮಿತ್ ಶಿಬಂದಿ ಆಸ್ಲಿ. ಸಂಪಾದಕಾನ್ ಆಮ್ಚೆ ತಸಲ್ಯಾ ಥೊಡ್ಯಾಂಚಿಂ ಮಜತ್ ಘೆವ್ನ್ ರಾತ್ ದೀಸ್ ಕಾಮ್ ಕರುನ್, ಧರ್ಮಾಂದ್ಳ್ಯಾಂಚ್ಯಾ ಕಾಲ್ಸಿಂತ್ ಕ್ರಿಸ್ತಾಂವ್ ರಗತ್ ಮ್ಹಳ್ಳ್ಯಾ ನಾಂವಾನ್ ಏಕ್ ವಿಶೇಸ್ ಅಂಕೊ ಫಾಯ್ಸ್ ಕೆಲೊ ಮಾತ್ ನಯ್, ಚಡಿತ್ ಪ್ರತಿಯೊ ಛಾಪುನ್ ದಿಯೆಸೆಜಿಚ್ಯಾ ಚಡಾವತ್ ಫಿರ್ಗಜಾಂನಿ ಆಯ್ತಾರಾಚ್ಯಾ ಮಿಸಾ ಉಪ್ರಾಂತ್ ಫುಂಕ್ಯಾಕ್ ವಾಂಟ್ಲ್ಯೊ. ಕರ್ಪ್ಯೂ ಆಸ್ತಾನಾಂಯ್ ಪ್ರೆಸ್ ಕಾರ್ಡ್ ಘೆವ್ನ್ ಕಲಾಕಾರ್ ವಿಲ್ಸನ್ ಕಯ್ಯಾರ್ ಆನಿ ತವಳ್ಚೊ ಸಹ ಸಂಪಾದಕ್ ಟೋನಿ ಫೆರೋಸ್, ವಿಲ್ಸನ್ ಕಟೀಲ್ ಕುಲ್ಶೇಕರ್, ವಾಮಂಜೂರ್, ಮಿಲಾರ್, ಪೆರ್ಮನ್ನೂರ್ ಮ್ಹಣ್ ಬೈಕಾರ್ ಧಾಂವೊನ್ ರಾಕ್ಣೊ ಪತ್ರಾಚ್ಯಾ ಕ್ಯಾಮೆರಾಂತ್ ಕಾಡ್ಲ್ಲ್ಯೊ ತಸ್ವಿರ್ಯೊ ಸೋಮಶೇಖರ್ ಆಯೋಗಾಕ್ ದಾಖಲ್ ಕರುಂಕ್ ಉಪ್ಕಾರಿ ಜಾಲೆ. ಐಎಎಸ್. ಐಪಿಎಸ್ ನಯ್, ಅಶೆಂ ಗ್ರೌಂಡಾರ್ ಕಾಮ್ ಕರ್ಚೆ ಮನಿಸ್ ಆಜ್ ಆಮ್ಚೆಲಾಗಿಂ ಕಿತ್ಲೆ ಆಸಾತ್ ?
ಧರ್ಮಾಂದ್ಳ್ಯಾಂಚ್ಯಾ ಕಾಲ್ಸಿಂತ್ ಕ್ರೀಸ್ತಾಂವ್ ರಗತ್ ಮ್ಹಣ್ ಮುಖ್ಪಾನಾರ್ ಛಾಪುನ್ ಅಂಕೊ ಕಾಡ್ಲ್ಲೆ ಫಾ| ಫ್ರಾನಿಸಾ ತಸಲೆ ವಾ ಅದ್ವಾನಿ ದೇಶ್ಭರ್ ರಥಾಯಾತ್ರಾ ಕರುನ್ ಭಂವ್ತಾನಾ ಜಾಂವ್ಚೊ ರಗ್ತಾಪಾತ್ ಪಳೆವ್ನ್ ಅಡ್ವಾನಿಚ್ಯೊ ರಗ್ತಾಯಾತ್ರಾ ಮ್ಹಣ್ ರಾಕ್ಣೊರ್ ಸಂಪಾದಕೀಯ್ ಬರಂವ್ಚೆಂ ಧಯ್ರ್ ಘೆತ್ಲ್ಲ್ಯಾ ಫಾ| ಸಾಮ್ವೆಲಾ ತಸಲೆ ದಯ್ರಾದೀಕ್ ಸಂಪಾದಕ್ ಖಂಯ್ ಆಸಾತ್ ? ಫಾ| ಸಾಮ್ವೆಲ್ ಸಂಪಾದಕ್ ಅಸ್ತಾನಾ ರಾಕ್ಣೊ ಪತ್ರಾಕ್ ದಕ್ಷಿಣ ಕನ್ನಡ ಕಾರ್ಯನಿರತ್ ಪತ್ರಕರ್ತಾಂಚ್ಯಾ ಸಂಘಾಂತ್ ಸಾಂದೆಪಣ್ ಆಸ್ಲೆಂ, ಪ್ರೆಸ್ಕ್ಲಬಾಂತ್ ಜಾಂವ್ಚ್ಯಾ ಪತ್ರಿಕಾ ಗೋಷ್ಠಿಕ್ ರಾಕ್ಣೊಚೆ ಪತ್ರ್ಕಾರ್ ಹಾಜರ್ ಜಾತಾಲೆ. ಆಜ್ ಆಮ್ಕಾಂ ಆಮ್ಚೆಂಚ್ ಮಾಧ್ಯಮ್ ಜಾಯ್, ಪತ್ರ್ ಜಾಯ್ ಮ್ಹಣ್ಚಿ ಪರಿಸ್ಥಿತಿ ಖಂಯ್ಸರ್ ಪಾವ್ಲ್ಯಾ ಮ್ಹಳ್ಯಾರ್ ಆರ್ಎನ್ಐ (ಪಿಆರ್ಜಿಐ) ಸಾರ್ಕಿ ನೋಂದಣಿ ನಾಸ್ತಾನಾ ದಿಯೆಸೆಜಿಚಿಂ (ಆಮ್ಚಿಂ) ಪತ್ರಾಂ ಬೆಕಾಯ್ದ್ಯಾಶೀರ್ ಚಲ್ತೇ ಆಸಾತ್. ಉಡುಪಿ ದಿಯೆಸೆಜಿಚೆಂ ಪತ್ರ್ ಡಿಫಂಕ್ಟ್ ಜಾಲಾಂ. (ಸಕಯ್ಲ್ ದಿಲ್ಲೊ ದಾಕ್ಲೊ ಪಳಯಾ) ಮಂಗ್ಳುರ್ ದಿಯೆಸೆಜಿಚೆಂ ಪತ್ರ್ ದುಬಾಶಿ ತರೀ ಕೊಂಕ್ಣಿ ಮ್ಹಣ್ ಚಲ್ತಾ. ಸಂವಾದಾ ವೆಳಾರ್ ಆಮ್ಚ್ಯಾ ಇಗರ್ಜಾಂಚಿಂ ದಸ್ತಾವೆಜಾಂ ಸಾರ್ಕಿಂ ನಾಂತ್ ಸಾರ್ಕಿಂ ಕರಿಜೆ ಮ್ಹಳ್ಳೊ ಪ್ರಸ್ತಾಪ್ ಆಯ್ಲೊ, ಫಕತ್ ಇಗರ್ಜಿಚಿಂ ದಸ್ತಾವೆಜಾಂ ಮಾತ್ರ್ ನಯ್, ದಿಯೆಸೆಜಿನ್ ಆನಿ ಧಾರ್ಮಿಕಾಂನಿ ಚಲಂವ್ಚ್ಯಾ ಖಂಯ್ಚ್ಯಾಯ್ ಪತ್ರಾಂಚಿಂ ದಸ್ತಾವೆಜಾಂ ಆನಿ ನೊಂದಾವ್ಣಿ ಸಾರ್ಕಿಂ ನಾ. ಕೊಣೆ ಎಕ್ಲ್ಯಾನ್ ದೂರ್ ದಿಲ್ಯಾರ್ ಪತ್ರ್ ಬಂದ್ ಆನಿ ಲಾಕಾಂನಿ ದಂಡ್. ಹಾಂಗಾ ಐಎಎಸ್, ಐಪಿಎಸ್ ರಾಕೊಂಕ್ ಯೆತಿತ್ ಮ್ಹಳ್ಳಿ ಕಸಲೀಯ್ ಗ್ಯಾರಂಟಿ ನಾ. ವಕೀಲ್ಚ್ ಜಾಯ್ ಪಡ್ತಿತ್.
ಬದಲ್ಲೆಲ್ಯಾ ಕಾಳಾರ್ ಕ್ರೀಸ್ತಾಕ್ ಸಾಕ್ಸ್ ಜಾಂವ್ಕ್ ‘ಫಯರ್ ಎಕ್ಸ್ಟ್ವಿಂಗರ್ಸ್’ ತಯಾರ್ ಕರುನ್ ವಣದಿಕ್ ಖೊವವ್ನ್ ದವರ್ಲ್ಯಾರ್ ಪಾವಾನಾಂತ್, ವ್ಹಡಿಲಾಂಕ್ ಆನಿ ಮುಕೆಲ್ಯಾಂಕ್ ಉಲಯ್ಜೆ ಜಾಲ್ಲ್ಯಾ ಜಾಲ್ಯಾರ್ ಉಲಂವ್ಚೆಂ ಗಿನ್ಯಾನ್ ಆನಿ ಸತ್ ಸಾಂಗ್ಚೆ ಧಯ್ರ್ ಆಸುಂಕ್ ಜಾಯ್.
ತೇಂ ನಾಂ ಜಾಲ್ಯಾರ್ ಐಎಎಸ್, ಐಪಿಎಸ್ ಜಾಯ್, ಕೆಎಎಸ್ ಜಾಯ್, ಜಡ್ಜ್ ಜಾಯ್, ವಕೀಲ್ ಜಾಯ್, ಪತ್ರ್ಕಾರ್ ಜಾಯ್ ಮ್ಹಣ್ ರುದಾನ್ ಕರ್ಚೆಂ ಪಡ್ತಲೆಂ. ಹ್ಯಾ ರುದಾನಾ ಬದ್ಲಾಕ್ ಆಮ್ಚ್ಯಾ ಸಮುದಾಯಾಕ್ ಏಕ್ ಅಂಬಾನಿ ಆನಿ ಏಕ್ ಅದಾನಿ ದೀ ದೆವಾ ಮ್ಹಣ್ ಮಾಗ್ಲ್ಯಾರ್ ಸಗ್ಳೆಂ problem solve ಜಾತೆಲೆಂ. ಸಬ್ ಛಂಗಾ ಸೀ. ಮಾಗೀರ್ ತೋ ವಾ ತೆ ಸಗ್ಳೆಂ ಪಳೆವ್ನ್ ಘೆತಲೆ , ಬ್ಯೂರೊಕ್ರಸಿ, ಜುಡಿಷಿಯರಿ, ಮೀಡಿಯಾ, ಶೇರ್ ಬಜಾರ್ ಸಯ್ತ್ …
ಬದಲ್ಚ್ಯಾ ಭಾರತಾಂತ್, ಕ್ರಿಸ್ತಾಂವ್ ಸಮಾಜ್ ಫಾ| ಪ್ರವೀಣಾನ್ ಸುಚಾಯಿಲ್ಲ್ಯಾ, ಅಸಲ್ಯಾ ಎಕಾ ಕ್ರಾಂತಿಕಾರಿ ಬದ್ಲಾವಣೆಕ್ ತಯಾರ್ ಆಸಾ?
■ ಎಚ್ಚೆಮ್, ಪೆರ್ನಾಲ್
6 comments
ಹಾಂವೆಂ ವಾಚ್ಲೆಂ. ವಿಶ್ಲೇಷಣ್ ಸಾರ್ಕೆಂ ಆಸಾ. ಸತ್ ಸಾಂಗೊಂಕ್ ಧಯ್ರ್ ಜಾಯ್.
Clear picture of which direction is Konkani language and affairs are going. Is there a future for our language, especially in Mangalore? Hope there is!
This is a direct question to the heads of diocese. Are we ready to counter when the real situation arises? Our clergy and laity leaders insist on having our own IAS, IPS officers. But the moment they become officers they will be transferred somewhere else, So what’s the point? A lot to think about and most importantly act upon. Merely coming after all the incident is over and trying to be a great community leaders is of no use.
Very good detailed analysis. It’s a good recap of events that occurred in last 15 years or so…
A mirror to reality… Hats off…
HM Pernal has rightly shown mirror to all the so called ‘community leaders’ who develop cold feet when the community faces onslaught as mentioned by HM. We need persons with upright reputation and conviction to stand against those who try to intimidate the community by various ways. We require bold journalists who can counter false propaganda and present counter narrative to uphold truth and integrity of the community.
ಮ್ಹಜಿಂ ಸವಲಾಂ ಆನಿಂ ಅಭಿಪ್ರಾಯ್:
1. ಕೊಂಕ್ಣಿ ಕಥೊಲಿಕ್ ವಕೀಲ್ ಸಂಘಾಂತ್ ಕಿತ್ಲೆ ಯಾಜಕ್ ಆಸಾತ್? ನಾಂತ್ ತರ್, ವೇದಿರ್ ಇತ್ಲೆ ಯಾಜಕ್ ಕಿತ್ಯಾಕ್?
2. ದಿಯೆಸೆಜಿಚ್ಯಾ ಲಾಯಿಕ್ ಆಯೋಗಾಚ್ಯೆ ಪದಾಧಿಕಾರಿ ಲಾಯಿಕ್-ಗೀ, ಯಾಜಕ್? ಜರ್ ಲಾಯಿಕ್, ತಾಂಚ್ಯಾ ಪ್ರತಿನಿಧಿಂಕ್ ವೇದಿ ದಿವ್ಯೆತಿ.
3. ಬದಲ್ಚ್ಯಾ ಕಾಳಾರ್ ಕ್ರಿಸ್ತಾಕ್ ಸಾಕ್ಸ್ ಜಾಂವ್ಚೆಂ ಕಶೆಂ?: ಹೊ ವಿಶಯ್ ಧಾರ್ಮಿಕ್-ಗೀ, ಸಮಾಜಿಕ್-ಗೀ, ಆರ್ಥಿಕ್-ಗೀ ವ ರಾಜಕೀಯ್? ಜರ್ ಧಾರ್ಮಿಕ್, ಕೊಮೆಂಟ್ ಕರುಂಕ್ ಹಾಂವ್ ಯೋಗ್ಯ್ ನಹಿಂ. ಸಮಾಜಿಕ್, ಆರ್ಥಿಕ್ ವ ರಾಜಕೀಯ್, ಕಾರ್ಡಿನಲ್, ಭಿಸ್ಪ್ ಆನಿಂ ಯಾಜಕ್ ಯೋಗ್ಯ್ ನಹಿಂ. ಅಮ್ಚೆ ಮಧೆಂ ವಿಷಯ್ ತಜ್ಞ ಆಸಾತ್.
4. ಅಂಬಾನಿ ಆನಿಂ ಅದಾನಿ ಪ್ರಸ್ತುತ್ ಸರ್ಕಾರಾಚ್ಯೆ ಸಂಪುಟಾಧಿಪತಿ (Oligarchs) ಅಸ್ಯೆತ್. 140 ಕರೋಡ್ ಆಬಾದಿಂತ್ ಹೆ ಬೊಟಾಂನಿಂ ಮೆಜ್ಯೆತ್ ತಿತ್ಲೆ. ಜೆರಾಲ್ ಹಂತಾರ್, ನಾಮ್ಣೆಚ್ಯೆ ಮಂಗ್ಳೂರಿ ಕೊಂಕ್ಣಿ ಕಥೊಲಿಕ್ ಉದ್ಯಮಿ ಆಸಾತ್. ತಾಂಚಿ ವಳೊಕ್ ಸಮುದಾಯಾಕ್ ನಾಂ. ಕರಾವಳಿ ಜಿಲ್ಲ್ಯಾಂಚ್ಯಾ ಮೂಳಾಚ್ಯೆ ಉದ್ಯಮಿ ಆದಾರಾಥಿ (hospitality), ರೀಯಲ್ ಎಸ್ಟೇಟ್ ಡಿವೆಲಪ್ಮೆಂಟ್, ಶಿಕ್ಪಾ ಕ್ಷೇತ್ರ್ ಇತ್ಯಾದಿ ಶೆತಾಂನಿಂ ಆಪ್ಲಿಚ್ ಐಡೆಂಟಿಟಿ ಜೊಡ್ನ್ ಆಸಾತ್.
5. ಆಮ್ಚಿಂ ಸಮುದಾಯಿಕ್ ಸಂಘಟಣಾಂ ಯಾಜಕ್ ವರ್ಗಾಚ್ಯಾ ಮುಠಿ ಬಿತರ್, ಹೆಬ್ಬೆಟಾ ಪಂದಾ ಅಡ್ಚೊನ್ ಪಡ್ಲ್ಯಾಂತ್. ಹ್ಯಾ ಸಂಘಟಣಾಚ್ಯೆ ಪದ್ವೆದಾರ್ ಲೋಕ್-ಶಾಹಿ ಖಂಡಿತ್ ನಹಿಂ. ತೆ ಸಮೂದಾಯಾಚ್ಯೆ ವಿಂಚ್ಲೆ
6. ಅಸಲೆ ಪ್ರತಿನಿಧಿ ನಹಿಂ ಬಗಾರ್ ಯಾಜಕಿ ವರ್ಗಾಚ್ಯೆ ನಾಮಾಂಕಿತ್ ಉಂದಿರ್.
7. ಸಮೂದಾಯಾಚ್ಯೆಂ ಸಾಲ್ವಸಾಂವ್ ಯಾಜಕಿ ವರ್ಗಾಚ್ಯಾ ಕಂಟ್ರೊಲಾ ಥಾವ್ನ್ ಭಾಯ್ರ್ ಯೆಂವ್ಚ್ಯಾಂತ್ ಆಸಾ. ಸಡ್ಡ್ಯಾಲ್ ತಸಲಿಂ ಖೂಣಾಂ ದಿಸಾನಾಂತ್.