ದೆವಾಚ್ಯಾ ಶಿಲ್ಪಕಾರಾಚೆಂ ಶಿಲ್ಪ್ – ಬಾರ್ಸಲೋನಾ

264

ಹ್ಯಾ ಪಾವ್ಟಿಂಚ್ಯಾ ಗಿಮಾಳ್ ರಜೆಂತ್ ಆಮಿ ಮತಾಯಸ್ ಆನಿ ಪಾಯ್ಸ್ ಕುಟ್ಮಾನ್ ಬಾರ್ಸಲೋನಾ ಆನಿ ಸಲೂ ಪ್ರವಾಸಾಚೊ ನಿರ್ಣಯ್ ಘೆತ್ಲೊ. ಬಾರ್ಸಲೋನಾ ಸ್ಪೇನಾಂತ್ಲೆಂ ದುಸ್ರೆಂ ವ್ಹಡ್ಲೆಂ ಶಹರ್, ಪಯ್ಲೆಂ ಮಡ್ರಿಡ್. ಹೆಂ ಆಧುನಿಕ್ ಕಲೆಕ್ ಆನಿ ಸಾಂಸ್ಕೃತಿಕ್ ಇತಿಹಾಸಾಕ್ ನಾಂವಾಡ್ಲಾಂ. ಸ್ವತಂತ್ರ್ ಸಮುದಾಯ್ ಜಾವ್ನಾಸ್ಚ್ಯಾ ಕ್ಯಟಲೋನಿಯಾಚಿ ರಾಜಧಾನಿ ಜಾವ್ನಾಸಾ ಬಾರ್ಸಲೋನಾ. ಥಂಯ್ಸರ್ ಸರಿ ಸುಮಾರ್ 1.6 ಮಿಲಿಯನ್ ಲೋಕ್ ಶಹರಾಂತ್ ವಸ್ತಿ ಕರ್ತಾ ತರ್ 5 ಮಿಲಿಯನ್ ಲೋಕ್ ಶಹರಾ ಭಾಯ್ರ್ ವಸ್ತಿ ಕರ್ತಾ. ಹಾಂಗಾಚೊ ಲೋಕ್ ಕ್ಯಾಟಲಾನ್ ತಶೆಂಚ್ ಸ್ಪ್ಯಾನಿಶ್ ಭಾಸ್ ಉಲಯ್ತಾ. ಬಾರ್ಸಲೋನಾಂತ್ ಆಮ್ಕಾಂ ಆದ್ಲಿ ತಶೆಂಚ್ ಆಧುನಿಕ್ ಸಂಸ್ಕ್ರತಿ ಪಳೆಂವ್ಕ್ ಮೆಳ್ತಾ. ರೋಮನ್ ಕಾಳಾಚಿಂ ಬಾಂದ್ಪಾಂ ತಶೆಂಚ್ ಅಧುನಿಕ್ ಮೊಳ್ಬಾಕ್ ತೆಂಕ್ಚ್ಯಾ ಬಾಂದ್ಪಾಂಚೆಂ ಮೆಳಾಪ್ ದೆಕ್ತೆಲ್ಯಾಚಿ ಲೋಂವ್ ನೀಟ್ ಕರ್ತಾ.

ಸಗ್ರಾಡಾ ಫೆಮಿಲಿಯಾ, ಪಾರ್ಕ್ ಗ್ವೆಲ್ಲ್, ಲಾ ರಾಂಬ್ಲಾ, ಎಫ್. ಸಿ ಬಾರ್ಸಲೋನ ಫುಟ್ಬಾಲ್ ಸ್ಟೇಡಿಯಮ್, ಟೊರ್ರೆ ಗ್ಲೋರಿಯಸ್ ಹಾಂಗಾಚೆ ಪ್ರಮುಖ್ ಪ್ರವಾಸಿ ಆಕರ್ಶಣಾಚೆ ಜಾಗೆ ಜಾವ್ನಾಸಾತ್. ಬಾರ್ಸಲೋನಾ ಬಂದರ್ ಮೆಡಿಟರೇನಿಯನಾಂತ್ಲೆಂ ವ್ಯಸ್ತ್ ಬಂದರ್ ಜಾವ್ನಾಸಾ. ದೆಕುನ್ ಹೆಂ ಶಹರ್ ಆರ್ಥಿಕ್ ಆನಿ ಸಾಂಸ್ಕ್ರತಿಕ್ ಕಲೆಚೆಂ ಕೇಂದ್ರ್ ಜಾವ್ನ್ ನಾಂವಾಡ್ಲಾಂ.

ಅಂತೋನಿ ಗೌಡಿ ಬಾರ್ಸಲೋನಾಚೊ ಪ್ರಮುಖ್ ಶಿಲ್ಪ್ ಕಾರ್ ಜಾವ್ನಾಸಾ. ಹಾಚೆಂ ಜನನ್ ಜೂನ್ 25, 1852. ಹಾಚಿ ಶಿಲ್ಪ್ ಕಲಾ ಪಳೆಂವ್ಕ್ ದೋನ್ ದೋಳೆ ಪಾವಾನಾಂತ್. ಗೌಡಿಚೊ ಗೂಂಡ್ ಕಥೊಲಿಕ್ ಭಾವಾಡ್ತ್ ಆನಿ ಆಧ್ಯಾತ್ಮಿಕ್ ಬಾಂದ್ಪಾಂ ಬಾಂದ್ಚ್ಯಾ ರೀತಿನ್ ಗೌಡಿಕ್ “ದೇವಾಚೊ ಶಿಲ್ಪ್ ಕಾರ್” ಮ್ಹಳ್ಳೆಂ ಬಿರುದ್ ಲಾಬ್ಲಾಂ.

ಗೌಡಿನ್ ಕೇವಲ್ ಬಾಂದ್ಪಾಂ ಬಾಂದುಂಕ್ ನಾಂತ್, ತಾಣೆಂ ಜೀವಂತ್ ಕಲಾ ರಚ್ಲ್ಯಾ ಮ್ಹಣ್ ಚರಿತ್ರಾ ಸಾಂಗ್ತಾ. ತಾಚ್ಯಾ ಶಿಲ್ಪ್ ಕಲೆ ದ್ವಾರಿಂ ಆಜ್ ಬಾರ್ಸಲೋನಾ ಏಕ್ ಅದ್ವಿತೀಯ್ ಶಹರ್ ಜಾವ್ನ್ ನಾಂವಾಡ್ಲಾಂ ಆನಿ ಮಿಲಿಯನ್ ಪ್ರವಾಸಿ ಹ್ಯಾ ಶಹರಾಕ್ ಭೆಟ್ ದಿತಾತ್ – ಫಕತ್ ಗೌಡಿಚಿ ಕಲಾ ಪಳೆಂವ್ಕ್. ತಾಚ್ಯಾ ಕಲೆ ಥಾವ್ನ್ ನಿರ್ಮಾಣ್ ಜಾಲ್ಲಿಂ ಬಾಂದ್ಪಾಂ ಸಾಗ್ರಾಡಾ ಫೆಮಿಲಿಯಾ (1882 – ಪ್ರಸ್ತುತ್) ಪಾರ್ಕ್ ಗ್ವೆಲ್ಲ್ (1900 – 1914) ಕಾಸಾ ಬಾಟ್ಲೊ (1904 – 1906) ಕಾಸಾ ಮೀಲಾ, ಲಾ ಪೆದ್ರೆರಾ (1906 – 1912) ಪಾಲಾವ್ ಗ್ವೆಲ್ಲ್ (1886 – 1888 ) ಕೊಲೋನಿಯಾ ಗ್ವೆಲ್ಲ್ (1890).

[blockquote align=”none” author=””]ಸಗ್ರಾಡಾ ಫೆಮಿಲಿಯಾ[/blockquote]

ಅಂತೊನಿ ಗೌಡಿಚ್ಯಾ ಬಾಂದ್ಪಾ ಪಯ್ಕಿಂ ಪ್ರಸಿದ್ಧ್ ಹಿ ಬೆಸಿಲಿಕಾ ಸಗ್ರಾಡಾ ಫೆಮಿಲಿಯಾ. ಹೆಂ ಗೌಡಿಚೆಂ ಮಾಸ್ಟರ್ ಪೀಸ್ ಆನಿ ಬಾರ್ಸಲೋನಾಚೆಂ ಐಕೋನಿಕ್ ಲ್ಯಾಂಡ್ ಮಾರ್ಕ್ ಮ್ಹಣ್ ನಾಂವಾಡ್ಲಾಂ. ಹಾಚೆಂ ಕಾಮ್ ಸುಮಾರ್ 150 ವರ್ಸಾಂ ಥಾವ್ನ್ ಚಲೊನ್ ಆಸಾ. ಹೆಂ ಬಾಂದಾಪ್ ತಯಾರ್ ಜಾಂವ್ಕ್ ಅನಿಕೀ ಚಡುಣೆಂ ಪಾಂಚ್ ಥಾವ್ನ್ ಧಾ ವರ್ಸಾಂ ಲಾಗ್ತೆಲಿಂ ಮ್ಹಣ್ತಾತ್. ಹೆಂ ಬಾಂದಾಪ್ ಸಂಪ್ತಾನಾ ಹ್ಯಾ ಬೆಸಿಲಿಕಾಕ್ 18 ಬುರುಜ್ ಅಸ್ತಾಲೆ. 12 ಅಪೊಸ್ತಲಾಂಕ್, 4 ಇವ್ಯಾಂಜಲಿಸ್ತಾಂಕ್, ಏಕ್ ಮರಿಯೆಕ್ ಆನಿ 172.5 ಮೀಟರ್ ಲಾಂಬ್ ಆಸ್ಚೆಂ ಬುರುಜ್ ಜೆಜು ಕ್ರೀಸ್ತಾಕ್. ದೆಕುನ್ ಹಿ ಇಗರ್ಜ್ ಸಂಸಾರಾಂತ್ಲ್ಯಾ ಸರ್ವ್ ಇಗರ್ಜಾಂ ಪಯ್ಕಿಂ ವ್ಹಡ್ಲಿ ಜಾವ್ನಾಸಾ. ಹಾಚೊ ಅಕಾರ್ ಮೊಂವಾಚ್ಯಾ ಕಂಗಿ ಬರಿಂ ಅಸೊನ್ ತಾಂತುನ್ ಬೈಬಲಾಂತ್ಲೆ ಕಾಣಿಯೊ ಕಾಂತಯ್ಲ್ಯಾತ್.

ಗೌಡಿನ್ ಅಪ್ಲ್ಯಾ ಜಿಣಿಯೆಚಿಂ ಅಖ್ರೇಚಿ ಪಂದ್ರಾ ವರ್ಸಾಂ ಸಂಪೂರ್ಣ್ ಥರಾನ್ ಹ್ಯಾ ಇಗರ್ಜೆಚ್ಯಾ ಬಾಂದ್ಪಾ ಖಾತಿರ್ ಖರ್ಚಿಲ್ಯಾಂತ್. ಇತ್ಲೊ ವಡ್ಲೊ ಶಿಲ್ಪ್ ಕಲಾಕಾರ್ ತರೀ ಬೊವ್ ಚ್ ಸಾದಿ ತಾಚಿ ಜಿಣಿ. ಆಮಿ ಬಾರ್ಸಲೋನಾ ಬಸ್ಸ್ ಭಂವ್ಡೆರ್ ಆಸ್ತಾನಾ ಬಸ್ಸ್ ಟೂರ್ ಕಮೆಂಟ್ರಿಚೆರ್ ತಾಣೆ ಮರಣ್ ಪಾವ್ ಲ್ಲಿ ರೀತ್ ಆಯ್ಕೊನ್ ಮಸ್ತ್ ಬೆಜಾರಾಯ್ ಬೊಗ್ಲಿ. ಜೂನ್ 7, 1926 ಸಾಂಜೆರ್ ಸಗ್ರಾಡಾ ಫೆಮಿಲಿಯಾ ಇಗರ್ಜೆಕ್ ಮಾಗ್ಣೆಂ ಕರುಂಕ್ ವೆತಾಸ್ತಾನಾ ರಸ್ತೊ ಉತರ್ತಾನಾ ಟ್ರಾಮಾಕ್ (ಟ್ರೈನ್) ಅಪ್ಟಾಲೊ. ಸಾದ್ಯಾ ವಸ್ತುರಾರ್ ತೊ ಆಸ್ ಲ್ಲ್ಯಾನ್ ವಾಟೆರ್ ವೆತೆಲ್ಯಾನಿಂ ಆನಿ ಪೊಲಿಸಾಂನಿ ತೊ ಬಿಕಾರಿ ಮ್ಹಣ್ ಲೆಕುನ್ ತಾಕಾ ತುರ್ತ್ ಚಿಕಿತ್ಸಾ ಲಾಬ್ಲಿ ನಾಂ. ಥೊಡ್ಯಾ ವೇಳಾನ್ ತಾಕಾ ದುಬ್ಳ್ಯಾಂಕ್ ಚಿಕಿತ್ಸಾ ದಿಂವ್ಚ್ಯಾ ಆಸ್ಪತ್ರೆಕ್ ವೆಲೊ. ಕ್ರಮೇಣ್ ತ್ಯಾ ಇಗರ್ಜೆಚ್ಯಾ ಪಾದ್ರ್ಯಾಬಾನ್ ತಾಚಿ ವಳಕ್ ದರುನ್ ತಾಕಾ ಬರಿ ಚಿಕಿತ್ಸಾ ಲಾಬಯ್ತಾನಾ ವೇಳ್ ಉತ್ರಾಲ್ಲೊ. ಜೂನ್ 10,  1926 , ಸತ್ತರ್ ಆನಿ ತೀನ್ ವರ್ಸಾಂಚ್ಯಾ ಪ್ರಾಯೆರ್ ತೊ ಮರಣ್ ಪಾವ್ಲೊ. ಸಾಗ್ರಾಡಾ ಫೆಮಿಲಿಯಾ ಇಗರ್ಜೆ ಖಾತಿರ್ ತಾಣೆ ಆಪ್ಲೊ ಜೀವ್‌ಚ್ ಸಮರ್ಪಿಲ್ಲೊ, ದೆಕುನ್ ತ್ಯಾ ಇಗರ್ಜೆಚ್ಯಾ ಅಂಡರ್ ಗ್ರೌಂಡಾಂತ್ ತಾಚಿ ಕೂಡ್ ನಿಕೆಪಿಲ್ಯಾ. ತಾಚ್ಯಾ ಮೊರ್ನಾಕ್ ಹಜಾರಾಂನಿ ಲೋಕ್ ಇಗರ್ಜ್ ಭರೊನ್ ರಸ್ತ್ಯಾರ್ ಉಬೊ ಆಸ್‌ಲ್ಲೊ ಮ್ಹಣ್ ತ್ಯಾ ಕಮೆಂಟ್ರಿಂತ್ ಆಮಿ ಆಯ್ಕಾಲೆಂ.

[blockquote align=”none” author=””]ಪಾರ್ಕ್ ಗ್ವೆಲ್ಲ್[/blockquote]

ಪಾರ್ಕ್ ಗ್ವೆಲ್ಲ್ ಬಾರ್ಸಲೋನಾಚೆಂ ಅನ್ಯೇಕ್ ಪ್ರವಾಸಿ ಆಕರ್ಶಣ್ ಆನಿ ಗೌಡಿಚ್ಯಾ ಶಿಲ್ಪ್ ಕಲಾ ಥಾವ್ನ್ ಉಬ್ಜಾಲ್ಲೆಂ ಬಾಂದಾಪ್. 1900 ವ್ಯಾ ವರ್ಸಾ ಗ್ರೇಸ್ತ್ ಲೋಕಾಕ್ ಮಾರಗ್ ಘರಾಂಚಿ ಎಸ್ಟೇಟ್ ಜಾವ್ನ್ ಸುರು ಜಾಲ್ಲೆಂ ಹೆಂ ಕಾಮ್ ಕ್ರಮೇಣ್ ವಾಣಿಜ್ಯ್ ಗೊಂದೊಳಾಕ್ ಲಾಗೊನ್ ಪಬ್ಲಿಕ್ ಪಾರ್ಕ್ ಜಾವ್ನ್ ಬದಲ್ಲೆಂ. ರಂಗಾಳ್ ಮೊಸೈಕಾಂತ್ ಬಾಂದ್‌ಲ್ಲೆಂ ಹ್ಯಾ ಬಾಂದ್ಪಾಚೆಂ ಪ್ರವೇಶ್ ದ್ವಾರ್ ಭೊವ್‌ಚ್ ಆಕರ್ಶಿಕ್ ಜಾವ್ನ್ ಬಾರ್ಸಲೋನಾಂತ್ಲಿ ಚಡ್ ಫೊಟೊ ಕಾಡ್ಚಿ ಸುವಾತ್ ಮ್ಹಣ್ ನಾಂವಾಡ್ಲ್ಯಾ.

ಪ್ರವೇಶ್ ಟಿಕೆಟ್ಯೊ ಮಹಿನ್ಯಾ ಪಯ್ಲೆಂಚ್ ವಿಕೊನ್ ವೆತಾತ್ ದೆಕುನ್ ಆಮ್ಕಾಂ ಹ್ಯಾ ಬಾಂದ್ಪಾಚ್ಯಾ ಬಿತರ್ಲಿ ಸೊಭಾಯ್ ಚಾಕ್ಚೆಂ ಭಾಗ್ ಫಾವೊ ಜಾಂವ್ಕ್ ನಾ. ಹಾಚ್ಯಾ ಬಿತರ್ಲಿ ಸಜಾವಟ್ ಝಡಾಂ, ಮನ್ಜಾತ್, ಮಾಟಿಂ, ದೊಂಗೊರ್ ಇತ್ಯಾದಿ. ಪ್ರಕೃತಿಕ್ ಮತಿಂತ್ ದವ್ರುನ್ ಹೆಂ ಬಾಂದಾಪ್ ಗೌಡಿನ್ ಬಾಂದ್ಲಾಂ ಮ್ಹಣ್ತಾತ್. ಗೌಡಿಚೆಂ ಘರ್ ಥಂಯ್ಸರ್ ಆಸಾ. ಥಂಯ್ ತೊ ಸುಮಾರ್ ವೀಸ್ ವರ್ಸಾಂ ವಸ್ತಿ ಕರ್ತಾಲೊ ಆತಾಂ ತೆಂ ಘರ್ ಮ್ಯುಸಿಯಮ್ ಜಾವ್ನ್ ಬದಲ್ಲಾಂ.

[blockquote align=”none” author=””]ಲಾ ರಾಂಬ್ಲಾ[/blockquote]

ಬಾರ್ಸಲೋನಾಚೊ ನಾಂವಾಡ್ದಿಕ್ ಪಾಂಯ್ ವಾಟೆಚೊ ರಸ್ತೊ ಲಾ ರಾಂಬ್ಲಾ. ಹಾಕಾ ಲಾಸ್ ರಾಂಬ್ಲಾಸ್ ಮ್ಹಣೊನೀ ಆಪಯ್ತಾತ್. ಸುಮಾರ್ 1.2 ಕಿಲೊಮೀಟರ್ ಲಾಂಬ್ ಆಸೊನ್, ಪ್ಲಾಕಾ ಡೆ ಕ್ಯಾಟಲುನ್ಯಾ ಆನಿ ಕ್ರಿಸ್ಟೋಫರ್ ಕೊಲಂಬಸ್ ಸ್ಮಾರಕ್ ಆಸ್ಚ್ಯಾ ಪೋರ್ಟ್ ವೆಲ್ ಮ್ಹಳ್ಳ್ಯಾ ಜಾಗ್ಯಾಕ್ ಜೊಡ್ತಾ. ದೋನೂಯ್ ಕುಶಿನಿಂ ರೂಕ್ ಆಸೊನ್ ರೂಂದ್ ಅಸ್ಚ್ಯಾ ಹ್ಯಾ ರಸ್ತ್ಯಾಚ್ಯಾ ಲ್ಯಾಂಪ್ ಪೋಸ್ಟಾಚಿ ಸಜಾವಟ್‌ಯ್ ಗೌಡಿನ್‌ಚ್ ಕೆಲ್ಲಿ. ಹಾಂಗಾಸರ್ ತಾಜಾ ಫಳಾಂಚಿ, ಮಾಸ್ಳೆಚಿ, ಗೊಡ್ಶ್ಯಾ ಖಾಣಾಚಿ ಆನಿ ಟಪಾಸ್ (ಸ್ಪ್ಯಾನಿಶ್ ಖಾಣ್) ಚಿ ಪ್ರಸಿದ್ದ್ ಮಾರ್ಕೆಟ್ ಪಳೆಂವ್ಕ್ ಮೆಳ್ತಾ. ತಶೆಂಚ್ ಫುಲಾಂಚಿ ಸ್ಟೋಲಾಂ ಆನಿ ಬುಕಾಂಚಿಂ ದುಕಾನಾಂಯ್ ಆಸಾತ್. ನಿರ್ಜೀವ್ ಮೂರ್ತಿ ಬರಿಂ ನಟನ್ ಕರ್ಚೆ ರಸ್ತ್ಯಾ ನಟನ್‌ಕಾರ್‌ಯ್ ಹಾಂಗಾ ಪಳೆಂವ್ಕ್ ಮೆಳ್ತಾತ್. ಸಾಂಜೆಚ್ಯಾ ಥಂಡ್ ಹವ್ಯಾಕ್ ಹ್ಯಾ ರಸ್ತ್ಯಾಚಿ ಬೊಂವ್ಡಿ ನಿಜಾಯ್ಕಿ ಮತಿಕ್ ತಶೆಂಚ್ ಕುಡಿಕ್ ಪ್ರಫುಲ್ಲಿತ್ ಕರ್ತಾ. ಆಮಿ ತ್ಯಾ ವಾಟೆನ್ ಚಲ್ತಾನಾ ಪಾವ್ಸ್ ಆಯ್ಲೊ ದೆಕುನ್ ಥಂಯ್ಚೊ ತಸ್ವಿರ‍್ಯೊ ಮ್ಹಜ್ಯಾ ಕ್ಯಾಮರಾಂತ್ ಕೈದ್ ಜಾವ್ನಾಂತ್. ಸಕಯ್ಲ್ ಚಿಡ್ಕಾಯಿಲ್ಲ್ಯಾ ವಿಡಿಯೋಂತ್ ಹಾಚಿ ಝಳಕ್ ಆಸಾ.

[blockquote align=”none” author=””]ಟೊರ್ರೆ ಗ್ಲೋರಿಯಸ್[/blockquote]

ಹ್ಯಾ ಬಾಂದ್ಪಾಂತ್ 38 ಮಾಳಿಯೊ ಆಸೊನ್ ಹಾಚಿ ಉಂಚಾಯ್ 144 ಮೀಟರ್ಸ್. ಹೆಂ ಬಾರ್ಸಲೋನಾಚೆಂ ತಿಸ್ರೆಂ ಊಂಚ್ ಬಾಂದಾಪ್. ಹಾಚಿ ಆಕೃತಿ ಸಿಲಿಂಡರಾ ಬರಿಂ ಆಸ್ಲ್ಯಾನ್ ಹಾಕಾ “ಬಾರ್ಸಲೋನಾಚೆಂ ತೆಂಡ್ಲೆಂ” ಮ್ಹಣ್ ಆಪಯ್ತಾತ್. ಹಾಚಿ ಬಾಯ್ಲಿ ಕೂಸ್ ಚಾಳೀಸಾಂಚ್ಯಾಕೀ ವಯ್ರ್ ರಂಗ್ ಆನಿ 4500 ಎಲ್.ಈ.ಡಿ ವೀಜ್ ದಿವ್ಯಾನಿಂ ರಾತಿಕ್ ಹಾಚಿ ಸೊಭಾಯ್ ದೊಡ್ತಿ ಜಾತಾ.

ಪಯ್ಲೆಂ ಹೆಂ ಬಾಂದಾಪ್ ಶಹರಾಚ್ಯಾ ಉದ್ಕಾಚೆಂ ಹೆಡ್ ಕ್ವಾಟರ್ಸ್ ಜಾವ್ನಾಸ್ಲೆಂ ಆಜ್ ಬಿಜ್ನೆಸ್ ಆಫೀಸ್ ಬಾಂದಾಪ್ ಜಾವ್ನ್ ಬದಲ್ಲಾಂ. 2022 ವ್ಯಾ ವರ್ಸಾ ಹ್ಯಾ ಬಾಂದ್ಪಾಚಿ ತೀಸಾವಿ ಮಾಳಯ್ ಪಬ್ಲಿಕಾಕ್ 360 ಡಿಗ್ರಿ ಬಾರ್ಸಲೋನಾ ನಿರೀಕ್ಶಣ್ ಜಾಗೊ ಜಾವ್ನ್ ಬದಲ್ಲಾ. ಹಾಚೆ ಟಿಕೆಟ್ಯೊಯ್ ಮಹಿನ್ಯಾ ಆದಿಂಚ್ ವಿಕೊನ್ ವೆತಾತ್. ದೆಕುನ್ ಹೊ ಅವ್ಕಾಸ್ ಆಮ್ಕಾಂ ಲಾಬೊಂಕ್ನಾ.

[blockquote align=”none” author=””]ಎಫ್. ಸಿ. ಬಾರ್ಸಲೋನಾ[/blockquote]

ಸಂಸಾರಾಂತ್ಲೆಂ ಅಧಿಕ್ ನಾಂವಾಡ್ದಿಕ್ ಆನಿ ಜಯ್ತೆವಂತ್ ಫುಟ್ ಬಾಲ್ ಕ್ಲಬ್ಬ್ ಎಫ್. ಸಿ. ಬಾರ್ಸಲೋನಾ. ಯುರೋಪಾಂತ್ಲೆಂ ಭೊವ್ ವ್ಹಡ್ಲೆಂ ಸ್ಟೇಡಿಯಮ್ ಕ್ಯಾಂಪ್ ನೋವ್ ಹಾಂಗಾಸರ್ ಆಸಾ. 1957 ವ್ಯಾ ವರ್ಸಾ ಹಾಚೆಂ ಉಗ್ತಾವಣ್ ಜಾಲೆಂ. ಹ್ಯಾ ಸ್ಟೇಡಿಯಮಾಂತ್ 99,000 ಲೋಕಾಕ್ ಬಸ್ಚಿ ವ್ಯವಸ್ಥಾ ಆಸಾ. ಹಾಂಗಾಸರ್ 1982 ವ್ಯಾ ವರ್ಸಾ ವರ್ಲ್ಡ್ ಕಪ್ ಮ್ಯಾಚ್ ಆನಿ 1992 ವ್ಯಾ ವರ್ಸಾ ಒಲಿಂಪಿಕ್ ಖೆಳ್ ಮಾಂಡುನ್ ಹಾಡ್‌ಲ್ಲೆ. ಹೆಂ ಸ್ಟೇಡಿಯಮ್ ಆತಾಂ ನವೀಕರಣ್ ಕರ್ತಾತ್ ಜಾಲ್ಲ್ಯಾನ್ ಥಂಯ್ಸರ್ ಲೋಕಾಕ್ ವಚೊಂಕ್ ಆಡಾಯ್ಲಾಂ. ಸಕಯ್ಲ್ ಚಿಡ್ಕಾಯಿಲ್ಲ್ಯಾ ವಿಡಿಯೋಂತ್ ಹಾಚಿ ಝಳಕ್ ಆಸಾ.

ಕೇಬಲ್ ಕಾರಾಚೆರ್ ಚಡೊನ್ ಸಗ್ಳ್ಯಾ ಬಾರ್ಸಲೋನಾಚೆರ್ ಸುಕ್ಣ್ಯಾ ನದರ್ ಮಾರ್ತಾನಾ, ಸರ್ಗಾರ್‌ಚ್ ಆಸಾಂವ್ ಮ್ಹಳ್ಳ್ಯಾಬರಿಂ ಭೊಗ್ಲೆಂ. ಭೊವ್ ಸೊಬಿತ್ ಶಹರ್ ಹೆಂ. ಉಪ್ರಾಂತ್ ಬಾರ್ಸಲೋನೆಟ್ಟ ಬೀಚಾರ್ ಆಸ್ಚ್ಯಾ ರೆಸ್ಟೊರೆಂಟಾಂತ್ ದರ್ಯಾಚಿ ಸೊಭಾಯ್ ಚಾಕೊನ್ ದೊನ್ಪಾರಾಂಚೆಂ ಜೆವಾಣ್ ಸಂಪಯ್ಲೆಂ.

ಮಾಸ್ಳೆಚೆಂ ಪಯೆಲಾ ಹಾಂಗಾಚ್ಯಾ ಪ್ರಸಿದ್ದ್ ಜೆವ್ಣಾ ಪಯ್ಕಿಂ ಏಕ್. ಮ್ಹಾಕಾ ಭೊವ್ ಪಸಂದೆಚೆಂ. ಪಳೆಂವ್ಕ್ ಮಾಂಯ್ಗಾಂವ್ಚ್ಯಾ ಬಿರಿಯಾನಿ ಬರಿಂ ದಿಸ್ತಾ. ರಂಗಾಳ್ ಶಿತಾ ವಯ್ರ್ ಬರ್ಶಿಕ್ ಮಾಸ್ಳಿ. ಭೊವ್‌ಚ್ ರುಚಿಕ್ ಅಸ್ತಾ.

ಬಾರ್ಸಲೋನಾ ಕೇವಲ್ ಏಕ್ ಶಹರ್ ನ್ಹಂಯ್, ಹೊ ಏಕ್ ಉಗ್ಡಾಸಾಂತ್ ಉರ್ಚೆ ತಸಲೊ ಅನುಭವ್. ತೀನ್ ದಿಸಾಂನಿ ಬಾರ್ಸಲೋನಾಚಿ ಸೊಭಾಯ್ ಕಾಳ್ಜಾಂತ್ ತಶೆಂಚ್ ಕ್ಯಾಮರಾಂತ್ ಕೈದ್ ಕರ್ನ್ ಟ್ರೈನ್ ದರ್ನ್ ಪಾವ್ಲ್ಯಾಂವ್ ಸಲೂ ಮ್ಹಳ್ಳ್ಯಾ ಸ್ಪೇನಾಂತ್ಲ್ಯಾ ಅನ್ಯೇಕಾ ಜಾಗ್ಯಾಕ್. ಬಾರ್ಸಲೋನಾಚ್ಯಾ ದಕ್ಶಿಣ್ ಪಶ್ಚಿಮಾಕ್ ಸುಮಾರ್ ಶೆಂಬೊರ್ ಕಿಲೊ ಮೀಟರ್ ಪಯ್ಸ್ ದರ್ಯಾ ದೆಗೆರ್ ಆಸ್ಚೆಂ ರಿಸೋರ್ಟ್ ಶಹರ್ ಹೆಂ. ಹಾಂಗಸರ್ ಆಸ್ಚೆಂ ಪೋರ್ಟಾವೆಂಚುರಾ ಥೀಮ್ ಪಾರ್ಕ್ ಯುರೋಪಾಂತ್ಲೆಂ ವ್ಹಡ್ಲೆಂ ಥೀಮ್ ಪಾರ್ಕ್. ಹಾಂಗಾಸರ್ ರೋಲರ್ ಕೋಸ್ಟರ್ಸ್, ಉದ್ಕಾಚೆ ಸ್ಲೈಡ್ಸ್ ಆನಿ ಫೆರಾರಿ ಲ್ಯಾಂಡ್ ಎಡ್ವೆಂಚರ್ಸ್ ಅಸಾತ್.

ರೆಡ್ ಫೋರ್ಸ್ ರೈಡ್ ಫೆರಾರಿ ಲ್ಯಾಂಡಾಂತ್ ಆಸ್ಚೆಂ ಯುರೋಪಾಂತ್ಲೆಂ ಪ್ರಸಿದ್ದ್ 112 ಮೀಟರ್ ಊಂಚ್ ಅನಿಂ ಘಂಟ್ಯಾಕ್ 180 ಕಿಲೊ ಮೀಟರ್ 5 ಸೆಕೆಂಡಾಚೆಂ ಅತೀ ವೇಗಾಚೆಂ ರೋಲರ್ ಕೋಸ್ಟರ್. ಪಳೆಯ್ತಾನಾಂಚ್ ಮ್ಹಜೆಂ ಕಾಳಿಜ್ ತೋಂಡಾಂತ್ ಆಯ್ಲೆಂ. ವ್ಹಡಾನಿಂ ತಶೆಂಚ್ ಭುರ್ಗ್ಯಾನಿಂ ಪೋರ್ಟಾವೆಂಚುರಾ ಪಾರ್ಕಾಂತ್ ಅಸ್ಚ್ಯಾ ನಮೂನ್ಯಾವಾರ್ ಸ್ಲೈಡ್ಸ್ ಆನಿ ರೈಡ್ಸಾಚಿಂ ಮಜಾ ಭೊಗ್ಲಿ. ಉಪ್ರಾಂತ್ ಥಂಯ್ಚ್ಯಾ ಲಾಂಬ್ ರೆಂವಾಳ್ ದರ್ಯಾ ತಡಿರ್ ರೆಂವೆಂಚಿಂ ರಾವ್ಳೆರಾಂ ಬಾಂದುನ್ ಥಂಯ್ಚ್ಯಾ ಗರ್ಮೆಕ್ ಕುಡಿಕ್ ಥಂಡಾಯ್ ದೀಂವ್ಕ್ ಉದ್ಕಾಕ್ ಉಡ್ಕಿ ಮಾರ್ಲಿ. ಉಪ್ರಾಂತ್ ದರ್ಯಾ ತಡಿರ್ ಅಸ್ಚ್ಯಾ ರೆಸ್ಟೊರೆಂಟಾನಿಂ ಸುರ್ಯೊ ದರ್ಯಾಂತ್ ಬುಡ್ಚಿ ಸೊಭಾಯ್ ಪಳೆವ್ನ್ ರಾತ್ಚೆಂ ಜೆವಾಣ್‌ಯ್ ಸಂಪಯ್ಲೆಂ.

ಪೋರ್ಟಾವೆಂಚುರಾಕ್ ಹ್ಯಾ ವರ್ಸಾ 30 ವರ್ಸಾಂ ಜಾತಾತ್ ದೆಕುನ್ ಸದಾಂನೀತ್ ಥಂಯ್ಸರ್ ಮಸ್ತ್ ಶೋ ತಾಣಿಂ ಆಸಾ ಕೆಲ್ಲೆ. ವಿಡಿಯೋಂತ್ ತುಮ್ಕಾಂ ಪಳೆಂವ್ಕ್ ಮೆಳ್ತಾಲೆ.

‘ಸಂತೋಸ್ ಭೊಗ್ತಾನಾ ದೀಸ್ ಪಾಶಾರ್ ಜಾಲ್ಲೆ ಕಳಾನಾಂತ್’ ಮ್ಹಳ್ಳ್ಯಾ ಸಾಂಗ್ಣೆ ಪ್ರಕಾರ್ ಕಸೊ ಏಕ್ ಹಫ್ತೊ ಕಾಬಾರ್ ಜಾಲೊ ಕಳ್ಳೊ ನಾಂ. ಮನ್ ನಾತ್ಲ್ಯಾ ಮನಾನ್ ರಡ್ಕುರೆಂ ತೋಂಡ್ ಘೆವ್ನ್ ಉಬ್ಲ್ಯಾಂವ್ ಪಾಟಿಂ ಆಮ್ಚ್ಯಾ ಘೊಂಟೆರಾಕ್.

■ ಮೋನಿಕಾ ಶಾಂತಿಪುರ