ಆಪ್ಲ್ಯಾ ಚಾರಣ್ ಅನಿ ಪ್ರವಾಸಾಚ್ಯಾ ಹವ್ಯಾಸಾಕ್ ಲಾಗೊನ್ ದೇಶ್ – ವಿದೆಶಾಂನಿ ಜಾಯ್ತೆ ಜಾಗೆ ಭಂವೊನ್ ಆಯಿಲ್ಲಿ, ಆಕಾಶ್‌ವಾಣಿ ಅಧಿಕಾರಿ ಆನಿ ಪತ್ರ್‌ಕರ್ತ್ ಮಾನೆಸ್ತಿಣ್ ಫ್ಲೋರಿನ್ ರೋಚ್ ಹಿಚೊ ಫುಡ್ಲದ್ ಕೊಂಕ್ಣಿ ಪುಸ್ತಕ್ ‘ಉದೆಂವ್ಚ್ಯಾ ಸುರ್ಯಾಚ್ಯಾ ಕಿರ್ಣಾಂನಿ ಫುಲ್‌ಲ್ಲೆಂ ಸಾಳಕ್ – ಜಪಾನ್’ ಬ್ರೇಸ್ತಾರಾ 26 ಜನೆರ್ 2023 ವೆರ್, ವಿಶ್ವ ಕೊಂಕ್ಣಿ ಕೇಂದ್ರಾಂತ್, ಸಾಂಜೆಚ್ಯಾ 4 ವ್ಹರಾಂಚೇರ್ ಲೊಕಾರ್ಪಣ್ ಜಾತಲೊ.
ವಿಶ್ವ ಕೊಂಕ್ಣಿ ಕೇಂದ್ರಾಚ್ಯಾ ಆಶ್ರಯಾಖಾಲ್ ಚಲ್ಚ್ಯಾ ಪುಸ್ತಕ್ ಲೊಕಾರ್ಪಣ್ ಸುವಾಳ್ಯಾಂತ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಆದ್ಲೊ ಅಧ್ಯಕ್ಶ್ ಡಾ| ಕೆ. ಜಗದೀಶ್ ಪಯ್ ಪುಸ್ತಕ್ ಉಗ್ತಾಯ್ತಲೆ. ಅನಿವಾಸಿ ಉದ್ಯಮಿ ಆನಿ ಮಹಾದಾನಿ ಮಾನೆಸ್ತ್ ಮೈಕಲ್ ಡಿ’ಸೊಜಾ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ತಲೆ. ವಿಶ್ವ ಕೊಂಕ್ಣಿ ಕೇಂದ್ರಾಚೊ ಅಧ್ಯಕ್ಷ್ ಸಿಎ ನಂದಗೋಪಾಲ ಶೆಣಯ್ ಕಾರ್ಯಾಚೆಂ ಅಧ್ಯಕ್ಷ್ ಸ್ಥಾನ್ ಘೆತಲೆ.
ಡಾ। ಕೆ. ಜಗದೀಶ ಪಯ್
ಮಾನೆಸ್ತ್ ಮೈಕಲ್ ಡಿಸೊಜಾ
ಸಿಎ. ನಂದಗೋಪಾಲ ಶೆಣಯ್
ಕಾರ್ಯಾಂತ್ ಲೇಖಿಕಾ ಮಾನೆಸ್ತಿಣ್ ಫ್ಲೋರಿನ್ ರೋಚ್ ಹಿಚೆಸಂಗಿ ಮಾಲ್ಗಡೊ ನಾಟಕಿಸ್ತ್, ಕಲಾಕಾರ್ ಆನಿ ವಿನ್ಯಾಸಕ್ ಮಾನೆಸ್ತ್ ಎಡ್ಡಿ ಸಿಕೇರ್, ಲೇಖಿಕಾಚ್ಯಾ ಪಯ್ಣ್ ಆನಿ ಚಾರಣ್ ಹವ್ಯಾಸಾ ವಿಶ್ಯಾಂತ್, ದೇಶ್ – ವಿದೇಶಾಂತ್ ತಿಣೆ ಭಂವ್ಲೆಲ್ಯಾ ಗಾಂವಾಂ ವಿಶ್ಯಾಂತ್, ಥಂಯ್ಚ್ಯಾ ಲೊಕಾ ವಿಶ್ಯಾಂತ್, ಸಂಸ್ಕೃತಿ ಆನಿ ಆಚಾರ್ – ವಿಚಾರಾ ವಿಶ್ಯಾಂತ್ ಸಂವಾದ್ ಚಲಯ್ತಲೆ. ಕಾರ್ಯಾಕ್ ಹಾಜರ್ ಜಾತೆಲ್ಯಾಂಕ್ ಸಾಂವಾದಾಂತ್ ವಾಂಟೆಲಿ ಜಾವ್ನ್ ಲೇಖಿಕಾಲಾಗಿಂ ಸವಾಲಾಂ ವಿಚಾರುಂಕ್ ಉಗ್ತೊ ಅವ್ಕಾಸ್ ಆಸ್ತಲೊ.
ಮಾನೆಸ್ತ್ ಎಡ್ಡಿ ಸಿಕೆರ್
ಕಾರ್ಯೆಂ ಸಾಂಜೆಚ್ಯಾ 4 ವ್ಹರಾಂಚೆರ್ ಸುರು ಜಾವ್ನ್, ಸಾಡೆ ಪಾಂಚ್ ವ್ಹರಾಂಚೆರ್ ಕಾಫಿ – ಫಳ್ಹಾರಾಸವೆಂ ಸಂಪ್ತಲೆಂ.
ಕೊಂಕ್ಣಿ ಸಾಹಿತ್ಯಾಂತ್ ಪ್ರವಾಸ್ ಕಥನ್ ಪ್ರಕಾರಾಚೆಂ ಸಾಹಿತ್ಯ್ ಫಕತ್ ಬೊಟಾಂನಿ ಮೆಜ್ಚೆಂ ತಿತ್ಲೆಂ ಆಸುನ್, ಫ್ಲೋರಿನ್ ರೋಚ್ ಹಾಂಚೊ ಬೂಕ್ ಕೊಂಕ್ಣಿ ಸಾಹಿತ್ಯಾಂತ್ ಪ್ರವಾಸ್ ಕಥನ್ ಸಾಹಿತ್ಯ್ ಪ್ರಕಾರಾಕ್ ನವೊ ಜೀವ್ ಭರ್ತಲೊ ಮ್ಹಣ್ಚ್ಯಾಕ್ ದುಬಾವ್ ನಾ. ಜಾಯ್ತ್ಯಾ ವರ್ಸಾಂ ಅದಿಂ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಂಚೆಂ ಪಯ್ಣಾ ಕಥನ್ ‘ಗಡ್ದೆಚ್ಯಾ ಗಾಂವಾಂತ್’ ನೆಮಾಳ್ಯಾರ್ ಸಾಂಕ್ಳೆರುಪಾರ್ ಫಾಯ್ಸ್ ಜಾಲ್ಲೆಂ, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ ಅನಿಲ್, ಪೆರ್ನಾಲಾಚೆಂ ‘ಪಯ್ಶಿಲೆಂ ಪಯಣ್‌’ ಏಕ್ ಪುಸ್ತಕ್ ಫಾಯ್ಸ್ ಕೆಲ್ಲೆಂ ಆನಿ ಆಯ್ಲೆವಾರ್ ವಿನ್ಸಿ ಪಿಂಟೊ, ಆಂಜೆಲೊರ್ ಹಾಣಿ ‘ನಮಾನ್ ಬಾಳೊಕ್ ಜೆಜು’ ಪತ್ರಾರ್ ‘ಪಯ್ಣಾ ನೋಟ್ ಬುಕ್’ ಶಿಂಕಳ್ ಬರಯಿಲ್ಲಿ ಸೊಡ್ಲ್ಯಾರ್, ಕೊಂಕ್ಣಿ ಸಾಹಿತ್ಯಾಂತ್ ಉಲ್ಲೇಕ್ ಕರ್ಚೆ ತಸಲೆಂ ಪಯ್ಣಾ ಸಾಹಿತ್ಯ್ ವಾಚುಂಕ್ ಮೆಳಾನಾ.
ಹ್ಯಾ ಆದಿಂ ಫ್ಲೋರಿನ್ ರೋಚ್ ಹಿಣೆ ಮೆಕ್ಸಿಕೊ ದೆಶಾಕ್ ಭೆಟ್ ದಿಲ್ಲೆ ತವಳ್, ಉತ್ತರ್ ಭಾರತಾಕ್ ಭೆಟ್ ದಿಲ್ಲೆ ತವಳ್ ಬರಯಿಲ್ಲ್ಯೊ ಸಚಿತ್ರ್ ಪಯ್ಣಾಕಥಾ ‘ಆರ್ಸೊ’ ವಿಶೇಸ್ ಅಂಕ್ಯಾಂನಿ ಫಾಯ್ಸ್ ಜಾವ್ನ್ ವಾಚ್ಪ್ಯಾಂ ಥಾವ್ನ್ ಮೆಚ್ವಣೆಕ್ ಪ್ರಾಪ್ತ್ ಜಾಲ್ಯಾತ್. ಮುಳಾನ್ ಫಜೀರ್‌ಚಿ, ಪ್ರಸ್ತುತ್ ಕುಲ್ಶೇಕರ್ ಪದ್ವಾರ್ ಕುಟ್ಮಾ ಸಾಂಗಾತಾ ವಸ್ತಿ ಕರುನ್ ಆಸ್ಚಿ ಮಾನೆಸ್ತಿಣ್ ಫ್ಲೋರಿನ್ ರೊಚ್, ಪ್ರಸ್ತುತ್ ಬೆಂಗ್ಳುರ್ ಆಕಾಶ್‌ವಾಣಿ ಕೇಂದ್ರಾಂತ್ ‘ರೇನ್ ಬೊ’ ಎಫ್. ಎಮ್. ಚ್ಯಾನೆಲಾಂತ್ ಸೆವಾ ದೀವ್ನ್ ಆಸಾ.
ಮಾನೆಸ್ತಿಣ್ ಫ್ಲೋರಿನ್ ರೋಚ್
ಎಕುಣ್ 112 ಪಾನಾಂಚ್ಯಾ ‘ಉದೆಂವ್ಚ್ಯಾ ಸುರ್ಯಾಚ್ಯಾ ಕಿರ್ಣಾಂನಿ ಫುಲ್‌ಲ್ಲೆಂ ಸಾಳಕ್ – ಜಪಾನ್’ ಬುಕಾಂತ್ 13 ಸವಿಸ್ತಾರ್ ಲೇಕನಾಂ ಆನಿ 8 ಪಾನಾಂನಿ ರಂಗಾಳ್ ತಸ್ವಿರ‍್ಯೊ ಆಸಾತ್. (ಎಕುಣ್ 120 ಪಾನಾಂ) ಕಿಟಾಳ್ ಪ್ರಕಾಶನಾನ್ ಫಾಯ್ಸ್ ಕರ್ಚ್ಯಾ ಹ್ಯಾ ಬುಕಾಚೆಂ ಮೋಲ್ ರು. 150/- ಆಸುನ್, ಪುಸ್ತಕಾಚಿ ಪ್ರತಿ ಅಮಾನಾತ್ ಕರುಂಕ್ ಆಶೆತೆಲ್ಯಾಂನಿ ಲೇಖಕಿಕ್ 98808 10329 ನಂಬ್ರಾಚೆರ್ ಪುಸ್ತಕಾಚೊ ಐವಜ್ ರು. 150/- ಆನಿ ಪೊಸ್ಟಾಚೊ ಖರ್ಚ್ ರು.40/- ಮೆಳವ್ನ್ ರು. 190/- ಗೂಗಲ್ ಪೇ ಕೆಲ್ಯಾರ್, ಪುಸ್ತಕ್ ಲೊಕಾರ್ಪಣ್ ಜಾಲ್ಲ್ಯಾ ದುಸ್ರ್ಯಾ ದಿಸಾ, ಪುಸ್ತಕ್ ಪೋಸ್ಟ್ ಪಾರ್ಸೆಲಾ ಮುಕಾಂತ್ರ್ ಪಾವಿತ್ ಕರ್ಚಿ ವೆವಸ್ತಾ ಆಸಾ. ಒನ್ ಲೈನಿರ್ ಹ್ಯಾ ಗಾಂಚಾಚೆರ್ https://www.kittall.com/product/japan-a-travelogue/ ಪುಸ್ತಕ್ ಓರ್ಡರ್ ಕರ್ಯೆತ್. ವಾ ಹಾಂಗಾ ಸಕಯ್ಲ್ ದಿಲ್ಲೊ ಕ್ಯೂ ಆರ್ ಕೋಡ್ ಸ್ಕ್ಯಾನ್ ಕರುನ್‌ಯೀ ಪುಸ್ತಕ್ ಮೊಲಾಕ್ ಘೆವ್ಯೆತ್.
ಬ್ರೇಸ್ತಾರಾ ಸಾಂಜೆರ್, 26 ಜನೆರ್ 2023 ವೆರ್, ವಿಶ್ವ ಕೊಂಕ್ಣಿ ಕೇಂದ್ರಾಂತ್, 4 ವ್ಹರಾಂಚೇರ್ ಚಲ್ಚ್ಯಾ ಲೊಕಾರ್ಪಣ್ ಕಾರ್ಯಾಕ್ ಸರ್ವ್ ಕೊಂಕ್ಣಿ ಮೊಗಿಂಕ್ ಆನಿ ಪುಸ್ತಕ್ ಪ್ರೇಮಿಂಕ್ ಮೊಗಾಚೆಂ ಆಪವ್ಣೆಂ ಆಸಾ, ಸಾಂಗಾತಾ ಲೇಖಿಕಾಲಾಗಿಂ ಸಂವಾದಾಂತ್ ವಾಂಟೆಲಿ ಜಾವ್ನ್, ತಿಣೆ ಹಸ್ತಾಕ್ಷರ್ ಕೆಲ್ಲೆಂ ಪುಸ್ತಕ್ ಆಪ್ಣಾಂವ್ಕ್ ಅವ್ಕಾಸ್ ಆಸಾ.
1 comment
Your goodwill in publishing a book on your trip to Japan is very much appreciated.We really enjoyed reading the same in ‘Arso’.We must have missed the track.All those who read this book will be thrilled as if they visited Japan!