ಆಮ್ಚ್ಯಾ ಮಾಲ್ಘಡ್ಯಾಂಚೆಂ ಪ್ರಾಮಾಣಿಕ್ಪಣ್, ಜಾಣ್ವಾಯ್, ಬೆಸಾಯ್ ಆನಿ ಇತರ್ ಕಾಮಾಂನಿ ಆಸ್ಚಿ ಚತುರಾಯ್ ಪಳೆವ್ನ್ ಆದಿಂ ಮಾಗಾಂ ತುಂಡು ರಾಯಾಂನಿ, ಗುತ್ತು, ಗೂಡು, ಸಾವಂತಾಂನಿ ಆನಿ ಬ್ರಿಟಿಷಾಂನಿ ಸಯ್ತ್ ಆಮ್ಕಾಂ ದಿಲ್ಲಿ ಭುಂಯ್ ಆಜ್ ಆಮ್ಕಾಂ, ಆಮ್ಚ್ಯಾ ಕ್ರಿಸ್ತಾಂವ್ ಸಮಾಜೆಕ್, ಸಂಚಿಕಾರ್ ಜಾಂವ್ಕ್ ಪಾವ್ಲ್ಯಾ. ಆಮ್ಚ್ಯಾ ಮಾಲ್ಘಡ್ಯಾಂನಿ ತಿ ಭುಂಯ್ ಸಾಗ್ವೊಳೆಕ್ ಗಳ್ಸಿಲ್ಲಿ ತರ್, ಜೆನ್ನಾಂ ದುಡು ಆಮ್ಚ್ಯಾ ಹಾತಾಂನಿ ಖೆಳೊಂಕ್ ಲಾಗ್ಲೊ, ಕೊಂಪ್ಲೆಕ್ಸಾಂ ಉಭಿಂ ಜಾಲಿಂ. ಭುಂಯ್ಚೊ ದಂದೊ ಸುರು ಜಾಲೊ. ರಿಯಲ್ ಎಸ್ಟೇಟ್!
ಆಯ್ಲೆವಾರ್ ಪುತ್ತೂರ್ಚ್ಯಾ ಎಕಾ ಹಿಂದೂ ಸಮಾವೇಶಾಂತ್ ಎಕಾ ಮುಕೆಲ್ಯಾನ್ ಕೆಲ್ಲೆಂ ಭಾಷಣ್ ಆತಾಂ ಜಾಯ್ತ್ಯಾ ಕ್ರಿಸ್ತಾಂವ್ ಗ್ರೂಪಾಂನಿ, ಸಮಾಜಿಕ್ ಮಾಧ್ಯಮಾಂನಿ ವೈರಲ್ ಜಾತೇ ಆಸಾ ವಾ ಆಮ್ಚ್ಯಾ ಸೋ ಕೊಲ್ಡ್ ಮುಕೆಲಿಚ್ ತೆಂ ವೈರಲ್ ಕರ್ನ್ ತಾಕಾ ಫುಂಕ್ಯಾಚೊ ಪ್ರಚಾರ್ ದಿತೇ ಆಸಾತ್. ಪೂಣ್, ವಾಸ್ತವ್ ಕಿತೆಂ, ಹಕೀಗತ್ ಕಿತೆಂ, ಜಾಣಾಸ್ಚೆ ಆಮ್ಚೆ ಲೀಡರ್ ಆನಿ ಧಾರ್ಮಿಕ್ ವ್ಹಡಿಲ್ ಮಾತ್ರ್ ತೋಂಡ್ ಬಂದ್ ಕರುನ್ ವಗೆತ್ ಬಸ್ಲ್ಯಾತ್. ಜರ್ ತಾಣಿಂ ಆತಾಂ ನೆಣಾರ್ಯಾಂ ಭಾಷೆನ್ ತೋಂಡ್ ಉಘಡ್ಲೆಂ ತರ್, ಆಮ್ಚಿ ಮಾನ್ ಮರ್ಯಾದ್ ವಿಕುನ್ ವಚೊನ್, ನಾಲಿಸಾಯ್ ಜಾಂವ್ಚಿ ಮಾತ್ರ್ ಖಂಡಿತ್. ಕಿತ್ಯಾಕ್ ಮ್ಹಳ್ಯಾರ್ ಆಮ್ಚ್ಯಾ ಮಾಲ್ಘಡ್ಯಾಂಚೆಂ ಬರೆಂಪಣ್ ಪಳೆವ್ನ್, ಬ್ರಿಟಿಷ್, ಪೋರ್ಚುಗೀಸ್ ವಾ ರಾಯ್, ಸಾಮಾಂತ್, ಗೂಡು ಆನಿ ಗುತ್ತು ಧನ್ಯಾಂನಿ – ಇಗರ್ಜೊ, ಇಸ್ಕೊಲಾಂ, ಆಸ್ಪತ್ರ್ಯೊ ಬಾಂದುಂಕ್ ವ್ಹಡ್ ವ್ಹಡ್ ಜಾಗೆ ದರ್ಮಾರ್ಥ್ ದಿಲ್ಯಾತ್. ಪುಣ್ ತ್ಯಾ ಜಾಗ್ಯಾಂಚಿಂ ದಸ್ತಾವೆಜಾಂ ಆತಾಂ ಕೊಣಾಕಡೆ ಆಸಾತ್?
ಬೋವ್ ಥೊಡೆ ಜಾಗೆ ಮಾತ್ರ್ ಆಮ್ಚ್ಯಾ ಸಂಸ್ಥ್ಯಾಂಚ್ಯಾಂ ನಾಂವಾರ್ ಆಸಾತ್. ಆನಿ ಥೊಡೆ ಜಾಗೆ 100 ವರ್ಸಾಂಚ್ಯಾ ಲೀಸಾರ್. ಆನಿ ಥೊಡ್ಯಾಂಕ್ ದಸ್ತಾವೆಜಾಂಚ್ ನಾಂತ್. ತರ್ ಆತಾಂ ಮುಕ್ಲ್ಯಾ ಪರಿಸ್ಥಿತಿ ವಿಶ್ಯಾಂತ್ ಚಿಂತಿಜೆ ಪಡ್ತಾ. ಹಾಂಗಾಸರ್ ಆಮ್ಚ್ಯಾ ಮಾಲ್ಘಡ್ಯಾಂಚಿಂ ಕಿತೆಂಚ್ ಚೂಕ್ ನಾ. ತಾಂಕಾ ಚಡ್ ಶಿಕಪ್ ನಾತ್ಲೆಂ ಮ್ಹಣ್ಯಾಂ. ಪೂಣ್ ಆಮ್ಕಾಂ ಸ್ವತಂತ್ರ್ ಲಾಬೊನ್ 76 ವರ್ಸಾಂ ಜಾಲಿಂ. ಹ್ಯಾ 76 ವರ್ಸಾಂನಿ ಆಮ್ಚ್ಯಾ ಸೋ ಕೊಲ್ಡ್ ಲೀಡರ್ಸಾಂನಿ, ಧಾರ್ಮಿಕ್ ವ್ಹಡಿಲಾಂನಿ – ಆಮ್ಚ್ಯಾ ಮಾಲ್ಘಡ್ಯಾಂನಿ ಜೊಡ್ಲ್ಲೆಂ ಕಿತ್ಲೆಂ ಉರಯ್ಲೆಂ ? ಕಿತ್ಲೆ ವಿಕ್ಲೆಂ ? ಆನಿ ದಸ್ತಾವೆಜಾಂ ನಾತ್ಲ್ಲ್ಯಾ ಆಮ್ಚ್ಯಾ ಜಾಗ್ಯಾಂಕ್ ಕಿತ್ಲಿಂ ದಸ್ತಾವೆಜಾಂ ಕರುನ್ ಘೆತ್ಲಿಂ ? ಮ್ಹಳ್ಳೆಂ ಸಾದ್ಯಾ ಕ್ರಿಸ್ತಾಂವ್ ಲೊಕಾಕ್ ಕಳಿತ್ ನಾಂ ತರೀ, ಆಮ್ಚ್ಯಾ ‘ಮುಕ್ಕೆಲಿ’ ಮುಕೆಲ್ಯಾಂಕ್ ಬೋವ್ ಬರ್ಯಾನ್ ಕಳಿತ್ ಆಸಾ ಮ್ಹಣ್ಯೆತ್.
ವ್ಹಯ್, ಥೊಡೊ ಜಾಗೊ ಆಮ್ಚ್ಯಾ ಸಂಸ್ಥ್ಯಾಂಚ್ಯಾ ನಾಂವಾರ್ ಆಸಾ, ದಸ್ತಾವೆಜಾಂ ಸಾರ್ಕಿಂ ಆಸಾತ್. ಪೂಣ್, ತಾಚ್ಯಾ ಭಂವ್ತಣಿ ಆಕ್ರಮ್ ಕೆಲ್ಲೊ ಜಾಗೊ? ಇತ್ಲಿಂ ವರ್ಸಾಂ ರಾಜ್ಯಾಂತ್ ಆನಿ ದೇಶಾಂತ್ ಕ್ರೀಸ್ತಾಂವಾಂಚಿ ಪೊಸ್ಕಿ ಪಾಡ್ತ್ ಕೊಂಗ್ರೆಸ್ ಅಧಿಕಾರಾರ್ ಆಸ್ಲಿ ತರೀ, ಕಿತ್ಯಾಕ್ ಅಸಲೆ ಜಾಗೆ ಸಕ್ರಮ್ ಕರುನ್ ಘೆಂವ್ಕ್ ನಾಂತ್ ? ಆಮ್ಚೆ ಕಡೆ ಪಯ್ಶೆ ನಾತ್ಲ್ಲೆ ? ಅಧಿಕಾರ್ ನಾತ್ಲ್ಲೊ ? ಇಗರ್ಜೆಚ್ಯಾ ದೊರ್ಯಾ ಭಿತರ್ಲೆ ಲೀಡರ್ಸ್ ಹೆ ವಿಶಿಂ ಕಿತೆಂ ಮ್ಹಣ್ತಾತ್ ? ತಾಂಕಾ ದಿಯೆಸೆಜ್, ಬಿಸ್ಪಾಂಚಿಂ ಗರ್ಜ್ ಕೇವಲ್ ಎಲಿಸಾಂವ್ ಲಾಗಿಂ ಯೆತಾನಾ – ಶಿಫಾರಸ್ ಪತ್ರ್ ಘೆಂವ್ಕ್ ಮಾತ್ರ್ಗೀ ?
ಆಜ್ ಪರಿಸ್ಥಿತಿ ಆಶಿ ಆಸಾಗೀ – ಇಗರ್ಜ್ ವರ್ಗ್ ಜಾಗ್ಯಾರ್ ಆಸಾ ತರ್, ಪಾದ್ರ್ಯಾಬಾಚೆಂ ಘರ್, ಖೆಳಾ ಆಂಗಣ್, ಇಸ್ಕೊಲ್ ಸರ್ವ್ ಸರ್ಕಾರಿ ಜಾಗ್ಯಾರ್ ಆಸಾತ್. ಆನಿ ಥೊಡ್ಯಾ ಸವಯ್ ಬುದ್ವಂತಾಂನಿ ‘ಕನ್ನಡ’ ಆಸ್ಲ್ಲೆಂಯ್ ‘ಇಂಗ್ಲಿಶ್’ ಕೆಲಾಂ ಜಾಲ್ಲ್ಯಾನ್ ಸರ್ಕಾರಾಚೆ ಜಾಗೆ ಸರ್ಕಾರಾಕ್ ಪಾಟಿಂ ಸೊಡಿಜೆಚ್ ಜಾಲ್ಲಿ ಪರಿಸ್ಥಿತಿ ನಿರ್ಮಾಣ್ ಜಾಲ್ಯಾ. ಜರ್ ತಿಂ ಅನುದಾನಿತ್ ಕನ್ನಡ ಮಾದ್ಯಮ್ ಇಸ್ಕೊಲಾಂ ಉರವ್ನ್ ಘೆತ್ಲ್ಲಿಂ ತರ್, ಇಸ್ಕೊಲಾಚ್ಯಾ ನಾಂವಾನ್ ತರೀ ಆಮ್ಚೆ ಜಾಗೆ ಆಮ್ಚೆಲಾಗಿಂ ಉರ್ತೆ. ಪೂಣ್, ಆತಾಂ ಇಸ್ಕೊಲ್ಯೀ ನಾ, ಜಾಗೊಯ್ ನಾ! ಇಂಗ್ಲಿಶ್ ಮೀಡಿಯಮ್ ಇಸ್ಕೊಲಾಂ ಅನುದಾನಿತ್ ನಂಯ್. ಆನಿ ತೆಂ ಏಕ್ ಕಮರ್ಷಿಯಲ್ ಬಿಜ್ನೆಸ್ ಜಾಲ್ಲ್ಯಾನ್ ಮ್ಹಣ್ತಾನಾ ಬಿಜ್ನೆಸಾಕ್ ಜಾಗೊ ಕಿತ್ಯಾಕ್ ಫುಂಕ್ಯಾಕ್ ದೀಜೆ ಮ್ಹಳ್ಳೆಂ ಸವಾಲ್ ವಾಜ್ಬಿ. ದೆಕುನ್ ಜಾಗೊ ಪಾಟಿಂ ಘೆಂವ್ಚೆಂ ಹಕ್ಕ್ ಸರ್ಕಾರಾಕ್ ಆಸಾ.
ಆಮ್ಚೆ ಸಬಾರ್ ಜಾಗೆ 100 ವರ್ಸಾಂಚ್ಯಾ ಲೀಸಾರ್ ಬ್ರಿಟಿಶ್ ಗವರ್ನ್ಮೆಂಟಾನ್ ಆನಿ ಹೆರಾಂನಿ ದಿಲ್ಲೆ ಆಸಾತ್. ತಾಂತ್ಲೆಯ್ ಥೊಡೆ ಆಮ್ಚ್ಯಾಂನಿ ನಕ್ಲಿ ದಸ್ತಾವೆಜಾಂ ಕರುನ್ ವಿಕುನ್ ಜಾಲ್ಯಾತ್. ಸಬಾರ್ ಜಾಗ್ಯಾಂಚೆ ಲೀಸ್ ಮುಗ್ದೊನ್ ಯೇತೆ ಆಸಾ. ಆನಿ ತ್ಯಾ ಜಾಗ್ಯಾಂನಿ ಸಬಾರ್ ಕೊಲೆಜಿ, ಆಸ್ಪತ್ರ್ಯೊ ಇಗರ್ಜ್ಯೊ ಆನಿ ಕಮರ್ಶಿಯಲ್ ಬಿಲ್ಡಿಂಗಾಂಯ್ ಆಸಾತ್. ಆತಾಂ ಹಾಂಚಿ ಗತ್ ಕಿತೆಂ ಜಾಯ್ತ್ ? ಲೀಸ್ ಮುಗ್ದಾಲ್ಲೆಂಚ್ ಹೆ ಜಾಗೆ ಪಾಟಿಂ ಸರ್ಕಾರಾಕ್ ವೆಚೆ ನಾಂತ್ಗೀ ? ಲಗ್ಭಗ್ 60 – 70 ವರ್ಸಾಂ ಆಮ್ಚ್ಯಾ ಮೊಗಾಚೆಂ ಕೊಂಗ್ರೆಸ್ ಅಧಿಕಾರಾರ್ ಆಸ್ಲ್ಲೆಂ, ಕಿರಿಸ್ತಾಂವ್ ಎಮ್ಮೆಲ್ಲೆ,, ಎಮ್ಮೆಲ್ಸಿ, ಎಂಪಿ, ಮಿನಿಸ್ಟರ್ ಪರ್ಯಾಂತ್ ಆಸ್ಲ್ಲೆ. ಕಶೆಂಯ್ ಏಕ್ ಡೊಕ್ಯುಮೆಂಟ್ ಕರುನ್ ಘೆವ್ಯೆತೆಂ ನಂಯ್ ? ಆಮ್ಚೆ ಲೀಡರ್ ಆನಿ ಧಾರ್ಮಿಕ್ ವ್ಹಡಿಲ್ ಖಂಯ್ ನಿದೊನ್ ಪಡ್ಲ್ಲೆ?
ಬ್ರಿಟಿಶ್ ತಶೆಂಚ್ ಭಾರತೀಯ್ ಸರ್ಕಾರಾನ್ ಜಾಗೆ ದಿತಾನಾ ಥೊಡಿಂ ನಿಯಮಾಂ ಆನಿ ರೆಗ್ರ್ಯಾಂ ಪ್ರಕಾರ್ ದಿಲ್ಯಾತ್. ಆನಿ ತೆ ಆಮ್ಚ್ಯಾ ಸಬಾರಾಂನಿ ಪಾಳುಂಕ್ಚ್ ನಾಂತ್. ಧಾರ್ಮಿಕ್ ಆನಿ ಶೈಕ್ಷಣಿಕ್ ಉಪೆಗಾ ಖಾತಿರ್ ಮ್ಹಣೊನ್ ದಿಲ್ಲ್ಯಾ ಜಾಗ್ಯಾಂನಿ ಕೊಂಪ್ಲೆಕ್ಸಾಂ ಬಾಂದುನ್, ಬಾಡ್ಯಾಕ್ ದಿಲ್ಯಾಂತ್. ಹೆರ್ ಥೊಡೆ ಕಡೆ ಬಿಲ್ಡಿಂಗಾಂ ಬಾಂದುನ್ ಲೀಸಾಕ್ ದಿಲ್ಯಾಂತ್ ಯಾ ವಿಕ್ಲ್ಯಾಂತ್. ಜರ್ ಆಜ್ ಭಾಷಣ್ ಕರ್ಚೆ ಮುಕೆಲಿ ಯಾ ತಾಚ್ಯಾ ಪಾಡ್ತಿಚೆ ಕೊಡ್ತಿಕ್ ಗೆಲೆ ತರ್ ಹಾಚೊ ಪರಿಣಾಮ್ ಕಸೊ ರಾವತ್ ? – ಆಮ್ಚೆ ಮುನಿಸ್ ಹಿ ಗಜಾಲ್ ನೆಣಾಂತ್ ?
ಆಜ್ ಹಿಂದೂ ಮುಕೆಲ್ಯಾಚೆಂ ಭಾಷಣ್ ವೈರಲ್ ಕರ್ತೆಲ್ಯಾಂನಿ ಎಕ್ ಉಡಾಸಾಂತ್ ದವರುಂಕ್ ಜಾಯ್ ಕೀ – ಭಾಷಣಾ ವಿರೋದ್ ತುಮಿ ಉಲಂವ್ಕ್ ಗೆಲ್ಯಾರ್ ಪಯ್ಲ್ಯಾನ್ ಪಯ್ಲೆಂ ಆಮ್ಚೆಚ್ ಮುಕೆಲಿ ಆನಿ ಧಾರ್ಮಿಕ್ ವ್ಹಡಿಲ್ ತುಮ್ಚೆಂ ತೋಂಡ್ ದಾಂಪಯ್ತಾತ್. ಕಾರಣ್ ತ್ಯಾ ಮುಕೆಲ್ಯಾನ್ ಉಲಯಿಲ್ಲೆಂ ಕರ್ನಾಟಕಾ ರಾಜ್ಯಾಚಾ ಮಟ್ಟಾಕ್ 70% ಸತ್ ಜಾವ್ನಾಸಾ. ಆನಿ ತುಮ್ಚೆ ತಸಲ್ಯಾಂ ಖಾತಿರ್ ಆಮ್ಚೆ ಧಾರ್ಮಿಕ್ ವ್ಹಡಿಲ್ ಆನಿ ಸಂಸ್ಥ್ಯಾಂಚೆಂ ಲೀಡರ್ ’ಎಕ್ಸ್ಪೋಸ್’ ಜಾಂವ್ಕ್ ತಯಾರ್ ನಾಂತ್. ಆತಾಂ ತಾಂಕಾ ಭಿರಾಂತ್ ಉಟ್ಲ್ಯಾ – ಪ್ರೊಪರ್ಟಿ ಕಶಿ ಉರಂವ್ಚಿ ಮ್ಹಣ್.
ಬಿಜೆಪಿಂತ್ ಆಸ್ಲ್ಲ್ಯಾ ಕ್ರೀಸ್ತಾಂವ್ ಮುಕೆಲ್ಯಾಂ ವಿಶ್ಯಾಂತ್ ಉಲಂವ್ಚೆಂ ಸುಲಭ್. ಸತ್ ಗಜಾಲ್ ಅಶಿ ಆಸಾ ಕೀ – ತ್ಯಾಚ್ ಬಿಜೆಪಿಂತ್ಲ್ಯಾ ಕ್ರೀಸ್ತಾಂವ್ ಲೀಡರಾಂ ಮುಕಾಂತ್ರ್ ಹೈ ಕಮಾಂಡಾಚೆ ಹಾತ್ – ಪಾಯ್ ಧರ್ನ್ ಸದ್ದ್ಯಾಕ್ ಕ್ರೀಸ್ತಾಂವ್ ವಾಂಚ್ಲ್ಯಾತ್ ಆನಿ ಆಪ್ಲೆಂ ಬಿಜ್ನೆಸ್ ಚಲವ್ನ್ ಆಸಾತ್.
ಅಸಲ್ಯಾ ಎಕಾ ಪ್ರತಿಕೂಲ್ ಪರಿಸ್ಥಿತೆಂತೀ – ಆಮ್ಚ್ಯಾ ಮುಕೆಲ್ಯಾಂಚಿಂ ಆನಿ ಧಾರ್ಮಿಕ್ ವ್ಹಡಿಲಾಂಚಿಂ ನೀದ್ ಸುಟಾನಾ ಜಾಲ್ಯಾರ್, ಏಕ್ ಪಾವ್ಟಿಂ ಆತ್ಮಾವಲೋಕನ್ ಕರುಂಕ್ ಪುರ್ಸತ್ ನಾ ಜಾಲ್ಯಾರ್ – ವಿಶಯ್ ಎದೊಳ್ಚ್ ಅತ್ತೂರ್ ಥಾವ್ನ್ ಪುತ್ತೂರ್ ಪಾವ್ಲಾ … ಮುಕಾರ್ ಖಂಯ್ ವಚೊನ್ ರಾವತ್ ? ಸಾಂಗೊಂಕ್ ಜಾಯ್ನಾ.
– ವಿನೋದ್ ಪಿಂಟೊ, ತಾಕೊಡೆ
3 comments
ಒಹ್! ಅಶಿ ಗಜಾಲ್ ಆಮ್ಚಾ ಸಂಸ್ತ್ಯಾಂಚಿ!
ಆಮ್ಕಾಂ ದೇವ್ ಸೊಡ್ನ್ ಘಾಲ್ಚೊ ನಾ!
It’s a great knowledge you shared. It’s a awareness to all of us. In fact Hindu leaders giving alarm speech on this recently I watched. Thank you.
ಸತ್ ಸತ್ಕಾರ್ ಪಾಟಿಂಬೊ ಅಮ್ಚ್ಯಾ ಲೊಕಾ ಥಾವ್ನ್ ವೆಗ್ಳಾಚಾರ್ ಜಾಲಾ. ಆಮ್ಚೆ ಮನಿಸ್ ಅಮ್ಕಾಂ ದುಸ್ಮಾನ್ ಜಾಲ್ಯಾತ್ ಭಿತರ್ಲ್ಯಾ ಭಿತರ್ ಪಾಡ್ತಿ ಕರ್ನ್ ಕ್ರಿಸ್ತಾಂವ್ ಪಣ್ ಫುಂಕ್ಯಾಕ್ ವಿಕುನ್ ಘೆತ್ಲಾ. ವ್ಹಡ್ ವ್ಹಡ್ ವಹಿವಾಟ್ ದಾರ್ ಆಸಾತ್ ತರೀ ಅಮ್ಕಾಂ ಕಿತ್ಯಾಕ್ ಪಡೊನ್ ಗೆಲಾಂ ಸಾಯ್ಬಾ ?