ಕೊಂಕಣಿ ಭಾಸ್, ಸಂಸ್ಕ್ರತಿ ಆನಿ ಕಲೆಚೊ ಪೊಸ್ ಕರ್ಚ್ಯಾ ಉದ್ದೇಶಾನ್ 1999 ವ್ಯಾ ವರ್ಸಾ ‘ದಾಯ್ಜಿ ದುಬಾಯ್’ ನಾಂವಾಖಾಲ್ ಆರಂಭ್ ಜಾಲ್ಲ್ಯಾ ಸಂಯುಕ್ತ್ ಆರಭ್ ಎಮಿರೆತಾಂತ್ಲ್ಯಾ ಕೊಂಕ್ಣಿ ಬರೊವ್ಪ್ಯಾಂಚ್ಯಾ ಎಕ್ತಾರಾನ್ ಎಪ್ರಿಲ್ 30 ವೆರ್, ದುಬಾಯಾಂತ್ಲ್ಯಾ ಎಮಿರೆಟ್ಸ್ ಇಂಟರ್‌ನ್ಯಾಶನಲ್ ಸ್ಕೂಲ್ ಆಡಿಟೊರಿಯಂ ಹಾಂತುಂ 23 ವೊ ವಾರ್ಶಿಕ್ ದೀಸ್ ಆಚರಣ್ ಕೆಲೊ.
ದಾಯ್ಜಿ ಶೀರ್ಷಕ್ ಗಿತಾ ಸವೆಂ ಆರಂಭ್ ಜಾಲ್ಲ್ಯಾ ಕಾರ್ಯಾಂತ್, ಆದ್ಲ್ಯಾ ವರ್ಸಾ ಸಾಸ್ಣಾಚ್ಯಾ ಪಯ್ಣಾಕ್ ಭಾಯ್ರ್ ಸರೊನ್ ಗೆಲ್ಲೊ ದಾಯ್ಜಿ ಸಾಂದೊ ಆನಿ ಪಯ್ಲಿ ದಾಯ್ಜಿ ದುಬಾಯ್ ಸಾಹಿತಿಕ್ ಪ್ರಶಸ್ತಿ ವಿಜೇತ್ ಸಿರಿಲ್ ಗ್ರೆಗೊರಿ ಸಿಕ್ವೇರಾಕ್ ( ಸಿಜ್ಯೆಸ್ ತಾಕೊಡೆ ) ಸಂಘಟನಾ ತರ್ಫೆನ್ ಶ್ರದ್ದಾಂಜಲಿ ಭೆಟಯ್ಲಿ.
ದಾಯ್ಜಿ ದುಬಾಯ್ ಸಂಸ್ಥಾಪಕ್ ಆನಿ ಪಯ್ಲೊ ಸಂಚಾಲಕ್ ಮಾನೇಸ್ತ್ ಡಯಾನ್ ಡಿ’ಸೋಜಾ ಮುಕಾಮರ್ ಆನಿ ಪ್ರಸ್ತುತ್ ಸಂಚಾಲಕ್ ಮಾನೇಸ್ತ್ ನಾನು ಮರೋಲ್ ತೊಟ್ಟಾಮ್ ಹಾಣಿ ಸಿಜ್ಯೆಸ್ ತಾಕೊಡೆಚಿ ಧುವ್ ಶ್ರೀಮತಿ ವಿನಿತಾ ಡಿ’ಸೋಜಾ , ಜಾಂವಯ್ ಶ್ರೀ ಆಶ್ವಿನ್ ಡಿ’ಸೋಜಾ , ದಾಯ್ಜಿ ದುಬಾಯ್ ಸಂಘಟನಾಚೆ ಆದ್ಲೆ ಸಂಚಾಲಕ್ ಮಾನೇಸ್ತ್ ಸ್ಟ್ಯಾನಿ ಪಿಂಟೊ ನಿರುಡೆ, ಮಾನೇಸ್ತ್ ಸ್ಟ್ಯಾನ್ ಆಗೇರಾ, ಮಾನೇಸ್ತ್ ರೊಬರ್ಟ್ ಫೆರ್ನಾಂಡಿಸ್ ಆನಿ ಮಾನೇಸ್ತ್ ದಿನೇಶ್ ಕೊರೆಯಾ ಹಾಂಕಾಂ ವೇದಿರ್ ಆಪೊವ್ನ್ ಹಾಡ್ಲೆಂ. ಸಿಜ್ಯೆಸ್ ತಾಕೊಡೆ ಹಾಚ್ಯಾ ಜಿವಿತಾ ವಯ್ರ್ ತಯಾರ್ ಕೆಲ್ಲೆಂ ಏಕ್ ಸಾಕ್ಶ್ಯ್‌ಚಿತ್ರ್ ಪ್ರದರ್ಶಿತ್ ಜಾಲ್ಯಾ ಉಪ್ರಾಂತ್ ವೇದಿರ್ ಆಸ್‍ಲ್ಲ್ಯಾ ಸರ್ವಾಂನಿ ಸಿಜ್ಯೆಸ್ ತಾಕೊಡೆಚ್ಯಾ ತಸ್ವಿರೆಕ್ ಫುಲಾಂಚ್ಯೊ ಪಾಕ್ಳ್ಯೊ ಆರ್ಪುನ್ ಮಾನ್ ಕೆಲೊ.
ದಾಯ್ಜಿ ದುಬಾಯ್ ಸಂಘಟನಾನ್, ದಾಯ್ಜಿ ದುಬಾಯ್ ಸಾಹಿತ್ಯ್ ಪ್ರಶಸ್ತಿ ವಿಜೇತ್ – 2022 ವಲ್ಲಿ ಕ್ವಾಡ್ರಸ್ ಆಜೆಕಾರ್ ಹಾಚ್ಯಾ ಸಾಹಿತಿಕ್ ಪಯ್ಣಾಚೊ ಸಂಪೂರ್ಣ್ ವಿವರ್ ದಿಂವ್ಚೆಂ ಸಾಕ್ಶ್ಯ್‌ಚಿತ್ರ್ ತಯಾರ್ ಕರುನ್ ಪ್ರಶಸ್ತಿ ಹಸ್ತಾಂತರ್ ಕಾರ್ಯೆಂ ಪಡ್ದ್ಯಾರ್ ಪ್ರದರ್ಶಿತ್ ಕೆಲೆಂ. ದಾಯ್ಜಿ ದುಬಾಯ್ ಸಂಸ್ಥಾಪಕ್ ಆನಿ ಪಯ್ಲೊ ಸಂಚಾಲಕ್ ಮಾನೇಸ್ತ್ ಡಯಾನ್ ಡಿ’ಸೋಜಾ ಮುಕಾಮರ್ ಆನಿ ಪ್ರಸ್ತುತ್ ಸಂಚಾಲಕ್ ಮಾನೇಸ್ತ್ ನಾನು ಮರೋಲ್ ತೊಟ್ಟಾಮ್ ಹಾಣಿಂ ಮುಖೆಲ್ ಸಯ್ರೆ ಮಾನೇಸ್ತ್ ಜೇಮ್ಸ್ ಮೆಂಡೊನ್ಸಾ, ಮಾನೇಸ್ತ್ ಜೊಸೆಫ್ ಮಥಾಯಸ್ ಆನಿ ಮಾನೇಸ್ತ್ ಲ್ಯಾನ್ಸಿ ಡಿ’ಸೋಜಾ ಹಾಂಕಾಂ ವೇದಿಕ್ ಆಪೊವ್ನ್ ಹಾಡುನ್ ಫುಲಾಂಚ್ಯಾ ತುರ‍್ಯಾಂಸವೆಂ ಉಲ್ಲಾಸುನ್ ಸ್ವಾಗತ್ ಕೆಲೊ.
ಸಂಚಾಲಕ್ ನಾನು ಮರೋಲ್ ತೊಟ್ಟಾಮ್ ಹಾಣೆ ಆಯಿಲ್ಲ್ಯಾ ಸರ್ವಾಂಕ್ ಸ್ವಾಗತ್ ಕೆಲೊ.ಆಪ್ಲ್ಯಾ ಸ್ವಾಗತ್ ಉಲೊವ್ಪಾಂತ್ ತಾಣೆ ದಾಯ್ಜಿ ದುಬಾಯ್ ಸಂಘಟನಾನ್ ಕೆಲ್ಲ್ಯಾ ವಿವಿಧ್ ವಾವ್ರಾಚೊ ವಿವರ್ ದಿಲೊ ಆನಿ ಹೆಂ ಸಾಧ್ಯ್ ಜಾಲೆಂ ಫಕತ್ ಉದಾರ್ ಮನಾಚ್ಯಾ ಪೊಷಕಾಂ ವರ್ವಿಂ. ಕೊಂಕ್ಣಿ ಆಮ್ಚಿ ಮಾಂಯ್‍ಭಾಸ್ ಆನಿ ತಿಚೊ ಪೊಸ್ ಕರ್ಚೊ ಆಮ್ಚೊ ಕಾಯ್ದೊ ಮ್ಹಳ್ಳ್ಯಾಬರಿಂ ತೆ ಆಮ್ಚ್ಯಾ ಕೊಂಕ್ಣಿ ವಾವ್ರಾಕ್ ಸಾಂಗಾತ್ ದೀವ್ನ್ ಆಸಾತ್. ತಾಂಚೊ ಸಾಂಗಾತ್ ಆಸ್‍ಲ್ಲ್ಯಾ ಆಯ್ಚ್ಯಾ ದಿಸಾ ಆಮ್ಕಾಂ ಎದೆಂ ವ್ಹಡ್ ಕಾರ್ಯೆಂ ಆಸಾ ಕರುಂಕ್ ಸಾಧ್ಯ್ ಜಾಲೆಂ ಮ್ಹಣ್ ಸಾಂಗಾತ್ ದಿಲ್ಲ್ಯಾ ಆಯೋಜಕಾಂಕ್, ಕಾರ್ಯೆಂ ಪಳೆಂವ್ಕ್ ಆಯಿಲ್ಲ್ಯಾ ಪ್ರೇಕ್ಷಕಾಂಕ್ ಆನಿ ಸಯ್ರೆ ಜಾವ್ನ್ ಆಯಿಲ್ಲ್ಯಾ ಕಲಾಕರಾಂಕ್ ಎಕಾಚ್ ಉತ್ರಾನ್ ಯೆವ್ಕಾರ್ ಮಾಗ್ಲೊ.
ಆಪ್ಲ್ಯಾ ಭಲಾಯ್ಕೆ ನಿಮ್ತಿಂ ಪಯ್ಣ್ ಕರುಂಕ್ ಆಡ್ವಾರ್ಲೆಲ್ಯಾನ್ ಮಾನೇಸ್ತ್ ವಲ್ಲಿ ಕ್ವಾಡ್ರಸಾನ್ ದಾಡ್‍ಲ್ಲೊ ಸಂದೇಶ್ ಪ್ರಸಾರ್ ಕೆಲೊ. ಆಪ್ಲ್ಯಾ ಸಂದೇಶಾಂತ್ ಮಾನೇಸ್ತ್ ವಲ್ಲಿ ಕ್ವಾಡ್ರಸಾನ್ “ಕೊಂಕ್ಣಿ ಭಾಶೆಕ್ ಪ್ರತ್ಯೇಕ್ ಜಾವ್ನ್ ಕೊಂಕ್ಣಿ ಸಾಹಿತ್ಯಾಕ್ ತೆಂಕೊ ದಿಂವ್ಚ್ಯಾ ಉದ್ದೇಶಾನ್ ತುಮಿ ತೆವೀಸ್ ವರ್ಸಾಂ ಆದಿಂ ಸುರು ಕೆಲ್ಲ್ಯಾ ಮಿಸಾಂವಾಂಚೊ ಫಳ್ ಜಾವ್ನ್ ಜಾಯ್ತಿಂ ಕೊಂಕ್ಣಿ ಸಂಘಟನಾಂ ಆಜ್ ಉದೆಲ್ಯಾಂತ್ ತಶೆಂಚ್ ಕೊಂಕ್ಣೆಂತ್ ವಾವ್ರ್ ಕರ್ತೆಲ್ಯಾಂಕ್ ಮಾನ್ ಸನ್ಮಾನ್ ದಿಂವ್ಚಿ ರಿವಾಜ್ ಸಯ್ತ್ ಸುರು ಜಾಲಿ. ದಿಸ್ಪೊಟ್ತ್ಯಾ ಗ್ರಾಸಾಕ್ ಲಾಗೊನ್ ತುಮಿ ಸಾತ್ ದರ್ಯೊ ಉತ್ರೊನ್ ವಾವ್ರ್ ಕರ್ಚ್ಯಾ ತುಮಿಂ ಪರ್ಗಾವಾಂತ್ ಕೊಂಕ್ಣಿ ವಾವ್ರ್ ಕರುನ್ ಆಸಾತ್ ಮಾತ್ರ್ ನ್ಹಂಯ್, ಕೊಂಕ್ಣಿ ಸಾಹಿತಿಕ್ ವಾವ್ರ್ ಕರ್ಚ್ಯಾ ಕೊಂಕ್ಣಿ ವಾವ್ರಾಡಿಕ್, ಜಾಂವ್ ತೊ ಖಂಯ್ಚ್ಯಾಯ್ ರಾಜ್ಯಾಂತ್ ಆಸೊಂ, ತಾಚೊ ಸಾಹಿತಿಕ್ ವಾವ್ರ್ ಬರ್ಕಾಯೆನ್ ತಜ್ವಿಜ್ ಕರುನ್ ಪುರಸ್ಕಾರ್ ದಿತಾತ್. ಮ್ಹಜ್ಯಾ ಭಲಾಯ್ಕೆಚ್ಯಾ ಕಾರಣಾಕ್ ಲಾಗೊನ್ ಮ್ಹಾಕಾ ಸದ್ದ್ಯಾಕ್ ವಿಮಾನಾಚೆರ್ ಪಯ್ಣ್ ಕರುಂಕ್ ಆಡ್ವಾರ್ಲಾಂ ಜಾಲ್ಲ್ಯಾನ್ ತುಮ್ಚ್ಯಾ ತೆವಿಸಾವ್ಯಾ ವರ್ಸುಗೆ ದಿಸಾ ತುಮ್ಚೆ ಸವೆಂ ಆಸ್ಚೆಂ ಭಾಗ್ ಚುಕ್ಲೊಲೊ ಪಶ್ಚತ್ತಾಪ್ ಮ್ಹಾಕಾ ಆಸಾ. ಪುಣ್ ಮ್ಹಜಿ ಪರಿಗತ್ ಸಮ್ಜೊನ್ ಮ್ಹಾಕಾ ಸುಧಾರ್ಸುನ್ ವರ್ತೆಲ್ಯಾತ್ ಮ್ಹಣೊನ್ ಭರ್ವಾಸ್ತಾಂ. ಕೊಂಕ್ಣಿ ಸಾಹಿತಿಕ್ ವಾವ್ರ್ ಸುರ್ವಾತ್ ಕರ್ಚ್ಯಾ ಮ್ಹಜ್ಯಾ ಸುರ್ವಿಲ್ಯಾ ದಿಸಾಂನಿ ಕಸಲೆಚ್ಚ್ ಪುರಸ್ಕಾರ್ ಕೊಂಕ್ಣೆಂತ್ ನಾತ್‍ಲ್ಲೆ ಜಾಲ್ಲ್ಯಾನ್ ಎಕಾ ದಿಸಾ ಮೊಜ್ಯಾ ವಾವ್ರಾಕ್ ದಾಯ್ಜಿ ದುಬಾಯ್ ಸಾಹಿತಿಕ್ ಪುರಸ್ಕಾರಾ ತಸಲೊ ಪ್ರತಿಶ್ಟಿತ್ ಪುರಸ್ಕಾರ್ ಆಪ್ಣಾಕ್ ಮೆಳ್ತಾಲೊ ಮುಣೊನ್ ಮೊಜ್ಯಾ ಮತಿಂತ್ ಕೆದ್ನಾಂಚ್ ನಾತ್‍ಲ್ಲೆಂ. ಪುಣ್ ಮ್ಹಜ್ಯಾ ಹ್ಯಾ ವಾವ್ರಾಕ್ ತುಮಿ ದಿಲ್ಲೊ ಹೊ ಮಾನ್ , ಕೊಂಕ್ಣೆಕ್ ದಿಲ್ಲೊ ಮಾನ್ ಮ್ಹಣೊನ್ ಲೆಕುನ್ ಬೊವ್ ವ್ಹಡಾ ಆಭಿಮಾನಾನ್ ಹೊ ಮಾನ್ ಸ್ವಿಕಾರ್ ಕರ್ತಾಂ. 2003 ಇಸ್ವೆಂತ್ ದಾಯ್ಜಿ ದುಬಾಯ್‍ಚೆಂ ಪ್ರೇರಣ್ ಘೆವ್ನ್ ಕುವೈಟಾಂತ್ ಆರಂಭ್ ಜಾಲ್ಲ್ಯಾ ಕೊಂಕ್ಣಿ ಕುಳ್ವಾರ್ ತರ್ಫೆನ್ ಕೊಂಕ್ಣಿ ಕಲಾಕರ್ ಪುರಸ್ಕಾರ್ ಜೊ ಮಾಂಯ್‍ಭಾಸ್ ಜಾಳಿಜಾಗ್ಯಾಚೊ ಬುನ್ಯಾದಿ ನವೀನ್ ಸಿಕ್ವೇರಾ ಹಾಚೊ ಪುರಸ್ಕಾರ್ ತಾಚ್ಯಾ ತರ್ಫೆನ್ ಘೆಂವ್ಕ್ ಮ್ಹಾಕಾ ಭಾಗ್ ಲಾಭ್‍ಲ್ಲೆಂ. ಆತಾಂ ಮ್ಹಾಕಾ ಜೊ ದಾಯ್ಜಿ ದುಬಾಯ್ ಸಾಹಿತಿಕ್ ಪುರಸ್ಕಾರ್ ಫಾವೊ ಜಾಲಾ ತೊ ಮ್ಹಜ್ಯಾ ತರ್ಫೆನ್ ನವೀನ್ ಸಿಕ್ವೇರಾಕ್ ದಿಂವ್ಕ್ ತುಮ್ಚೆಲಾಗಿಂ ಹಾಂವ್ ವಿನಂತಿ ಕರ್ತಾಂ. ಕೊಂಕ್ಣಿ ವಾವ್ರಾಕ್ ನವಿ ದಿಶಾ, ನವೆಂ ತ್ರಾಣ್, ನವೆಂ ಚಿಂತಾಪ್, ನವಿ ಪಿಳ್ಗಿಚ್ ತಯಾರ್ ಜಾಂವ್ಕ್ ಆಸಾ. ಆನಿ ತ್ಯಾ ದಿಶೆನ್ ಆಮಿ ಸಮೇಸ್ತಾನಿ ಎಕಾ ಮ್ಹನಾಂತ್ ಥಕಾನಾಸ್ತಾನಾ ವಾವ್ರ್ ಕರುನ್ ಮುಕಾರ್ ವೆಚಿ ಗರ್ಜ್ ಆಸಾ ಆನಿ ತ್ಯಾ ದಿಶೆನ್ ಪುಡ್ಲ್ಯಾ ದಿಸಾಂನಿ ಆಮ್ಚೆ ಯುವಜಣ್ ಮುಕಾರ್ ಯೆತಾಲೆ ಆನಿ ಕೊಂಕ್ಣೆಕ್ ಉಂಚಾಯೆಕ್ ಪಾವಯ್ತಾಲೆ ಮ್ಹಳ್ಳ್ಯಾ ಭರ್ವಾಶ್ಯಾನ್ ಹಾಂವ್ ಆಸಾಂ” ಮ್ಹಳೆಂ.
ತಾಚೆಂ ಮಾನ್‍ಪತ್ರ್ ದಾಯ್ಜಿ ದುಬಾಯ್ ಸಂಘಟನಾಚೊ ಸಹ-ಸಂಚಾಲಕ್ ಸುನಿಲ್ ಫೆರ್ನಾಂಡಿಸ್ ಕೋಟಾ ಹಾಣೆ ವಾಚ್ಲೆಂ. ವೇದಿರ್ ಆಸ್‍ಲ್ಲ್ಯಾ ಸಯ್ರ್ಯಾಂನಿ ‘ದಾಯ್ಜಿ ದುಬಾಯ್ ಸಾಹಿತಿಕ್ ಪ್ರಶಸ್ತಿ – 2022’ ವಿಜೇತ್ ಶ್ರೀ ವಲ್ಲಿ ಕ್ವಾಡ್ರಸ್ ಹಾಚ್ಯಾ ಆಶೆ ಪ್ರಕಾರ್ ಮಾನೇಸ್ತ್ ನವೀನ್ ಸಿಕ್ವೆರಾ ಹಾಕಾ ಫುಲಾಂಚೊ ತುರೊ, ಮಾನ್‍ಪತ್ರ್, ಯಾದಿಸ್ತಿಕಾ ಆನಿ ರುಪಯ್ 75,000 ಹಜಾರಾಂಚಿ ಚೆಕ್ಕ್ ಹಸ್ತಾಂತರ್ ಕರುನ್ ಮಾನ್ ಕೆಲೊ.
ಮನೋರಂಜನಾಚೊ ವಾಂಟೊ ಜಾವ್ನ್ ಗಾಂವಾಂತ್ ಥಾವ್ನ್ ಆಯಿಲ್ಲ್ಯಾ ಆಸ್ಥಿತ್ವ, ಮಂಗ್ಳುರ್ ಪಂಗ್ಡಾ ಥಾವ್ನ್ ದೋನ್ ನಾಟಕ್ ಖೆಳೊನ್ ದಾಕಯ್ಲೆ. ಮಾನಾಧಿಕ್ ಬಾಪ್ ದೊತೊರ್ ಆಲ್ವಿನ್ ಸೆರಾವೊ ಹಾಣಿ ಬರವ್ನ್ , ಕ್ರಿಸ್ಟಿ ನೀನಾಸಂ ಹಾಣೆ ನಿರ್ದೇಶನ್ ಕೆಲ್ಲೊ ‘ಸಳ್ಗಿ’ ಆನಿ ರೋಹನ್ ಆಡ್ಕಬಾರೆ ಹಾಣೆ ತರ್ಜುಮೊ ಕರುನ್ ಮಲಯಾಳಮ್ ಮಾಂಚಿಯೆಚೊ ಫಾಮಾದ್ ನಿರ್ದೇಶಕ್ ಆರುಣ್‍ಲಾಲ್ ಹಾಣೆ ನಿರ್ದೇಶಿತ್ ಕೆಲ್ಲೊ ‘ಜುಗಾರಿ’ ನಾಟಕ್ ದುಬಾಯ್ ಪ್ರೇಕ್ಷಕಾಂಚಿಂ ಕಾಳ್ಜಾಂ ಮನಾಂ ಜಿಕ್ಚ್ಯಾಂತ್ ಸಫಲ್ ಜಾಲೆ.
ಸಳ್ಗಿ ನಾಟಕಾ ಉಪ್ರಾಂತ್ ಪೋಷಕಾಂಕ್ ಯಾದಿಸ್ತಿಕಾ , ಫುಲಾಂ ತುರೆ ದೀವ್ನ್ ಸನ್ಮಾನ್ ಕೆಲೊ.
ಜುಗಾರಿ ನಾಟಕಾ ಉಪ್ರಾಂತ್ ಕಲಾಕರಾಂಕ್ ಆನಿ ಮಾ.ಬಾ.ದೊ. ಆಲ್ವಿನ್ ಸೆರಾವೊ ಆನಿ ಆರುಣ್‍ಲಾಲ್ ಹಾಂಕಾಂ ಯಾದಿಸ್ತಿಕಾ ಆನಿ ಕಾಣಿಕ್ ದೀವ್ನ್ ಸನ್ಮಾನ್ ಕೆಲೊ. ಕ್ರಿಸ್ಟಿ ನೀನಾಸಂ ಹಾಣೆ ದಿಲ್ಲ್ಯಾ ಖಳ್ಮಿತ್ ನಾತ್‍ಲ್ಲ್ಯಾ ಸೆವೆಕ್ ಲಾಗೊನ್ ‘ಕಲಾ ಚತುರ್’ ಬಿರುದ್ ದೀವ್ನ್ ಪರ್ಗಟ್ ಮಾನ್ ಕೆಲೊ. ದಾಯ್ಜಿ ದುಬಾಯ್ ಕಾರ್ಯದರ್ಶಿ ಸಂತೋಷ್ ಪೆರ್ಲ ಹಾಣೆ ಮಾನ್ ಪತ್ರ್ ವಾಚ್ಲೆಂ. ಮುಕೆಲ್ ಸಯ್ರ್ ಮಾನೇಸ್ತ್ ಜೊಸೆಫ್ ಮಥಾಯಸ್, ಮಾನೇಸ್ತ್ ನೆಲ್ಸನ್ ರೊಡ್ರಿಕ್ಸ್, ಮಾನೇಸ್ತ್ ಲ್ಯಾನ್ಸಿ ಡಿ’ಸೋಜಾ, ಮಾನೇಸ್ತ್ ಡಯಾನ್ ಡಿ’ಸೋಜಾ ಆನಿ ಮಾನೇಸ್ತ್ ನಾನು ಮರೋಲ್ ತೊಟ್ಟಾಮ್ ಹಾಣಿ ಕ್ರಿಸ್ಟಿ ನೀನಾಸಂ ಹಾಕಾಂ ಫುಲಾಂಚೊ ತುರೊ, ಶಾಲ್, ಯಾದಿಸ್ತಿಕಾ , ಮಾನ್ ಪತ್ರ್ ಆನಿ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ.
ಸಭಾ ಕಾರ್ಯೆಂ ಮಾನೇಸ್ತ್ ಆನಿಲ್ ಪಿಂಟೊ ಕುಲ್ಶೇಕರ್, ಪೋಷಕಾಂಕ್ ಮಾನ್ ಕರ್ಚೆಂ ಕಾರ್ಯೆಂ ಮಾನೇಸ್ತಿಣ್ ವೆನಿಸ್ಸಾ ಡಿ’ಆಲ್ಮೇಡಾ ಆನಿ ಕಲಾಕರಾಂಕ್ ಸನ್ಮಾನ್ ಕಾರ್ಯೆಂ ಮಾನೇಸ್ತ್ ಮೆಲ್ವಿನ್ ಕಲಾಕುಲ್ ಹಾಣಿಂ ಚಲೊವ್ನ್ ವೆಲೆಂ.
ಡಯಾನ್ ಡಿ’ಸೋಜಾ ಮುಕಾಮರ್ , ವಾಲ್ಟರ್ ನಂದಳಿಕೆ , ಮೆಲ್ವಿನ್ ರೋಡ್ರಿಗಸ್ , ಸ್ಟ್ಯಾನಿ ಪಿಂಟೊ ನಿರುಡೆ ಆನಿ ಸ್ಟೀಫನ್ ಮಸ್ಕರೇನ್ಹಾಸ್ (ಹೇಮಾಚಾರ್ಯಾ) ಹಾಂಚ್ಯಾ ಪಯ್ಸಾದಿಶ್ಟಿನ್ ಘಡ್‍ಲ್ಲ್ಯಾ ದಾಯ್ಜಿ ದುಬಯ್ ಸಂಘಟನಾಂತ್ ಆತಾಂ ಚಾಳಿಸಾಂ ಲಾಗಿಂ ಸಾಂದೆ ಆಸಾತ್.
