“ಹ್ಯಾ ಸಂಸಾರಿಂ ಆಮ್ಚೆಂ ಜಿವಿತ್ ಜಾಂವ್ಕ್ ಜಾಯ್ ಎಕಾ ಪೆನ್ಸಿಲೆಪರಿಂ. ಪೆನ್ಸಿಲ್ ಬರೆಂ ಕರ್ತಾ, ಧಾರೆಂತ್ ತೀಕ್ಷ್ಣ್ ಜಾತಾ, ಅನೆಕ್ಲ್ಯಾಚಾ ತಾಬೆಂತ್ ಕಾಮ್ ಕರ್ತಾ ಆನಿ ಸಾಸ್ಣಾಕ್ ಉರ್ಚೆ ತಸಲೊ ಗುರ್ತ್ ಸೊಡುನ್ ವೆತಾ. ಜೆಜ್ವಿತ್ ಸಭೆಚೊ ಯಾಜಕ್ ಫಾ| ಜೆರೊಮ್ ಎಕಾ ಪೆನ್ಸಿಲೆಪರಿಂ ಆಪ್ಲೆಂ ಜಿವಿತ್ ಹ್ಯಾ ಸಂಸಾರಿಂ ಜಿಯೊನ್ – ಸಾಸ್ಣಾಕ್ ಉರ್ಚೆ ಗುರ್ತ್ ಸೊಡುನ್ ಗೆಲಾ. ಸಂವಿದಾನ್ ರಚ್ಣುಕೆಚ್ಯಾ ಕಾಮಾಂತ್ ಹಾತ್ ಮೆಳವ್ನ್, ಅಲ್ಪ್‌ಸಂಕ್ಯಾತ್ ವರ್ಗಾಚ್ಯಾ ಹಕ್ಕಾಂಚೆಂ ರಾಕಣ್ ಕರುನ್ ತಾಣೆ ಬರೆಂ ಕಾಮ್ ಕೆಲೆಂ, ಜೆಜುಚ್ಯಾ ಸಭೆಚ್ಯಾ ವ್ಹಡಿಲಾಂಚ್ಯಾ ಆನಿ ತಾಚೆಪ್ರಾಸ್ ಚಡ್ ದೆವಾಚ್ಯಾ ತಾಬೆಂತ್ ತೋ ಆಸ್ಲೆಲ್ಯಾನ್ ಹೆಂ ವರ್ತೆಂ ಕಾಮ್ ಕರುಂಕ್ ತಾಚ್ಯಾನ್ ಸಾದ್ಯ್ ಜಾಲೆಂ. ಪೆನ್ಸಿಲೆಪರಿಂ ತಾಣೇಂಯ್ ಆಪ್ಣಾಕ್‌ಚ್ ಧಾರಿಕ್ ಸಮರ್ಪಿಲೆಂ, ಕಶ್ಟ್ – ಅಕ್ಮಾನ್ ಸೊಸ್ಲೆ ತರೀ, ತೋ ತೀಕ್ಷ್ ಜಾಯಿತ್ತ್ ಗೆಲೊ ಆನಿ ಶೆವ್ಟಿಂ ಸಾಸ್ಣಾಕ್ ಉಡಾಸಾಂತ್ ಉರ್ಚೆ ತಸಲೊ ಗುರ್ತ್ ಸೊಡುನ್ ಗೆಲೊ. ಫಾ| ಜೆರೊಮಾಚೆಂ ಜಿವಿತ್ ಆಮ್ಚ್ಯಾಯ್ ಜಿವಿತಾಕ್ ಏಕ್ ದೇಕ್ ” ಮ್ಹಣಾಲೊ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ, ಮಂಗ್ಳುರ್ ದಿಯೆಸೆಜಿಚೊ ಧರ್ಮಾಧ್ಯಕ್ಷ್.
ದೊ| ಸಲ್ಡಾನ್ಹಾ, ಸಾಂ. ಲುವಿಸ್ ಕೊಲೆಜಿಚೊ, ಸ್ನಾತಕೋತ್ತರ್ ಉದ್ಯಮ್‌ಶಾಸ್ತ್ರ್ ವಿಭಾಗಾಚೊ ಪ್ರಾದ್ಯಾಪಕ್ ಆನಿ ಮುಕೆಲಿ ಪ್ರೊ| ಎಡ್ಮಂಡ್ ಫ್ರ್ಯಾಂಕ್ ಹಾಣಿ ಬರವ್ನ್, ಸಾಂ. ಲುವಿಸ್ ಪ್ರಕಾಶನ್ ಹಾಣಿ ಉಜ್ವಾಡಾಯಿಲ್ಲೊ, ಸಂವಿದಾನಾಚ್ಯಾ ರಚ್ಣುಕೆಂತ್ ಮಹತ್ವಾಚೆಂ ಯೋಗ್‌ದಾನ್ ದಿಲ್ಲೊ, ಸಂವಿದಾನ್ ಸಭಾ, ಮದ್ಯಂತರ್ ಲೋಕ್‌ಸಭಾ ಆನಿ ಸಂಯುಕ್ತ್ ರಾಷ್ಟ್ರಾಂತ್ ಭಾರತಾಚ್ಯಾ ನಿಯೋಗಾಚೊ ಸಾಂದೊ ಜಾವ್ನ್ ಕಾಮ್ ಕೆಲ್ಲೊ, ಮುಳಾನ್ ಮುಲ್ಕಿಚೊ ಜೆಜ್ವಿತ್ ಯಾಜಕ್ ಫಾ| ಜೆರೊಮ್ ಡಿಸೊಜಾಚೆಂ ಜಿವಿತ್ ಆನಿ ಭಾರತಾಚ್ಯಾ ಸಂವಿದಾನಾಕ್ ತಾಚ್ಯಾ ಯೊಗ್‌ದಾನಾ ವಿಶ್ಯಾಂತ್ ಬರಯಿಲ್ಲೊ ಬೂಕ್ Pride of Kanara, True son of India, Fr Jerome D Souza, S.J. ಲೊಕಾರ್ಪಣ್ ಕರುನ್ ಉಲಯ್ತಾಲೊ.
“ಎಕಾ ಮನ್ಶ್ಯಾಚಿ ಜಿಣ್ಯೆಕಥಾ ವಾಚ್ತಾನಾ ತಾಣಿ ಜಿಯೆಲ್ಲ್ಯಾ ಕಾಳಾ ವಿಶ್ಯಾಂತ್ ಸಮ್ಜೊಂಕ್ ಆಮ್ಕಾಂ ಅವ್ಕಾಸ್ ಲಾಭ್ತಾ. ಫಾ| ಜೆರೊಮಾ ವಿಶ್ಯಾಂತ್ ಬರಯಿಲ್ಲೊ ಬೂಕ್ ವಾಚ್ತಾನಾ ತಾಣೆ ಸಂವಿದಾನಾನ್ ಪ್ರತಿಪಾದನ್ ಕೆಲ್ಲಿಂ ಮೊಲಾಂ ಬುಕಾಂತ್ ಝಳ್ಕತಾತ್. ಫಕತ್ ಫಾ| ಜೆರೊಮ್ ಮಾತ್ ನ್ಹಯ್, ತಾಂಚೆಂ ಕುಟಮ್‌ಚ್ ಪವಿತ್ ಸಭೆಕ್ ಸಮರ್ಪಿತ್ ಮ್ಹಳ್ಯಾರೀ ಚೂಕ್ ಜಾಂವ್ಚಿ ನಾ. ಫಾ| ಜೆರೊಮಾಚ್ಯಾ ದೊಗಾ ಭಾವಾಂನಿ ಯಾಜಕ್ ಆನಿ ಭಯ್ಣಿನ್ ಆಪೊಸ್ತಲಿಕ್ ಕಾರ್ಮೆಲಿತ್ ಮೆಳಾಚಿ ಧರ್ಮ್ ಭಯ್ಣ್ ಜಾವ್ನ್ ಪವಿತ್ ಸಭೆಚಿ ಸೆವಾ ಕೆಲ್ಲೆ ಖಾತಿರ್, ಪವಿತ್ ಸಭೆಚೊ ಪ್ರತಿನಿಧಿ ಜಾವ್ನ್ ಹಾಂವ್ ಕುಟ್ಮಾಚೊ ಅಬಾರ್ ಮಾಂದ್ತಾಂ ಆನಿ ಕುಟ್ಮಾಕ್ ಉಲ್ಲಾಸ್ ಪಾಟಯ್ತಾಂ” ಮ್ಹಣ್ ದೊ| ಸಲ್ಡಾನ್ಹಾ ಹ್ಯಾ ಸುವಾಳ್ಯಾರ್ ಮ್ಹಣಾಲೊ.
ಕಾರ್ಯಾಕ್ ಆಪೊಸ್ತಲಿಕ್ ಕಾರ್ಮೆಲಿತ್ ಮೆಳಾಚಿ ಕರ್ನಾಟಕ ಪ್ರಾಂತೀಯ್ ವ್ಹಡಿಲ್ನ್ ಭ| ಮರಿಯ ಶಮಿತ, ಫಾ| ಜೆರೊಮಾಚಿ ಮಾಂಯ್ ಫಿರ್ಗಜ್ ಮುಲ್ಕಿಚೊ ವಿಗಾರ್ ಮಾ| ಬಾ| ಸಿಲ್ವೆಸ್ಟರ್ ಡಿಕೊಸ್ಟಾ, ಫಾ| ಜೆರೊಮಚ್ಯಾ ಕುಟ್ಮಾಚೊ ಪ್ರತಿನಿಧಿ ಶ್ರೀ ಎಡ್ವಿನ್ ಡಿ ಸೊಜಾ, ಸಾಂ. ಲುವಿಸ್ ಕೊಲೆಜಿಚೊ ರಿಜಿಸ್ಟ್ರಾರ್ ದೊ| ಆಲ್ವಿನ್ ಡೆ’ಸಾ ಆನಿ ಸಾಂ. ಲುವಿಸ್ ಪ್ರಕಾಶನ ಹಾಚಿ ನಿರ್ದೇಶಕಿ ದೊ| ವಿದ್ಯಾ ವಿನುತ ಡಿ’ಸೊಜಾ ವೆದಿರ್ ಹಾಜರ್ ಅಸ್ಲಿಂ.
ಸಾಂ. ಲುವಿಸ್ ಕೊಲೆಜಿಚ್ಯಾ ಎರಿಕ್ ಮಥಾಯಸ್ ಹೊಲಾಂತ್ ಚಲ್ಲೆಲ್ಲ್ಯಾ ಕಾರ್ಯಾವಳಿಕ್ ಕೊಲೆಜಿಚೊ ಪ್ರಾಚಾರ್ಯ್ ಮಾ| ದೊ| ಪ್ರವೀಣ್ ಮಾರ್ಟಿಸ್ ಹಾಣಿ – ಸಾಂ. ಲುವಿಸ್ ಪ್ರಕಾಶನಾಚೊ ಉದೆವ್, ಪಾಟ್ಲ್ಯಾ ದೋನ್ ವರ್ಸಾಂಚ್ಯಾ ಆವ್ಧೆಂತ್, ದೊ| ವಿದ್ಯಾ ವಿನುತ ಡಿ’ಸೊಜಾಚ್ಯಾ ಮುಕೆಲ್ಪಣಾರ್ 17 ಮೌಲಿಕ್ ಬೂಕ್ ಫಾಯ್ಸ್ ಕರುನ್ ಕೆಲ್ಲೆಂ ಸಾಧನ್, ಫಾ| ಜೆರೊಮ್ ಆನಿ ಸಾಂ. ಲುವಿಸ್ ಕೊಲೆಜ್, ಮಂಗ್ಳುರ್ಚೆಂ ನಾತೆಂ – ಹೆ ವಿಶ್ಯಾಂತ್ ಸವಿಸ್ತಾರ್ ಮಾಹೆತ್ ದಿಲಿ. ಭಾರತಾಚ್ಯಾ ಸಂವಿದಾನಾಂತ್ ಜೆಜ್ವಿತ್ ಯಾಜಕಾಚೆಂ ಯೋಗ್‌ದಾನ್ ಆಸಾ ಮ್ಹಣ್ಚಿ ಗಜಾಲ್ ಆಮ್ಕಾಂ ಜೆಜ್ವಿತಾಂಕ್ ವರ‍್ತ್ಯಾ ಅಭಿಮಾನಾಚಿ ಮ್ಹಣ್ ಮಾ| ದೊ| ಮಾರ್ಟಿಸ್ ಹಾಣಿ ಮ್ಹಳೆಂ ಆನಿ ವೆದಿರ್ ತಶೆಂ ಸಭೆಂತ್ ಹಾಜರ್ ಆಸ್ಲೆಲ್ಯಾ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ.
ಫಾ| ಜೆರೊಮ್ ಬಾಂದ್ಪ್ಯಾಂನಿ ನಿರಾಕರ್ಸಿಲ್ಲೊ ಫಾತೊರ್ – ಡೊ| ರೊನಾಲ್ಡ್ ಅನಿಲ್ ಫೆರ್ನಾಂಡಿಸ್
ಬುಕಾಚಿ ಪ್ರೇರಕ್ ಸಕತ್, ಪೋಶಕ್ ತಶೆಂಚ್ ಸಾಂ. ಲುವಿಸ್ ಕೊಲೆಜಿಚೊ ಆದ್ಲೊ ವಿದ್ಯಾರ್ಥಿ, ಪತ್ರಿಕೋದ್ಯಮ್ ವಿಭಾಗಾಚೊ ಆದ್ಲೊ ಪ್ರಾಧ್ಯಾಪಕ್ ಆನಿ ಪ್ರಸ್ತುತ್ ಕೆಪಿಸಿಸಿ ಸಾಂದೊ – ಡೊ| ರೊನಾಲ್ಡ್ ಅನಿಲ್ ಫೆರ್ನಾಂಡಿಸ್ ಹಾಣಿ – ” ಕೆಪಿಸಿಸಿ ಅಧ್ಯಕ್ಶ್ ಜಾವ್ನ್ ನಿಯುಕ್ತ್ ಜಾಂವ್ಚ್ಯಾ ಎಕಾ ಹಫ್ತ್ಯಾ ಆದಿಂ ಡೆಕ್ಕನ್ ಹೆರಾಲ್ಡ್ ಪತ್ರಾ ಖಾತಿರ್ ಫಾ| ಜೆರೊಮಾ ವಿಶ್ಯಾಂತ್ ಲೇಖನ್ ತಯಾರ್ ಕರುಂಕ್ ಮ್ಹಣ್ ಮುಲ್ಕಿ ಪಾವ್‌ಲ್ಲೊಂ. ಪೂಣ್ ತಾಚೆವಿಶ್ಯಾಂತ್ ಸಮ್ಜಾತಾನಾ, ಫಾ| ಜೆರೊಮ್ ಏಕ್ ಲೇಕನಾಂತ್ ಆಟಾಪ್ಚ್ಯಾ ವ್ಯಕ್ತಿತ್ವಾಚೊ ನಯ್, ಬಗಾರ್ ತಾಚೆವಿಶ್ಯಾಂತ್ ಏಕ್ ಬರೊ ಬೂಕ್‌‌ಚ್ ಯೇಂವ್ಕ್ ಜಾಯ್ ಆನಿ ತಾಚೆ ವಿಶ್ಯಾಂತ್ ಚಡ್ ಆನಿ ಚಡ್ ಲೊಕಾನ್ ಜಾಣಾ ಜಾಂವ್ಕ್ ಜಾಯ್ ಮ್ಹಣ್ ಮ್ಹಕಾ ಭೊಗ್ಲೆಂ. ಪೂಣ್ ತ್ಯಾಚ್ ವೆಳಾರ್ ಕರ್ನಾಟಕ ಲೋಕ್‌ಸೇವಾ ಆಯೋಗಾಂತ್ ಮ್ಹಜೆಂ ನೇಮಕ್ಪಣ್ ಜಾಲ್ಲ್ಯಾನ್ ಆಲೊಚೆನ್ ಥೊಡ್ಯಾ ವೆಳಾಕ್ ಪಾಟಿಂ ಪಡ್ಲಿ ತರೀ, ಸಪಣ್ ಸಾಂಡುಂಕ್ ನಾ. ಆದ್ಲ್ಯಾ ವರ್ಸಾ ಅಚಾನಕ್ ಮ್ಹಳ್ಳೆಪರಿಂ ಪ್ರೊ| ಎಡ್ಮಂಡ್ ಹಾಂಚೊ ಸಂಪರ್ಕ್ ಜಾಲೊ ಆನಿ ಆನಿ ತಾಣಿ ಮ್ಹಜ್ಯಾ ಸಪ್ಣಾಕ್ ಆತಾಂ ರೂಪ್ ದಿಲಾಂ ” ಮ್ಹಣ್ ಆಪ್ಲಿ ಅಭಿಪ್ರಾಯ್ ಉಚಾರ್ಲಿ.
ಮುಕಾರುನ್ ಡೊ| ರೊನಾಲ್ಡ್ ಹಾಣಿ ” ವಾಂಜೆಲಾಂತ್ ಏಕ್ ಉತರ್ ಆಸಾ, ಬಾಂದ್ಪ್ಯಾಂನಿ ನಿರಾಕರ್ಸಿಲ್ಲೊ ಫಾತೊರ್ ಜಾಂವ್ಕ್ ಪಾವ್ಲೊ ಮುಲ್ಯಾ ಫಾತೊರ್. ಫಾ| ಜೆರೊಮಾಚಿ ಜಿಣಿ ಪಳಯ್ಲ್ಯಾರ್ ತಾಕಾ ಹಾಂಗಾ ಥಾವ್ನ್ ಅಮಾನತ್ ಕೆಲ್ಲೊ ದಾಕ್ಲೊ ಆಸಾ. ತಾಕಾ ಹಾಂಗಾಥಾವ್ನ್ ಅಮಾನತ್ ಕರಿನಾತ್ಲ್ಯಾರ್ ತೋ ತ್ರಿಚಿ ಪಾವ್ತೊ ನಾ, ತ್ರಿಚಿ ಥಾವ್ನ್ ಚೆನ್ನಯ್ ಆನಿ ಚೆನ್ನಯ್ ಥಾವ್ನ್ ಡೆಲ್ಲಿ ಪಾರ್ಲಿಮೆಂಟಾಕೀ ಪಾವ್ತೊ ನಾ ಕೊಣ್ಣಾ. ಫಾ| ಜೆರೊಮಾಕ್ ಹಾಂವೆ ಪಳೆಂವ್ಕ್ ನಾ. ಪೂಣ್ ಹಾಂಗಾಸರ್ ಶಿಕ್ತಾನಾ ತಾಚ್ಯಾ ಕುಟ್ಮಾಚೊಚ್ ಯಾಜಕ್ ಫಾ| ಲೊರೆನ್ಸಾಚಿ ಶಿಸ್ತ್ ಪಳೆವ್ನ್ ಫಾ| ಜೆರೊಮಾಚಿ ಶಿಸ್ತ್ ಆನಿ ತಾಚೆಂ ಜಿವಿತ್ ಖಂಯ್ಚ್ಯಾ ಪಾಂವ್ಡ್ಯಾಂಚೆಂ ಆಸ್‌ಲ್ಲೆಂ ಜಾಂವ್ಕ್ ಪುರೊ ಮ್ಹಣ್ ಅಂದಾಜ್ ಕರುಂಯೆತಾ. ಮ್ಹಜೊ ಸಾಂಗಾತಿ ಹ್ಯಾ ಸಭೆಂತ್ ಹಾಜರ್ ಆಸ್ಚೊ ರಾಮ್‌ಬಾಬು ತಾಚೊ ವಿದ್ಯಾರ್ಥಿ, ಫಾ। ಜೆರೊಮಾ ವಿಶ್ಯಾಂತ್ ತಾಚಿ ಅಭಿಪ್ರಾಯ್ ಆಯ್ಕಾಲ್ಯಾ ಉಪ್ರಾಂತ್ ಮ್ಹಜೊ ಅಂದಾಜ್ ಖರೊ ಜಾಲೊ. ಫಾ| ಜೆರೊಮಾ ವಿಶ್ಯಾಂತ್ ಮ್ಹಾಕಾ ತೀನ್ ಸಪ್ಣಾಂ ಆಸ್‌ಲ್ಲಿಂ. ತಾಂತ್ಲೆಂ ಏಕ್ ಆಜ್ ಪೂರ್ಣ್ ಜಾಲೆಂ. ಪಯ್ಲೆಂ ಆಸ್‌ಲ್ಲೆಂ – ತಾಚೆಂ ಜಿವಿತ್ ಆನಿ ಸಾಧನಾ ವಿಶ್ಯಾಂತ್ ಲೊಕಾಕ್ ಕಳಂವ್ಚೆಂ. ಹ್ಯಾ ಬುಕಾ ಮಾರಿಫಾತ್ ತೆಂ ಕಾಮ್ ಆಜ್ ಜಾಲಾಂ. ದುಸ್ರೆಂ – ಕೊಡ್ಯಾಳಾಂತ್ ಖಂಯ್ಚ್ಯಾ ತರೀ ಎಕಾ ರಸ್ತ್ಯಾಕ್ ತಾಚೆಂ ನಾಂವ್ ದಿಂವ್ಚೆಂ. ತೇಂಯ್ ಕಾಮ್ ಜಾತೆಲೆಂ. ಮ್ಹಜ್ಯಾ ತಾಂಕಿ ಭಿತರ್ಲೆಂ ಪ್ರೇತನ್ ತೆ ಬಾಬ್ತಿನ್ ಹಾಂವ್ ಕರುನ್ ಆಸಾಂ. ಆನಿ ತಿಸ್ರೆಂ – ದಿಯೆಸೆಜಿ ಮಟ್ಟಾರ್ ವಾ ಫಿರ್ಗಜೆ ಮಟ್ಟಾರ್ ತರೀ ಎಕಾ ಸರ್ವಜಣಿಕ್ ಥಳಾರ್ ತಾಚ್ಯಾ ಉಡಾಸಾಕ್ ಏಕ್ ಸ್ಮಾರಕ್ ಉಬಾರ್ಚೆಂ, ಪುತ್ಳೊ ವಾ ಹೆರ್ ಕಿತೇಂಯ್”
ಧರ್ಮಾಧ್ಯಕ್ಷ್ ದೊ| ಸಲ್ಡಾನ್ಹಾ ಆನಿ ಹಾಣಿ ಪಣ್ತಿ ಪೆಟಂವ್ಚೆಂ ಮಾರಿಫಾತ್ ಕಾರ್ಯಾಕ್ ಚಾಲನ್ ದಿಲೆಂ. ಪ್ರೊ| ಎಡ್ಮಂಡ್ ಫ್ರ್ಯಾಂಕ್ ಹಾಣಿ, ಫಾ। ಜೆರೊಮಾಕ್ ಪಯ್ಲೆ ಪಾವ್ಟಿಂ ಮೆಳ್‌ಲ್ಲಿ, ದುಸ್ರೆ ಪಾವ್ಟಿಂ ಮೆಳ್‌ಲ್ಲಿ ಆನಿ ಉಪ್ರಾಂತ್ ಲೊಯೊಲಾ ಕೊಲೆಜಿಂತ್ ಅರ್ಥ್‌ಶಾಸ್ತ್ರ್ ಶಿಕ್ತಾನಾ ಫಾ| ಜೆರೊಮಾ ಸಾಂಗಾತಾ ಖರ್ಚಿಲ್ಲ್ಯೊ ಘಡಿಯೊ ಯಾದ್ ಕರುನ್, ರಾಜಗೋಪಾಲಾಚಾರಿ, ನೆಹರೂ ಹಾಂಚೆಸಾಂಗಾತಾ ಫಾ| ಜೆರೊಮಾಕ್ ಆಸ್‌ಲ್ಲಿ ಸಳಾವಳ್, ಝುಜಾ ಸಮಿತಿಚೊ ಸಾಂದೊ ಜಾವ್ನ್ ತಾಣಿ ಕೆಲ್ಲೊ ವಾವ್ರ್, ಫ್ರಾನ್ಸ್, ಪೊರ್ಚುಗಲ್ ಆನಿ ರೊಮಾಮಧೆಂ ಏಕ್ ಸಾಂಕೊವ್ ಜಶೆಂ ಕಾಮ್ ಕರುನ್ ನೆಹರೂಕ್ ತಾಣೆ ಕೆಲ್ಲಿ ಕುಮಕ್ ಆನಿ ಹೆರ್ ಜಾಯ್ತ್ಯೊ, ಆಮ್ ಲೊಕಾಕ್ ಕಳಿತ್ ನಾತ್‌ಲ್ಲ್ಯಾ ಗಜಾಲಿಂಚೆರ್ ವಿಸ್ತಾರ್ ಉಲವ್ಪ್ ದೀವ್ನ್, ಜೊಕ್ತೆಂ ಅಧ್ಯಯನ್ ಆನಿ ಉಲ್ಲೇಕ್ ಘೆವ್ನ್ ಬುಕಾಂತ್ ಸರ್ವ್ ಗಜಾಲಿ ಆಪ್ಣೆ ಬರಯ್ಲ್ಯಾತ್ ಮ್ಹಳೆಂ ಆನಿ ಬೂಕ್ ಘೆವ್ನ್ ವಾಚುಂಕ್ ವಿನಂತಿ ಕೆಲಿ.
ಕಾರ್ಯಾಂತ್ ಬುಕಾಚೆಂ ಮುಕ್‌ಪಾನ್ ಪಿಂತ್ರಾಯಿಲ್ಲೊ ಕಲಾಕಾರ್ ಶ್ರೀ ಜೋನ್ ಚಂದ್ರನ್ ಆನಿ ಕೊಂಕ್ಣಿ ತರ್ಜಣ್‌ದಾರ್ ಶ್ರೀ ಎಚ್ಚೆಮ್, ಪೆರ್ನಾಲ್ ಹಾಂಕಾ ಸೊಂಶಿ ದೀವ್ನ್ ಮಾನ್ ಪಾಟಯ್ಲೊ. ಕಾರ್ಯಾಂತ್ ಸಾಂ. ಲುವಿಸ್ ಕೊಲೆಜಿಚ್ಯಾ ಮ್ಯೂಸಿಯಾಂತ್ ದವರ್ಚೆ ಖಾತಿರ್ ಫಾ। ಜೆರೊಮಾಚಿ ತಸ್ವೀರ್ ದರ್ಮಾಧ್ಯಕ್ಷ್ ಡೊ। ಸಲ್ದಾನ್ಹಾನ್ ಹ್ಯಾ ಸುವಾಳ್ಯಾರ್ ಅನಾವರಣ್ ಕೆಲಿ.
ಕಾರ್ಯಾಕ್ ಮುಕೆಲ್ ಸೊಯ್ರಿ ಜಾವ್ನ್ ಹಾಜರ್ ಆಸ್ಲೆಲಿ ಆಪೊಸ್ತಲಿಕ್ ಕಾರ್ಮೆಲಿತ್ ಮೆಳಾಚಿ ಕರ್ನಾಟಕ ಪ್ರಾಂತೀಯ್ ವ್ಹಡಿಲ್ನ್ ಭ| ಮರಿಯ ಶಮಿತ ಹಿಣಿ ಫಾ| ಜೆರೊಮಾಚ್ಯಾ ದೆವೊತ್ ಕುಟ್ಮಾಚೊ ಉಲ್ಲೇಕ್ ಕರುನ್ ಫಾ| ಜೆರೊಮಾಚಿ ಭಯ್ಣ್ ಭ| ವಿಯೊಲಾ ವಿಶ್ಯಾಂತ್ ವಿವರ್ ದಿಲೊ. ಆಪ್ಲ್ಯಾ ಜಿವಿತಾಚಿಂ ನಿಮಾಣಿಂ ವರ್ಸಾಂ ಉಡುಪಿಂತ್ ಸಾರ್‌ಲ್ಲಿ ತಿ 1995 ವ್ಯಾ ವರ್ಸಾ ಆಪ್ಲ್ಯಾ 92 ವ್ಯಾ ವರ್ಸಾಂ ಪ್ರಾಯೆರ್ ಸಂಸಾರಾಕ್ ಅಂತರ್ಲಿ ಮ್ಹಳೆಂ. ತಿಚ್ಯಾ ಸಂಪರ್ಕಾಕ್ ಆಯಿಲ್ಲ್ಯಾ ಜಾಯ್ತ್ಯಾಂಕ್ ಭ| ವಿಯೊಲಾನ್ ಆಪ್ಲೊ ಭಾವ್ ಫಾ| ಜೆರೊಮಾ ವಿಶ್ಯಾಂತ್ ಸಾಂಗ್‌ಲ್ಲೆಂ ಹಾಂವೆ ಆಯ್ಕಾಲಾಂ ಮ್ಹಣ್ ಭ| ಮರಿಯ ಶಮಿತ ಹ್ಯಾ ಸಂದರ್ಭಾರ್ ಮ್ಹಣಾಲಿ.
ಮುಲ್ಕಿ ಫಿರ್ಗಜೆಚೊ ವಿಗಾರ್ ಮಾ| ಬಾ| ಸಿಲ್ವೆಸ್ಟರ್ ಡಿಕೊಸ್ಟಾ ಆನಿ ಫಾ| ಜೆರೊಮಾಚ್ಯಾ ಕುಟ್ಮಾಚೊ ಪ್ರತಿನಿಧಿ ಶ್ರೀ ಎಡ್ವಿನ್ ಡಿಸೊಜಾ ಹಾಣಿ ಮುಲ್ಕಿಂತ್ ಫಾ| ಜೆರೊಮಾನ್ ಜಲ್ಮೊನ್ ವ್ಹಡ್ ಜಾಲ್ಲ್ಯಾ ಘರಾ ವೆಗಿಂಚ್ ಚಲೊಂಕ್ ಆಸ್ಚ್ಯಾ ಕೊಂಕ್ಣಿ ಬುಕಾಚ್ಯಾ ಉಗ್ತಾವಣ್ ಕಾರ್ಯಾವಳಿಕ್ ಫಾ| ಜೆರೊಮಾಚ್ಯಾ ಅಭಿಮಾನಿಂಕ್, ವಿದ್ಯಾರ್ಥಿಂಕ್ ಆಪವ್ಣೆಂ ಪಾಟಯ್ಲೆಂ ಆನಿ ಮುಲ್ಕಿ ಫಿರ್ಗಜೆಚೆಂ ನಾಂವ್ ಸಂಸಾರಾರ್ ಗಾಜಯಿಲ್ಲ್ಯಾ ಫಾ| ಜೆರೊಮಾಚಿ ಹೊಗ್ಳಿಕ್ ಉಚಾರ್ಲಿ.
ಸಾಂ. ಲುವಿಸ್ ಪ್ರಕಾಶನಾಚಿ ನಿರ್ದೇಶಕಿ ದೊ| ವಿದ್ಯಾ ವಿನುತ ಡಿ’ಸೊಜಾ ಹಿಣೆ ದಿನ್ವಾಸ್ ಪಾಟಯ್ಲೆ. ಡೊ| ಮೋನಾ ಮೆಂಡೊನ್ಸಾ ಹಿಣೆ ಕಾರ್ಯೆಂ ಚಲವ್ನ್ ವೆಲೆಂ.
ಅಪ್ರೂಪಾಚಿಂ ಥೊಡಿಂ ಚಿತ್ರಾಂಯ್ ಆಟಾಪುನ್ ಆಸ್ಚ್ಯಾ 144 ಪಾನಾಂಚ್ಯಾ ಬುಕಾಚೆಂ ಮೋಲ್ ರು. 200/- ಆಸುನ್, ಬುಕಾಚ್ಯಾ ಪ್ರತಿಯಾಂ ಖಾತಿರ್ ಸಾಂ. ಲುವಿಸ್ ಪ್ರಕಾಶನಾಚ್ಯಾ 0824 – 4117701 ಟೆಲಿಫೊನ್ ನಂಬ್ರಾಕ್ ವಾ aloysiusprakashana@staloysius.edu.in ಹ್ಯಾ ಇ ಮೇಲಾಕ್ ಸಂಪರ್ಕ್ ಕರ್ಯೆತ್.
ತಸ್ವಿರ‍್ಯೊ : ರವಿ
