“ದೆವಾಚೆಂ ಉತರ್ ಜಾವ್ನಾಸಾ ಸುರ್ಯಾಚ್ಯಾ ವೊತಾಪರಿಂ. ಕೋಣ್ ವೊತಾಕ್ ಮೋವ್ ಜಾತಾ, ಕೋಣ್ ವೊತಾಕ್ ಕಠೋರ್ ಜಾತಾ; ಪವಿತ್ ಪುಸ್ತಕ್ ವಾಚ್‌ಲ್ಲೆ ಸಗ್ಳೆ ಬರೆಚ್ ಜಾವ್ನ್ ಬದಲ್ತಾತ್ ಮ್ಹಣ್ ಸಾಂಗೊಂಕ್ ಜಾಯ್ನಾ. ಥೊಡೆ ಅಪ್ವಾದ್‌ಯೀ ಆಸ್ತಾತ್” ಮ್ಹಣಾಲೊ ಮಂಗ್ಳುರ್ ಧರ್ಮ್‌ಪ್ರಾಂತ್ಯಾಚೊ ಧರ್ಮಾಧ್ಯಕ್ಷ್ ಅ|ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ.
ದೊ| ಸಲ್ಡಾನ್ಹಾ ಮಿಲಾರ್ ಸೆನೆಟ್ ಹೊಲಾಂತ್ ಮರಿಯಾಣ್ ಪಾವ್ಲ್ ಲುದ್ರಿಗ್ ಹಾಣಿ ಬರವ್ನ್, ಮಂಗ್ಳುರ್ಚ್ಯಾ ಸೆವಕ್ ಪ್ರಕಾಶನಾನ್ ಫಾಯ್ಸ್ ಕೆಲ್ಲೊ ಜೆಜು ಕ್ರಿಸ್ತಾಚೆಂ ಜಿವಿತ್ – ದೇವ್ ಮನ್ಶಾಂತ್ ಆಯ್ಲೊ ಪುಸ್ತಕ್ ಲೊಕಾರ್ಪಣ್ ಕರುನ್ ಉಲಯ್ತಾಲೊ.
ಸಾಂ. ಜೆರೊಮಾನ್ ಮ್ಹಳಾಂ – “ಪವಿತ್ ಪುಸ್ತಕಾವಿಶಿಂ ನೆಣಾರ್ಪಣ್ ಮ್ಹಳ್ಯಾರ್ ಕ್ರಿಸ್ತಾವಿಶಿಂ ನೆಣಾರ್ಪಣ್” ಪವಿತ್ ಪುಸ್ತಕ್ ವಾಚುನ್ ಜಾಣಾ ಜಾಂವ್ಚೆಂ ಮ್ಹಳ್ಯಾರ್ ಕ್ರಿಸ್ತಾಕ್ ಜಾಣಾ ಜಾಲ್ಲೆಪರಿಂ. ಆನಿ ಕ್ರಿಸ್ತಾಕ್ ಸಮ್ಜೊಂಕ್ ‘ಜೆಜು ಕ್ರಿಸ್ತಾಚೆಂ ಕಾಕುಳ್ತಿಚೆಂ ಮುಖಮಳ್’ ಹ್ಯಾ ವಿಶಯಾಚೆರ್ ಭೊರ್ ಘಾಲ್ನ್ ಮರಿಯಾಣ್ ಪಾವ್ಲ್ ಲುದ್ರಿಗ್ ಹಾಣಿ ಕೊಂಕ್ಣೆಂತ್ ಬರಯಿಲ್ಲೊ ಬೂಕ್ ‘ದೇವ್ ಮನ್ಶಾಂತ್ ಆಯ್ಲೊ – ಜೆಜು ಕ್ರಿಸ್ತಾಚೆಂ ಜಿವಿತ್’ ಖಂಡಿತ್ ಆದಾರಿ ಜಾತೊಲೊ. ತಶೆಂ ಮ್ಹಣ್ ಪ್ರಸ್ತುತ್ ಬೂಕ್ ಪವಿತ್ ಪುಸ್ತಕಾಕ್ ಪರ್ಯಾಯ್ ನಯ್, ದೊತೊರ್ನಿಚೊ ಬೂಕ್‌ಯೀ ನಯ್ ಮ್ಹಣ್ ಖುದ್ ಬರಯ್ಣಾರಾನ್ ಮ್ಹಳಾಂ ತೆಂ ಗುಮಾನಾಂತ್ ಘೆಂವ್ಚೆಂ. ದೆವಾಕ್ ಖಂಯ್ಚೀಯ್ ಹೆರ್ ಜೀವಿ ಜಾವ್ನ್ ಸಂಸಾರಾಕ್ ಯೆವ್ಯೆತೆಂ, ಪೂಣ್ ಮನ್ಶ್ಯಾಚೆ ಕಶ್ಟ್ ಸಮ್ಜೊಂಕ್ ತೋ ಮನಿಸ್‌ಚ್ ಜಾವ್ನ್ ಆಯ್ಲೊ. ಹೊ ವಿಶಯ್ ಬೋವ್ ಸಾದ್ಯಾ ಉತ್ರಾಂನಿ, ಏಕ್ ಕಾಣಿ ಜಶೆಂ, ನಿರೂಪಣ್ ಕರ್ಚ್ಯಾ ಆಪುರ್ಬಾಯೆಚ್ಯಾ ಶಯ್ಲೆಂತ್ ಬರಯ್ಣಾರಾನ್ ಹ್ಯಾ ಪುಸ್ತಕಾಂತ್ ಬರಯ್ಲಾ”
“ಜೊ ಸೊಮ್ಯಾಕ್ ಭೆಟ್ತಾ, ತೊ ಬದಲ್ತಾ. ತಶೆಂ ಮ್ಹಣೊನ್ ಪವಿತ್ ಪುಸ್ತಕ್ ವಾಚ್‌ಲ್ಲೆ ಸಗ್ಳೆ ಬದಲ್ತಾತ್ ಮ್ಹಣ್ ನಯ್. ಥೊಡೆ ಪವಿತ್ ಪುಸ್ತಕ್ ಕ್ರಿಸ್ತಾಕ್ ಸಮ್ಜೊಂಕ್ ನಯ್ ಬಗಾರ್ ಪವಿತ್ ಸಭಾ ಆನಿ ತಿಚ್ಯಾ ಸಾಂದ್ಯಾಥಂಯ್ ಫಕತ್ ಚುಕಿ ಸೊಧುಂಕ್ ಮ್ಹಣ್‌ಚ್ ವಾಚ್ತಾತ್, ಅಭ್ಯಾಸ್ ಕರ್ತಾತ್. ಭಾರತಾಂತೀ ಥೊಡ್ಯಾ ಬರಯ್ಣಾರಾಂನಿ ಪವಿತ್ ಪುಸ್ತಕ್ ವಾಚುನ್ ಅಶೆಂ ಕೆಲ್ಲೆಂ ಆಸಾ, ಬೂಕ್ ಬರಯಿಲ್ಲೆ ದಾಕ್ಲೆಯ್ ಆಸಾತ್” ಮ್ಹಣ್ ಧರ್ಮಾಧ್ಯಕ್ಷ್ ದೊ| ಸಲ್ಡಾನ್ಹಾನ್ ಮ್ಹಳೆಂ.
ಮುಕಾರುನ್ ಬುಕಾಚೊ ಬರಯ್ಣಾರ್ ಮರಿಯಾಣ್ ಪಾವ್ಲ್ ಲುದ್ರಿಗಾ ವಿಶ್ಯಾಂತ್ ಅಭಿಮಾನ್ ಜಾಯ್ರ್ ಕರುನ್ ಧರ್ಮಾಧ್ಯಕ್ಶ್ ದೊ| ಸಲ್ಡಾನ್ಹಾ ಹಾಣಿ ಮ್ಹಳೆಂ ” ಹಾಂವ್ ಎಮ್. ಪಿ. ರೊಡ್ರಿಗಸ್ – ಕೊಂಕ್ಣಿ ಬರಯ್ಣಾರಾಚೆಂ ಫಾಮಾದ್ ನಾಂವ್ ಆಯ್ಕೊನ್ ಜಾಣಾಸ್ಲೊಂ. ತಾಕಾ ಪಯ್ಲೆ ಪಾವ್ಟಿಂ ಮೆಳ್ತಾನಾ ತಾಣಿ ಪುಸ್ತಕ್ ಬರಂವ್ಕ್ ವಿಂಚ್ಲಲೊ ವಿಶಯ್ ಆನಿ ತಾಚ್ಯಾ ಜಿವಿತಾಚಿ ಚಾಲ್ ಎಕಾಮೆಕಾಕ್ ತಾಳ್ ಪಡ್ತಾತ್ ತೆಂ ಸಮ್ಜಾಲೊಂ. ಬರ್ಪಾಚೊ ವಿಶಯ್ ಆನಿ ಜಿವಿತಾಚಿ ಚಾಲ್ ತಾಳ್ ಪಡ್ತಾನಾ ಬರ್ಪಾಕ್ ಬದ್ದತಾ ಅಪಾಪಿಂ ಯೆತಾ.”
“ಹ್ಯಾ ಬುಕಾ ಸಂಬಂದಿ ದೋನ್ ಗಜಾಲಿ ಮ್ಹಾಕಾ ಖೂಬ್ ಆಂವಡ್ಲ್ಯೊ. ಪಯ್ಲ್ಯಾನ್ – ಹ್ಯಾ ಬುಕಾಚೆಂ ಕಾಮ್ ಸಂಪವ್ನ್, ಭಲಾಯ್ಕೆಚ್ಯಾ ಕಾರಣಾಕ್ ಲಾಗೊನ್ ಪುಸ್ತಕ್ ಛಾಪೊನ್ ಯೆಂವ್ಚ್ಯಾ ಆದಿಂಚ್, ಛಾಪ್ಖಾನ್ಯಾಚೊ ಸಂಪೂರ್ಣ್ ಅಯ್ವಜ್ ಬರಯ್ಣಾರಾನ್ ಫಾರಿಕ್ ಕೆಲ್ಲಿ ಗಜಾಲ್ ಆನಿ ದುಸ್ರ್ಯಾನ್ – ಕ್ರಿಸ್ತಾಚ್ಯಾ ಜಿವಿತಾಚೆರ್ ಬರಯಿಲ್ಲೊ ಪುಸ್ತಕ್ ವಿಕುನ್ ಯೆಂವ್ಚ್ಯಾ ದುಡ್ವಾಕ್ ಆಪುಣ್ ಹಕ್‌ದಾರ್ ನಯ್ ಬಗಾರ್ ಕೊಣಾಖಾತಿರ್ ದೇವ್ ಮನಿಸ್ ಜಾವ್ನ್ ಆಯಿಲ್ಲೊಗೀ ತೇಚ್ ನೀಜ್ ಹಕ್‌ದಾರ್ ಮ್ಹಣ್ ದುಬ್ಳ್ಯಾ – ಧಾಕ್ಟ್ಯಾಂ ಖಾತಿರ್ ಬುಕಾಚ್ಯಾ ವಿಕ್ರ್ಯಾಥಾವ್ನ್ ಆಯಿಲ್ಲೊ ದುಡು ಸೇವಾ ಸಂಸ್ಥ್ಯಾಂ ಮುಕಾಂತ್ರ್ ಖರ್ಚುಂಕ್ ಕರುಂಕ್ ತಾಣಿ ಕೆಲ್ಲೊ ಥಿರ್ ನಿಚೆವ್.”
ದೊ| ಸಲ್ಡಾನ್ಹಾ ಹಾಣಿ ಜೆಜು ಕ್ರಿಸ್ತಾಚ್ಯಾ ಜಿವಿತಾಚೆರ್ ಜಾಯ್ತೆ ಬೂಕ್ ವಾಚುನ್, ಅಬ್ಯಾಸ್ ಕರುನ್ ಏಕ್ ಬರೆಂ ಪುಸ್ತಕ್ ಬರವ್ನ್ ಅರ್ಪಿಲ್ಲೆ ಖಾತಿರ್ ಧರ್ಮ್‌ಪ್ರಾಂತ್ಯಾ ತರ್ಫೆನ್ ಬರಯ್ಣಾರ್ ಮರಿಯಾಣ್ ಪಾವ್ಲ್ ರೊಡ್ರಿಗಸ್ ಹಾಂಕಾ ಫುಲಾಂ ಆನಿ ಫಳಾಂ ದಾಲಿ ದೀವ್ನ್ ಮಾನ್ ಪಾಟಯ್ಲೊ.
ಖುದ್ ಏಕ್ ಸಂಗೀತ್ಗಾರ್ ಜಾವ್ನಾಸ್ಚ್ಯಾ ಬರಯ್ಣಾರ್ ಮರಿಯಾಣ್ ಪಾವ್ಲ್ ಲುದ್ರಿಗ್ ಹಾಣಿ ರಚ್ಲೆಲ್ಯಾ ಸ್ತುತಿಗೀತಾಚ್ಯಾ ಗಾಯನಾಸವೆಂ ಕಾರ್ಯೆಂ ಸುರ್ವಾತ್ಲೆಂ. ಮಿಲಾರ್ ಪಿರ್ಗಜೆಚೊ ವಿಗಾರ್ ಮಾ| ಬಾ| ಬೊನವೆಂಚರ್ ನಜ್ರೆತ್ ಹಾಣಿ ದರ್ಮಾಧ್ಯಕ್ಶ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಆನಿ ಸಯ್ರ್ಯಾಂಕ್ ಯೆವ್ಕಾರ್ ಮಾಗ್ಲೊ.
ಆಪ್ಲ್ಯಾ ಯೆವ್ಕಾರಾಚ್ಯಾ ಉತ್ರಾಂನಿ ಮಾ| ಬಾ| ನಜ್ರೆತ್ ಹಾಣಿ – ಧರ್ಮಾಧ್ಯಕ್ಶ್ ದೊ| ಸಲ್ಡಾನ್ಹಾ ಹಾಂಕಾ ಸಾಹಿತ್ಯಾಚೆರ್ ಆಸ್ಚೊ ವಿಶೇಸ್ ಮೋಗ್, ತಾಂಚಿ ಬುಕಾಂಚಿಂ ವೋಡ್ ಆನಿ ಕವಿ, ಸಾಹಿತಿಂಚೆರ್ ತಾಂಕಾ ಆಸ್ಚ್ಯಾ ವಿಶೇಸ್ ಅಭಿಮಾನಾಚೊ ಉಲ್ಲೇಕ್ ಕೆಲೊ. ತಶೆಂಚ್ ಬರಯ್ಣಾರ್ ಎಮ್. ಪಿ. ರೊಡ್ರಿಗಸ್ ಹಾಂಚ್ಯಾ ಸಾದ್ಯಾ ಆನಿ ಸಮರ್ಪಿತ್ ವ್ಯಕ್ತಿತ್ವಾಚೊ ಉಲ್ಲೇಕ್ ಕರುನ್, ಏಕ್ ಪಾವ್ಟಿಂ ಕಂಪ್ಯೂಟರಾಚೆರ್ ಕಾಮಾಕ್ ಬಸ್ಲ್ಯಾರ್ ಸಗ್ಳೆಂ ಕಾಮ್ ಸಂಪವ್ನ್‌ಚ್ ತಾಣಿ ಉಟ್ಚೊ ತಾಂಚ್ಯಾ ಸಮರ್ಪಣಾಚೊ ದಾಕ್ಲೊ ದಿಲೊ. ಆಪ್ಣೆ ಕೆಲ್ಲ್ಯಾ ಖಂಯ್ಚ್ಯಾಯ್ ಕಾಮಾಚೊ ಶ್ರೇಯ್ ಘೆನಾಸ್ತಾನಾ ಆಪುಣ್ ಫಕತ್ ಕ್ರಿಸ್ತಾಚೊ ಹಾತೆರ್ ಮ್ಹಣ್ಚ್ಯಾ ತಾಂಚ್ಯಾ ನಿಸ್ವಾರ್ಥಿ ಕಾಲೆತಿಚಿ ವಿಗಾರ್ ಮಾ। ಬಾ। ನಜ್ರೆತ್ ಹಾಣಿ ತೊಕ್ಣಾಯ್ ಕರುನ್ ಮ್ಹಳೆಂ “ಎಂ. ಪಿ. ರೊಡ್ರಿಗಸಾ ಥಂಯ್ ಆಡಂಬರ್ ಮ್ಹಳ್ಳೊ ನಾ. ಹೊಗ್ಳಿಕ್ ಘೆಂವ್ಚೆ ಥಾವ್ನ್ ತೋ ಕೆದಾಳಾಯ್ ಮಯ್ಲಾಂ ಪಯ್ಸ್”
ಬುಕಾಚೊ ಬರಯ್ಣಾರ್ ಮರಿಯಾಣ್ ಪಾವ್ಲ್ ಲುದ್ರಿಗ್ ಹಾಣಿ ಖಾಡಿಗಾಂವಾಂತ್ ಕಾಮ್ ಕರ್ತಾನಾ ಕಶೆಂ ಆಪ್ಲೆ ಭಿತರ್ ಆಸ್ಲಲೊ ಬರವ್ಪಿ, ಸಂಗೀತ್ಗಾರ್ ಲಿಪ್ಲಲೊ, ನಿವೃತ್ ಜಾವ್ನ್ ಗಾಂವಾಂಕ್ ಯೆತಚ್ ಸುರ್ವಾತ್ಲೆಲೆಂ ಸಾಹಿತ್ಯ್ ರಚ್ಣುಕೆಚೆಂ ಕಾಮ್, ಜೆಜು ಕ್ರಿಸ್ತಾಚೆಂ ಜಿವಿತ್ ಕೊಂಕ್ಣೆಂತ್ ಬರಯ್ಜೆ ಮ್ಹಣ್ ಆಸ್ಲೆಲಿ ಪರ್ನಿ ಆಶಾ ಜಿವಾಳೊಂಕ್ ಕಾರಣ್ ಜಾಲ್ಲಿ ಡ್ಯಾನ್ ಬ್ರಾವ್ನ್ ಹಾಣೆ ಬರಯಿಲ್ಲ್ಯಾ ‘ದ ವಿಂಚಿ ಕೋಡ್’ ಪುಸ್ತಕಾಚೆರ್ ಉಟ್ಲೆಲಿಂ ಸವಾಲಾಂ, ಮಾಲ್ಘಡೊ ಯಾಜಕ್ ಮಾ| ವಿಲ್ಲಿ ಗೊಸಾಲ್ ಹಾಂಚೆಲಾಗಿಂ ವಾಂಟುನ್ ಘೆತ್‌ಲ್ಲಿ ಮುಳಾವಿ ಆಲೊಚೆನ್ ಅನಿ ತಾಣಿ ದಿಲ್ಲೆಂ ಪ್ರೇರಣ್, ಸರಿ ಸುಮಾರ್ ನೋವ್ ವರ್ಸಾಂ ಜೆಜು ಕ್ರಿಸ್ತಾಚ್ಯಾ ಜಿವಿತಾ ವಿಶ್ಯಾಂತ್ ವಾಚ್‌ಲ್ಲಿಂ ವೆವೆಗ್ಳಿಂ ಪುಸ್ತಕಾಂ, ವಿಶಯಾಚೆರ್ ಪರಿಣತ್ ಜಾವ್ನಾಸ್ಚೆ ಯಾಜಕ್ ಮಾ| ಲುವಿಸ್ ಸೊಜ್, ಕಾಪುಚಿನ್, ಮಾ| ವಿತೊರ್ ಮಚಾದೊ, ವಿಶ್ರಾಂತ್ ರೆಕ್ಟರ್ ಆನಿ ಬೈಬಲ್ ತರ್ಜಣ್‌ದಾರ್ ಮಾ| ದೊ। ವಿಲ್ಲಿ ಸಿಲ್ವ ಹಾಣಿ ದಿಲ್ಲೆಂ ಮಾರ್ಗದರ್ಶನ್ ಆನಿ ಕೆಲ್ಲಿ ತಿದ್ವಣ್, ವಿಗಾರ್ ಜೆರಾಲ್ ಮೊ| ಮ್ಯಾಕ್ಸಿಮ್ ನೊರೊನ್ಹಾ ಹಾಂಚೆಂ ಥಾವ್ನ್ ಮೆಳ್ಳೆಲೆಂ ಮಾರ್ಗದರ್ಶನ್ ಆನಿ ಗೊವ್ಳಿ ಬಾಪ್ ದೊ| ಸಲ್ಡಾನ್ಹಾ ಹಾಣಿ ಲಾಂಬ್ ದೀಗ್ ಹಾತ್‌ಪ್ರತಿ ಖೊಲಾಯೇನ್ ತಪಾಸುನ್ ಪರ್ಗಟುಂಕ್ ದಿಲ್ಲಿ ಅನುಮತಿ – ಹೆ ವಿಶ್ಯಾಂತ್ ಸವಿಸ್ತಾರ್ ಉಲವ್ನ್, ಬೂಕ್ ತಯಾರ್ ಜಾವ್ನ್ ಯೆತಾನಾ ಭಲಾಯ್ಕೆಚೆ ಸಮಸ್ಸೆ ಜಾಲ್ಲೆ ತವಳ್ ಮಿಲಾರ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಬೊನವೆಂಚರ್ ನಜ್ರೆತ್ ಹಾಣಿ ಘರಾ ಯೇವ್ನ್ ದಿಲ್ಲೆಂ ಧಯ್ರ್ ಆನಿ ಉಪ್ರಾಂತ್ ಘೆತ್‌ಲ್ಲಿ ಸಗ್ಳಿ ಜವಾಬ್ದಾರಿ ಆನಿ ಮುಕೆಲ್ಪಣ್, ಸಾಂ. ಫ್ರಾನ್ಸಿಸ್ ಸಾವೆರ್ ವಾಡ್ಯಾಚಿ ಗುರ್ಕಾರ್ನ್ ಆನಿ ವಾಡ್ಯಾಗಾರಾಂನಿ, ಫಿರ್ಗಜ್ ಗೊವ್ಳಿಕ್ ಮಂಡಳೆಚ್ಯಾ ಸಾಂದ್ಯಾಂನಿ ದಿಲ್ಲೊ ಕುಮ್ಕೆಹಾತ್ ಆನಿ ಕೆಲ್ಲ್ಯಾ ವಾವ್ರಾಚೊ ಉಡಾಸ್ ಕಾಡುನ್ ಸರ್ವಾಂಚೊಂ ಕಾಳ್ಜಾಮನಾನ್ ಉಪ್ಕಾರ್ ಬಾವುಡ್ಲೊ.
ಹ್ಯಾ ಬುಕಾಚೊ ಶ್ರೇಯ್ ಕೊಣಾಕ್ ಫಾವೊ ಜಾಂವ್ಚೊ ತರ್ ತೋ ಆಪ್ಣಾಚ್ಯಾ ಕುಟ್ಮಾಕ್. ಪತಿಣೆಕ್ ಅನಿ ಭುರ್ಗ್ಯಾಂಕ್. ಜರಿ ತಾಂಚೊ ಸಹಕಾರ್ ನಾತ್‌ಲ್ಲೊ ಜಾಲ್ಯಾರ್ ಹೆಂ ಕಾಮ್ ಪೊಂತಾಕ್ ಪಾವ್ತೆಂ ನಾ ಮ್ಹಣ್ – ಮರಿಯಾಣ್ ಪಾವ್ಲ್ ರೊಡ್ರಿಗಸ್ ಹಾಣಿ ಹ್ಯಾ ಸಂದರ್ಬಾರ್ ನಮೃತಾಯೇನ್ ಉಚಾರ್ಲೆಂ.
“ಜೆಜು ಕಿಸ್ತಾಚಿ ಖರಿ ಒಳಕ್ ದಿಂವ್ಚಿ ಆನಿ ಬೂಕ್ ವಿಕುನ್ ಆಯಿಲ್ಲೊ ದುಡು ದುಬ್ಳ್ಯಾ – ಧಾಕ್ಟ್ಯಾಂಚ್ಯಾ ಗರ್ಜೆಕ್ ದಿಂವ್ಚೊ – ಫಕತ್ ಹೆ ದೋನ್ ಶೆವೊಟ್ ಮಾತ್ ಮತಿಂತ್ ದವರ್ನ್ ಹಾಂವೆ ಹ್ಯಾ ಬುಕಾಚೆಂ ಕಾಮ್ ಕೆಲಾಂ” ಮ್ಹಣ್ ಶ್ರೀ ಲುದ್ರಿಗ್ ಹಾಣಿ ಮ್ಹಳೆಂ. ಬೂಕ್ ಪರ್ಗಟುಂಕ್ ಪರ್ವಣ್ಗಿ, ಸಹಕಾರ್ ಅನಿ ಮಾರ್ಗದರ್ಶನ್ ದಿಲ್ಲ್ಯಾ ಧರ್ಮಾಧ್ಯಕ್ಷಾಂಕ್ ಬರಯ್ಣಾರ್ ಶ್ರೀ ಲುದ್ರಿಗ್ ಹಾಣಿ ಉಪ್ಕಾರಿ ಮನಾನ್ ಫುಲಾಂ – ಫಳಾಂದಾಲಿ ದೀವ್ನ್ ಅಬಾರ್ ವೆಕ್ತ್ ಕೆಲೊ.
ಧರ್ಮಾಧ್ಯಕ್ಶ್ ದೊ| ಸಲ್ಡಾನ್ಹಾ ಹಾಣಿ ಬುಕಾಚ್ಯಾ ವಾವ್ರಾಕ್ ಕುಮಕ್ ದಿಲ್ಲ್ಯಾ ಪೋಶಕಾಂಕ್ ಆನಿ ಬರಯ್ಣಾರಾಚ್ಯಾ ಕುಟ್ಮಾ ಸಾಂದ್ಯಾಂಕ್ ಮಾನಾಚ್ಯೊ ಪ್ರತಿಯೊ ವಾಂಟ್ಯ್ಲೊ. ಬರಯ್ಣಾರ್ ಮರಿಯಾಣ್ ಪಾವ್ಲ್ ರೊಡ್ರಿಗಸ್ ಹಾಣಿ ಫುಲಾಂತುರೆ ದೀವ್ನ್ ಉಪ್ಕಾರ್ ಆಟಯ್ಲೊ.
ಬರಯ್ಣಾರ್ ಮರಿಯಾಣ್ ಪಾವ್ಲ್ ಲುದ್ರಿಗ್ ಹಾಂಚಿ ಪತಿಣ್ ಶ್ರೀಮತಿ ಜೆಸಿಂತಾ ಲುದ್ರಿಗ್, ಪೂತ್ ಡೊ| ಜೊನಾತನ್ ಲುದ್ರಿಗ್ , ಸೆವಕ್ ಪ್ರಕಾಶನಾಚೊ ನಿರ್ದೇಶಕ್ ಮಾ| ಬಾ| ಚೇತನ್, ಕಾಪುಚಿನ್, ಮಿಲಾರ್ ಫಿರ್ಗಜೆಚೊ ಉಪಾಧ್ಯಕ್ಶ್ ಶ್ರೀ ಸಿಲ್ವೆಸ್ಟರ್ ಮಸ್ಕರೇನ್ಹಸ್, ಕಾರ್ಯದರ್ಶಿ ಶ್ರೀಮತಿ ಜೆಸಿಂತಾ ಫೆರ್ನಾಂಡಿಸ್ ಹಾಣಿ ಉಗ್ತಾವಣೆ ಸುವಾಳ್ಯಾರ್ ಸಾಂಗಾತ್ ದಿಲೊ.
ಬುಕಾಚೊ ವಿನ್ಯಾಸಕ್, ಫಾಮಾದ್ ಕಲಾಕಾರ್, ನಾಟಕಿಸ್ತ್ ಆನಿ ನಿರೂಪಕ್ ಶ್ರೀ ಎಡಿ ಸಿಕೇರ್ ಹಾಣಿ ಅಪುರ್ಬಾಯೆನ್ ಕಾರ್ಯೆಂ ಚಲವ್ನ್ ವೆಲೆಂ. ಆರೊನ್ ಲೋಬೊ ಹಾಣಿ ದಿನ್ವಾಸ್ ಪಾಟಯ್ಲೆ.
ಕಾರ್ಯಾಕ್ ನವಿದಿಲ್ಲಿ, ಸಾಹಿತ್ಯ ಅಕಾಡೆಮಿಂತ್ ಕಾರ್ಯಕಾರಿ ಮಂಡಳಾಚೊ ಸಾಂದೊ ತಶೆಂ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಕವಿ ಮೆಲ್ವಿನ್ ರೊಡ್ರಿಗಸ್, ಕೊಂಕಣ್ ಮೈನಾ ಶ್ರಿಮತಿ ಮೀನಾ ರೆಬಿಂಬಸ್, ಪತ್ರ್‌ಕರ್ತ್ ಎಚ್ಚೆಮ್, ಪೆರ್ನಾಲ್, ಮೈಕಲ್ ಡಿ ಸೊಜಾ ಎಡುಕೇರ್ ಶಿಕ್ಪಾನಿಧಿಚೆ ಸಂಯೋಜಕ್ ಶ್ರೀ ಸ್ಟೀಫನ್ ಪಿಂಟೊ ಆನಿ ಶ್ರೀ ಓಸ್ವಲ್ಡ್ ರೊಡ್ರಿಗಸ್, ಸಾಂ. ವಿಶೆಂತ್ ಪಾವ್ಲ್ ಸಭಾ, ದಿಯೆಸೆಜಿಚೊ ಅಧ್ಯಕ್ಷ್ ಶ್ರೀ ಜ್ಯೋ ಕುವೆಲ್ಹೊ, ಮಿಲಾರ್ ಫಿರ್ಗಜೆಚೊ ಆದ್ಲೊ ಉಪಾಧ್ಯಕ್ಷ್ ಶ್ರೀ ಆಲ್ವಿನ್ ರೊಸಾರಿಯೊ, ಕವಿ ಆಂಡ್ರ್ಯೂ ಎಲ್. ಡಿ’ಕುನ್ಹಾ, ನಿರೂಪಕ್ ಶ್ರೀ ಮೆಲ್ವಿನ್ ಪೆರಿಸ್ ಕೈಕಂಬ, ಬರವ್ಪಿ ಶ್ರೀಮತಿ ಶಾಲಿನಿ, ವಾಲೆನ್ಸಿಯಾ , ಶ್ರೀ ಜೆ. ಎಫ್. ಡಿ’ಸೊಜಾ ಅತ್ತಾವರ್ ಆನಿ ಹೆರ್ ಜಾಯ್ತೆ ಸಾಹಿತಿ, ಕಲಾಕಾರ್, ಎಮ್. ಪಿ. ರೊಡ್ರಿಗಸ್ ಹಾಂಚೆ ಅಭಿಮಾನಿ ಹಾಜರ್ ಆಸ್ಲೆ.
ಸಂಗೀತ್ಗಾರ್ ಸಿಪ್ರಿಯನ್ ಮೆಸ್ತ್ರಿಚ್ಯಾ ನಿರ್ದೇಶನಾಖಾಲ್ , ಮಿಲಾರ್ ಪಿರ್ಗಜೆಚ್ಯಾ ಯುವಗಾವ್ಪಿಣ್ಯಾಂನಿ ಮರಿಯಾಣ್ ಪಾವ್ಲ್ ರೊಡ್ರಿಗಸ್ ಹಾಣಿ ರಚ್‌ಲ್ಲಿಂ ಸ್ತುತಿ ಗಾಯನಾಂ ಪೇಶ್ ಕೆಲಿಂ.
ಬುಕಾಚ್ಯಾ ಪ್ರತಿಯಾಂ ಖಾತಿರ್ ಮಿಲಾರ್ ಪಿರ್ಗಜೆಚ್ಯಾ ದಫ್ತರಾಕ್, ಫಿರ್ಗಜೆಂತ್ ಸಾಂ. ವಿಶೆಂತ್ ಪಾವ್ಲ್ ಸಭೆಚ್ಯಾ ಸಾಂದ್ಯಾಕ್ ವಾ ಕೊಡಿಯಾಳ್ ಬಯ್ಲ್ ಜೈಲ್ ರೊಡಾರ್ ಆಸ್ಚ್ಯಾ ಕಾಪುಚಿನ್ ಫ್ರಾಯರಿಚೊ / ಆಸಿಸಿ ಪ್ರೆಸ್ಸಾಚೊ ಸಂಪರ್ಕ್ ಕರ್ಯೆತ್ ಮ್ಹಣ್ ಕಳಯ್ಲಾಂ. 540 ಪಾನಾಂಚ್ಯಾ ಬುಕಾಚ್ಯಾ ಹಾರ್ಡ್ ಬೈಂಡ್ ಬುಕಾಚೆಂ ಮೋಲ್ ರು. 400 ಆನಿ ಪೇಪರ್‌ಬ್ಯಾಕ್ ಪ್ರತಿಯೆಚೆಂ ಮೋಲ್ ರು. 300 ಜಾವ್ನಾಸ್ತೆಲೆಂ. ಬುಕಾಚ್ಯಾ ವಿಕ್ರ್ಯಾನ್ ಜಮೊ ಜಾಲ್ಲೊ ಐವಜ್ ಬರಯ್ಣಾರಾಚ್ಯಾ ಖುಶೆಪ್ರಕಾರ್ ದುಬ್ಳ್ಯಾ – ದಾಕ್ಟ್ಯಾಂಚ್ಯಾ ಕಲ್ಯಾಣ್ ಯೋಜನಾಕ್ ವೆತಲೊ.
ತಸ್ವಿರ‍್ಯೊ : ಸ್ಟ್ಯಾನ್ಲಿ, ಬಂಟ್ವಾಳ್
