ಅ. 18ವೆರ್ ಸಾಂ. ಲುವಿಸ್ ಕೊಲೆಜಿಂತ್ ‘ಕೊಂಕ್ಣಿ ಮಾನ್ಯತಾ ದೀಸ್’; ಸ್ಟೀವನ್ ಕ್ವಾಡ್ರಸ್ ಪುಸ್ತಕ್ ಲೊಕಾರ‍್ಪಣ್

175

“ಮನಿಸ್ ಜಮ್ಯಾಂತ್ ಜಿಯೆತಾ ಆನಿ ಅಶೆಂ ಜಿಯೆಂವ್ಚ್ಯಾವಗ್ತಾ ಸಭಾರ್ ಅನ್ಭವ್ ತಾಕಾ ಜಾತಾತ್. ತ್ಯಾ ಅನ್ಭವಾಚೆರ್ ಕಾಂಯ್ ಕಿತೆಂ ಬರವ್ನ್ ಕಾಡ್ನ್ ತೆ ಹೆರಾಂಕ್ ವಾಂಟ್ತಾನಾ ಸಾಹಿತ್ ಆಸಾ ಜಾತಾ. ಸಾಹಿತ್ ಎಕ್ಲ್ಯಾಚೆಂ ನ್ಹಂಯ್ ತೆಂ ಜಮ್ಯಾಚೆಂ. ಜಿವಿತಾಚ್ಯಾ ವಿ’ವಿಂಗಡ್ ರಂಗಾಂಕ್ ಆಟಾಪ್ಚೆಂ” ಮ್ಹಣ್ತಾ ಪ್ರಾದ್ಯಾಪಕ್ ಸ್ಟೀವನ್ ಕ್ವಾಡ್ರಸ್, ಪೆರ‍್ಮುದೆ;  ಸುಕ್ರಾರಾ, ಆಗೋಸ್ತ್ 18 ವೆರ್ ದೊನ್ಪಾರಾಂ 3.00 ವೊರಾಂಕ್, ಸಾಂತ್ ಲುವಿಸ್ ಕೊಲೆಜಿಚ್ಯಾ ಎರಿಕ್ ಮಥಾಯಸ್ ಹೊಲಾಂತ್ ಲೊಕಾರ್ಪಣ್ ಜಾಂವ್ಕ್ ಆಸ್ಚ್ಯಾ ಆಪ್ಲ್ಯಾ ನವ್ಯಾ ಪುಸ್ತಕಾವಿಶ್ಯಾಂತ್.

ನಾಮ್ಣೆಚೊ ಉದ್ಯಮಿ ತಶೆಂ ಕೊಂಕ್ಣಿ ಭಾಶೆಚೊ ಪ್ರೋತ್ಸಾಹಕ್ ಶ್ರೀ ಜೇಮ್ಸ್ ಮೆಂಡೊನ್ಸಾ – ಪುಸ್ತಕ್ ಸಾಂ. ಲುವಿಸ್ ಕೊಲೆಜ್ ವಿದ್ಯಾ ಸಂಸ್ಥೊ (ಸ್ವಾಯತ್ತ್) ಮಂಗ್ಳುರ್ ಕೊಂಕ್ಣಿ ಸಂಘ್, ಸಾಂ. ಲುವಿಸ್ ಪ್ರಕಾಶನ್ ಆನಿ ಕೊಂಕ್ಣಿ ಭಾಶಾ ಮಂಡಳ್, ಕರ್ನಾಟಕ್ – ಹಾಣಿ ಸಾಂಗಾತಾ ಮೆಳೊನ್ ಮಾಂಡುನ್ ಹಾಡ್‌ಲ್ಲ್ಯಾ ‘ಕೊಂಕ್ಣಿ ಮಾನ್ಯತಾ ದೀಸ್’ ಸಂಭ್ರಮಾಂತ್ ಲೊಕಾರ‍್ಪಣ್ ಕರ‍್ತಲೆ. ಕೊಲೆಜಿಚೊ ಪ್ರಾಚಾರ್ಯ್  ಮಾ। ದೊ।  ಪ್ರವೀಣ್ ಮಾರ‍್ಟಿಸ್. ಜೆ.ಸ. ಕಾರ‍್ಯಾಚೆ ಅಧ್ಯಕ್ಷ್ ಆಸ್ತಲೆ.

ವಿವಿಧ್ ರಾಷ್ಟ್ರ್ ಮುಕೆಲ್ಯಾಂವಿಶಿಂ, ವಿವಿಧ್ ಅನ್ಭವಾಂಭಂವ್ತಿಂ ಆನಿ ಹೆರ್ ಜೆರಾಲ್ ಸಂಗ್ತಿಂ ಭೊಂವ್ತಿಂ ಲಿಕ್ಲಲಿಂ ಮನ್ಶಾವಾದಿ ಚಿಂತ್ಪಾಚಿಂ ಎಕುಣ್ತೀಸ್ ಲೇಕನಾಂ ಆಟಾಪುನ್ ಆಸ್ಚೊ ಜಮ್ಯಾಂತ್ಯ್ಲಾನ್ ಪುಸ್ತಕ್ ಜೆರಾಲ್ ವಾಚ್ಪಾಕ್ ತಶೆಂಚ್ ಅಧ್ಯಯನಾತ್ಮಕ್ ವಾಚ್ಪಾಕ್ ಏಕ್ ವ್ಹರ‍್ತೊ ಪುಸ್ತಕ್ ಮ್ಹಣ್ಯೆತ್. ಸಾಂ. ಲುವಿಸ್ ಪ್ರಕಾಶನಾಥಾವ್ನ್ ಪರ‍್ಗಟ್ ಜಾಂವ್ಚ್ಯಾ ಹ್ಯಾ ಪುಸ್ತಕಾಕ್ ನಾಂವಾಡ್ದಿಕ್ ಪ್ರಾಧ್ಯಾಪಕ್ ಡೊ| ಆಲ್ವಿನ್ ಡೆ’ಸಾನ್ ಮುಕಾಳೆಂ ಲಿಕ್ಲಾಂ. ಬಸವಣ್ಣ, ಅಂಬೇಡ್ಕರ್, ಡಿವಿಜಿ ಅಸಲ್ಯಾ ಗಂಭೀರ್ ವಿಷಯಾಂಸವೆಂ ಬಸ್ಸ್‌ಪಯ್ಣಾಚೆ ಅನ್ಭವ್, ಇತಿಹಾಸ್ ಶಿಕಂವ್ಚೆ ಅನ್ಭವ್, ಏಕ್‌ಮುಕಿ ಉಲೊವ್ಣೆಂ ಅಸಲ್ಯಾ ಮೊವಾಳ್ ವಿಷಯಾಂಚೆರ್ ಅರ್ಥಾಭರಿತ್ ಬರ‍್ಪಾಂ ಹ್ಯಾ ಪುಸ್ತಕಾಂತ್ ಆಸಾತ್.

ಲ್ಹಾನ್ ಪ್ರಾಯೆರ್‌ಥಾವ್ನ್ಂಚ್ ವಾಚ್ಪಾ – ಬರವ್ಪಾಚಿ ಆತುರಾಯ್ ವಾಡವ್ನ್ ಘೆತ್‌ಲ್ಲ್ಯಾ ಸ್ಟೀವನ್ ಕ್ವಾಡ್ರಸಾನ್ ಕೊಂಕ್ಣಿ ಸಾಹಿತ್ ಆನಿ ವಿಮರ‍್ಶ್ಯಾ ಶೆತಾಂತ್, ಭಾಶಾಂತರ್ ಶೆತಾಂತ್ ಆನಿ ಕೋಶ್ ಸಾಹಿತಾಚ್ಯಾ ಶೆತಾಂತ್ ಮಹತ್ವಾಚೊ ವಾವ್ರ್ ಕೆಲಾ. ಕೊಂಕ್ಣಿಂತ್ ‘ಸಾಹಿತ್ ಆನಿ ವಿಮರ‍್ಸೊ’, ‘ಕೊಂಕ್ಣಿ ಕಾವ್ಯೆಂ ಏಕ್ ಸುಕ್ಣ್ಯಾ ನದರ್’, ‘ವಾಚ್ತಾಂ… ವಾಚ್ತಾಂ…’ ಆನಿ ‘ಬಾನ್ನೆಂ’, ತಶೆಂಚ್ ಕನ್ನಡಾಂತ್ ‘ವಜ್ರದೊಟ್ಟಿಲು’ ವಿಮರ‍್ಶ್ಯಾ ಆನಿ ಮೀಮಾಂಸಾ ಶೆತಾಂತ್ ತಾಚೆ ಮಹತ್ವಾಚೆ ಪುಸ್ತಕ್. ಜನ್ನ ಮಹಾಕವಿಚೊ ಯಶೋಧರ ಚರಿತ, ಬಸವಣ್ಣ ಆನಿ ಹೆರ್ ವಚನಕಾರಾಂಚಿಂ ವಚನಾಂ, ಮಂಕುತಿಮ್ಮನ ಕಗ್ಗ, ಎಮ್ ಆರ್ ಶ್ರೀನಿವಾಸ ಮೂರ‍್ತಿಚೊ ರಂಗಣ್ಣನ ಕನಸಿನ ದಿನಗಳು, ಜೊರ‍್ಜ್ ಆರ‍್ವೆಲಾಚೊ ಎನಿಮಲ್ ಫಾರ‍್ಮ್ ತಾಣೆಂ ಕೊಂಕ್ಣಿಕ್ ಹಾಡ್ಲ್ಯಾಂತ್.

ಭಾರತಾಚೆಂ ಸಂವಿಧಾನ್ ಕೊಂಕ್ಣಿ ಭಾಶೆಕ್ ಭಾಶಾಂತರ್ ಕರ‍್ನ್ ತಾಣೆಂ ಕೊಂಕ್ಣಿ ಭಾಸೆಚಿ ಕೀರ‍್ತ್ ಗಾಜಯ್ಲ್ಯಾ. ತಾಚೆ ಇಂಗ್ಲೀಶ್- ಕೊಂಕ್ಣಿ- ಅರ‍್ಥ್‌ಕೋಶ್, ವೆಲ್‌ಕಮ್ ಟು ಕೊಂಕಣಿ ಸಬ್ಧ್‌ಕೋಶ್, ಇಂಗ್ಲೀಶ್-ಕೊಂಕ್ಣಿ-ಕನ್ನಡ ತೀನ್ ಭಾಶೆಂಚೊ ಅರ‍್ಥ್‌ಕೋಶ್, ಕೊಂಕ್ಣಿ-ಇಂಗ್ಲೀಶ್-ಕನ್ನಡ ಅರ‍್ಥ್‌ಕೋಶ್ ಲೊಕಾಮೊಗಾಳ್ ಜಾಲ್ಯಾತ್. ತಾಚ್ಯಾ ಮಾರ‍್ಗದರ‍್ಶನಾಖಾಲ್ ತಯಾರ್ ಕೆಲ್ಲೆ ಇಂಗ್ಲೀಶ್-ಕನ್ನಡ-ಹಿಂದಿ-ಬ್ಯಾರಿ ಆನಿ ಇಂಗ್ಲೀಶ್-ಕನ್ನಡ-ಹಿಂದಿ-ಕೊಡವ ಸಬ್ಧ್‌ಕೋಶ್ ಸರ‍್ಕಾರಾಚ್ಯಾ ವಿವಿಧ್ ಅಕಾಡಮಿಂನಿ ಪರ‍್ಗಟ್ ಕೆಲ್ಯಾತ್. ಅಶೆಂ ಎದೊಳ್‌ಚ್ ಸುಮಾರ್ ಸಾತ್ ಕೋಶ್ ಗ್ರಂಥ್ ತಯಾರ್ ಕೆಲ್ಲಿ ವಿಶೇಷ್ ಕೀರ‍್ತ್ ತಾಕಾ ಫಾವೊ ಜಾತಾ.

ಹ್ಯಾ ಕಾರ್ಯಾಕ್ ಸಮೆಸ್ತ್ ಕೊಂಕ್ಣಿ ಮೊಗಿಂಕ್ ಮೊಗಾಚೊ ಯೆವ್ಕಾರ್ ಆಸಾ ಮ್ಹಣ್ ಸಾಂ. ಲುವಿಸ್ ವಿದ್ಯಾ ಸಂಸ್ಥೊ (ಸ್ವಾಯತ್ತ್) ಮಂಗ್ಳುರ್ ಕೊಂಕ್ಣಿ ಸಂಘ್, ಸಾಂ. ಲುವಿಸ್ ಪ್ರಕಾಶನ, ಕೊಂಕ್ಣಿ ಭಾಶಾ ಮಂಡಳ್ ಕರ್ನಾಟಕ ಆನಿ ಬುಕಾಚೊ ಬರಯ್ಣಾರ್ ಪ್ರೊ। ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ ಹಾಣಿ ಕಳಯ್ಲಾಂ.