“ಕೊಂಕ್ಣೆಂತ್ ಸಾಹಿತ್ಯ್ ರಚ್ತೆಲ್ಯಾಂಕ್ ವ್ಯವಹಾರಿಕ್ ಸಫಲತಾ ಮೆಳಾನಾ ಮ್ಹಳ್ಳಿ ಸಗ್ಳ್ಯಾಂಕ್ ಕಳಿತ್ ಆಸ್ಚಿಚ್ ಗಜಾಲ್. ಪೂಣ್ ಆಮ್ಚೆ ಕೊಂಕ್ಣಿ ಸಾಹಿತಿ ಆನಿ ಕವಿ ಧಯ್ರ್ ಸಾಂಡಿನಾಸ್ತಾನಾ ಸಾಹಿತ್ಯ್ ರಚುನ್ ಆಸಾತ್ ಮ್ಹಣ್ಚೆಂ ಆಮ್ಕಾಂ ವರ್ತ್ಯಾ ಅಭಿಮಾನಾಚೆಂ. ಖಂಯ್ಚ್ಯಾಯ್ ಭಾಶೆಚೊ ಫುಡಾರ್ ಘಟ್ ಜಾಯ್ಜಯ್ ಜಾಲ್ಯಾರ್, ತ್ಯಾ ಭಾಶೆಂತ್ ಯತೇಶ್ಟ್ ಸಾಹಿತ್ಯ್ ಯೇಜಾಯ್. ಭಾಸ್ ಮುಕ್ಲ್ಯಾ ಪಿಳ್ಗೆಕ್ ಪಾವಂವ್ಚ್ಯಾಂತ್ ಸಾಹಿತಿಂಚೊಂ ಪಾತ್ರ್ ಬೋವ್ ನಿರ್ಣಾಯಕ್. ಕೊಂಕ್ಣೆಂತ್ ಸಾಹಿತ್ಯ್ ರಚ್ತೆಲ್ಯಾಂಕ್ ಚಡ್ ಪಾಟಿಂಬೊ ಮೆಳಾನಾ ಜಾಲ್ಯಾರೀ, ಆಮ್ಚೆ ಕೊಂಕ್ಣಿ ಸಾಹಿತಿ ಅಡ್ಕಳಿ – ಅಡ್ಚಣ್ಯೊ ಫುಡ್ ಕರುನ್ ಸಾಹಿತ್ಯ್ ರಚ್ತೇ ಆಸಾತ್. ದೆಕುನ್ ತಾಂಕಾ ಹಾಂವ್ ಶಾಬಾಸ್ಕಿ ಪಾಟಯ್ತಾಂ. ಹಾಂವೆಯ್ ಮ್ಹಜಿ ಸುರ್ವಾತ್ ಏಕ್ ಕೊಂಕ್ಣಿ ಬರವ್ಪಿ ಜಾವ್ನ್ ಕೆಲ್ಲಿ. ದೆಕುನ್ ಕೊಂಕ್ಣಿ ಸಾಹಿತ್ಯಾಕ್ ಆನಿ ಸಾಹಿತಿಂಕ್ ಸದಾಂಚ್ ಮ್ಹಜೊ ಪಾಟಿಂಬೊ ಆಸಾ” ಮ್ಹಣಾಲೊ ದಾಯ್ಜಿವಲ್ಡ್ ಮಾದ್ಯಮ್ ಸಮೂಹಾಚೊ ಸ್ಥಾಪಕ್ ಅನಿ ಮುಕೆಲಿ ಶ್ರೀ ವೊಲ್ಟರ್ ನಂದಳಿಕೆ.
ಶ್ರೀ ನಂದಳಿಕೆ, ಆಯ್ತಾರಾ, 17 ದಸೆಂಬರ್ 2023 ವೆರ್, ಮಂಗ್ಳುರ್ಚ್ಯಾ ಡೊನ್ ಬೊಸ್ಕೊ ಮಿನಿ ಹೊಲಾಂತ್ ಕಾಣಿಕ್ ಪತ್ರಾಚೊ ಆದ್ಲೊ ಸಂಪಾದಕ್ ಆನಿ ಪ್ರಕಾಶಕ್, ಕವಿ, ಲೇಖಕ್ ಆವಿಲ್ ರಸ್ಕಿನ್ಹಾ ಹಾಚೊ “ಕಾಳ್ಜಾ ಭಿತರ್ಲೆ ರಂಗ್” ಕವಿತಾ ಪುಂಜೊ ಉಗ್ತಾವ್ನ್ ಉಲಯ್ತಾಲೊ.
ಆಪ್ಲೆ ಐಸಿವೈಎಮ್ ದೀಸ್ ಉಡಾಸ್ ಕಾಡುನ್ ವೊಲ್ಟರ್ ನಂದಳಿಕೆನ್ ಮ್ಹಳೆಂ ” 1988 ವ್ಯಾ ವರ್ಸಾ ಫಿರ್ಗಜ್ ಪತ್ರಾಂಚ್ ನಾತ್‌ಲ್ಲ್ಯಾ ಕಾಳಾರ್ ಬೆಳ್ಮಣ್ ಫಿರ್ಗಜೆಂತ್ ಐಸಿವೈಎಮ್ ತರ್ಫೆನ್ ’ಮುಕೆಲಿ’ ತ್ರೈಮಾಸಿಕ್ ಪತ್ರ್ ಛಾಪುಂಕ್ ಹಾಂವ್ ಆವಿಲ್ ರಸ್ಕೀನ್ಹಾಚ್ಯಾ ಸಾಂತಾಕ್ರೂಜ್ ಪ್ರೆಸ್ಸಾಕ್ ಆಯಿಲ್ಲೊಂ. ತವಳ್ ತಾಣೆ ಮ್ಹಾಕಾ ದಿಲ್ಲೆಂ ಮಾರ್ಗದರ್ಶನ್ ಆನಿ ಸಹಕಾರ್ ಅಜೂನ್ ಮ್ಹಾಕಾ ಉಡಾಸಾಂತ್ ಆಸಾ.” ಆವಿಲ್ ರಸ್ಕೀನ್ಹಾಚ್ಯಾ ಕವಿತಾ ಜಮ್ಯಾಕ್ ಬರೆಂ ಮಾಗೊನ್ ತಾಚ್ಯಾ ಅನ್ಭೊಗಾಥಾವ್ನ್ ಆನಿಕೀ ಜಾಯ್ತೆ ಸಾಹಿತ್ಯ್ ಕೃತಿಯೊ ಕೊಂಕ್ಣಿ ಸಾಹಿತ್ಯಾಕ್ ಫಾವೊ ಜಾಂವ್ ಮ್ಹಣ್ ವೊಲ್ಟರ್ ನಂದಳಿಕೆನ್ ಆಶಾ ವೆಕ್ತ್ ಕೆಲಿ.
ಉಗ್ತಾವಣ್ ಸುವಾಳ್ಯಾಕ್ ಕೊಂಕಣ್ ಮೈನಾ ಶ್ರೀಮತಿ ಮೀನಾ ರೆಬಿಂಬಸ್, ಸೆವಕ್ ಪತ್ರಾಚೊ ಆದ್ಲೊ ಸಂಪಾದಕ್ ಮಾ| ಬಾ| ರೋಶನ್ ಕಾಪುಚಿನ್, ಬೆಳ್ಳೂರ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಪ್ಯಾಟ್ರಿಕ್ ಸಿಕ್ವೇರಾ ಮಾನಾಚೆ ಸಯ್ರೆ ಜಾವ್ನ್ ಹಾಜರ್ ಆಸೊನ್ ಕವಿ ಆವಿಲ್ ರಸ್ಕಿನ್ಹಾಕ್ ಉಲ್ಲಾಸುನ್ ಬರೆಂ ಮಾಗ್ಲೆಂ. ಮಾ| ಬಾ| ರೋಶನ್ ಕಾಪುಚಿನ್ ಹಾಣಿ ಆವಿಲ್ ರಸ್ಕೀನ್ಹಾಕ್ ಉಲ್ಲಾಸುನ್ ಕವಿತಾ ಸಾದರ್ ಕೆಲಿ. ಕವಿ ಆವಿಲಾನ್ ಆಪ್ಲಿಂ ಭೊಗ್ಣಾಂ ಉಚಾರ್ನ್, ಪತಿಣ್ – ಭುರ್ಗ್ಯಾಂಚ್ಯಾ ಆನಿ ಇಶ್ಟಾಂಚ್ಯಾ ಸಹಕಾರಾಕ್ ದಿನ್ವಾಸ್ ಪಾಟಯ್ಲೆ.
ಜಿಯೋ ಅಗ್ರಾರ್ ಹಾಣಿಂ ಕಾರ್ಯೆಂ ಚಲವ್ನ್ ವ್ಹೆಲೆಂ. ಪಂಚು, ಬಂಟ್ವಾಳ್ ಹಾಣೆ ಸಯ್ರ್ಯಾಂಚಿಂ ವಳಕ್ ಕರುನ್ ದೀವ್ನ್ ಯೆವ್ಕಾರ್ ಮಾಗ್ಲೊ. ವಲ್ಲಿ ಕ್ವಾಡ್ರಸಾನ್ ಬುಕಾಚಿ ವಳಕ್ ಕರುನ್ ದಿಲಿ. ಶ್ರೀಮತಿ ಮಾರಿಯೆಟ್ ರಸ್ಕೀನ್ಹಾ ಹಿಣೆ ಉಪ್ಕಾರ್ ಪಾಟಯ್ಲೊ.
ಕಾಳ್ಜಾ ಭಿತರ್ಲೆ ರಂಗ್ – ಸಾಂತಾಕ್ರೂಜ್ ಪ್ರಕಾಶನಾಚೊ ಪಂದ್ರಾವೊ ಪುಸ್ತಕ್ ಜಾವ್ನಾಸುನ್, ಕಾನಡಿ ಆನಿ ನಾಗರಿ ದೋನೂಯ್ ಲಿಪಿಯಾಂನಿ ಛಾಪ್ಲೆಲ್ಯಾ 136 ಪಾನಾಂಚ್ಯಾ ಕವಿತಾ ಪುಂಜ್ಯಾಂತ್ ಆವಿಲ್ ರಸ್ಕೀನ್ಹಾನ್ ಬರಯಿಲ್ಲೆ ಎಕುಣ್ 55 ಕವಿತಾ ಆಸಾತ್. ವಲ್ಲಿ ಕ್ವಾಡ್ರಸ್, ಆಜೆಕಾರ್ ಹಾಣೆ ಪುಸ್ತಕಾಕ್ ಪ್ರಾಸ್ತಾವಿಕ್ ಉತ್ರಾಂ ಬರಯ್ಲ್ಯಾಂತ್. ಪುಸ್ತಕಾಚೆಂ ಮೋಲ್ ರು. 150/- ಆಸುನ್, ಪ್ರತಿಯಾಂ ಖಾತಿರ್ ಲೇಖಕಾಕ್ 8971563221 ಹ್ಯಾ ನಂಬ್ರಾರ್ ಸಂಪರ್ಕ್ ಕರ್ಯೆತ್.
3 comments
Congratulations wishing you all the best continue the good work
Avil Rasquina was pivotal in my writing career, always encouraging and supportive during my early years. It’s great to see his poetry is being published as a book and I wish his venture a huge success.
Nice to hear from you after a long time. Thank you for your support by contributing some classic short stories for Kannik. They helped me a lot in my early journalism days .