ತೊಟ್ಟಾಮ್ ಸಾಂತ್ ಆನ್ನಾ ಮಾಯೆಚ್ಯಾ ಫಿರ್ಗಜೆಂತ್ , ICYM ಆನಿ Y.C.S ಸಂಘಟನಾಂನಿ ಸಾಂಗಾತಾ ಮೆಳೊನ್ “ನತಾಲ್ ಸಂಭ್ರಮ್ – 2023″ ಆಚರಣ್ ಕೆಲೊ. ಆಚರಣಾಕ್ ಹೆರ್ ಧರ್ಮಾಂಚೆ ಭಾವ್ ಭಯ್ಣಿ ” ಸಮನ್ವಯ ಸರ್ವ ಧರ್ಮ ಸೌಹರ್ದ ಸಮಿತಿ ” ಚ್ಯಾ ಆಸ್ರ್ಯಾ ಖಾಲ್ ಸಾಂಗಾತ್ ದಿಲೊ.
ಲೆಸ್ಲಿ ಆರೋಜಾ ಆನಿ ಲವೀನಾ ಆರೋಜಾ ಹಾಂಚ್ಯಾ ಪ್ರಾರ್ಥನ್ ಗಿತಾ ಸವೆಂ ಆರಂಭ್ ಜಾಲ್ಲ್ಯಾ ಮಟ್ವ್ಯಾ ಸಭಾ ಕಾರ್ಯಾಂತ್ ಮಾನೇಸ್ತ್ ರಮೇಶ್ ತಿಂಗಳಾಯ – ಅಧ್ಯಕ್ಷ್,ಸಮನ್ವಯ ಸರ್ವ ಧರ್ಮ ಸೌಹರ್ದ ಸಮಿತಿ , ಮಾನೇಸ್ತ್ ಮೌಲಾನಾ ಇಮ್ರಾನುಲ್ಲಾ ಖಾನ್ ಮನ್ಸೂರಿ -ಮುಖ್ಯ್ ಧರ್ಮಗುರು , ಜಾಮಿಯ ಮಸ್ಜಿದ್ , ಸಯ್ಯದಿನಾ ಆಬೂಬಕರ್ ಸಿದ್ದೀಕ್ ಮಲ್ಪೆ , ಮಾನಾಧಿಕ್ ಎಡ್ವಿನ್ ಜೊಸೆಫ್ , C.S.I. Ebenezer ಇಗರ್ಜ್ ಮಲ್ಪೆ , ಮಾನಾಧಿಕ್ ಬಾಪ್ ಡೆನಿಸ್ ಡೆಸಾ – ವಿಗಾರ್ , ಸಾಂತ್ ಆನ್ನಾ ಮಾಯೆಚಿ ಫಿರ್ಗಜ್ ತೊಟ್ಟಾಮ್ , ಮಾನೇಸ್ತಿಣ್ ವನಿತಾ ಫೆರ್ನಾಂಡಿಸ್ – 20 ಆಯೋಗಾಂಚಿ ಸಂಯೋಜಕಿ , ಸಾಂತ್ ಆನ್ನಾ ಮಾಯೆಚಿ ಫಿರ್ಗಜ್ ತೊಟ್ಟಾಮ್ , ಸಿ.ಶಾಲಿನಿ – ಸಾಂತ್ ಆನ್ನಾ ಕೊವೆಂತ್ ತೊಟ್ಟಾಮ್ , ಮಾನೇಸ್ತ್ ಸ್ಯಾಮುವೆಲ್ ಫೆರ್ನಾಂಡಿಸ್ – ಆಧ್ಯಕ್ಷ್ – ICYM ಘಟಕ್ , ಸಾಂತ್ ಆನ್ನಾ ಮಾಯೆಚಿ ಫಿರ್ಗಜ್ ತೊಟ್ಟಾಮ್ , ಮಾನೇಸ್ತ್ ವಿವಿಯನ್ ಫೆರ್ನಾಂಡಿಸ್ – ಆಧ್ಯಕ್ಷ್ – YCS ಘಟಕ್ , ಸಾಂತ್ ಆನ್ನಾ ಮಾಯೆಚಿ ಫಿರ್ಗಜ್ ತೊಟ್ಟಾಮ್ ಹೆ ವೆದಿರ್ ಹಾಜರ್ ಆಸ್ಲೆ.
ಸಮನ್ವಯ ಸರ್ವ ಧರ್ಮ ಸೌಹರ್ದ ಸಮಿತಿ , ತೊಟ್ಟಾಮ್ ಹಾಚೊ ಕಾರ್ಯದರ್ಶಿ ಮಾನೇಸ್ತ್ ಲೆಸ್ಲಿ ಆರೋಜಾನ್ ಆಯಿಲ್ಲ್ಯಾ ಸರ್ವಾಂಕ್ ಸ್ವಾಗತ್ ಕರ್ತಾನಾ ಫಿರ್ಗಜೆಚ್ಯಾ ವಿವಿಧ್ ಘಟಂಕಾಚ್ಯಾ ಮುಖೆಲ್ಯಾಂನಿ ವೇದಿರ್ ಆಸ್‍ಲ್ಲ್ಯಾ ಸಯ್ರ್ಯಾಂಕ್ ಫುಲಾಂ ದೀವ್ನ್ ಮಾನ್ ಕೆಲೊ.
ಮಾನೇಸ್ತ್ ರಮೇಶ್ ತಿಂಗಳಾಯ – ಆಧ್ಯಕ್ಷ್,ಸಮನ್ವಯ ಸರ್ವ ಧರ್ಮ ಸೌಹರ್ದ ಸಮಿತಿ ಹಾಣೆ ಆಪ್ಲ್ಯಾ ಸಂದೇಶಾಂತ್ “ಕ್ರಿಸ್ಮಸ್ ಎಕ್ ಸಾರ್ವತ್ರಿಕ್ ಫೆಸ್ತ್ , ಸರ್ವಾಂಕ್ ಸಾಂಗಾತಾ ಹಾಡ್ಚೆಂ ಫೆಸ್ತ್ , ಮನ್ಶಾನ್ ಮನ್ಶಾಪಣ್ ಸಾಂಡ್‍ಲ್ಲ್ಯಾ ವಕ್ತಾ ದೆವಾನ್ ಹ್ಯಾ ಸಂಸಾರಿ ಯೇವ್ನ್ ಸುಟ್ಕಾ ದಿಲ್ಲೆಂ ಫೆಸ್ತ್ , ಜೆಜು ಕ್ರೀಸ್ತ್ ಆಮ್ಚ್ಯಾ ಫಾಸೊತ್ ಖಾಲ್ತೊ ಜಾವ್ನ್ ಗೊರ್ವಾಂಚ್ಯಾ ಖಾವ್ಣೆರ್ ಜಲ್ಮಾಲೊ ತಶೆಂಚ್ ಆಮಿಂ ಖಾಲ್ತಿಂ ಜಾವ್ನ್ ಜಾತ್-ಧರ್ಮ್ ಲೆಖಿನಾಸ್ತಾನಾ ಜೆಜು ಕ್ರೀಸ್ತಾಚಿ ದೇಖ್ ಘೇವ್ನ್ ಮೊಗಾನ್ ಜಿಯೆಂವ್ಕ್ ಜಾಯ್” ಮ್ಹಣ್ ಉಲೊ ದಿಲೊ.
ಮಾನಾಧಿಕ್ ಎಡ್ವಿನ್ ಜೊಸೆಫ್ , C.S.I. Ebenezer ಇಗರ್ಜ್ ಮಲ್ಪೆ ಹಾಣೆ ಆಪ್ಲ್ಯಾ ಉಲೊವ್ಣ್ಯಾಂತ್ “ಕ್ರಿಸ್ಮಸ್ ಏಕ್ ದೆವಾಚ್ಯಾ ಮೊಗಾಚೆಂ ಫೆಸ್ತ್ , ದೆವಾನ್ ಆಮ್ಚೊ ಇತ್ಲೊ ಮೋಗ್ ಕೆಲೊ ತೆಂ ತಿಳ್ಸುಂಕ್ ಏಕ್ ಲ್ಹಾನ್ ಭುರ್ಗ್ಯಾಚೆಂ ನಿದರ್ಶನ್ ತಾಣೆ ದಿಲೆಂ.ಕಶೆಂ ಏಕ್ ಲ್ಹಾನ್ ಭುರ್ಗ್ಯಾಕ್ ಪಳೆಯ್ಲ್ಯಾ ತಕ್ಷಣ್ ಎಕೆಕ್ಲೊ ಎಕೇಕ್ ರಿತಿಚೊ ಮೋಗ್ ವ್ಯಕ್ತ್ ಕರ್ತಾ , ಥೊಡೆ ಭುರ್ಗ್ಯಾಕ್ ಉಕ್ಲುನ್ ಪೊಶೆತಾತ್ , ಥೊಡೆ ಖೆಳಾಯ್ತಾತ್ , ಥೊಡೆ ಉಮೆ ದಿತಾತ್ , ಉಸ್ಕ್ಯಾರ್ ಬಸಾಯ್ತಾತ್ ಆಶೆಂ ವಿಶೇಸ್ ಥರಾಚೊ ಮೊಗ್ ಕರ್ತಾತ್ ತಶೆಂಚ್ ದೆವಾನ್ ಆಮಾಂ ಸರ್ವಾಂಚೊ ಆಪ್ಲ್ಯಾ ಪುತಾ ಮಾರಿಫಾತ್ ಲ್ಹಾನಾಂ ಭುರ್ಗ್ಯಾಂ ಪರಿ ಮೋಗ್ ಕೆಲೊ” ಮ್ಹಳೆಂ.
ಮಾನೇಸ್ತ್ ಮೌಲಾನಾ ಇಮ್ರಾನುಲ್ಲಾ ಖಾನ್ ಮನ್ಸೂರಿ -ಮುಖ್ಯ್ ಧರ್ಮಗುರು , ಜಾಮಿಯ ಮಸ್ಜಿದ್ , ಸಯ್ಯದಿನಾ ಆಬೂಬಕರ್ ಸಿದ್ದೀಕ್ ಮಲ್ಪೆ ಹಾಣೆ ಆಪ್ಲ್ಯಾ ಉಲೊವ್ಪಾಂತ್ “ಆದ್ಲ್ಯಾ ಮಹಿನ್ಯಾಂತ್ ನೆಜಾರಾಂತ್ ಎಕ್‍ಚ್ ಘರ್ಚ್ಯಾ ಚಾರ್ ಸಾಂಧ್ಯಾಂಚಿ ಖುನಿ ಜಾಲ್ಲ್ಯಾ ಸಂದರ್ಭಾರ್ ಸರ್ವ್ ಜಾತಿ ಕಾತಿಂಚ್ಯಾ ಲೊಕಾಂನಿ ದಾಕಯಿಲ್ಲಿ ಭಾವೈಕ್ಯತಾ ಆನಿ ಸಾಂಗಾತ್ಪಣ್ ಸರ್ವಾಂಕ್ ಮಾಧರಿ ಜಾಂವ್ಚ್ಯಾ ತಸಲೆಂ. ಮನ್ಶಾಪಣ್ ಹೊಗ್ಡಾಯಿಲ್ಲೆಂ ದಿಸ್ಚ್ಯಾ ಹ್ಯಾ ಕಾಳಾರ್ ಹ್ಯಾ ಘಡಿತಾ ಉಪ್ರಾಂತ್ ಲೊಕಾಂನಿ ದಾಕಯಿಲ್ಲೊ ಎಕ್ವೊಟ್ ಆಮ್ಚ್ಯಾ ದೇಶಾಕ್‍ಚ್ಚ್ ಆದರ್ಶ್ ಜಾಂವ್ದಿ , ಕ್ರಿಸ್ಮಸ್ ಮುಳ್ಳ್ಯಾರ್ ಆಮ್ಕಾಂ ಮನ್ಶ್ಯಾಂಕ್ ಮನ್ಶ್ಯಾಂ ಬೊರಿ ಕರ್ಚೆಂ ಫೆಸ್ತ್ , ಕ್ರಿಸ್ಮಸ್ ವ ಹೆರ್ ಧರ್ಮಾಂಚಿಂ ಫೆಸ್ತಾಂ ತಿಂ ಮಂದಿರಾಚ್ಯಾ , ಮಸೀದೆಚ್ಯಾ ವ ಇಗರ್ಜಾಚ್ಯಾ ವಠಾರಾಂತ್ ತೆದ್ನಾಂ ತೆದ್ನಾಂ ಆಚರಣ್ ಕರುಂಕ್ ಜಾಯ್. ಲೊಕಾಂನಿ ಸಾಂಗಾತಾ ಯೆಂವ್ಕ್ ಜಾಯ್ ಕಿತ್ಯಾಕ್ ಮುಳ್ಳ್ಯಾರ್ ರಾಜ್‍ಕಾರಣಿ ತಾಂಚ್ಯಾ ಸ್ವಾರ್ಥಾ ಖಾತಿರ್ ಆಮ್ಕಾಂ ವಿಂಗಡ್ ಕರುಂಕ್ ಪಳೆತಾತ್. ಪುಣ್ ಆಮಿ ಮನ್ಶ್ಯಾಂನಿ ಎಕಾಮೆಕಾಚ್ಯಾ ಬೊರ‍್ಯಾ ಮನಾನ್ ಆಮ್ಚ್ಯಾಮ್ಚ್ಯಾ ಧರ್ಮಾಕ್ ಗೌರವ್ ದೀವ್ನ್ , ಧರ್ಮಾಚ್ಯಾ ಭಾಯ್ರ್ ಕಿತೆಂ ಸರ್ವ್ ಕರುಂಕ್ ಸಾಧ್ಯ್ ಆಸಾ ತೆಂ ಆಮಿಂ ಸಾಂಗಾತಾ ಮೆಳೊನ್ ಕರ್ಯಾಂ” ಮ್ಹಣ್ ಉಲೊ ದಿಲೊ.
ಆಗ್ನೇಲ್ ಫೆರ್ನಾಂಡಿಸ್ -ಉಪಾಧ್ಯಕ್ಷ್,ಸಮನ್ವಯ ಸರ್ವ ಧರ್ಮ ಸೌಹರ್ದ ಸಮಿತಿ ಹಾಣೆ ದಿನ್ವಾಸ್ ಪಾಟಯ್ಲೆ.
ವೇದಿರ್ ಆಸ್‍ಲ್ಲ್ಯಾ ಸರ್ವಾಂನಿ ಸಾಂಗಾತಾ ಮೆಳೊನ್ ಕೇಕ್ ಕಾತರ್ನ್ ಎಕಾಮೆಕಾ ಉಲ್ಲಾಸುನ್ ಮಾಯಾಮೊಗಾಚೊ ಸಂದೇಶ್ ಪಾಚಾರ್ಲೊ. ಹಾಜರ್ ಆಸ್‍ಲ್ಲ್ಯಾ ಸರ್ವಾಂಕ್ ಕೇಕ್ ಆನಿ ಥಂಡ್ ಪೀವನ್ ICYM ಆನಿ Y.C.S ಸಾಂಧ್ಯಾಂನಿ ವಾಂಟ್ಲೆಂ.
ಉಪ್ರಾಂತ್ ಚಲ್‍ಲ್ಲ್ಯಾ ವೈವಿಧ್ಯಮಯ್ ಸಾಂಸ್ಕ್ರತಿಕ್ ಕಾರ್ಯಾಂತ್ ಶಭರಿ ತಿಂಗಳಾಯ ಹಿಚೆ ಥಾವ್ನ್ ಕ್ಲಾಸಿಕಲ್ ನ್ರತ್ಯ್ , ICYM ಆನಿ Y.C.S ಸಾಂದ್ಯಾಂ ಥಾವ್ನ್ ಕ್ರಿಸ್ಮಸ್ ಕ್ಯಾರಲ್ಸ್ , ನಾಚ್ ತಶೆಂಚ್ ಗಾಯನ್ , ICYM ಸಾಂದ್ಯಾಂ ಥಾವ್ನ್ ಆಮಿಂ ಸರ್ವಾಂ ಎಕ್ ಆನಿ ಹ್ಯಾಚ್ಚ್ ಭಾರತ್ ದೇಶಾಚಿಂ ನಾಗರಿಕಾಂ ಮ್ಹಳ್ಳೊ ಸಂದೇಶ್ ದಿಂವ್ಚೊ ಎಕ್ವೊಟಾಚೊ ಟ್ಯಾಬ್ಲೊ, ಸಮನ್ವಯ ಕಮಿಟಿಚ್ಯಾ ಪ್ರಸಾದ್ ಕುಂದರ್ ಹಾಚ್ಯಾ ಮುಖೆಲ್ಪಣಾರ್ ಯಕ್ಷಗಾನ ನಾಚ್, ನಾನು ಮರೋಲ್ ಹಾಚ್ಯಾ ಮುಖೆಲ್ಪಣಾರ್ ಫಿರ್ಗಜ್‍ಗಾರಾಂ ಥಾವ್ನ್ ಸಂದೇಶ್ ಭರಿತ್ ಮಟ್ವೊ ನಾಟ್ಕುಳೊ“ದಾದ್ಲ್ಯಾಚೊ ಸಾಕ್ರಿಫಿಸ್”, ಆಶೆಂ ವಿವಿಧ್ ಕಾರ್ಯಕ್ರಮಾಂ ದ್ವಾರಿಂ ಹಾಜರ್ ಆಸ್‍ಲ್ಲ್ಯಾ ಪ್ರೇಕ್ಷಕಾಂಕ್ ಮನೋರಂಜಿತ್ ಕರುನ್ ಎಕ್ ಸದಾಂಚ್ ಉಗ್ಡಾಸಾಚೆಂ ಕಾರ್ಯೆಂ ಯುವಜಣಾಂನಿ ಆಸಾ ಕೆಲೆಂ.
