ಅಗೊಸ್ತ್ 31ವೆರ್ ಉಗ್ತಾವಣ್ ಜಾತಾ ‘ನವ್- ರಂಗ್’ ಎಡ್ಡಿ ಸಿಕೇರಿಚೊ ನಾಟಕಾಂ ಪುಸ್ತಕ್

313

ಮಾಲ್ಘಡೊ ನಾಟಕಿಸ್ತ್, ನಿರೂಪಕ್ ಆನಿ ನಾಮ್ನೆಚೊ ಕಲಾಕಾರ್ ಎಡ್ಡಿ ಸಿಕೇರ್ ಹಾಂಚ್ಯಾ ನಾಟಕ್ ಕೃತಿಯಾಂಚೊಂ ಜಮೊ ನವ್ ರಂಗ್ ಸನ್ವಾರಾ ಅಗೋಸ್ತ್ 31 ವೆರ್ ಸಾಂಜೆಚ್ಯಾ 6.00 ವರಾಂಚೇರ್ ಸಾಂ. ಲುವಿಸ್ ಕೊಲೆಜಿಚ್ಯಾ ‘ಸಹೋದಯ’ ಸಾಲಾಂತ್ ಉಗ್ತಾವಣ್ ಜಾತಲೊ. ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚೊ ವೈಸ್ ಚಾನ್ಸಲರ್ ಮಾ| ದೊ| ಪ್ರವೀಣ್ ಮಾರ್ಟಿಸ್, ಜೆ. ಸ. ಬೂಕ್ ಉಗ್ತಾಯ್ತಲೆ. ಮೈಕಲ್ ಡಿ ಸೊಜಾ ಟ್ರಸ್ಟ್ ಹಾಚೊ ಸಲಹಾದಾರ್ ಮಾನೆಸ್ತ್ ಸ್ಟೀಫನ್ ಪಿಂಟೊ, ಬೆಂದುರ್ ಆನಿ ಕಿಟಾಳ್ ಜಾಳಿಜಾಗ್ಯಾಚೊ ಸಂಪಾದಕ್ ಎಚ್ಚೆಮ್, ಪೆರ್ನಾಲ್ ಕಾರ್ಯಾಕ್ ಸಯ್ರೆ ಜಾವ್ನ್ ಹಾಜರ್ ಆಸ್ತಲೆ.

ಕಾರ್ಯಾಂತ್ ಎಡ್ಡಿ ಸಿಕೇರ್ ಆಪ್ಲ್ಯಾ ನಾಟಕ್ ಪಯ್ಣಾ ವಿಶ್ಯಾಂತ್ ಉಲಂವ್ಚೆಂ ಬರಾಬರ್, ಥೊಡ್ಯಾ ನಾಟಕಾಂತ್ಲ್ಯಾ ವಿಂಚ್ಣಾರ್ ದೃಶ್ಯಾಂಚೆಂ ವಾಚನ್ ಆನಿ ಅಭಿನಯ್ ಪೇಶ್ ಕರ್ತಲೆ. ನಾಮ್ನೆಚಿ ರಂಗ್ ಕಲಾಕಾರ್ನ್ ಶ್ರೀಮತಿ ಜೀನಾ ಡಿ ಸೊಜಾ ಎಡ್ಡಿ ಸಿಕೆರ್ ಹಾಂಕಾ ವೆದಿರ್ ಸಾಂಗಾತ್ ದಿತೆಲಿ.

ನವ್ ರಂಗ್ ಬುಕಾಂತ್ ಎಡ್ಡಿ ಸಿಕೇರಿನ್ ಬರಯಿಲ್ಲೆ ತೀನ್ ನಾಟಕ್, ಚಾರ್ ಕಿಣ್ಕುಳೆ ಆನಿ ದೋನ್ ಕೊಂಕ್ಣಿ ನಾಟಕ್ ಸಂಬಂದಿ ಅಧ್ಯಯನ್ ಲೇಖನಾಂ ಆಸಾತ್. ಪ್ರೊ| ದೊ| ವಿದ್ಯಾ ವಿನುತ ಡಿ ಸೊಜಾ ಹಿಚ್ಯಾ ಮುಕೆಲ್ಪಣಾರ್ ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಸಾಂ. ಲುವಿಸ್ ಪ್ರಕಾಶನಾನ್ ವಿಶ್ವ ಕೊಂಕಣಿ ಕೇಂದ್ರಾಚ್ಯಾ ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ ಪುಸ್ತಕ್ ಪ್ರಕಾಶನ್ ಅನುದಾನ್ ಯೋಜನಾಖಾಲ್ ಪುಸ್ತಕ್ ಫಾಯ್ಸ್ ಕೆಲ್ಲೊ ಆಸುನ್, 160 ಪಾನಾಂಚ್ಯಾ ಬುಕಾಚೆಂ ಮೋಲ್ ರು. 200/- ಆಸೊನ್ ಉಗ್ತಾವಣೆ ದಿಸಾ ಪಯ್ಲೆಂ ವಿಕೊನ್ ವೆಚ್ಯಾ ಪನ್ನಾಸ್ ಬುಕಾಂಕ್ ವಿಶೇಸ್ ರಿಯಾಯ್ತಿ ಮೆಳ್ತೆಲಿ ಮ್ಹಣ್ ಪರ್ಗಟ್ಣರಾಂನಿ ಕಳಯ್ಲಾಂ.

ವೃತ್ತೆನ್ ಚಿತ್ರ್ ಕಲಾಕಾರ್ ಜಾವ್ನಾಸ್ಚೊ ಎಡ್ಡಿ ಸಿಕೇರ್ ಪ್ರವೃತ್ತೆನ್ ಕವಿ, ನಟ್, ನಿರ್ದೇಶಕ್, ನಾಟಕ್ ಬರವ್ಪಿ ಆನಿ ಕಾರ್ಯೆಂ ನಿರ್ವಾಹಕ್. 1951 ಅಗೋಸ್ತಾಚ್ಯೆ 28 ತಾರ್ಕೆರ್ ಮಂಗ್ಳುರ್ ಇಜಯ್ ಫಿರ್ಗಜೆಂತ್ ತಾಚೊ ಜಲ್ಮ್. ಧಾವಿ ಪರ್ಯಾಂತ್ ಮಂಗ್ಳುರ್ ಸಾಂ ಲುವಿಸ್ ಇಸ್ಕೊಲಾಂತ್ ಶಿಕಪ್. ಉಪ್ರಾಂತ್ ತೀನ್ ವರ್ಸಾಂ ಬಿ.ಜಿ.ಎಮ್. ಕಲಾ ಇಸ್ಕೊಲಾಂತ್ ಚಿತ್ರ್ ಕಲಾ ಶಿಕಪ್. ತ್ಯಾ ನಂತರ್ ಆಜ್ ಪರ್ಯಾಂತ್ ತೊ ವೃತ್ತಿಪರ್ ಚಿತ್ರ್ ಕಲಾಕಾರ್ ಜಾವ್ನ್ ವಾವ್ರ್ ಕರಿತ್ ಆಯ್ಲಾ. ನಟ್ ಜಾವ್ನ್ ಆಪ್ಲ್ಯಾ ಆಪ್ಲ್ಯಾ ಮೋಡಿಚ್ಯಾ ತಾಳ್ಯಾನ್ ಆನಿ ತೀಕ್ಷ್ಣ್ ಅಭಿನಯನಾನ್ ಕಸಲ್ಯಾಯ್ ಪಾತ್ರಾಂತ್ ಜೀವ್ ಭರ‍್ಚಿ ಸಕತ್ ತಾಚಿ. ಅಭಿನಯ್, ಉಜ್ವಾಡ್, ಸಂಗೀತ್, ಹ್ಯಾ ಸರ್ವಾಂಚಾ ಕಲಾತ್ಮಕ್ ಮಿಲನಾಚೆಂ ನವೆಂಪಣ್ ಕೊಂಕ್ಣಿ ನಾಟಕ್ ನಿರ್ದೇಶನಾಂತ್ ಹಾಡುನ್ ಫಾಮಾದ್ ಕವಿ, ನಾಟಕಿಸ್ತ್ ಚಾಫ್ರಾ ದೆಕೋಸ್ತಾಚೆ ಸಬಾರ್ ನಾಟಕ್ ಆಪ್ಲ್ಯಾ ಕಲಾತ್ಮಕ್ ನಿರ್ದೇಶನಾನ್ ತಾಣೆಂ ರಂಗಯಿಲ್ಲೆ ಆಸಾತ್.

ಕಲಾ ಸಂಪತ್ ಸಂಘಟನಾನ್ ವರ್ಸಾವಾರ್ ಚಲಯಿಲ್ಲ್ಯಾ ನಾಟಕ್ ಸ್ಪರ್ಧ್ಯಾಂನಿ ನಟನಾಕ್ ಆನಿ ನಿರ್ದೇಶನಾಕ್ ಸಬಾರ್ ಬಹುಮಾನಾಂ ತಾಣೆಂ ಆಪ್ಣಾಯಿಲ್ಲಿಂ. ನವ್ಯಾಚ್ ಶೈಲೆಚೆ ’ವರ್ಸಾಕ್ ಏಕ್ ಪಾವ್ಟಿಂ’ ’ತೆಂ ತೊ ಆನಿ ಹಾಂವ್’ ಭಾರಿಚ್ ಯಶಸ್ವಿ ಜಾಲ್ಲೆ ತಾಚೆ ಮಟ್ವೆ ನಾಟಕ್. ’ಪರತ್ ಏಕ್ ಪಾವ್ಟಿಂ’ ಆನಿ ’ಗಲ್ಫ್ ಸರ್ಗಾರ್ ಏಕ್ ಸುಕ್ರಾರ್’ ಪ್ರಶಸ್ತ್ಯೊ ಆಪ್ಣಾಯಿಲ್ಲೆ ತಾಚೆ ಲಾಂಬ್ ನಾಟಕ್. ಹ್ಯಾ ಶಿವಾಯ್ ಕಾರ್ಯೆಂ ನಿರ್ವಾಹಕ್ ಜಾವ್ನ್ ಶೆಂಭರಾಂ ವಯ್ರ್ ’ವಿಲ್ಫಿ ನಾಯ್ಟ್’ ಆನಿ ಇತರ್ ಸಬಾರ್ ಸಾಂಸ್ಕೃತಿಕ್ ಕಾರ್ಯಕ್ರಮಾಂ ಚಲವ್ನ್ ವ್ಹೆಲ್ಯಾಂತ್.

ಆಂಕ್ವಾರ್ ಆವಯ್ (ಎ ಟಿ ಲೋಬೊ) ಶಿರಾಪ್ (ಬೆನ್ನಾ ರುಜಾಯ್) ಆಂಕ್ವಾರ್ ಮರಿಯೆಚಿ ಕಥಾ (ಬೆನ್ನಾ ರುಜಾಯ್ – ನಟನ್:ಜೆಜು) ಜೆಜು ನಜರೆನ್ (ಜೊಸಾ ಅಲ್ವಾರಿಸ್ – ನಟನ್ : ಜುದಾಸ್) ಕೆಡಿ ಬೊನಾ ಬಿ.ಎ. (ವಿಲ್ಫಿ ರೆಬಿಂಬಸ್ – ನಟನ್:ನಿರ್ದೇಶನ್) ಜಿಲ್ಲು ವಾಂಟೆಡ್ ( ಪರ್ಸಿ ಉರ್ವಾ – ನಟನ್ : ನಿರ್ದೇಶನ್) ಮಿಲಾರ‍್ಚಿ ಚರಿತ್ರಾ ( ಶ್ರೀಮತಿ ಲುಯೆಲ್ಲಾ ಲೋಬೊ ಪ್ರಭು – ನಟನ್ ಆನಿ ನಿರ್ದೇಶನ್) ಸಪ್ನ ಸಾರಸ್ವತ್ (ಗೊಪಾಲಕೃಷ್ಣ ಪೈ – ನಟನ್ ಆನಿ ನಿರ್ದೇಶನ್) ತಾಣೆ ನಟನ್ ಆನಿ ನಿರ್ದೇಶನ್ ಕೆಲ್ಲೆ ಥೊಡೆ ಪ್ರಮುಕ್ ನಾಟಕ್.

‘ಹಾಂಡೊ ಉಟ್ಲಾ ‘, ‘ವಿಶೆಂತಿಚೆ ಭಾವ್’, ‘ಮಾಂಕ್ಡಾಚೊ ಪಾಯ್’ ‘ಭಾಂಗಾರ್ ಮನಿಸ್’, ‘ಆಂಕ್ವಾರ್ ಮೆಸ್ತ್ರಿ’, ‘ತರ್ನೆಂ ತರ್ನೆಂ ಮೊರ್ನೆಂ’ ಆನಿ ‘ಸುಣೆಂ ಮಾಜರ್ ಹಾಸ್ತಾ’ ತಾಣೆ ನಟನ್ ಆನಿ ನಿರ್ದೇಶನ್ ಕೆಲ್ಲೆ ಚಾ. ಫ್ರಾ. ದೆಕೊಸ್ತಾಚೆ ನಾಟಕ್.

‘ದೊನ್ಶಿಂ ದೊಂಪ್ಳೆ ಧಾನಿಯೆಲ್’ (ಏಕ್ ವ್ಯಕ್ತಿ ನಾಟಕ್-Monologue) ‘ಮಾಗಿರ‍್ಚೆಂ ಮಾಗಿರ್’, ‘ಬೊಂಚೊ ಬಂಧ್’, ‘ಕುವಾಳ್ಯಾಚಿ ವಾಲ್’, ‘ತೆಂ, ತೊ ಆನಿ ಹಾಂವ್’ – ಪಯಿಲ್ಯಾ ಪ್ರದರ್ಶನಾಂಕ್ ನಟನ್ ನಿರ್ದೇಶನ್ ಕೆಲ್ಲೆ ಚಾಫ್ರಾ ದೆಕೊಸ್ತಾಚೆ ನಾಟಕ್.