“ಸಮಾಜೆಂತ್ ಸುಧ್ರಾಪ್ ಹಾಡ್ಚಿ ಸಕತ್ ಸಾಹಿತ್ಯಾಕ್ ಆಸಾ. ರಾಜಕಾರಣಿಂ ಪರಿಂ ಬರಯ್ಣಾರಾಂನಿ ಮುಲಾಜೆಕ್ ಪಡಾಜೇ ವಾ ಮಿತಿ ವಿಶ್ಯಾಂತ್ ಚಿಂತಿಜೆ ಮ್ಹಣ್ ನಾ. ಹ್ಯಾ ಕಾರಣಾಕ್ ಲಾಗೊನ್ ಸಾಹಿತಿಂಕ್ ಸಮಾಜ್ ಸುಧ್ರಾಪಾಚೆ ಸೂತ್ರ್‌ದಾರ್ ಮ್ಹಣ್ಯೆತ್. ಸಾಹಿತ್ಯ್ ಅನಿ ಸಮಾಜ್ ವಾಡೊಂಕ್ ವಿಮರ್ಸೊ ಬೋವ್ ಗರ್ಜೆಚೊ ಜಾಲ್ಲ್ಯಾನ್ ಆಮಿ ಉಗ್ತ್ಯಾ ಮನಾನ್ ವಿಮರ್ಸೊ ಘೆಂವ್ಕ್ ಶಿಕಾಜೆ ” ಮ್ಹಣಾಲೊ ಮಾನೆಸ್ತ್ ಐವನ್ ಡಿ ಸೊಜಾ, ಕರ್ನಾಟಕ ವಿದಾನ್ ಪರಿಶದೆಚೊ ಶಾಸಕ್.
ಮಾನೆಸ್ತ್ ಐವನ್ ಡಿ ಸೊಜಾ , ಸನ್ವಾರಾ, ಅಕ್ತೋಬರ್ ೫ ವೆರ್, ಹಂಪನ್‌ಕಾಟ್ಯಾರ್ ಎಂಸಿಸಿ ಬ್ಯಾಂಕಾಚ್ಯಾ ಫಿ.ಎಪ್.ಎಕ್ಸ್ ಸಲ್ಡಾನ್ಹಾ ಅಡಿಟೋರಿಯಮಾಂತ್ ಕಿರಣ್ ನಿರ್ಕಾಣ್ ಲಿಕ್ಣೆನಾಂವಾನ್ ಬರಂವ್ಚ್ಯಾ ನಿರ್ಕಾಣ್ ಫಿರ್ಗಜೆಚ್ಯಾ ಫ್ಲೊಯ್ಡ್ ಕಿರಣ್ ಮೊರಾಸ್ ಹಾಕಾ 2024 ವ್ಯಾ ವರ್ಸಾಚೊ, ಅಬುದಾಬಿಚೊ ಉದ್ಯಮಿ ಆನಿ ಕೊಂಕ್ಣಿ ಸಮರ್ಥಕ್ ಮಾನೆಸ್ತ್ ಲಿಯೊ ರೊಡ್ರಿಗಸ್ ಕುಟ್ಮಾನ್ ದಿಂವ್ಚೊ ಕಿಟಾಳ್ ಯುವ ಪುರಸ್ಕಾರ್ ಪ್ರದಾನ್ ಕರುನ್ ಉಲಯ್ತಾಲೆ. ಪುರಸ್ಕಾರ್ ನಗ್ದೆನ್ ರುಪಯ್ ೨೫,೦೦೦ ಆನಿ ಮಾನ್ ಪತ್ರ್ ಆಟಾಪ್ತಾ.
ಪ್ರಶಸ್ತೆಚೊ ಪೋಶಕ್ ಮಾನೆಸ್ತ್ ಲಿಯೊ ರೊಡ್ರಿಗಸ್ ಹಾಣಿ ಅಬುದಾಬಿ ಥಾವ್ನ್ ವಿಡಿಯೊ ಸಂದೇಶಾ ಮುಕಾಂತ್ರ್ ಕಿರಣ್, ನಿರ್ಕಾಣ್ ಹಾಕಾ ಕುಟ್ಮಾ ತರ್ಫೆನ್ ಉಲ್ಲಾಸ್ ಪಾಟಯ್ಲೆ ಆನಿ ಸಯ್ರ್ಯಾಂಕ್ ಬರೆಂ ಮಾಗ್ಲೆಂ. ಕೊಂಕ್ಣಿ ಭಾಸ್ ಆನಿ ಸಾಹಿತ್ಯಾ ಖಾತಿರ್ ಆಪ್ಲ್ಯಾ ಕುಟ್ಮಾಚೊ ಸಹಕಾರ್ ಸದಾಂಚ್ ಆಸ್ತಲೊ ಮ್ಹಣ್ ಭಾಸಾಯ್ಲೆಂ.
ಎಂಸಿಸಿ ಬ್ಯಾಂಕಾಚೊ ಅಧ್ಯಕ್ಷ್ ಮಾನೆಸ್ತ್ ಅನಿಲ್ ಲೋಬೊ ಹಾಣಿ ಕಿರಣ್, ನಿರ್ಕಾಣ್ ಹಾಕಾ ಉಲ್ಲಾಸ್ ಪಾಟವ್ನ್ “ಲಿಯೊ ರೊಡ್ರಿಗಸ್ ಪಾಟ್ಲ್ಯಾ ಇಕ್ರಾ ವರ್ಸಾಂ ಪಾಸುನ್ ಕೊಂಕ್ಣಿ ಸಾಹಿತ್ಯಾಂತ್ಲ್ಯಾ ಯುವ ಪ್ರತಿಭೆಂಕ್ ಮಾನ್ ಕರುನ್ ಆಸಾತ್. ಕೊಂಕ್ಣಿ ಭಾಸ್ ಆನಿ ಸಾಹಿತ್ಯಾಚಾ ವಾಡಾವಳೆಚ್ಯಾ ದಿಶೆನ್ ಹಿ ಬೋವ್ ವರ್ತಿ ಗಜಾಲ್. ಅಜ್ ಮೆರೆನ್ ಲಿಯೊ ರೊಡ್ರಿಗಸ್ ಕುಟ್ಮಾ ಥಾವ್ನ್ ಯುವ ಪುರಸ್ಕಾರ್ ಜೊಡ್‌ಲ್ಲೆ ಕೊಂಕ್ಣೆಂತ್ ವ್ಹಡ್ಲೆ ಸಾಹಿತಿ ಜಾಲ್ಯಾತ್. ಭಾಸ್, ಸಾಹಿತ್ಯ್, ಸಂಗೀತ್, ಕಲಾ ಹಿಂ ಶೆತಾಂ ಫುಲಜೆ ತರ್ ಯುವ ಪ್ರತಿಭೆಂಕ್ ಪ್ರೊತ್ಸಾಹ್ ದೀಜೆ” ಮ್ಹಳೆಂ.
ಪುರಸ್ಕಾರ್ ಸ್ವೀಕಾರ್ ಕರುನ್ ಉಲಯಿಲ್ಲ್ಯಾ ಕಿರಣ್ ನಿರ್ಕಾಣ್ ಹಾಣಿ “ಪ್ರಶಸ್ತೆನ್ ಮ್ಹಜಿ ಜವಾಬ್ದಾರಿ ವಾಡಯ್ಲ್ಯಾ. ಗಲ್ಪ್, ಕೆನಡಾ, ಆಸ್ಟೇಲಿಯಾ ಅಶೆಂ ಜಾಯ್ತ್ಯಾ ದೇಶಾಂನಿ ಆಜ್ ಕೊಂಕ್ಣಿ ಭಾಸ್ ವಿಸ್ತಾರ್ಲ್ಯಾ ಆನಿ ಜಾಯ್ತಿಂ ಸಂಘಟನಾಂ ಕೊಂಕ್ಣೆಚೆಂ ಕಾಮ್ ಕರುನ್ ಆಸಾತ್. ಪೂಣ್ ಹೆಂ ಕಾಮ್ ಫಕತ್ ಸಾಂಸ್ಕೃತಿಕ್ ಕಾರ್ಯಿಂ ಆನಿ ಕಲೆಕ್ ಮಾತ್ ಸೀಮಿತ್ ಜಾಯ್ನಾಯೆ. ಸಾಹಿತ್ಯಾಚೆಂ ಕಾಮ್‌ಯೀ ಜಾಲ್ಯಾರ್ ಕೊಂಕ್ಣಿ ಭಾಶೆಕ್ ಚಡಿತ್ ಬಳ್ ಮೆಳ್ತೆಲೆಂ. ಹ್ಯಾ ವಾಟೆನ್ ಮ್ಹಜ್ಯಾ ತಾಂಕಿ ಭಿತರ್ಲೆಂ ಪ್ರೇತನ್ ಹಾಂವ್ ಕರ್ತಲೊಂ” ಮ್ಹಳೆಂ. ಪ್ರಶಸ್ತಿ ಸ್ವೀಕಾರ್ ಕರ್ಚ್ಯಾ ಸಂದರ್ಬಾರ್ ಕಿರಣಾಚಿಂ ವ್ಹಡಿಲಾಂ ಶ್ರೀ ಫೆಲಿಕ್ಸ್ ಮೊರಾಸ್ ಆನಿ ಶ್ರಿಮತಿ ಕ್ರಿಸ್ತಿನ್ ಲೋಬೊ ಪತಿಣ್ ಶ್ರೀಮತಿ ಪ್ರೀತಿಕಾ ಆನಿ ಭುರ್ಗಿಂ ಜೋಆನ್ ನೈರಾ ಅನಿ ಡೇವ್ ಕೀತ್ ಹಾಣಿ ಕಿರಣಾಕ್ ಸಾಂಗಾತ್ ದಿಲೊ.
ಕಿಟಾಳ್ ಸಂಪಾದಕ್ ಎಚ್ಚೆಮ್ ಪೆರ್ನಾಲ್ ಹಾಣಿ ಪ್ರಾಸ್ತಾವಿಕ್ ಉತ್ರಾಂ ಉಲವ್ನ್, ಮುಕೆಲ್ ಸಯ್ರ್ಯಾಂಚಿಂ ಒಳಕ್ ಕರುನ್ ದಿಂವ್ಚೆ ಸವೆಂ ಯೆವ್ಕಾರ್ ಮಾಗ್ಲೊ. ಸಾಂಗಾತಿ ಸಂಪಾದಕ್ ಕವಿ ವಿಲ್ಸನ್ ಕಟೀಲ್ ಹಾಣಿ ಪುರಸ್ಕಾರ್ ವಿಜೇತಾಚಿ ಒಳಕ್ ಕರುನ್ ದೀವ್ನ್ ಮಾನ್ ಪತ್ರ್ ವಾಚ್ಲೆಂ. ವಿಂಚ್ಣುಕೆ ಸಮಿತಿಚೊ ಅಧ್ಯಕ್ಷ್ ಟೈಟಸ್ ನೊರೊನ್ಹಾ ಹಾಣಿ ಸಮಾರೋಪಾಚ್ಯಾ ಉತ್ರಾಂ ಸಂಗಿ ದಿನ್ವಾಸ್ ಪಾಟಯ್ಲೆ. ವಿಲ್ಸನ್ ಕಿನ್ನಿಗೋಳಿ ಹಾಣೆ ಆಪುರ್ಬಾಯೆನ್ ಕಾರ್ಯೆಂ ಚಲವ್ನ್ ವೆಲೆಂ.
ವಿಶನ್ ಕೊಂಕಣಿ ಯೆವ್ಜಣೆಚೊ ಪ್ರವರ್ತಕ್ ಶ್ರಿ ಮೈಕಲ್ ಡಿ ಸೊಜಾ, ಯುವ ಉದ್ಯಮಿ ರೋಹನ್ ಮೊಂತೇರೊ, ಉದ್ಯಮಿ ರಮೇಶ್ ನಾಯ್ಕ್, ಕೊಮೆಡಿ ಕಿಂಗ್ ಫ್ರಾನ್ಸಿಸ್ ಫೆರ‍್ನಾಂಡಿಸ್ ಕಾಸ್ಸಿಯಾ, ಗೀತ್ – ಗಜಾಲ್ ಪಂಗ್ಡಾಚೊ ಮುಕೆಲಿ, ಆಂಕ್ರಿ ಸಂಪಾದಕ್ ಶ್ರೀ ಸನ್ನು ಮೋನಿಸ್ ಬೊಳಿಯೆ, ಸಮುದಾಯಾಚೆ ಮುಕೆಲಿ ಮಾನೆಸ್ತ್ ಪೀಯೂಸ್ ಎಲ್. ರೊಡ್ರಿಗಸ್, ನವೀನ್ ಆರ್ ಡಿ ಸೊಜಾ, ಮಾರ್ಸೆಲ್ ಮೊಂತೇರೊ ಆನಿ ಜಾಯ್ತೆ ಮಾನೆಸ್ತ್ ಕಾರ್ಯಾಕ್ ಹಾಜರ್ ಆಸೊನ್ ಕಾರ್ಯಾಚೊ ಭರಮ್ ಚಡಯ್ಲೊ.
■ ತಸ್ವಿರ‍್ಯೊ : ರೋಶನ್ ಮಾಡ್ತಾ
1 comment
Well organized Award Ceremony. In his Video message Sir Leo Rodrigues stressed on importance of supporting youth writers which I’m sure many young writers will take note.
On receiving Floyd Kiran said that in gulf countries many konkani cultural events are successfully organized but seldom importance is given to the literature. This is really very sad since every leader from podium says we must support konkani but forgetting the main part that is literature. As Floyd said, it’s high time to think and act quickly on this serious issue.
Finally Kittall has been doing a great job by way of supporting youngsters with youth award every year under the patronage of Leo Rodrigues and family. This is the encouragement n inspiration for many more young writers to take literature seriously and start writing.
As HM said in his introduction after KITTALL many old writers who have given up writing for one reason or other started writing again. I can proudly say I am ONE among them. It’s true that I started writing in 1977 and continued for a few years and gave up altogether. It is Kittall who inspired me write again.
Congratulations dear Floyd kiran a multi talented multi tasking young man. After receiving this award your responsibility really increases.Let more articles and poems flow from your pen. Wish you all the vesy best.