“ಆವಯ್ನ್ ಶಿಕಯಿಲ್ಲೆಂ ಲಿಸಾಂವ್ ಆನಿ ದಿಲ್ಲೆಂ ಬೆಸಾಂವ್ ಮನ್ಶ್ಯಾಕ್ ಉದ್ದಾರ್ ಕರ್ತಾ ಮ್ಹಣ್ಚ್ಯಾಕ್ ಮೈಕಲ್ ಡಿ ಸೊಜಾಚೆಂ ಜಿವಿತ್ ಏಕ್ ಗೊವಾಯ್. ಆಜ್‌ಯೀ ಆವಯ್ಚೊ ಉಲ್ಲೇಕ್ ಯೆತಾನಾ ತೋ ಭಾವುಕ್ ಜಾಲೊ. ಎಕಾ ಆವಯ್ನ್ ಎಕಾ ಗರ್ಜೆವೊಂತಾಕ್ ಕುಮಕ್ ದಿತಾನಾ ಜಾಂವ್ ವಾ ಇಗರ್ಜೆಂತ್ ಇಜ್ಮೊಲ್ ಘಾಲ್ತಾನಾ ; ಆಪ್ಲ್ಯಾ ಭುರ್ಗ್ಯಾಚ್ಯಾ ಹಾತಾಂತ್ ದಿಂವ್ಚ್ಯಾ ಕರ್ನೆ ಪಾಟ್ಲ್ಯಾನ್ ಏಕ್ ‘ಫಿಲೊಸೊಫಿ’ ಆಸಾ. ಆನಿ ತಿ ಜಾವ್ನಾಸಾ ಆಪ್ಲ್ಯಾ ಭುರ್ಗ್ಯಾಕ್ ಆಪ್ಲ್ಯಾ ಪೆಲ್ಯಾಚಾ ಗರ್ಜೆಕ್ ಪಾವೊಂಕ್ ವಾ ವಾಂಟುನ್ ಘೆಂವ್ಕ್ ಶಿಕಂವ್ಚೆಂ” ಮ್ಹಣಾಲೊ ಅ|ಮಾ|ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ, ಮಂಗ್ಳುರ್ ಧರ್ಮ್‌ಪ್ರಾಂತ್ಯಾಚೊ ಧರ್ಮಾಧ್ಯಕ್ಷ್.
ದೊ| ಸಲ್ದಾನ್ಹಾ ನಂತೂರ್ ಸಿ.ಒ.ಡಿ.ಪಿ. ಮದರ್ ತೆರೆಜಾ ಸಭಾಂಗ್ಣಾಂತ್ 103 ಭುರ್ಗ್ಯಾಂಕ್ ಮೈಕಲ್ ಡಿಸೊಜಾ ಕುಟ್ಮಾಚ್ಯಾ ಎಡುಕೇರ್ ಉಪಕ್ರಮಾಕಾಲ್ ವಾಡಿವೀಣ್ ಶಿಕ್ಪಾರೀಣ್ ಯೆವ್ಜಣೆಚ್ಯಾ ದುಸ್ರ್ಯಾ ಕಂತಾರ್ ರುಪಯ್ 86,60,000 ರುಪ್ಯಾಂಚಿಂ ಮಜತ್ ವಿತರಣ್ ಕರುನ್ ಉಲಯ್ತಾಲೊ. ಪಯ್ಲ್ಯಾ ಹಂತಾರ್ ಸಪ್ಟೆಂಬರ್ 16 ವೆರ್ 84 ವಿದ್ಯಾರ್ಥಿಂಕ್ ರುಪಯ್ 74,42,000 ರುಪ್ಯಾಂಚಿಂ ಮಜತ್ ಮೈಕಲ್ ಡಿ ಸೊಜಾ ಹಾಂಚಿ ಪತಿಣ್ ಶ್ರೀಮತಿ ಫ್ಲಾವಿಯಾ ಡಿ ಸೊಜಾ ಆನಿ ಧುವ್ ಶ್ರೀಮತಿ ನಿಶಾ ಡಿ ಸೊಜಾ ಹಾಂಚ್ಯಾ ಉಪಸ್ಥಿಂತೆಂತ್ ತಾಣಿ ವಿತರಣ್ ಕೆಲ್ಲಿ. [ ದುರ್ಬಳ್ಯಾಂಕ್ ಬಳ್ವಂತ್ ಕರ್ಚ್ಯಾ ಚಳ್ವಳೆಂತ್ ಮೈಕಲ್ ಡಿ ಸೊಜಾ ಕುಟಮ್ ಭರ್ವಶ್ಯಾಚೆಂ ಕೀರ್ಣ್ – ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ದಾನ್ಹಾ ]
ಎಡುಕೇರ್ ಉಪಕ್ರಮಾಚೊ ಫಳ್ ಜೊಡ್ಲೆಲ್ಯಾ ವಿದ್ಯಾರ್ಥಿಂಕ್ ಉದ್ದೇಸುನ್ ಧರ್ಮಾಧ್ಯಕ್ಷ್ ದೊ। ಸಲ್ಡಾನ್ಹಾನ್ ” ಅಣುಸಕ್ತೆಚ್ಯಾ ಉತ್ಪಾದನಾಂ ವಿಶ್ಯಾಂತ್ ವಿಗ್ಯಾನಾಚ್ಯಾ ವರ್ಗಾಂತ್ ಆಮಿ ಶಿಕ್ಲ್ಯಾಂವ್. ಆಮಿ ಆಮ್ಚ್ಯಾ ಪೆಲ್ಯಾಕ್ ಕರ್ಚಿ ಕುಮಕ್ ಅಣುಸಕ್ತೆಪರಿಂ. ಸುರ್ವಾತ್, ಉತ್ಪನ್ನ್ ಆನಿ ಪರಿಣಾಮ್. ಮೈಕಲ್ ಡಿ ಸೊಜಾ ಥಾವ್ನ್ ಸುರ್ವಾತ್ಲೆಲ್ಯಾ ಹ್ಯಾ ಕುಮ್ಕೆಥಾವ್ನ್ ತುಮಿ ಫಳ್ ಆನಿ ಪ್ರೇರಣ್ ಜೊಡುನ್, ಅನ್ಯೆಕ್ಲ್ಯಾಚಾ ಕಾಳ್ಜಾ ಪರ್ಯಾಂತ್ ತಿ ಪಾವಯಾ” ಮ್ಹಳೆಂ ಆನಿ ಮಾಂಯ್ – ಬಾಬ್, ಮಾಂಯ್ ಭಾಸ್ ಆನಿ ಮಾಂಯ್ ಗಾಂವ್ಚೊ ಮೋಗ್ ಸದಾಂಚ್ ಕಾಳ್ಜಾಂತ್ ಜಿವೊ ದವರುಂಕ್ ದಿಲ್ಲೊ ಮೈಕಲ್ ಡಿ ಸೊಜಾ ಉಲ್ಯಾಕ್ ಸಹಮತ್ ಉಚಾರ್ಲೊ.
ಮಾಂಯ್ – ಬಾಬಾಕ್, ಮಾಂಯ್ ಭಾಶೆಕ್ ಆನಿ ಮಾಂಯ್ ಗಾಂವಾಂಕ್ ಕೆದಿಂಚ್ ವಿಸ್ರಾನಾಕಾತ್ – ಮೈಕಲ್ ಡಿ ಸೊಜಾ
“ರಾವೊಂಕ್ ಏಕ್ ಬಿಡಾರ್, ದಿಸ್ಪಡ್ತೊ ಗ್ರಾಸ್ ಜೊಡುಂಕ್ ಫಾವೊತೆಂ ಶಿಕಪ್ ಆನಿ ಪಿಡೆಂತ್ ಪಡ್ಲ್ಯಾರ್ ಪಾವೊತಿ ಚಿಕಿತ್ಸಾ – ಹ್ಯೊ ಜಾವ್ನಾಸಾತ್ ಮನ್ಶ್ಯಾಚೊ ಮುಳಾವ್ಯೊ ಗರ್ಜೊ. ಬರೆಂ ಶಿಕಪ್ ಆಸ್ಲ್ಯಾರ್ ಮಾತ್ ಬರೆಂ ಕಾಮ್ ಮೆಳ್ತಾ ವಾ ಉದ್ಯಮಾಂತ್ ಉಂಚಾಯೆಕ್ ಫಾವೊಂಕ್ ಜಾತಾ. ಹ್ಯಾ ದಿಶ್ಟಾವ್ಯಾನ್ 2013 ವ್ಯಾ ವರ್ಸಾ ಸಿ.ಒ.ಡಿ.ಪಿ ಮಾಂತಾಖಾಲ್ ಎಡುಕೇರ್ ಯೋಜನ್ ಸುರು ಕೆಲ್ಲೆಂ ತರೀ, ಆಜ್ ಪರ್ಯಾಂತ್ ಮ್ಹಾಕಾ ವಿದ್ಯಾರ್ಥಿಂಕ್ ಮುಕಾಮುಕಿ ಮೆಳ್ಚೊ ಅವ್ಕಾಸ್ ಲಾಬೊಂಕ್ ನಾತ್ಲೊ. ಆಜ್ ಹೊ ಅವ್ಕಾಸ್ ಲಾಭ್ಲಾ ಆಸ್ತಾಂ ಕಾಳಿಜ್ ಭರೊನ್ ಯೆತಾ” ಮ್ಹಣ್ ವಿದ್ಯಾರ್ಥಿಂಕ್ ಉದ್ದೇಸುನ್ ಉಲಯಿಲ್ಲ್ಯಾ ಮೈಕಲ್ ಡಿ ಸೊಜಾ ಹಾಣಿ ” ಜಲ್ಮ್ ದಿಲ್ಲ್ಯಾ ಆವಯ್ – ಬಾಪಯ್ಕ್ ಮಾನ್ ದಿಯಾ, ಮಾಂಯ್ ಭಾಶೆಚೊ ಮೋಗ್ ಕರಾ ಆನಿ ಆನಿ ಮಾಂಯ್ ಗಾಂವಾಂಕ್ ಕೆದಾಳಾಚ್ ವಿಸರ್ನಾಕಾತ್” ಮ್ಹಣ್ ಭಾವುಕ್ ಜಾವ್ನ್ ಸಾಂಗ್ಲೆಂ.
ಆಪ್ಲ್ಯಾ ಉಲವ್ಪಾ ಮಧೆಂ ತೆಗಾಂ ವಿದ್ಯಾರ್ಥಿಂಕ್ ತಾಂಚಿಂ ಭೊಗ್ಣಾಂ ವಾಂಟುನ್ ಘೆಂವ್ಕ್ ವೆದಿಕ್ ಆಪಯಿಲ್ಲ್ಯಾ ಮೈಕಲ್ ಡಿ ಸೊಜಾನ್ “ಹಾಂವ್ ತುಮ್ಚೆ ಥಾವ್ನ್ ಕಿತೆಂಚ್ ಪಾಟಿಂ ಆಶೆನಾ. ಪೂಣ್ ತುಮಿ ಶಿಕೊನ್ ಜಿವಿತಾಂತ್ ಉಂಚ್ಲ್ಯಾ ಪಾಂವ್ಡ್ಯಾಕ್ ಪಾವ್ತಾನಾ ತುಮ್ಚ್ಯಾನ್ ಸಾಧ್ಯ್ ಕಿತ್ಲಿ ಮಜತ್ ಗರ್ಜೆಂತ್ ಆಸ್ಲೆಲ್ಯಾಂಕ್ ಕೆಲಿ ಕೆಲ್ಯಾರ್, ತೀಚ್ ಮ್ಹಾಕಾ ದಿಂವ್ಚಿ ಖರಿ ಉಪ್ಕಾರ್ ಆಟವ್ಣಿ ಜಾಂವ್ಕ್ ಪಾವ್ತೆಲಿ. ದಿತೆಲ್ಯಾಂಕ್ ದೇವ್ ಕೆದಾಳಾಯ್ ಸೊಡ್ನ್ ಘಾಲಿನಾ. ತುಮಿ ಕಿತ್ಲೆಂ ದಿತಾತ್, ದೇವ್ ತುಮ್ಕಾಂ ದೊಡ್ತ್ಯಾನ್ ದಿತಾ ಮ್ಹಳ್ಳೆಂ ಮ್ಹಜ್ಯಾ ಜಿಣ್ಯೆಂತ್ ಘಡ್ಲಾಂ” ಮ್ಹಳೆಂ.
ಸಿ..ಒ. ಡಿ.ಪಿ. ಶಿಬಂದೆಚ್ಯಾ ಪ್ರಾಥನಾ ಸವೆಂ ಸುರ್ವಾತ್ಲೆಲ್ಯಾ ಕಾರ್ಯಕ್ರಮಾಂತ್ ಸಂಸ್ಥ್ಯಾಚೊ ಕಾರ್ಯದರ್ಶಿ ಮಾ| ಬಾ| ವಿನ್ಸೆಂಟ್ ಡಿ ಸೊಜಾ ಹಾಣಿ ಸಯ್ರ್ಯಾಂಕ್ ಯೆವ್ಕಾರ್ ಮಾಗ್ಲೊ ಆನಿ ಅಶಕ್ತ್ ವರ್ಗಾಕ್ ಘರಾಂ ಬಾಂದುಂಕ್, ವಯ್ಜಾಕೀಯ್ ಚಿಕಿತ್ಸೆಕ್ ಆನಿ ಉಂಚ್ಲ್ಯಾ ಶಿಕ್ಪಾಕ್ ಪಾಟ್ಲ್ಯಾ ಇಕ್ರಾ ವರ್ಸಾಂ ಥಾವ್ನ್ ವ್ಹಡ್ ಮಾಪಾನ್ ಮಜತ್ ಕರುನ್ ಆಸ್ಚ್ಯಾ ಮೈಕಲ್ ಡಿ ಸೊಜಾ ಕುಟ್ಮಾಚೊ ಉಪ್ಕಾರ್ ಬಾವುಡ್ಲೊ ಆನಿ ತಾಂಚೆರ್ ಆನಿ ತಾಂಚ್ಯಾ ಕುಟ್ಮಾಚೆರ್ ದೆವಾಚಿಂ ವಿಂಚ್ಣಾರ್ ಬೆಸಾಂವಾಂ ಮಾಗ್ಲಿಂ. ಧರ್ಮಾಧ್ಯಕ್ಷ್ ದೊ| ಸಲ್ಡಾನ್ಹಾ ಹಾಣಿ ಮೈಕಲ್ ಡಿ ಸೊಜಾ ಜೊಡ್ಯಾಕ್ ಮಾನಾಚ್ಯಾ ಶೊಲಾಸವೆಂ ಸನ್ಮಾನ್ ಕೆಲೊ.
ಶ್ರೀ ಮೈಕಲ್ ಡಿ ಸೊಜಾ ಆನಿ ಶ್ರೀಮತಿ ಫ್ಲಾವಿಯಾ ಡಿ ಸೊಜಾ ಹಾಣಿ ಸಿ.ಒ.ಡಿ.ಪಿ. ನಿರ್ದೇಶಕ್ ತಶೆಂ ಧರ್ಮಾಧ್ಯಕ್ಷ್ ಅ। ಮಾ|ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಂಕಾ ಆಯ್ವಜಾಚಿ ಚೆಕ್ ಹಾತಾಂತರ್ ಕೆಲ್ಲೆಂಚ್, ಸಾಂಕೇತಿಕ್ ಜಾವ್ನ್ ಪಾಂಚ್ ವಿದ್ಯಾರ್ಥಿಂಕ್ ಚೆಕ್ ಹಾತಾಂತರ್ ಕೆಲ್ಯೊ. ಉರ್ಲೆಲ್ಯಾ ವಿದ್ಯಾರ್ಥಿಂಚ್ಯಾ ಬ್ಯಾಂಕ್ ಖಾತ್ಯಾಂಕ್ ಆಯ್ವಜ್ ಪಾವಿತ್ ಜಾತಲೊ ಮ್ಹಣ್ ಹ್ಯಾ ವೆಳಿಂ ಕಳಯ್ಲೆಂ.
ಎಡುಕೇರ್ ಯೋಜನಾ ಖಾತಿರ್ ವಾವುರ್ಚ್ಯಾ ರೋಬರ್ಟ್ ಡಿ ಸೊಜಾ, ಓಸ್ವಲ್ಡ್ ರೊಡ್ರಿಗಸ್, ಡೋರಾ ರೊಡ್ರಿಗಸ್, ರಿಚರ್ಡ್ ಆಲ್ವಾರೆಸ್, ಸ್ಟೀಫನ್ ಪಿಂಟೊ, ಸಿ.ಎ. ಲಾಯ್ನಲ್ ಅರಾನ್ಹಾ, ರೀನಾ ಡಿ ಕೊಸ್ಟಾ ಹಾಂಕಾ ಹ್ಯಾ ವೆಳಿಂ ಧರ್ಮಾಧ್ಯಕ್ಷಾನ್ ಮಾನ್ ಕೆಲೊ.
ಸಹ ಕಾರ್ಯದರ್ಶಿ ಮಾ| ಬಾ| ಲೊರೆನ್ಸ್ ಕುಟಿನ್ಹಾ ಹಾಣಿ ಆಪುರ್ಬಾಯೆನ್ ಕಾರ್ಯೆಂ ಚಲವ್ನ್ ವ್ಹೆಲೆಂ ಆನಿ ದಿನ್ವಾಸ್ ಪಾಟಯ್ಲೆ.
ಕಾರ್ಯಾಕ್ 103 ವಿದ್ಯಾರ್ಥಿ ಪೋಶಕಾಂ ಸವೆಂ ಹಾಜರ್ ಆಸೊನ್ ವಿತರಣ್ ಕಾರ್ಯಾ ಪಯ್ಲೆಂ ಶಿಕ್ಷಕ್ ರಿಚರ್ಡ್ ಆಲ್ವಾರೆಸ್, ಕೊರ್ಡೆಲ್ ಹಾಣಿ ವಿದ್ಯಾರ್ಥಿಂಕ್ ಮಾಹೆತ್ ಆನಿ ತರ್ಭೆತಿ ದಿಲಿ.
■ ತಸ್ವಿರ‍್ಯೊ : ಸ್ಟ್ಯಾನ್ಲಿ, ಬಂಟ್ವಾಳ್
