ಹ್ಯಾ ತೆರಾ ( 2025 Mar 13 ) ತಾರಿಕೆರ್, ಪಾಪಾ ಫ್ರಾನ್ಸಿಸಾಚಿ ಬಾರಾವಿ ವಾರ್ಸುಕಿ. ಹೊ ಸಂಬ್ರಮ್ ಅಚರುಂಕ್ ತೊ ವಾತಿಕನಾಂತ್ ನಾಂ. ಚ್ಯಾರ್ ಹಫ್ತ್ಯಾಂ ಥಾವ್ನ್, ಡಬಲ್ ನೀಮೋನಿಯಾ ಪಿಡೆನ್ ಉಸ್ವಾಸ್ ಕಾಡುಂಕ್ ಜಾಯ್ನಾ ದೆಕುನ್ ಆಸ್ಪತ್ರೆಂತ್ ಆಸಾ. “ಹ್ಯಾ ಪಾವ್ಟಿಂ ಹಾಂವ್ ವಯ್ರ್ ಪಡಾನಾಂ.” ಮ್ಹಣ್ತಾ ತೊ. ತಶೆಂಚ್ ಜಾಂವ್ ಮ್ಹಣ್ ತಾಚ್ಯೆ ವಿರೋಧಿ ಅಶೆತಾತ್. ವಯ್, ಕ್ಯೂರಿಯಾ ಭಿತರ್ ತಶೆಂ ಭಾಯ್ರ್ ಜಾಯಿತ್ತೆ ತಾಚ್ಯಾ ಮೋರ್ಣಾಕ್ ರಾಕೊನ್ ಆಸಾತ್.
ಪಾಪಾಕ್ 88 ವರ್ಸಾಂಚಿ ಪ್ರಾಯ್ ಜಾಲಿ. ಕಠಿಣ್ ಸಿಕ್ ಆಸಾ ತರೀ, ಜಾಗ್ರತ್ ಆಸಾ ಆನಿ ಕಾಡ್ದಿನಲಾಂಕ್ ನಿರ್ದೇಶನ್ ದಿತಾ. ದೆಕುನ್ ತೊ ರಾಜಿನಾಮೊ ದೀತ್ ಮ್ಹಣ್ ದಿಸಾನಾ. ಆಪ್ಲಿಂ ಥೊಡಿಂ ದಿಸ್ಪಡ್ತಿ ಕಾಮಾಂ ಕಾಡ್ದಿನಲಾಂಕ್ ತಾಣೆಂ ವಾಂಟ್ಲ್ಯಾಂತ್. ವಾತಿಕನಾಚೊ ಸೆಕ್ರೆಟರಿ ಒಫ್ ಸ್ಟೇಟ್ ಕಾಡ್ದಿನಲ್ ಪಿಯೆತ್ರೊ ಪಾರೊಲೀನ್ ತಾಚೊ ಪಾತ್ಯೆಣೆಚೊ ಡಿಪ್ಲಮೆಟ್. ಹೊಚ್ ಚಡಿತ್ ಜವಾಬ್ದಾರಿ ಘೆವ್ನ್ ಆಸಾ. ದೆಕುನ್, ಫ್ರಾನ್ಸಿಸ್ ನಿವೃತ್ತ್ ಜಾಯ್ತ್ ಮ್ಹಣ್ ಭಗಾನಾಂ.
ತೆರಾ ವರ್ಸಾಂ ಪೈಲೆಂ, ಪಾಪಾ ಬೆನೆದಿಕ್ತ್ ಸೊಳಾವ್ಯಾನ್ ರಾಜಿನಾಮೊ ದೀವ್ನ್ ಏಕ್ ಚಾರಿತ್ರಿಕ್ ಮೇಟ್ ಕಾಡ್ಲೆಲೆಂ. “ಮುಕ್ಲ್ಯಾ ಪಾಪಾಂಕ್ ಏಕ್ ದೇಕ್ ತಾಣೆಂ ದಿಲ್ಯಾ. ಕಿತ್ಯಾಕ್, ಇಗರ್ಜ್ಯೆಂತ್ ಪವಿತ್ರ್ ಆತ್ಮೊ ಆನಿ ಜೆಜು ಕ್ರಿಸ್ತ್ ಮಾತ್ರ್ ಶಾಶ್ವತ್. ಹೆರ್ ಸಗ್ಳೆ ತಾತ್ಕಾಲಿಕ್. ಹೆಂ ಪಾಪಾ ಬೆನೆದಿಕ್ತ್ ಸಮ್ಜಾಲೊ. ತೊ ಎಕ್ಲೊ ಮಹಾನ್ ಪಾಪಾ, ಖಾಲ್ತೊ ತಶೆಂ ಪ್ರಾಮಾಣಿಕ್”. ಅಶೆಂ ಫ್ರಾನ್ಸಿಸಾನ್ ತವಳ್ ಆಪ್ಲಿಂ ಭೊಗ್ಣಾಂ ಉಚಾರ್ಲೆಲಿಂ. ಪಾಪಾಲ್ ಪದ್ವಿ ಸ್ವೀಕಾರ್ತಚ್ ತಾಣೆಂ ಏಕ್ ರಾಜಿನಾಮೊ ಪತ್ರ್ ಬರವ್ನ್ ಗುಪಿತ್ ದವರ್ಲಾ.
ಪಾಪಾ ಎಮೆರಿಟಸ್ ಬೆನೆದಿಕ್ತ್ 95 ವರ್ಸಾಂ ಪ್ರಾಯೆರ್ 2022 ದಸೆಂಬ್ರ್ 31 ವ್ಯೆರ್ ಮರಣ್ ಪಾವ್ಲೊ. ತೊ ಜಿವಿತ್ ಆಸ್ತಾ ಪರ್ಯಾಂತ್, ಫ್ರಾನ್ಸಿಸಾಚ್ಯೆ ವಿರೋಧಿ ಪರಂಪರಾವಾದಿ ಆನಿ ಪರ್ನ್ಯಾ ಚಿಂತ್ಪಾಚ್ಯೆ ಬೆನೆದಿಕ್ತಾಕ್ ವಾಪ್ರುನ್ ಆಪ್ಲಿ ಘುಟ್ಮೊಳ್ ಖೆಳ್ತಾಲೆ. ಬೆನೆದಿಕ್ತಾಚ್ಯಾ ಮೊರ್ಣಾ ನಂತರ್ ತಾಚೆ ವಿರೋಧಿ ಅಸ್ಕತ್ ಜಾಲೆ ತರೀ, ತಾಣಿಂ ಠಿಕಾ ಕರ್ಚಿ ಸವಯ್ ಸೊಡ್ಲಿನಾಂ. ದೆಕುನ್, ತವಳ್ ಥಾವ್ನ್, ಫ್ರಾನ್ಸಿಸಾನ್ ಆಪುಣ್ Pope for Life ಮ್ಹಣ್ ತರ್ಕ್ ಮಾಂಡ್ಲಾಂ.
ಫ್ರಾನ್ಸಿಸಾಚ್ಯೆ ವಿರೋಧಿ ತಾಕಾ ಸರ್ವಾಧಿಕಾರಿ ಮ್ಹಣ್ತಾತ್. ತಾಣೆಂ ಸಲಿಂಗಕಾಮಿ ಜೊಡ್ಯಾಂಕ್ ಬೆಸಾಂವ್, ಟ್ರಯ್ಡೆಂಟ್ ಲಾತಿನ್ ಮೀಸಾಂಚ್ಯೆರ್ ನಿಷೇದ್, ಆನಿ ರೋಮನ್ ಕ್ಯೂರಿಯಾಂತ್ ಬದ್ಲಾಪ್ ಅಸಲಿಂ ಸುಧಾರಣಾಂ ಕೆಲ್ಯಾಂತ್. ಹ್ಯಾ ಸುದ್ರಾಪಾಂ ವಿರುದ್ಧ್ ತಾಚಿ ಠಿಕಾ ಚಾಲುಚ್ ಆಸಾ. ಥೊಡೆ ಜಣ್ ಫುಡ್ಲ್ಯಾ ಪಾಪಾಚಿ ವಾಟ್ ಪಳೆವ್ನ್ ಆಸಾತ್. ತೊ ಸಾರ್ಕ್ಯಾ ಮಾನಸಿಕ್ ಸ್ಥಿತೆರ್ ನಾಂ. ತಾಣೆಂ ನಿವೃತ್ತ್ ಜಾಯ್ಜೆ ಅಶೆಂ ಅಫ್ವಾ ಆಯ್ಕೊಂಕ್ ಮೆಳ್ತಾ.
ಫ್ರಾನ್ಸಿಸಾಚಿ ಫೊಂತಿಫಿಕೇಟ್ ವೆಗಿಂಚ್ ಸಂಪ್ತೆಲಿ ತೆಂ ಖಂಡಿತ್ ಮ್ಹಣ್ ಸಮ್ಜೊನ್ ತಾಚಿ ಠಿಕಾ ವಾಡೊನ್ ಯೆತಾ. ಆಪ್ಲಿ ಪರಂಪರಾ ಶಾಬಿತ್ ಕರಿಜೆ ಮ್ಹಳ್ಳ್ಯಾ ಇರಾದ್ಯಾನ್ ಫ್ರಾನ್ಸಿಸಾನ್ ಎಕಾ ಪಾತ್ಯೆಣೆಚ್ಯಾ ಕಾಡ್ದಿನಲಾಕ್ Dicastery for the Doctrine of the Faith (DDF) ಹಾಚೊ ಮುಕೆಲಿ ಜಾವ್ನ್ ನೆಮ್ಲಾ. ಕಾಡ್ದಿನಲ್ ವಿಕ್ಟರ್ ಮ್ಯಾನುಯೆಲ್ ಫೆರ್ನಾಂದ್ ತಾಚೊ ಆರ್ಜೆಂಟಾಯ್ನ್ ಸಾಂಗಾತಿ ಧರ್ಮಶಾಸ್ತ್ರಜ್ಞನ್. ಪಾಪಾಚ್ಯೆಂ ಸಮರ್ಥನ್ ಕರ್ನ್ ತಾಣೆಂ ಸಾಂಗ್ಲಾಂ: “ಇಗರ್ಜ್ ಮಾತೆಕ್ ಮಾರ್ಗದರ್ಶನ್ ಕರುಂಕ್ ಪಾಪಾಕ್ ಪವಿತ್ರ್ ಆತ್ಮೊ ಕುಮಕ್ ಕರ್ತಾ, ಅಶೆಂ ಆಮಿ ಪಾತ್ಯೆತಾಂವ್”.
ಪಾಪಾಚ್ಯಾ ಉತ್ತರಾಧಿಕಾರಿಕ್ ಕೋಣ್ ವಿಂಚ್ತಾ?
ಇಗರ್ಜ್ ಮಾತೆಂತ್ ಕಾಡ್ದಿನಲಾಂಚಿ ಪವಿತ್ರ್ ಕೊಲೇಜ್ ಮ್ಹಣ್ ಸಂಘಟನ್ ಆಸಾ. ಹ್ಯಾ ಸಭೆಂತ್ ಹಾಲಿನ್ 252 ಕಾಡ್ದಿನಲ್ ಆಸಾತ್. ತಾಂತುನ್, ಕೇವಲ್ 138 ಮಾತ್ರ್ 80 ವರ್ಸಾಂ ಪ್ರಾಯೆ ಸಕ್ಲಾಚ್ಯೆ ದೆಕುನ್ ಪಾಪಾಚ್ಯೆ ವಿಂಚ್ಣುಕೆ ಸಭೆಂತ್ (papal conclave) ವೋಟ್ ದೀತಾತ್. ಹ್ಯಾ ಪೈಕಿಂ 110 ಕಾಡ್ದಿನಲ್ ಪಾಪಾ ಫ್ರಾನ್ಸಿಸಾನ್ ನೆಮ್ಲೆಲೆ. ಮ್ಹಣ್ತಚ್, ಹ್ಯೆ ಸಭೆಂತ್ ಫ್ರಾನ್ಸಿಸಾಚ್ಯೆ “ಸುಧಾರಣವಾದಿ” ಪಾಟ್ಲಾವ್ದಾರ್ ಆಪ್ಲೆಂ ಸಕ್ತೆ ಪ್ರದರ್ಶನ್ ಕರ್ತೆಲೆ. ಮುಕ್ಲೊ ಪಾಪಾ ಫ್ರಾನ್ಸಿಸಾಪರಿಂಚ್ “ದಾವ್ಯೆ ಪಂಥಿಚೊ ಉದಾರ್ ಮತವಾದಿ” ಜಾಂವ್ಚ್ಯೆಂ ಚಾನ್ಸ್ ಚಡ್ ಆಸಾ. ಅಶೆಂಯೀ, 16 ಒಕ್ತೊಬ್ರ್ 1978 ಥಾವ್ನ್ 28 ಫೆಬ್ರೆರ್ 2013 ಪರ್ಯಾಂತ್ 36 ಲಾಂಬ್ ವರ್ಸಾಂಚ್ಯೆ ಆವ್ಧೆಂತ್ ಸಂಪ್ರದಾಯಿಕ್ ಉಜ್ವ್ಯಾ ಪಂಥಿಚ್ಯಾ ಚಿಂತ್ಪಾಚ್ಯಾ ದೋಗ್ ಪಾಪಾಂಚಿ ರಾಜ್ವಟ್ಕಿ ಚಲ್ಲಿ. 2013 ಚ್ಯೆ ಪಾಪಾಚ್ಯೆ ವಿಂಚ್ಣುಕ್ಯೆಂತ್ ಪೆಂಡುಲಮಾಚಿ ಸುವಿ ಮ್ಹಸ್ತ್ ದಾವ್ಯಾಕ್ ಘುಂವ್ಲಿ.
ಫ್ರಾನ್ಸಿಸಾ ಪಯ್ಲೆಂ ದೋಗಾಂ ದಾವ್ಯಾ ಪಂಥಿಚ್ಯಾಂ ಸುದ್ರಾಪಾವಾದಿ ಪಾಪಾಂನಿಂ, 28 ಒಕ್ತೊಬ್ರ್ 1958 ಥಾವ್ನ್ 6 ಒಗೊಸ್ತ್ 1978 ಪರ್ಯಾಂತ್, ವೀಸ್ ವರ್ಸಾಂಚ್ಯೆ ಆವ್ಧೆಂತ್ ಸಾಂತ್ ಪೆದ್ರುಚಿ ಗಾದಿ ಸಾಂಬಾಳ್ಳಿ. ಪ್ರತ್ಯೇಕ್ ಜಾವ್ನ್, ಫ್ರಾನ್ಸಿಸಾನ್ ಸಾಂತ್ ಮ್ಹಣ್ ಆಲ್ತಾರಿಚೊ ಮಾನ್ ದಿಲ್ಲ್ಯಾ ಪಾಪಾ ಪಾವ್ಲ್ ಸವ್ಯಾಚ್ಯೆ ಆವ್ಧೆಂತ್ ವಾತಿಕನ್ ದುಸ್ರಿ ಸಭಾ ಚಲ್ಲಿ. ಹ್ಯೆ ಸಭೆವರ್ವಿಂ ಜಾಲ್ಲಿ ಬದ್ಲಾವಣ್ ಆಮಿಂ ಸಕ್ಟಾಂನಿಂ ಪಳೆಲ್ಯಾ. ಪ್ರತ್ಯೆಕ್ ಜಾವ್ನ್ ಲಾತಿನ್ ಮೀಸಾ ಬದ್ಲಾಕ್ ಆಮ್ಚೆ ಕೊಂಕ್ಣಿ (ಲೋಕಲ್) ಭಾಶೆನ್ ಮೀಸ್ ಆಮ್ಕಾಂ ವೊಂಬ್ಲಾಂ. ಹಾಚಿ ದೇಕ್ ಘೆವ್ನ್, ಫ್ರಾನ್ಸಿಸಾನ್ Synod of Synodality ಮ್ಹಳ್ಳಿ ಬಿಸ್ಪಾಂಚಿ ಸಭಾ 2022 ಒಕ್ತೊಬ್ರಾಂತ್ ಸುರ್ವಾತ್ಲಿ. ಫುಡ್ಲ್ಯಾ ಪಾಪಾ ವಿಂಚ್ಣುಕ್ಯೆಂತ್ ಪೆಂಡೂಲಮ್ ಸುವಿ ಮಾತ್ಶೆಂ ಉಜ್ವ್ಯಾಕ್ ಘುಂವತ್. left of centre ವ ಮಧೆಗಾತ್ ರಾಂವ್ಚ್ಯೆಂ ಚಾನ್ಸ್ ಚಡ್ ಆಸಾ.
ಪಾಪಾಚ್ಯೆ ಸಂಭಾವ್ಯ್ ಉತ್ತರಾಧಿಕಾರಿ:
- ಕಾಡ್ದಿನಲ್ ಪಿಯೆತ್ರೊ ಪಾರೊಲಿನ್. (ಇತಾಲಿಯನ್, 70 ವರ್ಸಾಂಚೊ)
- ಕಾಡ್ದಿನಲ್ ಫ್ರಿಡೊಲಿನ್ ಆಂಬೆಂಗೊ ಬೆಸುಂಗೊ. (ಕೊಂಗೊಲೀಸ್, 65 ವರ್ಸಾಂಚೊ)
- ಕಾಡ್ದಿನಲ್ ವಿಮ್ ಇಜ್ಕ್. (ಡಚ್, 72 ವರ್ಸಾಂಚೊ)
- ಕಾಡ್ದಿನಲ್ ಪೀಟರ್ ಏರ್ಡೊ. (ಹಂಗೇರಿಯನ್, 71 ವರ್ಸಾಂಚೊ)
- ಕಾಡ್ದಿನಲ್ ಲೂವಿಸ್ ಅಂತೋನಿಯೊ ತಗ್ಲೆ. (ಫಿಲಿಪ್ಪಿನ್, 67 ವರ್ಸಾಂಚೊ)
- ಕಾಡ್ದಿನಲ್ ರೇಮಂಡ್ ಬರ್ಕ್. (ಅಮೇರಿಕನ್, 77 ವರ್ಸಾಂಚೊ)
- ಕಾಡ್ದಿನಲ್ ಮಾರಿಯೊ ಗ್ರೇಕ್. (ಮಾಲ್ಟೀಸ್, 68 ವರ್ಸಾಂಚೊ)
- ಕಾಡ್ದಿನಲ್ ಮಟ್ಟೆಓ ಝುಪ್ಪಿ. (ಇತಾಲಿಯನ್, 69 ವರ್ಸಾಂಚೊ)
- ಕಾಡ್ದಿನಲ್ ರೋಬರ್ಟ್ ಸಾರಾ (ಗಿನಿಯನ್, 79 ವರ್ಸಾಂಚೊ)
- ಕಾಡ್ದಿನಲ್ ಕ್ರಿಸ್ತೊಫ್ ಸ್ಕೊನ್-ಬರ್ನ್ (ಓಸ್ಟ್ರಿಯನ್, 79 ವರ್ಸಾಂಚೊ)
- ಕಾಡ್ದಿನಲ್ ಪೀಟರ್ ಟಕ್ಸನ್ ( ಘಾನಾಚೊ, 76 ವರ್ಸಾಂಚೊ)
ಅಭಿಪ್ರಾಯ್:
ಹ್ಯೆ ವಯ್ಲ್ಯೆ ಪಟ್ಟೆಂತ್ ತೇಗ್ ಆಫ್ರಿಕನ್ ಕಾಳೆ ಕಾಡ್ದಿನಲ್. ಫಾನ್ಸಿಸಾನ್ ಇಗರ್ಜ್ ಮಾತೆಕ್ ಅಂತರ್‌ರಾಷ್ಟ್ರೀಯ್ ಕೆಲಾಂ. ಇತಾಲಿಯನಾಂಚೊ ಮಾತ್ರ್ ನಹಿಂ ಯೂರೋಪಿಯನಾಂಚೊ ಪ್ರಭಾವ್ ಮ್ಹಸ್ತ್ ಉಣೊ ಜಾಲಾ. ತರ್, ಕಾಳ್ಯೆ ಕಾತಿಚೊ ಪಾಪಾ ವಿಂಚೊನ್ ಯೆತಲೊ‌ಗೀ? ತಿತ್ಲೆಂಚ್ ನಹಿಂ, ಹೆ ತೆಗೀ ಪಾಪಾಬ್ಲಿ (ಪಾಪಾಚ್ಯೆ ಉಮೇದ್ವಾರ್) ಉಜ್ವ್ಯಾ ಪಂಥಿಚ್ಯೆ ತಶೆಂಚ್ ಸಂಪ್ರಾದಾಯಿಕ್, ಫ್ರಾನ್ಸಿಸಾಚ್ಯೆ ವಿರೋಧಿ ಮ್ಹಣ್ಯೆತ್. ದೆಕುನ್, ತಾಂಚ್ಯೆ ಚಾನ್ಸ್ ಉಣೆಂ ದಿಸ್ತಾ.
ಯೂರೋಪಿಯನಾಂ ಪೈಕಿಂ, ಪಾರೊಲಿನ್ ಆನಿಂ ಸ್ಕೊನ್-ಬರ್ನ್ ಸೊಡ್ನ್ ಹೆರ್ ಸರ್ವ್ ಸಂಪ್ರದಾಯಿಕ್‌ವಾದಿ. ಸ್ಕೊನ್-ಬರ್ನಾಕ್ ಪ್ರಾಯ್ ಜಾಲಿ ದೆಕುನ್ ಚಾನ್ಸ್ ಉಣೆಂ. ಪಾರೊಲಿನ್ ಕ್ಯೂರಿಯಾಂತ್ ಹೆಳ್ಳಾ ಆನಿಂ ಪ್ರಭಾವ್‌ಶಾಲಿ. ತಾಚ್ಯೆಂ ಚಾನ್ಸ್ ಚಡ್ ಆಸಾ.
ಫಿಲಿಪ್ಪೀನ್ ದೇಸ್ ಕಥೊಲಿಕಾಂಚೊ, ತಾಂಚ್ಯೆಂ ಜಣಾಂಗ್ ವಾಡೊನ್ ಯೇತಾ. ವಯ್ಲ್ಯಾನ್, ಕಾಡ್ದಿನಲ್ ತಗ್ಲೆ ಫ್ರಾನ್ಸಿಸಾಚ್ಯಾ ಚಿಂತ್ಪಾಕ್ ತಾಳ್ ಪಡ್ಚೊ. ಯುರೋಪಾ ಭಾಯ್ಲೆ ಕಾಡ್ದಿನಲ್ ತಾಕಾ ಪಸಂದ್ ಕರುಂಕ್ ಪುರೊ.
ಮ್ಹಾಕಾ ಬೊಗ್ತಾ ಹ್ಯಾ ಪಾವ್ಟಿಂ ಕಾಡ್ದಿನಲ್ ಪಿಯೆತ್ರೊ ಪಾರೊಲಿನ್ ವಿಂಚೊನ್ ಯೇತಲೊ. ತಶೆಂ ಜಾಲ್ಯಾರ್, ಪ್ರಾನ್ಸಿಸಾಚಿ legacy ಮುಕಾರುನ್ ವೆತೆಲಿ.
ಫುಡ್ಲ್ಯಾ ಪಾಪಾಚಿಂ ಆಹ್ವನಾಂ:
ಪಾಪಾ ಫ್ರಾನ್ಸಿಸಾನ್ ಮೋಗಾಚಿ, ದಯೆಚಿ ಆನಿಂ ಕುರ್ಪೆಚಿ ಇಗರ್ಜ್ ಜಾವ್ನ್ ಕಥೊಲಿಕಾಂಕ್ ಏಕ್ ನವಿ ದಿಶಾ ದಿಲ್ಯಾ. ಆಮ್ಚೊ ಸೊಡ್ವಣ್‌ದಾರ್ ಜೆಜು ಕ್ರಿಸ್ತ್ ಎಕ್ಲೊ ದಯಾಳು (merciful) ಪ್ರಭು. ತೊ ಆನಿ ತಾಚೊ ಬಾಪ್, ಜೊ ಸರ್ಗಾರ್ ರಾಜ್ ಕರ್ತಾ, ಭ್ಯೆಂ ಉಬ್ಜಾಂವ್ಚೊ ಗೊಂಗೊ ನಹಿಂ. ಇಗರ್ಜ್ ಮಾತೆಂತ್ ಪಾತ್ಕಿ ಜಣಾಂಕ್ ಜಾಗೊ ಆಸಾ; ಆಪೂಟ್ ಸಾಂತಾಂಕ್ ಮಾತ್ರ್ ನಹಿಂ. ದೇವಾನ್ ಮನ್ಶ್ಯಾಕ್ ದಾದ್ಲೊ ಆನಿ ಸ್ತ್ರೀ ಜಾವ್ನ್ ರಚ್ಲೆಂ. ಪೂಣ್, ಥೊಡ್ಯಾಂಕ್ ತಿಸ್ರೆಂ ಸಂಯ್ಬ್ ದಿಲೆಂ. ತೀಯಿ ದೇವಾಚಿಚ್ ಮಾಂಡಾವಳ್. ದೇವಾನ್ ಜೋಡಿಂ ಸರ್ಗಾರ್ ರಾಚ್ಲ್ಯಾಂತ್ ತರಿ, ತಿಂ ಸಂಸಾರಾಂತ್ ಜಿಯೆತಾತ್. ಹ್ಯೆ ಕಠಿಣ್ ಜಿಣ್ಯೆಂತ್ ಥೊಡ್ಯಾಂಕ್ ಕಾಜಾರಿ ಜಿಣಿ ಜಿಯೆಂವ್ಕ್ ತ್ರಾಸ್ ಜಾತಾತ್; ಕಾಜಾರಾಂ ಮೊಡ್ತಾತ್. ತಸ್ಲಿಂ ಜೊಡಿಂ ದೇವಾಸ್ಪಣ್ ಸಾಂಡ್ಲೆಲಿಂ ನಹಿಂ. ಅಸಲಿ ಕುಟ್ಮಾ-ಕೇಂದ್ರಿತ್ (family-centrik) ದೊತೊರ್ನ್ ಫ್ರಾನ್ಸಿಸಾನ್ ಸುರ್ವಾತ್ಲೆಲಿ. ಹಿ legacy ಮುಕಾರುನ್ ವರುಂಕ್ ನವ್ಯಾ ಪಾಪಾಕ್ ಪಂಥಾಹ್ವನ್ ಉಬ್ಂ ಜಾತೆಲಿಂ.
ಇಗರ್ಜ್ ಮಾತೆಂತ್ ಸ್ತ್ರೀಯಾಂಚ್ಯೆ ಸ್ಥಾನ್ ಕಿತೆಂ? ತಾಂಕಾಂ ಒಡ್ದ್ ಕಿತ್ಯಾಕ್ ದೀವ್ನಜೊ? ಯಾಜಕಾಂಕ್ ಕಾಜಾರ್ ಕಿತ್ಯಾಕ್ ಅಡ್ವರ್ಲಾಂ? ಕಾಜಾರಿ ಜೊಡ್ಯಾಕ್ ಲಾಯಿಕ್ ಸ್ಥಾನ್ ಮಾತ್ರ್ ಫಾವೊ‌ಗೀ? ಅ-ಕಥೊಲಿಕ್ ಇಗರ್ಜ್ಯೆಂ ಸಂಗಿಂ ಎಕ್ವೊಟ್ ಜಾಂವ್ಚಿ ಘರ್ಜ್ ಆಸಾ‌ಗೀ? ವಯ್ ತರ್, ಕಥೊಲಿಕ್ ಇಗರ್ಜ್ಯೆಂತ್ ಕಸಲಿ ಬದ್ಲಾವಣ್ ಜಾಯ್ಜೆ? ಹಿಂ ಥೊಡಿಂ ಸವಲಾಂ ಫುಡ್ಲ್ಯಾ ಪಾಪಾ ಮುಕಾರ್ ಉಠ್ತೆಲಿಂ ತಿಂ ಪಾಪಾಚ್ಯೆ ವಿಂಚ್ಣುಕ್ಯೆ ಸಬೆಂತ್ ಗಾಜ್ತೆಲಿಂ. ಹ್ಯಾ ವಿಷಯಾಂಚ್ಯೆರ್ ತರ್ಕ್ ಮಾತ್ರ್ ನಹಿಂ ಕಾಡ್ದಿನಲಾಂ ಮಧೆಂ ಝುಜ್ ಸಯ್ತ್ ಜಾತೆಲೆಂ. ಹ್ಯಾ ಬಾಬ್ತಿನ್, ತಾಂತು ದೋನ್ ಉತ್ರಾಂ ನಾಂತ್. ಕಸ್ಸಲೊ ದುಬಾವ್ ನಾಂ! ಏಕ್ ಮಾತ್ರ್ ಖಂಡಿತ್; ಪವಿತ್ರ್ ಆತ್ಮ್ಯಾಚ್ಯೆ ಕುರ್ಪೆನ್ ಫಾವೊತೊ ಪಾಪಾ ವಿಂಚೊನ್ ಯೇತಲೊ.
■ ಪಿಲಿಫ್ ಮುದಾರ್ಥ
5 comments
ಬಾರಿಚ್ಚ್ ಸಂಸೊದ್ ಕರ್ನ್ ಲೇಖನ್ ಲಿಕ್ಲಾಂ..ಫಿಲಿಪ್ ಸರಾಕ್ ಅಬಿನಂದನ್!
ಪುಣ್ ಹೊ ಮೊಗಾಳ್ ಪಾಪಾ ಆನಿಕೀ ಲಾಂಬ್ ಜಿಯೊಂ!
ಭಲಾಯ್ಕೆನ್ ಪಾಟಿಂ ಯೆತಾಚ್ಚ್ ತಾಕಾ ಖುಶಿ ಆಸ್ಲ್ಯಾರ್ ರಾಜಿನಾಮೊ ದೀಂವ್.
ತಾಚ್ಯಾ ಹಾತಾನಿಂಚ್ ನವ್ಯಾ ಪಾಪಾಚಿ ಸುರ್ವಾತ್ ಜಾಂವ್!
ಪುಣ್ ಇತ್ಲೆ ವೆಗಿಂ ತಾಣೆಂ ದೆವಾಸರ್ಶಿಂ ವ್ಹಚಾನಾಯೆ ಮ್ಹುಣ್ ಆಮ್ಚೆಂ ಮಾಗ್ಣೆಂ.
ಸಗ್ಳ್ಯಾ ಸಂಸಾರಾಕ್ ಜೆಜುಚ್ಚ್ ರಾಯ್.
ತಶೆಂಚ್ ತಾಚೊ ಖಾಲ್ತೊ ಪಾಟ್ಲಾವ್ದಾರ್ ಪಾಪಾ,ಸಗ್ಳ್ಯಾ ಸಂಸಾರಾರಚೆ ಸಕ್ಕಡ್ ಧಾರ್ಮಿಕ್ ಆನಿ ರಾಜಕೀಯ್ ಫುಡಾರಿ ಜಾಂವ್ ಅಮೆರಿಕಾಚೊ ಅಧ್ಯಕ್ಶ್ ವಾ ದಲಾಯಿಲಾಮಾ ,ತಾಕಾಚ್ಚ್ ಅತೀ ಶ್ರೇಷ್ಟ್ ಮ್ಹುಣ್ ಮಾನ್ತಾತ್.ಬೋವ್ ಥೊಡ್ಯಾಚ್ಚ್ ಪಾಪಾನಿಂ ಲೊಕಾಮೊಗಾಳ್ ಜಾಲ್ಲೆಂ ಆಸಾ.ತ್ಯಾ ಪಯ್ಕಿ ಹೊಯೀ ಎಕ್ಲೊ!
ಜುವಾಂವ್ ಪಾವ್ಲ್ ದುಸ್ರ್ಯಾ ಉಪ್ರಾಂತ್ ಕಾಂಯ್ ತರೀ ಲೋಕ್ ವಿಶೇಸ್ ಉಲಯ್ತಾ ತರ್ ಹ್ಯಾ ಪಾಪಾವಿಶಿಂ ಮಾತ್ರ್.
ದಾಕ್ಲ್ಯಾಕ್ ಹ್ಯಾ ಕರೆಜ್ಮಾಂತ್ ತಾಚೊ ಸಂದೇಶ್ “ಮಾಸ್ ಖಾಯಾ,ಪುಣ್ ಮಾಸಾಂ ಖಾಯ್ನಾಕಾತ್” ಅಸಲ್ಯಾ ಸಮಾಜ್‌ವಾದಿ ಆನಿ ಸಾಮಾನ್ಯ್ ಚಿಂತ್ಪಾಚ್ಯಾ ಪಾಪಾಕ್ ದೇವ್ ಆನಿಕೀ ಭಳ್ ಭಲಾಯ್ಕಿ ದೀಂವ್.
ದೇವ್ ಬರೆಂ ಕರುಂ
Very good informative content. Though I keep following about Vatican updates still reading such contents in my mother tongue give better feeling. Can learn some new words.
There has been tussle between progressive and tradtionalist views in the church since many centuries. While many Pope’s adhered to traditional ways, some others such as Pope Paul VI, Pope John Paul II and present Pope Francis attempted to reform the church according to the needs of the changing times. Hope that the future Pope’s will follow their examples and give new direction to the Universal Church. Thank you Philip Mudartha for your timely and interesting article.
Comprehensive article on anniversary of Pope Francis, present situation in vatican and future. kudos to the author.
ಮಾನೆಸ್ತ್ ಮುದಾರ್ಥಾನ್ ಬರಿಚ್ ಮಾಹೆತ್ ವಾಂಟ್ಲ್ಯಾ. ಲಾಂಬ್ ಜಿಯೊಂ ಪಾಪಾ ಫ್ರಾನ್ಸಿಸ್. ಆನಿ ಉಪ್ರಾಂತ್ ಆತ್ಮ್ಯಾಚೆ ಕುರ್ಪೆನ್ ಫಾವೊತೊ ಪಾಪಾ ವಿಂಚುನ್ ಯೆತಾಲೊ ಮ್ಹಳ್ಳೊ ತಾಚೊ ಭರ್ವಾಸೊ ಆಮಾ ಸಮೇಸ್ತಾಂಚೊ.