ಅಬುಧಾಬಿಂತ್ ಜಿಯೆಂವ್ಚ್ಯಾ ಮಂಗ್ಳುರ್ಗಾರಾಂ ಪಯ್ಕಿ, ಸಿ.ಎ. ವಲೇರಿಯನ್ ದಲ್ಮೆದಾ ಅಪ್ರತಿಮ್ ವ್ಯಕ್ತಿತ್ವಾಚೊ, ಪಯ್ಸಾದಿಶ್ಟಿಚೊ, ಸಮುದಾಯಾಚೊ ಮುಕೆಲಿ ಜಾವ್ನ್ ಉಟೊನ್ ದಿಸ್ತಾ. ಎಪ್ರಿಲ್ 14 ತಾರ್ಕೆರ್ ಆಪ್ಲ್ಯಾ ಜಿವಿತಾಚಿಂ ಫಳಾದಿಕ್ ಪಾಂಸಾಟ್ ವರ್ಸಾಂ ಸಂಪವ್ನ್, ಸಂತೃಪ್ತೆನ್ ಸಾಂಸಾಟಾಂಕ್ ಪ್ರವೇಶ್ ಜಾತಾನಾ, ಎಕುಣ್ ಸಮಾಜೆಕ್, ಪ್ರತೇಕ್ ಜಾವ್ನ್ ಕೊಂಕ್ಣಿ ಕ್ರಿಸ್ತಾಂವ್ ಸಮುದಾಯಾಕ್ ತಾಣೆ ದಿಲ್ಲ್ಯಾ ಸೆವೆಚೆರ್ ಏಕ್ ಉಪ್ಕಾರಿ ದೀಶ್ಟ್ ಚರಂವ್ಚಿ ಗರ್ಜ್ ಆಸಾ.
ವೃತ್ತಿ ಜೀವನಾಂತ್ ಥೊರಾಯೇಕ್ ಪಾವೊನ್ ಕೀರ್ತ್ ಆನಿ ಸಂಪತ್ತಿ ಜೊಡ್ಲ್ಯಾ ಉಪ್ರಾಂತ್, ಜಲ್ಮೊನ್, ವ್ಹಡ್ ಜಾಲ್ಲೊ ಗಾಂವ್ ಆನಿ ಉಲಯಿಲ್ಲಿ ಭಾಸ್ ವಿಸ್ರೊನ್ ಸೊಡ್ಚೆಂ ಸಾಮಾನ್ಯ್ ಕಶೆಂ ಜಾಲ್ಲ್ಯಾ ಆಯ್ಚ್ಯಾ ಸ್ವಕೇಂದ್ರಿತ್ ಸಮಾಜೆಂತ್ ಸಿ.ಎ. ವಲೇರಿಯನ್ – ಕೊಂಕ್ಣಿ ಸಮುದಾಯಾಂತ್ ಶಿಕಪ್, ಮಾಧ್ಯಮ್, ಸ್ವ ಉದ್ಯಮ್ ಆನಿ ಸಮುದಾಯ್ ಸೆವೆಂತ್ ವಿದ್ಯಾರ್ಥಿ ಆನಿ ಯುವಜಣಾಂಕ್ ಮೊಯ್ಜೆಪರಿಂ ವಾಟ್ ದಾಕಂವ್ಚೆಂ ಪ್ರಾಮಾಣಿಕ್ ಆನಿ ನಿಸ್ವಾರ್ಥಿ ಕಾಮ್ ಕರುನ್ ಆಸಾ. ಗಾಂವಾಂತ್ ತಶೆಂ ಪರ್ಗಾಂವಾಂತ್ ಎದೊಳ್ಚ್ ತಾಚ್ಯಾ ಹ್ಯಾ ನಿಸ್ವಾರ್ಥಿ ವಾವ್ರಾಚಿ ತೊಕ್ಣಾಯ್ ಜಾಯೀತ್ ಆಸಾ.
1960, ಎಪ್ರಿಲ್ 14 ವೆರ್ ಸಿ.ಎ. ವಲೇರಿಯನಾಚೊ ಜಲ್ಮ್ ಜೊನ್ ಆನಿ ಸ್ತೆಫಾನಿಯಾ ಡಿ ಅಲ್ಮೇಡಾ ಹಾಂಚ್ಯಾ ಸಾದ್ಯಾ ಆನಿ ದೇವ್ ಭಕ್ತೆಚ್ಯಾ ಕುಟ್ಮಾಂತ್ ಜಾಲೊ. ಪ್ರಾಥಮಿಕ್ ಶಿಕಪ್ ಸುರತ್ಕಲಾಂತ್ ಜಾತಚ್, ತಾಣೆ ಸಾಂ ಲುವಿಸ್ ಕೊಲೆಜಿಂತ್ (ಆತಾಂ ಪರಿಗಣಿತ್ ವಿಶ್ವವಿದ್ಯಾಲಯ್) ವಾಣಿಜ್ಯ್ ಸನದ್ ಆಪ್ಣಾಯ್ಲಿ. ತ್ಯಾ ದಿಸಾಂನಿ ಸಿ.ಎ. ಶಿಕಪ್ ಮ್ಹಳ್ಯಾರ್ ಬೋವ್ ವ್ಹಡ್ ಸಾಧನ್. ವರ್ಸಾಂಗಟ್ಲ್ಯಾನ್ ಶಿಕಪ್ ಆನಿ ಭರ್ಪೂರ್ ಮ್ಹಿನತ್. ತರೀ ಧೃಡ್ ಮನಾನ್ ಆನಿ ಪರಿಶ್ರಮಾನ್ ತಾಣೆ ಸಿ.ಎ ತರ್ಭೆತಿ ಪ್ರತಿಷ್ಠಿತ್ ಎಸ್.ಬಿ. ಬಿಲಿಮೊರಿಯಾ ಆನಿ ಕಂಪೆನಿ (ಆತಾಂ Deloitte and Touche ) ಹಾಂತುಂ ಜೊಡ್ಲಿ.
ಸಂಪೂರ್ಣ್ ತರ್ಭೆತಿ ಆನಿ ಪ್ರತಿಷ್ಟಿತ್ ಚಾರ್ಟರ್ಡ್ ಎಕಾಂವ್ಟೆಂಟ್ ಸನದೆ ಉಪ್ರಾಂತ್ ವಲೇರಿಯನಾನ್ ಆಪ್ಲೆಂ ವೃತ್ತಿ ಜೀವನ್ 1984 ವ್ಯಾ ವರ್ಸಾ ಕುಳಾಂಯ್ತ್ ಸುರು ಕೆಲೆಂ. ತಾಚಿ ಆರ್ಥಿಕ್ ಚತುರತಾ ಆನಿ ವ್ಯವಹಾರಿಕ್ ಸಲಹಾ ಸ್ಥಳೀಯ್ ಉದ್ಯಮಿಂಕ್ ವ್ಹಡ್ ಆಧಾರಾಚಿ ಜಾಲಿ ಮಾತ್ರ್ ನ್ಹಯ್ ಸುರತ್ಕಲಾಂತ್ ಸೇಕ್ರೆಡ್ ಹಾರ್ಟ್ಸ್ ಇಂಗ್ಲಿಶ್ ಮಾಧ್ಯಮ್ ಇಸ್ಕೊಲ್ ಆರಂಭ್ ಕರ್ಚ್ಯಾಂತ್ ತಾಣೆ ಪ್ರಮುಖ್ ಪಾತ್ರ್ ಘೆತ್ಲೊ ಹ್ಯಾ ಮುಖಾಂತ್ರ್ ಆಪ್ಲ್ಯಾ ಸಮುದಾಯಾಂತ್ ಶಿಕ್ಪಾ ಪ್ರಗತಿ ಜಾಂವ್ಚ್ಯಾಕ್ ತಾಣೆ ಆಧಾರ್ ದಿಲೊ.
1991 ವ್ಯಾ ವರ್ಸಾ ಇಸ್ವೆಂತ್ ಸಿ.ಎ. ವಲೇರಿಯನಾನ್ ಯುಎಇಚ್ಯಾ ಅಬುಧಾಬಿ ಕುಶಿನ್ ಮೆಟಾಂ ಕಾಡ್ಲಿಂ. ತಾಚೊ ಅಂತರಾಷ್ಟ್ರೀಯ್ ಪ್ರಭಾವ್ ವಾಡಾತ್ ಆಯ್ಲೊ ಆನಿ ಸಬಾರ್ ವ್ಹಡ್ ಹುದ್ದೆ ತಾಣೆ ಆಪ್ಣಾಯ್ಲೆ ತ್ಯಾ ಪಯ್ಕಿ Al Ain Holding ಹಾಂತುಂ 2019 ಇಸ್ವೆಂತ್ ನಿವೃತ್ತ್ ಜಾತಾ ಪರ್ಯಾಂತ್ ತಾಣೆಂ ಸಪೊರ್ಟ್ ಸರ್ವಿಸ್ ಹಾಚೊ ಪಂಗ್ಡಾ ಮುಖೆಲಿ ಆನಿ ಗ್ರೂಪ್ ಫೈನಾನ್ಶಿಯಲ್ ಕಂಟ್ರೊಲರ್ ಜಾವ್ನ್ ಜವಾಬ್ದಾರಿ ಸಾಂಬಾಳ್ಳಿ. ತಾಚ್ಯಾ ಆದಿಂ ಅಬುಧಾಬಿಚ್ಯಾ ಎಚ್ಎಲ್ಬಿ ಇಂಟರ್ನ್ಯಾಶನಲ್ (ಜೀವನ್ಜೀ ಆನಿ ಕಂ) ಹಾಂತುಂ ಸೀನಿಯರ್ ಆಡಿಟರ್ ಜಾವ್ನ್ ತೋ ವಾವುರ್ಲೊ.
ಆಪ್ಲ್ಯಾ ಸದಾಂಚ್ಯಾ ವಾವ್ರಾಚ್ಯಾ ಸಾಧನಾಂತ್ ತೃಪ್ತಿ ಪಾವಾನಾಸ್ತಾಂ, ಮಾನೆಸ್ತ್ ವಲೇರಿಯನಾನ್ ಅಬುಧಾಬಿಂತ್ 2017 ವ್ಯಾ ವರ್ಸಾ ಕ್ವಿಕ್ ಎಕೌಂಟಿಂಗ್ ಆನಿ ಎಡ್ವೈಸರಿ ಎಲ್ಎಲ್ಸಿ ಸುರ್ವಾತ್ಲೆಂ. ಹ್ಯಾ ಮುಖಾಂತ್ರ್ ತೊ ಏಕ್ ಉದ್ಯಮಿ ಜಾವ್ನ್ ಆಪ್ಲೆಂ ಪಯ್ಣ್ ಆರಂಭ್ ಕೆಲೆಂ. 2022 ಇಸ್ವೆಂತ್ ಮಂಗ್ಳುರಾಂತ್ ತಾಣೆ ಕ್ವಿಕ್ ಡಿಜಿಟಲ್ ಆನಿ ಎಡ್ವೈಸರಿ ಸಂಸ್ಥೊ ಸುರು ಕೆಲೊ. ಆನಿ ಹೆ ಸವೆಂ ಯುಎಇ ಆನಿ ಭಾರತಾ ಮಧೆಂ ವ್ಯಾಪಾರಾಚ್ಯಾ ಆವ್ಕಾಸಾ ಖಾತಿರ್ ತಾಣೆ ಏಕ್ ಸಾಂಕೊವ್ ಬಾಂದ್ಲೊ ಆನಿ ಡಿಜಿಟಲ್ ಮಾರ್ಕೆಟಿಂಗ್ ಆನಿ ಎಡ್ವೈಸರಿ ಎಕ್ಸಲೆನ್ಸ್ ಮುಖಾಂತ್ರ್ ಸ್ಥಳೀಯ್ ಆರ್ಥಿಕತಾ ಸುದ್ರಾಯ್ಲಿ.
Barefoot Counsellor ದೀಕ್ಶಾ ಘೆತಾನಾ….
ಪೆಲ್ಯಾ ಹಿತಾ ಸೆವೆಕ್ ನಾಂವಾಡ್ಲಲೊ ಸಿ. ಎ. ವಲೆರಿಯನಾಕ್ 2009 ವ್ಯಾ ವರ್ಸಾ ಎವಿಒಎಸ್ಎ ಹಾಂಚೆ ಥಾವ್ನ್ ಖಾಲಿ ಪಾಯಾಂಚೊ ಸಲಹೆಗಾರ್ ( Barefoot Counsellor ) ಮ್ಹಣ್ ಅಧಿಕೃತ್ ಮಾನ್ಯತಾ ಲಾಭ್ಲಿ. ಹ್ಯಾ ಮಾರಿಫಾತ್ ಸಬಾರಾಂಚ್ಯಾ ಜಿವಿತಾಂತ್ ಮಾನಸಿಕ್, ಭಾವನಾತ್ಮಕ್ ಆನಿ ಭೌತಿಕ್ ಗರ್ಜಾಂಕ್ ಪಾವುನ್ ತಾಂಚ್ಯಾ ಜಿವಿತಾಂತ್ ಪ್ರಕಾಸ್ ಫಾಂಕಂವ್ಚೆಂ ಮಿಸಾಂವ್ ತಾಣೆ ಸುರ್ವಾತ್ಲೆಂ. ತಾಚಿ ಸೆವಾ ಶಿಕ್ಷಣ್, ಭಲಾಯ್ಕಿ, ಘರಾಂ, ಖೆಳ್, ಸಮುದಾಯ್ ಮುಳಾವ್ಯೊ ಸುವಿಧಾ, ಕಾಮ್ ಅಸಲ್ಯಾ ಶೆತಾಂನಿ ಭರ್ಪೂರ್ ವ್ಹಾಳೊಂಕ್ ಲಾಗ್ಲ್ಯೊ. ಕೊವಿಡಾಚ್ಯಾ ವೆಳಾರ್ ಸಂಕಶ್ಟಾಂಕ್ ಸಾಂಪಡ್ಲೆಲ್ಯಾ ಕುಟ್ಮಾಂಕ್ ತಾಣೆ ದಿಲ್ಲೊ ಆಧಾರ್ ಅಪಾರ್.
ಮಾಧ್ಯಮಾದ್ವಾರಿಂ ಸಾಮಾಜಿಕ್ ಬದ್ಲಾವಣ್ ಹಾಡುಂಕ್ ಸಾಧ್ಯ್ ಆಸಾ ಮ್ಹಣ್ ಸಮ್ಜಾಲ್ಲ್ಯಾ ಸಿ.ಎ. ವಲೇರಿಯನಾನ್, ನಿವ್ಸ್ಕರ್ನಾಟಕ.ಕೊಮ್, ನಿವ್ಸ್ಕನ್ನಡ.ಕೊಮ್ ಆನಿ ಎನ್ಕೆ ಟಿವಿ ಅಸಲ್ಯಾ ವೆದಿಚೆ ಸೃಷ್ಟಿಕರ್ತ್ ಜಾವ್ನಾಸ್ಚ್ಯಾ ಸ್ಪಿಯರ್ಹೆಡ್ ಮೀಡಿಯಾ ಪ್ರೈ. ಲಿ. ಹಾಂತುಂ ಆಪ್ಲೊ ಬಂಡ್ವಾಳ್ ಘಾಲ್ನ್ ಆಧಾರ್ ದಿಂವ್ಚೆ ಸವೆಂ ತಾಚೆಂ ಮುಖೆಲ್ಪಣ್ ಘೆತ್ಲೆಂ. ತಾಚ್ಯಾ ಪರಿಣಾಮ್ಕಾರಿ ಆನಿ ಕ್ರಿಯಾತ್ಮಕ್ ಮುಖೆಲ್ಪಣಾ ವರ್ವಿಂ ಸ್ಪಿಯರ್ಹೆಡ್ ಮೀಡಿಯಾ ಹಾಕಾ ಪ್ರತಿಷ್ಟಿತ್ ಚಾಣಕ್ಯ ಪ್ರಶಸ್ತಿ (Media House of the Year 2021 ) ಫಾವೊ ಜಾಲಿ. ಮಾನೆಸ್ತ್ ವಲೇರಿಯನಾಚಿಂ ವಿಚಾರ್ಶೀಲ್ ಪ್ರದರ್ಶನಾ ಜಾವ್ನಾಸ್ಚಿಂ ಸಬಾಲ್ಟರ್ನ್ಸ್, ನಮಸ್ತೆ ಟೀಚರ್, ಅಮೇಜಿಂಗ್ ಪೀಪಲ್ ಆನಿ ಅಮೇಜಿಂಗ್ ಸ್ಟೊರೀಸ್ ತಾಳೊ ನಾತ್ಲ್ಲ್ಯಾಂಚೊ ತಾಳೊ ಬಳ್ ಕರುಂಕ್ ಸಕ್ಲ್ಯಾಂತ್ ಮಾತ್ರ್ ನ್ಹಯ್ ಸಬಾರಾಂಕ್ ಹ್ಯಾ ವರ್ವಿಂ ಕಾಮಾಂಚೊ ಆವ್ಕಾಸ್ಯೀ ಮೆಳ್ಳಾ.
ಮಾಧ್ಯಮ್ ಮಾಂತ್ರಿಕ್ …
ಹಳ್ಳೆಚ್ಯಾ ಯುವಜಣಾಂಕ್ ಮಾಧ್ಯಮ್ ಉದ್ಯಮ್ಶೀಲತಾ ನಿಪುಣತಾಯ್ ತರ್ಭೆತಿ ದಿಂವ್ಚ್ಯಾ ಖಾತಿರ್ ತಾಣೆ ವಿಲೆಜ್ ಟಿವಿ ಟ್ರಸ್ಟ್ (ರಿ) ಆರಂಭ್ ಕೆಲ್ಯಾ. ಹ್ಯಾ ಟ್ರಸ್ಟಾಖಾಲ್ ಸ್ಪಿಯರ್ಹೆಡ್ ಅಕಾಡೆಮಿ ವೆಗಿಂಚ್ ಮಟ್ವ್ಯಾ ಆವ್ದೆಚೆ ಪತ್ರಿಕೋದ್ಯಮ್ ಕೋರ್ಸ್ ಆರಂಭ್ ಕರ್ತಲಿ. ಹ್ಯಾ ಮುಖಾಂತ್ರ್ ಯುವಜಣಾಂಚ್ಯಾ ಸಬಲೀಕರಣಾ ಸವೆಂ ತಾಂಕಾಂ ಸ್ವಾವಲಂಬಿತ್ ಕರ್ಚೊ ಜಾವ್ನಾಸಾ ಸಿ.ಎ. ವಲೇರಿಯನಾಚೊ ದಿಶ್ಟಾವೊ.
ಸಿ.ಎ. ವಲೇರಿಯನಾಚೆಂ ಮುಖೆಲ್ಪಣ್ ಆಜ್ ವಿವಿಧ್ ಸ್ಥರಾಂಚೆರ್ ಪರ್ಜಳ್ತಾ. ಮೊತಿಯಾಳ್ಯಾ ಸುವಾಳ್ಯಾರ್ ಆಸ್ಚ್ಯಾ ಕೊಂಕಣಿ ಕಲ್ಚರಲ್ ಅರ್ಗನೈಜೇಶನ್ (ಕೆಸಿಒ) ಹಾಚೊ ದೋನ್ ಆವ್ದೆಕ್ ಅಧ್ಯಕ್ಷ್ ಆನಿ ಆತಾಂ ಉಪಾಧ್ಯಕ್ಷ್ ತಶೆಂ ಟ್ರಸ್ಟಿ, ಎಮಿರೇಟ್ಸ್ ಸುರತ್ಕಲ್ ಪ್ಯಾರಿಶನರ್ಸ್ ಎಸೋಶಿಯೇಶನ್ (ಇಎಸ್ಪಿಎ) ಹಾಚೊ ಸಲಹಾದಾರ್, ದೈವಿಕ್ ಅಮೃತ್ ಹಾಚೊ ಪಾತ್ರೊನ್, ಅಬುಧಾಬಿಚ್ಯಾ ಕೊಂಕ್ಣಿ ಮಾಗ್ಣ್ಯಾ ಪಂಗ್ಡಾಚೊ ಆದ್ಲೊ ಸಂಯೋಜಕ್, ಅಬುಧಾಬಿ ಸಾಂ ಜುಜೆ ಕೊಂಕಣಿ ಸಮುದಾಯ್ ಹಾಚೊ ಆದ್ಲೊ ಖಜಾಂಚಿ, ತಶೆಂ ಕೊಂಕಣಿಬೈಬಲ್.ಒರ್ಗ್ ಹಾಚೊ ಆಧಾರ್ ಅಶೆಂ ವಿವಿಧ್ ಸ್ಥರಾಂಚೆರ್ ತಾಚಿ ದೆಣ್ಗಿ ಅಪಾರ್ ಜಾವ್ನಾಸಾ.
ಸಮುದಾಯ್ ಸೆವೆಕ್ ಸಮರ್ಪಿತ್ ಕುಟಮ್ . . .
ಮಾನೆಸ್ತ್ ವಲೇರಿಯನಾಚ್ಯಾ ಸಾಧನಾ ಪಾಟ್ಲ್ಯಾನ್ ತಾಚೆಂ ಮೊಗಾಚೆಂ ಕುಟಮ್ ಆಸಾ. ಪತಿಣ್ ಬ್ಲಾಂಚ್ ವಿಡಾ ಡಿಸೋಜಾ, ಸರ್ವಾಂಕ್ ಮೊಗಾಚಿ ಶಿಕ್ಷಕಿ, ದೊಗಾಂ ಭುರ್ಗಿಂ ವಯ್ಲಾನ್ ಆನಿ ಎಡ್ಮನ್, ಎಡ್ಮನಾಚೆಂ ಕಾಜರ್ ಡಾ| ಡ್ಯಾಫ್ನಿ ನೊರ್ಮಾ ಕ್ರಾಸ್ತಾ ಲಾಗಿಂ ಜಾಲಾಂ.
ಮಾನ್ – ಸನ್ಮಾನ್ , ಪುರಸ್ಕಾರ್ ….
ತಾಚ್ಯಾ ಹ್ಯಾ ಪಯ್ಣಾಂತ್ ವಿಶ್ವ ತುಳು ಸಮ್ಮೇಳನ (ದುಬಾಯ್), ಆಲ್ ಕನ್ನಡ ಕೂಟಾಸ್ ಅಮೇರಿಕಾ (ಎಕೆಕೆಎ) ಅಸಲ್ಯಾ ಸಬಾರ್ ಜಾಗತಿಕ್ ವೇದಿಚೆರ್ ಗೌರವ್ ಮೆಳ್ಳಾ. ಸಯ್ರೊ ಸ್ಪೀಕರ್, ಸಂಪನ್ಮೂಲ್ ವ್ಯಕ್ತಿ ಆನಿ ಪ್ರೇರಕ್ ಸಕತ್ ಜಾವ್ನ್ ತಾಚಿ ಉಪಸ್ಥಿತಿ ಜಾಗತಿಕ್ ಸಮುದಾಯಾಂತ್ ತಾಚೊ ಪ್ರಭಾವ್ ಆನಿ ಗೌರವ್ ಕಿತ್ಲೊ ಮ್ಹಣ್ ದಾಕಯ್ತಾ.
ಭಾಸ್ – ಸಾಹಿತ್ಯ್ – ಸಾಂಸ್ಕೃತಿಕ್ ಸೆವೆಂತ್ ….
ಸಿ.ಎ. ವಲೇರಿಯನಾಚ್ಯಾ ಜಿವಿತಾಚೆರ್ ಏಕ್ ನದರ್ ಆಮ್ಕಾಂಯ್ ಪ್ರೇರಣ್ ದಿತಾ. ದೆವಾನ್ ದಿಲ್ಲಿಂ ದೆಣಿಂ ಆನಿ ದುಡು ಸಮಾಜೆಚ್ಯಾ ಬರ್ಯಾಪಣಾಖಾತಿರ್ ತಾಣೆ ಖರ್ಚಿಲಾ. ತಾಚಿ ವೃತ್ತಿ ಉತ್ಕೃಷ್ಟತಾ, ಪಯ್ಸಾದೀಶ್ಟ್, ತಾಚೆಂ ದಯಾಳ್ ಕಾಳಿಜ್, ಸಮರ್ಪಿತ್ ಸಮುದಾಯಾಚಿ ಸೆವಾ ಏಕ್ ಮೇಲ್ಫಂಕ್ತ್ ಜಾವ್ನಾಸಾ. ತಾಚ್ಯಾ ಜಿವಿತಾ ಪಯ್ಣಾರ್ ವಯಕ್ತಿಕ್ ಸಾಧನಾ ಬರಾಬರ್ ತಾಣೆ ಕೆಲ್ಲೆಂ ಸಾಮಾಜಿಕ್ ಬರೆಪಣ್, ಅಸಂಖ್ಯಾತ್ ವ್ಯಕ್ತಿಂಚ್ಯಾ ಜಿವಿತಾಂತ್ ಸಕಾರಾತ್ಮಕ್ ಪರಿವರ್ತನಾಕ್ ಪ್ರೇರಣ್ ಜಾವ್ನ್ ತಾಂಚ್ಯಾ ಜಿವಿತಾಂತ್ ಬದ್ಲಾವಣೆಚಿಂ ಲಾರಾಂ ಹಾಡವ್ನ್ ಪ್ರಕಾಸ್ ಫಾಂಕಯಿಲ್ಲಿ ರೀತ್ ಸಮಾಜೆಕ್ ಏಕ್ ಪ್ರೇರಣಾತ್ಮಕ್ ದಾಯ್ಜ್ ಜಾವ್ನಾಸಾ.
