ಜಂತರ್ ಮಂತರಾಂತ್, ದೆಶಾಚ್ಯಾ ಶಿಕ್ಪಾ ಮಂತ್ರಿಚೊ ರಾಜಿನಾಮೊ ವಿಚಾರುನ್ ಉಪಾಸಾಕ್ ಬಸ್ಲೆಲ್ಯಾ ಸೋನಮ್ ವಾಂಗ್ಚೂಕಾಚಿ ಭಲಾಯ್ಕಿ ಭಿಗಡ್ತೇ ಆಸ್ಲ್ಯಾರೀ, ಜಾಂವ್ ಶಿಕ್ಪಾಮಂತ್ರಿ – ಜಾಂವ್ ಸರ್ಕಾರ್ ಕಾನ್ ಹಾಲಯ್ತೇ ನಾಂತ್. ಜಂತರ್ ಮಂತರ್ ಆನಿ ವೇಳಾಕ್ ಬೋವ್ ಲಾಗ್ಶಿಲೊ ಸಂಬಂದ್ ಆಸಾ. ಜಂತರ್ ಮಂತರ್ ಮ್ಹಳ್ಯಾರ್ ‘ವೇಳ್’ ದಾಕಂವ್ಚೊ ಜಾಗೊ. ಅಟ್ರಾವ್ಯಾ ಶೆಕ್ಡ್ಯಾಂತ್ ರಾಜಪೂತ್ ರಾಯ್ ದುಸ್ರ್ಯಾ ಜೈ ಸಿಂಗಾನ್ ‘ಜಂತರ್ – ಮಂತರ್’ ಬಾಂದ್ಲ್ಲೆಂ ಮ್ಹಣ್ ಇತಿಹಾಸ್ ಸಾಂಗ್ತಾ. ಜಂತರ್ – ಮಂತರಾ ವಿಶ್ಯಾಂತ್ ಇಂಟರ್ನೆಟಾರ್ ಸೊಧ್ಲ್ಯಾರ್ ಶೆಕ್ಡ್ಯಾಂ ಥಾವ್ನ್ ಹಾಂಗಾ ‘ವೇಳ್’ ಮಾತ್ ನಯ್, ಖಗೋಳ್ ವಿಜ್ಞಾನಾಕ್ ಲಗ್ತಿ ಗಜಾಲಿಂಚೇರ್ ವಾವ್ರ್ ಚಲ್ಲಾ ಮ್ಹಳ್ಳಿ ಮಾಹೆತ್ ಮೆಳ್ತಾ. https://en.wikipedia.org/wiki/Jantar_Mantar,_New_Delhi
‘ವೇಳ್’ ಮ್ಹಳ್ಯಾರ್ ‘ವರಾಂ’ ಮ್ಹಣ್ಚ್ಯಾ ಪರಿಧೆ ಭಾಯ್ರ್ ವಿಚಾರ್ ಕೆಲ್ಯಾರ್ – ಜಂತರ್ ಮಂತರ್ ಆಜ್ ಮ್ಹಾಕಾ, ಬದಲ್ಲೆಲ್ಲ್ಯಾ ವೆಳಾಕ್ ಕವಿತೆಚಿ ಏಕ್ ಅಖಂಡ್ ‘ಪ್ರತೀಕ್’ ಕಶೆಂ ದಿಸ್ತಾ.
ಫಕತ್ ಪಂದ್ರಾ ವರ್ಸಾಂ ಆದಿಂ, ಮ್ಹಳ್ಯಾರ್ 2011 ವ್ಯಾ ವರ್ಸಾ ಹ್ಯಾಚ್ ಜಂತರ್ ಮಂತರಾಂತ್ ಅಣ್ಣಾ ಹಜಾರೆ ಉಪಾಸಾಕ್ ಬಸ್ಲ್ಲೊ. ಮುದ್ದೊ ಆಸ್ಲೊ – ಭೃಶ್ಟಾಚಾರ್ ಆನಿ ಲೋಕಪಾಲ್ ಬಿಲ್. ತಾಚೆ ಸಾಂಗಾತಾ ಕಿರಣ್ ಬೇಡಿ, ಅರವಿಂದ ಕೇಜ್ರಿವಾಲ್, ಪ್ರಶಾಂತ್ ಭೂಷಣ್ ಆನಿ ಜಾಯ್ತೆ ಹೆರ್ಯೀ ಆಸ್ಲೆ. ಅಮೀರ್ ಖಾನ್, ಶಾರೂಖ್ ಖಾನ್, ಅಕ್ಷಯ್ ಕುಮಾರ್, ದೀಪಿಕಾ ಪಡುಕೋಣ್, ಅನುಪಮ್ ಖೇರ್ ತಸ್ಲಿಂ ಸಿನೆಮಾ ನೆಕೆತ್ರಾಂ, ಬಾಬಾ ರಾಮ್ದೇವ್, ಸ್ವಾಮಿ ಅಗ್ನಿವೇಶ್ ತಸಲೆ ಗುರು, ಡೆಲ್ಲಿಚೊ ಆರ್ಚ್ಬಿಸ್ಪ್ ವಿನ್ಸೆಂಟ್ ಕೊನ್ಸೆಸೊ, ಮುಂಬಯ್ಚೊ ಕಾಡ್ದಿನಾಲ್ ಓಸ್ವಲ್ಡ್ ಗ್ರೇಶೀಯಸ್ ತಸಲ್ಯಾ ರೋಮಿ ಕಥೊಲಿಕ್ ವ್ಹಡಿಲಾಂನಿ ಅಣ್ಣಾಚ್ಯಾ ಆಂದೋಲನಾಂತ್ ಉಗ್ತ್ಯಾನ್ ಹಾತ್ ಮೆಳಯಿಲ್ಲೊ. ಕರ್ನಾಟಕಾಂತ್ ಪರಮೋಚ್ಚ್ ಕೊಡ್ತಿಚೊ ನಿವೃತ್ತ್ ನಿತಿದಾರ್ ಸಂತೋಶ್ ಹೆಗ್ಡೆ ಅಣ್ಣಾ ಆಂದೋಲನಾಕ್ ಮುಕೆಲ್ಪಣ್ ದಿತಾಲೊ.
ತವಳ್ ಕೇಂದ್ರಾಂತ್ ದೊ| ಮನಮೋಹನ್ ಸಿಂಗಾಚೊ ಯುಪಿಎ ಸರ್ಕಾರ್ ಆಸ್ಲೊ ಆನಿ ಸೋನಿಯಾ ಗಾಂಧಿ ಯುಪಿಎಚಿ ಅಧ್ಯಕ್ಶ್. ಅಣ್ಣಾ ಹಜಾರೆನ್ ಘೆತ್ಲಲೊ ವಿಶಯ್ – ಯುಪಿಎ ಸರ್ಕಾರಾಂತ್ ಜಾಲಾ ಮ್ಹಣ್ಚೊ ಭೃಶ್ಟಾಚಾರ್; ಮುಕೆಲ್ ಜಾವ್ನ್ 2G ಸ್ಪೆಕ್ಟ್ರಮ್ ವಾಂಟಪ್ ಆನಿ ಕೊಮನ್ವೆಲ್ತ್ ಖೆಳಾಂತ್. ತವಳ್ ಅಸ್ತಿತ್ವಾಕ್ ಆಯಿಲ್ಲೆಂ ಸಂಗಟನ್ – ಇಂಡಿಯಾ ಎಗೆನೆಸ್ಟ್ ಕರಪ್ಶನ್. ಭಾರತಾಚ್ಯಾ ಮಾತ್ ನಯ್ ವಿದೇಶಿ ಮಾಧ್ಯಮಾಂನಿ ಸಯ್ತ್ ಅಣ್ಣಾಕ್ ಆನಿ ತಾಚ್ಯಾ ಆಂದೋಲನಾಕ್ ವ್ಹಡ್ ಪ್ರಚಾರ್ ದಿಲೊ. ಟೈಮ್ ಪತ್ರಾಂತ್ ಭಾರತಾಂತ್ ಜಾಲ್ಲ್ಯಾ ಭೃಶ್ಟಾಚಾರಾಚಿ ಖಬರ್ ಪ್ರಮುಕ್ ಜಾಲಿ. ಟೆಲಿವಿಶನ್ ಮಾದ್ಯಮಾಂನಿ ದಿಸಾಚಿಂ ಚೊವೀಸ್ ವೊರಾಂ ಜಂತರ್ ಮಂತರಾಚೆರ್ ಕ್ಯಾಮೆರಾ ಲಾಯ್ಲಿಂ. ದೇಶ್ಭರ್ ವಾತಿಂಚೊಂ ಪುರ್ಶಾಂವ್ ಆನಿ ಸಭಾ ಚಲ್ಲ್ಯೊ. ಸರ್ಕಾರಾಂತ್ ಭೃಶ್ಟಾಚಾರ್ ಆಡಾಂವ್ಕ್ ಲೋಕ್ಪಾಲ್ ಬಿಲ್ ಜಾಯ್ಜೆ ಮ್ಹಣ್ಚೆಂ ಮಾಗ್ಣೆಂ ಮೊಳ್ಬಾಕ್ ತೆಂಕ್ಲೆಂ. ಫಕತ್ ಚಾರ್ ದಿಸಾಂನಿ ಸರ್ಕಾರಾನ್ ಪ್ರತಿಸಾದ್ ದಿಲೊ ಆನಿ ಅಣ್ಣಾ ಹಜಾರೆನ್ ಉಪಾಸ್ ಮೊಡ್ಲೊ.
ಆಜ್ ಪಂದ್ರಾ ವರ್ಸಾಂ ಉಪ್ರಾಂತ್ – 2026, ತೇಂಚ್ ಜಂತರ್ ಮಂತರ್, ಉಪಾಸಾಕ್ ಬಸ್ಲಾ ಸೋನಮ್ ವಾಂಗ್ಚೂಕ್. ಮುದ್ದೊ ಆಸಾ – ನೀಟ್ ತಸಲ್ಯಾ ಶಿಕ್ಪಾಪರೀಕ್ಶೆಂನಿ ಭೃಶ್ಟಾಚಾರ್, ವಿದ್ಯಾರ್ಥಿಂಚೊಂ ಜೀವ್ಘಾತ್. ಮಾಗ್ಣೆಂ ಆಸಾ – ಶಿಕ್ಪಾಮಂತ್ರಿಚೊ ರಾಜಿನಾಮೊ.
ಆಜ್ ಆಮೀರ್ ಜಾಂವ್ ಶಾರೂಕ್, ಅಕ್ಶಯ್ ಜಾಂವ್ ಅನುಪಮ್, ದೀಪಿಕಾ ಪಡುಕೋಣ್ – ಕೋಣ್ ಉಲಯ್ನಾಂತ್ ! ಡೆಲ್ಲಿಚ್ಯಾ ಆರ್ಚ್ ಬಿಸ್ಪಾಚೊ ಜಾಂವ್ ಮುಂಬಯ್ಚ್ಯಾ ಕಾಡ್ದಿನಾಲಾಚೊ ಅವಾಜ್ ನಾ! ಅಂತರಾಷ್ಟ್ರೀಯ್ ವಾ ರಾಷ್ಟ್ರೀಯ್ ಮಾದ್ಯಮಾಂನಿ ಖಬರ್ ನಾ, ಚೊವೀಸ್ ತಾಸ್ ಟೆಲಿವಿಶನ್ ಚಾನೆಲಾಂಚಿಂ ಕೆಮೆರಾಂ ಜಂತರ್ – ಮಂತರಾಚೇರ್ ನಾಂತ್. ದೆಶಾಚ್ಯಾ ಗಲ್ಲೆಂನಿ ವಾಂತಿಚೊಂ ಪುರ್ಶಾಂವ್ ನಾ, ಸಭಾ ನಾಂತ್. ನೀಟ್ ಆನಿ ಹೆರ್ ಪರೀಕ್ಶೆಂನಿ ಜಾಲ್ಲೊ ಎದೊ ವ್ಹಡ್ಲೊ ಅಕೃಮ್ ಆನಿ ಅನ್ಯಾಯ್ – ಅನೀತ್ ಮ್ಹಣ್ ಕೊಣಾಯ್ಕೀ ಭೊಗಾನಾ. ಭೊಗ್ಲ್ಯಾರೀ ಉಲಂವ್ಕ್ ತಯಾರ್ ನಾಂತ್. ಮೆಲ್ಲ್ಯಾ ತೀಸ್ ವಿದ್ಯಾರ್ಥಿಂಚೊ ಜೀವ್ – ‘ಜೀವ್’ ಮ್ಹಣ್ ಭೊಗಾನಾ. ತಾಂಚ್ಯಾ ಆವಯ್ – ಬಾಪಯ್ಚೆಂ ದೂಕ್ – ‘ದೂಕ್’ ಮ್ಹಣ್ ಭೊಗಾನಾ.
ವಿಪರ್ಯಾಸಾಚಿ ಗಜಾಲ್ ಪಳಯಾ – 2G ಸ್ಪೆಕ್ಟ್ರಮ್ ವಿತರಣ್ ಆನಿ ಕೊಮನ್ವೆಲ್ತ್ ಖೆಳ್ ಹಗರಣಾಕ್ ಲಾಗೊನ್ ರಾಜಿನಾಮೊ ದಿಲ್ಲೆ ವಾ ಜಯ್ಲಾಕ್ ಗೆಲ್ಲೆ ಆಜ್ ನಿರ್ದೋಶ್ ಸುಟ್ಲ್ಯಾತ್. ತನ್ಕಿ ಕೆಲ್ಲ್ಯಾ ಸಿಬಿಐ ತಸಲ್ಯಾ ತನ್ಕೆ ಸಂಸ್ಥ್ಯಾಂಲಾಗಿಂ ಸಯ್ತ್ ಹ್ಯಾ ಗಜಾಲಿಂನಿ ಭೃಶ್ಟಾಚಾರ್ ಜಾಲಾ ಮ್ಹಣ್ ಅಫ್ರಾದ್ ರುಜು ಕರುಂಕ್ ಪುರಾವೆ – ಸಾಕ್ಶಿ ನಾಂತ್. ಪೂಣ್ ಅಣ್ಣಾನ್ ಆನಿ ತಾಚ್ಯಾ ಸಾಂಗೊಡ್ಯಾಂನಿ ಕೆಲ್ಲ್ಯಾ ಆಂದೋಲನಾನ್ – 2014 ವ್ಯಾ ವರ್ಸಾ ಕೇಂದ್ರಾಂತ್ ಸರ್ಕಾರ್ ಬದಲ್ಲೊ. ಅರಂವಿದ ಕೇಜ್ರಿವಾಲಾನ್ ಆಮ್ ಆದ್ಮಿ ಪಾಡ್ತ್ ಘಡ್ಲಿ ಆನಿ ಡೆಲ್ಲಿಂತ್ ಸರ್ಕಾರ್ ರಚ್ಲೊ. ಕಿರಣ್ ಬೇಡಿ ಗವರ್ನರ್ ಜಾಲಿ. ಅಣ್ಣಾ ಹಜಾರೆಕ್ ‘ಝಡ್’ ಸೆಕ್ಯೂರಿಟಿ ಮೆಳ್ಳಿ. ರಾಮ್ದೇವ್ ಬಾಬಾಚೆಂ ಪತಂಜಲಿ ಬಿಜ್ನೆಸ್ ಸಾಮ್ರಾಜ್ಯ್ ಉಭೆಂ ಜಾಲೆಂ. ಆರ್ಚ್ಬಿಸ್ಪ್ ಆನಿ ಕಾಡ್ದಿನಾಲ್ ಪಾಟಿಂ ಲಿಂಬಾಕ್ ಗೆಲೆ!
2011 ವ್ಯಾ ವರ್ಸಾ ಅಣ್ಣಾ ಹಜಾರೆಕ್ ಚಾರ್ ದೀಸ್ ಉಪಾಸ್ ಕರುಂಕ್ ಜಾಗೊ ದಿಲ್ಲೆಂ ‘ಜಂತರ್ – ಮಂತರ್’ ಮಾತ್ ಆಜೂಯ್ ಅಸಂಗತ್ ಕವಿತೆಚ್ಯಾ ಅಪ್ರೋಸ್ ರೂಪಕಾಪರಿಂ ತಶೆಂಚ್ ಅಖಂಡ್ ಉಭೆಂ ಆಸಾ, ಪಂದ್ರಾ ಪಾವ್ಸಾಂಕ್ ಭಿಜೊನ್ ಆನಿ ಪಂದ್ರಾ ವೊತಾಂಕ್ ತಾಪೊನ್. ಪೂಣ್ ಜಂತರ್ – ಮಂತರಾನ್ ದಾಕಂವ್ಚೊ ‘ವೇಳ್’ – ಬದಲ್ಲಾ ಮ್ಹಣ್ ಮ್ಹಾಕಾ ಭೊಗ್ತಾ. (ಹ್ಯಾಚ್ ವರ್ಸಾ ಮಾರ್ಚ್ ಮಯ್ನ್ಯಾಂತ್ ಸಾಹಿತ್ಯ ಅಕಾಡೆಮಿಚೊ ಪುರಸ್ಕಾರ್ ಘೆಂವ್ಕ್ ಡೆಲ್ಲಿ ಗೆಲ್ಲೆ ತವಳ್ ಹಾಂವ್ ಜಂತರ್ – ಮಂತರಾಚ್ಯಾ ಮುಕ್ಲ್ಯಾ ‘ಪಾರ್ಕ್’ ಹೊಟೆಲಾಂತ್ ರಾವ್ಲ್ಲೊಂ. ಡೆಲ್ಲಿ ಆಸ್ಲ್ಲೆ ದೊನೀ ದೀಸ್ ಜಂತರ್ – ಮಂತರ್ ವಚೊನ್ ವಾರೆಂ ಘೆವ್ನ್ ಯೆತಾಲೊಂ)
ಜಂತರ್ – ಮಂತರ್ : ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ ಘೆಂವ್ಕ್ ಡೆಲ್ಲಿ ಗೆಲ್ಲೆ ತವಳ್ ರಾವ್ಲ್ಲೆಂ ‘ಪಾರ್ಕ್’ ಹೊಟೆಲ್ – ಪಾಟ್ಲ್ಯಾನ್ ದಿಸ್ತಾ.
ಜಂತರ್ ಮಂತರಾಂತ್ ನೀಟ್ ಆನಿ ಹೆರ್ ಪರೀಕ್ಶೆಂನಿ ಚಲ್ಲೆಲ್ಯಾ ಅಕೃಮಾಂಚೇರ್ ಶಿಕ್ಪಾಮಂತ್ರಿಚೊ ರಾಜಿನಾಮೊ ಮಾಗೊನ್ ಸತ್ಯಾಗ್ರಹಾಕ್ ಬಸ್ಲೆಲ್ಯಾ ಸೋನಮ್ ವಾಂಗ್ಚೂಕಾಚೊ ಉಪಾಸ್ ಸೊಳಾವ್ಯಾ ದಿಸಾಕ್ ಪಾವ್ಲಾ ತರೀ, ಸರ್ಕಾರಾಕ್ ಸೋನಮ್ ವಾಂಗ್ಚೂಕಾಚಾ ಜಿವಾಚೆಂ ವಾ ಪರೀಕ್ಶೆಂತ್ ಘಡ್ಲೆಲ್ಯಾ ಅಕ್ರಮಾಚೆಂ ಕಿತೆಂಚ್ ಪಡುನ್ ವಚೊಂಕ್ ನಾ. ಶಿಕ್ಪಾಮಂತ್ರಿ ರಾಜಿನಾಮೊ ದಿಂವ್ಕ್ ಸುತಾರಾಂ ತಯಾರ್ ನಾ.
ಹಾಚೇರ್ ವಿಚಾರ್ ಕರ್ತಾನಾ – ಏಕ್ ಪ್ರಶ್ನ್ ಉಟ್ತಾ. ಆಜ್ ರಾಜಕೀಯಾಂತ್ ‘ನಯ್ತಿಕತಾ’ ಮ್ಹಳ್ಳಿ ಕಾಂಯ್ ಉರ್ಲ್ಯಾ? ಏಕ್ ಕಾಳ್ ಆಸ್ಲೊ – ರಯ್ಲ್ವೇ ಅವ್ಘಡ್ ಜಾಲೆಂ ಮ್ಹಣ್ ರಯ್ಲ್ ಮಂತ್ರಿ ಆಸ್ಲೆಲ್ಯಾ ಲಾಲ್ ಬಹಾದೂರ್ ಶಾಸ್ತ್ರಿನ್ ರಾಜಿನಾಮೊ ದಿಲ್ಲೊ. ಪೂಣ್ ಆಜ್ ಆಪ್ಲ್ಯಾ ಕೆಬಿನಾಂತ್ ‘ಸೆಕ್ಸ್’ ಕರ್ತಾನಾ ಶಿರ್ಕೊನ್ ಪಡ್ಲ್ಯಾರೀ ಮಂತ್ರಿ – ಅಧಿಕಾರಿಂಕ್ ಲಜ್ ಮ್ಹಳ್ಳಿ ದಿಸಾನಾ. ‘ಎಕಾಮೆಕಾಚೆ ಸಹಮತೆನ್ ಆಮಿ ತೆ ಕೆಲಾಂ. ತುಮಿ ಕೋಣ್ ವಿಚಾರುಂಕ್ ?’ ಮ್ಹಣ್ ತೆ ಧಯ್ರಾನ್ ಸಾಂಗ್ತಾತ್. ನಯ್ತಿಕತಾ, ಲಜ್ ಕಶೀಯ್ ನಾ. ಮನ್ಶಾಪಣ್ಯ್ ಮೆಲಾಂಗೀ ? – ಸಮಾಜಿಕ್ ಜಿವಿತಾಂತ್ಲೆಂ ಮನ್ಶಾಪಣ್ ಗೆಲೆಂ ತರ್, ಉರ್ಲೆಂ ಕಿತೆಂ ? ಹೊ ದೇಶ್ ಖಂಯ್ ವಚೊನ್ ಪಾವ್ತಲೊ ?
ಪಾಟ್ಲ್ಯಾ ಪಂದ್ರಾ ವರ್ಸಾಂನಿ ‘ಜಂತರ್ – ಮಂತರ್’ ಕಾವ್ಯಾಳ್ ಪ್ರತಿಮೆಂತ್ಲೊ ಫಕತ್ ‘ವೇಳ್’ ಮಾತ್ ಬದ್ಲೊಂಕ್ ನಾ, ವೆಳಾನ್ ಯೂ ಟರ್ನ್ ಘೆತ್ಲಾಂ ಮ್ಹಣ್ ಮ್ಹಾಕಾ ಭೊಗ್ತಾ.
2011 ವ್ಯಾ ವರ್ಸಾ ಉಲಯಿಲ್ಲೆ ಸಿನೆಮಾ ಹೀರೊ, ಹೀರೊಯಿನ್ ಆತಾಂ ಉಲಯ್ನಾಂತ್. ಪೂಣ್ ಸಿನೆಮಾಂತ್ಲೆ ವಿಲನ್ ಘಟ್ಟ್ ತಾಳ್ಯಾನ್ ಉಲಯ್ತಾತ್. ಪ್ರಕಾಶ್ ರಾಜ್, ಸಯ್ಯಾಜಿ ಶಿಂದೆ, ನಸೀರುದ್ದೀನ್ ಶಾ, ಕುನಿಕಾ. ಕುನಾಲ್ ಕಾಮ್ರಾ, ವರುಣ್ ಗ್ರೋವರ್ ತಸಲೆ ಕೊಮೆಡಿಯನ್ ಉಲಯ್ತೇ ಆಸಾತ್. ಅರುಂಧತಿ ರೊಯ್, ಶೋಭಾ ಡೇ ತಸಲಿಂ ಲೇಖಿಕಾ ಉಲಯ್ತೇ ಆಸಾತ್.
ತರೀ ಏಕ್ ಪ್ರಶ್ನ್ ಮ್ಹಾಕಾ ಅಜೂನ್ ಧೊಸ್ತಾ …. ಕೊಣಾಚ್ಯಾ ಭುರ್ಗ್ಯಾಂ ಖಾತಿರ್ ಸೋನಮ್ ವಾಂಗ್ಚೂಕ್ ಜಂತರ್ ಮಂತರಾಂತ್ ಮರೊಂಕ್ ತಯಾರ್ ಜಾಲಾ ; ತೋ ಲೋಕ್ ಕಿತ್ಯಾಕ್ ಉಲಯ್ನಾ ? ವಾಂಗ್ಚೂಕಾಚ್ಯಾ ಝುಜಾಕ್ ಆನಿ ತಾಂಕಾ ಕಸಲೊಚ್ ಸಂಬಂದ್ ನಾ ಮ್ಹಳ್ಳೆಪರಿಂ ಕಿತ್ಯಾಕ್ ನುತ್ತಾ ಬಸ್ಲಾ? ಅಣ್ಣಾನ್ ಭಾನಾಯಿಲ್ಲೆಂ ಪರಿಂ ವಾಂಗ್ಚೂಕೀ ಆಮ್ಕಾಂ ಭಾನಾಯ್ತ್ ಮ್ಹಣ್ ಚಿಂತಾ ?
ತರೀ ಸೋನಮ್ ಮ್ಹಣ್ತಾ – ಹಾಂವ್ ಮರೊಂಕೀ ತಯಾರ್. ಮ್ಹಜೆಂ ಪ್ರಶ್ನ್ ಪರತ್ ತೇಂಚ್ – ಕೊಣಾ ಖಾತಿರ್ ಸೋನಮ್ ? ತುಂವೆ ಕೊಣಾ ಖಾತಿರ್ ಮೊರಾಜಾಯ್ ?
■ ಎಚ್ಚೆಮ್, ಪೆರ್ನಾಲ್
