ಕೊಂಕ್ಣಿ, ಕನ್ನಡ, ತುಳು ಭಾಸಾಂನಿ ‘ವಲ್ಲಿ ಬೋಳ’ ನಾಂವಾನ್ ಬರಂವ್ಚ್ಯಾ ವಲೇರಿಯನ್ ಸಿಕ್ವೇರಾ ಹಾಂಚೊ, ತುಳುನಾಡ್ ಕೃಷಿ ಪರಂಪರಾ, ಆಚಾರ್ – ವಿಚಾರ್ ಆನಿ ತುಳು ಸಂಪ್ರದಾಯಾವಿಶಿಂ ಬರಯಿಲ್ಲಿಂ ಸಚಿತ್ರ್ ಲೇಖನಾಂ ಆಸ್ಚೊ ‘ತುಳುವಪ್ಪೆಗ್ ಬುಲೆಕಾಣಿಕೆ’ ಬೂಕ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಂತ್ ಸನ್ವಾರಾ ಜುಲಾಯ್ 18 ವೆರ್ ತುಳುಭವನಾಚ್ಯಾ ಡಾ| ವಾಮನ ನಂದಾವರ ವೆದಿರ್ ಲೊಕಾರ್ಪಣ್ ಜಾಲೊ. ಹ್ಯಾ ಸಂದರ್ಭಾರ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಶ್ ತಾರಾನಾಥ ಗಟ್ಟಿ ಕಾಪಿಕಾಡ್, ರಿಜಿಸ್ಟ್ರಾರ್ ಪೂರ್ಣಿಮಾ ಆನಿ ಹೆರ್ ಸಯ್ರೆ ವೆದಿರ್ ಹಾಜರ್ ಆಸ್ಲೆ.
150 ಪಾನಾಂನಿ 32 ತಸ್ವಿರೆಂ ಸವೆಂ ಸಚಿತ್ರ್ ಲೇಖನಾಂ ಹ್ಯಾ ಬುಕಾಂತ್ ಆಸೊನ್, ಹೊ ಬೂಕ್ ಕರ್ನಾಟಕ ಸರ್ಕಾರಾಚ್ಯಾ ಕರ್ನಾಟಕ ತುಳು ಸಾಹಿತ್ಯ್ ಅಕಾಡೆಮಿನ್ ಫಾಯ್ಸ್ ಕೆಲಾ. ಹ್ಯಾ ಸುವಾಳ್ಯಾರ್ ಕರ್ನಾಟಕ ತುಳು ಅಕಾಡೆಮಿ ತರ್ಫೆನ್ ಮಾನ್ ಪತ್ರ್ ದೀವ್ನ್ ಮಾನ್ ಕೆಲೊ.
ಹ್ಯಾ ಬುಕಾಕ್ ಪ್ರೊ| ಡಾ| ಅಕ್ಷಯ ಆರ್ ಶೆಟ್ಟಿ ಹಾಣಿಂ ಸುರ್ವಿಲಿಂ ಉತ್ರಾಂ ಬರಯ್ಲ್ಯಾಂತ್. ಬುಕಾಚೆಂ ಮೋಲ್ ಫಕತ್ 80 ರುಪಯ್ ಆಸೊನ್, ತುಳು ಅಕಾಡೆಮಿಚ್ಯಾ ದಫ್ತರಾಂತ್ ಆನಿ ಸರ್ಕಾರಿ ಗ್ರಂಥಾಲಯಾಂನಿ ಹೊ ಬೂಕ್ ವಿಕ್ರ್ಯಾಕ್ ಮೆಳ್ತಾ.
ಕಾರ್ಕೊಳ್ ತಾಲುಕೆಚ್ಯಾ ಬೋಳ ಗಾಂವ್ಚ್ಯಾ ಕೃಷಿ ಕುಟ್ಮಾಂತ್ ಜಲ್ಮಲ್ಲ್ಯಾ ವಲೆರಿಯನ್ ಸಿಕ್ವೇರಾ ಹಾಂಕಾ, ತಾಣಿ ಬಾಳ್ ಕೃಷಿಕ್ ಜಾವ್ನ್ ಕಾಡ್ಲ್ಲ್ಯಾ ವಾಂವ್ಟಿಕ್ ಆನಿ ಅನ್ಭೊಗಾನ್ ರಚ್ಲೆಲ್ಯಾ ಕೃಷಿ ಸಾಹಿತ್ಯಾಕ್ ಲಾಗುನ್ ‘ಕೃಷಿ ಸಾಹಿತಿ’ ಮ್ಹಣ್ಚ್ ಒಳ್ಕತಾತ್. 1986 ವ್ಯಾ ವರ್ಸಾ ಬರಂವ್ಕ್ ಸುರು ಕೆಲ್ಲ್ಯಾ ತಾಣಿ ಪಾಟ್ಲ್ಯಾ 40 ವರ್ಸಾಂನಿ, ಕೊಂಕ್ಣಿ, ಕನ್ನಡ, ತುಳು ಅಶೆಂ ವಿವಿಧ್ ಭಾಸಾಂನಿ ಕಾಂಯ್ 3,500 ಲೇಖನಾಂ ಬರಯ್ಲ್ಯಾಂತ್ ಆನಿ ತಾಂಚೆ ಸ ಕೊಂಕ್ಣಿ ಬೂಕ್ ಆನಿ ಏಕ್ ತುಳು ಬೂಕ್ ಪರ್ಗಟ್ ಜಾಲ್ಯಾತ್. ತಾಂಚ್ಯಾ ‘ಶೆತಾಂ – ಭಾಟಾಂ ತೊಟಾಂನಿ’ ಬುಕಾಕ್ 2023 -24 ವ್ಯಾ ವರ್ಸಾ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ‘ವರ್ಸಾಚೊ ಉತ್ತೀಮ್ ಪುಸ್ತಕ್’ ಪುರಸ್ಕಾರ್ ಲಾಭ್ಲಾ.
ತಾಣಿ ತುಳು ಸಾಹಿತ್ಯ್ ಶೆತಾಕ್ ದಿಲ್ಲಿ ದೆಣ್ಗಿ ಲೆಕಾಕ್ ಧರುನ್ ತಾಂಕಾ 2018 ವ್ಯಾ ವರ್ಸಾ ಚಲ್ಲೆಲ್ಲ್ಯಾ ವಿಶ್ವ ತುಳು ಸಮ್ಮೇಳನಾಂತ್ ‘ತುಳುಶ್ರೀ’ ಪ್ರಶಸ್ತಿ ದೀವ್ನ್ ಮಾನ್ ಕೆಲಾ. ಮಂಗ್ಳುರ್ ಆಕಾಶ್ವಾಣಿಚೆರ್, ಸಾರಂಗ್ ಸಮುದಾಯ್ ರೆಡಿಯೊಚೆರ್ ತಾಣಿ ಜಾಯ್ತಿಂ ಕಾರ್ಯಕ್ರಮಾಂ ದಿಲ್ಯಾಂತ್. ಜಾಳಿಜಾಗ್ಯಾಂನಿ, ಪತ್ರಾಂನಿ ತಾಂಚಿ ಬರ್ಪಾಂ ಸರಾಗ್ ಫಾಯ್ಸ್ ಜಾವ್ನ್ ಆಸಾತ್.
ಪಾಂಚ್ ವರ್ಸಾಂ ಕಥೊಲಿಕ್ ಸಭೆಚ್ಯಾ ‘ಆಮ್ಚೊ ಸಂದೇಶ್ ಪತ್ರಾಚೊ ಸಹ ಸಂಪಾದಕ್ ಜಾವ್ನ್ ಆನಿ ಧಾ ವರ್ಸಾಂ ಫಿರ್ಗಜ್ ಪತ್ರಾಚೊ ಸಂಪಾದಕ್ ಜಾವ್ನ್ ತಾಣಿ ಸೆವಾ ದಿಲ್ಯಾ. ಭಾರತೀಯ್ ತಪ್ಪಾಲ್ ಖಾತ್ಯಾಂತ್ 40 ವರ್ಸಾಂಚ್ಯಾ ಸೆವೆ ಉಪ್ರಾಂತ್ ಆತಾಂ ತೆ ನಿವೃತ್ತ್ ಜೀವನ್ ಸಾರುನ್ ಆಸಾತ್.
