ವಿಶ್ವ ಕೊಂಕಣಿ ಕೇಂದ್ರಾಂತ “ವರ್ಧನಿ” ಸಹಯೋಗಾನ ತಾ. 01-08-2026 ತಾರ್ಕೆರ “ಸ್ಕೇಲ್ ಅಪ್” ಉದ್ಯಮ ಉನ್ನತಿ ಕೊಂಕಣಿ ಉದ್ಯಮಿ ಬಾಯಲಾಂಕ ದೋನಿ ದಿವಸಾಚೆ ಸ-ನಿವಾಸ ಮುಫತ ತರಬೇತಿ ಕಾರ್ಯಾಗಾರಾಚೆ ಉಗ್ತಾವಣ ಸುವಾಳೊ ಚಲ್ಲೆಂ.
ಮುಖೇಲ ಸೊಯರೊ ಜಾವನು ಆಯಿಲೊ ಕೌಶಲ್ಯ ಅಭಿವೃದ್ಧಿ ಇಲಾಖೇಚಾ ಅದಲೆ ಜಂಟಿ ಅಧಿಕಾರಿ ಮಾನೆಸ್ತ ಅರವಿಂದ ಡಿ ಬಾಳೇರಿ ಹಾನ್ನಿ ಉಲಯತಚಿ ‘ಬಾಯಲ ಮನಶಾಂನಿ ಸ್ವ ಉದ್ಯಮ ಕರಚೆ ಚಿಂತನ ಅಪಣಾವನ ಘೆವನು ವ್ಯಾಪಾರ ಕ್ಷೇತ್ರ ವಿಶಾಲ ಜಾವನು ವಾಡ್ದುನ ಆಯಲಾಂ. ವ್ಯವಹಾರಾಚೆ ಬದ್ದಲ ಜಾನಕಾರೀ ಅಸುನು ಆಯಚೆ ದಿವಸು ಬಾಯಲ ಮನಶಾಂನಿ ಉದ್ಯಮ ಶೀಲ ಜಾವನು ತಾಂಗೆಲೇಚಿ ಜಾಲೆಲೆ ಸ್ವ- ಉದ್ಯಮ ಪ್ರಾರಂಭ ಕೆಲೆಲೆ ವಿಚಾರ ಮಸ್ತ ಬರೆಂ ದಿಸತಾ” ಅಶಿಂ ಸಾಂಗಲೆಂ. ಆಮಗೆಲೆ ಉದ್ಯಮ ಆನಿ ವ್ಯವಹಾರ ಆನಿಕಯ ಚಡ ಮುಖಾರ ಹಾಡಚೆ ವಿಚಾರ ಬದ್ದಲ, ಕೌಶಲ್ಯ ಅಭಿವೃದ್ಧಿಕ ಆನಿ ಸರ್ವ ರೀತೀನ ಮುಖಾರ ಯೆವಚಾಕ ಲಭ್ಯ ಆಸುಚೆ ವೆವೆಗಳೆ ಯೋಜನಾ ಬದ್ದಲ ಮಾಹಿತಿ ದಿಲೆಂ. ವಿಶ್ವ ಕೊಂಕಣಿ ಕೇಂದ್ರಾಚೆ ಪ್ರತೀ ಏಕ ಸು ವ್ಯವಸ್ಥಾ ಆಸುಚೆ ಉದ್ಯಮ ಉನ್ನತಿ ಕಾರ್ಯಾಗಾರಾಚೆ ಪ್ರಯೋಜನ ಘೆಯಾತಿ. ಅಶಿಂ ಶುಭ ಸಾಂಗಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ, ನಾಮಚೆಚೆ ಲೇಕ ಪರಿಶೋಧಕ ನಂದಗೋಪಾಲ ಶೆಣೈ ಹಾನ್ನಿ ಕಾರ್ಯವಳೀಚೆ ಅಧ್ಯಕ್ಷಪಣ ಘೆವನು ಸರ್ವಾಂಕಯ ಸ್ವಾಗತ ಕರತಚಿ ಕಾರ್ಯಾಗಾರಾಂತ ಉಮೇದ ದೀವನು ಭಾಗ್ ಘೆತ್ತಿಲೆ ಸರ್ವ ಮಹಿಳಾ ಉದ್ಯಮಿಂಕ ಉದ್ದೇಶಿಸುನು “ಕೆದನಾಯ ವಿಂಗಡಾಲ ಸಾಂಗಾತಾಕ ಆಮಗೆಲೆ ತುಲನ ಕರನಾಶೀ ಸರ್ವಾಂನಿ ಸಬಲೀಕರಣ ಜಾವಕಾ. ಆಮಗೆಲೆ ಉದರಗತೀಕ ಆಮ್ಮೀಚಿ ಕಾರಣ ಜಾವಕಾ. ಆತ್ಮವಿಶ್ವಾಸ ಆನಿ ಛಲ, ಸಾಧನ ಆಸಲ್ಯಾರೀ ಗುರಿ ಪಾವಚಾಕ ಫಾವ ಆಸಾ ಅಶಿಂ ಸಾಂಗಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಉಪಾಧ್ಯಕ್ಷ ಮಾನೆಸ್ತ ರಮೇಶ ಡಿ ನಾಯಕ್ ವೇದಿಕೆರಿ ಉಪಸ್ಥಿತ ಆಶಿಲಿಂಚಿ. ‘ವರ್ಧನಿ’ ಪ್ರವರ್ತಕಿ ಮಾನೆಸ್ತಿಣ್ ಉಷಾ ನಂದಗೋಪಾಲ ಶೆಣೈ ಸಮಾರಂಭಾಂತ ಹಾಜರ ಆಶಿಲಿಂಚಿ, ಸುಚಿತ್ರಾ ಎಸ್ ಶೆಣೈನ ಕಾರ್ಯಕ್ರಮ ನಿರೂಪಣ ಕರನು, ಉಪಕಾರ ಆಟಯಲೆ. ಲಕ್ಶ್ಮೀ ಕಿಣಿ ನ ಕೊಂಕಣಿ ಅಭಿಮಾನ ಗೀತ ಗಾಯಲೆಂ, ರಕ್ಷಾ ಶೆಣೈನ ಸಂಪನ್ಮೂಲ ವ್ಯಕ್ತಿಂಗೆಲೆ ವಳಕ ಕರನು ದಿಲೆಂ. ಶಿಬಿರಾಂತ ಮಂಗಳೂರು ಸಾಧನಾ ಬಳಗ ತಂಡಾ ಥಾವನ ಸಾಂಸ್ಕೃತಿಕ ಕಾರ್ಯಕ್ರಮಯ ಪ್ರದರ್ಶನ ಜಾಲೆಂ. ವಿಂಗಡ ಪ್ರದೇಶಾ ಥಾವನು ಆಯಲೆಂ 50 ಮಹಿಳಾ ಉದ್ಯಮಿನಿಂ ಉತ್ಸಾಹಾನ ಕಾರ್ಯಾಗಾರಾಚೆ ಪ್ರಯೋಜನ ಘೆವಚಾಕ ಭಾಗೀದಾರ ಜಾವನು ಆಯಿಲಿಂತಿ. ಸೋಳಾ (16) ಸಂಪನ್ಮೂಲ ವ್ಯಕ್ತಿಂನಿ ವೆವೆಗಳೆ ಉದ್ಯೋಗ ಉನ್ನತಿ ವಿಚಾರ ಬದ್ದಲ ಮಾಹಿತಿ ದಿಲೆಂ.
ಸಮಾರೋಪ ಸುವಾಳೊ
ದೋನ ದಿವಸ ಚಲ್ಲೆಲೆ ಸ-ನಿವಾಸ ಮುಫತ ತರಬೇತಿ ಕಾರ್ಯಾಗಾರಾಚೆ ಸಮಾರೋಪ ಸುವಾಳೊ 02-08-2026 ತಾರ್ಕೆರ ಚಲ್ಲೊ.
ಮುಖೇಲ ಸೊಯರಿ ಜಾವನು ಆಯಿಲಿ ವತಿಕಾ ಇಂಟರ ನ್ಯಾಷನಲ್, ನಿರ್ಮಲಾ ಟ್ರಾವೆಲ್ಸ್ ಚೆ ಮುಖೇಲಿ ಮಾನೆಸ್ತಿಣ್ ವತಿಕಾ ಕಾಮತ ಪೈ ಹಾನ್ನಿ ‘ಬಾಯಲಾಂನಿ ತಾಂಗೆಲೆ ಸ್ವ- ಉದ್ಯಮ ಚಿಂತನ ಆಪಣಾವನ ಘೆತ್ತಿಲೆ, ಏಕ ಬರೆಂ ವಿಚಾರ ಜಾವನು ಆಸಾ. ಆಮಗೆಲೇಚಿ ಜಾಲೆಲೆ ಸ್ವ ಉದ್ಯಮ ಆನಿಕಯ ಮುಖಾರ ಹಾಡಚಾಕ ಮಸ್ತ ಅಗತ್ಯ ಆಸುಚೆ, ಆತ್ಮವಿಶ್ವಾಸ ವಾಡೊವಚೆ, ದೃಢ ವಿಶ್ವಾಸ್ ನಂಬಿಕಾ, ಸಹಭಾಗಿತ್ವ, ಸಂಪರ್ಕ, ಅಸಲೆ ಪೂರಾ ವಿಚಾರ ಸಾಂಗತಚೀ ಮಸ್ತ ಇತಲೆ ಉದಾಹರಣ್ ಆನಿ ಸಲಹಾ ದೀವನು ಉದ್ಯಮಿ ಬಾಯಲಾಂಕ ಧೈರ್ಯ ಸಾಂಗುನ ಪಾಟಿಂಬಾ ದಿಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ, ನಾಮನೆಚೆ ಲೇಕ ತಪಾಸಕ ನಂದಗೋಪಾಲ ಶೆಣೈ ಹಾನ್ನಿ ಜೀವನಾಂತ ಪ್ರಾಮಾಣಿಕ ಜಾವನು ಆತ್ಮ ವಿಶ್ವಾಸಾನ ಆನಿ ಕೌಶಲ್ಯತೇನ ಮುಖಾರ ಸರಲಾರ್ ಖಂಚೇಯ ವ್ಯಾರ, ಉದ್ಯಮ ವಾಡ್ದುನ ಯೆವಚಾಂತ ಸಂಶಯಚೀ ನಾ. ಅಶಿಂ ಸ್ಪೂರ್ಥಿದಾಯಕ ಉತ್ರಂ ಸಾಂಗುನ ಸರ್ವಾಂಕ ಅಭಿನಂದನ ಕೆಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಉಪಾಧ್ಯಕ್ಷ ಮಾನೆಸ್ತ ರಮೇಶ ಡಿ ನಾಯಕ್ ಹಾನ್ನಿ ವೇದಿರಿ ಉಪಸ್ಥಿತ ಆಶಿಲಿಂಚಿ. ಮಾನೆಸ್ತ ವಿಲಿಯಂ ಡಿಸೋಜಾ ಹಾನ್ನಿ ಉಪಸ್ಥಿತ ಆಸುನು ಉಪಕಾರಾಚೆ ಉತ್ರಂ ಸಾಂಗಲೆಂ. ಆನಿ ಸಮಾರಂಭಾಂತ ‘ವರ್ಧನಿ’ ಚೆ ಪ್ರವರ್ತಕಿ ಮಾನೆಸ್ತಿಣ್ ಉಷಾ ನಂದಗೋಪಾಲ ಶೆಣೈ, ವಿಶ್ವ ಕೊಂಕಣಿ ಕೇಂದ್ರ ಸಲಹಾ ಸಮಿತಿಚೆ ನರೇಶ್ ಕಿಣಿ, ಎಂ ಆರ್ ಕಾಮತ್ ಉಪಸ್ಥಿತ ಆಸಿಲಿಂಚಿ. ಸುಚಿತ್ರಾ ಎಸ್ ಶೆಣೈ ನ ಕಾರ್ಯಕ್ರಮ ನಿರೂಪಣ ಕೆಲೆಂ. ಒಟ್ಟು ಸೋಳಾ -16 ಸಂಪನ್ಮೂಲ ವ್ಯಕ್ತಿಂನಿ ಭಾಘಿ ಜಾವನು ವೆವೆಗಳೆ ವಿಷಯಾರ ಸಕಡಾಂನಿ ವ್ಯಾರಾಂತ ಆನಿ ಉದ್ಯೋಗ ಆನಿಕಯ ಮುಖಾರ ಹಾಡಚಾಕ ಸಂಬಂಧ ಆಶಿಲೆಂ ಮಸ್ತ ಇತಲೆ ವಿಷಯ ತಿಳಸುನ ದಿಲೆಂ. ಲಕ್ಶ್ಮೀ ಕಿಣಿ ನ ಸಂಪನ್ಮೂಲ ವ್ಯಕ್ತಿಂಕ ಸ್ವಾಗತ ಕೆಲೆಂ, ತಶೀಂಚಿ ರಕ್ಷಾ ಶೆಣೈ ನ ತಾಂಗೆಲೆ ವಳಕ ಕರನು ದಿಲೆಂ. ವೆವೆಗಳೆ ಪ್ರದೇಶಾ ಥಾವನು ಆಯಲೆ ಉದ್ಯಮ ಶೀಲತಾ ಮಹಿಳಾ ಉದ್ಯಮಿಂನಿ ಉತ್ಸಾಹಾನ ಕಾರ್ಯಾಗಾರಾಂತ ಶಿಕಿಲೆ ಆನಿ ಆತ್ಮ ವಿಶ್ವಾಸಾನ ತಾಂಗೆಲೆ ಅನುಭವ ಆನಿ ಘೆತ್ತಿಲೆ ಪ್ರಯೋಜನ ಸಭಿಕಾಂಗೆಲೆ ಸಾಂಗಾತಾಕ ಸಂತೋಷಾನ ವಾಂಟುನ ಘೆತಲೆಂ. ಮುಖಾರ್ ಆಮ್ಮಿ ಏಕ ಜವಾಬ್ದಾರಿ, ಬರೆಂ ಉನ್ನತ ಉದ್ಯಮೋನ್ನತಿ ಮಹಿಳಾ ಜಾವಚೆ ಭಾಸ್ ದಿಲೆಂ.
