ದೆವಾಕ್ ಮನಿಸ್ ಕೆಲ್ಲಿ ‘ಜೆನ್ Z’ ಭಾಸ್

16

ಆಯ್ಲೆವಾರ್ ಡೆಲ್ಲಿಚ್ಯಾ ಜಂತರ್ ಮಂತರ್ ತಶೆಂ ದೆಶಾಚ್ಯಾ ಇತರ್ ಜಾಗ್ಯಾಂನಿ ಯಶಸ್ವಿ ರಿತಿನ್ ಆಯೋಜನ್ ಜಾಲ್ಲೆಂ ಸಿಜೆಪಿ ಮುಕೇಲ್ಪಣಾರ್ ಸುರ್ವಾತ್ಲಲೆಂ ತರೀ ಉಪ್ರಾಂತ್ ಚಡಾವತ್ ‘ಜೆನ್ Z’ ನ್ ಕೊಣೀ ನಿರ್ದಿಶ್ಟ್ ಮುಕೆಲಿ ನಾಸ್ತಾನಾ ಚಲಯಿಲ್ಲೆಂ ಆಂದೋಲನ್, ಆಪ್ಲ್ಯಾಚ್ ಸಬಾರ್ ವಿಭಿನ್ನ್ ಕಾರಣಾಂಖಾತಿರ್ ಫಾಮಾದ್ ಜಾಂವ್ಕ್ ಪಾವ್ಲೆಂ. ಇತಿಹಾಸಾಂತ್ ಜಾಲ್ಲ್ಯಾ ಸಬಾರ್ ಕ್ರಾಂತಿಂಚ್ಯಾ ಸಾಲಿರ್ ಹ್ಯಾ ಪ್ರತಿರೋಧಾಕ್‌ಯೀ ತುಲನ್ ಕರ್ನ್ ಪಳೆಂವ್ಚ್ಯಾ ಮಟ್ಟಾಕ್ ಹೆಂ ಪ್ರತಿಭಟನ್ ವಾಡೊನ್ ಆಯಿಲ್ಲಿ ರೀತ್ ವಿಜ್ಮಿತ್ ಪಾಂವ್ಚೆತಸಲಿ ಆನಿ ಸಂಸೊಧಾಕ್ ಯೋಗ್ಯ್.

ಇತಿಹಾಸಾಂತ್ ಘಡ್‌ಲ್ಲ್ಯಾ ಹರ್ಯೆಕಾ ಕ್ರಾಂತೆಂತ್ ರಗತ್ ವ್ಹಾಳ್ಳಾಂ, ಜೀವ್ ಗೆಲ್ಯಾತ್. ಜಾಂವ್ ರಾಜ್ ಶಾಹಿಚ್ಯಾ ವಿರೋಧ್ ವಾ ಆಧುನಿಕ್ ಪರ್ಜೆರಾಜ್ ವಾ ಇತರ್ ಸರ್ಕಾರಾವಿರೋಧ್. ಹರ್ಯೆಕ್ ಪಾವ್ಟಿಂ ಆಡಳ್ತ್ಯಾನ್ ವಿರೋಧ್ ಆವಾಜಾಚೊ ಗಳೊ ಚಿರ್ಡುಂಚೆಂ ಪ್ರಯತ್ನ್ ಕೆಲಾಂ. ಆನಿ ಹಾಕಾ ಆಮ್ಚೊ ದೇಸ್ ಕಾಂಯ್ ವೆಗ್ಳೊ ನ್ಹಯ್. ಸಬಾರ್‌ಶಿಂ ಆಂದೋಲನಾಂ ಸರ್ಕಾರಾನ್ ಚಿರ್ಡಿಲ್ಯಾಂತ್. ಆತಾಂಚೆಂ ಪ್ರಸ್ತುತ್ ಮೋದಿಚೆಂ ಆಡಳ್ತೆಂ ಅಸಲ್ಯಾ ಗಜಾಲಿಂತ್ ಏಕ್ ಮೇಟ್ ಮುಕಾರ್‌ಚ್ ಮ್ಹಣ್ಯೆತ್. ಆಯ್ಲೆವಾರ್ಚ್ಯಾ ವರ್ಸಾಂನಿ CAA-NRC ಕಾನೂನಾ ವಿರೋಧ್ ಚಲ್ಲಲೆಂ ಆಂದೋಲನ್ ಜಾಂವ್ಕ್ ಪುರೊ ವಾ ಕೃಶಿ ಕಾನೂನಾ ವಿರೋಧ್ ರೈತಾಂಚೆಂ ಆಂದೋಲನ್ ಜಾಂವ್ಕ್ ಪುರೊ ಹಾಂತುಂ ಸರ್ಕಾರಾನ್ ಬೋವ್ ಧಾರುಣ್ ರಿತಿನ್ ಲೊಕಾಚೆರ್ ಅತ್ಯಾಚಾರ್ ಚಲಯ್ಲಾ. ಕೃಶಿ ಕಾನೂನಾಚ್ಯಾ ಆಂದೋಲನಾಂತ್ ಜೀಕ್ ಮೆಳ್ಳಿ ತರೀ ವರ್ಸ್ ಉತ್ರಲ್ಲ್ಯಾ ಹ್ಯಾ ಚಳ್ವಳೆಕ್ ಸರ್ಕಾರಾನ್ ಚಲಯಿಲ್ಲಿ ರೀತ್ ಆನಿ ಹಾಂತುಂ ಹೊಗ್ಡಾಲ್ಲೆ ರೈತಾಂಚೆ ಜೀವ್ ಹ್ಯಾ ನಿರ್ದಯಿ ಸರ್ಕಾರಾಚಿ ಕ್ರೂರತಾ ದಾಕಯ್ತಾ.

ಸದ್ದ್ಯಾಕ್ ಹ್ಯಾ ಸರ್ಕಾರಾಕ್ ಲೊಕಾಚೊ ಪಾಟಿಂಬೊ ಆಸೊಂ ವಾ ನಾ ಲೊಕಾನ್ ಪ್ರಸ್ತುತ್ ಸರ್ಕಾರಾ ವಿರೋಧ್ ವೋಟ್ ಘಾಲ್ನ್ ಜಿಕಯಿಲ್ಲ್ಯಾ ಪ್ರತಿನಿಧಿಂಕ್‌ಚ್ ಭೆಶ್ಟಾವ್ನ್ ವಾ ಮೊಲಾಕ್ ಘೆವ್ನ್ ಮ್ಹಳ್ಳೆಬರಿ ಆಪ್ಣಾಕುಶಿನ್ ಕರ್ನ್ (ಅಸಂವಿಧಾನಿಕ್ ರಿತಿನ್) ಲೊಕಾಮನಾಂತ್ ನ್ಹಯ್ ತರೀ ಸಂಸದಾಂತ್ ಸಂಖ್ಯಾಚೆಂ ಬಳ್ ಖೂಬ್ ಜೊಡ್ನ್ ಘೆತ್ಲಾಂ. ಪಸ್ಚಿಮ್ ಬಂಗಾಳ್, ಮಹಾರಾಶ್ಟ್ರಾಚ್ಯಾ ಬಿಜೆಪಿ ವಿರೋಧ್ ವಿಂಚುನ್ ಆಯಿಲ್ಲ್ಯಾ ಲೋಕ್ ಸಭೆಚ್ಯಾ ಸದಸ್ಯಾಂಕ್ ಚ್ ಆಪ್ಣಾಚ್ಯಾ ಕುಶಿನ್ ಕರ್ನ್ ಘೆಂವ್ಚೆಂ ಸರ್ಕಾರಾಚ್ಯಾ ಹಿಕ್ಮತ್ಯಾಂಕ್ ಉಕಲ್ನ್ ದಾಕಯ್ತಾ.

ಗಜಾಲ್ ಅಶಿ ಆಸ್ತಾನಾ ಅಸಲ್ಯಾ ಸರ್ಕಾರಾವಿರೋಧ್ ಭುರ್ಗ್ಯಾನಿ ಉಪ್ರಾಟೊನ್ ಸರ್ಕಾರಾಕ್ ಬಾಗ್ವೊಂಕ್ ಲಾಯಿಲ್ಲೆಂ ಖಂಯ್ಚ್ಯಾಯ್ ಮಹಾನ್ ಕ್ರಾಂತೆಕ್ ಉಣೆಂ ನ್ಹಯ್. ಹ್ಯಾ ಆಂದೋಲನಾಂತ್ ಸಬಾರ್ ವಿಭಿನ್ನ್ ಗಜಾಲಿ ಪಳೆಂವ್ಕ್ ಮೆಳ್ಳ್ಯೊ ತರೀ ಹ್ಯಾ ಪಯ್ಕಿ ‘ಜೆನ್ – Z’ ನ್ ವಾಪಾರ್ಲಲಿ ಭಾಸ್ ಉಟೊನ್ ದಿಸ್ತಾ. ಭಾಸ್ ಸಡಿಲ್ ವಾ ಅಶ್ಲೀಲ್ ಮ್ಹಣ್ ದಿಸ್ಲ್ಯಾರೀ ಹಿಚ್ ಭಾಸ್ ಸರ್ಕಾರಾಚಿ ಆಡಿ ಹಾಲಂವ್ಚ್ಯಾಂತ್ ಬಳ್ವಂತ್ ಹಾತೆರ್ ಜಾಂವ್ಕ್ ಪಾವ್ತಾ ಮ್ಹಣ್ ಆಂದೋಲನ್ ಚಲೊನ್ ಆಸ್ತಾನಾ ಮ್ಹಾಕಾ ಬೊಗೊಂಕ್ ಲಾಗ್‍ಲ್ಲೆಂ. ಹಾಕಾ ಪೂರಕ್ ಮ್ಹಳ್ಳೆಬರಿ ಆತಾಂ ಹೆಂ ಬರವ್ನ್ ಆಸ್ತಾನಾ ಹ್ಯಾಚ್ ಭಾಶೆವಿಶಿಂ ಚರ್ಚಾ ಚಲೊನ್ ಆಸಾ. ಆಂದೋಲನಾ ಉಪ್ರಾಂತ್ ಆಡಳ್ತೆಂ ಕಾಂಯ್ ಆಪುಣ್ ಖಂಯ್ ಚುಕೊನ್ ಪಡ್ಲೆಂ ಮ್ಹಣ್ ಸೊದ್ತಾನಾ ಭಾಶೆಚೆಂ ಆಯಾಮ್‌ಯೀ ಗಮ್ಲಾಂ ಆಸ್ತಲೆಂ. ದೆಕುನ್ ಆಡಳ್ತಾ ಪಾಡ್ತಿಥಾವ್ನ್ ಶೀದಾ ವಾ ಟಿವಿ ಮಾದ್ಯಮಾ (ಚಡಾವತ್ ಸರ್ಕಾರಾಚೆ ಮುಖವಾಣಿ) ಮುಕಾಂತ್ರ್ ಆನಿ ಆಪ್ಲ್ಯಾ ಸಮಾಜಿಕ್ ಜಾಳಿಜಾಗ್ಯಾಚ್ಯಾ ಪ್ರೊಪೊಗಾಂಡಾ ಮೆಶಿನರಿ ಥಾವ್ನ್ ಹ್ಯಾಚ್ ಭಾಶೆವಿರೋಧ್ ಠಿಕಾ ಚಲೊನ್ ಆಸಾ. ಖುದ್ ಪ್ರದಾನಿ ಮೋದಿ ಸಯ್ತ್ ರೀಲ್ ಕರ್ನ್ ಆಪ್ಣಾಕ್ ಗಾಳಿ ದಿಲ್ಯೊ ಆನಿ ಅಪುಣ್ ಭುರ್ಗ್ಯಾಂಕ್ ಬೊಗ್ಶಿತಾಂ ಮ್ಹಣ್ ಆಪ್ಣಾಚಿ ತೀನ್ ತಿರ್ಕುಟ್ ಜಾಲ್ಲಿ ಮರ್ಯಾದ್ ಪರ್ತ್ಯಾನ್ ಆರಾಂವ್ಕ್ ಪ್ರಯತ್ನ್ ಕರ್ನ್ ಆಸಾ.

ಎದೊಳ್ ಚಲ್ಲೆಲ್ಲ್ಯಾ ಖಂಯ್ಚ್ಯಾಯ್ ಪ್ರದರ್ಶನಾಂತ್ ವಾ ಆಂದೋಲನಾಂತ್ ಪ್ರದರ್ಶನ್‍ಕಾರಿ ಭಾಶೆಚೊ ವಾಪಾರ್ ಬೋವ್ ಸೂಕ್ಶಿಮಾಯೆನ್ ಕರ್ತಾಲೆ. ದೆಶಾಚೊ ಪ್ರದಾನಿ ಜಾಂವ್ ವಾ ಹೆರ್ ಕೊಣೀ ಸರ್ವಾಂಕ್ ಮರ್ಯಾದಿನ್ ಸಂಭೋದನ್ ಕರ್ಚೆಂ ಸ್ವಾಬಾವಿಕ್ ಆಸ್ಲೆಂ. ಪುಣ್ ಹೆಂ ಸಗ್ಳೆಂ ವಯ್ರ್ ಪಂದಾ ಕರ್ನ್ ಸೊಡ್ಲೆಂ ಜೆನ್ – Z ನ್. ಹೆಂ ಜನಾಂಗ್ ತರ್ನೆಂ ತರೀ ಥೊಡ್ಯಾ ಗಜಾಲಿಂನಿ ತಾಂಕಾಂ ಆಸ್ಚಿ ಸ್ಪಶ್ಟತಾ ಮಾಲ್ಘಡ್ಯಾಂಕ್‌ಯೀ ನಾ ಮ್ಹಳ್ಳೆಬರಿ ದಿಸ್ತಾ. ತೆ ಚೊರಾಕ್ ಚೋರ್ ಮ್ಹಣ್ ಶೀದಾ ಸಂಭೋದನ್ ಕರ್ತಾತ್. ಗಾಳಿ ದಿತಾನಾ ಸರ್ವಾಂಕ್ ಏಕ್ ಸಾರ್ಕೆಂ ದಿತಾತ್. ಹಾಂತುಂ ಪ್ರದಾನಿ ವಾ ಮಂತ್ರಿ ಮ್ಹಳ್ಳೊ ಬೇದ್ ನಾಸ್ತಾನಾ. ವಿಚಾರ್ಲ್ಯಾರ್ ‘ಆನಿ ಕಿತೆಂ ಮ್ಹಣಜೆ ಬ್ರೊ… ___’ ಮ್ಹಣಜೆ‌ಗೀ ಮ್ಹಣ್ ಆನಿ ಕಿತೆಂ ತರೀ ಆಮಿ ಲಜೆಂವ್ಚೊ ಸಬ್ದ್ ವಾಪಾರ್ನ್ ಹಾಸ್ತಾತ್. ಚಡಾವಾತ್ Millennials ವಾ ಹೆರ್ ಪಯ್ಲೆಂಚ್ಯಾ ಜನಾಂಗಾಕ್ (Generation) ವಾಪಾರ್ಚಿ ಭಾಸ್ ವಾ ಥೊಡೆಪಾವ್ಟಿಂ ಚುಕೊನ್ ವಾಪಾರ್ಲಲೊ ಸಬ್ದ್‌ಚ್ ಘೆವ್ನ್ ಎಕಾ ಗಜಾಲಿಥಾವ್ನ್ ಬಡ್ಕಾಂವ್ಕ್ ಜಾಂವ್ಚೆಬರಿ ಜೆನ್-Z ಕ್ ಬಡ್ಕಾಂವ್ಕ್ ಜಾಯ್ನಾ. ತೆ ಅಸಲ್ಯಾ ಗಜಾಲಿಂಕ್ ಗುಮಾನ್‌ಚ್ ದೀನಾಂತ್ ಆನಿ ಆಪ್ಣಾಚ್ಯಾ ಮೂಳ್ ಮುದ್ದ್ಯಾಕ್ ಚ್ ಪಾಟಿಂ ವೆತಾತ್. ಆಮ್ಚ್ಯಾ ದೆಶಾಂತ್ ಮಾದ್ಯಮಾಂ – ಚಡಾವತ್ ಟಿ.ವಿ ಮಾದ್ಯಮಾಂ ಸರ್ಕಾರಾನ್ ಸಾಂಗ್ಲೆಬರಿಚ್ ಆಸಾತ್ ಆನಿ ಹರ್ಯೆಕ್ ಪಾವ್ಟಿಂ ಸರ್ಕಾರಾಕ್ ಸಮರ್ಥನ್ ಕರ್ಚೆಂಚ್ ತಾಂಚೆಂ ಕಾಮ್ ಜಾವ್ನ್ ಬದ್ಲಾಲಾಂ ಆಸ್ತಾಂ, ಅಸಲ್ಯೊ ಹೆರ್ ಗರ್ಜೆಭಾಯ್ಲ್ಯೊ ಗಜಾಲಿ ವಾಪಾರ್ನ್ ಲೊಕಾಚಿ ಅಭಿಪ್ರಾಯ್ ಮೊಡ್ಚೆಂ ಪ್ರಯತ್ನ್ ಜೆನ್-Z ಮುಕಾರ್ ನಿರ್ಫಳ್ ಜಾಲೆಂ.

ಚಡಾವತ್ ಸಾಂಪ್ರದಾಯಿಕ್ ಜಾವ್ನ್ ಪ್ರದರ್ಶನಾಂನಿ ದಿಸೊನ್ ಯೆಂವ್ಚೆ ನಾರೆ ಥಂಯ್ ಹಾಂಗಾ ಆಸ್ಲೆ ತರೀ ಹೆರ್ ಸಬಾರ್ ಆಡಳ್ತ್ಯಾಕ್ ಲಜೆಕ್ ಘಾಲ್ಚೆ ವಾ ಮಂತ್ರಿಕ್, ಪ್ರದಾನಿಕ್ ಶೀದಾ ನಾಂವ್ ಕಾಡ್ನ್ ತಮಾಶೆ ಕರ್ಚೆ ವಾ ಸಬಾರ್ ಕಡೆ ಅಶ್ಲೀಲ್ ಜಾವ್ನ್ ಪಿಂತ್ರಾವ್ನ್ ಯೀ slogans ಆನಿ placards ಸರ್ಕಾರಾಕ್ ಲಜೆಕ್ ಘಾಲ್ತಾಲೆ ಮ್ಹಳ್ಳ್ಯಾಕ್ ದುಬಾವ್ ನಾ. ಹೆಂ ಸರ್ವ್ ಪ್ರದರ್ಶನಾಚ್ಯಾ ಜಾಗ್ಯಾರ್ ಮಾತ್ರ್ ನ್ಹಯ್ ಆಸ್ತಾಂ ಜೆನ್-Z ನ್ ಚಡಾವತ್ ವಾಪಾರ್ಚೊ ಸಾಮಾಜಿಕ್ ಜಾಳಿಜಾಗೊ ಇನ್ಸ್ಟಾಗ್ರಾಮ್ ರ್ ಘಡ್ಯೆನ್ ಸಂಸಾರ್ ಭರ್ ಪಾವ್ತಾಲೆ ಆನಿ ಸಬಾರಾಂಕ್ ಪರೋಕ್ಶ್ ರಿತಿನ್ ಹಾಂತುಂ ಮೆತೆರ್ ಜಾಂವ್ಚೆಬರಿ ಕರುಂಕ್ ಪಾವ್ಲೆ.

ತುಮಿ ಅಸಂವಿಧಾನಿಕ್ ಮ್ಹಣಾ ವಾ ಅಶ್ಲೀಲ್; ಪುಣ್ ಹ್ಯಾ ಭಾಶೆನ್ ಪ್ರಧಾನಿ ಮೋದಿನ್ ಪಾಟ್ಲ್ಯಾ ಸಬಾರ್ ವರ್ಸಾಂಥಾವ್ನ್ ಕೊರೊಡಾಂನಿ ಖರ್ಚುನ್ ಆಪ್ಣಾಚಿ ಮ್ಹಣ್ ಲೊಕಾಮನಾಂತ್ ಉಬಾರ್‌ಲ್ಲಿ ಇಮಾಜ್ ಎಕಾ ಹಫ್ತ್ಯಾಬಿತರ್ ಕೊಸ್ಳಾವ್ನ್ ಘಾಲಿ. ಆಮ್ಚೊ ಪ್ರಧಾನಿ ಆಪ್ಣಾಕ್ ದೆವಾನ್ ಸಂಸಾರಾಕ್ ಧಾಡ್ಲಾ ಆನಿ ಆಪುಣ್ ಚ್ ದೇವ್ ಮ್ಹಣ್ಚೆತಿತ್ಲೆ ಮಟ್ಟಾಕ್ ಪಾವ್‍ಲ್ಲ್ಯಾ ತಾಕಾ ಹೊ ಆಘಾತ್ ಕಾಂಯ್ ಇಲ್ಲೊ ನ್ಹಯ್. ಜೆನ್-Z ನ್ ಆಪ್ಲ್ಯಾ memes ಆನಿ ಹೆರ್ ಭಾಶೆಚ್ಯಾ ಅಭಿವ್ಯಕ್ತೆನ್ ಹೆಂ ಸರ್ವ್ ಮಾರ್ನ್ ಕಾಡ್ಲೆಂ. ವೆಕ್ತಿಗತ್ ಜಾವ್ನ್ ಪ್ರಧಾನಿ ಮಾತ್ರ್ ನ್ಹಯ್ ಆಸ್ತಾಂ ಹೊ ಬಿಜೆಪಿ ಸರ್ಕಾರ್ ಬೋವ್ ಸುದೃಡ್ ಆನಿ ಕೊಣೆಂಚ್ ಹಾಲಂವ್ಕ್ ಜಾಯ್ನಾ ಮ್ಹಳ್ಳೆ ತಸ್ಲೆಂ ಭೊಗಪ್ ಆಪ್ಲ್ಯಾ ಮಾದ್ಯಮಾ ಮುಕಾಂತ್ರ್ ದೀವ್ನ್ ಚ್ ಆಯ್ಲಾಂ. ಹ್ಯಾ ಸರ್ಕಾರಾನ್ ಉಗ್ತ್ಯಾನ್ ಸಯ್ತ್ ಸಾಂಗ್ಲಲೆಂ ಆಸಾ ಆಮ್ಚ್ಯಾ ಸರ್ಕಾರಾಂತ್ ರಾಜೀನಾಮೆ ಜಾಯ್ನಾಂತ್ ಮ್ಹಣ್. ಪುಣ್ ಹ್ಯಾ ಆಂದೋಲನಾನ್ ತ್ಯಾ ಹಂಕಾರಾಕ್ ದಿಂಬ್ಯೆರ್ ಹಾಡಯ್ಲೆಂ ಆನಿ ದೀನಾ ಮ್ಹಳ್ಳೊ ರಾಜೀನಾಮೊ ಘೆತ್ಲೊಚ್.

ಸತ್ರಾವ್ಯಾ ಶೆಕ್ಡ್ಯಾಂತ್ ಫ್ರೆಂಚ್ ಕ್ರಾಂತಿ ವೆಳಾರ್ ಥಂಯ್ಚ್ಯಾ ರಾಜ್ ಶಾಹಿ ವಿರೋಧ್‌ಯೀ ಲೋಕ್ ಉಪ್ರಾಟ್ತಾನಾ ಅಶ್ಲೀಲ್ ಪ್ರೊಪೊಗಾಂಡಾಚೊ ಪಾತ್ರ್‌ಯೀ ದಿಸೊನ್ ಯೆತಾ. ರಾಯಾಕ್ ದೆವಾನ್‌ಚ್ ನಮಿಯಾರ್ಚೊ ಆನಿ ರಾಯ್ ರಾಣಿ ಸಾದ್ಯಾ ಮನ್ಶಾಬರಿ ನ್ಹಯ್‌ಚ್ ಮ್ಹಳ್ಳೆಂ ಭೊಗಪ್ ಆಸ್ಲ್ಯಾ ತ್ಯಾ ಕಾಳಾರ್ ರಾಯ್ ಆನಿ ರಾಣ್ಯೆ ವಿಶ್ಯಾಂತ್ ಸಬಾರ್ ಅಶ್ಲೀಲ್ ಗಜಾಲಿ ಛಾಪುನ್ ಲೊಕಾಲಾಗಿಂ ಪಾವೊಂಕ್ ಲಾಗ್ಲ್ಯೊ. ರಾಯಾಕ್ ಸಾದ್ಯಾ ಮನ್ಶಾಕ್ ಉಲ್ಲೇಖ್ ಕೆಲ್ಲೆಬರಿ ಕರ್ಚೆಂ, ರಾಯಾಕ್ ಆನಿ ರಾಣಿಯೆಕ್ ಅಶ್ಲೀಲ್ ಪಿಂತುರಾಂನಿ ಪಿಂತ್ರಾಂವ್ಚೆಂ ಅಶೆಂ ರಾಯಾಕ್ ದೇವ್ ಮ್ಹಳ್ಳೆಥಾವ್ನ್ ಮನ್ಶ್ಯಾರುಪಾರ್ ದಾಕವ್ನ್ ಲೊಕಾಕ್ ರಾಯ್‌ಯೀ ಆಮ್ಚೆಬರಿ ಸಾದೊ ಮನಿಸ್‌ಚ್ ಮ್ಹಳ್ಳೆಂ ಭೊಗಪ್ ವಾಡೊನ್ ಆಯ್ಲೆಂ. ಹಾಂತುಂ ರಾಯ್ ರಾಣ್ಯೆವಿಶ್ಯಾಂತ್ಲ್ಯೊ ಸಬಾರ್ ಗಜಾಲಿ – ಜಶೆಂ ರಾಯಾಕ್ ಭುರ್ಗಿಂ ಜಾಂವ್ಚಿ ಸಕತ್ ನಾ ಆನಿ ರಾಣ್ಯೆಕ್ ಜಾಲ್ಲಿಂ ಭುರ್ಗಿಂ ಕೊಣ್ ಕೊಣಾಚಿಂ, ರಾಣ್ಯೆಕ್ ಸಬಾರ್ ಅಶ್ಲೀಲ್ ಪಿಂತುರಾಂನಿ ಪಿಂತ್ರಾವ್ನ್ ತೆಂಚ್ ಸತ್ ಮ್ಹಣ್ ಪಾಚಾರ್ಚೆಂ ಹ್ಯೊ ಸರ್ವ್ ಫಟಿ ಗಜಾಲಿ ತರೀ ರಾಯ್ ರಾಣ್ಯೆ ವಿಶಾಂತ್ ದೇವ್‍ಪಣಾಚಿ ಇಮಾಜ್ ಲೊಕಾಮನಾಥಾವ್ನ್ ಕಾಡ್ನ್ ಉಡೊಂಕ್ ಸಾಧ್ಯ್ ಜಾಲೆಂ. ಹೆಂಚ್ ಮುಕಾರುನ್ ತ್ಯಾ ರಾಜ್ ಶಾಹಿಕ್ ಧೆಸ್ವಾಟುಂಕ್ ಸಕ್ಲೆಂ ರಾಯ್ ರಾಣ್ಯೆಚೆಂ ಅಂತ್ ಧಾರುಣ್ ಜಾಂವ್ಕ್ ಪಾವ್ಲೆಂ.

ಫ್ರೆಂಚ್ ಕ್ರಾಂತೆಂತ್ಲ್ಯಾ ಭಾಶೆಂತ್ ಕಾಂಯ್ ಥೊಡ್ಯಾ ಫಟಿಂಚಿ ಮಜತ್ ಆಸ್ಲಿ ತರೀ ಹಾಂಗಾ ತಾಚಿ ಗರ್ಜ್ ನಾ. ಕಾಂಯ್ ಥೊಡ್ಯಾ ಪಾಟ್ಲ್ಯಾ ವರ್ಸಾಂನಿ ಆಮಿ ನಿಜಾಕೀ ಪರ್ಜೆರಾಜಾಂತ್ ಆಸಾಂವ್ ಗೀ ವಾ ಕಾಂಯ್ ರಾಜ್ ಶಾಹಿಂತ್  ಆಸಾಂವ್ ವಾ ತಾಚ್ಯಾಕೀ ವರ್ತ್ಯಾನ್ ದೇವ್ ರಾಜಾಂತ್ ಆಸಾಂವ್ ಮ್ಹಳ್ಳೆಬರಿ ಆಪ್ಣಾಕ್‌ಚ್ ದಾಕೊಂವ್ಕ್ ಲಾಗ್‌ಲ್ಲ್ಯಾ ಸರ್ಕಾರಾಕ್ ಆನಿ ಮೋದಿಕ್ ಹೊ ಆಘಾತ್ ಸಾಮಾನ್ಯ್ ನ್ಹಯ್. ಹೆಂ ಸರ್ವ್ ಆಪ್ಣಾಚ್ಯಾ ಹಾತಾಂತ್ಲೆಂ ಚುಕೊನ್ ವೆತಾ ಕೊಣ್ಣಾ ಮ್ಹಣ್ ಸಮ್ಜೊನ್‌ಚ್ ರಾತಿಂ 12 ವೊರಾರ್ ಪ್ರಧಾನಿ ಮೋದಿ ಇನ್ಸ್ಟಾಗ್ರಾಮಾರ್ ಆಪುಣ್‌ಚ್ ರೀಲ್ ಕರ್ನ್ ಘಾಲ್ತಾ ತೆಂ ತಾಕಾ ಜಾಲ್ಲ್ಯಾ ಆಘಾತಾಕ್ ದಾಕಯ್ತಾ. ಹ್ಯಾ ವರ್ವಿಂ ಆಖ್ರೇಕ್ ಏಕ್ ತರೀ ಪ್ರಯತ್ನ್ ಕರ್ನ್ ಮಂತ್ರಿಚೊ ರಾಜೀನಾಮೊ ಚುಕಂವ್ಚೆಂ ಪ್ರಯತ್ನ್ ತಾಣೆಂ ಕೆಲೆಂ. ಪುಣ್ ಹಾಂವೆಂ ಪಯ್ಲೆಂಚ್ ಸಾಂಗ್ಲೆಬರಿ ಜೆನ್ – Z ಚಿ ವೈಚಾರಿಕ್ ಸ್ಪಶ್ಟತಾ ಹ್ಯಾ ಪ್ರಯತ್ನಾಕ್‌ಯೀ ನಿರ್ಫಳ್ ಕರ್ತಾ.

ಉಲೊಂವ್ಚಿ ಭಾಸ್, ವಾಪಾರ್ಚೆ ಸಬ್ದ್ ವಿಶಿಶ್ಟ್ ಹಾತೆರ್. ಭಾಶೆಚೊ ವಾಪಾರ್ ಮನ್ಶಾಕ್ ದೇವ್ ಕರುಂಕ್ ಸಕ್ತಾ ತರ್ ದೆವಾಕ್ ಮನಿಸ್ ಕರುಂಕ್‌ಯೀ ಸಕ್ತಾ. ಆಪ್ಲ್ಯಾ ಭೊಂವಾರಿ ಮಾಧ್ಯಮಾಕ್ ವಾಪಾರ್ನ್ ಹ್ಯಾಚ್ ಭಾಶೆಚ್ಯಾ ಬಳಾನ್ ಆಪ್ಣಾಕ್‌ಚ್ ದೇವ್ ಕರ್ನ್ ಘೆತ್‌ಲ್ಲ್ಯಾ ಮೋದಿಕ್ ಆಪ್ಣೆಂ ವಾರ‍್ಯಾರ್ ಬಾಂದುನ್ ದವರ್ಲಲ್ಯಾ ರಾವ್ಳೆರಾಚ್ಯೊ ವೊಣ್ತಿ ಘಡ್ಯೆನ್ ಫುಟ್ ಯೇವ್ನ್ ಕೊಸ್ಳೊನ್ ಪಡ್ಚೆಂ ಪಾರ್ಕಿಲ್ಲೆಂ ಆನಿ ತ್ಯಾ ದೆಕುನ್ ಸದ್ದ್ಯಾಕ್ ತರೀ ಹಾಂತ್ಲೆಂ ಭಾಯ್ರ್ ಯೇಜೆ ಮ್ಹಣ್ ಮಂತ್ರಿಚೊ ರಾಜೀನಾಮೊ ಘೆತ್ಲೊ ಮ್ಹಳ್ಳೆಂ ಸ್ಪಷ್ಟ್ ಜಾತಾ. ಆಪ್ಣಾಕ್ ದೇವ್ ಕಶೆಂ ದಾಕಂವ್ಕ್ ಪ್ರಯತ್ನ್ ಕರ್ಚ್ಯಾ ಪ್ರಧಾನಿಕ್ ಇನ್ಸ್ಟಾಗ್ರಾಮಾರ್ ರೀಲ್ ಕರುಂಕ್ ಲಾಯಿಲ್ಲೆಂ ವ್ಹಡ್ ಸಾಧನ್‍ಚ್ ಸಯ್.

ಸದ್ದ್ಯಾಕ್ ಆಮ್ಕಾಂ ಜೀಕ್ ಮೆಳ್ಳ್ಯಾ ಮ್ಹಣ್ ನಿದೊನ್ ಪಡ್ಲ್ಯಾರ್ ಖಂಡಿತ್ ಮುಕ್ಲೆ ದೀಸ್ ಕಶ್ಟಾಂಚೆ ಆಸ್ತಲೆ. ಎದೊಳ್ ಮ್ಹಣಾಸರ್ ವಿರೋಧ್ ಆವಾಜಾಕ್ ಬಳಾನ್ ವಾ ಧರ್ಮಾಚ್ಯಾ ಉನ್ಮಾದಾನ್ ಲೊಕಾಕ್ ಬಡ್ಕಾವ್ನ್ ವಾ ಇತರ್ ಹಾತೆರಾಂನಿ ಚಿರ್ಡುಂಕ್ ಪಳೆಲ್ಲೆಂ ತೆಂ ಹ್ಯಾ ಆಂದೋಲನಾಂತ್ ಯಶಸ್ವಿ ಜಾಂವ್ಕ್ ನಾ ತರೀ ಖಂಡಿತ್ ಜಾವ್ನ್ ಹಾಕಾ ಮುಕಾರಿಂ ಕಶೆಂ ಫುಡ್ ಕರ್ಚೆಂ ಮ್ಹಣ್ ಆಡಾಳ್ತ್ಯಾನ್ ಎದೊಳ್‌ಚ್ ಚಿಂತಪ್ ಆಟಂವ್ಕ್ ಸುರು ಕೆಲಾಂ ಆಸ್ತಲೆಂ. ಹೆರ್ ಚಡಾವತ್ ಸಮಾಜಿಕ್ ಜಾಳಿಜಾಗ್ಯಾಂನಿ ಬಿಜೆಪಿ IT Cell ಚೊ ಪ್ರಭಾವ್ ಚಡ್ ಆಸಾ ಆನಿ ಜೆನ್-Z ಹಾಂತುಂ ನ್ಹಯ್ ಕೇವಲ್ ಇನ್ಸ್ಟಾಗ್ರಾಮಾರ್ ಆಸಾ ಮ್ಹಣ್ ಸಮ್ಜಲ್ಲೆಂಚ್ ಪ್ರಧಾನಿನ್ ಖುದ್ ರೀಲ್ಸ್ ಕರುಂಕ್ ಸುರು ಕೆಲಾಂ ಮಾತ್ರ್ ನ್ಹಯ್ ಆಪ್ಲ್ಯಾ ಮಂತ್ರಿಂಕ್‌ಯೀ ಇನ್ಸ್ಟಾಗ್ರಾಮ್ ವಾಪ್ರುಂಕ್ ಆನಿ ಸಕ್ರಿಯ್ ಜಾಂವ್ಕ್ ಸುಚನ್ ದಿಲಾಂ. ಅಶೆಂ ಮ್ಹಣ್ತಾನಾ ಮುಕ್ಲ್ಯಾ ದಿಸಾನಿ IT Cell ಹಾಂತುಂಯ್ ಸಕ್ರಿಯ್ ಜಾತಲೆಂ ಆನಿ ಆಪ್ಲೆಂ ಪ್ರೊಪಗಾಂಡಾ ವಿಸ್ತಾರುಂಕ್ ಆನಿ ಫಟಿ ಹ್ಯಾ ಮಾದ್ಯಮಾ ಮುಕಾಂತ್ರ್‌ಯೀ ಬಳಾನ್ ಪ್ರಚಾರುಂಕ್ ಲಾಗ್ತಲೆಂ. ಎದೊಳ್ ಚ್ ಪ್ರಧಾನಿ ರೀಲ್ಸ್ ಕರ್ನ್ ಜೆನ್-Z ಕ್ ಆಪ್ಣಾ ಕುಶಿನ್ ವೊಡುಂಕ್ ಪ್ರಯತ್ನ್ ಕರ್ನ್ ಆಸಾ ಪುಣ್ ತೆಂ ತಿತ್ಲೆಂ ಸುಲಬಾಯೆಚೆಂ ನ್ಹಯ್ ತರೀ ತಾಚೆಂ ಪ್ರಯತ್ನ್ ತೊ ಮುಕಾರುನ್ ಆಸಾ. ಸದ್ದ್ಯಾಕ್ ಏಕ್ ರೀಲ್ ಕರ್ನ್ ತೊಯೀ ಹ್ಯಾಚ್ ಭಾಶೆವಿಶ್ಯಾಂತ್ ಉಲೊನ್ ಆಸಾ. ಭುರ್ಗ್ಯಾಂನಿ ಮ್ಹಾಕಾ ಗಾಳಿ ದಿಲ್ಯೊ, ಪಾಡ್ ಭಾಶೆನ್ ಉಲಯ್ಲಿಂ ಪುಣ್ ಆಪುಣ್ ತಾಂಕಾ ಬೊಗ್ಶಿತಾಂ ಅಶೆಂ ಮ್ಹಣ್ ಭುರ್ಗ್ಯಾಂಚೆಂ ನ್ಹಯ್ ತರೀ ತಾಂಚ್ಯಾ ವ್ಹಡಿಲಾಂಚೆಂ ಮನ್ ತರೀ ಭಾವನಾತ್ಮಕ್ ಜಾವ್ನ್ ಜಿಕ್ಚೆಂ ಪ್ರಯತ್ನ್ ಕರ್ನ್ ಆಸಾ ಮ್ಹಣ್ ಭೊಗ್ತಾ. ಮುಕ್ಲ್ಯಾನ್ ಅಶೆಂ ಮ್ಹಣ್ತಾ ತರೀ ಆಡಳ್ತ್ಯಾನ್ ಆಜೂನ್ ಭುರ್ಗ್ಯಾಂವಯ್ರ್ ಘಾಲ್ಲ್ಯೊ ಕೆಜಿ ಪಾಟಿ ಕಾಡಿನಾಸ್ತಾಂ ಭುರ್ಗ್ಯಾಂಕ್ ಸಮಾಜಿಕ್ ವಿರೋಧ್ ಸಕ್ತ್ಯೊ ಮ್ಹಣ್ ದಾಕಂವ್ಚೆಂ ಪ್ರಯತ್ನ್ ಕರ್ನ್ ಆಸಾ ತೆಂ ಸ್ಪಶ್ಟ್ ದಿಸೊನ್ ಆಸಾ.

ಭಾಸ್ ದೆವಾಕ್ ಮನಿಸ್ ಕರುಂಕ್ ಸಕ್ತಾ ತರ್ ಮನ್ಶ್ಯಾಕ್ ಮನ್ಶ್ಯಾ ವೆತಿರಿಕ್ತ್ ಕಿಡಿ ಕಶೆಂ ಪಿಂತ್ರಾಂವ್ಕ್ ಯೀ ಸಕ್ತಾ ಮ್ಹಳ್ಳೆಂಯ್ ಆಮಿ ಸಮ್ಜೊಂಚಿ ಗರ್ಜ್. ಜರ್ಮನಿಂತ್ ಹಿಟ್ಲರಾಚ್ಯಾ ನಾಜಿನ್ ಜುದೆವಾಂಚೊ ಸಂಹಾರ್ ಕರ್ಚ್ಯಾ ಪಯ್ಲೆಂ ಜುದೆವಾಂಕ್ ಮನಿಸ್‌ಚ್ ನ್ಹಯ್ ಮ್ಹಳ್ಳೆಬರಿ ಪಿಂತ್ರಾಯಿಲ್ಲೆಂ. ಲೊಕಾಕ್ ಕಿಡೆ, ವ್ಹಾಳಯ್ ಅಶೆಂ ಮ್ಹಳ್ಳೆಂ ವಾಚುಂಕ್ ಮೆಳ್ತಾ. ಹಿ ವಾಳಯ್ ಆಮ್ಚ್ಯಾ ದೆಶಾಕ್ ಪೊಕೊಳ್ ಕರ್ನ್ ಆಸಾ, ಹ್ಯೊ ಕಿಡಿ ಆಮ್ಚ್ಯಾ ದೆಶಾಕ್ ವಾಯ್ಟ್ ಅಶೆಂ ಸಾಂಗೊನ್ ಸಾಂಗೊನ್ ಸಾದ್ಯಾ ಲೊಕಾಮದೆಂ ಮನೋವೈಜ್ಞಾನಿಕ್ ಜಾವ್ನ್ ತ್ಯಾ ಲೊಕಾಕ್ ಮಾರ್ಲ್ಯಾರ್ ಕಾಂಯ್ ವ್ಹಡ್ ನ್ಹಯ್ ತಾಂಚೊ ನಾಸ್ ಗರ್ಜ್ ಮ್ಹಳ್ಳೆಂ ಭೊಗಪ್ ವಾಡಶೆಂ ಕೆಲ್ಲೆಂ. ಆಯ್ಲೆವಾರ್ ಬಿಜೆಪಿ ಅದ್ಯಕ್ಶ್ ನಿತಿನ್ ನವೀನ್ ಜಂತರ್ ಮಂತರಾಂತ್ಲ್ಯಾ ಆಂದೋಲನ್ ಕಾರಿಂಕ್ ವಾಳಯ್ ಮ್ಹಣ್ತಾ. ಬಿಜಿಪಿ ಸಂಸದ್ ಕಂಗನಾ ರಣಾವತ್ ಹ್ಯಾ ಜನಾಂಗಾಕ್‌ಚ್ ಗಟರ್ ಮ್ಹಣ್ತಾ. ಹ್ಯೊ ಥಂಯ್ ಹಾಂಗಾ ಜಾಂವ್ಚ್ಯೊ ಸಾದ್ಯೊ ಗಜಾಲಿ ಮ್ಹಣ್ ನಿರ್ಲಕ್ಶ್ಯಾ ಕರ್ನಾಸ್ತಾಂ ಹಾಚೆವಿರೋಧ್ ಬಳಾನ್ ಆವಾಜ್ ಕರುಂಕ್ ಜಾಯ್. ದೆವಾಕ್ ಮನಿಸ್ ಕೆಲ್ಲ್ಯಾ ಆಮಿ ಪರ್ತ್ಯಾನ್ ತಾಕಾ ದೇವ್ ಕರ್ಚೊಯ್ ನ್ಹಯ್ ಆನಿ ಆಮಿ ಮನ್ಶ್ಯಾಥಾವ್ನ್ ಕ್ರಿಮಿ ಕೀಟ್ ಜಾಂವ್ಚೆಂಯ್ ನ್ಹಯ್ ಮ್ಹಳ್ಳೆಂ ಉಡಾಸಾಂತ್ ದವರ್ಚೆಂ ಗರ್ಜೆಚೆಂ.

■ ವಿಲ್ಸನ್ ಕಿನ್ನಿಗೋಳಿ