ಸುರತ್ಕಲ್ ಕಾಟಿಪಳ್ಳ ಫಿರ್ಗಜೆಚೊ ಮಾಲ್ಘಡೊ ಲೇಖಕ್ ಆನಿ ಕಥಾಕಾರ್ ಹೆನ್ರಿ ಡಿ ಸೊಜಾ ಹಾಂಚ್ಯಾ ಮಟ್ವ್ಯಾ ಕಾಣಿಯಾಂಚೊಂ ದುಸ್ರೊ ಜಮೊ ಸಗ್ಳೆಂ ಜಾಂವ್ಚೆಂ ಬರ್ಯಾಕ್ ಸುಟ್ಕೆ ಪರ್ಬೆ ದಿಸಾ ಫಿರ್ಗಜೆಚ್ಯಾ ಕಥೊಲಿಕ್ ಸಭಾ ಘಟಕಾನ್ ದೇರಳಕಟ್ಟೆ ಡೆ ಮರ್ಸಿಡೇ ಭುರ್ಗ್ಯಾಂಚ್ಯಾ ಘರ್ಚ್ಯಾ ಸಭಾಸಾಲಾಂತ್ ಮಾಂಡುನ್ ಹಾಡ್ಲೆಲ್ಯಾ ಕಾರ್ಯಾಂತ್ ಘರ್ಚಿ ವ್ಹಡಿಲ್ನ್ ಭ| ಲೂಸಿಯಾನಾ ಹಿಣೆ ಉಗ್ತಾಯ್ಲೊ.
2019 ವ್ಯಾ ವರ್ಸಾ ಹೆನ್ರಿ ಡಿ ಸೊಜಾ ಕಾಟಿಪಳ್ಳ ಹಾಂಚೊ ‘ತ್ಯಾಗ್, ಮೋಗ್ ಆನಿ ಕಾಣಿಕ್’ ಕಥಾ ಪುಂಜೊ ಕಲಾಸಾಗರ್ ಪ್ರಕಾಶನಾನ್ ಫಾಯ್ಸ್ ಕೆಲ್ಲೊ. ಪ್ರಸ್ತುತ್ ‘ಸಗ್ಳೆಂ ಜಾಂವ್ಚೆಂ ಬರ್ಯಾಕ್’ ತಾಂಚ್ಯಾ ಕಾಣಿಯಾಂಚೊಂ ದುಸ್ರೊ ಪುಂಜೊ ಆಸುನ್ ಹೊ ಬೂಕ್ ಕಿಟಾಳ್ ಪ್ರಕಾಶನಾನ್ ‘ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ’ ಪುಸ್ತಕ್ ಅನುದಾನ್ ಯೆವ್ಜಣೆಖಾಲ್ ಫಾಯ್ಸ್ ಕೆಲಾ.
ಹ್ಯಾ ಬುಕಾಂತ್ ಗಾಂವ್ಚೆಂ ಕೃಷಿ ಜಿವಿತ್, ಬೊಂಬಯ್ ಮ್ಹಾಶೆರಾಚಿ ಗಡ್ದಿ ಆನಿ ಸಂಘರ್ಶಾನ್ ಬರ್ಲೆಲಿ ವೆಸ್ತ್ ಜಿಣಿ, ಗಲ್ಪಾಚ್ಯಾ ಜೋಡಿನ್ ಬದ್ಲಲ್ಲಿಂ ಗಾಂವ್ಚಿಂ ಕುಟ್ಮಾಂ ಆನಿ ಜಿವಿತ್, ಪ್ರಾಯ್ವಂತಾಚ್ಯಾ ಘರಾಕ್ ಪಾವ್ಲೆಲಿಂ ಮಾಲ್ಘಡಿಂ, ಆಧುನಿಕ್ ಸವಯಾಂಕ್ ಬಲಿ ಜಾವ್ನ್ ಜಿವಿತ್ ಪಿಡ್ಡ್ಯಾರ್ ಕರುನ್ ಘೆಂವ್ಚಿಂ ಭುರ್ಗಿಂ ಆನಿ ಕುಟ್ಮಾಂಚಿಂ ದೆಸ್ವಾಟ್ – ಹ್ಯಾ ವಿಶಯಾಂಚೇರ್ ಸಾದ್ಯಾ ಭಾಶೆನ್, ಸರಳ್ ಕಥನ್ ಶಯ್ಲಿ ವಾಪಾರುನ್ ಬರಯಿಲ್ಲ್ಯೊ ಪಂಚ್ವೀಸ್ ಕಾಣಿಯೊ ಆಸಾತ್.
ಬೂಕ್ ಉಗ್ತಾವ್ನ್ ಉಲಯಿಲ್ಲ್ಯಾ ಭ| ಲೂಸಿಯಾನಾ ಹಿಣೆ “ವ್ಹಡಾಂನಿ ಮಾತ್ ನಯ್, ತರ್ಯಾಟ್ಯಾಂನೀಯ್ ಹೋ ವಾಚುನ್ ನಿಯಾಳಿಜೆ ಜಾಲ್ಲೊ ಬೂಕ್. ಕಾಣಿಯೊ ಜಿವಿತಾ ವಿಶ್ಯಾಂತ್ ನಿಯಾಳುಂಕ್ ಆಮ್ಕಾಂ ಏಕ್ ಅವ್ಕಾಸ್ ಕರುನ್ ದಿತಾತ್” ಮ್ಹಣ್ ಅಭಿಪ್ರಾಯ್ ಉಚಾರ್ಲಿ ಆನಿ ಲೇಖಕ್ ಹೆನ್ರಿ ಡಿ ಸೊಜಾಚ್ ಬರೆಂ ಮಾಗ್ಲೆಂ ತಶೆಂಚ್ ಕಾರ್ಯೆಂ ಮಾಂಡುನ್ ಹಾಡ್ಲೆಲ್ಯಾ ಕಥೊಲಿಕ್ ಸಭೆಕ್ ಶಾಭಾಸ್ಕಿ ದಿಲಿ.
ಹ್ಯಾ ಸುವಾಳ್ಯಾರ್ ಆಮ್ಚೊ ಸಂದೇಶ್ ಪತ್ರಾಚೊ ಸಂಪಾದಕ್ ವಿಲ್ಫ್ರೆಡ್ ಲೋಬೊ, ಕಾಟಿಪಳ್ಳ ಫಿರ್ಗಜೆಚೊ ಉಪಾಧ್ಯಕ್ಷ್ ವಿಲ್ಫ್ರೆಡ್ ಫೆರ್ನಾಂಡಿಸ್, ಕಥೊಲಿಕ್ ಸಭಾ ಅಧ್ಯಕ್ಷ್ ಫೆಲಿಕ್ಸ್ ಮಿನೇಜಸ್ ವೆದಿರ್ ಹಾಜರ್ ಆಸ್ಲೆ.
ಪ್ರಕಾಶಕ್ ಎಚ್ಚೆಮ್ ಪೆರ್ನಾಲ್ ಹಾಣೆ ಬುಕಾಚಿ ಒಳಕ್ ಕರುನ್ ದೀವ್ನ್ ಸಯ್ರ್ಯಾಂಕ್ ಯೆವ್ಕಾರ್ ಮಾಗ್ಲೊ. ಲೇಖಕ್ ಹೆನ್ರಿ ಡಿ ಸೊಜಾ ಹಾಣಿ ಉಪ್ಕಾರ್ ಭಾವುಡ್ಲೊ. ಶಿಕ್ಶಕಿ ಜೆಸಿಂತಾ ಡಿ ಸೊಜಾ ಹಿಣೆ ಕಾರ್ಯೆಂ ಚಲವ್ನ್ ವೆಲೆಂ.
