ವಿದೇಶಿ ದೆಣ್ಗಿ ನಿಯಂತ್ರಣ್ ಕಾನೂನ್ ದುರುಸ್ತಿ ವಿಧೆಯಕ್ 2025 ಹೆಂ 2026 ಪಾವ್ಸಾಳ್ಯಾ ಅಧಿವೇಶನಾಂತ್ ಮಾಂಡುಂಕ್ ಮೋದಿ ಸರ್ಕಾರ್ ದಡ್ಬಡ್ತಾಲೊ. ತರೀ, ವಿರೋಧಿ ಪಕ್ಶಾಂನಿಂ ತಶೆಂ ಕರುಂಕ್ ಸೊಡ್ಲೆಂ ನಾಂ. ಆತಾಂ ಹೆಂ ಬಿಲ್ಲ್ ಜೋಡ್ ಪಾರ್ಲಿಮೆಂಟರಿ ಸಮಿತಿ (ಜೆಪಿಸಿ) ಚ್ಯಾ ತಾಬೆನ್ ದಿಲಾಂ.
ಸಬಾರ್ ಕಾರಣಾಂಕ್ ಲಾಗೊನ್, ಹ್ಯಾ ಬಿಲ್ಲಾಚಿ ಠಿಕಾ ಚಲ್ತಾ. ಪೈಲ್ಯೆ ಸುವಾತೆರ್ ಪಾರದರ್ಶಕತಾಯೆಚಿ ಮಾಗ್ಣಿ ಆಸಾ. ದುಸ್ರೆಂ, ಕಾರ್ಯಾಕಾರೀ ಶಾಖೆಕ್ ವ್ಯಾಪಕ್ ಅಧಿಕಾರ್ ದಿತಾ. ತಿಸ್ರೆಂ, ನಾಗರಿಕ್ ಸಮಾಜ್ಯಾಚ್ಯಾ ಕಾಮ್ಕಾಜ್ ಆನಿಂ ಆಸ್ತಿಂಚ್ಯೆರ್ ಸರ್ಕಾರಿ ದೇಖ್ರೇಖ್ ವಾಡಯ್ತಾ.
ಕಾನೂನಾಚೊ ಉದ್ದೇಸ್ ಕೇವಲ್ ಪರ್ಕಿ ನಿಧಿ ನಿಯಂತ್ರಿತ್ ಕರ್ಚೊ ನಹಿಂ. ಬದ್ಲೆಕ್ ಸ್ವತಂತ್ರ್ ಸಂಸ್ಥ್ಯಾಂಚ್ಯೆರ್, ಖಾಸ್ ಕರ್ನ್ ಪಾಟಿಂ ಲೊಟ್ಲೆಲ್ಯಾಂ ಸಮೂದಾಯಾಂಚಿ ಆನಿಂ ಅಲ್ಪ್ಸಂಖ್ಯಾಂಚ್ಯಾಂಚಿ ಸೇವಾ ಕರ್ತೆಲ್ಯಾಂ ಸಂಸ್ಥ್ಯಾಂಚ್ಯೆರ್, ರಾಜ್ವಟ್ಕೆಚ್ಯೆಂ ನಿಯಂತ್ರಣ್ ಮಜ್ಬೂತ್ ಕರ್ಚೊ.
ಮುಖೆಲ್ ಠಿಕಾ:
1. ಫಾವೊತ್ಯೆ ನೀತಿ ಪ್ರಕ್ರಿಯೆವಿಣೆಂ ಆಸ್ತಿ ಹಸ್ತಾಂತರ್: ಹೆಂ ಬಿಲ್ಲ್ ಏಕ್ “ನಾಮನಿತೀಕೃತ್ ಪ್ರಾಧಿಕರಣ್” ಸ್ಥಾಫಿತ್ ಕರ್ತಾ. ಬೆಸರ್ಕಾರಿ ಸಂಸ್ಥಾಂಚಿಂ ನೊಂದ್ಣಿ ರದ್ದ್ ಕೆಲ್ಯಾರ್/ಜಾಲ್ಯಾರ್, ಸೊಡುನ್ ದಿಲ್ಯಾರ್, ವ ಸಂಪ್ಲ್ಯಾರ್, ತಾಂಚಿ ಆಸ್ತ್ ತಾತ್ಕಾಳಾಕ್ ವ ಕಾಯಾಮ್ ಆಪ್ಲ್ಯೆ ತಾಬೆನ್ ಘೆಂವ್ಕ್ ಅಧಿಕಾರ್ ದಿತಾ.
ಪರ್ಕಿ ನಿಧಿ ವಾಪ್ರುನ್ ಉಭಿ ಕೆಲ್ಲಿಂ ಇಸ್ಕೊಲಾಂ, ಅಸ್ಪತ್ರ್ಯೊ, ಆಶ್ರಮಾಂ, ಅಸಲೆ ವೆವಸಾಯ್ ತ್ಯಾ ಪ್ರಾಧಿಕರಣಾ ಕಡೆಂ ವಚೊಂಕ್ ಸಾಧ್ಯ್ ಆಸಾ. ಕೊಡ್ತಿಂಚೊ ನಿರ್ಣಯ್ ಘರ್ಜ್ ನಾಂ. ಸರ್ಕಾರಿ ಹಾಂತಾಂಕ್ ಪಡ್ತಚ್, ಹೆ ಸಂಸ್ಥೆ ಏಕತ್ರಿತ್ ನಿಧಿಂತ್ ಹಸ್ತಾಂತರ್ ಜಾತೆಲೆ.
ಆಸ್ತಿ ತಾಬೆನ್ ಘೆಂವ್ಚ್ಯಾಪೈಲೆಂ ಕಾನೂನಿ ಸುನಾವ್ಣೆಚಿ ಗರ್ಜ್ ನಾಂ. ನೊಂದ್ಣಿ ನವ್ಯಾನ್ ಮೆಳೊಂಕ್ನಾಂ ತರ್ ಆಸ್ತಿ ಹಸ್ತಾಂತರ್ ಜಾಂವ್ಚ್ಯಾ ಪೈಲೆಂ ಕಾಂಯ್ ಆಯ್ಕೊನ್ ಘೆವ್ಪಾಚಿ ಪ್ರಕ್ರಿಯಾ ನಾಕಾ-ಗೀ? ಆಸ್ತಿ ಜಪ್ತ್ ಜಾಲ್ಯಾ ಉಪ್ರಾಂತ್, ಅಪಿಲಾಚೆಂ ಹಕ್ಕ್ ಕಸ್ಲ್ಯಾ ಫಾಯ್ದ್ಯಾಚ್ಯೆಂ?
ಸಂಸ್ಥೊ ಪ್ರಸ್ತುತ್ ದೇಸಿ ನಿಧಿಂಚ್ಯೆರ್ ಆಧಾರಿತ್ ಅಸಾ, ತರೀ ಆದಿಂ ಮಾಗಾಂ, ವಿದೇಸಿ ದಾನ್ ವಾಪ್ರುನ್ ಉಬೊ ಕೆಲ್ಲ್ಯೊ ಆಸ್ತಿ ದೆಕುನ್ ಹಸ್ತಾಂತರ್ ಜಾಂವ್ಕ್ ಸಕ್ತಾತ್. ಹಿ ಖಂತ್ ಕ್ರಿಸ್ತಾಂವ್ ಸಂಸ್ಥ್ಯಾಂಕ್ ಧೊಸ್ತಾ.
ಕಾನೂನ್ ತಜ್ಞ ಹೆಂ ಕಾರ್ಯಾಕಾರಿ ಶಾಖೆನ್ ಕರ್ಚ್ಯೆಂ ಅತಿರೀಕ್ ಮೇಟ್ ಮ್ಹಣ್ತಾತ್. ನೈಸರ್ಗಿಕ್ ನೀತಿಚ್ಯಾಂ ತತ್ವಾಂ ವಿರುದ್ಧ್ ಮ್ಹಣ್ತಾತ್. ತಶೆಂಚ್, ಸಾಂವಿಧಾನಿಕ್ ಕೊಲಮ್ 19 (1) (c) (ಸಂಘಟನ್ ಕರ್ಪಾಚ್ಯೆಂ ಸ್ವಂತಂತ್ರ್) ಅನಿಂ ಕೊಲಮ್ 300 (A) ಆಸ್ತಿಂಚ್ಯೆಂ ಹಕ್ಕ್ ಹಾಂಚ್ಯಾ ವಿರುದ್ಧ್ ವೆತಾ.
2. ಅಲ್ಪ್-ಸಂಖ್ಯಾಕಾಂ ಆನಿಂ ಹಕ್ಕ್ ಆಧಾರಿತ್ ಬೆಸರ್ಕಾರಿ ಸಂಸ್ಥಾಂಚೇರ್ ವ್ಹಡ್ ಮಾಫಾಚೊ ಪರಿಣಾಮ್: ಹಕ್ಕ್ ಗಟಾಂನಿಂ ಕೆಲ್ಲ್ಯಾ ಸಂಶೊಧನಾಂ ಪ್ರಮಾಣೆಂ, ಅಲ್ಪ್-ಸಂಖ್ಯಾಕಾಂ ಹಕ್ಕಾಂ ಖಾತಿರ್, ಪಾಟಿಂ ಉರ್ಲೆಲ್ಯಾಂಚ್ಯಾ ವಿಕಾಸಾ ಖಾತಿರ್, ಅಭಿಪ್ರಾಯೆಚ್ಯೆಂ ಸ್ವತಂತ್ರ್, ಪರ್ಯಾವರಣ್ ಆನಿಂ ಹವಾಮಾನ್ ಸಾಂಬಾಳ್ನ್ ವರೊಂಕ್ ಝುಜ್ಚ್ಯಾ ಸಂಸ್ಥ್ಯಾಚ್ಯೆರ್ ಅಧಿಕ್ ಪ್ರಮಾಣಾಚೊ ಪರಿಣಾಮ್ ಪಡ್ತಲೊ.
ಅಲ್ಪ್-ಸಂಖ್ಯಾಕಾಂನಿಂ ಚಲಂವ್ಚ್ಯೆ ಸಂಸ್ಥೆ -ಪ್ರತ್ಯೇಕ್ ಜಾವ್ನ್ – ಇಸ್ಕೊಲಾಂ, ಆಸ್ಪತ್ರ್ಯೊ, ಆನಿಂ ಅನಾಥಾಶ್ರಮಾಂ – ಹ್ಯಾ ಬಿಲ್ಲಾ ವರ್ವಿಂ ಸಂವಿಧಾನಾನ್ ದಿಲ್ಲ್ಯಾಂ ಹಕ್ಕಾಂಚ್ಯೆರ್ ಸಾರ್ಕಾರಿ ಹಸ್ತಕ್ಶೇಪ್ ಜಾತಲೊ ಮ್ಹಳ್ಳೆಂ ಭ್ಯೆಂ ಉಟ್ಲಾಂ.
ಕಥೊಲಿಕ್ ಬಿಸ್ಪಾಂಚ್ಯಾ ಮಹಾಮಂಡಳಾನ್ ಹ್ಯಾ ಬಿಲ್ಲಾಕ್ ‘ಧೊಕೆಭಾಜಿ’ ಆನಿಂ ‘ಚಿಂತಾಜನಕ್’ ಮ್ಹಳಾಂ. ಅಲ್ಪ್-ಸಂಖ್ಯಾಕಾಂನಿಂ ಚಲಂವ್ಚ್ಯಾ ಶೈಕ್ಷಣಿಕ್ ಆನಿಂ ದಾನ್-ಶೀಲ್ ಸಂಸ್ಥ್ಯಾಂಕ್ ಅಸ್ಕತ್ ಕರ್ತಲೆಂ. ಹೊ ಧೊಕೊ ಗಜ್ಯೆ ಭಾಯ್ಲೊ ಅಶೆಂ ಮ್ಹಳಾಂ.
ಠಿಕಾಕಾರಾಂಚ್ಯೆ ಅಭಿಪ್ರಾಯೆ ಪ್ರಮಾಣೆಂ, ಅಲ್ಪ್-ಸಂಖ್ಯಾಕ್ ಸಂಸ್ಥೆ ದೆಶಾಂತ್-ಭಿತರ್ಲೆಂ ದಾನ್ ಭೋವ್ ಉಣೆಂ ಮೆಳ್ತಾ ದೆಕುನ್ ಪರ್ಕಿ ದಾನಾಚ್ಯೆರ್ ಹೊಂದ್ವೊನ್ ಆಸ್ತಾತ್. ದೆಕುನ್ ಕಡಕ್ಕ್ ರೂಲಿ ಆನಿಂ ಆಸ್ತಿ ಜಪ್ತ್ ಕರ್ಚ್ಯೊ ಧಮ್ಕ್ಯೊ ತಾಂಚ್ಯೆರ್ ಚಡ್ ನಕಾರಾತ್ಮಕ್ ಪರಿಣಾಮ್ ಕರ್ತಾತ್.
3. ಅತಿ-ವ್ಯಾಪಕ್ ಕಾನೂನಿ ಅಧಿಕಾರ್ ಆನಿಂ ಕಾಮ್ಕಾಜಾಚೊ ಗಳೊ ದಾಂಬ್ಚೊ: 2026 ಚ್ಯಾ ನವ್ಯಾ ನಿಯಮಾಂ ಪ್ರಮಾಣೆಂ, ಸಂಸ್ಥಾಂನಿಂ ಸರ್ಕಾರಾನ್ ಠರಾಯಿಲ್ಲ್ಯಾ ಕಡಕ್ಕ್ ಕಾಯ್ದ್ಯಾ-ಕಾನೂನಾಂ ಪ್ರಮಾಣೆಂ ಆಪ್ಲಿ ಕಾರ್ಯಾವಳ್ ಚಲಯ್ಜೆ, ಭೌಗೊಲಿಕ್ ಶೆತಾಂ ಠರಾಯ್ಜೆ, ಸೊಶಿಯಶಲ ಮೀಡಿಯಾ ಖಾತೆ ಪರ್ಗಟಿಜೆ, ಇತ್ಯಾದಿ. ನಿಯಮಾಂ ಜರ್ ಮೊಡ್ಲಿಂ, ತರ್ ಕಡಕ್ಕ್ ಶಿಕ್ಶಾ ಭೊಗಿಜೆ.
ವಿರೊಧಿ ಪಾರ್ಟಿಂಚ್ಯೆ ನೇತಾ ಆನಿಂ ನಾಗರಿಕ್ ಸಮಾಜ್ ಮ್ಹಣ್ತಾತ್ ಕಿ ಹಿಂ ಕಾನುನಾಂ ಸ್ವತಂತ್ರ್ ಸಂಸ್ಥ್ಯಾಂಕ್ ‘ಭಿಂವ್ಕುರಿ, ಸರಕಾರ್-ನಿಯಂತ್ರಿತ್ ಆವಾಜಾಂಚಿ ಗೂಂಜ್’ ಜಾವ್ನ್ ಪರಿವರ್ತಿತ್ ಕರ್ತಾತ್.
ನಿಯಮಾಂ ಪ್ರಮಾಣೆಂ, ಪ್ರಶಾಸಕೀಯ್ ಖರ್ಚ್ 20% ಭಿತರ್ ಆಸಾಜೆ. ಹ್ಯಾ ವರ್ವಿಂ, ದೇಖ್-ರೇಖಿಚ್ಯಾ ಕಾಮಾಂ ವಯ್ರ್ ವಣದ್ ಉಭಿ ಜಾತಾ.
ರದ್ದ್ ಕರ್ಚಿ ಧಮ್ಕಿ, ನವೀಕರಣ್ ನಕಾರ್ಚ್ಯೆಂ, ಆನಿಂ ಆಸ್ತಿಂಚ್ಯೆ ಹಸ್ತಾಂತರಣ್ ಅಸಲೊ ವಿವೆಕೀಯ್ ಅಧಿಕಾರ್ ಆಸ್ತಾ. ಕೊಡ್ತಿಂನಿಂ ತಪಾಸ್ ನಾಸ್ಲೆಲ್ಯಾನ್ ಅನಿಶ್ಚಿತಾಯ್ ಆನಿಂ ಸ್ವ-ನಿಯಂತ್ರಣ್ ನಿರ್ಮಾಣ್ ಜಾತಾ.
4. ವಿಸಂಗತಿ ಆನಿಂ ಅವಿವೆಕೀಯ್ ನಿವ್ಡೂಕ್: ಠಿಕಾಕಾರ್ ಸಾಂಗ್ತಾತ್ ಕಿ ಸಂಸ್ಥಾಂಚೆಂ ಸೂಕ್ಷ್ಮ್ ನಿಯಂತ್ರಣ್ ಆಸ್ತಾನಾ, ಹೆರ್ ಸಾಮಾಜಿಕ್-ಸಾಂಸ್ಕ್ರತಿಕ್ ಸಂಸ್ಥೆ ಜ್ಯೆ ಸರ್ಕಾರಿ ಟಟ್ಟು ಆಸ್ತಾತ್, ತೆ ಆಪ್ಲಿ ಮನ್ಮಾನಿ ಕರುಂಕ್ ಸಕ್ತಾತ್/ಕರ್ತಾತ್. ಜಶೆಂ ರಾಷ್ಟ್ರೀಯ್ ಸ್ವಯಂ ಸೇವಕ್ ಸಂಘ್ , ಭಾಜಪಾಚೊ ಪೊದೊರ್ನ್. ಹೆಂ ಸಂಘಟನ್ ಹ್ಯಾ ಕಾನುನಾಚ್ಯಾ ಭಾಯ್ರ್ ಆಸಾ. ಹಾಂಕಾಂ ಕಸ್ಸಲಿಂ ಕಾನೂನಾಂ, ಕಾಯ್ದೆ ವ ನಿಯಮಾಂ ಲಾಗು ಜಾಯ್ನಾಂತ್. ಹೊ ಕಾಯ್ದೊ ಫಕತ್ ವಿದೇಶಿ ನಿಧಿ ನಿಯಂತ್ರಣ್ ಕರ್ಚ್ಯಾ ಖಾತಿರ್ ನಹಿಂ, ಬಗಾರ್ ಸ್ವತಾಂತ್ರ್ ನಾಗರಿಕ್ ಸಮಾಜ್ಯಾಕ್ ಆಕಾರ್ ದಿಂವ್ಚ್ಯಾ ಖಾತಿರ್ ವಾಪ್ರುಂಚಿ ಘುಟ್ಮೋಳ್ ಮ್ಹಳ್ಳೊ ಆರೊಪ್ ಬಳಿಶ್ಟ್ ಜಾತಾ.
ಗಂಭೀರ್ ನದ್ರೆನ್ ಪಳೆಲ್ಯಾರ್, ವಿದೇಶಿ ದೆಣ್ಗಿ ನಿಯಂತ್ರಣ್ ಕಾನೂನ್ ತಿದ್ವಣ್ ವಿಧೆಯಕ್ 2025/2026 ಹೆಂ ಕಾನೂನಿ ಪಳ್-ವಾಟಾಂ ಭರ್ಚ್ಯಾ ಪ್ರಾಸ್, ಕೊಣ್ ಉಲಂವ್ಕ್ ಸಕ್ತಾ, ಸೆವಾ ದೀಂವ್ಕ್ ಸಕ್ತಾ, ಆನಿಂ ಸಂಘಟನಾಂ ಕರೂಂಕ್ ಸಕ್ತಾ ತಾಚ್ಯೆರ್ ಕಾರ್ಯಾಕಾರಿ ಜಬರ್ದಸ್ತಿ ಕರುಂಕ್ ಏಕ್ ಪ್ರೇತನ್ ಜಾತೆಲೆಂ. ಮಜ್ಬೂತ್ ಸುರಕ್ಷಾ- ಉಪಾಯಾಂ ವಿಣೆಂ, ಆಸ್ತಿ ಹಸ್ತಾಂತರ್ ಕರ್ಚ್ಯೆಂ,- ಕಸ್ಸಲಿ ಆಯ್ಕೊಂಚಿ ಪ್ರಣಾಲಿ ನಾಸ್ತಾನಾಂ- ಕೊಡ್ತಿಂಚ್ಯೆ ದೇಖ್-ರೇಖ್ ವಿಣೆಂ ಸ್ಪಸ್ಟ್ ಕಾನೂನಿ ಕಾರಾಣಾಂ ವಿಣೆಂ, ಹಸ್ತಾಂತರ್ ಕರ್ಚ್ಯ್ಂ ಹೆಂ ಅಲ್ಪ್ಸಂಖ್ಯಾತಾಂ ವಯ್ರ್ ಜುಲ್ಮ್ ಜಾವ್ನಾಸಾ,
■ ಫಿಲಿಪ್ ಮುದಾರ್ತ್
