ಖಂಯ್ಚೆಯ್ ಭಾಷೆಕ ಭಾರತ ಸಂವಿಧಾನಾಚ್ಯಾ 8 ವೆ ಪರಿಚ್ಛೆದಾಂತ್ ಸ್ಥಾನ್ ದೆಶಾಚೊ ಸಂಸತ್ತ್ ದಿತಾ ಕಿತ್ಯಾಕ ಮ್ಹಳ್ಯಾರ ತ್ಯಾ ಭಾಶೀಕಾನ್ ತಾಂಚಿ ಭಾಸೆಚಿ ಉದ್ರಗತೀಕ ಖೂಬ್ ವಾವಾರ ಕರೂಂಕ ಜಾಯ್. ಕೊಂಕ್ಣೀಕ್ ಹೆಂ ಸ್ಥಾನ್ ಮೆಳೂಂಕ್ ಖೂಬ್ ಲೊಕಾನಿಂ ಪರಿಶ್ರಮ್ ಘೆತ್ಲಾ, ತಾಂಕಾ ಆಮಿ ಆಭಾರ ಆಸಾತಿ. ಆಯ್ಚೆ ಪೀಳೀಗೆನ್ ಕೊಂಕ್ಣೀಂತ ಶಿಕ್ಷಣ ಆನಿ ಸಾಹಿತ್ಯಾಚೆ ಉದ್ರಗತೀಕ್ ವಾವ್ರ್ ಕರೂಂಕ ಜಾಯ್” ಅಶೆಂ ಮ್ಹಣು ಮಂಗ್ಳೂರ ವಿಶ್ವ್ ಕೊಂಕ್ಣಿ ಕೆಂದ್ರಾಂತ ‘ಕೊಂಕ್ಣಿ ಮಾನ್ಯತಾಯ್ ದೀಸ್’ ಚೆ ಸುವಾಳ್ಯಾಂತ್ ದಿವೊ ಪೆಟೊವುನ್ ಮುಖೈಲ್ ಸೊಯ್ರೊ ಡೊ.ಟಿ.ಎಮ್.ಎ ಪೈ ಉತ್ಕೃಷ್ಟ್ ಕೊಂಕ್ಣಿ ಪುಸ್ತಕ್ ಪುರಸ್ಕಾರ್ ವಿಜೆತ್, ಕೊಂಕ್ಣಿ ಸಾಹಿತಿ, ಅಂಕಣಕಾರ್ ಗೊಂಯ್ಚೊ ಪ್ರಾಧ್ಯಾಪಕ್ ಅನಂತ್ ಅಗ್ನಿ ಹಾನಿಂ ಸಾಂಗ್ಲೆಂ.
ಸಮಾರಂಭಾಚೆ ಪಯ್ಲೆಂ ರಾಷ್ಟ್ರದ್ವಜ್ ಉಬೊವುನ್ ವಿಶ್ವ್ ಕೊಂಕ್ಣಿ ಕೆಂದ್ರ್ ಅಧ್ಯಕ್ಷ ನಂದಗೋಪಾಲ ಶೆಣೈ ಹಾನಿಂ ಯೆವ್ಕಾರ ಕೆಲೆಂ. ಕೊಂಕ್ಣಿ ವಾಚನ ಸತ್ರಾಂಚೆ ವಾಂಗ್ಡ್ಯಾನ ಕೊಂಕ್ಣಿ ಅಭಿಮಾನ ಗೀತ ಮ್ಹಣೂನ ‘ಕೊಂಕ್ಣಿ ಅಂತರ್ಧ್ವನಿ’ ನಾಟಕ ಪ್ರದರ್ಶನ ಕೆಲೆಂ.
ಸಚಿವ್ ಡೊ.ಕಸ್ತೂರಿ ಮೊಹನ್ ಪೈ ಹಾನಿಂ “ವಿಶ್ವ್ ಕೊಂಕ್ಣಿ ಕೆಂದ್ರಾಚೆ ಫಾಟಿಂಬಾನ್ 4500 ವಿದ್ಯಾರ್ಥಿಯೊ ಆಯ್ಜ್ ಮೆರೆನ ಕೊಂಕ್ಣಿ ಶಿಕ್ಲ್ಯಾತ್, ತುಮಿ ತುಮ್ಚ್ಯಾ ಶಾಳೆಂತ್ ಕೊಂಕ್ಣಿ ಶಿಕೊವ್ಪಾಕ್ ಮಾಗ್ಣಿ ದವ್ರಾ” ಮ್ಹಣು ಸಲ್ಲ್ ದಿಲ್ಲೊ. ಧಾವೆ ವರ್ಗಾಂತ್ ಕೊಂಕ್ಣೀಂತ್ 100 ಅಂಕಾಂ ಜೊಡಿಲ್ಯಾ ಕೌಸಲ್ಲ್ಯಾಕ್ 7000 ರೂಪ್ಯೆಚೆಂ ಶಿಷ್ಯ್ ವೇತನ್ ಉಷಾ ಮೊಹನ್ ಪೈ ಹಾನಿಂ ದಿಲ್ಲೆಂ.
ಸಾಹಿತ್ಯ್ ಅಕಾದೆಮೀಚೊ ಕೊಂಕ್ಣಿ ಸಲ್ಲಾಗಾರ ಸಮಿತಿಚೊ ನಿಮಂತ್ರಕ್ ಮೆಲ್ವಿನ ರೊಡ್ರಿಗಸ ಹಾನಿಂ “ತುಮಿ ಕಿತೆಲೆಂಯ್ ಚಡ ಶಿಕ್ಲೆಯ ತರ ಆವಾಯ ಭಾಸ ಕೊಂಕ್ಣಿ ವಿಸ್ರೂಂಕ ನ್ಹಯ್” ಮ್ಹಣು ಸಂದೆಶ್ ದಿಲೊ.
ಜಮಿಲ್ಯಾ 100 ಪೆಕ್ಷ್ ಚಡ ವಿಧ್ಯಾರ್ಥಿಯಾನಿ ವೆಗ ವೆಗ್ಳ್ಯಾ ತರಾಂಚಿ ಸಾಂಸ್ಕೃತಿಕ್ ಕಾರ್ಯಾವಳಿಯೊ ಪ್ರದರ್ಶನ ಕೆಲ್ಯೊ ಆನಿ ಖೂಬ್ ಇನಾಮಾ ಜೊಡ್ಲ್ಯೊ.
ಖಜಾಂಚಿ ಬಿ.ಆರ್.ಭಟ್ಟ್ ಹಾನಿಂ ಧನ್ಯವಾದ್ ಕರೂನ್ ದೆವ್ ಬರೆಂ ಕರುಂ ಮ್ಹಳ್ಳೆಂ. ಎಮ್.ಆರ್. ಕಾಮತ ಹಾನಿಂ ಸೂತ್ರ್ ಸಂಚಾಲನ ಕೆಲೆಂ.
ಉಪಾಧ್ಯಕ್ಷ್ ರಮೆಶ್ ನಾಯ್ಕ್, ವಿಲಿಯಂ ಡಿ ಸೊಜ್, ವಿಶ್ವಸ್ಥ್ ಮಂಡಳಿಚೆ ಕುಡ್ಪಿ ಜಗದೀಶ್ ಶೆಣೈ, ಗೊಕುಲನಾಥ್ ಪ್ರಭು, ಪ್ರಶಾಂತ್ ಶೇಟ್, ವತಿಕಾ ಕಾಮತ್ ಪೈ, ಶಿವಶಂಕರ್ ಎಸ್ ನಾಯ್ಕ್ ಆನಿ ಸಬಾರ್ ಕೊಂಕ್ಣಿ ಮೊಗಿ ಉಪಸ್ಥಿತ್ ಆಶಿಲೆ.
