ಕರ್ನಾಟಕಾಂತ್ಲ್ಯಾ ‘ಕರಾವಳಿಚ್ಯೆಂ ಕೇಸರಿಕರಣ್’ ಸರಿಸುಮಾರ್ ಶೆಂಭೊರ್ ವರ್ಸಾಂ ಪಯ್ಲೆಂ ಸುರ್ವಾತ್ಲೆಲೆಂ. ತವಳ್, ಕೊಡಿಯಾಳ್ಚ್ಯೆ ಸಾರಸ್ವತ್ ಕೊಂಕ್ಣೆ ಆರ್ ಎಸ್ ಎಸ್ ಸಂಘಟನ್ ಘಡುನ್ ಹಾಡ್ಚ್ಯಾಂತ್ ಮುಖೆಲಿ ಜಾಲ್ಲೆ. ಪಾಟ್ಲ್ಯಾ ದಿಸಾಂನಿ, ಆರ್.ಎಸ್.ಎಸ್. ಚೊ ಸರಸಂಘಚಾಲಕ್ ಮೋಹನ್ ಭಾಗವತ್ ಅಮೇರಿಕಾಚ್ಯೆ ಭೊಂವ್ಡೆರ್ ಗೆಲ್ಲೊ ಆನಿ ಥಂಯ್ಸರ್ ಉಲವ್ನ್ ಮ್ಹಣ್ತಾ ಕೀ ಭಾರತಾಚಿ ‘ವಿವಿಧತೆಂತ್ ಏಕತಾ’ ಹಿ ಪರಂಪರಾ ಜೀವಂತ್ ಆಸಾ.
ಪೂಣ್, ಠಿಕಾಕಾರಾಂಚ್ಯೆ ಅಭಿಪ್ರಾಯೆ ಪ್ರಮಾಣೆಂ, ಹಿಂದುತ್ವ್ ರಾಜಕಾರಣಾಚೊ ಪ್ರಸಾರ್ ಭಾರತಾಚ್ಯಾ ಬಹುತ್ವವಾದಿ ಪರಂಪರೆಕ್ ಆವ್ಹಾನ್ ದಿತಾ. ಹ್ಯಾ ಪೃಷ್ಟ ಭೂಮಿ ವಯ್ರ್ ಕರ್ನಾಟಕಾಂತ್ ಭಾಜಪಾಚ್ಯಾ ‘ಭಗ್ವಾ ಪ್ರಕಲ್ಪಾಚೊ’ ಅಭ್ಯಾಸ್ ಕರ್ಚಿ ಗರ್ಜ್ ಆಸಾ.
ಭಾಜಪಾಚೊ ‘ಭಗ್ವಾ ಪ್ರಕಲ್ಪ್’ :
ಭಗ್ವಾ ಪ್ರಕಲ್ಪ್ – ರಾಜ್ಯಾಚ್ಯಾ ರಾಜಕೀಯ್, ಸಾಂಸ್ಕೃತಿಕ್ ಆನಿ ಸಂಸ್ಥಾಗತ್ ರಚ್ಣೆಂತ್ ಹಿಂದುತ್ವ್ ವಿಚಾರಾಕ್ ಬಲಿಶ್ಟ್ ಸ್ಥಾನ್ ಮೆಳ್ಳೊವ್ಪಾಚಿ ದೀರ್ಘಕಾಲೀನ್ ರಣನೀತಿ. ಪಕ್ಷಾಚ್ಯಾ ಅಭಿಪ್ರಾಯೆ ಪ್ರಮಾಣೆಂ, ಹೊ ಸಾಂಸ್ಕೃತಿಕ್ ಪುನರುಜ್ಜೀವನ್ ಆನಿ ಸಮಾಜ್-ಸುಧಾರಣಾಚೊ ವಾವ್ರ್ ಜಾವ್ನಾಸಾ. ಪೂಣ್, ವಿರೋಧಕಾಂಚ್ಯೆ ಅಭಿಪ್ರಾಯೆ ಪ್ರಮಾಣೆಂ, ಹೊ ವಾವ್ರ್ ಕರ್ನಾಟಕಾಚ್ಯಾ ಬಹುತ್ವವಾದಿ ಪರಂಪರೆಕ್ ದುರ್ಬಳ್ ಕರ್ತಾ ಆನಿ ಬಹುಸಂಖ್ಯಾತವಾದಿ ರಾಜಕಾರಣಾಕ್ ಬಲಿಶ್ಟ್ ಕರ್ತಾ.
ಕರ್ನಾಟಕ್ ಚಾರಿತ್ರಿಕ್ ನದ್ರೆನ್ ಧರ್ಮನಿರಪೇಕ್ಷ್ ರಾಜಕಾರಣಾಚೆಂ ಘಟ್ಟ್ ಕೇಂದ್ರ್ ಆಸ್ಲೆಂ. ಕಾಂಗ್ರೆಸ್ ಆನಿ ಜೆಡಿಎಸ್ ದಶಕಾಂ ಥಾವ್ನ್ ಪ್ರಭಾವಿ ಆಸ್ಲ್ಯೊ. ಭಾಜಪಾಚೊ ಉದೇವ್ ಆಯ್ಲೆವಾರ್ ಜಾಲೊ. ಪೂಣ್, ಜಾತಿ-ಆಧಾರಿತ್ ಸಮೀಕರಣಾಂ, ಸಂಘಟನಾತ್ಮಕ್ ವಿಸ್ತಾರ್ ಆನಿ ಧಾರ್ಮಿಕ್ ಜಾಗೃತಿಚ್ಯಾ ರಾಜಕಾರಣಾಂ ವರ್ವಿಂ ಪಕ್ಷಾನ್ ರಾಜ್ಯಾಂತ್ ಘಟ್ಟ್ ಪಾಯ್ ದವರ್ಲೊ.
ಭಾಜಪಾಚ್ಯಾ ಸುರ್ವಾತಿಚ್ಯಾ ಜಯ್ತಾಂತ್ ಲಿಂಗಾಯತ್ ಆನಿ ಒಕ್ಕಲಿಗ ಸಮುದಾಯಾಂಚೊ ವ್ಹಡ್ ವಾಂಟೊ ಆಸ್ಲೊ. ಪೂಣ್, ಪಕ್ಷಾನ್ ಹ್ಯಾಚ್ಯೆ ಬರೋಬರ್ ಸರ್ವ್-ಹಿಂದು ಓಳ್ಕಿ ನಿರ್ಮಾಣ್ ಕರುಂಕ್ ಪ್ರಯತ್ನ್ ಕೆಲೆಂ. ಜಾತಿ ರಾಜಕಾರಣ್ ಆನಿ ಹಿಂದು ಏಕೀಕರಣ್ ಹ್ಯಾ ದೋನ್ ಥಳಾಂರ್ ವಾವ್ರ್ ಕರ್ನ್ ಪಕ್ಷಾನ್ ಆಪ್ಲೊ ಜಣಾಧಾರ್ ವಾಗಯ್ಲೊ.
ಮೋದಿ- ಶಹಾ ಕಾಳ್ :
ಮೋ – ಶಾ ಆಡಳ್ತ್ಯಾ ಖಾಲ್, ಹ್ಯೆ ಪ್ರಕ್ರಿಯೆಕ್ ನವೊ ವೇಗ್ ಮೆಳ್ಳೊ. ಕರ್ನಾಟಕ್ ದಕ್ಷಿಣ್ ಭಾರತಾಂತ್ ‘ಗುಜಾರಾತ್ ಮಾದರಿಚ್ಯೆಂ’ ಹಿಂದುತ್ವ್ ರಾಜಕಾರಣಾಚ್ಯೆಂ ಪ್ರಮುಖ್ ‘ಪ್ರಯೋಗ್ ಕ್ಷೇತ್ರ್’ ಜಾಲೆಂ. ಚುನಾವಣೆಚ್ಯಾ ಗಣಿತಾಚೊ ವಾವ್ರ್, ಸಾಂಸ್ಕೃತಿಕ್ ಚಿನ್ಹಾಂಚಿ ಪುನರ್-ವ್ಯಾಖ್ಯಾನ್, ಶಿಕ್ಷಣಾಂತ್ ಬದ್ಲಾವ್, ಆನಿ ಇತಿಹಾಸಾಚ್ಯೆಂ ನವೆಂ ವಾಚನ್ ಅಸಲ್ಯಾಂ ವಿಷಯಾಂಕ್ ಮಹತ್ವ್ ಲಾಭಾಂವ್ಚ್ಯೆಂ ಪ್ರೇತನ್ ಕೆಲೆಂ. ಶಿವಾಜಿ, ಕೆಂಪೇಗೌಡಾ, ಸಂಗೊಳ್ಳಿ ರಾಯಣ್ಣಾ ತಸ್ಲ್ಯಾಂ ಐತಿಹಾಸಿಕ್ ವ್ಯಕ್ತಿಂಚ್ಯೊ ಪ್ರತಿಮಾ ರಾಜಕೀಯ್ ಕಥನಾಂತ್ ವಾಪರ್ಲ್ಯೊ.
ಹ್ಯೆ ಪ್ರಕ್ರಿಯೆಚೊ ಆನಿ ಏಕ್ ಮುಖ್ಯ್ ಆಧಾರ್ ಸಾಂಪ್ರದಾಯಿಕ್ ಧ್ರುವೀಕರಣ್ ಜಾವ್ನಾಸಾ. ‘ಲವ್ ಜಿಹಾದ್’, ‘ಗೋ-ರಕ್ಷಣ್’, ‘ಮತಾಂತರ್’, ‘ಮಂದಿರ್-ಮಸ್ಜಿದ್’ ತಸ್ಲೆ ವಿಷಯ್ ಚುನಾವಣಾಂತ್ ಆನಿ ಸಾರ್ವಜನಿಕ್ ಚರ್ಚೆಂತ್ ವ್ಹಡ್ ಪ್ರಮಾಣಾಂತ್ ಯೆಂವ್ಕ್ ಲಾಗ್ಲೆಂ. ಆರ್.ಎಸ್.ಎಸ್., ಬಜರಂಗ್ ದಳ್, ಹಿಂದು ಜಾಗರಣ್ ವೇದಿಕೆ ಆನಿ ಇತರ ಸಂಘಟಣಾಂನಿ ಹೆ ವಿವಾದ್ ಬಲಿಶ್ಟ್ ಕರ್ಚೊ ವಾವ್ರ್ ಕೆಲೊ.
ಮಾಧ್ಯಮಾಂ ಆನಿ ಸಾಮಾಜಿಕ್ ಮೀಡಿಯಾಂಚೊ ವಾಪರ್ ಹ್ಯಾ ರಣನೀತಿಂಚೊ ಮುಖ್ಯ್ ಭಾಗ್ ಜಾಲೊ. ವಿರೋಧ್ ಪಕ್ಷಾಂಚ್ಯಾ ಧೋರಣಾಂಕ್ ‘ತುಷಣೀಕರಣ್’ ಆನಿ ‘ಅಲ್ಪಸಂಖ್ಯಾತ್-ಕೇಂದ್ರೀತ್ ರಾಜಕಾರಣ್’ ಮ್ಹಣುನ್ ವರ್ಣನ್ ಕರ್ಚಿ ಪದ್ದತ್ ಸಾಮಾನ್ಯ್ ಜಾಲಿ. ಹ್ಯೆ ಪ್ರಕ್ರಿಯೆಂತ್ ಮಾಹೆತ್ ಆನಿಂ ಅಪ-ಮಾಹೆತ್ ಹಿಂ ದೋನೀ ರಾಜಕೀಯ್ ಸಾಧನಾಂ ಜಾವ್ನ್ ವಾಪರ್ಲಿಂ.
ಪೂಣ್, ಹ್ಯಾ ಭಗ್ವಾ ಪ್ರಕಲ್ಪಾಕ್ ಮಿತಿ ಆಸಾತ್…
ಕರ್ನಾಟಕಾಚಿ ಸಮಾಜ್ ಬಹುವಿಧ್ ಆನಿ ಸಂಕೀರ್ಣ್ ಜಾವ್ನಾಸಾ. ದಲಿತ್, ಮುಸ್ಲಿಂ, ಕ್ರಿಸ್ತಾಂವ್, ಹಿಂದುಳಿದ ವರ್ಗ್ ಆನಿ ವಿವಿಧ್ ಜಾತೀಯ್ ಸಮುದಾಯಾಂಚ್ಯೆಂ ಹಿತ್ ವೆವೆಗ್ಳೆಂ ಜಾವ್ನಾಸಾ. ದೆಕುನ್, ಏಕ್ಚ್ ಓಳಕ್ ಸರ್ವಾಂಕ್ ಆಕರ್ಷಿತ್ ಕರಿನಾಂ. ರಾಜ್ಯಾಚ್ಯಾ ಬಹುತ್ವವಾದಿ ಪರಂಪರೆನ್ ವಿವಿಧ್ ಸಮುದಾಯಾಂಕ್ ಆಪ್ಲೊಚ್ ಜಾಗೊ ದಿಲ್ಲೊ ಆಸಾ.
ಹ್ಯಾ ಮಿತಿಂಚೊ ನವೊ ದಾಕ್ಲೊ ಆಯ್ಲೆವಾರ್ ಪುತ್ತೂರಾಂತ್ ಜಾಲ್ಲೆಂ ‘ಪುತ್ತೂರು ಚಲೋ’ ಆಂದೊಲನ್ ಜಾವ್ನಾಸಾ. ದರ್ಬೆ ಘಡಿತಾ ಉಪ್ರಾಂತ್ ವಿವಿಧ್ ಹಿಂದುತ್ವವಾದಿ ಸಂಘಟಣಾಂನಿ ವ್ಹಡ್ ಪ್ರಚಾರ್ ಕರ್ನ್ ರಾಜ್ಯ್ ಮಟ್ಟಾರ್ ಪ್ರತಿಕ್ರಿಯ್ ಉಭಾರುಂಕ್ ಪ್ರೇತನ್ ಕೆಲೆಂ. ಪೂಣ್, ಆಂದೊಲನ್ ಕೇವಲ್ ಸ್ಥಳೀಯ್ ಪರಿಧಿಂತ್ಚ್ ಸೀಮಿತ್ ಉರ್ಲೆಂ. ಹೆಂ ದಾಕಯ್ತಾ ಕೀ ಕರಾವಳಿಂತ್ ಹಿಂದುತ್ವ್ ಸಂಘಟಣಾಂಚೊ ಪ್ರಭಾವ್ ಆಸಾ ತರಿ, ಧಾರ್ಮಿಕ್ ಧ್ರುವೀಕರಣ್ ಸದಾಂಚ್ ವ್ಯಾಪಕ್ ಜಾವ್ನ್ ನಿರ್ಮಾಣ್ ಕರುಂಕ್ ತೆ ಯಶಸ್ವಿ ಜಾಂವ್ಕ್ ನಾಂತ್.
ಭಾಜಪಾ ಭಿತರೀ ವಿವಿಧ್ ಪ್ರವಾಹ್ ಆಸಾತ್. ಏಕ್ ಕಡೆ ತೀವ್ರ್ ಹಿಂದುತ್ವಾಚೊ ಆಗ್ರಹ್ ಆಸಾ; ದುಸ್ರೆ ಕಡೆ ಚುನಾವಣೆಚ್ಯಾ ವ್ಯವಹಾರಿಕ್ ಗರ್ಜಾಂಕ್ ಪ್ರಾಮುಖ್ಯ್ ದಿವ್ಪಾಚೊ ದೃಷ್ಟಿಕೋಣ್ ಆಸಾ. ಹ್ಯಾ ದೋನ್ ಪ್ರವಾಹಾಂ ಮಧೆಂ ಸದಾಂಚ್ ತಣಾವ್ ಆಸ್ತಾ. ಜೆಡಿಎಸ್ ಬರೋಬರ್ ಜಾಲ್ಲೆಲಿ ಮೈತ್ರಿ ಹಾಚೊ ದಾಕ್ಲೊ ಜಾವ್ನಾಸಾ. ಹಿಂದುತ್ವಾಚ್ಯಾ ತೀವ್ರ್ ವಕ್ತ್ರತ್ವಾ (rhetoric) ಸದಾಂಚ್ ಚುನಾವ್ ಜಿಕುಂಕ್ ಸಕಾನಾಂ ಮ್ಹಣ್ ಪಕ್ಷಾಕ್ ಕಳಿತ್ ಆಸಾ.
ಹ್ಯಾ ಸಗ್ಳ್ಯಾ ಪ್ರಕ್ರಿಯೆಚೊ ಕರ್ನಾಟಕಾಚ್ಯಾ ರಾಜಕೀಯ್ ಸಂಸ್ಕೃತಿ ವಯ್ರ್ ಪರಿಣಾಮ್ ಜಾಲಾ. ಧಾರ್ಮಿಕ್ ಓಳ್ಕಿಂಚೊಂ ರಾಜಕೀಯ್ ವಾಪರ್ ವಾಡ್ಲಾ. ಸಾರ್ವಜಣಿಕ್ ಚರ್ಚಾ ಜಾಯಿತ್ತ್ಯಾ ಮಟ್ಟಾಕ್ ಧ್ರುವೀಕೃತ್ ಜಾಲ್ಯಾ. ವಿಶೇಷ್ ಮ್ಹಳ್ಯಾರ್, ಭಾಜಪಾಚೊ ಪ್ರಭಾವ್ ವಿರೋಧ್ ಪಕ್ಷಾಂ ವಯ್ರ್ ಪಡ್ಲಾ. ಕಾಂಗ್ರೆಸ್ ಸಯ್ತ್ ‘ಸಾಫ್ಟ್ ಹಿಂದುತ್ವ್’ ಧೋರಣಾಂಚೊ ಆಶ್ರಯ್ ಘೆತಾ. ಕರ್ನಾಟಕಾಚ್ಯಾ ರಾಜಕೀಯಾಚೊ ಕೇಂದ್ರ್ ಉಜ್ವ್ಯೆ ದಿಶೆನ್ ಗೆಲಾ ಮ್ಹಳ್ಳೊ ಯುಕ್ತಿವಾದ್ ಬಲಿಶ್ಟ್ ಜಾತೇ ಆಸಾ.
ಸಮಾಪ್ತಿ :
ಕರ್ನಾಟಕಾಂತ್ ಭಾಜಪಾಚೊ ಭಗ್ವಾ ಪ್ರಕಲ್ಪ್ ಕೇವಲ್ ಏಕ್ ಚುನಾವಣೆಚಿ ರಣನೀತಿ ನಹಿಂ. ತೊ ರಾಜ್ಯಾಚ್ಯಾ ರಾಜಕೀಯ್ ಆನಿ ಸಾಂಸ್ಕೃತಿಕ್ ಸ್ವರೂಪಾಕ್ ಪುನರ್-ಆಕಾರ್ ದಿಂವ್ಚ್ಯೆಂ ದೀರ್ಘಕಾಲೀನ್ ಪ್ರೇತನ್ ಜಾಲಾಂ. ಸಮರ್ಥಕಾಂಚ್ಯೆ ನದ್ರೆನ್ ಹೊ ಸಾಂಸ್ಕೃತಿಕ್ ಆತ್ಮವಿಶ್ವಾಸಾಚೊ ಪುನರುಜ್ಜೀವನ್. ವಿರೋಧಕಾಂಚ್ಯೆ ನದ್ರೆನ್ ಬಹುತ್ವವಾದಿ ಪರಂಪರೆಕ್ ಆವ್ಹಾನ್. ಪೂಣ್, ಹ್ಯಾ ವಾದಾಚೊ ಅಂತಿಮ್ ನಿರ್ಣಯ್ ಚುನಾವಾಂತ್ ನಾಂ, ಬಗಾರ್ ಕರ್ನಾಟಕಾಚಿ ಸಮಾಜ್ ವೈವಿಧ್ಯ್, ಸಹ-ಅಸ್ತಿತ್ವ್ ಆನಿ ಸಾಮಾಜಿಕ್ ಮೈತ್ರಿ ಹಾಂಕಾಂ ಕಿತ್ಲೆಂ ಮಹತ್ವ್ ದಿತಾ ಹಾಂಚ್ಯೆರ್ ಹೊಂದ್ವೊನ್ ಆಸ್ತೆಲೆಂ.
■ ಫಿಲಿಪ್ ಮುದಾರ್ತ್
