“ಮೊಂತಿ ಫೆಸ್ತ್ ಜಾವ್ನಾಸಾ ಕುಟ್ಮಾಚೆಂ ಫೆಸ್ತ್. ಕುಟ್ಮಾನ್ ಸಾಂಗಾತಾ ಮೆಳೊನ್ ದಿನ್ವಾಸಿ ಕಾಳ್ಜಾನ್ ಆನಿ ಮರಿ ಮಾಯೆಚೊ ಮೋಗ್, ಖಾಲ್ತೆಂಪಣ್ ಆನಿ ಕುರ್ಪೆಚ್ಯಾ ಉಜ್ವಾಡಾಂತ್ ಕುಟ್ಮಾಚೊ ಬಾಂದ್ ನವೀಕರಣ್ ಕರುಂಕ್ ಅವ್ಕಾಸ್ ರಚುನ್ ದಿಂವ್ಚೆಂ ಫೆಸ್ತ್.” ಮ್ಹಣಾಲೊ ಮಂಗ್ಳುರ್ ದಿಯೆಸೆಜಿಚೊ ಗೊವ್ಳಿಬಾಪ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ.
ಜೆಪ್ಪು ಸಾಂತ್ ಆಂತೊನಿಚ್ಯಾ ಆಸ್ರ್ಯಾಂತ್ ಮೊಂತಿ ಫೆಸ್ತಾಚ್ಯಾ ಸಂಭ್ರಮಿಕ್ ಮಿಸಾಚ್ಯಾ ಬಲಿದಾನಾಚ್ಯಾ ಪ್ರಸಂಗಾಂತ್ ಮುಕಾರುನ್ ತಾಣೆ ಮ್ಹಳೆಂ “ಮರಿ ಮಾಂಯ್ ಜಾವ್ನಾಸಾ ಪವಿತ್ ಸಭೆಚಿ ಆವಯ್ ಆನಿ ಭಾವಾಡ್ತಾಚಿ ದೇಕ್. ಮೊಂತಿ ಸಾಯ್ಭಿಣಿಚ್ಯಾ ಫೆಸ್ತಾಕ್ ಬೆಳೆಂ ಅನಿ ಲುಂವ್ಣೆಚೆಂ ಸಾಂಸ್ಕೃತಿಕ್ ಪಾಟಿತಳ್ ಆಸಾ. ಪ್ರಿತುಮೆಚ್ಯಾ ನವ್ಯಾ ಫಳಾ ಸಾಂಗಾತಾ ಹೆಂ ಫೆಸ್ತ್ ಕುಟ್ಮಾಂತ್ ಚಲಿಭುರ್ಗ್ಯಾಕ್ ಮಾನ್ ಕರ್ಚೆಂಯ್ ಫೆಸ್ತ್ ಜಾವ್ನಾಸಾ.”
ನವೆಂ ಬೆಂಜಾರ್ ಕರ್ಚೆಸವೆಂ ಸುರು ಜಾಲ್ಲೊ ಫೆಸ್ತಾಚೊ ಸಂಭ್ರಮ್, ಭುರ್ಗ್ಯಾಂನಿ ಮರಿಯೆಕ್ ಫುಲಾಂ ಅರ್ಪುಂಚೆಂ ಸವೆಂ ಮುಕಾರುನ್ ಗೆಲೊ. ಆನಿ ಗೊವ್ಳಿ ಬಾಪಾಂ ಸಾಂಗಾತಾ ಆಸ್ರ್ಯಾಚೊ ದಿರೆಕ್ತೊರ್ ಮಾ| ಬಾ| ಜೆ. ಬಿ. ಕ್ರಾಸ್ತಾ, ಆಡಳ್ತೆದಾರ್ ಮಾ| ಬಾ| ಪ್ರವೀಣ್ ಅಮ್ರುತ್ ಮಾರ್ಟಿಸ್ ಆನಿ ಮಾ| ಬಾ| ಫ್ರಾನ್ಸಿ ಸಾವೆರ್ ಗೋಮ್ಸ್ ಹಾಂಚ್ಯಾ ಸಹಭೆಟವ್ಣೆಂತ್ ಮಿಸಾಂತ್ ಸಂಪನ್ನ್ ಜಾಲೊ.
ಆಸ್ರ್ಯಾಚ್ಯಾ ನಿವಾಸಿಂ ಸವೆಂ ವ್ಹಡಾ ಸಂಕ್ಯಾನ್ ಭಕ್ತಿಕ್ ಫೆಸ್ತಾ ಸಂಭ್ರಮಾಕ್ ಹಾಜರ್ ಆಸೊನ್, ಬೆಂಜಾರ್ ಕೆಲ್ಲಿಂ ಭಾತಾಂ ಆನಿ ಕೊಬು ವಾಂಟಪ್ ಚಲ್ಲೆಂ. ಮಿಸಾಚ್ಯಾ ಸಂಭ್ರಮಿಕ್ ಬಲಿದಾನಾ ಉಪ್ರಾಂತ್ ಗೊವ್ಳಿಬಾಪಾನ್ ಆಸ್ರ್ಯಾಚಾ ನಿವಾಸಿಂಕ್ ಮೆಳೊನ್ ಫೆಸ್ತಾಚೆ ಶುಭಾಶಯ್ ವಾಂಟುನ್ ಘೆತ್ಲೆ.
