ಸಪ್ಟೆಂಬರ್ 14 : ‘ಆಮ್ಚೊ ಸಂದೇಶ್’ ಕೊಂಕ್ಣಿ ಮಹಿನ್ಯಾಳ್ಯಾ ಪತ್ರಾಚ್ಯಾ ಮಂಗ್ಳುರ್ ದಿಯೆಸೆಜಿಚ್ಯಾ ಪ್ರತಿನಿಧಿಂಚೆಂ ಸಹಮಿಲನ್ ಮಂಗ್ಳುರ್ ಮಿಲಾರ್ ಇಗರ್ಜೆಚ್ಯಾ ಸೆನೆಕಲ್ ಸಭಾ ಸಾಲಾಂತ್ ಚಲ್ಲೆಂ.
ಕಥೊಲಿಕ್ ಸಭಾ ಮಂಗ್ಳುರ್ ಪ್ರದೇಶ್ (ರಿ) ಅತ್ಮಿಕ್ ನಿರ್ದೇಶಕ್ ಮಾ| ಬಾ| ಮೈಕಲ್ ಐವನ್ ರೊಡ್ರಿಗಸ್ ಹಾಂಣಿ ಕಾರ್ಯೆಂ ಉಗ್ತಾಯ್ಲೆಂ. ಮಿಲಾರ್ ಕೊಲೆಜಿಚೆ ಪ್ರಾಂಶುಪಾಲ್ ಮಾ| ದೊ| ಆಲ್ವಿನ್ ಸೆರಾವೊ ಹ್ಯಾ ಕಾರ್ಯಾಕ್ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ಲ್ಲೆ. ಕಥೊಲಿಕ್ ಸಭಾ ಮಂಗ್ಳುರ್ ಪ್ರದೇಶ್ ( ರಿ) ಕೇಂದ್ರಿಯ್ ಅಧ್ಯಕ್ಶ್ ಮಾನೆಸ್ತ್ ಸಂತೋಶ್ ಡಿಸೋಜಾ ಕಾರ್ಯಾಚೆ ಅಧ್ಯಕ್ಶ್ ಆಸ್ಲ್ಲೆ.
“ಆಮ್ಚೊ ಸಂದೇಶ್ ಪತ್ರ್ ಆಮ್ಚ್ಯಾ ಸಮುದಾಯಾಚೊ ತಾಳೊ ಆನಿ ಆಮ್ಚೆಂ ದಾಯ್ಜ್. ಸಂದೇಶ್ ಪ್ರತಿನಿಧಿಂಚ್ಯಾ ಮಿನತೆನ್ ಹೆಂ ಪತ್ರ್ ಪ್ರಗತೆಕುಶಿನ್ ಚಮ್ಕೊನ್ ಆಸಾ. ಹಿ ಗಜಾಲ್ ಸಂತೊಸಾಚಿ. ವಾವ್ರ್ ಕೆಲ್ಲ್ಯಾಂಕ್ ಸಾಂಗಾತಾ ಹಾಡುನ್ ಮಾನ್ ಕರ್ಚೆಂ ವಾಜ್ಬಿ. ಅಶೆಂ ಜಾಲ್ಲ್ಯಾನ್ ಹ್ಯಾ ಕಾರ್ಯಾಕ್ ಚಡ್ ಮಹತ್ವ್ ಆಸಾ” ಮ್ಹಣ್ ಅತ್ಮಿಕ್ ನಿರ್ದೇಶಕ್ ಬಾಪ್ ಮಾ| ಐವನ್ ಮೈಕಲ್ ರೊಡ್ರಿಗಸ್ ಹಾಂಣಿ ಅಭಿಪ್ರಾಯ್ ಉಚಾರ್ಲಿ.
“ಇಂಟರ್ನೆಟ್ ಆನಿ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸಾಚೊ ಲೆಕಾವರ್ತೊ ವಾಪರ್ ಮನ್ಶಾಕುಳಾರ್ ಆಪಾಯಾಚೊ ಜಾಂವ್ಚ್ಯಾರ್ ಆಸಾ ಮ್ಹಣ್ ಜಾಣಾರಿ ಸಾಂಗ್ತಾತ್. ಬರ್ಪಾ ಮಾಧ್ಯಮಾಕ್ ಇಲೆಕ್ಟ್ರೊನಿಕ್ ಮಾಧ್ಯಮ್ ಏಕ್ ಪರ್ಯಾಯ್ ನ್ಹಯ್ ಮ್ಹಳ್ಳೆಂ ಸತ್ ಆಮಿ ಮಾನುನ್ ಘೆಜೆ. ಜೆ ಕೊಣ್ ಬರಯ್ತಾತ್ ತೆ ಜಾಯ್ತೆಂ ವಾಚುನ್, ಚಿಂತುನ್ ತಜ್ವೀಜ್ ಕರ್ನ್ ಸಮಾಜೆಚ್ಯಾ ಹಿತಾಪಾಸತ್ ಬರಯ್ತಾತ್. ಅಸಲೆಂ ಕಾಮ್ ಆಮ್ಚೊ ಸಂದೇಶ್ ಪತ್ರಾರ್ ಪಳೆಂವ್ಕ್ ಮೆಳ್ತಾ. ತೆಂ ತಶೆಂಚ್ ಫುಡೆಂ ವಚೊಂದಿ” ಮ್ಹಣ್ ತಾಂಣಿ ಸಾಂಗ್ಲೆಂ.
ಮುಕೆಲ್ ಸಯ್ರೊ ಮಾ| ದೊ| ಆಲ್ವಿನ್ ಸೆರಾವೊ ಬಾಪ್ ಉಲವ್ನ್, “ಆಮ್ಚೊ ಸಂದೇಶ್ ಪತ್ರಾನ್ ಪತ್ರಿಕೋದ್ಯಮ್ ಶೆತಾಂತ್ ವ್ಹಡ್ ಸಾಧನ್ ಕೆಲಾಂ. ಬರೆ ಆನಿ ಪಕ್ಷಪಾತ್ ನಾತ್ಲ್ಲೆ ಪತ್ರ್ಕರ್ತ್ ರುತಾ ಕರ್ಚೆ ದಿಶೆನ್ ಪೂರ್ಣ್ಪ್ರಮಾಣಾಚೆಂ ’ಪತ್ರಿಕೋದ್ಯಮ್ ಕಾರ್ಯಗಾರ್’ ಆಸಾ ಕರಿಜೆ” ಮ್ಹಣ್ ಸಲಹಾ ದಿಲಿ.
ಕೊಂಕ್ಣೆಂತ್ ಅತ್ಯಧಿಕ್ ಪ್ರಸಾರಾರ್ ಆಸ್ಚ್ಯಾ ‘ಆಮ್ಚೊ ಸಂದೇಶ್’ ಪತ್ರಾಚ್ಯಾ ಪ್ರಗತೆಕ್ ಪ್ರಮುಕ್ ಕಾರಣ್ ತಾಚೆ ಪ್ರತಿನಿಧಿ. ವಾವ್ರ್ ಕೆಲ್ಲ್ಯಾ ಪ್ರತಿನಿಧಿಂಕ್ ಸಹಮಿಲನ್ ಆಸಾ ಕರ್ನ್ ಧಿನ್ವಾಸ್ ಪಾಟಂವ್ಚೆಂ, ವಿಚಾರ್-ವಿನಿಮಯ್ ಚಲಂವ್ಚೆಂ ಆನಿ ಫುಡ್ಲ್ಯಾ ವಾವ್ರಾಕ್ ಪೂರಕ್ ಮಾಹೆತ್ ಘೆಂವ್ಚೆಂ ಹೆಂ ಕಾರ್ಯೆಂ ಸಮಯೋಚಿತ್ ಆನಿ ಅರ್ತಾಭರಿತ್ ಮ್ಹಣ್ ತಾಂಣಿ ಶಾಭಾಸ್ಕಿ ಪಾಟಯ್ಲಿ.
ಆಜ್ಕಾಲ್ ಪತ್ರಾಂ ವಾಚ್ಪಿ ಉಣೆ ಜಾಲ್ಯಾತ್ ಮ್ಹಳ್ಳೊ ಆಕಾಂತ್ ಆಸಾ. ಆರ್ಥಿಕ್ ಅಡ್ಚಣೆಕ್ ಲಾಗುನ್ ಜಾಯ್ತಿಂ ಪತ್ರಾಂ ಬಂಧ್ ಪಡ್ಲ್ಯಾಂತ್. ಥೊಡ್ಯಾ ಪತ್ರಾಂನಿ ತಾಂಚಿಂ ಪಾನಾಂ ಉಣಿಂ ಕೆಲ್ಯಾಂತ್. ಪುಣ್ ಆಮ್ಚೊ ಸಂದೇಶ್ ಆಪ್ಲ್ಯಾ ಪ್ರತಿನಿಧಿಂಚ್ಯಾ ಆನಿ ಕಥೊಲಿಕ್ ಸಭಾ ಕಾರ್ಯಕರ್ತಾಂಚೆ ಮಿನತೆನ್ ಆಜ್ ಕೊಂಕ್ಣಿ ಪತ್ರಿಕೋದ್ಯಮಾಂತ್ ನಂ.1 ಸ್ಥಾನಾರ್ ಆಸಾ. ಹಾಕಾ ಕಾರಣ್ ಆಮ್ಚೊ ಸಂದೇಶ್ ಪ್ರತಿನಿಧಿ. ತಾಂಚ್ಯಾ ವಾವ್ರಾಕ್ ಶಾಭಾಸ್ಕಿ ಫಾವೊ ಮ್ಹಣ್ ಕಾರ್ಯಾಚೊ ಅಧ್ಯಕ್ಷ್ ಮಾನೆಸ್ತ್ ಸಂತೋಷ್ ಡಿಸೋಜಾ ಹಾಂಣಿ ಸಾಂಗ್ಲೆಂ.
ಸಂಪಾದಕ್ ವಿಲ್ಫ್ರೆಡ್ ಲೋಬೊ ಪಡೀಲ್ ಹಾಂಣಿ ಆಮ್ಚೊ ಸಂದೇಶ್ ಪತ್ರಾಚ್ಯಾ ಪ್ರಸ್ತುತ್ ಪರಿಗತೆವಿಶಿಂ ಝಳಕ್ ಆನಿ ಪ್ರಾಯೋಜಕ್ಪಣಾವಿಶಿಂ ಮಾಹೆತ್ ದಿಲಿ. ಸರ್ವ್ ಪ್ರತಿನಿಧಿಂನಿ ಉಗ್ತ್ಯಾನ್ ಆಪ್ಲಿ ಅಭಿಪ್ರಾಯ್ ಉಚಾರ್ಲಿ ಆನಿ ಪತ್ರಾಚ್ಯಾ ಪ್ರಗತೆಖಾತಿರ್ ಸಲಹಾ-ಸುಚನಾಂ ದಿಲಿಂ.
ಸಂಪಾದಕ್ ವಿಲ್ಫ್ರೆಡ್ ಲೋಬೊ ಪಡೀಲ್ ಹಾಂಣಿ ಯೆವ್ಕಾರ್ ಮಾಗುನ್ ಪ್ರಸ್ತಾವನ್ ದಿಲೆಂ. ಕಾರ್ಯದರ್ಶಿ ವಿಲ್ಮಾ ಮೊಂತೇರೊ ಹಾಂಣಿ ಧನ್ಯವಾದ್ ಪಾಟಯ್ಲೆ. ಆಲ್ಬರ್ಟ್ ಸುನಿಲ್ ಮೊನಿಸ್ ಗರ್ಡಾಡಿ ಹಾಂಣಿ ಕಾರ್ಯೆಂ ನಿರ್ವಹಣ್ ಕೆಲೆಂ. ಸ್ಟೀವನ್ ರೊಡ್ರಿಗಸ್ ವಾಲೆನ್ಸಿಯಾ ಹಾಂಣಿ ಸಹಕಾರ್ ದಿಲೊ.
1 comment
Nice, too good