“ಆಮಿ ಕೊಣೆಂಯ್ ಆಮ್ಚ್ಯಾ ದೊಳ್ಯಾಂನಿ ದೆವಾಕ್ ಪಳಯಿಲ್ಲೆಂ ನಾ. ಪೂಣ್ ಆಮ್ಚ್ಯಾ ಗರ್ಜಾಂಕ್ ಪಾವೊನ್ ಆಮ್ಕಾಂ ಕುಮ್ಕೆ ಹಾತ್ ದಿತೆಲ್ಯಾ ಮನ್ಶ್ಯಾಂ ರುಪಾರ್ ದೇವ್ ಆಮ್ಕಾಂ ಪಳೆಂವ್ಕ್ ಮೆಳ್ತಾ. ಮೈಕಲ್ ಡಿ ಸೊಜಾ ಕುಟಮ್ ದೆವಾಚೆಂ ಅಸಲೆಂ ಏಕ್ ರೂಪ್. ತೋ ದೆವಾನ್ ಧಾಡ್ಲ್ಲೊ ಮನಿಸ್. ತಾಚೆಪರಿಂ ಪೆಲ್ಯಾಚೆಂ ಬರೆಂ ಆಶೆಂವ್ಚ್ಯಾ, ಕುಮ್ಕೆಕ್ ಪಾಂವ್ಚ್ಯಾ ಹರ್ ಮನ್ಶಾಥಂಯ್ ಆಮಿ ದೆವಾಚೆಂ ರೂಪ್ ಪಳವ್ಯೆತ್” ಮ್ಹಣಾಲೊ ಅ| ಮಾ| ದೊ| ಲೆಸ್ಲಿ ಕ್ಲಿಫರ್ಡ್ ಸೊಜ್, ಉಡುಪಿ ಕಥೊಲಿಕ್ ಧರ್ಮ್ಪ್ರಾಂತ್ಯಾಚೊ ಧರ್ಮಾಧ್ಯಕ್ಷ್.
ಸೊಮಾರಾ, ಸಪ್ತ್ತೆಂಬರ್ 14 ವೆರ್, ಉಡುಪಿ ಇಗರ್ಜೆ ವಠಾರಾಂತ್ ಆಸ್ಚ್ಯಾ ಆವೆ ಮರಿಯಾ ಸಾಲಾಂತ್ ಎಮ್.ಡಿ.ಎಸ್. ಚ್ಯಾರಿಟೀಸ್ ತರ್ಫೆನ್ ಮಾಂಡುನ್ ಹಾಡ್ಲೆಲ್ಯಾ ಉಮೆದ್ 2026 ಕಾರ್ಯಾಚ್ಯಾ ಅಧ್ಯಕ್ಶ್ ಸ್ಥಾನಾ ಥಾವ್ನ್ ಎಡುಕೇರ್ ಫಲಾನುಭವಿ ವಿದ್ಯಾರ್ಥಿ ಆನಿ ತಾಂಚ್ಯಾ ಪೋಶಕಾಂಕ್ ಉದ್ದೇಸುನ್ ತೆ ಉಲಯ್ತಾಲೆ. ಉಡುಪಿ ದಿಯೆಸೆಜಿಚೊ ಸರ್ವಜಣಿಕ್ ಸಂಪರ್ಕ್ ಅಧಿಕಾರಿ ತಶೆಂ ಉಡುಪಿ ಫಿರ್ಗಜೆಚೊ ವಿಗಾರ್ ಮಾ| ಬಾ| ಡೆನಿಸ್ ಡೆಸಾ, ಮುಕೆಲ್ ಸಯ್ರೊ ಆನಿ ಉಡುಪಿ ಫಿರ್ಗಜೆಚೊ ಉಪಾಧ್ಯಕ್ಷ್ ಶ್ರೀ ಮ್ಯಾಕ್ಸಿಮ್ ಸೊಜ್ ಮಾನಾಚೊ ಸಯ್ರೊ ಜಾವ್ನ್ ಉಮೆದ್ 2026 ಕಾರ್ಯಾಕ್ ಹಾಜರ್ ಆಸ್ಲೆ.
ವಿಗಾರ್ ಮಾ। ಬಾ। ಡೆನಿಸ್ ಡೆಸಾ ಹಾಣಿ ‘ಉಮೆದ್ 2026 ಉಡುಪಿ’ ಕಾರ್ಯಾವಳಿಕ್ ಮಾಗ್ಣ್ಯಾದ್ವಾರಿಂ ಚಾಲನ್ ದಿಲೆಂ. ನಿರೂಪಕ್ ಎಚ್ಚೆಮ್, ಪೆರ್ನಾಲ್ ಹಾಣಿ ಎಡುಕೇರ್ ಉಮೆದ್ ಉಪಕ್ರಮಾ ವಿಶ್ಯಾಂತ್ ಮಾಹೆತ್ ದೀವ್ನ್, ಕಾರ್ಯಾಚೊ ಅಧ್ಯಕ್ಷ್ ಆನಿ ಸಯ್ರ್ಯಾಂಚಿಂ ಒಳಕ್ ಕರುನ್ ದೀವ್ನ್ ಯೆವ್ಕಾರ್ ಮಾಗ್ಲೊ ಆನಿ ಎಂ.ಡಿ.ಎಸ್ ಚ್ಯಾರಿಟೀಸ್ ಹಾಚೊ ಸಲಹಾದಾರ್ ಸ್ಟೀಫನ್ ಪಿಂಟೊ, ಬೆಂದುರ್ ಹಾಣಿ ಸಯ್ರ್ಯಾಂಕ್ ಫುಲಾಂ ತುರೆ ದೀವ್ನ್ ಮಾನಾನ್ ಸ್ವಾಗತ್ ದಿಲೊ. ದಿವೊ ಪೆಟವ್ನ್ ಧರ್ಮಧ್ಯಕ್ಷ್ ಅ। ಮಾ। ದೊ। ಲೆಸ್ಲಿ ಸೊಜ್ ಹಾಣಿ ಕಾರ್ಯಾವಳ್ ಉಗ್ತಾಯ್ಲಿ.
“ಪ್ರತಿಭಾ ಫಕತ್ ಜಲ್ಮಾಥಾವ್ನ್ ಯೇನಾ, ಸದಾಂಚ್ಯಾ ಅಭ್ಯಾಸಾನ್ ಪ್ರತಿಭಾ ಬರಿ ಕರುಂಕ್ ಸಾಧ್ಯ್ ಜಾತಾ. ಭುರ್ಗ್ಯಾಂಚಿಂ ಪ್ರತಿಭಾ ಫುಲೊಂಕ್ ಪೋಶಕಾಂಚೊಂ ಪ್ರೋತ್ಸಾವ್ ಮಾತ್ ನಯ್, ಇಲ್ಲಿಶಿ ಸೊಸ್ಣಿಕಾಯ್ ಸಯ್ತ್ ಗರ್ಜ್. ಕವ್ಳ್ಯಾ ಪ್ರಾಯೆರ್ ಆಪ್ಲ್ಯಾ ಭುರ್ಗ್ಯಾಂಚಿಂ ಪ್ರತಿಭಾ ಒಳ್ಕುನ್, ಸಾರ್ಕೊ ಪೋಸ್ ಕೆಲ್ಯಾರ್, ಸಾರ್ಕ್ಯಾ ವಾಟೆನ್ ಚಲೊನ್ ಆಯ್ಚಿಂ ಭುರ್ಗಿಂ ಖಂಡಿತ್ ಫಾಲ್ಯಾಂಚಿಂ ಜವಬ್ದಾರೆಚಿ ನಾಗರಿಕ್ ಜಾತಾತ್” ಮ್ಹಣ್ ಅ| ಮಾ| ದೊ| ಲೆಸ್ಲಿ ಕ್ಲಿಫರ್ಡ್ ಸೊಜ್ ಹಾಣಿ ಅಭಿಪ್ರಾಯ್ ಉಚಾರ್ಲಿ.
ಉಡುಪಿ ದಿಯೆಸೆಜಿಚೊ ಸರ್ವಜಣಿಕ್ ಸಂಪರ್ಕ್ ಅಧಿಕಾರಿ ತಶೆಂ ಉಡುಪಿ ಫಿರ್ಗಜೆಚೊ ವಿಗಾರ್ ಮಾ| ಬಾ| ಡೆನಿಸ್ ಡೆಸಾ ಹಾಣಿ ಆಪ್ಲ್ಯಾ ಸಂದೇಶಾಂತ್ “ಆಮ್ಚೆಂ ಜಿವಿತ್ ಆಮ್ಕಾಂ ದೆವಾನ್ ದಿಲ್ಲೆಂ ದೆಣೆಂ ಜಾವ್ನಾಸಾ. ಹೆಂ ದೆಣೆಂ ಆಮಿ ಆಪ್ಲ್ಯಾ ಪೆಲ್ಯಾ ಸಾಂಗಾತಾ ವಾಂಟುನ್ ಘೆತಾನಾ ಮಾತ್ ತೆಂ ಸಂಪೂರ್ಣ್ ಜಾತಾ. ಮೈಕಲ್ ಡಿ ಸೊಜಾ ಕುಟಮ್ ದೆವಾನ್ ತಾಂಚ್ಯಾ ಕುಟ್ಮಾಕ್ ದಿಲ್ಲೆಂ ದೆಣೆಂ ಆಮ್ಚೆ ಸಾಂಗಾತಾ ವಾಂಟುನ್ ಘೆತೇ ಆಸಾ. ತಾಚಿ ದೇಕ್ ಘೆವ್ನ್, ಆಜ್ ತಾಣೆ ದಿಲ್ಲ್ಯೆ ಕುಮ್ಕೆಚೊ ಬರೊ ಉಪೆಗ್ ಕರುನ್, ಉಂಚ್ಲ್ಯಾ ಶಿಕ್ಪಾಂತ್ ಊಂಚಾಯೆಕ್ ಪಾವೊನ್, ತುಮ್ಕಾಂ ಲಾಭ್ಲಲೆಂ ದೆಣೆಂ ಹೆರಾಂ ಸಾಂಗಾತಾ ವಾಂಟುನ್ ಘೆತ್ಲ್ಯಾರ್, ಮೈಕಲ್ ಡಿ ಸೊಜಾ ಕುಟ್ಮಾ ಥಂಯ್ ತುಮಿ ದಾಕಂವ್ಚೆಂ ಖರೆಂ ಉಪ್ಕಾರಿ ಮನ್ ಜಾಂವ್ಕ್ ಪಾವ್ತೆಲೆಂ” ಮ್ಹಳೆಂ.
ಎಂ.ಡಿ.ಎಸ್. ಚ್ಯಾರಿಟೀಸ್ ಹಾಚೊ ಸಲಹಾದಾರ್ ಪ್ರೊ| ಸಿ.ಎ. ಲೈನಲ್ ಅರಾನ್ಹಾ ಹಾಣಿ ದಿಶ್ಟಾವೊ ಭಾಷಣ್ ದಿಲೆಂ. ಆಪ್ಲ್ಯಾ ಉಲವ್ಪಾಂತ್ ತಾಣಿ ಪಾಟ್ಲ್ಯಾ ೧೩ ವರ್ಸಾಂ ಪಾಸುನ್ ಮೈಕಲ್ ಡಿ ಸೊಜಾ ಕುಟಮ್ ಉಂಚ್ಲ್ಯಾ ಶಿಕ್ಪಾಕ್, ಚಿಕಿತ್ಸೆಕ್, ಘರಾಂ ದುರುಸ್ತೆಕ್ ಆನಿ ಕಥೊಲಿಕ್ ಕುಟ್ಮಾಂತ್ಲ್ಯಾ ತಿಸ್ರ್ಯಾ ವಾ ಚವ್ತ್ಯಾ ಭುರ್ಗ್ಯಾಂಕ್ ಆದಾರ್ ದಿಂವ್ಚೆ ವಿಶ್ಯಾಂತ್ ಸಂಕ್ಷಿಪ್ತ್ ಮಾಹೆತ್ ದಿಲಿ.
ಎಡುಕೇರ್ ಉಪಕ್ರಮಾಖಾಲ್ 2013 ಪಾಸುನ್ 2025 ಪರ್ಯಾಂತ್ ಎಕುಣ್ 3,838 ವಿದ್ಯಾರ್ಥಿಂಕ್ ಶಿಕ್ಪಾ ಕುಮಕ್ ದಿಲ್ಯಾ ಆಸುನ್, ಹಾಂತುನ್ ಮಂಗ್ಳುರ್ ದಿಯೆಸೆಜಿಚಿಂ 3,098 ವಿದ್ಯಾರ್ಥಿ ಆನಿ ಉಡುಪಿ ದಿಯೆಸೆಜಿಚಿಂ 740 ವಿದ್ಯಾರ್ಥಿ ಆಸಾತ್. ಆದ್ಲ್ಯಾ ಆರ್ಥಿಕ್ ವರ್ಸಾಂತ್ ಉಡುಪಿ ದಿಯೆಸೆಜಿಂತ್ ಘರ್ ದುರುಸ್ತಿ ವಾ ಬಾಂದುಂಕ್ 79 ಲಾಕ್ ಆನಿ ತಿಸ್ರೆಂ ಬಾಳ್ ಕುಟ್ಮಾಕುಮ್ಕೆ ಯೆವ್ಜಣೆಖಾಲ್ 14.80 ಲಾಕ್ ಅನುದಾನ್ ದಿಲಾಂ ಮ್ಹಣ್ ತಾಣಿ ಮ್ಹಳೆಂ.
“ಎಕಾ ಜೀವಾನ್ ಅನ್ಯೇಕ್ ಜೀವ್ ಆಪ್ಡುಂಕ್ ಜಾಯ್” ಮ್ಹಳ್ಳ್ಯಾ ಇರಾದ್ಯಾನ್ ಎಡುಕೇರ್ ಫಲಾನುಭವಿ ಆದ್ಲ್ಯಾ ವಿದ್ಯಾರ್ಥಿಂಕ್ ಸಾಂಗಾತಾ ಹಾಡುನ್ ಏಕ್ ಸಂಪರ್ಕ್ ಜಾಳ್ ಸುರು ಕರ್ಚೆವಿಶ್ಯಾಂತ್ ಪ್ರೊ| ಸಿ.ಎ.| ಅರಾನ್ಹಾ ಹಾಣಿ ಆಲೊಚೆನ್ ಮಾಂಡ್ಲಿ. ಹಾಂಗಾಸರ್ ಕೊಣೀ ತುಮ್ಚೆಲಾಗಿಂ ದುಡು ವಿಚಾರ್ಚೆ ನಾಂತ್. ಫಕತ್ ಶಿಕ್ಪಾಚಿ ವಾ ವೃತ್ತೆಚಿ ಮಾಹೆತ್, ಕಾಮಾಂಚೆಂ ಅವ್ಕಾಸ್ ಆನಿ ಹೆರ್ ಗಜಾಲಿ ಎಕಾಮೆಕಾ ಸಾಂಗಾತಾ ವಾಂಟುನ್ ಘೆಂವ್ಕ್ ಹಿ ಏಕ್ ವೆದಿ ಜಾವ್ನ್ ಆಸ್ತೆಲಿ ಮ್ಹಣ್ ತಾಣಿ ಸ್ಪಶ್ಟ್ ಸಾಂಗ್ಲೆಂ.
ಪ್ರಸ್ತುತ್ ಶಿಕ್ಪಾ ವರ್ಸಾಂತ್ ಉಡುಪಿ ದಿಯೆಸೆಜಿಚ್ಯಾ 172 ವಿದ್ಯಾರ್ಥಿಂಕ್ ವೃತ್ತಿಪರ್ ಆನಿ ಉಂಚ್ಲ್ಯಾ ಶಿಕ್ಪಾಕ್ ಅಶೆಂ ಎಂಡಿಎಸ್ ಚ್ಯಾರಿಟೀಸ್ ಹಾಚೆಥಾವ್ನ್ ಕುಮ್ಕೆ ಹಾತ್ ದಿಲಾ. ಕಾರ್ಯಾಂತ್ ಆದ್ಲ್ಯಾ ಎಡುಕೇರ್ ಫಲಾನುಭವಿ ವಿದ್ಯಾರ್ಥಿ ತಶೆಂ ಪೋಶಕಾಂನಿ ಆಪ್ಲಿಂ ಭೊಗ್ಣಾಂ ಉಚಾರ್ಲಿಂ.
ವೆದಿ ಕಾರ್ಯಾಚ್ಯಾ ಸುರ್ವೆರ್ ಮಂಗ್ಳುರ್ ದಿಯೆಸೆಚ್ಯಾ ಕಥೊಲಿಕ್ ಶಿಕ್ಪಾ ಮಂಡಳಿಚೊ ಕಾರ್ಯದರ್ಶಿ ಮಾ| ದೊ| ಪ್ರವೀಣ್ ಲಿಯೋ ಲಸ್ರಾದೊ ಹಾಣಿ ವಿದ್ಯಾರ್ಥಿಂಕ್, ಪ್ರಾತ್ಯಕ್ಷಿಕಾ ವಾಪಾರುನ್ ಉಮೆದಿಚೆಂ ಮಾರ್ಗದರ್ಶನ್ ದಿಲೆಂ.
ಎಂಡಿಎಸ್ ಚ್ಯಾರಿಟೀಸ್ ಹಾಚೆ ಸಲಹಾದಾರ್ ಓಸ್ವಲ್ಡ್ ರೊಡ್ರಿಗಸ್, ಶುಭಾ ರೊಡ್ರಿಗಸ್, ಸ್ಟೀಫನ್ ಪಿಂಟೊ ಆನಿ ಎಂಡಿಎಸ್ ಕಾರ್ಯಾಲಯಾ ಥಾವ್ನ್ ವೀಣಾ ಆನಿ ತೇಜು ಕಾರ್ಯಾಕ್ ಹಾಜರ್ ಆಸ್ಲಿಂ.
ಸಾಹಿತಿ, ಪತ್ರಕರ್ತ್ ಎಚ್. ಎಮ್. ಪೆರ್ನಾಲ್ ಹಾಣೆ ಯೆವ್ಕಾರ್ ಮಾಗೊನ್ ಕಾರ್ಯೆಂ ಚಲವ್ನ್ ವೆಲೆಂ. ರೀನಾ ಡಿಕೋಸ್ತಾ ಹಿಣೆ ವಿದ್ಯಾರ್ಥಿಂಕ್ ದಸ್ತಾವೆಜಾಂ ಭರುಂಕ್ ಮಾಹೆತ್ ದೀವ್ನ್, ದಿನ್ವಾಸ್ ಪಾಟಯ್ಲೆ.
