ಆಯ್ತಾರಾ, ಸಪ್ತೆಂಬರ್ 13 ವೆರ್, ಯುನಾಯ್ಟೆಡ್ ಲೊರೆಟ್ಟೊ ಫ್ರೆಂಡ್ಸ್ ಹಾಣಿ ಸಾಂಪ್ರಾದಾಯಿಕ್ ಮೊಂತಿ ಫೆಸ್ತಾ ಬರಾಬರ್ ಸಂಸ್ಥ್ಯಾಚೊ ವರ್ಸುಗೆ ದೀಸ್ ದುಬಯ್ಚ್ಯಾ ಗ್ರಾಂಡ್ ಎಕ್ಸಾಯ್ಲರ್ ಹೊಟೆಲಾಂತ್ ವ್ಹಡಾ ದಬಾಜ್ಯಾನ್ ಸಂಭ್ರಮ್ಲೊ. ಫ್ಲೊಯ್ಡ್ ಕಿರಣ್ ಮೊರಾಸ್ ಹಾಣೆ ಕಾರ್ಯಾಚೆಂ ಸುಂಕಾಣ್ ಹಾತಿಂ ಧರುನ್, ಪೋಶಕ್, ಹಿತಯ್ಶಿ ಆನಿ ಸಾಂದ್ಯಾಂಕ್ ಯೆವ್ಕಾರ್ ಮಾಗೊನ್ ಕಾರ್ಯಾಕ್ ಚಾಲನ್ ದಿಲೆಂ.
ಮರಿಯಾಳ್ ಗೀತಾಂ ಸವೆಂ ಮೊಂತಿ ಫೆಸ್ತಾಚೆಂ ಆಚರಣ್ ಸುರ್ವಾತ್ಲೆಂ. ಉತ್ತಮ್ ಮಿನೇಜಸ್ ಆನಿ ಆರ್ಚಿ ಫೆರ್ನಾಂಡಿಸ್ ಹಾಣಿ ಗಾಯನಾಚೆಂ ಮುಕೆಲ್ಪಣ್ ಘೆತ್ಲೆಂ. ಜಮ್ಲೆಲ್ಯಾ ಭುರ್ಗ್ಯಾಂನಿ ಭಕ್ತಿಪಣಾನ್ ಮರಿಯೆಕ್ ಫುಲಾಂ ಅರ್ಪಿತಚ್, ಗ್ಲೆವಿನಾ ಆರಾನ್ಹಾ ಹಿಣೆ ಮಾಗ್ಣ್ಯಾಚಿ ರೀತ್ ಚಲವ್ನ್ ವೆಲಿ. ದೂದಾಂತ್ ಭರ್ಸಿಲ್ಲೆಂ ನವೆಂ ಸೆಂವ್ಚೆ ಮಾರಿಫಾತ್ ಸಗ್ಳ್ಯಾಂನಿ ಫೆಸ್ತಾ ಸಂಭ್ರಮ್ ವಾಂಟುನ್ ಘೆತ್ಲೊ.
ಉಪ್ರಾಂತ್ ಚಲ್ಲೆಲ್ಯಾ ವೆದಿ ಕಾರ್ಯಾಕ್ ಜಬೆಲ್ ಅಲಿ, ಸಾಂ. ಫ್ರಾನ್ಸಿಸ್ ಫಿರ್ಗಜೆಚೊ ಸಯ್ರೊ ಯಾಜಕ್ – ಮಾ| ಬಾ| ಲ್ಯಾನ್ಸಿ ನೊಯೆಲ್ ರೆಬೆಲ್ಲೊ, ಮುಕೆಲ್ ಸಯ್ರೊ ಜಾವ್ನ್, ಸಾಂ. ಮೈಕಲ್ ಮಂಗ್ಳುರಿ ಕೊಂಕ್ಣಿ ಸಮುದಾಯ್ ಶಾರ್ಜಾ ಹಾಚೊ ಮುಕೆಲ್ ಸಂಯೋಜಕ್ – ಅನಿಲ್ ಪಿಂಟೊ ಆನಿ ಜಬೆಲ್ ಅಲಿ ಕೊಂಕ್ಣಿ ಸಮುದಾಯ್ ಹಾಚೊ ಸಂಯೋಜಕ್ – ಆದಿತ್ ಲೋಬೊ, ಮುಕೆಲ್ ಸಯ್ರೆ ಜಾವ್ನ್ ಹಾಜರ್ ಆಸ್ಲೆ. ಸಂಸ್ಥ್ಯಾಚೊ ಅಧ್ಯಕ್ಷ್ ಡೊನಾಲ್ಡ್ ನೊರೊನ್ಹಾ, ಕಾರ್ಯದರ್ಶಿ ಜೀವಿತಾ ರೊಡ್ರಿಗಸ್ ಆನಿ ಆದ್ಲೊ ಅಧ್ಯಕ್ಷ್ ರೂಪೇಶ್ ಪಿಂಟೊ ಹಾಣಿ ಸಯ್ರ್ಯಾಂಕ್ ವೆದಿರ್ ಸಾಂಗಾತ್ ದಿಲೊ.
ಅಧ್ಯಕ್ಷ್ ಡೊನಾಲ್ಡ್ ನೊರೊನ್ಹಾನ್ ಯೆವ್ಕಾರ್ ಮಾಗೊನ್, ಸಯ್ರ್ಯಾಂಕ್ ಫುಲಾಂ ತುರೆ ಪಾಟವ್ನ್ ಮಾನ್ ಕೆಲೊ. ಕಾರ್ಯದರ್ಶಿ ಜೀವಿತಾ ರೊಡ್ರಿಗಸ್ ಹಿಣೆ 2025 – 26 ವ್ಯಾ ವರ್ಸಾಚಿ ಸಂಸ್ಥ್ಯಾಚಿಂ ಕಾರ್ಯಕ್ರಮಾಂ ಆನಿ ಉಪಕ್ರಮಾಂಚಿಂ ವರ್ದಿ ಸಭೆಮುಕಾರ್ ದವರ್ಲಿ. ಮುಕೆಲ್ ಸಯ್ರೊ ಮಾ| ಬಾ| ಲ್ಯಾನ್ಸಿ ನೊಯೆಲ್ ರೆಬೆಲ್ಲೊ ಹಾಣಿ ಫೆಸ್ತಾಚೊ ಸಂದೇಶ್ ಪಾಟಂವ್ಚೆ ಬರಾಬರ್ ಸೆವಾ ಆನಿ ಎಕ್ವಟಾಚ್ಯಾ ಮಹತ್ವಾ ವಿಶ್ಯಾಂತ್ ತಾಂಚೆ ವಿಚಾರ್ ವಾಂಟುನ್ ಘೆತ್ಲೆ.
ಸಂಸ್ಥ್ಯಾಚೊ ಶೆವೊಟ್ ಎಕ್ವಟ್ ಆನಿ ಸೆವೆಕ್ ಲಗ್ತಿ ಜಾವ್ನ್ ಸಮುದಾಯಾಕ್ ನಿರಂತರ್ ಆನಿ ನಿಸ್ವಾರ್ಥಿ ಸೆವಾ ದಿಲ್ಲ್ಯಾ ಇಗೇಶಿಯಸ್ ಡೆನಿಸ್ ದಾಂತಿಸ್ ಹಾಂಕಾ ಮಾನ್ ಪತ್ರ್, ಫುಲಾಂ – ಫಳಾಂ, ಶಾಲೊಪಾಟವ್ನ್ ಮಾನ್ ಕೆಲೊ. ಖಜಾನ್ದಾರ್ ಒಯ್ ಡಿ ಸೊಜಾ ಹಾಣಿ ಮಾನ್ ಪತ್ರ್ ವಾಚ್ಲೆಂ.
ನವೊ ಸಾಂದೊ ಜಾಲ್ಲ್ಯಾ ಹೊಸ್ಪೆಟ್ಚ್ಯಾ ಡೆರಿಲ್ ಅವಿನಾಶ್ ಸೊಜಾಕ್ ತಶೆಂ ಯೆವ್ಕಾರ್ ಮಾಗ್ಲೊ ಆನಿ ಸಂಸ್ಥ್ಯಾಚೆ ಸಾಂದೆ ಆನಿ ಭುರ್ಗ್ಯಾಂನಿಂ ಮೆಳೊನ್ ಆಪುರ್ಬಾಯೆಚೆಂ ಸಾಂಸ್ಕೃತಿಕ್ ಕಾರ್ಯೆಂ ಸಾದರ್ ಕೆಲೆಂ.
ಪ್ರೀತಿ ಸೀಮಾ ಡಿ ಸೊಜಾ ಹಿಣೆ ದಿನ್ವಾಸ್ ಪಾಟಯ್ಲೆ. ಫೆಸ್ತಾ ಜೆವ್ಣಾಸವೆಂ ಕಾರ್ಯೆಂ ಸಂಪನ್ನ್ ಜಾಲೆಂ.
ಸಮಾನ್ ಆಸಕ್ತೆಚ್ಯಾ ಸಾಂಗಾತ್ಯಾಂನಿ ಸಾಂಗಾತಾ ಯೇವ್ನ್ ನವೆಂಬರ್ 2019 ವ್ಯಾ ವರ್ಸಾ ಎಮಿರೆತಾಂತ್ ಎಕ್ವಟ್ ಆನಿ ಸೆವಾ ಧ್ಯೇಯಾಖಾಲ್ ಸುರ್ವಾತ್ಲೆಲ್ಯಾ ಯುನಾಯ್ಟೆಡ್ ಲೊರೆಟ್ಟೊ ಪ್ರೆಂಡ್ಸ್ (ULF) ಸಂಘಟನಾಂತ್ ಪ್ರಸ್ತುತ್ ಸೆವೆಕ್ ಸಮರ್ಪಿತ್ , 25 ಸಾಂದ್ಯಾಂಚಿಂ ಘಟ್-ಮೂಟ್ ಸಮಿತಿ ಆಸಾ. ಆಪ್ಲ್ಯಾ ಸೆವೆಚ್ಯಾ ಮಿಸಾಂವಾಂತ್ ಯುನಾಯ್ಟೆಡ್ ಲೊರೆಟ್ಟೊ ಫ್ರೆಂಡ್ಸ್ ಗಾಂವಾಂತ್, ಸಮುದಾಯಾಚ್ಯಾ ಗರ್ಜೆವೊಂತಾಂಕ್ ಶಿಕ್ಪಾಕ್, ಚಿಕಿತ್ಸೆಕ್, ಘರಾಂ ದುರುಸ್ತೆಕ್ ವಾ ಬಾಂದುಂಕ್ ಆರ್ಥಿಕ್ ಕುಮಕ್ ದೀವ್ನ್ ಆಸಾ. ಸಾಂಗಾತಾಚ್ ಉಂಚ್ಲೆಂ ಶಿಕಪ್ ಜೊಡುನ್ ಕಾಮಾಚೆ ಅವ್ಕಾಸ್ ಸೊಧುನ್ ಎಮಿರೆತಾಕ್ ವೆತೆಲ್ಯಾಂಕ್ ಕಾಮ್ ಆನಿ ವಿಜಾ ಹ್ಯಾ ಗಜಾಲಿಂನೀಯ್ ಕುಮಕ್ ಕರ್ತಾ. ಕೊಂಕ್ಣಿ ಭಾಸ್ ಆನಿ ಸಂಸ್ಕೃತೆಕ್ ಲಗ್ತಿಂ ಕಾರ್ಯಕ್ರಮಾಂ ಮಾಂಡುನ್ ಹಾಡ್ಚೆ ಸವೆಂ, ವರ್ಸಾವಾರ್ ಕೊಂಕಣಿ ಉಡ್ಕಣಾಂ ಮ್ಹಳ್ಳೆಂ ಖಾಸ್ ಕಾರ್ಯೆಂ ಮಾಂಡುನ್ ಹಾಡ್ತಾ.
