ಎಂ. ಸಿ.ಸಿ. ಬ್ಯಾಂಕಾನ್ 2025–26 ವ್ಯಾ ಆರ್ಥಿಕ್ ವರ್ಸಾಂತ್ 10.07 ಕೊರೊಡ್ ಲಾಭ್ ದಾಕಲ್ ಕೆಲ್ಲೊ ಆಸುನ್, ಆಯ್ತಾರಾ 20 ಸಪ್ತೆಂಬರ್ ಸಕಾಳಿಂ 11 ವರಾಂಚೇರ್ ಸಾಂ. ಲುವಿಸ್ ಪದ್ವೆ ಪೂರ್ವ್ ಕೊಲೆಜಿಚ್ಯಾ ಲೊಯೊಲಾ ಸಭಾಂಗ್ಣಾಂತ್ ಚಲ್ಲೆಲ್ಲ್ಯಾ 108 ವ್ಯಾ ವಾರ್ಶಿಕ್ ಮಹಾಸಭೆಂತ್ ಸಾಂದ್ಯಾಂಕ್ 10% ಡಿವಿಡೆಂಡ್ ಪೋಷಣ್ ಕೆಲೆಂ. ಬ್ಯಾಂಕಾಚೊ ಅಧ್ಯಕ್ಷ್ ಸಹಕಾರ ರತ್ನ ಅನಿಲ್ ಲೋಬೊ ಹಾಣಿ ಮಹಾಸಭೆಚೆಂ ಅಧ್ಯಕ್ಷ್ ಸ್ಥಾನ್ ಘೆತ್ಲ್ಲೆಂ.
ಸಭೆಕ್ ವಿಶೇಸ್ ಆಹ್ವಾನಿತ್ ಜಾವ್ನ್ ಬ್ಯಾಂಕಾಚೊ ಆದ್ಲೊ ಅಧ್ಯಕ್ಶ್ ತಶೆಂ ಪ್ರಸ್ತುತ್ ಜಿಲ್ಲ್ಯಾಚೊ ಸರ್ಕಾರಿ ವಕೀಲ್ ಎಂ.ಪಿ. ನೊರೋನ್ಹಾ, ಉದ್ಯಮಿ ರೋಹನ್ ಮೊಂತೆರೋ,ಮಂಗ್ಳುರ್ ಪ್ರದೇಶ್ ಕಥೊಲಿಕ್ ಸಭಾ ಅಧ್ಯಕ್ಶ್ ಸಂತೋಷ್ ಡಿಸೋಜ, ಆಲ್ ಇಂಡಿಯಾ ಕ್ಯಾಥೋಲಿಕ್ ಯುನಿಯನ್, ಕರ್ನಾಟಕ ಹಾಚೊ ಅಧ್ಯಕ್ಷ್ ಆಲ್ವಿನ್ ಕ್ವಾಡ್ರಸ್ ಆನಿ ಕ್ಯಾಥೋಲಿಕ್ ಅಸೋಸಿಯಶನ್ ಅಫ್ ಸೌತ್ ಕೆನರಾ ಅಧ್ಯಕ್ಷ್ ರೋನಾಲ್ಡ್ ಗೋಮ್ಸ್ ಹಾಜರ್ ಆಸೊನ್ ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೊ ಸಾಂಗಾತಾ ಮೆಳೊನ್ ದಿವೊ ಪೆಟವ್ನ್ ಮಹಾಸಭೆಕ್ ಚಾಲನ್ ದಿಲೆಂ. ಬ್ಯಾಂಕಾಚೊ ಸ್ಥಾಪಕ್ ಪಿ.ಎಫ್. ಎಕ್ಸ್ ಸಲ್ಡಾನ್ಹಾ ಹಾಂಚ್ಯಾ ತಸ್ವಿರೆಕ್ ಅಧ್ಯಕ್ಷ್, ಉಪಾಧ್ಯಕ್ಶ್ ಆನಿ ವಿಶೇಸ್ ಆಹ್ವಾನಿತಾಂನಿ ಫುಲಾಂ ಅರ್ಪುನ್ ನಮಾನ್ ಪಾಟಯ್ಲೊ.
“2018 ವ್ಯಾ ವರ್ಸಾ ಎಲಿಸಾಂವಾಕ್ ರಾವ್ತಾನಾ ಬ್ಯಾಂಕಾಚ್ಯಾ ಸರ್ವಾಂಗೀಣ್ ಅಭಿವೃದೆಚೆಂ ಉತರ್ ಜೆಂ ಸಾಂದ್ಯಾಂಕ್ ಆಮಿ ದಿಲ್ಲೆಂ ತೇ ಆತಾಂಯ್ ಪಾಳುನ್ ಆಸಾಂವ್. ಬ್ಯಾಂಕಾಚಿ ಪ್ರಗತಿ ಆನಿ ಅಭಿವೃದ್ದಿ ಮಾತ್ ಆಮ್ಚೊ ಶೆವೊಟ್. ಪ್ರಸ್ತುತ್ ಬ್ಯಾಂಕಾಂತ್ ವಿಸ್ತರಣಾಚೊ ಪಾಡ್ವೊ ಚಲ್ತೇ ಆಸುನ್ 2018 ವ್ಯಾ ವರ್ಸಾ ಫಕತ್ ದೋನ್ ಜಿಲ್ಲ್ಯಾಂಕ್ ಆನಿ 16 ಶಾಖ್ಯಾಂಕ್ ಸೀಮಿತ್ ಜಾವ್ನ್ ಆಸ್ಲ್ಲಿ ಕಾರ್ಯಾವ್ಯಾಪ್ತ್ ಆಜ್ ಅಖ್ಖ್ಯಾ ಕರ್ನಾಟಕಾಕ್ ವಿಸ್ತಾರಾಂವ್ಚೆ ಸವೆಂ 23 ಶಾಖ್ಯಾಂಕ್ ಪಾವಯ್ಲ್ಯಾ. ಹ್ಯಾ ಆರ್ಥಿಕ್ ವರ್ಸಾಚ್ಯಾ ಅಕೆರಿ ಭಿತರ್ 24 ವೊ ಶಾಖೊ ಪಡೀಲಾಂತ್ ಆನಿ 25 ವೊ ಶಾಖೊ ಕದ್ರಿ ಮಲ್ಲಿಕಟ್ಟೆಂತ್ ಉಗ್ತಾಯ್ತೆಲ್ಯಾಂವ್” ಮ್ಹಣ್ ಸಹಕಾರ್ ರತ್ನ ಅನಿಲ್ ಲೋಬೊನ್ ಆಪ್ಲ್ಯಾ ಅಧ್ಯಕ್ಶೀಯ್ ಭಾಷಣಾಂತ್ ಮ್ಹಳೆಂ.
“ಎಂಸಿಸಿ ಬ್ಯಾಂಕಾಚೇರ್ ಭಾರತೀಯ್ ರಿಜರ್ವ್ ಬ್ಯಾಂಕ್ ಆನಿ ರಾಜ್ಯ್ ಸರ್ಕಾರಾಚೊ ಸಹಕಾರಿ ಇಲಾಖೊ ಅಶೆಂ ‘ಡಬಲ್ ಇಂಜಿನ್’ ಕಂಟ್ರೋಲ್ ಆಸಾ ಜಾಲ್ಲ್ಯಾನ್ ಗ್ರಾಹಕಾಂನಿ ಖಂತ್ ಕರ್ಚಿ ಗರ್ಜ್ ನಾ. ಎಂಸಿಸಿ ಬ್ಯಾಂಕಾಂತ್ ಮೆಳ್ಚೆ ತಸಲಿ ಗ್ರಾಹಕ್ ಸೆವಾ ಪ್ರದೇಶಾಂತ್ ಖಂಯ್ಚ್ಯಾಯ್ ಬ್ಯಾಂಕಾನಿ ಮೆಳಾನಾ ಮ್ಹಣ್ ಆಮ್ಚ್ಯಾ ಗ್ರಾಹಕಾಂನಿ ಸಾಂಗ್ತಾನಾ ಆಮಿ 2018 ವ್ಯಾ ವರ್ಸಾ ದಿಲ್ಲೆಂ ಉತರ್ ಪಾಳ್ಳಾಂ ಮ್ಹಳ್ಳಿ ವರ್ತಿ ದಾದೊಸ್ಕಾಯ್ ಆಮ್ಕಾಂ ಭೊಗ್ತಾ. ತುಮ್ಚ್ಯಾ ಸಲಹಾ ಸೂಚನಾಂಕ್ ಸದಾಂಚ್ ಆಮಿ ಕಾಳ್ಜಾಂ – ಮನಾಂ ಉಗ್ತಿಂ ಆಸಾತ್. ಪೂಣ್ ತುಮಿ ಆಮ್ಕಾಂ ಸಲಹಾ ಸುಚನಾಂ ದಿತಾನಾ, ಭಲಾಯ್ಕೆಭರಿತ್ ಆನಿ ಬ್ಯಾಂಕಾಚಾ ವಾಡಾವಳಿಕ್ ಪೂರಕ್ ಸಲಹಾ ಸೂಚನಾಂ ದಿಯಾ. ಕಿತ್ಯಾಕ್ ಮ್ಹಳ್ಯಾರ್ ಎಂಸಿಸಿ ಬ್ಯಾಂಕ್ ಮ್ಹಳ್ಯಾರ್ ಏಕ್ ಜೋಡ್ ಕುಟಮ್ ಆಸ್ಲಲೆಪರಿಂ. ಆಮ್ಚ್ಯಾ ಪೂರ್ವಜಾಂನಿ ಆಮ್ಚ್ಯಾ ತಾಬೆನ್ ಸಾಂಬಾಳುಂಕ್ ಆನಿ ವಾಡಂವ್ಕ್ ದಿಲ್ಲೆಂ ದಾಯ್ಜ್. ಏಕ್ ಕುಟಮ್ ಜಾವ್ನ್ ಆಮ್ಕಾಂ ತೆಂ ಸಾಂಬಾಳುಂಕ್, ವಾಡಂವ್ಕ್ ಆಸಾ” ಮ್ಹಣ್ ಸಹಕಾರ ರತ್ನ ಅನಿಲ್ ಲೋಬೊನ್ ಮ್ಹಳೆಂ.
“ಬ್ಯಾಂಕಿಂಗ್ ವೆಗಾನ್ ವಾಡೊನ್ ಆಸ್ಚೆಂ ಉದ್ಯಮ್ ಜಾವ್ನಾಸಾ. ಹ್ಯಾ ಉದ್ಯಮಾಕ್ ಬ್ರ್ಯಾಂಡಿಂಗಾಚಿ ಗರ್ಜ್ ಆಸಾ. ಪ್ರಸ್ತುತ್ ಆಮಿ ಬ್ಯಾಂಕಾಚಾ ಬ್ರ್ಯಾಂಡಿಗಾಚೇರ್ ಕಾಮ್ ಕರುನ್ ಆಸಾಂವ್. ಎದೊಳ್ಚ್ ನವೊ ಜಾಳಿಜಾಗೊ ಕಾರ್ಯಾಳ್ ಜಾಲಾ, ನವ್ಯಾ ಲಾಂಛನಾಚೆರ್ ಕಾಮ್ ಜಾಲಾಂ. ಜನೆರಾ ತಿತ್ಲ್ಯಾಕ್ ಸರ್ವ್ ಶಾಖೆ ನವ್ಯಾ ರುಪಾರ್ ಸೊಭ್ತಲೆ. ಹ್ಯಾ ಆರ್ಥಿಕ್ ವರ್ಸಾ ಭಿತರ್ ಎಟಿಎಂ ಸಂಕೊ 20 ಪಾವಯ್ತೆಲ್ಯಾಂವ್” ಮ್ಹಣ್ ಲೋಬೊ ಮ್ಹಣಾಲೊ.
ಸಾಂದ್ಯಾಂನಿ ಬರ್ಪಿನಿಶಿಂ ವಿಚಾರ್ಲೆಲ್ಯಾ ಸವಾಲಾಂಕ್ ಮಹಾ ಪ್ರಬಂಧಕ್ ಸುನಿಲ್ ಮಿನೇಜಸ್ ಹಾಣಿ ಜಾಪಿ ದಿಲ್ಯೊ. ಸಭೆಂತ್ ರಾಕ್ಣೊ ಸಾಹಿತ್ಯ್ ಪ್ರಶಸ್ತಿ ಆಪ್ಣಾಯಿಲ್ಲ್ಯಾ ದೊ| ಜೆರಿ ನಿಡ್ಡೋಡಿಕ್ ಫುಲಾಂ – ಶಾಲೊ ದೀವ್ನ್ ಮಾನ್ ಕೆಲೊ. ಪ್ರಾರ್ಥನ್ ಗೀತಾ ಉಪ್ರಾಂತ್ ರೆಮೊನಾ ಇವೆಟ್ ಪಿರೇರಾ ಪಂಗ್ಡಾಥಾವ್ನ್ ಸ್ವಾಗತ್ ನಾಚ್ ಸಾದರ್ ಜಾಲೊ.
ವೆದಿರ್ ಬ್ಯಾಂಕಾಚೊ ಉಪಾಧ್ಯಕ್ಶ್ ಜೆರಾಲ್ಡ್ ಜೂಡ್ ಡಿಸಿಲ್ವಾ ಆನಿ ನಿರ್ದೇಶಕ್ ಆಂಡ್ರ್ಯೂ ಡಿಸೋಜ, ಜೋಸೆಫ್ ಎಂ. ಅನಿಲ್ ಪತ್ರಾವೊ, ದೊ| ಜೆರಾಲ್ಡ್ ಪಿಂಟೊ, ಡೇವಿಡ್ ಡಿಸೋಜ, ಎಲ್ರಾಯ್ ಕಿರಣ್ ಕ್ರಾಸ್ಟೊ, ರೋಶನ್ ಡಿಸೋಜ, ಹೆರಾಲ್ಡ್ ಮೊಂತೆರೊ, ಜೆ.ಪಿ. ರೊಡ್ರಿಗಸ್, ವಿನ್ಸೆಂಟ್ ಲಸ್ರಾದೊ, ಮೆಲ್ವಿನ್ ವಾಸ್, ಐರಿನ್ ರೆಬೆಲ್ಲೊ, ದೊ| ಫ್ರೀಡಾ ಡಿಸೋಜ ಆನಿ ವೃತ್ತಿಪರ್ ನಿರ್ದೇಶಕ್ ಸಿ.ಜಿ. ಪಿಂಟೊ, ಸುಶಾಂತ್ ಸಲ್ಡಾನ್ಹಾ ಆನಿ ಮಹಾ ಪ್ರಬಂಧಕ್ ಸುನಿಲ್ ಮಿನೇಜಸ್ ಹಾಜರ್ ಆಸ್ಲೆ.
ಸುನಿಲ್ ಮಿನೇಜಸ್ ಹಾಣಿ ಯೆವ್ಕಾರ್ ಮಾಗ್ಲೊ. ಡೆರಿಲ್ ಲಸ್ರಾದೊ ಹಾಣಿ ಕಾರ್ಯೆಂ ಚಲಯ್ಲೆಂ
