2026 ವ್ಯಾ ವರ್ಸಾಚೊ ಲಿಯೊ ರೊಡ್ರಿಗಸ್ ಕುಟಮ್ ಕಿಟಾಳ್ ಯುವ ಪುರಸ್ಕಾರ್ ಯುವ ಕವಿ, ಕಥಾಕಾರ್ ಆನಿ ಲೇಖಕ್ ಅಲಂಗಾರ್, ಮೂಡಬಿದ್ರಿಚ್ಯಾ ಗ್ಲ್ಯಾನಿಶ್ ಜ್ಯೂಡ್ ಮಾರ್ಟಿಸ್ ಹಾಕಾ ಲಾಭ್ಲಾ. ಸನ್ವಾರಾ ಅಕ್ತೋಬರ್ 3 ವೆರ್ ಸಾಂಜೆಚ್ಯಾ 6.30 ವರಾರ್ ಮಂಗ್ಳುರ್ ಹಂಪನ್ಕಟ್ಟ್ಯಾರ್ ಎಂಸಿಸಿ ಬ್ಯಾಂಕಾಚ್ಯಾ ಫಿಎಫ್ಎಕ್ಸ್ ಸಭಾಗೃಹಾಂತ್ ಹೊ ಪುರಸ್ಕಾರ್ ತಾಕಾ ಲಿಯೋ ರೊಡ್ರಿಗಸ್ ಹೆ ಖುದ್ ಭೆಟಯ್ತಲೆ. ಹೊ ಪುರಸ್ಕಾರ್ ನಗ್ದೆನ್ ರುಪಯ್ 25,000/- ಆನಿ ಮಾನ್ ಪತ್ರ್ ಆಟಾಪ್ತಾ.
2011 ವಾ ವರ್ಸಾ ಫೆಭ್ರೆರಾಚ್ಯಾ 5 ವೆರ್ ಸುರು ಜಾವ್ನ್, ಆಜ್ ಮೆರೆನ್ ಖಳಾನಾಸ್ತಾನಾ ಫಾಯ್ಸ್ ಜಾವ್ನ್ ಆಸ್ಚೆಂ ಕಿಟಾಳ್ 2012 ವ್ಯಾ ವರ್ಸಾ ಪಾಸುನ್ ಕೊಂಕ್ಣೆಂತ್ ಬರಂವ್ಚ್ಯಾ ಯುವ ಲೇಖಕಾಂಚಿಂ ಪ್ರತಿಭಾ ಒಳ್ಕುನ್ ತಾಂಕಾ ಪ್ರೋತ್ಸಾವ್ ದಿಂವ್ಚ್ಯಾ ಉದ್ದೇಶಾನ್ ವರ್ಸಾವಾರ್ ಕಿಟಾಳ್ ಯುವ ಪುರಸ್ಕಾರ್ ಪಾಟವ್ನ್ ಆಸಾ. ಅಬುದಾಬಿಂತ್ ಜಿಯೆಂವ್ಚೊ ಅನಿವಾಸಿ ಉದ್ಯಮಿ ತಶೆಂ ಕೊಂಕ್ಣಿ ಸಮರ್ತಕ್ ಲಿಯೋ ರೊಡ್ರಿಗಸ್ ಪಾಟ್ಲ್ಯಾ ಪಂದ್ರಾ ವರ್ಸಾಂ ಪಾಸುನ್ ಆಪ್ಲ್ಯಾ ಕುಟ್ಮಾಚ್ಯಾ ನಾಂವಾನ್ ಹೊ ಪುರಸ್ಕಾರ್ ದೀವ್ನ್ ಆಸಾತ್. ಹ್ಯಾ ಆದಿಂ ಕಿಟಾಳ್ ಯುವ ಪುರಸ್ಕಾರ್ ಜೊಡ್ಲೆಲ್ಯಾಂ ಪಯ್ಕಿ ವಿಲ್ಸನ್ ಕಟೀಲ್, ವಿಲ್ಮ ಬಂಟ್ವಾಳ್, ಸ್ಟ್ಯಾನಿ ಬೇಳಾ, ರೋಶು ಬಜ್ಪೆ, ಜೊ.ಸಿ.ಸಿದ್ದಕಟ್ಟೆ, ಕಿರಣ್ ನಿರ್ಕಾಣ್ – ಪ್ರಮುಕ್ ಜಾವ್ನಾಸುನ್ ಆಜ್ ಕೊಂಕ್ಣೆಂತ್ ನಾಮ್ನಾಚೆ ತಶೆಂ ಉತ್ತೀಮ್ ಸಾಹಿತಿ ಜಾವ್ನ್ ತಿಂ ಪರ್ಜಳುನ್ ಆಸಾತ್.
ಪಾಟ್ಲ್ಯಾ ಎಕಾ ದಶಕಾಥಾವ್ನ್ ಕೊಂಕ್ಣೆಂತ್ ಬರವ್ನ್ ಅಸ್ಚೊ ಗ್ಲ್ಯಾನಿಶ್ ಜ್ಯೂಡ್ ಮಾರ್ಟಿಸ್ ಪ್ರಸ್ತುತ್ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಂತ್ ರಸಾಯನ್ ಶಾಸ್ತ್ರಾಂತ್ ಪಿ.ಎಚ್.ಡಿ ಚೊ ಸಂಸೊಧ್ ಚಲೊವ್ನ್ ಆಸಾ. 2024 ವ್ಯಾ ವರ್ಸಾ ತಾಚ್ಯಾ ಮಟ್ವ್ಯಾ ಕಾಣಿಯಾಂಚೊಂ ಪುಸ್ತಕ್ ಹೆರಿಡಿಟಿ ಫಾಯ್ಸ್ ಜಾಲಾ. 2025 ವ್ಯಾ ತಾಣೆ ಬರಯಿಲ್ಲ್ಯಾ ಪದಾಕ್ ‘ECW ಬೆಸ್ಟ್ ಮಲ್ಟಿಲಿಂಗ್ವಲ್ ಲಿರಿಸಿಸ್ಟ್ ಪ್ರಶಸ್ತಿ’ ಫಾವೊ ಜಾಲ್ಯಾ. ಆಜ್ ಮೆರೆನ್ ಕೊಂಕ್ಣೆಂತ್ ತಾಣೆ 25 ಮಟ್ವ್ಯೊ ಕಥಾ, 60 ಕವಿತಾ ಆನಿ 20 ಲೇಖನಾಂ ಬರಯ್ಲ್ಯಾಂತ್. ಕವಿತಾ, ಮಟ್ವ್ಯೊ ಕಾಣಿಯೊ ತಾಚೆಂ ಪಸಂದೆಚೆಂ ಸಾಹಿತ್ ಶೆತ್ ತರಿ ಸಬಾರ್ ವೆಗ್ಯಾನಿಕ್ ಲೇಖನಾಂ ತಾಣೆ ಬರಯ್ಲ್ಯಾಂತ್ . ಆನಿ ತಿಂ ಅಂತರಾಷ್ಟ್ರೀಯ್ ಪತ್ರಾಂನಿ ಫಾಯ್ಸ್ ಜಾಲ್ಯಾಂತ್. ಕೊಂಕ್ಣಿ ಬರಾಬರ್ ಇಂಗ್ಲಿಷ್, ಕನ್ನಡ ಆನಿ ಹಿಂದಿ ಭಾಸಾಂನೀಯ್ ಗ್ಲ್ಯಾನಿಶ್ ಬರಯ್ತಾ.
ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಹಾಂಗಾಸರ್ ಡಾ| ಸಂತೋಷ್ ಎಲ್. ಗಾಂವ್ಕರ್ ಹಾಂಚ್ಯಾ ಮಾರ್ಗದರ್ಶನಾರ್ ಪಿಎಚ್ಡಿ ಅಧ್ಯಯನ್ ಕರುನ್ ಆಸ್ಚ್ಯಾ ಗ್ಲ್ಯಾನಿಶಾ, ಆರ್ಗ್ಯಾನಿಕ್ ಆನಿ ಮೆಡಿಸಿನಲ್ ಕೆಮಿಸ್ಟ್ರಿ ವಿಶಯಾಚೇರ್ , 2024 ರಿಂದ 25 ಪ್ರಾಸ್ ಚಡಿತ್ ವೈಜ್ಞಾನಿಕ್ ಪ್ರಕಟಣಾಂ ಕೆಲ್ಲಿಂ ಆಸುನ್, ರಾಸಾಯನ್ ವಿಜ್ಞಾನ್ ಶೆತಾಕ್ ತಾಣೆ ದಿಲ್ಲಿ ದೆಣ್ಗಿ ಲೆಕಾಕ್ ಧರುನ್ ತಾಕಾ ಲಂಡನ್ಚ್ಯಾ ರಾಯಲ್ ಸೊಸೈಟಿ ಆಫ್ ಕೆಮಿಸ್ಟ್ರಿ (AMRSC) ಹಾಚೊ ಅಸೋಸಿಯೇಟ್ ಸಾಂದೊ ಜಾವ್ನ್ ಘೆತ್ಲಾ. ತೋ ಅಲಂಗಾರ್ ಮೂಡಬಿದ್ರಿಚ್ಯಾ ಲವೀನಾ ಮತ್ತು ಗಿಲ್ಬರ್ಟ್ ಮಾರ್ಟಿಸ್ ಹಾಂಚೊ ಪೂತ್ ಜಾವ್ನಾಸಾ.
: ಕಿಟಾಳಾರ್ ಗ್ಲ್ಯಾನಿಶ್ ಮಾರ್ಟಿಸ್ ಬರ್ಪಾಂ :
https://kittall.com/author/glanish-martis/
