ಮಂಗ್ಳುರ‍್ಚ್ಯಾ ವಿಶ್ವ್ ಕೊಂಕ್ಣಿ ಕೆಂದ್ರಾಚ್ಯಾ ಕೊಂಕ್ಣಿ ಭಾಶಾ ಆನಿ ಸಂಸ್ಕೃತಿ ಪ್ರತಿಶ್ಠಾನಾಚೆ ಅಧ್ಯಕ್ಷ್ ಆನಿ ಕೊಂಕ್ಣಿ ಕಾರ್ಯಕರ‍್ತೆ ಸಿಎ ನಂದಗೋಪಾಲ್ ಶೆಣೈ ಹಾಂಚಿ 34ವ್ಯಾ ಅಖಿಲ್ ಭಾರತೀಯ್ ಕೊಂಕ್ಣಿ ಅಧಿವೆಶನಾಚ್ಯಾ ಅಧ್ಯಕ್ಷಪದಾರ್ ವಿಂಚವ್ಣ್ ಜಾಲ್ಯಾ. ಅಖಿಲ್ ಭಾರತೀಯ್ ಕೊಂಕ್ಣಿ ಪರಿಶದೆನ್ ಆಯೊಜೀತ್ ಕೆಲ್ಲೆಂ ಹೆಂ ಅಧಿವೆಶನ್ 2026 ನವೆಂಬರಾಚ್ಯಾ 14 ಆನಿ 15 ವೆರ್ ಪುಣೆ, ಮಹಾರಾಷ್ಟ್ರ್ ಹಾಂಗಾ ಜಾತಲೆಂ.
ತೆ ಫಾದರ್ ಮೊಉಜೀಞು ದ ಆತಾಈದ್ ಹಾಂಚೆ ಥಾವ್ನ್ ಅಧ್ಯಕ್ಷಪದಾಚಿಂ ಸುತ್ರಾಂ ಸ್ವಿಕಾರ‍್ತಲೆ. ಫಾದರ್ ಆತಾಈದ್ ಹಾಂಣಿ ಫಾಟ್ಲ್ಯಾ ದೊನ್ ವರ್ಸಾಂ ಥಾವ್ನ್ ಪರಿಶದೆಚ್ಯಾ ಅಧ್ಯಕ್ಶಾಚೆಂ ಪದ್ ಸಾಂಬಾಳ್ಳಾಂ.
ಸಿ.ಎ ನಂದಗೋಪಾಲ್ ಶೆಣೈ ಹೆ ವೃತ್ತೆನ್ ಚಾರ್ಟರ್ಡ್ ಅಕಾವ್ಟಂತ್ ಆಸಾತ್ ಆನಿ 1989 ವರ್ಸಾ ಸಾವ್ನ್ ಅಪ್ರತ್ಯಕ್ಷ್ ಕರಾಂಚ್ಯಾ ಶೆತಾಂತ್ ಕಾರ್ಯರತ್ ಆಸಾತ್. ಕೊಂಕ್ಣಿ ಭಾಶಾ, ಸಂಸ್ಕೃತಿ ಆನಿ ಸಮಾಜ್ ಹಾಂಚ್ಯಾ ವಿಕಾಸಾ ಖಾತೀರ್ ತಾಂಣಿ ಸತತ್ ಆಪ್ಲೆಂ ಯೋಗ‌ದಾನ್ ದಿಲಾಂ.
ತೆ 2021 ಪಾಸೂನ್ ವಿಶ್ವ್ ಕೊಂಕ್ಣಿ ಕೆಂದ್ರಾಚ್ಯಾ ಕೊಂಕ್ಣಿ ಭಾಶಾ ಆನಿ ಸಂಸ್ಕೃತಿ ಪ್ರತಿಶ್ಠಾನಾಚೆ ಅಧ್ಯಕ್ಷ್ ಮ್ಹಣೂನ್ ಕಾರ್ಯರತ್ ಆಸಾತ್. ವಿಶ್ವ್ ಕೊಂಕ್ಣಿ ಕೆಂದ್ರಾಚ್ಯಾ ಮಾಧ್ಯಮಾಂತ್ಲ್ಯಾನ್ ತಾಂಣಿ ವಿಶ್ವ್ ಕೊಂಕ್ಣಿ ಯೂಟ್ಯೂಬ್ ಚ್ಯಾನೆಲಾರ್ 1700 ಪರಸ್ ಚಡ್ ಕೊಂಕಣಿ ವಿಡಿಯೊ ನಿರ್ಮಿತೀಕ್ ಆನಿ ಕೊಂಕ್ಣಿ ಭಾಶೆಂತ್ಲೆ ಆಶಯ್ ನಿರ್ಮಿತೀಕ್ ಮೊಲಾಚೊ ಹಾತ್‌ಭಾರ್ ಲಾಯ್ಲಾ. ತಶೆಂಚ್, ‘ವಿದ್ಯಾಕಲ್ಪಕ್’ ಶಿಶ್ಯವೃತ್ತಿ ಯೆವ್ಜಣ್ ಆನಿ ‘ಕ್ಷಿತಿಜ್’ ಸೊಫ್ಟ್ ಸ್ಕಿಲ್ಸ್ ಪ್ರಶಿಕ್ಷಣ್ ಕಾರ್ಯಾವಳ್ ಸಾರ್ಕೆ ಯುವಾ ಸಕ್ಷಮೀಕರಣಾಚ್ಯಾ ಉಪಕ್ರಮಾಂಚೆಂ ಫುಡಾರಪಣ್ ಲೆಗೀತ್ ಕೆಲಾಂ.
ತಾಂಚ್ಯಾ ಫುಡಾರಪಣಾ ಖಾಲಾ ಕೊಂಕ್ಣಿ ಭಾಶೆಚೆ ಚಳವಳೀಕ್ ಅದೀಕ್ ಗತಿ ಮೆಳ್ಟಲಿ ಅಸೊ ವಿಶ್ವಾಸ್ ದೇಶ್‌‌ಭರ್ ಕೊಂಕ್ಣಿ ಭಾಶೆಚ್ಯಾ ಸಂವರ‍್ಧನ್ ಆನಿ ವಿಕಾಸಾ ಖಾತೀರ್ ಕಾರ‍್ಯ್ ಕರ್ಪಿ ಅಖಿಲ್ ಭಾರತೀಯ್ ಕೊಂಕ್ಣಿ ಪರಿಶದ್ ಹೆ ಸರ್ವೊಚ್ಚ್ ಸಂಸ್ಥೆನ್ ವ್ಯಕ್ತ್ ಕೆಲಾ.
