ಎಚ್. ಆರ್. ಆಳ್ವನ್ ಲಿಖ್‌ಲ್ಲ್ಯಾ ಕೆನರಾಂತ್ ಬದ್ಲಾಲ್ಲೆಂ ಜಿವಿತ್ ಆನಿ ಹೆರ್ ಲೇಖನಾಂ ಪುಸ್ತಕಾಚೆಂ ಮೊಕ್ಳಿಕ್ ಕಾರ್ಯೆಂ ಅಕ್ಟೋಬರ್ 1 ತಾರಿಕೆರ್ ಮಂಗ್ಳುರಾಂತ್ಲ್ಯಾ ದಾಯ್ಜಿ ವರ್ಲ್ಡ್ ಪ್ರಧಾನ್ ದಫ್ತರಾಂತ್ ಚಲ್ಲೆಂ. ಮುಂಬಯ್ಚ್ಯಾ ಪ್ರಿಂಟಾನಿಯಾ ಖ್ಯಾತೆಚೊ ಉದ್ಯಮಿ, ಮೋಡೆಲ್ ಶೆಡ್ಯೂಲ್ಡ್ ಬ್ಯಾಂಕಾಚೊ ಅಧ್ಯಕ್ಷ್, ಪಾಲ್ಘರಾಂತ್ಲ್ಯಾ ಸೈಂಟ್ ಜೋನ್ ಉಂಚ್ಲ್ಯಾ ಶಿಕ್ಪಾ ಸಂಸ್ಥ್ಯಾಂಚೊ ಸ್ಥಾಪಕ್ ಆನಿ ಮಹಾರಾಷ್ಟ್ರ ಕೊಂಕ್ಣಿ ಭಾಷಾ ಮಂಡಳಾಚೊ ಅಧ್ಯಕ್ಷ್ ಆಲ್ಬರ್ಟ್ ಡಬ್ಲ್ಯೂ. ಡಿಸೋಜಾನ್ ಪುಸ್ತಕ್ ಮೊಕ್ಳಿಕ್ ಕೆಲೆಂ.
ಆಲ್ಬರ್ಟಾನ್ ಉಲವ್ನ್ – ಮಂಗ್ಳುರ್ ದಿಯೆಸೆಜ್ ಏಕೀಕೃತ್ ಆಸ್ತಾನಾ ಅಖ್ಖ್ಯಾ ದಿಯೆಸೆಜಿಚೊ ಯುವಜಣ್ ಮುಕೆಲಿ, ದಿಯೆಸೆಜಿಚಾ ಗೊವ್ಳಿಕ್ ಪರಿಷದೆಚೊ ಪಯ್ಲೊ ಚುನಾಯಿತ್ ಲಾಯಿಕ್ ಕಾರ್ಯದರ್ಶಿ ಆನಿ ಅರ‍್ಧ್ಯಾ ಶತಮಾನಾ ವಯ್ಲ್ಯಾ ಆವ್ದೆ ಥಾವ್ನ್ ಕೊಂಕ್ಣಿ ಪತ್ರಾಂನಿ ಸರಾಗ್ ಬರಯಿತ್ತ್ ಆಸ್ಚ್ಯಾ ಲೇಖಕ್ ಎಚ್. ಆರ್. ಆಳ್ವ ಹಾಚಿಂ ಲೇಖನಾಂ ಹಾಂವ್ ವಾಚುನ್ಂಚ್ ಆಯ್ಲಾಂ. ಬೊರಿವಿಂತ್ಲ್ಯಾ ಆಮ್ಚ್ಯಾ ಮೌಂಟ್‌ವ್ಯೂವ್ ಮೆಂಗ್ಲೂರ್ ಸ್ಟೋರ‍್ಸ್ ಆಂಡ್ ಕೋಲ್ಡ್ ಸ್ಟೋರೆಜಾಕ್ ಗಾಂವ್ಚೆ ಜಾಯ್ತೆ ಗ್ರಾಹಕ್ ಆಸಾತ್. ತ್ಯಾಪಯ್ಕಿಂ ಥೊಡೆ ದಿವೊ ಹಫ್ತ್ಯಾಳ್ಯಾರ್ ಸರಾಗ್ ಯೆಂವ್ಚ್ಯಾ ಎಚ್. ಆರ್. ಆಳ್ವಚಾ ಬರ‍್ಪಾಂಚಿ ಹೊಗ್ಳಾಪ್ ಉಚಾರ‍್ತಾತ್. ರಾಜ್ಯ್ ಶಾಸ್ತ್ರಾಂತ್ ಎಂಎ, ಕಾನೂನ್ ಆನಿ ಇಂಜಿನಿಯರಿಂಗ್ ವಿಷಯಾಂನಿ ಶಿಕಪ್ ಆಸ್ಚ್ಯಾ ಆಳ್ವಚಿಂ ಲೇಖನಾಂ ಮಾಹೆತೆಚಿಂ ಆನಿ ಆಸಕ್ತ್ ಉಟಂವ್ಚಿಂ ಆಸ್ತಾತ್. ಹ್ಯಾ ಖಾತಿರ್ ತಿಂ ಬೊರಿಂಚ್ ಖಾಯ್ಸ್ ಜಾತಾತ್. ತಾಚಾ ಮರಿಯಾಡ್ಸ್ ಪ್ರಕಾಶನಾಚಾ ಮುಕಾಂತ್ರ್ ಫಾಯ್ಸ್ ಕೆಲ್ಲ್ಯಾ 25 ಲೇಖನಾಂಚೊ ಸಂಗ್ರಹ್ ಕೆನರಾಂತ್ ಬದ್ಲಾಲ್ಲೆಂ ಜಿವಿತ್ ಆನಿ ಹೆರ್ ಲೇಖನಾಂ ಪುಸ್ತಕ್ ಉಗ್ತಾವಣ್ ಕರುಂಕ್ ವ್ಹಡ್ ಅಭಿಮಾನ್ ಭಗ್ತಾ ಮ್ಹಳೆಂ.
ಪುಸ್ತಕಾಚಾ ಲೇಖನಾಂವಿಶಿಂ ಉಲಯಿಲ್ಲ್ಯಾ ಆಲ್ಬರ್ಟಾನ್ – ಎಚ್. ಆರ್. ಆಳ್ವ ಆನಿ ಹಾಂವ್ – ಆಮಿ ದೊಗೀ ಮುಳಾನ್ ಗ್ರಾಮೀಣ್ ಪ್ರದೆಶಾಂತ್ಲೆ ಕೃಷಿಕ್. ಕೆನರಾಂತ್ ಬದ್ಲಾಲ್ಲೆಂ ಜಿವಿತ್ ಆನಿ ಹೆರ್ ಲೇಖನಾಂ ಪುಸ್ತಕಾಂತ್ ಮೂಳ್ ಕೆನರಾಂತ್ಲ್ಯಾ (ಸ್ಥಾಪನ್ 1800 ) ಬದ್ಲಾಲ್ಲ್ಯಾ ಜಿವಿತಾವಿಶಿಂ ಪ್ರಮುಕ್ ಲೇಖನಾಸವೆಂ, ಗ್ರಾಮೀಣ್ ಜಿವಿತ್, ರೈತಾಂನಿ ಭಗುನ್ ಆಸ್ಚೆ ಕಷ್ಟ್ – ಸಂಕಷ್ಟ್, ಸ್ವಾತಂತ್ರ್ಯ್ ಚಳ್ವಳ್, ಮಹಾತ್ಮಾ ಗಾಂಧಿಚೆ ವಿಚಾರ್, ಪ್ರಜಾಪ್ರಭುತ್ವ್ ಆನಿ ತೆಂ ಉರಂವ್ಚಿ ಗರ್ಜ್, ಮಹತ್ವಾಚೆಂ ಮತದಾನ್, ಪಂಚವಾರ್ಷಿಕ್ ಯೋಜನಾಂ, ಖಾಣ್, ದೂದ್ ಆನಿ ಮಾಸ್ಳೆ ಬಾಬ್ತಿಚಿ ಕ್ರಾಂತಿ,ಬ್ರಿಟಿಷ್ ಕಾಳಾ ಥಾವ್ನ್ ಆತಾಂ ಪರ್ಯಾಂತ್ ಭಾರತಾಂತ್ಲೆ ಶಿಕ್ಪಾ ನಿತಿ, ಆವಯ್ – ಬಾಪಯ್ಚೆಂ ಮಹತ್ವ್ ಆಸಲ್ಯಾ ಆನಿ ಹೆರ್ ವಿಷಯಾಂಚೆರ್ 25 ಲೇಖನಾಂ ಆಸಾತ್. ಅಕ್ರೇಚೆಂ ಲೇಖನ್ – ವ್ಹಡಿಲಾಂನಿ ಭುರ‍್ಗ್ಯಾಂಚಿ ಆಸಕ್ತ್ ಸಮ್ಜಾಜಯ್ ಹೆಂ ಬಾರಾವಿ ಪರ್ಯಾಂತ್ ಶಿಕ್ಚಿಂ ಭುರ‍್ಗಿಂ ಆಸ್ಚ್ಯಾ ವ್ಹಡಿಲಾಂನಿ ಆವಶ್ಯ್ ಜಾವ್ನ್ ವಾಚಿಜಾಯ್ ಜಾಲ್ಲ್ಯಾ ತಸಲೆಂ ಮ್ಹಳೆಂ.
ಮುಕಾರುನ್ ತಾಣೆ ಸಾಂಗ್ಲೆಂ ಪುಸ್ತಕ್ ರುಪಾರ್ ಛಾಪೊ ಜಾಲ್ಲೆಂ ಸಾಹಿತ್ಯ್ ಜಾಯ್ತಿತ್ಲಿಂ ವರ್ಸಾಂ ಅಮರ್ ಜಾವ್ನ್ ಉರ್ತಾ. ತಾಂತುಂಯೀ ಸರ್ವ್ ಕಾಳಾಕ್ ಲಗ್ತಿ ಜಾವ್ನ್ ಲಿಖ್‌ಲ್ಲೆಂ ಸಾಹಿತ್ಯ್ ಕೆದಿಂಚ್ ಪರ್ನೆಂ ಜಾಯ್ನಾ. ಕೊಂಕ್ಣೆಂತ್ ಹ್ಯಾ ನಮೂನ್ಯಾಚೆಂ ಪುಸ್ತಕ್ ಎದೊಳ್ ಆಯಿಲ್ಲ್ಯಾವಿಶಿಂ ಹಾಂವ್ ನೆಣಾ. ವಿವಿಧ್ ವಿಷಯಾಂಚೆರ್ ಮಾಹೆತ್ ಆಟಾಪ್ಚೆಂ ಪುಸ್ತಕ್ ಕೊಂಕ್ಣಿ ಸಮಾಜೆಕ್ ದಿಲ್ಲ್ಯಾ ಲೇಖಕಾನ್ ಲೊಕಾ ಮೆಚ್ವಣೆಚೊ ವಾವ್ರ್ ಕೆಲಾ ಮ್ಹಳೆಂ. ಬಹುಮಾನಾಂ ದಿಂವ್ಕ್‌ಯಿ ಹೆಂ ಪುಸ್ತಕ್ ಉಪ್ಕಾರ್ತಾ ಮ್ಹಣ್ ಅಭಿಪ್ರಾಯ್ ಉಚಾರ್‌ಲ್ಲ್ಯಾ ತಾಣೆ ಮ್ಹಜ್ಯಾ ಸಂಪರ್ಕಾಕ್ ಯೆಂವ್ಚ್ಯಾ ಮಂಗ್ಳುರಿ ಕೊಂಕ್ಣಿ ಲೊಕಾಕ್ ಹೆಂ ಪುಸ್ತಕ್ ಪಾವಂವ್ಕ್ ಮಿನತ್ ಘೆತಲೊಂ ಮ್ಹಳೆಂ.
ಬುಕಾಚಾ ವಿಕ್ರ್ಯಾ ಬಾಬ್ತಿನ್ ಮಾಹೆತ್ ಆಟಾಪ್ಚ್ಯಾ ಬ್ರೋಶರಾಚೆಂ ಉಗ್ತಾವಣ್ ಕೆಲ್ಲ್ಯಾ ಮಂಗ್ಳುರ್ ಎಂ.ಸಿ.ಸಿ. ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೊನ್ ಉಲವ್ನ್ ಎಚ್. ಆರ್. ಆಳ್ವ 1981 – 84ವ್ಯಾ ವರ್ಸಾಂತ್ ದಿಯೆಸೆಜಿಚಾ ಸಿವೈಎಂ ಸಂಘಟನಾಂತ್ ಅಧ್ಯಕ್ಷ್ ಆಸ್‌ಲ್ಲೊ. ಹಾಂವ್ 2004 – 2005 ವ್ಯಾ ವರ್ಸಾಂತ್ಲೊ ಅಧ್ಯಕ್ಷ್. ಆಮ್ಕಾಂ ತೊ ತೆದಾಳಾ ಆನಿ ಆತಾಂಯೀ ರೋಲ್ ಮೊಡೆಲ್ ಜಾವ್ನಾಸಾ. 2006 – 07ವ್ಯಾ ವರ್ಸಾ ಎಂಎಲ್‌ಸಿ ಐವನ್ ಡಿಸೋಜಾಚಾ ಅಧ್ಯಕ್ಷ್‌ಪಣಾಚಾ ದಿಯೆಸೆಜ್ ಐಸಿವೈಎಂ ಭಾಂಗಾರೋತ್ಸವ್ ಸಮಿತೆಂತ್ ಎಚ್. ಆರ್. ಆಳ್ವನ್ ವಿಶೇಷ್ ಮಿನತೆಚೊ ವಾವ್ರ್ ದಿಲ್ಲೊ. ಆಮ್ಚ್ಯಾ ಸಮಾಜೆಂತ್ ತಾಕಾ ಬೊರೊ ಗೌರವ್ ಆಸಾ ಮ್ಹಳ್ಳ್ಯಾ ಅನಿಲಾನ್ ಪುಸ್ತಕ್ ಪ್ರತಿಯಾಂಚಾ ಬಾಬ್ತಿನ್ ವ್ಯವಹಾರ್ ಎಂಸಿಸಿ ಬ್ಯಾಂಕಾಂತ್ ಚಲಂವ್ಚೊ ಆಮ್ಕಾಂ ಅಭಿಮಾನಾಚಿ ಗಜಾಲ್. ಮರಿಯಾಡ್ಸ್ ಪ್ರಕಾಶನಾಕ್ ಆನಿ ಗ್ರಾಹಕಾಂಕ್ ಆಮ್ಚಿ ಬರಿ ಸೆವಾ ಮೆಳ್ತಲಿ ಮ್ಹಣ್ ಸಾಂಗೊನ್ ಲೇಖಕಾಕ್ ಆನಿ ತಾಚಾ ಕುಟ್ಮಾಕ್ ತಶೆಂ ಪ್ರಕಾಶನಾಕ್ ಬರೆಂ ಮಾಗ್ಲೆಂ.
ದಾಯ್ಜಿವರ್ಲ್ಡ್ ಸಂಸ್ಥಾಪಕ್ ಆನಿ ಸಿಇಒ ವಾಲ್ಟರ್ ನಂದಳಿಕೆನ್ ಪುಸ್ತಕ್ ಮೊಕ್ಳಿಕ್ ಕಾರ್ಯಾಚೆಂ ಅಧ್ಯಕ್ಷ್ ಸ್ಥಾನ್ ಘತ್‌ಲ್ಲೆಂ. ಆಪ್ಲ್ಯಾ ಅಧ್ಯಕ್ಷೀಯ್ ಉತ್ರಾಂನಿ ಆಪ್ಣಾಕ್ ಲ್ಹಾನ್ ಥಾವ್ನ್ ಕಾಣಿಯೊಂ, ಕವನಾಂ, ಲೇಖನಾಂ ಬರಂವ್ಚಿ ಹುಮೆದ್ ಆಸ್‌ಲ್ಲಿ. 9 ವ್ಯಾ ಕ್ಲಾಸಿಂತ್ ಆಸ್ತಾನಾ ಮಟ್ವಿ ಕಾಣಿ ಬರಯಿಲ್ಲಿ. ತಿ ಎಕಾ ಪಾಟ್ಲ್ಯಾನ್ ಎಕಾ ಪತ್ರಾಕ್ ದಾಡ್ಲ್ಯಾರೀ ಖಂಯ್ಸರ್‌ಯೀ ಪ್ರಗಟ್ ಜಾಲಿನಾ. ಆಮ್ಚೊ ಯುವಕ್ ಮಹಿನ್ಯಾಳೆಂ ಪತ್ರ್ ಸ್ತಾಪನ್ ಕರ್ನ್ ತೆಂ ಚಲವ್ನ್ ಆಸ್‌ಲ್ಲ್ಯಾ ಎಚ್. ಆರ್. ಆಳ್ವಕ್ ದಾಡ್‌ಲ್ಲ್ಯಾ ವೆಳಾರ್ ತಾಣೆ ತಿ ತುರ್ತಾನ್ ಫಾಯ್ಸ್ ಕೆಲ್ಲಿ. ಹ್ಯಾವರ್ವಿಂ ಮ್ಹಾಕಾ ಹುಮೆದ್ ಯೇವ್ನ್ ಹಾಂವೆಂ ಉಪ್ರಾಂತ್ ಬರಯಿಲ್ಲ್ಯೊ ಜಾಯ್ತ್ಯೊ ಕಾಣಿಯೊಂ, ಕವನಾಂ, ಲೇಖನಾಂ ಕೊಂಕ್ಣಿಂತ್ಲ್ಯಾ ಪತ್ರಾಂನಿ ಫಾಯ್ಸ್ ಜಾಲ್ಯಾಂತ್. ಮ್ಹಜೊ ಆತಾಂಚೊ ವಾವ್ರ್ ವೇಳ್ ಮಾಗ್ಚೊ ನ್ಹಯ್ ತರ್ ಹಾಂವ್ ಬರ‍್ಪಾ ಕ್ಷೇತ್ರಾಂತ್ ಫುಡೆಂ ವೆತೊಂ. ಮಂಗ್ಳುರ್ ಆಕಾಶವಾಣಿಂತ್ ಹುದ್ದೆದಾರ್ ಜಾವ್ನಾಸ್‌ಲ್ಲ್ಯಾ ಕನ್ಸೆಪ್ಟಾ ಫೆರ್ನಾಂಡಿಸಾನ್ ಮ್ಹಾಕಾ ಆಕಾಶವಾಣಿಕ್ ಆಪವ್ನ್ ರೆಕೊರ್ಡ್ ಕರ್ನ್ ಮ್ಹಜಿ ಕಾಣಿ ಪ್ರಸಾರ್ ಕೆಲ್ಲಿ. ಹಾಂವೆಂ ದಾಯ್ಜಿ ದುಬಯ್ ವೆಬ್‌ಸೈಟ್ ಸುರ್ವಾತ್ ಕರ್ತಾನಾ ಹ್ಯಾ ಜೊಡ್ಯಾನ್ ಮ್ಹಾಕಾ ಆಧಾರಾಸವೆಂ ಪ್ರೋತ್ಸಾಹ್ ದಿಲ್ಲೊ. ಹ್ಯಾ ಜೊಡ್ಯಾಕ್ ಹಾಂವ್ ಅಭಾರಿ ಜಾವ್ನಾಸಾಂ ಮ್ಹಳೆಂ. ಆಪ್ಲ್ಯಾ ಬರ‍್ಪಾಂ ಮುಕಾಂತ್ರ್ ಕೊಂಕ್ಣಿ ಸಮಾಜೆಂತ್ ಪರಿಚಿತ್ ಜಾವ್ನಾಸ್ಚ್ಯಾ ಎಚ್. ಆರ್. ಆಳ್ವಚೆಂ ನವೆಂ ಪುಸ್ತಕ್ ಕೆನರಾಂತ್ ಬದ್ಲಾಲ್ಲೆಂ ಜಿವಿತ್ ಆನಿ ಹೆರ್ ಲೇಖನಾಂ ಆಮ್ಚ್ಯಾ ದಾಯ್ಜಿ ವರ್ಲ್ಡ್ ಸ್ಟುಡಿಯೊಂತ್ ಮೊಕ್ಳಿಕ್ ಜಾಂವ್ಚಿ ಸಂತೊಸಾಲಾನಿ ಅಭಿಮಾನಾಚಿ ಗಜಾಲ್. ಹೆಂ ಪುಸ್ತಕ್ ಕೊಂಕ್ಣಿ ಲೊಕಾಕ್ ಮಾಹೆತ್ ಆನಿ ಮಾರ್ಗದರ್ಶನ್ ದಿಂವ್ಚ್ಯಾಂತ್ ಸುಫಳ್ ಜಾಂವ್ಚ್ಯಾಂತ್ ದುಭಾವ್ ನಾ ಮ್ಹಳೆಂ.
ಆರ್ಧ್ಯಾ ಶತಮಾನಾವಯ್ಲ್ಯಾ ಆವ್ದೆ ಥಾವ್ನ್ ಎಚ್. ಆರ್. ಆಳ್ವಚಿಂ ಬರ‍್ಪಾಂ ಫಾಯ್ಸ್ ಕರ್ನ್ ಆಯಿಲ್ಲ್ಯಾ ರಾಕ್ಣೊ ಹಫ್ತ್ಯಾಳ್ಯಾ ಪತ್ರಾಚೊ ಸಂಪಾದಕ್ ಮಾ|ಬಾಪ್ ರೂಪೇಶ್ ಮಾಡ್ತಾ ಆನಿ ಪುಸ್ತಕಾಂತ್ಲಿಂ ಲೇಖನಾಂ ತಿದ್ವುನ್, ಸುಧ್ರಾವ್ನ್ ಆಕರ್ಷಿತ್ ರಿತಿನ್ ಸಜವ್ನ್ ಛಾಪುನ್ ದಿಲ್ಲ್ಯಾ ಮಂಗ್ಳುರಾಂತ್ಲ್ಯಾ ಅಸ್ಸಿಸಿ ಪ್ರೆಸ್ಸಾಚೊ ದಿರೆಕ್ತೊರ್ ತಶೆಂ ಸೆವಕ್ ಮಹಿನ್ಯಾಳ್ಯಾಚೊ ಸಂಪಾದಕ್ ಮಾ|ಬಾ| ಚೇತನ್ ಲೋಬೊ ಕಾಪುಚಿನ್ – ಹೆ ಮಾನಾಚೆ ಸಯ್ರೆ ಜಾವ್ನಾಸ್‌ಲ್ಲೆ. ತಾಂಚಾ ಸಂಸ್ಥ್ಯಾಂಕ್ ಹ್ಯಾ ವೆಳಾರ್ ಪಯ್ಲಿ ಪ್ರತಿ ದಿಲಿ.
ಸುರ್ವೆರ್ ಲೇಖಕ್ ಆನಿ ಮರಿಯಾಡ್ಸ್ ಪ್ರಕಾಶನಾಚೊ ಮ್ಹಾಲಕ್ ಎಚ್. ಆರ್. ಆಳ್ವನ್ ಹಾಜರ್ ಜಾಲ್ಲ್ಯಾ ಸರ‍್ವಾಂಕ್ ಸ್ವಾಗತ್ ಕೆಲೊ. ಆಪ್ಲ್ಯಾ ಪ್ರಸ್ತಾವನ್ ಉತ್ರಾಂನಿ ಭುರ‍್ಗ್ಯಾಪಣಾ ಥಾವ್ನ್ ಯುವಕ್ಪಣಾಕ್ ಉತ್ರೊನ್ ಯೆತಾನಾ ಆಪ್ಣಾಕ್ ಮುಕೇಲ್ಪಣಾಂತ್ ಪ್ರೇರಿತ್ ಕೆಲ್ಲ್ಯಾ ಕನ್ನಡ ಅಕ್ಷರ ಮಾಲೆಂತ್ಲ್ಯಾ ಆ ಥಾವ್ನ್ ಆರಂಭ್ ಜಾಂವ್ಚ್ಯಾ ತೆಗಾಂಕ್ ತಾಣೆ ವಂದಿಲೆಂ. ತೆ ಜಾವ್ನಾಸಾತ್ – ಆಸ್ಕರ್ (ಫೆರ್ನಾಂಡಿಸ್), ಆಸ್ಟಿನ್ (ಡಿಸೋಜ ಪ್ರಭು) ಆನಿ ಆಲ್ಬರ್ಟ್ (ವಿಲ್ಫ್ರೆಡ್ ಡಿಸೋಜ). ಆಪ್ಲೊ ಇಷ್ಟ್ ಮ್ಹಳ್ಳ್ಯಾಬರಿ ಆಸ್ಲೆಲ್ಯಾ ಬಿಸ್ಪ್ ಬಾಜಿಲ್ ಸಾಲ್ವದೊರ್ ಡಿಸೋಜ ಆನಿ 1972 ಇಸ್ವೆ ಥಾವ್ನ್ ಆಪ್ಣಾಕ್ ರಾಕ್ಣೊ ಪತ್ರಾರ್ ಯೆವ್ಕಾರ್ ದಿಲ್ಲ್ಯಾ ಸಂಪಾದಕ್ ಬಾಪ್ ಮಾರ‍್ಕ್ ವಾಲ್ಡರ್ – ಹಾಂಕಾಂ ಕೃತಜ್ಞತಾ ಅರ್ಪಿಲಿ.
ನವೆಂ ಪುಸ್ತಕ್ ಕೆನರಾಂತ್ ಬದ್ಲಾಲ್ಲೆಂ ಜಿವಿತ್ ಮ್ಹಳ್ಳ್ಯಾ ಶಿರೋನಾಂವಾರ್ / ಮಾತಾಳ್ಯಾರ್ ಆಸ್ಲ್ಯಾರೀ, ಫಕತ್ ಕೆನರಾಕ್ ಸೀಮಿತ್ ನಾಸ್ತಾನಾ ಕರ್ನಾಟಕ ಆನಿ ಭಾgತಾ ಭಂವಾರಿಂ ಭಂವ್ಲಾಂ. ಮನ್ಶ್ಯಾಂ ಸಂಬಂಧಾಂ ಕುಶಿನ್ ಘುಂವ್ಲಾ. ಹ್ಯಾ ಪುಸ್ತಕಾಂತ್ಲಿಂ ಥೊಡಿಂ ಲೇಖನಾಂ ಎದೊಳ್‌ಚ್ ಪತ್ರಾಂ / ಇ ಪತ್ರಾಂನಿ ಫಾಯ್ಸ್ ಜಾಲ್ಲಿಂ ಆಸಾತ್. ಪೂಣ್ ಬುಕಾ ರುಪಾಕ್ ಹಾಡ್ತಾನಾ ಲೇಖನಾಂನಿ ಥೊಡಿ ವಾ ಜಾಯ್ತಿ ಬದ್ಲಾವಣ್ ಕರ್ನ್ ಲೇಖನಾಂ ಸರ್ವಯ್ ಕಾಳಾಕ್ ಉಪ್ಕಾರಾಶೆಂ ಕೆಲ್ಯಾಂತ್. ಥೊಡಿಂ ನವಿಂ ಲೇಖನಾಂ ಪುಸ್ತಕಾ ಖಾತಿರ್‌ಚ್ ಲಿಖ್ಲ್ಯಾಂತ್. ಧಾರ್ಮಿಕ್ ಆನಿ ರಾಜಕೀಯ್ ಪರಿಧೆ ಥಾವ್ನ್ ಭಾಯ್ರ್ ಆಸಾತ್.
1972 ಇಸ್ವೆ ಥಾವ್ನ್ ಆಪ್ಲಿಂ ಬರ‍್ಪಾಂ ಫಾಯ್ಸ್ ಕೆಲ್ಲ್ಯಾ ಆನಿ ಆಜೂನ್ ಫಾಯ್ಸ್ ಕರ್ನ್ ಆಸ್ಚ್ಯಾ ಸರ್ವ್ ಪತ್ರಾಂಚಾ ಸಂಪಾದಕಾಂಕ್ ಆನಿ ವಾಚ್‌ಲ್ಲ್ಯಾ ವಾಚ್ಪ್ಯಾಂಕ್ ಪ್ರಣಾಮ್ ಅರ್ಪಿಲೆ. ಆಪ್ಲ್ಯಾ ಸಾಹಿತಿಕ್ ವಾವ್ರಾಂತ್ ಸದಾಂಚ್ ಪ್ರೋತ್ಸಾಹಿತ್ ಕರ್ನ್ ಕುಮಕ್ ದಿಂವ್ಚ್ಯಾ ಆನಿ ಕೆನರಾಂತ್ ಬದ್ಲಾಲ್ಲೆಂ ಜಿವಿತ್ ಆನಿ ಹೆರ್ ಲೇಖನಾಂ ಪುಸ್ತಕ್ ಭಾಯ್ರ್ ಯೆಂವ್ಕ್ ಕಾರಣ್ ಜಾಲ್ಲ್ಯಾ ಪತಿಣ್ ಕನ್ಸೆಪ್ಟಾ ಫೆರ್ನಾಂಡಿಸ್ ಆನಿ ಭುರ‍್ಗಿಂ ಹರ್ಷ ಆಳ್ವ ಆನಿ ಹೀರಾ ಆಳ್ವಕ್ ತಾಣೆ ಧಿನ್ವಾಸ್ ಮ್ಹಳೆಂ.
ಬೆಂಗ್ಳುರ್ ಆಕಾಶವಾಣಿ ಕೇಂದ್ರಾಚಿ ನಿವೃತ್ ಸಹಾಯಕ್ ನಿರ್ದೇಶಕಿ ಕನ್ಸೆಪ್ಟಾ ಫೆರ್ನಾಂಡಿಸಾನ್ ಕಾರ್ಯೆಂ ನಿರ್ವಹಣ್ ಕರ್ನ್ ನಿಮಾಣೆ ಉಪ್ಕಾರ್ ಆಟಯ್ಲೊ. ಹರ್ಷ ಆಳ್ವ ಆನಿ ಹೀರಾ ಆಳ್ವನ್ ಸಯ್ರ್ಯಾಂಕ್ ಫುಲಾಂ ದಿಲಿಂ. ಮುಂಬಯ್ – ಪಾಲ್ಘರಾಂತ್ಲ್ಯಾ ಸೈಂಟ್ ಜೋನ್ಸ್ ಕ್ಯಾಂಪಸಾಚೊ ರೆಜಿಸ್ಟ್ರಾರ್ ಡಾ. ಚಾರ್ಲ್ಸ್ ಪಾಯಸ್, ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ ವಿಜೇತ್ ಕವಿ ಮೆಲ್ವಿನ್ ರೊಡ್ರಿಗಸ್, ಚಲನ್‌ಚಿತ್ರ್ ನಿರ್ದೇಶಕ್ ಸ್ಟ್ಯಾನಿ ಬೇಳ, ಕೊಂಕ್ಣಿ ಲೇಖಕ್ ಪ್ರವೀಣ್ ತಾವ್ರೊ, ವಿನ್ಸಿ ಪಿಂಟೊ, ರೊನಾಲ್ಡ್ ನಜರೆತ್ ಆನಿ ಹೆರ್ ಉಪಸ್ಥಿತ್ ಆಸ್‌ಲ್ಲೆ.
ಪುಸ್ತಕಾಚೊ ಪ್ರತಿಯೊ ಮಂಗ್ಳುರ್, ಉಡುಪಿ (ಶಂಕರಪುರ) ಆನಿ ಬೆಂಗ್ಳುರಾಂತ್ ಕೊಂಕ್ಣಿ ಪುಸ್ತಕಾಂ ವಿಕ್ರಾಪಾಚಾ ಸದಾಂಚ್ಯಾ ಸುವಾತೆಂನಿ ಮೆಳ್ತಾತ್. ಪುಸ್ತಕ್ ಭಾರತಾಂತ್ಲ್ಯಾ ಖಂಯ್ಚ್ಯಾಯಿ ಸುವಾತೆಕ್ ಸ್ಪೀಡ್ ಪೊಸ್ಟಾ ಮರಿಫಾತ್ ದಡ್ಚಿ ವಿಲೇವಾರಿ ಆಸಾ. ಹ್ಯಾ ಬಾಬ್ತಿನ್ ಪ್ರಕಾಶಕಾಚಾ ಮೊಬಾಯ್ಲ್ / ವಾಟ್ಸಪ್ 9108 86 88 03 ಸಂಖ್ಯಾಕ್ ಸಂಪರ‍್ಕ್ ಕರ್ಯೆತಾ.
