ಕೊಂಕ್ಣಿ ಸಾಹಿತ್ಯಾಂತ್ ಯುವಬರಯ್ಣಾರಾಂಚಿಂ ಪ್ರತಿಭಾ ಒಳ್ಕುನ್, ತಾಂಕಾ ಮಾನ್ ಕರುನ್, ಉತ್ತೇಜನ್ ದಿಂವ್ಚ್ಯಾ ಪಾಟ್ಲ್ಯಾ 15 ವರ‍್ಸಾಂಚ್ಯಾ ಪರಂಪರೆಚೊ ವಾಂಟೊ ಜಾವ್ನ್, 2026 ವ್ಯಾ ವರ‍್ಸಾಚಿ ಲಿಯೊ ರೊಡ್ರಿಗಸ್ ಕುಟಮ್ ಕಿಟಾಳ್ ಯುವ ಪ್ರಶಸ್ತಿ ಅಲಂಗಾರ್ಚೊ ಯುವ ಕವಿ, ಕಥಾಕಾರ್ ಆನಿ ಸಂಶೋಧಕ್ ಗ್ಲ್ಯಾನಿಶ್ ಮಾರ್ಟಿಸ್ ಹಾಕಾ, ಸನ್ವಾರಾ, ಅಕ್ತೋಬರ್ 3 ವೆರ್, ಎಂಸಿಸಿಸಿ ಬ್ಯಾಂಕಾಚಾ ಫಿಎಫ್‌ಎಕ್ಸ್ ಸಭಾಂಗ್ಣಾಂತ್ ಮಾನೆಸ್ತ್ ಲಿಯೋ ರೊಡ್ರಿಗಸ್ ಹಾಣಿ ಪ್ರದಾನ್ ಕೆಲಿ. ಹ್ಯಾ ಸಂದರ್ಭಾರ್ ಮುಕೆಲ್ ಸಯ್ರೊ ಸಾಂ.ಜುಜೆ ಸೆಮಿನರಿಚೊ ಆದ್ಲೊ ರೆಕ್ಟರ್, ಪ್ರಸ್ತುತ್ ದೆರೆಬಯ್ಲ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಜೋಸೆಫ್ ಮಾರ್ಟಿಸ್, ಕರ‍್ನಾಟಕ ಸರ‍್ಕಾರಾಚೊ ವಿದಾನ್ ಪರಿಷತ್ ಸಾಂದೊ ಐವನ್ ಡಿ ಸೊಜಾ, ಎಂಸಿಸಿ ಬ್ಯಾಂಕಾಚೊ ಅಧ್ಯಕ್ಶ್ ಸಹಕಾರ ರತ್ನ ಅನಿಲ್ ಲೋಬೊ ಆನಿ ವಿಂಚ್ಣುಕೆ ಸಮಿತಿಚೊ ಅಧ್ಯಕ್ಶ್ ಕವಿ ಟೈಟಸ್ ನೊರೊನ್ಹಾ ಹಾಜರ್ ಆಸ್ಲೆ. ಕಿಟಾಳ್ ಸಾಂಗಾತಿ ಸಂಪಾದಕ್ ಕವಿ ವಿಲ್ಸನ್ ಕಟೀಲ್ ಹಾಣೆ ಗ್ಲ್ಯಾನಿಶಾಚಿ ಓಳಕ್ ಕರುನ್ ದಿಲಿ ಆನಿ ಮಾನ್ ಪತ್ರ್ ವಾಚ್ಲೆಂ.
ಪ್ರಶಸ್ತಿ ಪ್ರದಾನ್ ಕರುನ್ ಮಾನೆಸ್ತ್ ಲಿಯೊ ರೊಡ್ರಿಗಸ್ ಹಾಣಿ “ಯುವಜಣಾಂ ಥಂಯ್ ಸಮಾಜ್ ಆನಿ ಸಾಹಿತ್ಯಾಚಾ ಕುಶಿನ್ ಜವಾಬ್ದಾರೆಚೊ ಮನೋಭಾವ್ ವಾಡಂವ್ಚೊ ಹ್ಯಾ ಪ್ರಶಸ್ತೆಚೊ ಉದ್ದೇಶ್ ಜಾವ್ನಾಸೊನ್, ಆಜ್ ಮೆರೆನ್ ಕೊಣಾಕ್ ಹಿ ಪ್ರಶಸ್ತಿ ಲಾಭ್ಲ್ಯಾ ತೆ ಸಗ್ಳೆ ಆಜ್ ಆಮ್ಚ್ಯಾ ಸಮಾಜೆಂತ್ ಆನಿ ಸಾಹಿತ್ಯಾಂತ್ ಬೋವ್ ಬರೆಂ ಕಾಮ್ ಕರುನ್ ಆಸಾತ್. ಪೂಣ್ ಆಜ್ ಕಾಲ್ ಕೊಂಕ್ಣಿ ಸಾಹಿತ್ಯಾಂತ್ ಮುಕಾರ್ ಯೆಂವ್ಚ್ಯಾ ತರ‍್ನಾಟ್ಯಾಂಚೊಂ ಸಂಕೊ ಉಣೊ ಜಾಲ್ಲೊ ದಿಸುನ್ ಯೆತಾ. ಪೂಣ್ ಆಮ್ಚೆ ಮಧೆಂ ಜಾಯ್ತೆ ಜಾಣ್ತೆ ಆನಿ ಅನ್ಭೊಗಿ ಸಾಹಿತಿ ಆಸಾತ್ ಮಾತ್ ನಯ್ ಬರೆಂ ಸಾಹಿತ್ಯ್ ಆಸಾ. ಯುವಜಣಾಂಕ್ ಕೊಂಕ್ಣಿ ಸಾಹಿತ್ಯಾ ಥಂಯ್ ವೊಡುಂಕ್ ಕಾಂಯ್ ಶಿಬಿರ್ ವಾ ಕಾಮಾಸಾಳ್ ಮಾಂಡುನ್ ಹಾಡ್ಚೆಂ ತರ್ ತಾಕಾ ಮ್ಹಜೊ ಸಂಪೂರ‍್ಣ್ ಸಹಕಾರ್ ಆಸಾ” ಮ್ಹಳೆಂ.
ಕಾರ್ಯಾಂತ್ ಕೊಂಕ್ಣಿ ಭಾಸ್ ಆನಿ ಕಲೆ ಖಾತಿರ್ ಸತತ್ ವಾವುರ‍್ನ್ ಆಸ್ಚ್ಯಾ, ಪಾಟ್ಲ್ಯಾ ದಿಸಾಂನಿ ಆಪ್ಲ್ಯಾ ಜಿಣಿಯೆಚೊ 80 ಆನಿ 75 ವರ‍್ಸಾಂಚೊ ಜಲ್ಮೋತ್ಸವ್ ಮಾನಾಯಿಲ್ಲ್ಯಾ ದೊ| ಎವ್ಜಿನ್ ಡಿ ಸೊಜಾ, ಬೊಳಿಯೆ ಆನಿ ಎಡ್ಡಿ ಸಿಕೆರ್, ಬೆಂದುರ್ ಹಾಂಕಾ ಜಲ್ಮಾ ದಿಸಾಚೆ ಶುಭಾಶಯ್ ಪಾಟವ್ನ್, ಫುಡಾರಾಚ್ಯಾ ಜಿವಿತಾಕ್ ಸರ‍್ವ್ ಬರೆಂ ಮಾಗೊನ್ ಲಿಯೊ ರೊಡ್ರಿಗಸ್ ಕುಟಮ್ ಆನಿ ಕಿಟಾಳ್ ಬರಯ್ಣಾರಾಂಚ್ಯಾ ಕುಟ್ಮಾ ತರ‍್ಪೆನ್ ಮಾನ್ ಕೆಲೊ.
ಆಪ್ಲ್ಯಾ ಪ್ರಮುಕ್ ಉಲವ್ಪಾಂತ್ ಅರಿಸ್ಟಾಟಲ್‌‌ಚ್ಯಾ “ವಿಸ್ಮಿತ್ಕಾಯ್ ಗಿನ್ಯಾನಾಚಿ ಸುರ‍್ವಾತ್” ಗಜಾಲ್ ಉಲ್ಲೇಕ್ ಕರುನ್, ಮುಕೆಲ್ ಸಯ್ರೊ ಮಾ| ಬಾ| ಜೋಸೆಫ್ ಮಾರ್ಟಿಸ್ ಹಾಣಿ ” ಹರ್ ಬರವ್ಪಿ ಆಪ್ಲ್ಯಾ ಭಂವ್ತಣಿಚೊ ಸಂಸಾರ್ ಆನಿ ಗಜಾಲಿಂ ಥಂಯ್ ವಿಸ್ಮಿತ್ ಪಾವ್ತಾ. ಆನಿ ಹೋಚ್ ಅನ್ಭೊಗ್ ತಾಕಾ ಸಾಹಿತ್ಯ್ ರಚುಂಕ್ ಲಾಯ್ತಾ. ಸಾಹಿತ್ಯ್ ಸಮಾಜೆಕ್ ಆರ್ಸೊ ಧರ‍್ತಾ ದೆಕುನ್ ಬರಯ್ಣಾರಾಂಕ್ ಮರಣ್ ನಾ. ತೆ ಆಪ್ಲ್ಯಾ ಕೃತಿಯಾಂ ಮುಕಾಂತ್ರ್ ಸದಾಂಕಾಳ್ ಜಿಯೆತಾತ್” ಮ್ಹಳೆಂ. ಮುಂದರುನ್ ತಾಣಿ, “ವಾಂಜೆಲಾಂತ್ ಜಾಯ್ತೆ ಒಪಾರಿ, ಕಾಣಿಯೊ ಆಮ್ಕಾಂ ವಾಚುಂಕ್ ಮೆಳ್ತಾತ್. ಕಾಣಿಯಾಂನಿ ಲೊಕಾಕ್ ಪಾವೊಂಕ್ ಸುಲಭ್. ಆಮ್ಚ್ಯಾ ಜಾಯ್ತ್ಯಾ ಮಾಲ್ಘಡ್ಯಾ ಬರಯ್ಣಾರಾಂನಿ ವಾಂಜೆಲಾಂತ್ಲಿಂ ಘಡಿತಾಂ ಆನಿ ವೆಕ್ತಿತ್ವಾಂ ಘೆವ್ನ್ ಸಾಹಿತ್ಯ್ ರಚ್‌ಲ್ಲೆಂ ಹಾಂವೆ ವಾಚ್ಲಾಂ. ಬೈಬಲ್ ಯುವ ಬರಯ್ಣಾರಾಂಕೀ ಪ್ರೇರಣ್ ಜಾಯ್ಜೆ” ಮ್ಹಳೆಂ.
ಪ್ರಶಸ್ತಿ ಸ್ವೀಕಾರ್ ಕರುನ್ ಗ್ಲ್ಯಾನಿಶ್ ಮಾರ‍್ಟಿಸಾನ್ ಆಪ್ಲ್ಯಾ ಆವಯ್ಚೊ ಆನಿ ಆಬಾಚೊ ಉಡಾಸ್ ಕಾಡುನ್, ಆಪ್ಣಾಕ್ ಸಾಹಿತ್ಯ್ ರಚುಂಕ್ ತಾಂಚೆ ಥಾವ್ನ್ ಮೂಳ್ ಪ್ರೇರಣ್ ಲಾಭ್ಲೆಂ ಮ್ಹಳೆಂ. ತಶೆಂಚ್ ಮಾಲ್ಘಡೆ ಕೊಂಕ್ಣಿ ಸಾಹಿತಿ ಕವಿ ಮೆಲ್ವಿನ್ ರೊಡ್ರಿಗಸ್, ವಿಲ್ಸನ್ ಕಟೀಲ್ ಹಾಣಿ ದಿಲ್ಲ್ಯಾ ಮಾರ್ಗದರ್ಶನಾಚೊಯ್ ಉಡಾಸ್ ಕಾಡ್ಲೊ. ಆಯ್ಚ್ಯಾ ತರ‍್ನಾಟ್ಯಾಂ ಥಂಯ್ ಸಾಹಿತ್ಯಾಚಿ ವೋಡ್ ಉಣಿ ಜಾಂವ್ಕ್ ಏಕ್ ಕಾರಣ್ ವಾಚಪ್ ಉಣೆ ಜಾಲ್ಲೆಂಯ್ ಕಾರಣ್ ಮ್ಹಳ್ಳ್ಯಾ ತಾಣೆ ಫಿರ‍್ಗಜ್ ಪತ್ರಾಂನಿ ವಾಚ್ಪಾಂಚಿಂ ಸತ್ರಾಂ ಕೆಲ್ಯಾರ್ ಕಾಂಯ್ ಉಪ್ಕಾರ್ ಜಾಯ್ತ್ ಮ್ಹಣ್ ಆಪ್ಲಿ ಅಭಿಪ್ರಾಯ್ ಉಚಾರ‍್ಲಿ. ಪ್ರಸ್ತುತ್ ಪ್ರಶಸ್ತೆನ್ ಕೊಂಕ್ಣಿ ಸಾಹಿತ್ಯಾ ಥಂಯ್ ಆಪ್ಣಾಚಿ ಜವಾಬ್ದಾರಿ ವಾಡಯ್ಲ್ಯಾ ಮ್ಹಳ್ಳ್ಯಾ ತಾಣೆ ಸಭಾಗೃಹಾಂತ್ ಹಾಜರ್ ಆಸ್ಚೊ ಆಪ್ಲೊ ಪಿ‌ಎಚ್‌ಡಿ ಮಾರ‍್ಗದರ್ಶಕ್ ದೊ| ಸಂತೋಶ್ ಎಲ್. ಗಾಂವ್ಕರ್ ಹಾಂಚೊಯ್ ಮನಾ ಕಾಳ್ಜಾನ್ ಉಪ್ಕಾರ್ ಭಾವುಡ್ಲೊ.
ಕಾರ್ಯಾಕ್ ಸಾಹಿತ್ಯ ಅಕಾಡೆಮಿ ಕೊಂಕಣಿ ಸಲಹಾ ಸಮಿತಿಚೊ ನಿಮಂತ್ರಕ್ ಕವಿ ಮೆಲ್ವಿನ್ ರೊಡ್ರಿಗಸ್, ವಿಶ್ವ ಕೊಂಕಣಿ ಕೇಂದ್ರಾಚೊ ಉಪಾಧ್ಯಕ್ಷ ರಮೇಶ್ ನಾಯಕ್, ಎಂಡಿಎಸ್ ಚ್ಯಾರಿಟೀಸ್‌ ಸಲಹಾದಾರ್ ಪ್ರೊ| ಸಿ.ಎ.| ಲೈನಲ್ ಅರಾನ್ಹಾ ಆನಿ ಓಸ್ವಲ್ಡ್ ರೊಡ್ರಿಗಸ್, ಕವಿ ಕಿಶೂ ಬಾರ್ಕೂರ್, ಸಿನೆಮಾ ನಿರ್ದೇಶಕ್ ಸ್ಟ್ಯಾನಿ ಬೇಳಾ, ಕೆನರಾ ಸಂಪರ್ಕ್ ಕೇಂದ್ರಾಚೊ ನಿರ್ದೇಶಕ್ ಮಾ| ಬಾ| ಅನಿಲ್ ಐವನ್ ಫೆರ್ನಾಂಡಿಸ್, ಸಮೀಕ್ಷಕ್ ನಾನು ಮರೋಲ್, ಕವಿ ರೋಶು ಬಜ್ಪೆ, ರೇಮಂಡ್ ಡಿ ಕುನ್ಹಾ , ಗ್ಲ್ಯಾನಿಶಾಚಿ ಆವಯ್ ಲವೀನಾ, ಆಜಿ, ಮಾಮ್ ಆನಿ ಕುಟ್ಮಾದಾರಾಂ ಹಾಜರ್ ಆಸ್ಲಿಂ.
