ಬುದ್ವಾರಾ, ಅಕ್ತೋಬರ್ 7 ವೆರ್ ಜೆಪ್ಪು ಸಾಂತ್ ಆಂತೊನಿಚ್ಯಾ ಆಸ್ರ್ಯಾಂತ್ ರೊಜಾರ್ ಮಾಯೆಚಿ ಪರಬ್ ವ್ಹಡಾ ಭಕ್ತಿಪಣಾನ್ ಆನಿ ದಬಾಜ್ಯಾನ್ ಮಾನಾಯ್ಲಿ. ಮರಿಯಾಳ್ ಭಕ್ತಿಪಣಾನ್ ಆನಿ ತೇರ್ಸಾನ್ ಸುರ್ವಾತ್ಲೆಲಿ ಸಾಂಜ್, ದೆವಾಚ್ಯಾ ಉತ್ರಾಚೆರ್ ನಿಯಾಳ್, ದಿವೆ – ವಾತಿಂಚೊ ಪುರ್ಶಾಂವ್ ಆನಿ ಪವಿತ್ ಸಾಕ್ರಾಮೆಂತಾಚ್ಯಾ ಬೆಸಾಂವಾಂನ್ ಸಂಪನ್ನ್ ಜಾಲಿ.
ಅಶೊಕ್‌ನಗರ್ ಸಾಂ. ಡೊಮಿನಿಕ್ ಫಿರ‍್ಗಜೆಚೊ ಸಹಾಯಕ್ ವಿಗಾರ್ ಮಾ| ಬಾ| ಮೆಕೆನ್ಸಿ ಮೆಂಡೋನ್ಸಾ ಹಾಣಿ ಸದಾಂಚ್ಯಾ ಜಿವಿತಾಂತ್ ಕೋಂತ್ ಆನಿ ತೆರ‍್ಸಾಚ್ಯಾ ಭಕ್ತಿಪಣಾಚ್ಯಾ ಮಹತ್ವಾವಿಶಿಂ ಸಾಂಗೊನ್, ನಿರಂತರ್ ಪ್ರಾರ್ಥನ್ ಆನಿ ಮರಿ ಮಾಯೆಚ್ಯಾ ಸಸಾಯೆನ್ ಕಶೆಂ ದೆವಾಚಿ ಕುರ‍್ಪಾ ಆನಿ ಬೆಸಾಂವ್ ಅಮಿ ಜೊಡ್ಯೆತ್ ಮ್ಹಳ್ಳೆವಿಶಿಂ ದಾಕ್ಲ್ಯಾಂಭರಿತ್ ವಿವರ್ ದಿಲೊ. ಕೋಂತ್ ಘೆವ್ನ್ ತೇರ‍್ಸ್ ಮ್ಹಣ್ತಾನಾ ಆಮ್ಕಾಂ ಜೆಜುಕ್ ಆನಿ ಮರಿಮಾಯೆಕ್ ಲಾಗ್ಶಿಲ್ಯಾನ್ ಮೆಳ್ಚೊ ಅವ್ಕಾಸ್ ಲಾಭ್ತಾ ಮ್ಹಣ್ ತಾಣಿ ಹ್ಯಾ ಸಂದರ್ಭಾರ್ ಮ್ಹಳೆಂ. ದೆವಾಚ್ಯಾ ಉತ್ರಾಥಾವ್ನ್ ಆಮ್ಕಾಂ ಆತ್ಮೀಕ್ ಬಳ್ ಮೆಳ್ತಾ ಮಾತ್ ನಯ್, ವಾಯ್ಟ್ ಸಕ್ತ್ಯೊ ಆನಿ ವ್ಯಸನಾಂ ಥಾವ್ನ್ ಪಯ್ಸ್ ರಾವೊಂಕ್ ಥಿರಾಸಾಣ್ ಲಾಭ್ತಾ ಮ್ಹಣ್ ತಾಣಿ ಮ್ಹಳೆಂ.
ಫೆಸ್ತಾ ಸಂಭ್ರಮಾಚೊ ವಾಂಟೊ ಜಾವ್ನ್ ವಠಾರಾಂತ್ ದಿವೆ, ವಾತಿ ಜಳವ್ನ್ ಉಜ್ವಾಡಾಚೊ ಪುರ್ಶಾಂವ್ ಕಾಡ್ಲೊ. ರೊಜಾರ್ ಮಾಯೆಚ್ಯಾ ಅಲಂಕೃತ್ ಇಮಾಜೆ ಸಮೊರ್ ಮರಿಯಾಳ್ ಕಾಂತಾರಾಂ ಆನಿ ಆಸ್ರ್ಯಾಂತ್ಲ್ಯಾ ವಿದ್ಯಾರ್ಥಿಂಚ್ಯಾ ಸಂಗೀತ್ ಪಂಗ್ಡಾಚ್ಯಾ ಗಾಯನಾನ್ ಫೆಸ್ತಾ ಸಂಭ್ರಮ್ ದೊಡ್ತೊ ಕೆಲೊ.
ಸುರ‍್ವೆರ್ ಆಸ್ರ್ಯಾಚೊ ಆಡಳ್ತ್ಯಾ ಅಧಿಕಾರಿ ಮಾ| ಬಾ| ಪ್ರವೀಣ್ ಅಮೃತ್ ಮಾರ್ಟಿಸ್ ಹಾಣಿ ಪರ‍್ಬೆಚೊ ಇತಿಹಾಸ್ ಆನಿ ಮಹತ್ವಾವಿಶಿಂ ಸಾಂಗ್ಲೆಂ. ರುಜಾಯ್ ಅರ್ಸುಯಾಲ್ನ್ ಧರ‍್ಮ‌ಭಯ್ಣಿಂನಿ ಕೊಂತಾಚೆಂ ಭಕ್ತಿಪಣಾಕ್ ಮುಕೆಲ್ಪಣ್ ದಿಲೆಂ. ಸಂಭ್ರಮಾಚ್ಯಾ ಅಕೇರಿಕ್ ಪವಿತ್ ಸಾಕ್ರಾಮೆಂತಾಚೆಂ ಆಶೀರ್ವಾದ್ ಚಲ್ಲೆಂ.
ಸಾಂತ್ ಅಂತೊನ್ ಆಸ್ರ್ಯಾಚೊ ನಿರ್ದೇಶಕ್ ಮಾ| ಬಾ| ಜೆ.ಬಿ. ಕ್ರಾಸ್ತಾ ಹಾಣಿ ಫೆಸ್ತಾ ಸಂಭ್ರಮಾಂತ್ ವಾಂಟೊ ಘೆತ್ಲೆಲ್ಯಾ ಆನಿ ಫೆಸ್ತಾ ತಯಾರಾಯೆಂತ್ ಕುಮಕ್ ಕೆಲ್ಲ್ಯಾ ಸ್ವಯಂಸೇವಕಾಂಚೊಂ, ವಿದ್ಯಾರ್ಥಿಂಚೊಂ, ಆಸ್ರ್ಯಾಚ್ಯಾ ನಿವಾಸಿಂಚೊಂ ಅಶೆಂ … ಸಹಕಾರ್ ದಿಲ್ಲ್ಯಾ ಸರ‍್ವಾಂಚೊಂ ಉಪ್ಕಾರ್ ಆಟಯ್ಲೊ ಆನಿ ರೊಜಾರ್ ಮಾಯೆಚಿಂ ಬೆಸಾಂವಾಂ ಮಾಗ್ಲಿಂ.
ತಸ್ವಿರ‍್ಯೊ : ಕೆನರಾ ಸಂಪರ‍್ಕ್ ಕೇಂದ್ರ್
