ವಿಶ್ವಕೊಂಕಣಿ ಕೇಂದ್ರ ಸಹಯೋಗಾನ ‘ವರ್ಧನಿ’ ಪ್ರಾಯೋಜಕತ್ವಾರಿ ಆನಿ ಸಾಧನಾ ಬಳಗ ಸಹಕಾರಾನ ಆಯೋಜನ ಕೆಲೆಲೆ “ಬಾಲರಂಗ” ಚೆರ್ಡುವಾಂಗೆಲೆ ನಾಟಕ ತರಬೇತ ದಿವಚೆ ತೀನಿ ದಿವಸಾಚೆ ಮುಫತ ತರಬೇತ ಶಿಬಿರ 11-10-2026 ತಾರ್ಕೆರ ವಿಶ್ವ ಕೊಂಕಣಿ ಕೇಂದ್ರಾಂತ ಚಲ್ಲೆಂ. ಮಂಗಳೂರು ಎಮ್ ಆರ್ ಪಿ ಎಲ್ ಚೆ ಆದಲೆ ಅಧಿಕಾರಿ ಡಾ. ನರೇಶ್ ರಾಮದಾಸ ಕಿಣಿ ಹಾನ್ನಿ ದಿವೊ ಲಾವನ ಕಾರ್ಯಾವಳೀಚೆ ಉಗ್ತಾವಣ ಕೆಲೆಂ.
ತಾನ್ನಿ ಸಭೆಕ ಉದ್ದೇಶಿಸುನು ‘ಸಂಗೀತ, ನಾಟಕ, ನೃತ್ಯ,ರಂಗ ಪರಿಕರತಯಾರಿ, ರಂಗಸಂಗೀತ, ಬೊಂಬೆ ಖೇಳು ಅಶಿಂ ವೆವೆಗಳೆ ಕೌಶಲ್ಯ ಚಟುವಟಿಕಾ ಅಭ್ಯಾಸ ಚೆರ್ಡುವಾಂಗೆಲೊ ವ್ಯಕ್ತಿತ್ವಚೆ ವಾಡಾವಳೀಕ ಸಹಾಯ ಜಾತ್ತಾ ಆನಿ ಲ್ಹಾನ ಪ್ರಾಯೇರೀಚಿ ಚೆರ್ಡುವಾಂಕ ತರಬೇತ ದಿವಚೆ ಕಾರ್ಯ ವಿಶ್ವಕೊಂಕಣಿ ಕೇಂದ್ರ ಹಾನ್ನಿ ಹಾತಾಂತು ಘೆತ್ತಿಲೆ ಮಸ್ತ ಪ್ರಯೋಜನ ಪಾವತಾ ಅಸಲೆ ಶಿಬಿರಾಚೆ ಸಂಪೂರ್ಣ ಪ್ರಯೋಜನ ಸರ್ವ ಛಾತ್ರಾಂನಿ ಘೆವಕಾ ಮ್ಹೊಣು ತಾನ್ನಿ ತಾಂಗೆಲೆ ಬರೆಂ ಅಭಿಪ್ರಾಯ ದಿಲೆಂ .
ವಿಶ್ವಕೊಂಕಣಿ ಕೇಂದ್ರಾಚೆ ಖಜಾಂಚಿ ಮಾನೆಸ್ತ್ ಬಿಆರ್ ಭಟ್ ಹಾನ್ನಿ ಆಯಿಲೆ ಸೊಯರೆಂಕ ಸ್ವಾಗತ ಕೆಲೆಂ. ವಿಶ್ವ ಕೊಂಕಣಿ ಕೇಂದ್ರ ಉಪಾಧ್ಯಕ್ಷ ಮಾನೆಸ್ತ್ ವಿಲಿಯಂ ಡಿಸೋಜಾ, ಮಾನೆಸ್ತ್ ಡಿ ರಮೇಶ್ ನಾಯಕ್, ನಾಮನೆಚೆ ನಾಟಕ ತರಬೇತುದಾರ ಜಗನ್ ಪವಾರ್, ಸತೀಶ ಪಿ ನೀನಾಸಂ, ಅರುಣ ಪ್ರಕಾಶ ನಾಯಕ,ಅಶೋಕ ಕಾಮತ್, ಪುಷ್ಪಲತಾ ಭಟ ಆನಿ ಶಿಬಿರ ಕಾರ್ಯಕ್ರಮಾಚೆ ಪ್ರಾಯೋಜಕಿ ‘ವರ್ಧನಿ’ ಚೆ ಮಾನೆಸ್ತಿಣ್ ಉಷಾ ನಂದಗೋಪಾಲ ಶೆಣೈ ಕಾರ್ಯಾವಳೀಂತ ಉಪಸ್ಥಿತ ಆಶಿಲಿಂಚಿ.
ಹೆಂ 3 ದಿವಸಾಚೆ ರವಪಾಚೆ ಸವಲತ್ತ ಆಸುಚೆ ಹ್ಯಾ ವಿಶೇಷ ಶಿಬಿರಾಂತು ಸುಮಾರ 50 ಚೆರ್ಡುಂವ ಮುಫತ ರಾವಪಾಚೆ ಸುವಿಧಾ ಸಾಂಗಾತಾಕ, ಖಾಣ- ಜೆವಾಣ , ನಾಟಕಾಚೆ ವೆವೆಗಳೆ ಕಲೆಚಾ ತರಬೇತ ಘೆತಲಿಂಚಿ ಅಶಿಂ ಸಾಧನಾ ಬಳಗಾಚೆ ಮುಖೇಲ ಮಾನೆಸ್ತ್ ಪ್ರಕಾಶ ಶ್ಶೆಣೈ ಹಾನ್ನಿ ಶಿಬಿರ ಬದ್ದಲ ಮಾಹಿತ ದಿಲೆಂ. ವಿಶ್ವ ಕೊಂಕಣಿ ಕೇಂದ್ರಾಚೆ ಉಪಾಧ್ಯಕ್ಷ ಮಾನೆಸ್ತ ಡಿ ರಮೇಶ ನಾಯಕ್ ಹಾನ್ನಿ ಧನ್ಯವಾದ ಸಮರ್ಪಣ ಕೆಲೆಂ. ವಿಶ್ವ ಕೊಂಕಣಿ ಕೇಂದ್ರಾಚೆ ಲಕ್ಷ್ಮೀಕಿಣಿ ನ್ ಮುಖೇಲ ಸೊಯರೆಲೆ ವಳಕ ಕರನು ದಿಲೆಂ. ಸುಚಿತ್ರಾಎಸ್ ಶೆಣೈ ಹಾನ್ನಿ ಕಾರ್ಯಕ್ರಮ ನಿರೂಪಣ ಕೆಲೆಂ. ವಿದ್ಯಾರ್ಥಿ ಶೈವಿಕಾ, ಅನ್ವಿತಾ, ಪ್ರಜಕ್ತಾ ಹಾನ್ನಿ ಪ್ರಾರ್ಥನ ಗೀತ ಗಾಯಲೆಂ.
