ಬೆಂದುರ್ ಸಾಂ. ಬೊಸ್ತ್ಯಾಂವ್ ಇಗರ‍್ಜೆಂತ್ ಮಂಗ್ಳುರ್ ದಿಯೆಸೆಜಿಚೊ ಗೊವ್ಳಿಬಾಪ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿ ಸ ಸೆಮಿನರಿಸ್ತಾಂಕ್ ದಿಯಾಕೊನಾಚಿ ದೀಕ್ಷಾ ದಿಲಿ. ಕಾಟಿಪಳ್ಳ ಫಿರ‍್ಗಜೆಚೊ ಭಾ| ಪ್ರಿನ್ಸ್ಟನ್ ಡಿ ಸೊಜಾ, ಅಮ್ಮೆಂಬಳ್ ಫಿರ‍್ಗಜೆಚೊ ಭಾ| ಲೊಯ್ವಿನ್ ರೊಡ್ರಿಗಸ್, ಕಾಸರಗೋಡ್ ಫಿರ‍್ಗಜೆಚೊ ಭಾ| ರೊಯ್‌ಸ್ಟನ್ ಡಿ ಸೊಜಾ, ಬಜ್ಪೆ ಫಿರ‍್ಗಜೆಚೊ ಭಾ| ರಜತ್ ಲೋಬೊ, ಆಂಜೆಲೋರ್ ಫಿರ‍್ಗಜೆಚೊ ಭಾ| ವಿನೊಲ್ ಫೆರ್ನಾಂಡಿಸ್ ಆನಿ ಆರ‍್ವಾ ಫಿರ‍್ಗಜೆಚೊ ಭಾ| ಅಜಯ್ ಡಿ ಸೊಜಾ – ದಿಯಾಕೊನಾಚಿ ದೀಕ್ಷಾ ಜೊಡ್ಲೆಲೆ ಸ ಸೆಮಿನರಿಸ್ತ್ ಜಾವ್ನಾಸಾತ್.
ಆಪ್ಲ್ಯಾ ಪ್ರಸಂಗಾಂತ್ ಗೊವ್ಳಿಬಾಪಾನ್ ಧಾರ್ಮಿಕ್ ಮುಕೆಲ್ಪಣಾಚ್ಯಾ ಮಹತ್ವಾ ವಿಶ್ಯಾಂತ್ ಸಾಂಗೊನ್ ಮುಕೆಲ್ಪಣ್ ಮ್ಹಳ್ಯಾರ್ ದೆವಾಮುಕಾರ್ ಆಮ್ಕಾಂಚ್ ಆಮಿ ಲ್ಹಾನ್ ಕರುನ್ ಲೊಕಾಚಿ ಸೆವಾ ಕರ್‍ಚಿ ಮ್ಹಳೆಂ. ಆನಿ ಹೀಚ್ ದೇಕ್ ಜೆಜುನ್ ನಿಮಾಣ್ಯಾ ಜೆವ್ಣಾವೆಳಾರ್ ಆಮ್ಕಾಂ ದಿಲ್ಯಾ ಮ್ಹಳೆಂ. ಯಾಜಕ್ ವೆದಿ ಆನಿ ಖುರ‍್ಸಾ ಮಧೆಂ ರಾವೊನ್ ಮಿಸಾಚೆಂ ಬಲಿದಾನ್ ಭೆಟಯ್ತಾ ಜಾಲ್ಯಾರ್ ದಿಯಾಕೊನ್ ವೆದಿ ಆನಿ ಲೊಕಾ ಮಧೆಂ ಮೋಗ್ ಆನಿ ಭೊಗ್ಸಾಣ್ಯಾಚೊ ಸಂದೇಶ್ ವಾಂಟ್ಚೆಂ ಕಾಮ್ ಕರ್‍ತಾ ಮ್ಹಳೆಂ. ಹಿ ದೇಕ್ ದೀಂವ್ಕ್ ಗೊವ್ಳಿಬಾಪಾನ್ ದಿಯಾಕೊನಾಚಿಂ ನ್ಹೆಸ್ಚ್ಯಾ ಮುಸ್ತಾಯ್ಕೆಚೊ ದಾಕ್ಲೊ ಆದಾರ್ ಜಾವ್ನ್ ಘೆತ್ಲೊ.
ಪ್ರಸಂಗಾ ಉಪ್ರಾಂತ್ ಭಾವಾಂನಿ ಆಪ್ಲ್ಯೊ ಆಂಗವ್ಣ್ಯೊ ಪರ‍್ಗಟ್ಲ್ಯೊ ಆನಿ ಗೊವ್ಳಿಬಾಪಾನ್ ತಾಂಚ್ಯಾ ತಕ್ಲೆರ್ ಹಾತ್ ದವರುನ್, ಪವಿತ್ ಆತ್ಮ್ಯಾಚ್ಯಾ ಕುರ್‍ಪೆನ್ ಮಾಗ್ಣೆಂ ಕೆಲೆಂ ಆನಿ ವೇಂಗ್ ಮಾರುನ್ ಯೆವ್ಕಾರ್ ದಿಲೊ.
ಮಂಗಳ ಜ್ಯೋತಿ ನಿರ್ದೇಶಕ್ ಮಾ| ಬಾ| ಫಾ. ರೋಹಿತ್ ಡಿ’ಕೋಸ್ಟಾ ಹಾಂಚ್ಯಾ ಮುಕೆಲ್ಪಣಾರ್ ದಿಯಾಕೊನಾಂನಿ ವೆದಿಚೆರ್ ಆಪ್ಲ್ಯಾ ಸೆವೆಚಿ ಸುರ‍್ವಾತ್ ಕೆಲಿ. ಸಾಂ. ಜುಜೆ ಸೆಮಿನರಿಚೊ ರೆಕ್ಟರ್ ಮಾ। ದೊ। ರಾಜೇಶ್ ರೊಜಾರಿಯೊ, ದಿಯೆಸೆಜಿಚೊ ವಿಗಾರ್ ಜೆರಾಲ್ ಮಾ| ಬಾ| ಮ್ಯಾಕ್ಸಿಮ್ ಎಲ್. ನೋರೊನ್ಹಾ, ಬೆಂದೂರ್ ಫಿರ‍್ಗಜೆಚೊ ಯಾಜಕ್ ಅನಿ ವಿಗಾರ್‌ವಾರ್ ಮಾ| ಬಾ| ವಾಲ್ಟರ್ ಡಿ’ಸೋಜಾ, ದಿಯೆಸೆಜಿಚೆ ಯಾಜಕ್, ಧರ್ಮ್‌ಭಯ್ಣಿ, ದಿಯಾಕೊನಾಚಿಂ ಕುಟ್ಮಾದಾರಾಂ ದೀಕ್ಷೆ ಸಂಭ್ರಮಾಕ್ ಹಾಜರ್ ಆಸ್ಲಿಂ.
ದೀಕ್ಷೆ ಉಪ್ರಾಂತ್ ಚಲ್ಲ್ರೆಲ್ಲ್ಯಾ ವೆದಿ ಕಾರ್ಯಾಂತ್ ಪಾದುವಾ ಕೊಲೆಜಿಚೊ ಪ್ರಾಚಾರ್ಯ್ ಮಾ। ಬಾ।. ಅರುಣ್ ಲೋಬೊ ಹಾಣಿ ದಿಯಾಕೊನಾಚಿಂ ಒಳಕ್ ಕರುನ್ ದೀವ್ನ್ ತಾಂಕಾ ಬರೆಂ ಮಾಗ್ಲೆಂ. ಗೊವ್ಳಿ ಬಾಪ್ ಅ। ಮಾ। ದೊ। ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿ ನವ್ಯಾನ್ ದೀಕ್ಷಾ ಜೊಡ್ಲೆಲ್ಯಾ ದಿಯಾಕೊನಾಂಕ್ ಆನಿ ತಾಂಚ್ಯಾ ಕುಟ್ಮಾದಾರಾಂಕ್ ಶುಭಾಶಯ್ ಪಾಟಯ್ಲೆ. ದಿ. ರೋಯ್ಸ್ಟನ್ ಡಿ’ಸೋಜಾ ಹಾಣೆ ಆಪ್ಲ್ಯಾ ಸಾಂಗಾತ್ಯಾ ತರ‍್ಪೆನ್ ದಿನ್ವಾಸ್ ಪಾಟಯ್ಲೆ.
ನವ್ಯಾನ್ ದೀಕ್ಷಾ ಜೊಡ್ಲೆಲ್ಯಾ ದಿಯಾಕೊನಾಂಕ್, ದಿ. ಪ್ರಿನ್ಸ್ಟನ್ ಡಿ’ಸೋಜಾಕ್ ಮೊಗರ್ನಾಡ್, ಡಿ ಲೊಯ್ವಿನ್ ರೋಡ್ರಿಗ್ಸಾಕ್, ದೆರೇಬೈಲ್, ದಿ. ರೋಯ್ಸ್ಟನ್ ಡಿ’ಸೋಜಾಕ್, ಪೆರ‍್ಮನ್ನೂರ್, ದಿ. ರಜತ್ ಲೋಬೋಕ್, ಕೊಕ್ಕಡ ಆನಿ ದಿ. ವಿನೋಲ್ ಫೆರ್ನಾಂಡಿಸ್ ಹಾಕಾ ನಿಡ್ಡೋಡಿ ಫಿರ‍್ಗಜೆಕ್ ಸೆವೆಕ್ ನಮಾಯಾರ್‍ಲಾಂ .
