ಮುಕಾರ್ ಗೆಲ್ಲ್ಯಾ ಇಶ್ಟಾಕ್ – ಏಕ್ ಕಾಗತ್

28

ಮೊಗಾಚ್ಯಾ ಜೆರಿಯಾಬ್,

ತುಕಾ ಕೆನ್ನಾಂಯ್ ಕಾಗಾತ್ ಬರಯಿಲ್ಲೆಂ ನಾಂ. ಸಾಂಗಾತಾಚ್ ಮ್ಹಳ್ಳೆಬರಿಂ ಆಸ್‌ಲ್ಲ್ಯಾಂವ್, ಬರಂವ್ಚಿ ಗರ‍್ಜ್ ದಿಸ್ಲಿನಾಂ. ಪೂಣ್ ಹಾಂವ್ ಉಲಂವ್ಚೆಪ್ರಾಸ್ ಬರಂವ್ಚ್ಯಾಂತ್ ಇಲ್ಲೊ ಮುಕಾರ್. ತುಕಾ ಕಾಗಾತ್ ಬರಯ್ನಾತ್‌’ಲ್ಲ್ಯಾನ್ ತುಜೆಕಡೆಂ ಸಾಂಗ್ಚೆಂ ಆಸಲ್ಲೆಂ ತಶೆಂಚ್ ಉರುನ್ ಗೆಲೆಂ ತೆಂ ಮ್ಹಾಕಾ ಎದೊಳ್ ಕಳ್ಳೆಂನಾಂ‌. ಮ್ಹಾಕಾ ತುಜೆಲಾಗಿಂ ಉಲಂವ್ಕ್ ಆಸಾ. ಇತ್ಲ್ಯಾವರ‍್ಸಾಂನಿ ತುಜೆಕಡೆಂ ಸಾಂಗುಂಕ್ ನಾತ್‍ಲ್ಲೆಂ ಸಾಂಗುಕ್ ಆಸಾ. ಫಕತ್ ಹಾಂವ್ ಆನಿ ತುಂ.

ತುಜ್ಯಾ ಅಗಣಿತ್ ಒಳ್ಕೆಂಚ್ಯಾ ಸಾಸಾಂಗಾತಾ ಹಾಂವೆ ತುಕಾ ಇತ್ಲ್ಯಾಜಣಾಂಚಿ ಒಳೊಕ್ ಕರುನ್ ದಿಲಿ. ಆನಿ ದರ್ ಏಕ್ ಪಾವ್ಟಿಂ ತುಂವೆ ಮ್ಹಾಕಾ ಏಕ್ ಅನ್ನ್ಯಾಯ್ ಕೆಲೊ. ಪೂಣ್ ತೊ ಸೊಬಿತ್ ಅನ್ನ್ಯಾಯ್… ತುಂವೆ ತ್ಯಾ ಸರ‍್ವ್ ಮ್ಹಜ್ಯಾ ಇಶ್ಟಾಂಕ್ ಆನಿ ಮೊಗಾಚ್ಯಾಂಕ್ ತುಜೆ ಕರ‍್ನ್ ಘೆತ್ಲೆಯ್. ಮ್ಹಾಕಾ ಉಡಾಸ್ ಆಸಾ, ಹಾಂವೆ ಹ್ಯಾ ಡೊಲ್ಫಿಕ್ ಏಕ್ದೀಸ್ ತೊಟ್ಟಾಮ್ ತುಮ್ಗೆರ್ ಧಾಡಲ್ಲೊ. ತಾಕಾ ಎಕ್ಸ್‌ಪ್ರೆಶನ್ಸಾಚ್ಯಾ ಕಸಲ್ಯಾಗೀ ಪ್ರೋಗ್ರಾಮಾಚಿ ಸಿಡಿ ಜಾಯ್ ಆಸ್‌ಲ್ಲಿ ಆನಿ ತುಮ್ಗೆರ್ ಆಸ್‌ಲ್ಲಿ. ತವಳ್ ಡೊಲ್ಫಿ ಬೊಂಬಯ್ ಥಾವ್ನ್ ಆಯಿಲ್ಲೊ ಮಾತ್ ಜಾಲ್ಲ್ಯಾನ್ ತಾಕಾ ತುಮ್ಚಿ ಯಾ ತುಮ್ಕಾಂ ತಾಚಿ ಬಿಲ್ಕುಲ್ ಒಳಕ್ ನಾತ್‍ಲ್ಲಿ. ಸಾಂಜೆರ್ ಹಾಂವೆ ಸಿಡಿ ಮೆಳ್ಳಿಗಿ ಮ್ಹಣ್ ವಿಚಾರುಂಕ್ ಫೋನ್ ಕರ‍್ತಾಂ ತರ್ ಹೊ ಸಕಾಳಿಂ ಗೆಲ್ಲೊ ದನ್ಪಾರಾ ಜೆವಾಣ್ ಕರ‍್ನ್, ಸಾಂಜೆಚಿ ಚಾ ಪಿಯೆವ್ನ್, ಆಜೂನೀ ತುಮ್ಗೆರ್‌ಚ್ ಉಲವ್ನ್ ಬಸ್ಲಾ. ಪ್ರವೀಣ್, ಸುಷ್ಮಾ, ಎರಿಕ್, ಡೆನಿಸ್, ರುಬಿನಾ, ಸ್ಟೇಫನ್, ಗ್ರೆಟ್ಟಾ, ಸುಜಾತಾ, ಒಲ್ವಿನ್… ಎಕೇಕ್‍ಚ್ ಮ್ಹಜೆ ಇಶ್ಟ್ ಫಕತ್ ತುಮ್ಚ್ಯಾ ತಸ್ಲ್ಯಾ ತುಮ್ಚ್ಯಾ ಉಬಾಳ್ ಮೊಗಾಂತ್ ಬುಡುನ್ ವೆಚೆಂ ಹಾಂವ್ ಪಳೇತ್ ಉರ‍್ಲೊಂ … ಇಲ್ಲೆಂ ದವ್ಲತೆನ್, ಇಲ್ಲೆಶೆಂ ಮಸ್ರಾನ್…

ತೊಚ್ ತುಜೊ ತೊ ಘುಟ್ ಜೆರಿ. ತುಕಾ ಕೊಣಾಯ್ಚೀಯ್ ಪರ‍್ತುನ್ ಒಳಕ್ ಕರ‍್ನ್ ದಿಂವ್ಚಿ ಗರ‍್ಜ್‌ಚ್ ನಾತ್‍ಲ್ಲಿ. ಏಕ್ ಪಾವ್ಟಿಕ್ ಪುರೊ. ಉಪ್ರಾಂತ್ ತುಂ ತಾಂಚ್ಯಾ ಜಿಣ್ಯೆಂತ್ ಮಿಸ್ಳಾತಲೊಯ್, ತಾಂಚ್ಯಾ ಆಂಗ್ಡಿನಿಂ, ತಾಂಚ್ಯಾ ರೆಸ್ಟೋರಾಂನಿಂ, ತಾಂಚ್ಯಾ ನಾಟಕಾಂನಿಂ, ಸಂಭ್ರಮಾಂನಿಂ ಆನಿ ಜಿಣಿಯಾಂನಿಂ. ಏಕ್ ಇಶ್ಟಾಗತೆಕ್ ತುಂ ಫಕತ್ ನಾಂವಾಪುರ‍್ತಿ ಭೆಟ್ ದೀನಾತ್‍ಲ್ಲೊಯ್. ಬಗಾರ್ ತುಂ ತಾಂತು ಘುಸ್ತಲೊಯ್ ಆನಿ ತ್ಯಾ ಇಶ್ಟಾಗತಿಚೆಂ ಭಾಡೆಂ ದರ್ ಏಕ್ ದೀಸ್ ತುಜ್ಯಾ ಶರ‍್ತಾಂವೀಣ್ ಮೊಗಾನ್ ಪಾವಿತ್ ಕರ‍್ತಾಲೊಯ್.

ಪಯಿಲ್ಲೆಂ ಹಾಂವ್ ಆನಿ ತುಂ ಅಬುಧಾಬಿ ದರ‍್ಯಾಮಧೆಂ ಸಾಂಗಾತಿ ವಾವ್ರಾಡಿ ಜಾವ್ನ್ ಮೆಳ್ಳೆಲ್ಯಾಂವ್. ತವಳ್ ಲ್ಹಾನ್ ಪ್ರಾಯೆಚ್ಯಾ ಮ್ಹಾಕಾ ತ್ಯಾ ಸರ‍್ವ್ ವೆವೆಗ್ಳ್ಯಾ ದೆಶಾಂಚ್ಯಾ ಅನ್ವಳ್ಕಿ ಮ್ಹನ್ಶ್ಯಾಮದೆಂ ತುಂ ಬುಡ್ತಲ್ಯಾಕ್ ಫಾಂಟೊ ಮೆಳಲ್ಲೊಶೆಂ ಮೆಳಲ್ಲೊಯ್. ಮ್ಹಜೊ ವಡ್ಲೊ ಭಾವ್ ಜೊನಿ ತುಜ್ಯಾ ವಳ್ಕಿಚೊ ಮ್ಹಣ್ ಕಳಲ್ಲೆ ಉಪ್ರಾಂತ್ ತುಂ ಮ್ಹಾಕಾ ಏಕ್ ವಡ್ಲೊ ಭಾವ್‍ಚ್ ಜಾಲೊಯ್. ಹಾಂವ್ ತೊಟ್ಟಾಮ್ ತುಮ್ಚ್ಯಾ ಘರಾಯ್ ಪಾವ್ಲೊಂ, ಪಾಪಾ ಆಲ್ಬರ್ಟ್ ಬ್ರಿಟ್ಟೊ, ಮೇರಿ ಮಾಂಯ್, ಬಾಯ್, ಬೊವ್ಜಿ, ಭಾವ್, ವ್ಹೊನಿಯೊಂ, ಭಾಚೆ, ಸಗ್ಳ್ಯಾಂಚ್ಯಾ ವಳ್ಕಿಚೊ ಜಾಲೊಂ, ಕುಟ್ಮಾಚೋಚ್ ಜಾಲೊಂ.

ಮಾಗಿರ್ ತುಜೆಂ‌ ಲಗಿನ್ ಕಲ್ಯಾನ್ಪುರ್ ನೆಜಾರ‍್ಚ್ಯಾ ಸ್ಯಾಂಡ್ರಾಬಾಯೆಲಾಗಿಂ. ಆಮ್ಚೆಂ ಲ್ಹಾನ್ಶೆಂ ವರ‍್ತುಲ್ ವಾಡತ್ ಗೆಲೆಂ. ಆನಿ ಉಪ್ರಾಂತ್ ಎಕಾ ದಿಸಾ ತುಂವೆ ಮ್ಹಾಕಾ ತುಜೊ ಕುಂಪಾದ್ರ್ ಕೆಲೊಯ್. ತುಮ್ಚೆ ಪಯ್ಲೆಂ ಬಾಳ್ ಶಾಲೊಮಾಕ್ ಪೊದೊರ್ನ್ ಜಾಂವ್ಚೊ ಅವ್ಕಾಸ್ ಕರುನ್ ದಿಲೆಂಯ್. ತುಜ್ಯಾ ಸಬಾರ್ ಮೊಗಾಚ್ಯಾಂಮಧೆಂ ಮ್ಹಾಕಾ ದಿಲ್ಲೊ ಹೊ ಅವ್ಕಾಸ್ ತುಮಿಂ ಮ್ಹಜೆರ್ ದವರಿಲ್ಲ್ಯಾ ಭರ‍್ವಶ್ಯಾಚಿ ಗವಾಯ್ ಆನಿ ಮ್ಹಜೊ ಗವ್ರವ್ ಮ್ಹಣ್ ಹಾಂವ್ ಲೆಕ್ತಾಂ. ತ್ಯಾ ಉಪ್ರಾಂತ್ ಧಾಕ್ಟುಲ್ಯಾ ಶಾರನಾಚೆಂ ಯೆಣೆಂ ಜಾಲೆಂ.

ಉಪ್ರಾಂತ್ ತುಂ ಖತಾರ್, ರಾಸ್‍ಗ್ಯಾಸ್ ಕಂಪನಿಂತ್ ಕಾಮಾರ್ ಗೆಲೊಯ್. ಕಾಮಾವೆಳಾರ್ ನಂಯ್ ತರೀ ಆಮ್ಚ್ಯಾ ದೊಗಾಂಯ್ಚ್ಯಾ ತವಳ್ ತವಳ್ಚೆ ರಜೆಂತ್ ಆಮ್ಚಿ ಸಳಾವಳ್ ತಶಿಚ್ ಉರ್ಲಿ. ರಾಸ್‍ಗ್ಯಾಸ್ ಕಂಪ್ಣೆಂತ್ ಥೊಡ್ಯಾಚ್ ವರ‍್ಸಾಂ ಪಯ್ಲೆಂ ತುಂ ನಿವೃತ್ ಜಾವ್ನ್ ಯೆತಾನಾ ಉಂಚ್ಲ್ಯಾ ಹುದ್ದ್ಯಾರ್ ತುಜ್ಯಾಚ್ ಎಕಿನ್ ಮ್ಹಿನತೆನ್ ಪಾವಲ್ಲೊಯ್. ಜಿಣಿಭರ್ ದರ‍್ಯಾಮದ್ಲ್ಯಾ ಬಲ್ತ್ಯಾಚ್ ಸಂಸಾರಾಂತ್ ಪಾಶಾರ್ ಜಾಲ್ಲ್ಯಾತುಕಾ ಆತಾಂ ಕುಟ್ಮಾಸವೆಂ, ಇಶ್ಟಾಮಂತ್ರಾಸವೆಂ, ಫಿರ್ಗಜ್ ಕುಟ್ಮಾಸಾಂಗಾತಾ, ಸಮುದಾಯಾಂತ್ ಜಿಣಿ ಪಾಶಾರ್ ಕರುಂಕ್ ಅವ್ಕಾಸ್ ಮೆಳ್ಳೊ, ಪೂಣ್ ಇತ್ಲ್ಯಾವೆಗಿಂ ತೊ ಸಂಪತ್ ಮ್ಹಣ್ ಆಮಿಂ ಕೊಣೆಂಯ್ ಚಿಂತ್‍ಲ್ಲೆಂ ನಾಂ.

ಅಬುಧಾಬಿಂತ್ಲೆ, ಖಟಾರಾಂತ್ಲೆ ತುಜೆ ಸಾಂಗಾತಿ ತುಜೆವಿಶಿಂ ಕಿತೆಂ ಸಾಂಗ್ತಾತ್ ಜಾಣಾಂಯ್ ? ತುಂ ಎಕ್ಲೊ ರಾಗ್ ಕರುಂಕ್ ನೆಣಾಸ್ಲಲೊ, ಗುಣೇಸ್ತ್ ಘನೇಸ್ತ್ ಮಾನೆಸ್ತ್ ಮ್ಹಣ್ ತೆ ಮ್ಹಣ್ತಾತ್. ಇತ್ಲ್ಯಾ ವರ್ಸಾಂಕ್ ತುಕಾ ಜಾಣಾಸ್ಲಲೊ ಹಾಂವ್ ತೆಂ ಶೆಂಬರ್ ಠಕೆ ಸತ್ ಮ್ಹಣ್ ಜಾಣಾಂ. ಮ್ಹಜ್ಯಾ ಜಿಣ್ಯೆಚ್ಯಾ ಹರ್ ಬರ‍್ಯಾವಾಯ್ಟಾವೆಳಿಂ ತುಂ ಮ್ಹಜೆ ಸವೆಂ ಆಸಲ್ಲೊಯ್ ಆನಿ ತುಕಾ ರಾಗ್ ಆಯಿಲ್ಲೊ ಪಳೆಂವ್ಚೊ ಅವ್ಕಾಸ್ ಮ್ಹಾಕಾ ತರೀ ಎದೊಳ್ ಮೆಳಲ್ಲೊ ನಾಂ. ತುಕಾ ತಿ ಸಂವಯೀಚ್ ನಾತ್‍ಲ್ಲಿ.

ಜಿಣ್ಯೆಚ್ಯಾ ಹರ್ ಪಾವ್ಲಾಂನಿಂ ತುಂ ಸಾಂಗಾತಾ ಆಸಲ್ಲೊಯ್. ಹಾಂವೆ ಕಿತೆಂ ಕೆಲ್ಯಾರೀ ತುಂ ಮಜ್ಬೂತ್ ಖಾಂಬ್ಯಾಬರಿಂ ಮ್ಹಜೆಬರಾಬರ್ ಉಬೊ ರಾವ್ತಲೊಯ್. ಮ್ಹಜ್ಯಾ ಜಯ್ತಾಂತ್ ಮ್ಹಜೆಪ್ರಾಸ್ ಚಡ್ ಸಂತೋಸ್ತಲೊಯ್. ಪಡಲ್ಲೆತೆನ್ನಾಂ ಶೆರ‍್ಮಾಂವ್ ದೀನಾಸ್ತಾಂ ಹಾಂವ್ ಪರತ್ ಉಟ್ತಾಪರ‍್ಯಾಂತ್ ಸಾಂಗಾತ್ ದಿತಲೊಯ್.

ಸಬಾರ್ ವರ‍್ಸಾಂಪಯ್ಲೆಂ ಆಮಿ ‘ದಿ ಎಕ್ಸ್‌ಪ್ರೆಶನ್ಸ್’ ಪಂಗಡ್ ಬಾಂದುನ್ ಹಾಡ್ತಾನಾಂ ಹಾಂವೆ, ಎರಿಕ್ ಆನಿ ಪ್ರವೀಣಾನ್ ತುಕಾ ಆನಿ ಸ್ಯಾಂಡ್ರಾಕ್ ವಿಚಾರ್ತಾನಾಂ ತುಮಿಂ ಜಾಯ್ತ್ ಮ್ಹಳ್ಳೆಂ ತುಮಿ ದರ್ ಏಕ್ ಪಾವ್ಟಿಂ ಆಮ್ಕಾಂ ಜಾಯ್ತ್ ಮ್ಹಳ್ಳೆಬರಿಚ್. ಪುರ‍್ತಾಮನಾನ್, ಕಾಂಯ್ ಚಿಂತಿನಾಸ್ತಾನಾಂ. ಆನಿ ತ್ಯಾ ದೀಸ್ ಥಾವ್ನ್ ಫಕತ್ ಪಂಗ್ಡಾಸಾಂದೆ ಮಾತ್ ನಂಯ್ ಪಂಗ್ಡಾಂತಚ್ ತುಮ್ಚೆಂ ಕಾಳಿಜ್ ಆಸ್ಲೆಂ. ದರ್ ಏಕ್ ಜಮಾತೆಕ್, ಪ್ರ್ಯಾಕ್ಟೀಸಾಕ್, ಆಮ್ಚ್ಯಾ ದರ್ ಏಕ್ ಕಾರ‍್ಯಾಕ್,ವಡ್ ಯಾ ಲ್ಹಾನ್ ತುಮಿಂ ಪುರ‍್ತ್ಯಾನ್ ಹಾಜರ್ ಆಸ್ತಲ್ಯಾತ್. ಬಾರ್ಕುರ್, ಬ್ರಹ್ಮಾವರ್, ಸಾಸ್ತಾನ್ಚ್ಯಾ ಲೊಕಾಂಕ್ ಸಾಂಸ್ಕೃತಿಕ್ ಶೆತಾಂತ್ ಏಕ್ ನವೆಸಾಂವ್ ದಿಸುಂಕ್ ಲಾಗ್‍ಲ್ಲೆಂ ಆನಿ ತಾಂತ್ಲ್ಯಾ ತಾಂತು ಹೆಂ ಸಂತೆಕಟ್ಟೆಚೆಂ ಜೊಡೆಂ ಆಮ್ಚೆಸವೆಂ ಆಸ್ಚೆಂ ತಾಂಕಾ ಏಕ್ ನವಾಲ್‌ಶೆಂ ಭಗ್ತಾಲೆಂ. ಲೊಕಾಂನಿಂ ಆಮ್ಚೆಲಾಗಿಂ ವಿಚಾರಲ್ಲೆಂ ಲೆಗುನ್, ಹಾಂಕಾಂ ತುಮಿಂ ಕಿತೆಂ ಕರ‍್ನ್ ತುಮ್ಚ್ಯಾ ವರ‍್ತುಲಾಂತ್ ಹಾಡುಂಕ್ ಸಕ್ಲ್ಯಾತ್ ಮ್ಹಣ್. ಹಾಂವೆ ಎದೊಳ್ ಕೊಣಾಯ್ಕೀ ಸಾಂಗ್‍ಲ್ಲೆಂ ನಾಂ. ಸತ್ ಸಾಂಗ್ಚೆಂ ತರ್ ಆಮಿ ಕೆಲ್ಲೆಂ ಕಾಂಯ್ಚ್ ನಾಂ. ತುಮಿಂ ಆಯ್ಲ್ಯಾತ್. ಆಮ್ಚೆ ಸವೆಂ ಠಿಕ್ಲ್ಯಾತ್.

ಠಿಕ್ಲ್ಯಾತ್ ಪಂಗ್ಡಾಚೊ ಬಳಿಶ್ಟ್ ಪಾಟಿಂಬೊ ಜಾವುನ್. ಸವೀಸ್ ವರ‍್ಸಾಂಪಯ್ಲೆಂಚ್ಯಾ ‘ಎಕ್ಸ್‌ಪ್ರೆಶನ್ಸ್ 2000’ ಕಾರ‍್ಯಾಥಾವ್ನ್ ಪೋಪೋರ‍್ಚ್ಯಾ ‘ಚಿರಿ’ ನಾಟಕಾಮೆರೆನ್ ಖಂಯ್ಚ್ಯಾಯ್ ಕಾರ‍್ಯಾಚೆಂ ವಜನ್ ಇಲ್ಲೆಂ ಚಡ್ಶೆಂ ಆಮ್ಕಾಂ ದಿಸಲ್ಲೆತೆನ್ನಾಂ ತುಂವೆಂ ಸಾಂಗ್ಚೆಂ ಆಸ್‍ಲ್ಲೆಂ, ‘ಎಕ್ಸ್‌ಪ್ರೆಶನ್ಸಾಚ್ಯಾ ಖಂಯ್ಚ್ಯಾಯ್ ಕಾರ‍್ಯಾವಿಶಿಂ ಖಂತ್ ಕರಿನಾಕಾತ್.. ಆಮಿಂ ಆಸಾಂವ್’. ಜಾಯ್ತೆ ಜಣ್ ತಶೆಂ ಸಾಂಗ್ತಾತ್, ಪೂಣ್ ತುಂವೆ ದರ್ ಏಕ್ ಪಾವ್ಟಿಂ ಸಾಂಗ್‍ಲ್ಲೆಂ ಕರ‍್ನ್ ದಾಕಯ್ಲೆಂಯ್.

ಆನಿ ಹಾಂವ್ ಸಬಾರಾಂತ್ ಎಕ್ಲೊಂ. ಹೆಂ ಸಗ್ಳ್ಯಾನಿಂ ಸಮ್ಜುನ್ ಘೆಜೆ ಮ್ಹಣ್ ಮ್ಹಜಿ ಆಶಾ. ತುಂ ಏಕ್ ಸಮುದಾಯಾಚೊ ಬಾಂದ್ಪಿ. ಇಗರ್ಜೆಂತ್ ತುಂ ಫಕತ್ ಏಕ್ ಮಿಸಾಕ್ ಯೇವ್ನ್ ವೆಚೊ ಭಾವಾರ್ಥಿ ನಂಯ್ ಆಸ್‍ಲ್ಲೊಯ್. ತುಂವೆಂ ಇಗರ‍್ಜಿಕ್ ತುಜೊ ವೇಳ್, ತುಜಿ ಮ್ಹಿನತ್ ಆನಿ ತುಜೆಂ ಉದಾರ್ ಮನ್ ದಿಲೆಂಯ್ ಆನಿ ಹೆರಾಂಕ್ ಇಗರ‍್ಜ್ ಆಮಾ ಸರ‍್ವಾಂಚೆಂ ಘರ್ ಮ್ಹಣ್ ಭಗಾಶೆಂ ಕೆಲೆಂಯ್. ಹಾಚೆ ಪಾಸತ್ ತುಕಾ ಫಿರ್ಗಜೆಂತ್ ಜಾಂವ್ ಯಾ ಭಾಯ್ರ್ ಖಂಯ್ಚ್ಯಾಯ್ ಸಂಘಟನಾಂತ್ ಯಾ ಆಯೋಗಾಂತ್ ಸಾಂದೆಪಣ್ ಯಾ ಪದ್ವಿ ಆಪ್ಣಾಂವ್ಚಿ ಗರ‍್ಜ್ ದಿಸ್ಲಿನಾಂ‌‌. ಆನಿ ತುಂ ಫಕತ್ ತುಜ್ಯಾ ಫಿರ‍್ಗಜೆಚ್ಯಾ ವೊಣೊದಿಂ ಪಾಟ್ಲ್ಯಾನ್ ಫಿಚ್ಯಾರ್ ಉರ‍್ಲೊನಾಂಯ್. ತುಜ್ಯಾ ಸೆಜ್ ಸಾಮಾರಾಚ್ಯಾ, ತುಜ್ಯಾ ವಾಡ್ಯಾಕ್ ಮಾತ್ ಸೀಮಿತ್ ಜಾಂವ್ಕ್‌ನಾಂಯ್. ತೊಟ್ಟಾಂ, ಸಂತೆಕಟ್ಟೆ, ಅಬುಧಾಬಿ, ಖತಾರ್, ಖಂಯ್ಸರ್ ತುಂ ಗೆಲ್ಯಾರೀ ಥಂಯ್ಸರ್ ತ್ಯಾ ಪಯ್ಲೆಂ ನಾತ್‍ಲ್ಲೆಂ ಕಾಂಯ್‌ ತರೀ ತುಂವೆಂ ಪಾಟಿಂ ದವರ‍್ಲೆಂಯ್. ಏಕ್ ಇಶ್ಟಾಗತ್, ಏಕ್ ನಾತೆಂ, ಎಕಾಮೆಕಾ ಸಾಂಬಾಳ್ನ್ ಧರ‍್ಚ್ಯಾ ಜಣಾಂಚೆಂ ಏಕ್ ಲ್ಹಾನ್ ವರ‍್ತುಲ್…

ತುಂವೆಂ ಗುಪ್ತಿಂ ಕೆಲ್ಲಿ ಮಜತ್ ಕಾಂಯ್ ಸ್ಯಾಂಡ್ರಾಬಾಯೆಕ್ ಲೆಗೂನ್ ಖಬರ್ ನಾಂ. ಉತ್ತರ್ ಭಾರತಾಂತ್ಲ್ಯಾ ಮಿಸಾಂವ್ ಠಾಣ್ಯಾಂತ್ಲಿ ಕಿತ್ಲಿಶಿಂ‌ ಕೊಪೆಲಾಂ ಬಾಂದುಂಕ್, ದುರಸ್ತ್ ಕರುಂಕ್ ತುಂವೆ ದುಡ್ವಾಕುಮೊಕ್ ಧಾಡುನ್ ದಿಲಿ. ನೋರ್ತ್ ಈಸ್ಟಾಚಾ ಕಿತ್ಲೆಶ್ಯಾ ವಿದ್ಯಾರ್ಥಿಂಕ್ ಶಿಕ್ಪಾಕ್ ಮಜತ್ ದಿಲಿಯ್.

ತುಮಿಂ ಕೊಣ್, ಖಂಯ್ ಥಾವ್ನ್ ಆಯ್ಲ್ಯಾತ್, ಮ್ಹಜೆಖಾತಿರ್ ಕಿತೆಂ‌ ಕರ‍್ಶ್ಯಾತ್ ಮ್ಹಣ್ ತುಂವೆ ಕೊಣಾಯ್ಕೀ ವಿಚಾರ್‌ಲ್ಲೆಂ ನಾಂ. ತುಜೆಲಾಗಿಂ ಆಯಿಲ್ಲೆ, ಕಾಂಯ್ ಇಲ್ಲೆಂ ಬರೆಂಪಣ್ ಘೆವುನ್ ಗೆಲೆ. ಕೊಣಾಯ್ಕ್ ಮಜತೆಚೊ ಖಾಂದ್ ತರ್, ಕೊಣಾಕ್ ಏಕ್ ಬರೆಂ ಉತರ್, ಕೊಣಾಕ್ ಜೊಕ್ತ್ಯಾವೆಳಾರ್ ಉಗಡ್‍ಲ್ಲೆಂ ದಾರ್ ತರ್ ಕೊಣಾಕ್ ಆಪ್ಣಾತೆವ್ಶಿಂ ಕೊಣೆಂತರೀ ಗುಮಾನ್ ಕೆಲೆಂ ಮ್ಹಳ್ಳೆಂ ಬರಿ ಖಬರ್. ಆನಿ ಹಿಚ್ ತುಜಿ ಶಾಥಿ ಆನಿ ತಾಂಕ್. ತುಂವೆಂ ಬಾಂದ್ಪಾಂ ಉಬಾರ‍್ಲಿಂನಾಂಯ್. ತುಂವೆ ಲೊಕಾಂಕ್ ಎಕ್ಟಾಂಯ್ಲೆಂಯ್ ಆನಿ ತಾಂಚೆಸವೆಂ ಸಮುದಾಯ್ ಬಾಂದ್ಲೆಂಯ್.

ತುಂ ಆತಾಂ ಕಿತೆಂ ಪಾಟಿಂ ಸೊಡುನ್ ವೆತಾಯ್ ಪಳೆ. ಸ್ಯಾಂಡ್ರಾಬಾಯ್… ತುಜೆಬರೀಚ್ ಉಬಾಳ್, ಮೊವಾಳ್ ಕಾಳಿಜ್. ಶಾಲೊಮ್ ಆನಿ ಶಾರನ್… ತುಜೆಂಚ್ ಉದಾರ‍್ಪಣ್, ತುಜೆಂಚ್ ಹುಸ್ಕ್ಯಾಚೆಂ ಆನಿ ಜತ್ನೆಂಚೆಂ ಮ್ಹೊಂವಾಳ್ ಸಂಯ್ಬ್. ಆನಿ ತಾಣಿಂ ವಾಜಂವ್ಚಿ ತಿಂ ಜಾಯ್ತಿಂ ಸಂಗೀತ್ ವ್ಹಾಜಾಂತ್ರಾಂ, ಕಾಂಯ್ ತುಂವೆಂ ತುಜೆಂ ಘರ್ ಬಾಂದ್‍ಲ್ಲೆಂಚ್ ಸಂಗೀತಾನ್ ಭರುಂಕ್‌ಶೆಂ. ಶಾಲೊಮ್, ಪುರಸ್ಕಾರ್ ಜೊಡ್ಪಿ ಲಂಡನಾಂತ್ ವಾವ್ರ್ ಕರ‍್ಚೆಂ ಆರ‍್ಕಿಟೆಕ್ಟ್. ಶಾರನ್ ಅಂತರಾಷ್ಟ್ರೀಯ್ ಮಳಾರ್ ಲೊಕಾಂಕ್ ಸಾಂಗಾತಾ ಹಾಡ್ಚೆಂ ಸಂಘಟನ್ ಬಾಂದ್ಪಿ. ಬಾಪಯ್‌ಪರಿಂಚ್ ಧುವೊ. ತುಂಯ್ ಎಕ್ಲೊ ಆರ‍್ಕಿಟೆಕ್ಟ್‌ಚ್. ಪೂಣ್ ತುಜಿಂ ಬಾಂದ್ಪಾಂ ಬಾಂದ್ತಾನಾಂ ಮಾತ್ ತುಂ ಫಕತ್ ಮ್ಹನ್ಶ್ಯಾಕಾಳ್ಜಾಂ ವಾಪಾರ‍್ತಾಲೊಯ್. ಮ್ಹನ್ಶ್ಯಾಕಾಳ್ಜಾಂಚಿ ಸಂಘಟನಾಂ ಘಡ್ತಲೊಯ್.

ಪೂಣ್ ಮ್ಹಾಕಾ ಏಕ್ ಮಾತ್ ಹ್ಯಾ ಖಿಣಾಂ ಸಮ್ಜಾನಾಂ ಜೆರಿ. ತುಂ ಕೆನ್ನಾಂಯ್ ವೇಳ್ ಕರುನ್ ಆಯಿಲ್ಲೊ ನಂಯ್ ಯಾ ವೆಳಾಫುಡೆಂಚ್ ಗೆಲ್ಲೊಯ್ ನಂಯ್. ಜಾಂವ್ ಜಮಾತ್, ಸಂಭ್ರಮ್ ಯಾ ಕಾಮ್. ಪೂಣ್ ಆತಾಂ ಆಮ್ಕಾಂ ಸರ‍್ವಾಂಕ್ ಸಾಂಗಾನಾಸ್ತಾಂಚ್ ಕಿತ್ಯಾಕ್ ಮುಕಾರ್ ಗೆಲೊಯ್. ‘ರಾವ್’ ಮ್ಹಣ್ ಸಾಂಗುಂಕ್ ಸಯ್ತ್ ಅವ್ಕಾಸ್ ದೀನಾಸ್ತಾಂಚ್ ಕಸೊ ಗೆಲೊಯ್?

ಹೊ ತುಜೊ ಜಿನೊಸ್ ನಂಯ್. ಯಾ ತುಜ್ಯಾ ಸದಾಂಚಾ ಜಿನೊಸಾಸಾರ‍್ಕೊಚ್,ಹರ್ಶೆಂಬರಿ ಮುಕಾರ್ ಗೆಲೊಯ್? ಥಂಯ್ ಕೊಣ್ ಆಸಾತ್ ಪಳಂವ್ಕ್, ತೊ ಜಾಗೊ ಘರಾಬರಿಂ ಆಯ್ತೊ ಕರುಂಕ್, ಆನಿ ಆಮ್ಚೊ ವೇಳ್ ಯೆತಾನಾಂ ಆಮ್ಕಾಂ ಅನ್ವಳ್ಕಿ ಜಣಾಂಮಧೆಂ ಆಮ್ಚೋಚ್ ಕೊಣೀ ಆಸಾ ಮ್ಹಳ್ಳೊ ಸುಶೇಗ್ ದೀಂವ್ಕ್ ಕೊಣ್ಣಾ.

ಆಜ್ ಆಮಿ ಸಕ್ಕಡ್ ತುಜ್ಯಾ ಮೊಗಾಚಿಂ, ಎಕ್ಸ್‌ಪ್ರೆಶನ್ಸ್ ಕುಟಾಮ್ ಧರೂನ್, ಸ್ಯಾಂಡ್ರಾಬಾಯ್, ಶಾಲೊಮ್ ಆನಿ ಶಾರನಾಸಾಂಗಾತಾ. ಪೂಣ್ ತುಜೊ ಜಾಗೊ ಮಾತ್ ಖಾಲಿಖಾಲಿ.

ನೀಜ್ ಇಶ್ಟಾಗತ್ ಜಗವ್ನ್ ದವರ‍್ಚಿ ನಂಯ್ – ಬಗಾರ್ ಪರತ್ ಪರತ್ ವಾಂಟ್ಚಿ, ಸಗ್ಳೆಂ ಕೂಡ್ ಭರ‍್ತಾ ಪರ‍್ಯಾಂತ್ ಮ್ಹಣ್ ತುಂವೆಂ ಆಮ್ಕಾಂ ಶಿಕಯ್ಲೆಂಯ್

ಆತಾಂ ತೆಂ ಕೂಡ್ ತುಜೆವೀಣ್ ಥಂಡ್ ಪಡ್ಲಾಂ. ಪೂಣ್ ತುಜೊ ಉಬಾಳ್ ಕೂಡಾಚ್ಯಾ ದರ್ ಏಕ್ ಮುಲ್ಯಾಮುಲ್ಯಾನಿಂ ಉಮ್ಕಳುನ್ ಉರ‍್ಲಾ. ತುಜಿ ಒಳಕ್ ಜಾಲ್ಲ್ಯಾ ಉಪ್ರಾಂತ್, ಇಲ್ಲೊ ಚಡಿತ್ ದಯಾಳ್ ಜಾವ್ನ್, ಇಲ್ಲೊ ಚಡ್ ತಾಕ್ತೆವಂತ್ ಜಾವ್ನ್ , ಇಲ್ಲಸೊ ಚಡಿತ್ ಮೋಗ್ ಭಗುನ್ ಗೆಲ್ಲ್ಯಾ ದರ್ ಎಕ್ಲ್ಯಾ ಥಂಯ್ ತೊ ಉರ‍್ತಲೊ.

ಆಮಿ ಅಸ್ತಾಂ ಪರ‍್ಯಾಂತ್ ತೊ ಉಬಾಳ್ ಆಮಿಂಯ್ ಸಾಂಬಾಳ್ತಲ್ಯಾಂವ್, ಆನಿ ಆಮ್ಚೊ ವೇಳ್ ಯೆತಾನಾ, ತೊ ಆಮಿ ತುಕಾ ಪಾಟಿಂ ಹಾಡ್ತಲ್ಯಾಂವ್, ಆನ್ಯೇಕ್ ಕೂಡ್ ಭರುಂಕ್, ತುಜ್ಯಾ ಸಾಂಗಾತಾ.

So long my friend… Till we meet again…

■ ಕಿಶೂ, ಬಾರ‍್ಕೂರ್.