ಭಾರತೀಯ್ ಕಥೋಲಿಕ್ ಬಿಸ್ಪಾಂಚಿಂ ಮಂಡಳಿ (ಸಿಸಿಬಿಐ) ಮಹಿಳಾ ಆಯೋಗಾಚ್ಯಾ ಫುಡಾರ್ಪಣಾರ್ ಮುಲ್ಕಿಚ್ಯಾ ಡಿವೈನ್ ಕಾಲ್ ಸೆಂಟರ್‌ ಹಾಂಗಾಸರ್ 8 ವೊ ಅಖಿಲ್ ಭಾರತೀಯ್ ಸ್ತ್ರ‍ಿಯಾಂಚೊ ಸಂಮೇಳ್ ‘ಮಹಿಳೋತ್ಸವ್ 2026’ ಸುರ‍್ವಾತ್ಲೊ. ತೀನ್ ದೀಸ್ ಚಲ್ಚ್ಯಾ ಹ್ಯಾ ಬೃಹತ್ ಸಂಮೇಳಾಂತ್ ದೆಶಾಚ್ಯಾ 80 ದಿಯೆಸೆಜಿಂಚೆಂ ಬಿಸ್ಪ್, ಯಾಜಕ್, ಧರ್ಮ್‌ಭಯ್ಣಿಂ ಆನಿ ಸ್ತ್ರೀಯೊ ವಾಂಟೊ ಘೆತಾಲಿಂ.
ದೊ| ಪ್ರೀತಿ ಕೀರ್‍ತಿ ಡಿಸೋಜ ಹಿಚ್ಯಾ ಮುಕೆಲ್ಪಣಾರ್ ಸಾಂಸ್ಕೃತಿಕ್ ಪುರ‍್ಶಾಂವಾಂತ್ ಕಾರ್ಯೆಂ ಸುರ‍್ವಾತ್ಲೆಂ. ಚತ್ತೀಸ್‌ಗಡ್ ಆನಿ ಒಡಿಶಾಚ್ಯಾ ಸ್ತ್ರೀಯಾಂನಿ ಸಾಂಪ್ರದಾಯಿಕ್ ನಾಚ್ ಸಾದರ್ ಕೆಲೆ ಆನಿ ಜಾನಪದ್ ಗೀತಾಂ ಮಾರಿಫಾತ್ ಸಯ್ರ್ಯಾಂಚೊಂ ವೆದಿರ್ ಸ್ವಾಗತ್ ಕೆಲೊ.
ಸಿಸಿಬಿಐ ಅಧ್ಯಕ್ಷ್, ಗೋವಾ ಮತ್ತು ದಮನ್‌ ಆರ್ಚ್‌ಬಿಷಪ್‌ ಕಾಡ್ದಿನಲ್ ಫಿಲಿಪ್ ನೇರಿ ಫೆರಾವೊ ಹಾಂಕಾ ಸಿಸಿಬಿಐ ಸ್ತ್ರ‍ಿಯಾಂಚ್ಯಾ ಆಯೋಗಾಚೊ ರಾಷ್ಟ್ರೀಯ್ ಅಧ್ಯಕ್ಷ್ ಬಿಸ್ಪ್ ಕಿಶೋರ್ ಕುಮಾರ್ ಕುಜೂರ್ ಹಾಣೆ ಯೆವ್ಕಾರ್ ದಿಲೊ. ಸಾಂದೊ ಬಿಸ್ಪ್ ಆಂಟೋನಿಸ್ ಬಾರಾ, ರಾಷ್ಟ್ರೀಯ್ ಕಾರ್ಯದರ್ಶಿ ಸಿ| ಲಿಡ್ವಿನ್ ಫೆರ್ನಾಂಡಿಸ್, ಮಂಗ್ಳುರ್ ದಿಯೆಸೆಜಿಚೊ ವಿಗಾರ್ ಜೆರಾಲ್ ಮೊ| ಮ್ಯಾಕ್ಸಿಮ್ ಎಲ್. ನೊರೊನ್ಹಾ, ಕಣ್ಣೂರ್ ದಿಯೆಸೆಜಿಚೊ ವಿಗಾರ್ ಜೆರಾಲ್ ಮಾ| ದೊ| ಜೋಯ್ ಪೈನಾಡತ್, ಉಡುಪಿ ಸಂಪದ ಸಂಸ್ಥ್ಯಾಚೊ ನಿರ್ದೇಶಕ್ ಮಾ| ಬಾ| ರೆಜಿನಾಲ್ಡ್ ಪಿಂಟೋ ಸವೆಂ ಜಾಯ್ತೆ ಮಾನಾಚೆ ಸಯ್ರೆ ಹ್ಯಾ ವೆಳಿಂ ವೆದಿರ್ ಹಾಜರ್ ಆಸ್ಲೆ.
ಕರಾವಳೆಚ್ಯಾ ಕೃಷಿ ಸಂಸ್ಕೃತಿ ಆನಿ ಸೌಹಾರ್ದತೆಚೊ ಸಂಕೇತ್ ಜಾವ್ನ್ ಭಿಂಗಾರಿ ಫುಲವ್ನ್ ಸಮಾವೇಶ್ ಉಗ್ತಾಯ್ಲೊ.
ಪ್ರಸ್ತುತ್ ವರ‍್ಸಾ ಮಿಸಾಂವ್ ಆಯ್ತಾರ್ ಸುರ್ವಾತುನ್ ಶೆಂಭೊರ್ ವರ‍್ಸಾಂ ಜಾಂವ್ಚ್ಯಾ ವಗ್ತಾ ವಿಶೇಸ್ ಮಿಸಾಚೆಂ ಸಂಭ್ರಮಿಕ್ ಬಲಿದಾನ್ ಭೆಟವ್ನ್ ಕಾಡ್ಡಿನಲ್ ಫೆರಾವೊನ್ ಆಪ್ಲ್ಯಾ ಪ್ರಸಂಗಾಂತ್ ” ಮಿಸಾಂವ್ ವಾ ಸೆವಾ ಮನ್ಶಾಚ್ಯಾ ಚಿಂತ್ಪಾಥಾವ್ನ್ ಯೆಂವ್ಚಿ ನಯ್, ಬಗಾರ್ ದೆವಾ ಥಾವ್ನ್ ಲಾಭ್ಚೆಂ ದೆಣೆಂ. ಸಮಾಜ್ ಆನಿ ಪವಿತ್ ಸಭೆಚ್ಯಾ ಅಭಿವೃದ್ದೆಂತ್ ಸ್ತ್ರೀಯೊ ಫಕತ್ ಸಹಾಯಕಾಂ ನಯ್, ಮುಕೆಲ್ ವಾಳ್ಯಾಚಿಂ ವಾಂಟೆಲಿ” ಮ್ಹಳೆಂ. ಸ್ತ್ರ‍ಿಯಾಂಚೇರ್ ಚಲುನ್ ಆಸ್ಚೊ ಬೇದ್ ಭಾವ್ ಆನಿ ಸ್ತ್ರಿಯಾಂನಿ ದಾದ್ಲ್ಯಾ ಕೇಂದ್ರಿತ್ ವೆವಸ್ತೆಚ್ಯಾ ಶೋಷಣಾಕ್ ಬಲಿ ಜಾಂವ್ಚೆ ವಿಶ್ಯಾಂತ್ ಉಲವ್ನ್ ಕಾಡ್ದಿನಲ್ ಫೆರಾವೊನ್ ಮ್ಹಳೆಂ “ಪವಿತ್ ಸಭೆಂತ್ ಕಸಲೋಯ್ ನಿರ‍್ದಾರ್ ಘೆತಾನಾ ಸ್ತ್ರ‍ಿಯಾಂಕೀ ಸಮಾನ್ ಅವ್ಕಾಸ್ ದೀಂವ್ಕ್ ಜಾಯ್. ಹ್ಯಾ ದಿಶೆನ್ ಮಿಸಾಂವ್ 2033 ಯೆವ್ಜಣೆಖಾಲ್ 86 ದಿಯೆಸೆಜಿಂನಿ ಎದೊಳ್‌ಚ್ 35,000 ಸ್ತ್ರ‍ಿಯಾಂಕ್ ತರ‍್ಭೆತ್ ಕೆಲಾಂ”
ಮಂಗ್ಳುರ್ ದಿಯೆಸೆಜಿಚ್ಯಾ ಸ್ತ್ರ‍ಿಯಾಂಚ್ಯಾ ಆಯೋಗಾನ್ ಎಕ್ಸುರ‍್ಯಾ ಆವಯಾಂಚ್ಯಾ (Single Mothers) ಆರ್ಥಿಕ್ ಆನಿ ಸಮಾಜಿಕ್ ಸಬಲೀಕರಣಾ ದಿಶೆನ್ ಸುರು ಕೆಲ್ಲ್ಯಾ ‘ಮಾತ್ರೋನ್ನತಿ’ ಯೆವ್ಜಣೆಕ್ ಹ್ಯಾ ಸಂದರ‍್ಬಾರ್ ಚಾಲನ್ ದಿಲೆಂ. ಜಾನ್ ಸ್ಯಾಮ್ಯುಯೆಲ್ ಹಾಣಿ ಆಪ್ಲಿ ಆವಯ್ ದೆ| ರೋಸಿ ಸ್ಯಾಮ್ಯುಯೆಲ್ ಹಾಂಚ್ಯಾ ಉಡಾಸಾಕ್ 1 ಕೊರೊಡ್ ರುಪ್ಯಾಂಚಿಂ ನಿಧಿ ಮಂಗ್ಳುರ್ ದಿಯೆಸೆಜಿಚ್ಯಾ ಸ್ತ್ರ‍ಿಯಾಂಚ್ಯಾ ಆಯೋಗಾಚಿ ಕಾರ್ಯದರ್ಶಿ ಅನಿತಾ ಫ್ರಾಂಕ್ ಹಿಕಾ ಹಾತಾಂತರ್ ಕೆಲಿ.
ಸಾಮಾಜಿಕ್ ಶೆತಾಂತ್ ನಿಸ್ವಾರ್ಥ್ ಸೆವಾ ದಿಲ್ಲ್ಯಾ ಖಾತೀರ್, ವೈಟ್ ಡವ್ಸ್ ಸಂಸ್ಥ್ಯಾಚಿ ಸ್ಥಾಪಕಿ ಕೊರಿನ್ ರಸ್ಕಿನ್ಹಾ ಆನಿ ಅವೆ ಮರಿಯಾ ಪಾಲಿಯೇಟಿವ್ ಕೇರ್‌ ನಿರ್ದೇಶಕಿ ದೊ| ಲವೀನಾ ನೊರೊನ್ಹಾ ಹಾಂಕಾ ಸನ್ಮಾನ್ ಕೆಲೊ. ಮಂಗ್ಳುರ್ ದಿಯೆಸೆಜಿಚ್ಯಾ ಸ್ತ್ರ‍ೀ ಆಯೋಗಾಚಿ ಕಾರ್ಯದರ್ಶಿ ಅನಿತಾ ಫ್ರಾಂಕ್ ಹಿಕಾ ಬೆಂಗ್ಳುರ್‍ಚ್ಯಾ ಆರ್ಚ್‌ಬಿಸ್ಪಾನ್ ಪ್ರಾದೇಶಿಕ್ ಸ್ತ್ರ‍ೀ ಆಯೋಗಾಚಿ ಕಾರ್ಯದರ್ಶಿ ಜಾವ್ನ್ ನೇಮಕ್ ಕೆಲಾಂ ಮ್ಹಣ್ ಪರ‍್ಗಟ್ಣಿಯ್ ಹ್ಯಾ ಸುವಾಳ್ಯಾರ್ ಕೆಲಿ.
ದೊನ್ಪಾರಾಂ ಉಪ್ರಾಂತ್ ಸಿಸಿಬಿಐ ಮೀಡಿಯಾ ಆಪೊಸ್ತಲಾದಿಚೊ ಸಿಇಒ ನೈಜಿಲ್ ಫೆರ್ನಾಂಡಿಸ್ ಆನಿ ಮಾ| ದೊ| ರೋಸ್ಲಿನ್ ರಾಜಾ ಹಾಣಿ ಡಿಜಿಟಲ್ ಸಂಪರ್ಕರ‍್ಕಾಕ್ ರಚ್ಲೆಲ್ಯಾ ‘ಕ್ಯಾಥೋಲಿಕ್ ಕನೆಕ್ಟ್’ (Catholic Connect) ಆ್ಯಪ್ ವಿಶ್ಯಾಂತ್ ಮಾಹೆತ್ ದಿಲಿ. ಬಿಸ್ಪ್ ಆಂಟೋನಿಸ್ ಬಾರಾ ಹಾಣಿ ದಿನ್ವಾಸ್ ಪಾಟಯ್ಲೆ. ಸಮ್ಮೇಳಾಚ್ಯಾ ಆಂಗ್ಣಾಂತ್ ಮಹಿಳಾ ಉದ್ಯಮಿಂನಿ ತಯಾರ್ ಕೆಲ್ಲ್ಯೊ ವಸ್ತು ಆನಿ ಉತ್ಪನ್ನಾಂಚೆಂ ಪ್ರದರ್ಶನ್ ಆನಿ ವಿಕ್ರೊ ಚಲ್ಲೊ. ಹೊ ರಾಷ್ಟ್ರೀಯ್ ಸಂಮೇಳ್ ಅಕ್ತೋಬರ್ 20 ವರೆಗ್ ಚಲ್ತಲೊ.
