ಮುಂಬಂಯ್ತ್ , ಹ್ಯಾಚ್ ಆಯ್ತಾರಾ ಸಾಂಜ್ಯೆರ್ ಬೊಲಿವುಡ್ ನಟ್ ಟೈಗರ್ ಶ್ರಾಫ್ ಹಾಚ್ಯೆ ವಯ್ರ್ ಜಾಲ್ಲೊ ಗುಳ್ಯಾಂಚೊ ಹಲ್ಲೊ ಶ್ಹೆರಾಚ್ಯಾ ಭದ್ರತಾ ವೆವಸ್ತೆಚ್ಯೆರ್ ಏಕ್ ವ್ಹಡ್ ಸವಾಲ್ ಜಾವ್ನಾಸಾ. ಅಕ್ಟೋಬರ್ 18, 2026 ವೆರ್ ತೊ ಜುಹುಚ್ಯಾ ಏಕ್ ಫುಟ್ಬಾಲ್ ಮೈದಾನಾ ಥಾವ್ನ್ ಪಾಟಿಂ ಯೆತಾನಾ, ಬೈಕಾರ್ ಆಯಿಲ್ಲ್ಯಾ ತೀನ್ ಗುಂಡಾಂನಿ ತಾಚ್ಯೆ ಗಾಡಿಯೆರ್ ಗುಳೆ ಮಾರ್‍ಲೆ. ಹ್ಯಾ ಆಡ್-ಕಾಟ್ ಹಲ್ಲ್ಯಾಂತ್ ಟೈಗರ್ ಶ್ರಾಫಾಕ್ ಚಿಲ್ಲರ್ ಘಾಯ್ ಮಾತ್ರ್ ಜಾವ್ನ್ ತೊ ಬಚಾವ್ ಜಾಲೊ. ಪೂಣ್, ತಾಚೊ ಡ್ರೈವರ್ ಆನಿ ಏಕ್ಲೊ ಜಕ್ಮಿ ಜಾಲೆ ದೆಕುನ್ ತೆ ಆಸ್ಪತ್ರೆಕ್ ಭರ್ತಿ ಜಾಲ್ಯಾತ್. ಮುಂಬೈ ಕ್ರೈಮ್ ಬ್ರಾಂಚ್ ಆನಿ ವೆವೆಗ್ಳ್ಯಾ ರಾಜ್ಯಾಂಚ್ಯಾ ಪೊಲೀಸಾಂನಿ ತಕ್ಷಣ್ ತನ್ಕಿ ಕರ್ನ್, ರಾಜಸ್ಥಾನಾಚ್ಯಾ ಕೋಟಾ ಶ್ಹೆರಾಂತ್ ತೆಗಾಂ ಆರೋಪಿಂಕ್ ಕೈದ್ ಕೆಲಾಂ. ಹೆ ಆರೋಪಿ ಧಾ ದಿಸಾಂ ಥಾವ್ನ್ ಟೈಗರ್ ಶ್ರಾಫಾಚ್ಯಾ ದಿಸ್ಪಡ್ತೆಚ್ಯೆರ್ ಪಾರೊ ದವರ್ನ್ ಆಸ್ಲೆ ಮ್ಹಣ್ ಕಳೊನ್ ಆಯ್ಲಾಂ.
ಲಾರೆನ್ಸ್ ಬಿಷ್ಣೋಯ್ ದಳಾನ್ ಹ್ಯಾ ಹಲ್ಲ್ಯಾಚಿ ಜವಾಬ್ದಾರಿ ಘೆತ್ಲ್ಯಾ ಆನಿ ಸಲ್ಮಾನ್ ಖಾನ್ ಸಾಂಗಾತಾ ಆಸ್ಲೆಲ್ಯಾ ಸಂಬಂಧಾಕ್ ಲಾಗುನ್ ಟೈಗರಾಕ್ ಟಾರ್ಗೆಟ್ ಕೆಲಾ ಮ್ಹಣ್ ಸಾಂಗ್ಲಾ.
ಟೈಗರ್ ಶ್ರಾಫ್ ಬೋಲಿವುಡಾಚೊ ಏಕ್ ನಾಮ್ಣೆಚೊ ನಟ್ ಆನಿ ಮಾರ್ಷಲ್ ಆರ್ಟಿಸ್ಟ್‌‌‌ಯೀ ಜಾವ್ನಾಸಾ. ಹಾಣೆಂ ಆಪ್ಲ್ಯಾ ಸ್ಟಂಟ್ಸ್ ಆನಿ ಡಾನ್ಸ್ ವರ್ವಿಂ ಆಕ್ಷನ್ ಸಿನೆಮಾಕ್ ನವೆಂ ರೂಪ್ ದಿಲಾಂ. ತೊ ಮುಂಬೈಚ್ಯಾ ಬಾಂದ್ರಾ ಉಪ-ನಗರಿಂತ್ ಆಪ್ಲ್ಯಾ ವ್ಹಡ್ ಬಂಗ್ಲ್ಯಾಂತ್ ರಾವ್ತಾ. ತಾಚಿ ಅಂದಾಜ್ ಗಿರೆಸ್ತ್-ಕಾಯ್ ಲಗ್ಬಗ್ 248 ಕರೋಡ್ ರುಪಯ್ ಜಾವ್ನಾಸಾ. ಸದ್ಯಾಕ್ ತೊ ಬಾಘಿ 5 ಆನಿ ಗಣಪತ್: ಪಾರ್ಟ್ 2 ಹ್ಯಾ ದೋನ್ ವ್ಹಡ್ ಸಿನೆಮಾಂಚ್ಯಾ ಶೂಟಿಂಗಾಂತ್ ವ್ಯಸ್ತ್ ಆಸಾ. ಆಪ್ಲೆ ಕಷ್ಟಾಚ್ಯೆ ಸ್ಟಂಟ್ಸ್ ಸ್ವತಾಃ ಕರ್ಚೊ ತೊ ಬೊಲಿವುಡಾಚೊ ಏಕ್ ಯಶಸ್ವಿ ಸ್ಟಾರ್ ಜಾವ್ನಾಸಾ.
ಟೈಗರ್ ಶ್ರಾಫಾಚೊ ಸಿನೆಮಾ ಸಂಸಾರಾಂತ್ ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ಸಾಂಗಾತಾ ಲಾಗ್ಶಿಲೊ ಸಂಬಂಧ್ ಆಸಾ. ತೊ ಟೈಗರಾಕ್ ಮಾರ್ಗದರ್ಶನ್ ದಿತಾ. ಟೈಗರ್ ಸಲ್ಮಾನಾಚ್ಯಾ ಖಾಸ್ಗಿ ಜಿಮ್ಮಾಂತ್ ಟ್ರೇಯ್ನಿಂಗ್ ಘೆತಾ ಆನಿ ಸಿನೆಮಾ ಪ್ರೊಮೋಷನಾಂತ್ ಸಾಂಗಾತಾ ಕಾಮ್ ಕರ್ತಾ. ತನ್ಕೆ ಪ್ರಕಾರ್, ಸಲ್ಮಾನ್ ಖಾನಾಚ್ಯಾ ಲಾಗ್ಶಿಲ್ಯಾ ಮಂಡಳಿಂತ್ ಆಸ್ಲೆಲ್ಯಾ ವರ್ವಿಂಚ್ ಹ್ಯಾ ಉಗ್ರಗಾಮಿ ದಳಾನ್ ಟೈಗರಾಕ್ ಟಾರ್ಗೆಟ್ ಕೆಲಾಂ.
ಕಾಳ್ವಿಟ್ ಆನಿ ವೈಶ್ನೋಯ್ ಸಮಾಜ್ :
ಹ್ಯಾ ಸಗ್ಳ್ಯಾ ಹಿಂಸಾಚಾರಾಚೆಂ ಮೂಳ್ 1998 ಚ್ಯಾ ಕಾಳ್ವಿಟ್ (Blackbuck) ಶಿಕಾರೆಚ್ಯಾ ಕೇಸಿಂತ್ ಆಸಾ. ಹಮ್ ಸಾಥ್-ಸಾಥ್ ಹೈಂ ಸಿನೆಮಾಚ್ಯಾ ಶೂಟಿಂಗ್ ವೆಳಾರ್ ರಾಜಸ್ಥಾನಾಂತ್ ಸಲ್ಮಾನ್ ಖಾನಾನ್ ದೋನ್ ಕಾಳ್ವಿಟಾಂಚಿ ಶಿಕಾರಿ ಕೆಲ್ಲಿ ಮ್ಹಳ್ಳೊ ಆರೋಪ್ ಆಸ್ಲೊ. ಹ್ಯಾ ಕೇಸಿಂತ್ ಸೈಫ್ ಅಲಿ ಖಾನ್, ತಬು, ನೀಲಮ್ ಆನಿ ಸೋನಾಲಿ ಬೇಂದ್ರೆ ಹೆ ಸಹ-ನಟ್ ಸಯ್ತ್ ವಾಂಟೆಲಿ ಜಾಲ್ಲೆ ಮ್ಹಣ್ ಆರೋಪ್ ಜಾಲ್ಲೊ. ದೋನ್ ದಶಕಾಂ ಪ್ರಾಸ್ ಚಡ್ ಚಲ್ಲೆಲ್ಯಾ ಹ್ಯಾ ಕಾನೂನಿ ಝುಜಾಂತ್ 2018 ವ್ಯೆರ್ ಸಲ್ಮಾನಾಕ್ ಪಾಂಚ್ ವರ್ಸಾಂಚಿ ಜೈಲ್ ಸಜಾ ಜಾಲ್ಲಿ. ತೊ ಜಮೀನೆರ್ ಸುಟ್ಲಾ ಆನಿಂ ಹಿ ಕೇಸ್ ಅಜೂನ್ ಕೋರ್ಟಾಂತ್ ಚಲ್ತಾ. ದೆಕುನ್, ಬಿಷ್ಣೋಯ್ ಸಮಾಜ್ ಸಲ್ಮಾನಾಕ್ ಗುನ್ಯಾಂವ್ಕಾರ್ ಮ್ಹಣ್ ಲೆಕ್ತಾ ಆನಿಂ ತಾಕಾ ಭೊಗ್ಸುಂಕ್ ತಯಾರ್ ನಾಂ.
ಲಾರೆನ್ಸ್ ಬಿಷ್ಣೋಯ್, ಜಶೆಂ ನಾಂವ್ ದಾಕಯ್ತಾ, ವೈಶ್ನೋಯ್ ಸಮುದಾಯಾಚೊ. ಹೊ ಸಮುದಾಯ್ ಚಡ್ತಾವ್ ಜಾವ್ನ್ ರಾಜಸ್ಥಾನಾಂತ್ ವಸ್ತಿ ಕರ್ತಾ. ಕಾಳ್ವಿಟ್ ಹಾಂಕಾಂ ಪವಿತ್ರ್ ಆಸಾ. ಹಿ ಮನ್ಜಾತ್ ತಾಂಚ್ಯಾ ಸಂಸ್ಥಾಪಕ್ ಗುರು ಜಂಭೇಶ್ವರಾಚೊ ಪುನರ್-ಜಲ್ಮ್ ಜಾಲ್ಲೆಂ ರೂಪ್ ಮ್ಹಣ್ ತೆ ಮಾಂದ್ತಾತ್. ಕಾಳ್ವಿಟಾಚಿ ಶಿಕಾರಿ ಕರ್ಚಿ ಮ್ಹಳ್ಯಾರ್ ಏಕ್ ಘೋರ್ ಪಾಪ್ ಮ್ಹಣ್ತಾ ಹೊ ಸಮೂದಾಯ್.
ಲಾರೆನ್ಸ್ ಬಿಷ್ಣೋಯ್ ದಳ್ ಹೆಂ ಭಾರತಾಂತ್ ಆನಿ ವಿದೇಶಾಂತ್ ಚಲ್ಚೆಂ ಏಕ್ ಖೂಬ್ ವ್ಹಡ್ ಅಪರಾಧಿ ಜಾಳ್ ಜಾವ್ನಾಸಾ. ಜೈಲಾಂತ್ ಆಸ್ಚೊ ಲಾರೆನ್ಸ್ ಬಿಷ್ಣೋಯ್ ಆನಿ ತಾಚ್ಯೆ ವಿದೇಶಾಂತ್ ಆಸ್ಚೆ ಸಾಂಗಾತಿ ಹ್ಯಾ ದಳಾಕ್ ಚಲಯ್ತಾತ್. ಹಾಣಿಂ 2022 ವರ್ಸಾ ಪಂಜಾಬಿ ಗಾಯಕ್ ಸಿದ್ಧು ಮೂಸೆವಾಲಾ ಹಾಚಿ ಖುನ್ ಕೆಲ್ಲಿ. ಬಿಷ್ಣೋಯ್ ಸಮಾಜ್ ಕಾಳ್ವಿಟಾಕ್ ದೇವ್ ಮ್ಹಣ್ ಪೂಜಿತಾ. ಹ್ಯಾ ಕಾರಣಾನ್ ಹ್ಯಾ ಗ್ಯಾಂಗಾನ್ ಸಲ್ಮಾನ್ ಖಾನಾಚ್ಯೆರ್ ಪ್ರಾಣಾಂತಕ್ ದುಸ್ಮಾನ್ಕಾಯ್ ದವ್ರುನ್ ತಾಕಾ ಲಗಾಡ್ ಕಾಡುಂಕ್ ಸೊಪುತ್ ಘೆತ್ಲಾ.
ಟೈಗರ್ ಕಿತ್ಯಾಕ್ ಟಾರ್ಗೆಟ್ ?
ಟೈಗರ್ ಶ್ರೊಫ್ ಹಲ್ಲ್ಯಾ ಉಪ್ರಾಂತ್, ಲಾರೆನ್ಸ್ ಬಿಷ್ಣೋಯ್ ದಳಾನ್ ಸೋಶಿಯಲ್ ಮೀಡಿಯಾಚ್ಯೆರ್ ಜವಾಬ್ದಾರಿ ಘೆತ್ಲಿ ಆನಿ ಸಲ್ಮಾನ್ ಖಾನ್ ಸಾಂಗಾತಾ ಆಸ್ಲೆಲ್ಯಾ ಇಷ್ಟಾಗತಿ ವರ್ವಿಂಚ್ ಟೈಗರಾಕ್ ಆಮಿ ಟಾರ್ಗೆಟ್ ಕೆಲೊ ಮ್ಹಣ್ ಸಾಂಗ್ಲೆಂ. ಸಲ್ಮಾನಾಚ್ಯಾ ಲಾಗ್ಶಿಲ್ಯಾ ಲೊಕಾಂಚೆರ್ ಹಲ್ಲೊ ಕರ್ನ್, ಸಲ್ಮಾನಾಕ್ ಸಮಾಜಾಂತ್ ಸಗ್ಳ್ಯಾಂ ಥಾವ್ನ್ ಮೆಕ್ಳೊ ಕರ್ಚೊ ತಾಂಚೊ ಉದ್ದೇಶ್ ಜಾವ್ನಾಸಾ. ಬೊಲಿವುಡಾಂತ್ ಕೊಣ್ ಸಲ್ಮಾನ್ ಖಾನಾ ಸಾಂಗಾತಾ ಕಾಮ್ ಕರ್ತಾತ್, ತಾಂಕಾಂ ಸಗ್ಳ್ಯಾಂಕ್ ಹ್ಯಾ ಗ್ಯಾಂಗಾನ್ ಜಿವ್ಶಿಂ ಮಾರ್ಚಿ ಧಮ್ಕಿ ದಿಲ್ಯಾ.
ಹ್ಯಾ ಹಲ್ಲ್ಯಾ ವರ್ವಿಂ ಸಗ್ಳ್ಯಾ ಬೊಲಿವುಡ್ ಫಿಲ್ಮ್ ಪ್ರೆಟರ್ನಿಟಿಂತ್ ವ್ಹಡ್ ಆತಂಕ್ ಆನಿ ಭ್ಯೆಂ ನಿರ್ಮಾಣ್ ಜಾಲಾಂ. ನಟ ಲೊಕಾಂಚ್ಯೆರ್ ಸಾರ್ವಜನಿಕ್ ಜಾಗ್ಯಾರ್ ಹಲ್ಲೊ ಜಾಂವ್ಚೊ ಪಳೆವ್ನ್ ಪ್ರೊಡ್ಯೂಸರ್ಸ್ ಆನಿ ಡೈರೆಕ್ಟರ್ಸ್ ಖಂತಿಂತ್ ಪಡ್ಲ್ಯಾತ್. ಖೂಬ್ ನಟಾಂನಿ ಟೈಗರಾಕ್ ಫೋನ್ ಕರ್ನ್ ಧೈರ್ ದಿಲಾಂ. ಪೂಣ್, ತಾಂಚ್ಯಾಚ್ ಭದ್ರತೆ ಖಾತಿರ್ ಖಾಸ್ಗಿ ಸೆಕ್ಯುರಿಟಿ ಕಂಟ್ರಾಕ್ಟರಾಂ ಸಾಂಗಾತಾ ಮೀಟಿಂಗ್ ಕರುಂಕ್ ಸುರು ಕೆಲಾಂ.
ನೊವೊದಾಂಚೆಂ ನೆಕ್ಸಸ್ ಪಾಟಿಂ …?
ಹ್ಯಾ ದೀಸ್ ಉಜ್ವಾಡಾಚ್ಯಾ ಹಲ್ಲ್ಯಾ ವರ್ವಿಂ 1990 ವ್ಯಾ ವರ್ಸಾಚ್ಯಾ ಕಾಳೊಕಿ ದಿಸಾಂಚೊ ಉಡಾಸ್ ಯೆತಾ. ತವಳ್ ಮುಂಬೈ ಅಂಡರ್ವರ್ಲ್ಡ್ ಸಿನೆಮಾ ನಟಾಂ ಕಡೆನ್ ಪಯ್ಶೆ ವಸೂಲಿ ಕರ್ತಾಲೆ. ಬೊಲಿವುಡ್ ಫಿಲ್ಮಾಂನಿಂ ದುಡು ನಿವೇಶ್ ಕರ್ತಾಲೆ. ತ್ಯಾಂ ಫಿಲ್ಮಾಂನಿಂ ಫಲಾಣ್ಯಾ ನಟಾಂಕ್ ಘೆಜೆ ಮ್ಹಣ್ ಠರಾಯ್ತೆಲೆ. ನಟ್ ಜರ್ ವೇಳಾರ್ ಫಿಲ್ಮ್ ಸೆಟ್ಟಾರ್ ಪಾವಾನಾಂತ್ ತರ್ ಗುಂಡಾ ತಾಂಕಾಂ ಉಕ್ಲುನ್ ಹಾಡ್ತೆಲೆ. ನಟಾಂಚ್ಯೆ ನಕ್ರೆ ಕಂಟ್ರೊಲ್ ಕರ್ತಾಲೆ. ಗುಲ್ಶನ್ ಕುಮಾರ್, ಮುಕೇಶ್ ದುಗ್ಗಲ್, ಜಾವೇದ್ ಸಿದ್ದೀಕಿ, ಅಜಿತ್ ದಿವಾನಿ – ಹಾಂಕಾ ಠಾರ್ ಮಾರ್‌ಲ್ಲೆಂ ತರ್, ರಾಕೇಶ್ ರೋಶನ್, ಲೊರೆನ್ಸ್ ಡಿ ಸೊಜಾ, ರಾಜೀವ್ ರಾಯ್ ಚೆರ್ ಹಲ್ಲೆ ಜಾಲ್ಲೆ. ಬೊಲಿವುಡ್ಡಾಚೆರ್ ಜಾಂವ್ಚೆ ನಿರಂತರ್ ಹಲ್ಲೆ ರಾವಯಿಲ್ಲಿ ಕೀರ್‍ತ್ ವೆತಾ ತವಳ್ಚೊ ಮಹಾರಾಷ್ಟ್ರಾಚೊ ಘರ್ ಮಂತ್ರ್ ಆರ್. ಆರ್. ಪಾಟೀಲಾಕ್ ಆನಿ ತಾಚ್ಯೆ ಆದೇಶ್ ಜ್ಯಾರಿ ಕೆಲ್ಲೊ ಮಂಗ್ಳುರಿ ಮುಳಾಚೊ ಮುಂಬಯ್ಚೊ ಪುಲಿಸ್ ಕಮಿಶನರ್ ಆರ್. ಎಚ್. ಮೆಂಡೋನ್ಸಾ ಆನಿ ತಾಕಾ ಬರಾಬರ್ ಸಾಂಗಾತ್ ದಿಲ್ಲೊ ಜೋಡ್ ಕಮಿಷನರ್ ಡಿ. ಶಿವಾನಂದನ್ ಹಾಂಕಾಂ. ಹ್ಯಾ ತೆಗಾಂ ಮಾನಾಯಾಂನಿ ಖರ್‍ಯಾನ್ ಮುಂಬಯ್ಚೆ ರಸ್ತೆ ಅಂಡ‌ವಲ್ಡಾ ಥಾವ್ನ್ ‘ಸಾಫ್’ ಕೆಲೆ. ಅಂಡರ್‌ವಲ್ಡ್ – ಬೊಲಿವುಡ್ ನೆಕ್ಸಸ್ ಮೋಡ್ನ್ ಸೊಡ್ಲೆಂ.
ಪೂಣ್ ಆಜ್, ಬೊಲಿವುಡ್ ಅಂಡರ್ವರ್ಲ್ಡ್ ಕಾಳೊಕಾ ಥಾವ್ನ್ ಪಯ್ಸ್ ಆಯ್ಲಾಂ ಮ್ಹಣ್ ಚಿಂತುನ್ ಆಸ್ಲೆಲ್ಯಾ ವೆಳಾರ್, ಬಿಷ್ಣೋಯ್ ಗ್ಯಾಂಗಾಚ್ಯಾ ಹ್ಯಾ ಕರ್ತುಬಾನ್ ಸಿನೆಮಾ ಆನಿ ಅಪ್ರಾಧಿ ಸಂಸಾರ್ ಪರತ್ ಸಾಂಗಾತಾ ಆಸಾತ್ ಮ್ಹಣ್ ಭೊಗುಂಕ್ ಲಾಗ್ಲಾಂ.
ಹ್ಯಾ ಘಡಿತಾ ಉಪ್ರಾಂತ್, ಮಹಾರಾಷ್ಟ್ರ ಸರ್ಕಾರಾನ್ ತಕ್ಷಣ್ ಟೈಗರ್ ಶ್ರಾಫಾಕ್ ವೈ-ಪ್ಲಸ್ ಭದ್ರತಾ ದಿಲ್ಯಾ. ತಾಚ್ಯಾ ಘರಾ ಭಂವ್ತಿಂ ಆನಿ ಫಿಲ್ಮ್ ಶೂಟಿಂಗ್ ಜಾಗ್ಯಾರ್ ಬಂದೂಕ್ ದವರ್ಲೆಲೆ ಪೊಲಿಸ್ ಭದ್ರತೆಕ್ ಆಸಾತ್. ಮುಂಬೈ ಪೊಲಿಸಾಂಚಿ ಆಂಟಿ-ಎಕ್ಸ್ಟಾರ್ಷನ್ ಸೆಲ್ ಹ್ಯಾ ಕೇಸಿಚಿ ತನ್ಕಿ ಕರ್ನ್ ಆಸಾ. ಪಪಾರಾಜಿಂನಿ ಆನಿ ಸೋಶಿಯಲ್ ಮೀಡಿಯಾಚೆರ್ ನಟಾಂಚ್ಯೆಂ ಲೈವ್ ಲೊಕೇಶನ್ ಪೋಸ್ಟ್ ಕರ್ಚ್ಯಾ ವರ್ವಿಂಚ್ ಹೆ ಹಂತಕ್ ಟೈಗರಾಚ್ಯಾ ಜಾಗ್ಯಾರ್ ಪಾವ್ಲೆ ಮ್ಹಣ್ ಪೊಲೀಸಾನಿ ಸಾಂಗ್ಲಾಂ.
ಬೊಲಿವುಡಾಚೆರ್ ಮಾಂಡ್ಲಲೆಂ ಅಂಡರ್‌ವಲ್ಡಾಚೆಂ ಮೋಡ್ ನಿತ್ಳಾಜೇ ತರ್, ಆರ್. ಆರ್. ಪಾಟೀಲಾ ತಸಲೊ ಘರ್ ಮಂತ್ರಿ, ಮೆಂಡೋನ್ಸಾ ತಸಲ್ಯಾ ಕಮಿಶನರಾಚಿ ಗರ್‍ಜ್ ಆಸಾ ಮ್ಹಣ್ ದಿಸ್ತಾ.
■ ಫಿಲಿಪ್ ಮುದಾರ್ತ್
