ಮಂಗ್ಳುರ್ ದಿಯೆಸೆಜಿಚೊ ಯಾಜಕ್ ಮಾ| ಬಾ| ವಿಕ್ಟರ್ ವಿಜಯ್ ಲೋಬೊ 2026 ಪಾಸುನ್ 2030 ಆವ್ಧೆಕ್ ಸಿಗ್ನಿಸ್ ಏಷ್ಯಾ ಅಧ್ಯಕ್ಶ್ ಜಾವ್ನ್ ವಿಂಚುನ್ ಆಯ್ಲ್ಯಾತ್. ವಿಯೆಟ್ನಾಂ ಸೈಗಾನ್ ಹಾಂಗಾಸರ್ ಚಲೆಲ್ಲ್ಯಾ ಏಷ್ಯನ್ ಅಸೆಂಬ್ಲಿಂತ್ ಹಿ ವಿಂಚವ್ಣ್ ಜಾಲಿ. ಪ್ರಸ್ತುತ್ ಮಾ| ಬಾ| ಸಿಗ್ನಿಸ್ ಇಂಡಿಯಾ ಹಾಚೊ ಅಧ್ಯಕ್ಷ್ ಜಾವ್ನಾಸಾತ್.
ಸಿಗ್ನಿಸ್ ಜಾಗತಿಕ್ ಮಾಳಾರ್ ಕಥೊಲಿಕಾಂಚೆಂ ಸಂಪರ‍್ಕ್ ಸಂಘಟನ್ ಜಾವ್ನಾಸುನ್, ಏಷ್ಯಾ ಮಾಳಾರ್ 16 ಸಾಂದೆ ದೇಶ್ ಆಸುನ್, 12 ದೆಶಾಂಚ್ಯಾ ಅಧಿಕೃತ್ ಪ್ರತಿನಿಧಿಂನಿ ಮಾ| ಬಾ| ಲೋಬೊ ಹಾಂಕಾ ವಿಂಚುನ್ ಕಾಡ್ಲೊ.
ಮುಳಾನ್ ವಿಟ್ಲ ಫಿರ‍್ಗಜೆಚ್ಯಾ ಮಾ| ಬಾ| ಲೋಬೊ ಹಾಣಿ 2003 ವ್ಯಾ ವರ‍್ಸಾ ಯಾಜಕೀ ದೀಕ್ಶಾ ಜೊಡ್ಲಿ ಆನಿ ಮಂಗ್ಳುರ್ ದಿಯೆಸೆಜಿಚೊ ಮಾಧ್ಯಮ್ ಸಂಸ್ಥೊ ಕೆನರಾ ಕಮ್ಯೂನಿಕೇಶನ್ ಸೆಂಟರ್ ಹಾಚೊ ನಿರ್ದೇಶಕ್, ಸಂದೇಶ ಪ್ರತಿಷ್ಠಾನಾಚೊ ನಿರ್ದೇಶಕ್, ದಿಯೆಸೆಜಿಚೊ ಪ್ರೊಕ್ಯೂರೇಟರ್ ಆನಿ ಸರ್ವಜಣಿಕ್ ಸಂಪರ‍್ಕ್ ಅಧಿಕಾರಿ ಜಾವ್ನ್ ಸೆವಾ ದಿಲ್ಯಾ. ಪ್ರಸ್ತುತ್ ಕೂಳೂರ್ ಸಾಂತ್ ಅಂತೊನ್ ಫಿರ‍್ಗಜೆಚೆ ವಿಗಾರ್ ತೆ ಜಾವ್ನ್ ಆಸಾತ್.
ನವ್ಯಾ ಆಡಾಳ್ತ್ಯಾ ಮಂಡಳೆಂತ್ ಉಪಾಧ್ಯಕ್ಷ್ ಜಾವ್ನ್ ಪೈ ಮಬಾಂಟಾ (ಫಿಲಿಪೈನ್ಸ್), ಕಾರ್ಯದರ್ಶಿ ಜಾವ್ನ್ ಕಾಗ್ನಾ ಕಿಯೋ (ಕಾಂಬೋಡಿಯಾ), ಖಜಾಂಚಿ ಜಾವ್ನ್ ಪಾಲ್ ಚಾನ್ (ದಕ್ಷಿಣ ಕೊರಿಯಾ) ತಶೆಂ ವಿಯೆಟ್ನಾಂ, ಬಾಂಗ್ಲಾದೇಶ್, ಪಾಕಿಸ್ತಾನ್ ದೆಶಾಂ ಥಾವ್ನ್ ಪ್ರತಿನಿಧಿ ಆಸಾತ್.
