‘ವಿಲ್ಫಿ ರೆಬಿಂಬಸ್’ ಹೆಂ ಉತರ್ ಉಚಾರ್ತಾನಾಂಚ್ ಹಜಾರೊಂ ಪದಾಂಚೆ ತಾಳೆ ಆನಿ ಉತ್ರಾಂ ಆಮ್ಚ್ಯಾ ಕಾಳ್ಜಾಭೊಂವ್ತಿಂ ಪಾಸಾಯೊ ಮಾರುಂಕ್ ಲಾಗ್ತಾತ್. ಟೈಮ್ ಮೆಶಿನ್ ಮ್ಹಳ್ಳೆಬರಿ ಹರ್ಯೇಕ್ ಪದ್ ಆಮ್ಚ್ಯಾ ಆದ್ಲ್ಯಾ ಕಾಳಾಕ್ ವರುನ್ ಪಾವಯ್ತಾ. ಕಾಂಯ್ ಚಾರ್ ಪಾಂಚ್ ಧಾಕ್ಡೆ ವಿಲ್ಫಿಯಾಬಾನ್ ಕೊಂಕ್ಣಿ ಸಂಗೀತ್ ಸಂಸಾರಾಂತ್ ಕೆಲ್ಲಿಂ ಅಚರ್ಯಿಂ ಆನಿ ಘಾಲ್ಲೊ ‘ಪ್ರಭಾವ್’ ಚಿಂತ್ತಾನಾ ಅಸಲೊ ಸಂಗೀತ್ಗಾರ್ ಆನಿ ಮುಕಾರ್ ಕೊಂಕ್ಣೆಂತ್ ಉದೆವ್ನ್ ಯೇತ್ಗೀ ಮ್ಹಳ್ಳೊ ದುಬಾವ್ ಯೆತಾ. ವಿಲ್ಫಿಯಾಬಾಚ್ಯಾ ಪದಾಂನಿ ಆಸ್ಲಿ ಗಿರೇಸ್ತ್ಕಾಯ್ ಆನಿ ತಾಚ್ಯಾ ವೆಕ್ತಿತ್ವಾಂತ್ ಆಸ್ಲ್ಲ್ಯಾ ಪ್ರಭುದ್ಧ್ಪಣಾನ್ ಆಜೂನ್ ತಾಕಾ ಕೊಂಕ್ಣಿ ಸಂಗೀತ್ ಸಂಸಾರಾಂತ್ಲೊ ದಾರ್ಶನಿಕ್ ಮ್ಹಣ್ ಮಾಂದಿಶೆಂ ಕೆಲಾಂ. ಘರಾಭಿತರ್ ಜಾಂವ್ಚಿ ಘೊವ್-ಬಾಯ್ಲೆಚಿ ಲ್ಹಾನ್-ಲ್ಹಾನ್ ಲಡಾಯ್ ಜಾಂವ್ ವಾ ಸಂಸಾರಾಂಂತ್ ದೆಶಾಂಮದೆಂ ಜಾಂವ್ಚಿಂ ಭೀಕರ್ ಝುಜಾಂ; ಆಂಕ್ವಾರ್ ಪಣಾಚೊ ಪೊಕ್ರಿ ಮೋಗ್ ಜಾಂವ್ ವಾ ಕಾಜಾರಾ ಉಪ್ರಾಂತ್ಲ್ಯಾ ಕುಟ್ಮಾಚಿ ಜವಾಬ್ದಾರಿ; ಲ್ಹಾನ್ಪಣಾಲೆ ಖೆಳ್ ಜಾಂವ್ ವಾ ಉತರ್ ಪ್ರಾಯೆಚ್ಯೊ ಖಂತಿ; ಭಕ್ತೆಚೊ ಉಜ್ವಾಡ್ ಜಾಂವ್ ವಾ ಫಿತಿಸ್ಪಣಾಚೊ ಕಾಳೊಕ್ – ಹ್ಯಾ ಸರ್ವಾಂಕ್ ವಿಲ್ಫಿಯಾಬಾಚ್ಯಾ ಪದಾಂನಿ ಸ್ಪಂದನ್ ಕೆಲಾಂ. ಬೊವ್ ಸಿಂತಿಮೆಂತಾಳ್, ವೆಂಗ್ಯ್-ವಿಡಂಬನ್, ಮೋಗ್-ಪೊಕ್ರಿಪಣಾಂ ಅಶೆಂ ವಿಲ್ಫಿಯಾಬಾನ್ ಆಪುಡ್ನಾತ್ಲ್ಯೊ ಗಜಾಲಿ ನಾಂತ್. ಆಪ್ಲ್ಯಾಚ್ ಕುಟ್ಮಾಚಿ ಆಸ್ತ್ ಮ್ಹಳ್ಳೆಬರಿ ಕೊಂಕ್ಣಿ ಕುಟ್ಮಾಂನಿ ವಿಲ್ಫಿಯಾಬಾಚ್ಯಾ ಪದಾಂಕ್ ಪಿಳ್ಗೆಥಾವ್ನ್ ಪಿಳ್ಗೆಕ್ ಜಿವಂತ್ ಉರಯ್ಲಾಂ. ಆದ್ಲ್ಯಾ ಆಬ್ – ವ್ಹಡ್ಲಿಮಾಂಯ್ ಥಾವ್ನ್ ಆತಾಂಚ್ಯಾ ನಾತ್ವಾಂ ಮ್ಹಣಾಸರ್ ತಾಂಚ್ಯೆ ಜಿಬೆರ್ ವಿಲ್ಫಿಯಾಬಾಚೆಂ ಏಕ್ ನಾ ಏಕ್ ಪದ್ ವಾ ಪದಾಚ್ಯೊ ಥೊಡ್ಯೊ ವೊಳಿ ಆಜೂನ್ ಗಾಜೊನ್ಚ್ ಆಸಾತ್. ವ್ಹಯ್, ಸರ್ವ್ ಕೊಂಕ್ಣಿ ಲೊಕಾನ್ ವಿಲ್ಫಿಯಾಬಾಚಿಂ ಪೂರಾಯ್ ಪದಾಂ ಆಯ್ಕೊಂಕ್ ನಾಂತ್ ಜಾಂವ್ಕ್ ಪುರೊ ಪುಣ್ ವಿಲ್ಫಿಯಾಬಾಚೆಂ ಏಕ್ ಪುಣೀ ಪದ್ ಆಯ್ಕನಾತ್ಲೊ ಕೊಂಕ್ಣಿ ಮನಿಸ್ ಆಮ್ಚ್ಯಾ ಕರಾವಳಿ ಜಿಲ್ಲ್ಯಾಂತ್ ಆಸೊಂಕ್ ಸಾಧ್ ನಾ ಮ್ಹಣ್ ಮ್ಹಜಿ ಪಾತ್ಯೆಣಿ.

ಹಾಂಗಾಸರ್ ಏಕ್ ಗಜಾಲ್ ಸಾಂಗ್ಯಾಂ ಮ್ಹಣ್ ಭೊಗ್ತಾ. ವಿಲ್ಫಿಯಾಬಾಚ್ಯಾ ಪ್ರೇರಣಾನ್ ಜಾಯ್ತಿಂ ಸಂಗೀತ್ಗಾರಾಂ ಉಬ್ಜಲ್ಯಾಂತ್. ಜಾಯ್ತ್ಯಾಂನಿ ವಿಲ್ಫಿಯಾಬಾಚ್ಯೆಚ್ ಶಯ್ಲೆರ್ ಪದಾಂ ಘಡುಂಕ್, ಗಾಂವ್ಕ್ ಪ್ರೇತನ್ ಕೆಲ್ಲೆಂಯ್ ಆಸಾ. ಪುಣ್ ಹ್ಯಾ ಪಯ್ಕಿ ಜಾಯ್ತ್ಯಾಂಕ್ ವಿಲ್ಫಿಯಾಬಾಚ್ಯಾ ಲಾಗಿಂ ಸಯ್ತ್ ವಚೊಂಕ್ ಸಾಧ್ ಜಾಲೆಂ ನಾ. ಹೆಂ ಕಿತ್ಯಾಕ್ ಮ್ಹಳ್ಯಾರ್ ವಿಲ್ಫಿಯಾಬಾನ್ ಫಕತ್ ವಯ್ಲ್ಯಾಬಾರ್ ಪದಾಂ ಘಡ್ಲ್ಲಿಂ ನ್ಹಯ್. ತಾಚಿಂ ಪಾಳಾಂ ಮುಳಾಂ ಕಾಳ್ಜಾಂತ್ ಆಸ್ಲ್ಲಿಂ. ವಿಲ್ಫಿಯಾಬಾಭಿತರ್ ಏಕ್ ವರ್ತೊ ಆನಿ ಸಂವೇದನ್ಶೀಳ್ ಸಾಹಿತಿ, ಕವಿ ಆಸ್ಲೊ. ತ್ಯಾ ದೆಕುನ್ ತಾಕಾ ಸಮಾಜ್-ಸಂಸಾರ್ ಎಕೆ ವೆಗ್ಳ್ಯೆಚ್ ದಿಶ್ಟಿನ್ ಪಳೆಂವ್ಕ್ ಆನಿ ತ್ಯಾ ಮಾರಿಫಾತ್ ಅಭಿವೆಕ್ತ್ ಕರುಂಕ್ ಸಾಧ್ ಜಾಲೆಂ. ಅಸಲಿ ಸಂವೇದನಾಶೀಳಾತಾ ಆನಿ ಪ್ರಭುದ್ದ್ ಪಣ್ ಆಸ್ಲ್ಲ್ಯಾಂನ್ಚ್ ತಾಚ್ಯಾ ಉತ್ರಾಂನಿ, ಪದಾಂನಿ ಜೀವ್ ಆಸ್ಲ್ಲೊ. ವಿಲ್ಫಿಯಾಬಾನ್ ಆಪ್ಲೆಂ ಸಂಗೀತ್ ವೆಗ್ಳೆಂ ಆನಿ ಆಪ್ಲಿ ಜಿಣಿ ವೆಗ್ಳಿ ಮ್ಹಣ್ ಚಿಂತುಂಕ್ಚ್ ನಾ. ಜಾಯ್ತ್ಯಾ ತಾಚ್ಯೆ ಜಿಣಿಯೆಂತ್ಲ್ಯಾ ಜಾಯ್ತ್ಯಾ ಘಡಿತಾಂಕ್ಚ್ ಪದಾಂ ಕೆಲ್ಯಾಂತ್. ಕೊಂಕ್ಣೆಂತ್ ಜಾಯ್ತಿಂ ಜಣಾಂ ಸಂಗೀತ್ಗಾರಾಂ ಆಯ್ಲ್ಯಾಂತ್ ಗೆಲ್ಯಾಂತ್. ಥೊಡ್ಯಾಂಕ್ ಏಕ್ ದೋನ್ ವಾ ಪಾಂಚ್ ಕೊವ್ಳ್ಯೊ ಕಾಡ್ತಾನಾಂಚ್ ಆಪ್ಲೆಂ ತಾಲೆಂತ್ ರಿತೆಂ ಜಾಲಾಂ ಮ್ಹಣ್ ಭೊಗ್ಲ್ಲೆಂಯ್ ಆಸಾ. ಜಾಯ್ತ್ಯಾಂಕ್ ಸಂಗೀತಾಚ್ಯೆ ಧಾಂವ್ಣೆಂತ್ ಪುರಾಸಾಣ್ ಭೊಗ್ಲ್ಲಿಯ್ ಆಸಾ. ಪುಣ್ ಚಡುಣೆಂ ಅರ್ಧ್ಯಾ ಶೆಕ್ಡ್ಯಾಪರ್ಯಾಂತ್ ಸಂಗೀತಾಂತ್ ಖಳನಾಸ್ತಾಂ ವಾವುರ್ಚೆಂ, ನವಿಂ ನವಿಂ ಪದಾಂ ಘಡೊನ್ಚ್ ಆಸ್ಚೆಂ, ವಿಲ್ಫಿ ನಾಯ್ಟಿ ಸಾದರ್ ಕರ್ನ್ಚ್ ಆಸ್ಚೆಂ ಮ್ಹಳ್ಯಾರ್ ತಿ ಸಾದಿ ಗಜಾಲ್ ಬಿಲ್ಕುಲ್ ನ್ಹಯ್. ಹಿ continuity ಸಾಂಬಾಳುಂಕ್ ಸಂಗೀತ್ ಆನಿ ಸಾಹಿತ್ಯಾಕ್ ಏಕ್ ಧ್ಯಾನ್ ಮ್ಹಳ್ಳೆಬರಿ ಲೆಕ್ಲ್ಯಾರ್ ಮಾತ್ರ್ ಸಾಧ್. ವಿಲ್ಫಿಯಾಬಾಕ್ ಹೆಂ ಸಾಧ್ ಜಾಲೆಂ ಕಿತ್ಯಾಕ್ ಮ್ಹಳ್ಯಾರ್ ತಾಚ್ಯಾ ತಾಲೆಂತಾಕ್ ಘಟಾಯ್ ಆಸ್ಲ್ಲಿ. ಫಕತ್ ತಾಳೆ ಸೊಭೊಂವ್ಕ್ ತಾಣೆಂ ಉತ್ರಾಂ ಘಡ್ಲ್ಲಿಂ ನ್ಹಯ್ ಬಗಾರ್ ತಾಚ್ಯಾ ಉತ್ರಾಂಪಾಟ್ಲ್ಯಾನ್ ವಿಚಾರ್ ಆಸ್ಲ್ಲೊ, ಕಾವ್ಯೆಂ ಆಸ್ಲ್ಲೆಂ. ತಾಣೆಂ ಸಂಗೀತಾಕ್ಚ್ ಆಪ್ಲೊ ಉಸ್ವಾಸ್ ಕರ್ನ್ ಘೆತ್ಲ್ಲೊ. ವಿಲ್ಫಿಯಾಬಾಚ್ಯಾ ಪದಾಂ ಸಗ್ಳ್ಯಾ ಕೊಂಕ್ಣಿ ಸಮುದಾಯಾಚ್ಯೆ ಸಂಸ್ಕೃತಿಕ್ ಗಿನ್ಯಾನಾಕ್ ಪ್ರತಿನಿಧಿತ್ ಕರ್ತಾತ್ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ದೆಕುನ್ಚ್ ಕೊಣ್ಣಾ ವಿಲ್ಫಿಯಾಬ್ ಅಂತರ್ತನಾ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣಿಂ ವಿಲ್ಫಿಯಾಬಾವಿಶಿಂ ಉಲಯ್ತಾನಾ ತಾಕಾ ಕೊಂಕ್ಣಿ ಸಮಾಜೆಚೊ ಏಕ್ ‘ಚಮತ್ಕಾರಿಕ್ ಅತ್ಮೊ’ ಮ್ಹಣ್ ಆಪಯಿಲ್ಲೆಂ.
ಆಜೂನ್ ವಿಲ್ಫಿಯಾಬಾಚಿಂ ಪದಾಂ ಘರಾಂನಿ ವ್ಹಾಜ್ತಾತ್. ತರ್ನಾಟ್ಯಾಂಮದೆಂ ರೀಲ್ಸಾಂನಿ ಆವಾಜ್ತಾತ್. ಇಗರ್ಜೆಂತ್ ಶೆರ್ಮಾಂವಾವೆಳಿಂ ತಾಚ್ಯಾ ಪದಾಚ್ಯೊ ವೊಳಿ ಉಲ್ಲೇಖ್ ಜಾತಾತ್. ಭಾಷಣಾಂನಿ ತಾಚಿಂ ಉತ್ರಾಂ quote ಜಾತಾತ್. ಮಾಟ್ವಾಂತ್ ಬೆಂಡಾನಾದಾನ್ ಆವಾಜ್ತಾತ್. ಆನಿಕೀ ಚಡ್ ಕರುನ್ ಕೊಂಕ್ಣಿ ಯೇನಾತ್ಲಿಂ ಮನ್ಶ್ಯಾಂ ಸಯ್ತ್ ವಿಲ್ಫಿಯಾಬಾಚಿಂ ‘ಮ್ಹಾಕಾ ನೊವ್ರೊ ಮೆಳ್ಳೊ ಘಾಟಾಗಾರ್’ ತಸಲಿಂ ಪದಾಂ ಆಜೂನ್ ಗಾವುನ್ ಸಂತೊಸ್ ಪಾವ್ತಾತ್. ವಿಲ್ಫಿಯಾಬಾನ್ ಕೊಂಕ್ಣಿ ಸಂಗೀತ್ ಸಂಸಾರಾಚೆರ್ ಘಾಲ್ಲೊ ಪ್ರಭಾವ್ ತಸಲೊ. ಆತಾಂಯ್ ವಿಲ್ಫಿಯಾಬಾಚಿಂ ಪದಾಂ ನಾಂತ್ ತರ್ ಖಂಯ್ಚೊಯ್ ಗಾಯನ್ ಸ್ಪರ್ಧೊ ಅಧುರೊ ಮ್ಹಣ್ ಲೊಕಾಕ್ ಭೊಗುಂಕ್ ಕಾರಣ್ ಹೆಂಚ್.
ಇತ್ಲೆಂ ಸರ್ವ್ ಬರೊಂವ್ಚೆಪಾಟ್ಲ್ಯಾನ್ ಏಕ್ ಸಂತೊಸಾಚಿ ಖಬರ್ ಆಸಾ. ಪಿಳ್ಗೆಥಾವ್ನ್ ಪಿಳ್ಗಿ ಆಯ್ಲ್ಯಾರೀ ಉಬ್ಗೊಣ್ ಭೊಗನಾತ್ಲಿಂ ವಿಲ್ಫಿಯಾಬಾಚಿಂ ಪದಾಂ ಆತಾಂ ಆನ್ಯೇಕ್ ವಿಶೇಸ್ ಆನಿ ತರ್ನಾಟ್ಯೆ ವೆದಿರ್ ಚಡೊಂಕ್ ಆಯ್ತಿಂ ಜಾಲ್ಯಾಂತ್. ತಿ ವೆದಿಚ್ – ಯುವ ವಿಲ್ಫಿ ನಾಯ್ಟ್!

ಕೊಂಕ್ಣಿ ಸಂಗೀತ್ ಸಂಸಾರಾಂತ್ ವಿಲ್ಫಿ ನಾಯ್ಟ್ ಮ್ಹಳ್ಳ್ಯಾ ನಾಂವಾಕ್ ವಿಶೇಸ್ ಮಾನ್ ಆಸಾ. ತ್ಯಾ ನಾಂವಾಭೊಂವ್ತಿಂಚ್ ಏಕ್ ಭಾವನಾತ್ಮಕ್ ಪ್ರಭಾ ಆಸಾ. ಕಿತ್ಲ್ಯಾಗೀ ಸಂಗೀತ್ ಗಾರಾಂಕ್, ಸಂಗೀತ್ ಪ್ರೇಮಿಂಕ್ ಹ್ಯಾ ವಿಲ್ಫಿ ನಾಯ್ಟ್ ಮ್ಹಳ್ಳ್ಯಾ ಝೆಲ್ಯಾನ್ ಗುಂತುನ್ ದವರ್ಲಾಂ. ಕಾಳ್ ಕಿತ್ಲೊ ಧಾಂವ್ಲ್ಯಾರೀ, ಬದಲ್ಲ್ಯಾರೀ ಹ್ಯಾ ವಿಲ್ಫಿಚ್ಯಾ ಪದಾಂಚೊ ಫರ್ಮಳ್ ಉಣೊ ಜಾಂವ್ಕ್ ನಾ. ಅಸಲಿ ವಿಲ್ಫಿಚ್ಯಾ ಪದಾಂಚಿ ಸಾಂಜ್ ಮ್ಹಣ್ಜೆ ವಿಲ್ಫಿನಾಯ್ಟ್ ಆತಾಂಚ್ಯಾ ಕಾಳಾಕ್ ಸರಿ ಜಾವ್ನ್ ಆತಾಂಚ್ಯೆ ಪಿಳ್ಗೆಚ್ಯಾ ತಾಳ್ಯಾನ್ ನವ್ಯಾನ್ ಶಿರ್ವಾಂತ್ ಸಾದರ್ ಜಾಂವ್ಚ್ಯಾರ್ ಆಸಾ.
ಹ್ಯಾಚ್ ಡಿಸೆಂಬರ್ 19 ತಾರಿಕೆರ್ ಶಿರ್ವಾಂತ್ ಜಾಯೊ ವಿಲೇಜ್ ಗ್ರೀನ್ಸ್, ಹಾಂಗಾಸರ್ ಯುವ ವಿಲ್ಫಿ ನಾಯ್ಟ್ ಸಾದರ್ ಜಾತೆಲಿ. ವಿಲ್ಫಿಚಿಂ ಭಾಂಗ್ರಾಳಿಂ ಉತ್ರಾಂ ಆನಿ ಆತಾಂಚ್ಯೆ ಪಿಳ್ಗೆಚೆ ಮಧುರ್ ತಾಳೆ ಸಾಂಗಾತಾ ಮೆಳ್ಚ್ಯಾ ಅಪ್ರೂಪ್ ಘಡಿಯೆಂಕ್ ಹಿ ಯುವ ವಿಲ್ಫಿ ನಾಯ್ಟ್ ಸಾಕ್ಸ್ ಜಾತೆಲಿ. ವಿಲ್ಫಿಚ್ಯಾ ಪದಾಂಕ್ ವಿಶೇಸ್ ಥರಾನ್ ಸುಂರ್ಗಾರಾಂವ್ಕ್ ಆತಾಂಚ್ಯಾ ಝೆನ್ ಝಿ ಪಿಳ್ಗೆಚೆ ತಾಳೆ ಆಯ್ತೆ ಜಾಲ್ಯಾತ್. ವಿಲ್ಫಿಚಿಂ ಪದಾಂ ನವ್ಯಾಚ್ ಆನಿ ತಾಜಾ ತಾಳ್ಯಾಂನಿ ಆಯ್ಜ್ಕೊಂವ್ಚೆಂ ಭಾಗ್ ಆಮ್ಚೆಂ. ಇತ್ಲೆಂಚ್ ನ್ಹಯ್ ವಿಲ್ಫಿಯಾಬಾಚೊ ನಾತು ರೋಜರ್ ರೆಬಿಂಬಸ್ ಹಾಂಚ್ಯಾ ಮುಕೇಲ್ಪಣಾರ್ ಝೆನ್ ಆಲ್ಫಾ ತಾಲೆಂತಾಂ ಸಯ್ತ್ ಹ್ಯೆ ಸಾಂಜೆಕ್ ವಿಶೇಸ್ ರಂಗ್ ದಿತೆಲಿಂ. ಹ್ಯಾ ನವ್ಯಾ ತಾಳ್ಯಾಂಮದೆಂ ಕೊಂಕಣ್ ಮೈನಾ ಮೀನಾ ರೆಬಿಂಬಸ್ ಆನಿ ಬಾ। ಡೆನಿಸ್ ಡೆಸಾ ಹ್ಯಾ ಕಾರ್ಯಾಂತ್ ಆಸೊನ್ ಆದ್ಲ್ಯೊ ಭಾಂಗ್ರಾಳ್ಯೊ ಯಾದಿ ಆಮ್ಚೆಮಧೆಂ ವಾಂಟುನ್ ಘೆತೆಲಿಂ. ಕೊಂಕ್ಣಿ ಸಂಗೀತ್ ಪ್ರೇಮಿಂಚ್ಯಾ ಉಡಾಸಾಚ್ಯಾ ಬುಂಯಾಂವಾಕ್ ನವಿಚ್ ರೂಚ್ ಲಾಬ್ತೆಲಿ. ಆಮ್ಚೆಮದ್ಲೆಂ ಆಪುರ್ಬಾಯೆಚೆಂ ತಾಲೆಂತ್ ಜೆನಿಶಾ ಜೆರ್ನಿಶ್ ಹೆಂ ಕಾರ್ಯೆಂ ಚಲೊವ್ನ್ ವ್ಹರ್ತೆಲಿ.
ಪೇಸ್ ಮೀಡಿಯಾ ಆನಿ ರೊನ್ ಲಿನ್ ಮಿನೆಜ್ ಫೌಂಡೇಶನ್ ಶಿರ್ವಾಂ ಹಾಂಚ್ಯಾ ಜೋಡ್ ಆಸ್ರ್ಯಾಖಾಲ್ ಚಲ್ಚಿ ಹಿ ಯುವ ವಿಲ್ಫಿ ನಾಯ್ಟ್ ಸಮುದಾಯಾಚ್ಯಾ ಗರ್ಜಾಂಖಾತಿರ್ ಆನಿ ‘ಪ್ರೋಜೆಕ್ಟ್ ನಜ್ರೆತ್ ನೆಸ್ಟ್’ ನಾಂವಾಖಾಲ್ ಗರ್ಜೆವಂತಾಂಕ್ ಘರಾಂ ಬಾಂದುನ್ ದಿಂವ್ಚ್ಯಾ ಸಮಾಜಿಕ್ ಉದ್ದೇಶಾಖಾತಿರ್ ವಾವುರ್ತೆಲಿ.


ರೊನ್ ಲಿನ್ ಮಿನೇಜ್ ಶಿರ್ವಾಂ ಫೌಂಡೇಶನ್ ಎದೊಳ್ಚ್ ಜಾಯ್ತ್ಯಾ ಗರ್ಜೆವಂತಾಂಕ್ ಬಿಡಾರ್, ಶಿಕಪ್ ಆನಿ ಭಲಾಯ್ಕೆಂತ್ ಆಧಾರ್ ಜಾಲಾಂ. ಪ್ರಸ್ತುತ್ ‘ಪ್ರೊಜೆಕ್ಟ್ ನಜರೆತ್ ನೆಸ್ಟ್’ ನಾಂವಾಖಾಲ್ ಎದೊಳ್ಚ್ ಉದ್ಕಾವೆವಸ್ಥಾ ಆಸ್ಚೊ ಜಾಗೊ ಘೆವ್ನ್ ಜಾಲಾ ಆನಿ ಘರಾಂ ಬಾಂದ್ಚೆಂ ಕಾಮ್ ಸುರ್ವಾತ್ಲಾಂ. ಯೇಂವ್ಕ್ ಆಸ್ಚ್ಯಾ ಯುವ ವಿಲ್ಫಿ ನಾಯ್ಟ್ ಕಾರ್ಯಾಪಯ್ಲೆಂಚ್ ಹೆಂ ಕಾಮ್ ಸಂಪೊವ್ನ್ ಗರ್ಜೆವ್ಂತಾಂಕ್ ಹಾತಾಂತರ್ ಕರ್ಚಿ ಆಶಾ ಹ್ಯಾ ಕಾರ್ಬಾರ್ಯಾಂಚಿಂ.
ಕೊಂಕ್ಣಿ ಸಂಗೀತ್ ಪ್ರೇಮಿಂಥಾವ್ನ್ ಹ್ಯಾ ಕಾರ್ಯಾಕ್ ಆಪುರ್ಬಾಯೆಚೊ ಪ್ರೋತ್ಸವ್ ಲಾಬ್ಲಾ ಆಸೊನ್, ಎದೊಳ್ಚ್ ಟಿಕೆಟ್ಯೊ ವಿಕುನ್ ಗೆಲ್ಯಾತ್ ಆನಿ ಕಾರ್ಯೆಂ ಹೌಸ್ ಫುಲ್ ಜಾಲಾಂ. ಹ್ಯಾ ಕಾರ್ಯಾಕ್ ಪಾಟಿಂಬೊ ಜಾಂವ್ಚೆಖಾತಿರ್ ಲಕ್ಕಿಡಿಪ್ ಸಯ್ತ್ ಆಸಾ ಕೆಲಾಂ. ಎಕೆ ಟಿಕೆಟಿಚೆಂ ಮೋಲ್ 500 ರುಪಯ್ ಆನಿ ಜಿಕ್ಲಲ್ಯಾಂಕ್ ರು 1 ಲಾಖ್ ರುಪಯಾಂಚೊ ಫೆರ್ಗೊ ಲಾಬ್ತೊಲೊ. ಕಾರ್ಯಾಚ್ಯೊ ಟಿಕೆಟಿ ಎದೊಳ್ಚ್ ವಿಕುನ್ ಗೆಲ್ಯಾರೀ ಹ್ಯಾ ಕಾರ್ಯಾಕ್ ಪಾಟಿಂಬೊ ದೀಂವ್ಕ್ ಆಶೆತಲ್ಯಾಂನಿ ಲಕ್ಕ್ ಡಿಪ್ ಕೂಪನ್ ಕಾಡ್ಚೆಮಾರಿಫಾತ್ ಆಧಾರ್ ಜಾವ್ಯೆತ್ ಆನಿ ಆಪ್ಲ್ಯಾ ಮಿಸಾಂವಾಂತ್ ವಾಂಟೆಲಿ ಜಾವ್ಯೆತ್ ಅಶೆಂ ಕಾರ್ಬಾರ್ಯಾಂನಿ ಕಳಯ್ಲಾಂ.
“ಹ್ಯಾ ಯುವ ವಿಲ್ಫಿ ನಾಯ್ಟಾಕ್ ಕೊಂಕ್ಣಿ ಸಂಗೀತ್ ಪ್ರೇಮಿಂನಿ ದಾಕಯಿಲ್ಲೊ ಮೋಗ್ ಆನಿ ಪ್ರೋತ್ಸಾವ್ ಪಳೆವ್ನ್ ಬೊವ್ ಚಡ್ ಸಂತೊಸ್ ಜಾಲಾ. ಕಾರ್ಯಾಚ್ಯಾ ಮ್ಹಯ್ನ್ಯಾಂಪಯ್ಲೆಂಚ್ ಪೂರಾಯ್ ಟಿಕೆಟ್ಯೊ ವಿಕುನ್ ಕಾರ್ಯೆಂ ಹೌಸ್ ಫುಲ್ ಜಾಲಾಂ. ಹೆಂ ಆಮಿ ಚಿಂತುಂಕ್ಚ್ ನಾತ್ಲೆಂ. ಲೊಕಾನ್ ದಾಕಯಿಲ್ಲ್ಯಾ ಹ್ಯಾ ಮೊಗಾವರ್ವಿಂ ಆಮ್ಚಿ ಜವಾಬ್ದಾರಿ ಆನಿಕೀ ಚಡ್ಲ್ಯಾ. ಸಂಗೀತ್ ಪ್ರೇಮಿ ಕಿತೆಂ ಆಶೆತಾತ್ ತಾಚ್ಯಾಕೀ ವರ್ತ್ಯಾ ನ್ ದೀಂವ್ಕ್ ಆಮಿ ವಾವ್ರ್ ಕರ್ತೇ ಆಸಾಂವ್” ಅಶೆಂ ಮ್ಹಣ್ತಾ ಹ್ಯಾ ಪಂಗ್ಡಾಚ್ಯಾ ತಾಂಡೆಲ್ಯಾಂಪಯ್ಕಿ ಎಕ್ಲೊ ಜಾವ್ನ್ ಆಸ್ಚೊ ರೋಶನ್ ಮಿನೇಜ್ ಶಿರ್ವಾಂ.
ಹ್ಯಾ ಕಾರ್ಯಾಕ್ ಪಾಟಿಂಬೊ ದಿಲ್ಲ್ಯಾ ಸರ್ವಾಂಕ್, ಮ್ಹಣ್ಜೆ ಲಕ್ಕಿ ಡಿಪ್ ಘೆವ್ನ್ ಪ್ರೋತ್ಸಾವ್ ದಿಲ್ಲ್ಯಾಂಕ್ ಆನಿ ಗಲ್ಫಾಚ್ಯಾ ರೆಂವೆರ್ ಝುಜಾಚಿ ಸಾವ್ಳಿ ಆಸ್ತಾನಾಂಯ್ ಗಾಂವಾಂತ್ ಜಾಂವ್ಚ್ಯಾ ಹ್ಯಾ ಯುವ ವಿಲ್ಫಿ ನಾಯ್ಟಾಕ್ ಆಧಾರಾಚೊ ದಿವೊ ದಿಲ್ಲ್ಯಾಂಚೊ ಉಪ್ಕಾರ್ ಬಾವ್ಡುಂಕ್ ತೊ ವಿಸ್ರೊಂಕ್ ನಾ.
ರೊನ್ ಲಿನ್ ಮಿನೇಜ್ ಫೌಂಡೇಶನ್ ಶಿರ್ವಾಂ ಹಾಣಿಂ ಸಮುದಾಯಾಚ್ಯಾ ಗರ್ಜಾಂಖಾತಿರ್ ಕರ್ಚೊ ವಾವ್ರ್ ವರ್ತೊ. ತಾಂಚಿಂ ಸರ್ವ್ ಸಪ್ಣಾಂ ಜ್ಯಾರಿ ಜಾಂವ್ . ಹ್ಯಾ ಸರ್ವಾಂಕ್ ಆಧಾರ್ ಜಾವ್ನ್ ಡಿಸೆಂಬರಾಚ್ಯಾ 19 ತಾರಿಕೆರ್ ಶಿರ್ವಾಂತ್ ಚಲ್ಚ್ಯೆ ಯುವ ವಿಲ್ಫಿ ನಾಯ್ಟಾಥಾವ್ನ್ ಕೊಂಕ್ಣಿ ಸಂಗೀತ್ ಪ್ರೇಮಿಂಚಿಂ ಕಾಳ್ಜಾಂ ಆನಿಕೀ ತರ್ನಾಟಿಂ ಜಾಂವ್!
■ ವಿಲ್ಸನ್ ಕಟೀಲ್
